“23. Pagpaambit sang Ebanghelyo kag Pagpabakod sang Bag-o kag Nagabalik nga mga Miyembro,” Mga Pinili nga Bahin halin sa Libro sang Pangkabilogan nga Pagsulundan (2023).
“23. Pagpaambit sang Ebanghelyo kag Pagpabakod sang Bag-o kag Nagabalik nga mga Miyembro,” Mga Pinili nga Bahin halin sa Libro sang Pangkabilogan nga Pagsulundan.
23.
Pagpaambit sang Ebanghelyo kag Pagpabakod sang Bag-o kag Nagabalik nga mga Miyembro
23.0
Introduksyon
Ang pag-imbitar sa tanan nga magbaton sang ebanghelyo kabahin sang buluhaton sang kaluwasan kag pangkahitaasan (tan-awa sa 1.2 sining libro; Mateo 28:19–20). Sakop sini ang:
-
Pagpartisipar sa pangmisyonaryo nga buluhaton kag pagserbisyo bilang mga misyonero.
-
Pagbulig sang bag-o kag nagabalik nga mga miyembro sang Simbahan nga magprogreso sa dalan sang kasugtanan.
23.1
Magpaambit sang Ebanghelyo
23.1.1
Magpalangga
Isa ka paagi nga ginapakita naton ang aton pagpalangga sa Dios amo ang pagpalangga kag pagserbisyo sa Iya mga anak (tan-awa sa Mateo 22:36–39; 25:40). Ginatinguhaan naton nga magpalangga kag magserbisyo pareho sa ginhimo ni Jesucristo. Ini nga pagpalangga nagainspirar sa aton nga lab-uton ang mga tawo halin sa tanan nga relihiyon, rasa, kag kultura (tan-awa sa Mga Binuhatan 10:34; 2 Nefi 26:33).
23.1.2
Magpaambit
Tungod palangga naton ang Dios kag ang Iya mga anak, natural nga gusto naton nga ipaambit ang mga bugay nga Iya ginhatag sa aton (tan-awa sa Juan 13:34–35) kag magbulig sa pagtipon sang Israel. Ginatinguhaan naton nga buligan ang mga tawo nga mabatyagan ang kalipay nga aton nabatyagan (tan-awa sa Alma 36:24). Bukas kita nga nagahambal parte sa Manluluwas kag sa Iya impluwensya sa aton mga kabuhi (tan-awa sa Doktrina kag mga Kasugtanan 60:2). Ginapaambit naton ining mga butang sa normal kag natural nga mga paagi bilang bahin sang personal, online, kag iban pa nga mga inter-aksyon.
23.1.3
Mag-imbitar
Nagapangamuyo kita para makabaton sang inspirasyon kag giya kon paano hagaron ang iban nga:
-
Magkadto kag magtan-aw sang mga bugay nga mabaton nila paagi kay Jesucristo, sa Iya ebanghelyo, kag sa Iya Simbahan (tan-awa sa Juan 1:37–39, 45–46).
-
Magkadto kag buligan kita nga magserbisyo sa mga tawo nga nagakinahanglan.
-
Magkadto kag mangin parte sang ginpanumbalik nga Simbahan ni Jesucristo.
Kasami, ang pag-imbitar nagakahulugan lamang sang pagdala sang aton pamilya, mga abyan, kag mga kasilingan sa mga ginahimo na naton ngadaan.
23.2
Pabakura ang Bag-o nga mga Miyembro
Ang kada bag-o nga miyembro nagakinahanglan sang abyan, mga oportunidad nga magserbisyo, kag espirituhanon nga pagsagod. Bilang mga miyembro sang Simbahan, ginahatagan naton ang bag-o nga mga miyembro sang aton pagpalangga kag suporta (tan-awa sa Mosias 18:8–10). Ginabuligan naton sila nga makabatyag nga parte sila sang Simbahan. Ginabuligan naton sila nga mag-abante sa dalan sang kasugtanan kag mangin mas “nahaylo sa Ginuo” (Alma 23:6).
23.3
Pabakura ang Nagabalik nga mga Miyembro
May mga miyembro nga nagapili nga mag-untat sa pagpartisipar sa Simbahan. “Sa mga subong nila,” siling sang Manluluwas, “magapadayon kamo sa pag-alagad; kay wala kamo makapakot nga basi magabalik sila kag magahinulsol, kag magakari sa akon nga may bug-os nga katuyuan sang tagipusuon, kag paayuhon ko sila; kag kamo ang mangin paagi sa pagdala sang kaluwasan sa ila.” (3 Nefi 18:32).
Ang mga miyembro nga wala kaayo nagapartisipar laban-laban nga magbalik kon may mabakod sila nga mga kaangtanan sa mga miyembro sang Simbahan. Pareho sa bag-o nga mga miyembro, kinahanglan nila sang abyan, mga oportunidad nga magserbisyo, kag espirituhanon nga pagsagod.
23.4
Mga Lider sang Stake
23.4.1
Stake Presidency
Ang stake president ang nagakapot sang mga yabi sa stake sa pagpaambit sang ebanghelyo kag pagpabakod sang bag-o kag nagabalik nga mga miyembro. Sia kag ang iya mga manuglaygay ang nagahatag sang kabilogan nga direksyon sa sini nga mga pagpaninguha.
Masami kada bulan, ang stake president nagapakigkita sa mission president para ipakig-angot ang mga pagpaninguha sang stake kag mga lider sang ward kag sang full-time nga mga misyonero.
23.4.3
Mga Miyembro sang High Council
Ang stake presidency pwede nga mag-asayn sang mga miyembro sang high council nga maghatag instruksyon kag suporta sa mga pangulohan sang elders quorum kag mga ward mission leader. Isa ukon mas madamo nga mga miyembro sang high council ang pwede i-asayn sa pagpanguna sa sining mga pagpaninguha. Pero, ang tanan nga miyembro sang high council ang may responsibilidad sini sa mga ward kag korum nga gin-asaynan sa ila.
23.4.4
Stake Relief Society Presidency
Sa direksyon sang stake president, ang stake Relief Society presidency nagahatag sang instruksyon kag suporta sa mga pangulohan sang Relief Society sa ward sa ila mga responsibilidad sa pagpaambit sang ebanghelyo kag pagpabakod sang bag-o kag nagabalik nga mga miyembro.
23.5
Mga Lider sa Ward
23.5.1
Bishopric
Nagapakig-angot ang bishopric sa mga pangulohan sang elders quorum kag Relief Society samtang ginapangunahan nila ang pagpaninguha sang ward sa pagpaambit sang ebanghelyo kag pagpabakod sang bag-o kag nagabalik nga mga miyembro. Ini nga mga lider regular nga nagakonsultahanay.
Ginasiguro sang bishopric nga ining mga pagpaninguha ginahambalan kag ginapakig-angot sa ward council kag sa mga miting sang ward youth council.
Ginainterbyu sang bishop ang bag-o nga mga miyembro nga ara na sa husto nga edad sa pagbaton sang temple recommend para maghikot sang proxy nga mga bunyag kag kumpirmasyon (tan-awa sa 26.4.2). Ginainterbyu man niya ang mga lalaki nga ara na sa husto nga edad sa pagbaton sang Aaronic Priesthood. Kinaandan niya nga ginahiwat ining mga interbyu sa sulod sang semana nga ginkumpirma ang miyembro.
23.5.2
Mga Presidency sang Elders Quorum kag Relief Society
Ang mga pangulohan sang elders quorum kag Relief Society ang nagapanguna sa adlaw-adlaw nga pagpaninguha sang ward sa pagpaambit sang ebanghelyo kag pagpabakod sang bag-o kag nagabalik nga mga miyembro (tan-awa sa 8.2.3 kag 9.2.3).
Ining mga lider may masunod nga mga responsibilidad:
-
Magbulig sa pag-inspirar sang mga miyembro nga palanggaon ang mga anak sang Dios, nga ipaambit ang ebanghelyo, kag hagaron ang iban nga batunon ang mga bugay sang Manluluwas.
-
Mag-asayn sang mga ministering brother kag sister sa bag-o kag nagabalik nga mga miyembro (tan-awa sa 21.2.1).
-
Magpanguna sa buluhaton sang ward mission leader.
Ang elders quorum president kag Relief Society president nagaasayn sang isa ka miyembro sang pangulohan nga magbulig sa pagpanguna sining mga pagpaninguha. Ining duha ka miyembro sang pangulohan nagabuligay. Nagaentra sila sa semanal nga mga coordination meeting (tan-awa sa 23.5.7).
23.5.3
Ward Mission Leader
Ginakonsulta sang bishopric ang stake president para hibaluon kon bala magtawag sang ward mission leader. Ini nga tawo dapat nagakapot sang Melchizedek Priesthood. Kon wala sang gintawag sa sini nga pwesto, isa ka miyembro sang pangulohan sang elders quorum ang nagahimo sining buluhaton.
Ang ward mission leader nagasuporta sa pangulohan sang elders quorum kag Relief Society sa ila pangmisyonaryo nga mga responsibilidad. Iya man ining masunod nga mga responsibilidad:
-
Magpakig-angot sang buluhaton sang mga miyembro kag lider sang ward, mga ward missionary, kag full-time nga mga misyonero.
-
Magpanguna sa semanal nga mga coordination meeting (tan-awa sa 23.5.7).
23.5.4
Mga Ward Missionary
Ang mga ward missionary nagabulig sa mga miyembro nga maeksperiyensyahan ang kalipay sang pagpaambit sang ebanghelyo nga ginlaragway sa 23.1. Nagaalagad sila sa direksyon sang ward mission leader ukon sang miyembro sang pangulohan sang elders quorum nga may amo sini nga tulumanon.
23.5.5
Ward Council kag Ward Youth Council
Ang pagpaambit sang ebanghelyo kag pagpabakod sang bag-o kag nagabalik nga mga miyembro dapat nga ginahambalan sing regular sa mga miting sang ward council. Pwede nga agdahon sang bishop ang ward mission leader nga mag-entra sa mga miting sang ward council.
Ang mga pormas pareho sang masunod makabulig sa sining mga diskusyon:
Sa paghinambalanay parte sa mga panginahanglan sang mga lamharon sa ward, ginahatagan sang espesyal nga atensyon sang ward youth council ang bag-o kag nagabalik nga mga miyembro kag ang mga lamharon nga ginatudloan sang mga misyonero.
23.5.7
Mga Coordination Meeting
Kada semana, ginahiwat ang malip-ot kag indi pormal nga mga miting para hambalan ang mga pagpaninguha sa pagpaambit sang ebanghelyo kag pagpabakod sang bag-o kag nagabalik nga mga miyembro. Kon may gintawag nga ward mission leader, sia ang nagapamuno sining mga miting. Kon wala, ang miyembro sang pangulohan sang elders quorum nga may amo sini nga tulumanon ang nagapamuno.
Dala sa iban nga ginaagda ang:
-
Naasayn sa sining tulumanon nga mga miyembro sang mga pangulohan sang Relief Society kag elders quorum.
-
Mga ward missionary.
-
Ang assistant sang priests quorum (ukon ang teachers ukon deacons quorum president kon wala sang mga priest sa ward).
-
Miyembro sang pangulohan sang pinakamagulang nga klase sang Young Women.
-
Full-time nga mga misyonero.
