tattao a kumitkita iti telepono

23.

Panangibinglay iti Ebanghelio ken Panangpapigsa kadagiti Baro ken Agsubsubli a Miembro

23.0

Pakauna

Ti panangawis kadagiti amin nga umawat iti ebanghelio ket paset ti aramid ti pannakaisalakan ken pannakaitan-ok (kitaen iti 1.2 iti daytoy a handbook; Mateo 28:19–20). Iramanna ti:

• Pannakiraman iti aramid a misionario ken panagserbi kas misionario.

• Panangtulong kadagiti baro ken agsubsublin a miembro [returning members] iti Simbaan iti panagdur-asda iti dana ti katulagan [covenant path].

23.1

Ibinglay ti Ebanghelio

23.1.1

Agayat

Maysa a wagas a pangipakitaantayo iti ayattayo iti Dios ket babaen ti panagayat ken panagserbi kadagiti annakna (kitaen iti Mateo 22:36–39; 25:40). Ikarigatantayo ti agayat ken agserbi a kas iti inaramid ni Jesucristo. Daytoy nga ayat ti mangparegta kadatayo a mangtulong kadagiti tao iti amin a relihion, puli, ken kultura (kitaen iti Dagiti Aramid 10:34; 2 Nephi 26:33).

23.1.2

Agibinglay

Gapu ta ay-ayatentayo ti Dios ken dagiti annakna, gagangay a kayattayo nga ibinglay dagiti bendision nga intedna kadatayo (kitaen iti Juan 13:34–35) ken tumulongtayo a mangummong iti Israel. Ikalikagumtayo a tulongan dagiti tao a makarikna iti rag-o a mariknatayo (kitaen iti Alma 36:24). Sipapanayag nga agsaotayo maipapan iti Mangisalakan ken ti impluensiana iti biagtayo (kitaen iti Doktrina ken Katulagan 60:2). Ibinglaytayo dagitoy a banag iti normal ken natural a wagas kas paset ti personal, online, ken dadduma pay a pannakilangen.

23.1.3

Agawis

Ikararagantayo ti inspirasion ken panangiwanwan no kasano nga awisen dagiti dadduma nga:

• Umay ket kitaen dagiti bendision a magun-od babaen ken ni Jesucristo, ti ebangheliona, ken ti Simbaanna (kitaen iti Juan 1:37–39, 45–46).

• Umay ket tulongandakami nga agserbi kadagiti tao nga agkasapulan.

• Umay ket agkameng iti naisubli Simbaan ni Jesucristo.

Masansan a ti panangawis kaipapananna laeng ti panangiraman iti pamilia, gagayyem, ken kaarrubatayo iti ar-aramidentayon.

23.2

Panangpapigsa kadagiti Baro a Miembro

Kasapulan ti tunggal baro a miembro ti pannakigayyem, gundaway nga agserbi, ken naespirituan a pannakataraon. Kas miembro ti Simbaan, itedtayo kadagiti baro a miembro ti panagayat ken suportatayo (kitaen iti Mosiah 18:8–10). Tulongantayo ida a makarikna iti kaipapanan ti pannakaikameng iti Simbaan. Tulongantayo ida nga agprogreso iti dana ti katulagan ken agbalin nga ad-adda a “mapasurot iti Apo” (kitaen iti (Alma 23:6).

23.3

Panangpapigsa kadagiti Agsubsubli a Miembro

Pilien ti sumagmamano a miembro ti mangisardeng iti pannakiraman iti Simbaan. “Gapu iti kasta,” kinuna ti Mangisalakan, “agtultuloykayo nga agpaay; gapu ta saanyo nga ammo no kaano ti isusubli ken panagbabawida, ket umayda kaniak nga addaan iti naan-anay a panggep iti pusoda, ket agasakto ida; ket dakayonto ti puon ti pannakayasidegda iti pannakaisalakan” (3 Nephi 18:32).

Dagiti miembro a saan a naan-anay a makiramraman ket ad-adda a makasubli no addaanda iti natibker a relasion kadagiti miembro ti Simbaan. Kas kadagiti baro a miembro, kasapulanda ti pannakigayyem, gundaway nga agserbi, ken naespirituan a pannakataraon.

23.4

Dagiti Lider ti Stake

23.4.1

Panguluen ti Stake

Iggem ti stake president dagiti tulbek iti stake para iti panangibinglay iti ebanghelio ken panangpapigsa kadagiti baro ken agsubsubli a miembro. Isu ken dagiti mamagbagana ti mangted iti pakabuklan a panangiturong kadagitoy a panagkagumaan.

Gagangay a binulan, makipagkita ti stake president iti mission president tapno makikoordinar kadagiti panagkagumaan iti nagbaetan dagiti lider ti stake ken ward ken dagiti full-time missionary.

23.4.3

Dagiti Nangato a Konsehal

Mabalin a dutokan ti panguluen ti stake dagiti nangato a konsehal a mangisuro ken mangsuporta kadagiti panguluen ti korum dagiti elder ken dagiti mission leader ti ward. Maysa wenno ad-adu pay a nangato a konsehal ti mabalin a dutokan a mangidaulo kadagitoy a panagkagumaan. Nupay kasta, addaan ti amin a nangato a konsehal kadagitoy a pagrebbengan para kadagiti ward ken korum a nakadutokanda.

23.4.4

Panguluen ti Relief Society iti Stake

Iti babaen ti panangiturong ti stake president, suruan ken suportaran ti panguluen ti Relief Society iti stake dagiti panguluen ti Relief Society iti ward kadagiti pagrebbenganda iti panangibinglay iti ebanghelio ken panangpapigsa kadagiti baro ken agsubsubli a miembro.

23.5

Dagiti Lider ti Ward

23.5.1

Bishopric

Makitunos ti bishopric kadagiti panguluen ti korum dagiti elder ken Relief Society bayat ti panangidauloda kadagiti panagkagumaan ti ward iti panangibinglay iti ebanghelio ken panangpapigsa kadagiti baro ken agsubsubli a miembro. Masansan nga agiinnuman dagitoy a lider.

Siguraduen ti bishopric a mapagsasaritaan ken maitunos dagitoy a panagkagumaan kadagiti miting ti konseho iti ward ken konseho dagiti agtutubo iti ward.

Interbyuen ti bishop dagiti baro a miembro iti maitutop nga edad para iti temple recommend tapno mangannong kadagiti panagbuniag babaen ti proxy ken kumpirmasion (kitaen iti 26.4.2). Interbyuenna pay dagiti kakabsat a lallaki iti maitutop nga edad tapno umawat iti Aaronic Priesthood. Gagangay nga aramidenna dagitoy nga interbyu iti uneg ti makalawas manipud iti kumpirmasion ti miembro.

23.5.2

Dagiti Panguluen ti Korum dagiti Elder ken Relief Society

Dagiti panguluen ti korum dagiti elder ken Relief Society ti mangidaulo kadagiti inaldaw a panagkagumaan ti ward iti panangibinglay iti ebanghelio ken panangpapigsa kadagiti baro ken agsubsubli a miembro (kitaen iti 8.2.3 ken 9.2.3).

Addaan dagitoy a lider kadagiti sumaganad a pagrebbengan:

• Tumulong a mangparegta kadagiti miembro a mangipateg kadagiti annak ti Dios, mangibinglay iti ebanghelio, ken mangawis kadagiti dadduma nga umawat kadagiti bendision ti Mangisalakan

• Mangdutok kadagiti ministering brother ken sister kadagiti baro ken agsubsubli a miembro (kitaen iti 21.2.1).

• Mangidaulo iti aramid ti lider ti mision ti ward.

Ti presidente ti korum dagiti elder ken presidente ti Relief Society ti mangdutok iti maysa a miembro ti panguluen a tumulong a mangidaulo kadagitoy a panagkagumaan. Agtinnulong nga agtrabaho dagitoy dua a miembro ti panguluen. Linawas a dar-ayanda dagiti coordination meeting (kitaen iti 23.5.7).

23.5.3

Ward Mission Leader

Makiuman ti bishopric iti stake president tapno maikeddeng no umawag iti lider ti mision ti ward. Nasken a maysa a Melchizedek Priesthood holder daytoy a tao. No saan a maawagan daytoy a lider, maysa a miembro ti panguluen ti korum dagiti elder ti mangpunno iti daytoy nga akem.

Ti ward mission leader ti mangsuporta iti panguluen ti korum dagiti elder ken ti panguluen ti Relief Society kadagiti pagrebbenganda kas misionario. Addaan pay kadagiti sumaganad a pagrebbengan:

• Mangitunos iti aramid dagiti miembro ken lider ti ward, misionario ti ward, ken dagiti full-time a misionario.

• Linawas a mangidaulo kadagiti coordination meeting (kitaen iti 23.5.7).

23.5.4

Dagiti Misionario iti Ward

Tulongan dagiti misionario ti ward dagiti miembro ti ward a mangpadas iti rag-o iti panangibinglay iti ebanghelio kas nailadawan iti 23.1. Agserbida iti babaen ti panangiturong ti lider ti mision ti ward wenno ti miembro ti panguluen ti korum dagiti elder a mangpunno iti daytoy nga akem.

23.5.5

Konseho iti Ward ken Konseho dagiti Agtutubo iti Ward

Ti panangibinglay iti ebanghelio ken panangpapigsa kadagiti baro ken agsubsubli a miembro ket nasken a regular a mapagsasaritaan kadagiti miting ti konseho ti ward. Mabalin nga awisen ti bishop ti ward mission leader tapno dumar-ay kadagiti miting ti konseho ti ward.

Dagiti porma kas iti sumaganad ti makatulong kadagitoy a panaglilinnawag.

• Missionary Progress Record.

• New and Returning Member Progress.

Iti panaglilinnawag kadagiti kasapulan dagiti agtutubo iti ward, mangted ti konseho dagiti agtutubo ti ward iti naisangsangayan nga atension kadagiti baro ken agsubsubli a miembro ken kadagiti agtutubo a sursuruan dagiti misionario.

23.5.7

Dagiti Miting iti Panagtutunos [Coordination Meeting]

Tunggal lawas, maangay dagiti ababa nga impormal a miting tapno mangitunos kadagiti panagkagumaan a mangibinglay iti ebanghelio ken mangpapigsa kadagiti baro ken agsubsubli a miembro. No maawagan ti maysa a lider ti mision ti ward, isu ti mangiturong kadagitoy a miting. No saan, iturong ti miembro ti panguluen ti korum dagiti elder a mangpunno iti daytoy nga akem.

Dagiti dadduma pay a maawis iramanna:

• Dagiti naidutok a miembro dagiti panguluen ti Relief Society ken korum dagiti elder.

• Dagiti misionario iti ward

• Maysa nga assistant iti korum dagiti priest (wenno ti presidente ti korum dagiti teacher wenno ti presidente ti kurom dagiti deacon no awan dagiti priest iti ward).

• Maysa a miembro ti panguluen ti klase ti oldest Young Women.

• Dagiti full-time a misionario.