“24. Fakaongoongoleleí mo e Ngāue Fakafaifekaú,” Ngaahi Konga naʻe Filifili mei he Tohi Tuʻutuʻuni Fakakātoá (2023).
“24. Fakaongoongoleleí mo e Ngāue Fakafaifekaú,” Ngaahi Konga naʻe Filifili mei he Tohi Tuʻutuʻuni Fakakātoá.
24.
Fakaongoongoleleí mo e Ngāue Fakafaifekaú
24.0
Talateú
ʻI he kuonga muʻá, naʻe foaki mai ʻe he ʻEikí ʻa e fekau ke tānaki fakataha ʻa ʻIsileli ʻi he “ngaahi puleʻanga kotoa pē, ʻo papitaiso ʻa kinautolu ʻi he huafa ʻo e Tamaí, mo e ʻAló, mo e Laumālie Māʻoniʻoní” (Mātiu 28:19; vakai foki, veesi 20). Kuo fakafoʻou ʻe he ʻEikí ʻa e fekau ko iá ʻi he ngaahi ʻaho kimui ní (vakai, Tokāteline mo e Ngaahi Fuakava 39:11; 68:6–8; 112:28–30).
Ko ha faingamālie toputapu ke ngāue maʻá e ʻEikí ko ha faifekau. ʻOkú ne ʻomi e ngaahi tāpuaki taʻengatá ki he tokotaha ko iá mo kinautolu ʻokú ne tokoniʻí (vakai, Tokāteline mo e Ngaahi Fuakava 18:14–16).
ʻOku kole ʻe he ʻEikí ki he talavou moʻui taau kotoa ʻe malavá ke teuteu ke ngāue fakafaifekau.
ʻOku talitali lelei foki ʻe he ʻEikí ʻa e kau finemui moʻui taau mo malavá ke ngāue fakafaifekau kapau ʻoku nau fie fakahoko ia.
ʻOku toe fiemaʻu foki mo e kau faifekau ʻosi malí pea ʻoku poupouʻi ke nau teuteu ke ngāue.
24.1
Ko e Ui ke Ngāué
ʻOku fakafofongaʻi ʻe he kau faifekaú ʻa e ʻEikí pea kuo pau ke uiuiʻi kinautolu ʻi he mafai totonú (vakai, Tokāteline mo e Ngaahi Fuakava 42:11; Ngaahi Tefito ʻo e Tui 1:5). Ko e ui ke ngāue fakafaifekaú ʻoku meimei ke fakahoko pē ia ʻe he Palesiteni ʻo e Siasí. Ko e kau faifekau matuʻotuʻa ʻoku ngāue tokoní, ʻoku fakahoko ʻe he palesiteni fakasiteikí ʻa e uiuiʻí.
24.2
Ngaahi Ngāue ʻa e Faifekaú
ʻOku kau ʻi he ui ke hoko ko ha faifekaú ha ngāue pau ke fakahoko. ʻE kehekehe pē ʻa e ngaahi ngāue ko ʻení.
24.2.1
Kau Faifekau Akoʻi kei Talavoú
Ko e tokolahi taha ʻo e kau faifekau kei talavoú ʻoku vahe ke nau akoʻi ʻa e ongoongoleleí mavahe mei ʻapi. ʻOku foaki ʻa e ngaahi ngāue ko ʻení ʻi ha fakahā ki he Kau ʻAposetoló. ʻOku ngāue ʻa e kau faifekau ko ʻení ʻi he malumalu ʻo e fakahinohino ʻa ha palesiteni fakamisiona.
24.2.2
Kau Faifekau Kei Talavou Ngāue Tokoní
ʻOku vahe ha kau faifekau kei talavou ʻe niʻihi ke nau ngāue ʻi he Siasí mo e tukui koló, lolotonga iá ʻoku nau kei nofo pē ʻi ʻapi. ʻOku foaki ʻa e ngaahi ngāue ko ʻení ʻi he fakahā ki he kau ʻAposetoló pea ʻoku foaki ia ki he kau teu ngāue fakafaifekau ʻoku feʻunga taha honau ngaahi tūkungá mo e ngāue fakafaifekau tokoní (vakai, 24.3.3).
24.2.3
Kau Faifekau Matuʻotuʻá
ʻOku poupouʻi atu ʻa e kau faifekau matuʻotuʻa kotoa pē ke nau kumi ha kakai ke akoʻi mo tokoni ke nau mateuteu ke papitaiso. ʻE lava foki ke vahe ha kau faifekau matuʻotuʻa ke nau tokoni ki he:
-
Kāingalotú mo e kau taki fakaʻēliá mo fakalotofonuá.
-
Ngaahi potungāue mo e ʻū fale ʻo e Siasí.
-
Ngaahi kautaha tokoni ʻofá.
ʻOku ʻikai kole ki he kau faifekau matuʻotuʻá ke nau ngāue ʻi ha ngaahi houa tatau, fakahoko e ngaahi ʻekitivitī tatau pē, pe feau e ngaahi fiemaʻu tatau mo e kau faifekau kei talavoú.
ʻOku vahe ʻa e ngaahi ngāue ki he kau faifekau matuʻotuʻá ʻo fakafou ʻi he fakahā ki he Kau ʻAposetoló. ʻE lava ke fakahaaʻi ʻe he kau teuteu ngāué ʻa e ngāue ʻoku nau saiʻia aí, ka ʻoku totonu ke nau loto-fiemālie ke tali pē ha faʻahinga ngāue ʻe vahe ange.
24.2.4
Kau Faifekau Tokoni Matuʻotuʻá
Makehe mei he ngaahi uiuiʻi ʻi honau uooti pe siteiki totonú, ʻe kei lava pē ʻa e kāingalotú ʻo ngāue maʻá e ʻEikí ko ha kau faifekau tokoni matuʻotuʻa. ʻOku fakahoko ʻe he kau faifekau ko ʻení ha tokoni mahuʻinga ʻi he ngaahi potungāue, ʻū fale, mo e ngaahi misiona ʻa e Siasí (vakai, 24.7.1). Te nau nofo pē ʻi ʻapi.
Ko e kau faifekau tokoni matuʻotuʻá ʻoku uiuiʻi kinautolu ʻe he palesiteni fakasiteikí. ʻOku nau ngāue ʻi he malumalu ʻo ʻene fakahinohinó. ʻE makatuʻunga e taimi te nau ngāue ai ʻi he uiké ʻi he meʻa ʻoku nau lavá, ngaahi faingamālie ngāue tokoni ʻi honau ʻēliá, mo e fakahinohino mei he Kau Palesitenisī Fakaʻēliá.
24.2.5
Fakamatala Fakanounou ʻo e Ngaahi Ngāue ʻOku Vahe ki he Faifekaú
ʻOku fakamatalaʻi fakanounou atu ʻe he tēpile ko ʻení ʻa e faʻahinga ngāue ʻi he ngāue fakafaifekaú.
|
Faifekau Akoʻi Kei Talavou |
Faifekau Tokoni Kei Talavou |
Faifekau Matuʻotuʻa |
Faifekau Ngāue Tokoni Matuʻotuʻa | |
|---|---|---|---|---|
|
ʻOku uiuiʻi ʻe he | Faifekau Akoʻi Kei Talavou Palesiteni ʻo e Siasí | Faifekau Tokoni Kei Talavou Palesiteni ʻo e Siasí | Faifekau Matuʻotuʻa Palesiteni ʻo e Siasí | Faifekau Ngāue Tokoni Matuʻotuʻa Palesiteni fakasiteikí |
|
ʻOku vahe ʻe ha | Faifekau Akoʻi Kei Talavou ʻAposetolo | Faifekau Tokoni Kei Talavou ʻAposetolo | Faifekau Matuʻotuʻa ʻAposetolo | Faifekau Ngāue Tokoni Matuʻotuʻa Palesiteni fakasiteikí |
|
Vaheʻi ʻe he | Faifekau Akoʻi Kei Talavou Palesiteni fakasiteikí | Faifekau Tokoni Kei Talavou Palesiteni fakasiteikí | Faifekau Matuʻotuʻa Palesiteni fakasiteikí | Faifekau Ngāue Tokoni Matuʻotuʻa Palesiteni fakasiteikí pe ko ha tokoni |
|
Nofo ʻi | Faifekau Akoʻi Kei Talavou Mavahe mei ʻapi | Faifekau Tokoni Kei Talavou ʻApi | Faifekau Matuʻotuʻa Mavahe mei ʻapi pe ʻi ʻapi | Faifekau Ngāue Tokoni Matuʻotuʻa ʻApi |
|
Taki fakalotú | Faifekau Akoʻi Kei Talavou Palesiteni fakamisioná pe palesiteni ʻo e feituʻu fakahisitōliá | Faifekau Tokoni Kei Talavou Palesiteni fakasiteikí | Faifekau Matuʻotuʻa Palesiteni ʻo e misioná, temipalé, pe feituʻu fakahisitōliá; pe Palesiteni Fakaʻēliá | Faifekau Ngāue Tokoni Matuʻotuʻa Palesiteni fakasiteikí |
|
Lipooti ki he | Faifekau Akoʻi Kei Talavou Palesiteni fakamisioná pe palesiteni ʻo e feituʻu fakahisitōliá | Faifekau Tokoni Kei Talavou Taki faifekau tokoní | Faifekau Matuʻotuʻa Palesiteni ʻo e misioná, temipalé, pe feituʻu fakahisitōliá; Palesiteni Fakaʻēliá; talēkita ʻo e senitā takimamatá; pe ko ha pule ʻi he potungāue ʻa e Siasí pe pule ki he naunau fakatuʻasinó | Faifekau Ngāue Tokoni Matuʻotuʻa Pule ʻo e ngāue tokoní |
|
Tuʻutuʻuni ki he taʻu motuʻá | Faifekau Akoʻi Kei Talavou 18–25 (tangata) | Faifekau Tokoni Kei Talavou 18–25 (tangata) | Faifekau Matuʻotuʻa taʻu 40 pe motuʻa ange kapau kuo ʻosi mali pe kapau ko ha fefine ʻoku ʻikai mali | Faifekau Ngāue Tokoni Matuʻotuʻa taʻu 26 pe motuʻa ange |
24.3
Ko e Teuteu mo e Feʻunga ke Ngāue Fakafaifekaú
ʻOku poupouʻi ʻa e kau teuteu ngāue fakafaifekaú ke nau ngāue fakafaifekau koeʻuhí ko ʻenau ʻofa ki he ʻEikí mo ʻEne fānaú. ʻOku totonu ke nau maheni mo e ngaahi fehuʻi ʻinitaviu ke fakaongoongolelei ke ngāue fakafaifekaú.
24.3.1
Ului kia Sīsū Kalaisí
ʻE feinga ʻa e kau teu ngāue fakafaifekaú ke fakamālohia ʻenau ului kia Sīsū Kalaisi mo ʻEne ongoongolelei kuo fakafoki maí.
24.3.2
Ko Hono Aʻusia e Ngaahi Tuʻunga Moʻui Tāú
ʻE feinga ʻa e kau teu ngāue faifekaú ke nau moʻui taau mo e takaua ʻo e Laumālié. ʻOku fie maʻu ʻeni ki he ngāue fakafaifekau leleí (vakai, Tokāteline mo e Ngaahi Fuakava 42:13–14).
24.3.2.1
Fakatomalá
ʻOku fie maʻu ki he fakatomalá ʻa e tui kia Kalaisí, maʻu ha loto-moʻoni, mo hono tauhi ʻo e ngaahi fekaú. ʻOku kau ai ʻa e vete mo e siʻaki ʻo e angahalá. ʻI he ngaahi angahala mamafá, ʻoku fie maʻu ki he fakatomalá ʻa e vete ki he pīsopé pe palesiteni fakasiteikí.
ʻOku fakamolemoleʻi mo fakamaʻa ha taha ʻoku fakatomala, tuʻunga ʻi he Fakalelei mo e ʻaloʻofa ʻa Sīsū Kalaisí. ʻOku ʻikai leva toe manatuʻi ʻe he ʻEikí ʻa e angahalá. (Vakai, ʻĪsaia 43:25; Sēkope 6:5; ʻAlamā 34:15–17; Hilamani 5:10–11; Tokāteline mo e Ngaahi Fuakava 58:42–43. Vakai foki, 32.1 ʻi he tohi tuʻutuʻuni ko ʻení.)
Kuo pau ke ʻosi fakatomala ha taha teu ngāue fakafaifekau mei ha angahala mamafa, kimuʻa pea toki fakahū ʻe he palesiteni fakasiteikí ʻene fakaongoongoleleí (vakai, 32.6; vakai foki, 24.4.4). ʻOku kau ʻi he founga ʻo e fakatomalá ha taimi feʻunga ke fakahaaʻi ai ʻe he tokotahá ʻi heʻene moʻui māʻoniʻoní, kuó ne maʻu ʻa e laumālie ʻo Kalaisí ki hono fakamolemoleʻi ʻo ʻene ngaahi angahalá.
24.3.3
Tuʻunga Moʻui Lelei Fakatuʻasino, Fakaeʻatamai, mo Fakaelotó
ʻOku faingataʻa ʻa e ngāue fakafaifekaú. Kuo pau ke līʻoa ʻa e kau faifekau akoʻi kei talavoú pea mo malava fakatuʻasino, fakaeʻatamai, pea mo fakaeloto ke ngāueʻi e taimi-tēpile kakato ʻa e faifekaú.
24.3.4
Meʻa Fakapaʻangá
24.3.4.1
Ko Hono Fakapaʻanga ʻo e Kau Faifekau kei Talavou ʻOku Ngāue Mavahe mei ʻApí
ʻOku ʻikai totonu ke fakatoloi ʻa e kau teu ngāue fakafaifekau kei talavou kuo nau mateuteu ʻo fakatatau mo honau ivi malavá, mei heʻenau ngāué koeʻuhí ko ha ʻuhinga fakapaʻanga. Ko kinautolu ʻoku nau fiemaʻu ha tokoni fakapaʻanga ke fakakakato e lahi ʻo e tukupā ki he foakí, te nau lava ke maʻu ia mei honau kāingá mo e ngaahi kaungāmeʻá.
Kapau ʻe kei fie maʻu pē, ʻe lava ke kole ʻe he pīsopé pe palesiteni fakasiteikí ki he kāingalotu ʻi he uōtí pe siteikí ke nau foaki ki he paʻanga faifekau ʻa e uōtí.
He ʻikai ke lava ʻo fakaʻaongaʻi e patiseti mo e paʻanga ʻaukai ʻa e ʻiuniti fakalotofonuá.
Tukupā fakamāhina ʻo e foakí. ʻE tokoni ʻa e kau faifekau akoʻi kei talavoú mo honau fāmilí ke foaki ha paʻanga pau ʻi he māhina takitaha ke tokoni ke feau e ʻū fakamole ki he polokalama ngāue fakafaifekaú.
ʻOku fai ʻa e ngaahi foakí ki he paʻanga faifekau fakauōtí. ʻE fakapapauʻi ʻe he kau pīsopé ʻoku foaki ʻa e paʻangá ʻi he māhina takitaha. ʻOku ʻikai totonu ke tomuʻa foaki ʻa e paʻanga ko ia kimuʻa ʻi he māhina totonú. He ʻikai ke lava ʻo totongi fakafoki ha paʻanga naʻe foaki kimuʻa kapau ʻe foki vave ha faifekau ki ʻapi.
Ngaahi fakamole ʻi he malaʻe ngāue fakafaifekaú. ʻE maʻu ʻe he kau faifekau kei talavoú, ʻi he māhina takitaha, ha paʻanga mei he misioná ke fakatau ʻaki ha meʻakai, fefonongaʻakí, mo ha ngaahi fakamole kehe ki he nofó. Ko e paʻanga ko ʻení ʻoku toputapu. ʻE toki fakaʻaongaʻi pē kinautolu ʻe he kau faifekaú ʻi ha ngaahi taumuʻa fekauʻaki mo e ngāue fakafaifekaú. ʻOku ʻikai totonu ke fakaʻaongaʻi kinautolu ki he ngaahi fakamole fakataautaha, fakahū, pe ʻave ki he kau mēmipa ʻo e fāmilí pe ko e niʻihi kehé. ʻE fakafoki ʻe he kau faifekaú ki he misioná ha paʻanga ʻoku ʻikai ke nau fie maʻu.
ʻE fakaʻaongaʻi ʻe he kau faifekaú ʻa e paʻanga fakatāutahá ke totongi ʻaki ʻa e ngaahi fakamole kehé. ʻOku totonu ke siʻisiʻi pē ʻa e ngaahi fakamole fakataautaha ko ʻení. (Vakai, Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí, 4.8.)
24.3.4.2
Ko Hono Fakapaʻanga ʻo e Kau Faifekau Matuʻotuʻa ʻoku Ngāue Mavahe mei ʻApí
Tukupā ʻo e foaki fakamāhiná. ʻE foaki ʻe he kau faifekau matuʻotuʻa ʻoku ngāue mavahe mei ʻapí ha tokoni ki he paʻanga faifekau fakauōtí ʻi he māhina takitaha. ʻOku tokoni ʻa e ngaahi tokoni ko ʻení ke totongi ʻa e ngaahi fakamole ki he fale nofoʻangá mo e meʻalelé.
ʻE fakapapauʻi ʻe he kau pīsopé ʻoku foaki ʻa e paʻangá ʻi he māhina takitaha. ʻOku ʻikai totonu ke tomuʻa foaki ʻa e paʻanga ko iá kimuʻa ʻi he māhina totonú.
Ngaahi fakamole kehé. Makehe mei he tukupā fakamāhina ʻo e foakí, ʻa ia ʻoku tokoni ke totongi e fakamole ki he fale nofoʻangá mo e meʻalelé, kuo pau ke totongi kakato ʻe he kau faifekau matuʻotuʻá ʻa e ngaahi fakamole kehe kotoa pē, ʻo kau ai ʻa e meʻakaí.
24.3.4.3
Ko Hono Fakapaʻanga ʻo e Kau Faifekau ʻOku Ngāue Pē ʻi ʻApí
ʻE fatongia ʻaki ʻe he kau faifekau ʻoku ngāue pē ʻi ʻapí ʻa ʻenau ngaahi fiemaʻu fakapaʻangá kotoa.
24.3.4.4
Maluʻí mo e Ngaahi Fakamole Fakafaitoʻó
ʻOku poupouʻi mālohi ʻa e kau faifekaú kotoa ke nau tauhi ʻenau maluʻi fakafaitoʻo lolotongá, kapau ʻe lava, ʻo kau ai mo e kau faifekau akoʻi kei talavoú.
Ko e kau faifekau ʻoku ngāue ʻi ʻapí, kuo pau ke nau feau ʻenau maluʻi fakafaitoʻo pē ʻanautolu pea mo ha maluʻi kehe. Ko e kau faifekau matuʻotuʻa ʻoku ngāue mavahe mei ʻapí kuo pau ke nau feau foki ʻa e maluʻi ko ʻení. ʻE lava ke maʻu ʻe he kau faifekau matuʻotuʻa te nau ngāue mavahe mei honau fonua tupuʻangá ha maluʻi ʻo fakafou ʻi he Palani Fakafaitoʻo ki he Kau Ngāue Matuʻotuʻá.
24.3.5
Fatongia ʻo e Kau Mēmipa ʻo e Fāmilí mo e Kau Takí ʻi hono Teuteuʻi ʻo e Kau Faifekaú
ʻE tokoniʻi ʻe he kau mēmipa ʻo e fāmilí, kau pīsopé, mo e kau taki kehé ʻa e toʻu tupú ke nau teuteu ke ngāue fakafaifekau.
ʻE poupouʻi ʻe he kau mēmipa ʻo e fāmilí mo e kau takí ʻa kinautolu kotoa pē ʻoku teu ngāue fakafaifekaú ke nau ako e:
-
Tohi ʻa Molomoná mo e ngaahi folofola kehé.
ʻE tokoni ʻa e kau mēmipa ʻo e fāmilí mo e kau takí ki he kau teu ngāue fakafaifekaú ke nau tukupā ke muimui ki he ngaahi tuʻunga moʻui fakafaifekaú. Te nau poupouʻi ʻa e kau teu ngāue fakafaifekaú ke nau ako ʻa e tohi tuʻutuʻuni ki he ngaahi tuʻunga moʻui fakafaifekaú ʻoku fekauʻaki mo ʻenau ngāue ʻe faí:
-
Ki he kau faifekau akoʻi kei talavoú: Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí
24.4
Ko hono Fakaongoongoleleiʻi ʻo e Kau Faifekaú
24.4.1
Ko e Sivi Moʻui Leleí
ʻOku fie maʻu ʻa e kau teu ngāue fakafaifekau kotoa pē ke sivi ʻenau mateuteu fakaemoʻui leleí ʻe ha mataotao fakafaitoʻo.
24.4.2
Foomu ʻInitaviú mo e Fakaongoongoleleí
ʻE fakahoko ʻe he pīsopé mo e palesiteni fakasiteikí ha ngaahi ʻinitaviu fakalaumālie fakaʻāuliliki, pea mo ha ʻinitaviu langaki moʻui mo e taha teu ngāue fakafaifekau kotoa pē. Te nau fakaʻaongaʻi ʻa e ngaahi fehuʻi ʻinitaviu ki he fakaongoongolelei fakafaifekaú.
ʻE vakaiʻi foki ʻe he pīsopé mo e palesiteni fakasiteikí ʻa e fakamatala fekauʻaki mo e ngaahi tuʻunga moʻui taau mo e mateuteu fakaemoʻui lelei ʻi he Missionary Online Recommendation System He ʻikai ke toe tānaki atu ʻe he pīsopé mo e palesiteni fakasiteikí ha ngaahi tuʻunga moʻui kehe. Pea he ʻikai foki ke na liliu e ngaahi fehuʻi ʻinitaviú.
Kapau ʻoku hohaʻa ʻa e pīsopé mo e palesiteni fakasiteikí ki hano aʻusia ʻe ha taha teu ngāue fakafaifekau ʻa e ngaahi tuʻunga ʻulungaanga ʻo e moʻui tāú pe ko ʻene mateuteu fakaemoʻui leleí, te nau talanoa fakataha mo e tokotahá. Te nau toe lava foki ke fealēleaʻaki mo ʻene ongomātuʻá, ʻo ka loto ki ai ʻa e tokotaha teu ngāue fakafaifekaú. He ʻikai fakahū ʻe he pīsopé mo e palesiteni fakasiteikí ha fakaongoongolelei kae ʻoua kuo fakatomala ʻa e tokotahá mei ha angahala mamafa (vakai, 24.3.2.1). Fakatatau mo e tuʻunga fakatuʻasino, fakaeʻatamai, pe fakaeloto ʻo e tokotahá, ʻe lava ke nau aleaʻi ha tuʻunga ʻe lava ai ke vahe ke ngāue fakafaifekau tokoni.
ʻI he ngaahi meʻa fakavavevave ka ʻoku ʻikai maʻu ʻa e pīsopé pe palesiteni fakasiteikí, te ne lava ʻo fakamafaiʻi ha taha ʻo hono ongo tokoní ke ne fakahoko ʻa e ngaahi ʻinitaviu ko ʻení.
ʻI he ngaahi vahefonuá, ʻe ʻinitaviu ʻe he palesiteni fakamisioná pe ʻe hano tokoni ne vahe ki ai pea mo fakaongoongoleleiʻi ʻa e kau teuteu ngāue fakafaifekaú. ʻOku ʻikai fakahoko ʻe he palesiteni fakavahefonuá ʻa e ngaahi ʻinitaviu ko ʻení.
24.4.4
Ko Kinautolu ʻOku ʻIkai Lava ʻo Ngāue Fakafaifekau Taimi Kakató
Ko e taimi ʻe niʻihi he ʻikai uiuiʻi ha mēmipa ʻoku fie ngāue fakafaifekau ke hoko ko ha faifekau taimi kakato. Mahalo ʻe tupu ʻeni mei ha ngaahi palopalema fakaemoʻui lelei, ʻikai aʻusia e ngaahi tuʻunga ʻo e moʻui tāú, ngaahi palopalema fakalao, pe ko ha ngaahi tūkunga kehe. ʻE lava ke fakaʻatā ia ʻe he palesiteni fakasiteikí mei he ngāue fakafaifekau taimi kakató.
24.5
Hili Hono Maʻu ha Uiuiʻi Fakafaifekaú
ʻOku poupouʻi ʻa e kau faifekau toki uiuiʻi foʻoú ke nau lau pe toe lau e Tohi ʻa Molomoná kimuʻa pea toki kamata ʻenau ngāue fakafaifekaú. Te nau muimui ki he faleʻi ʻa e Tuʻi ko Penisimaní ke “ʻiloʻi ʻoku mou faitotonu maʻu pē, mo hoʻomou ngaahi fakakaukaú, mo hoʻomou ngaahi leá, mo hoʻomou ngaahi ngāué” (Mōsaia 4:30).
24.5.1
ʻEnitaumeni Temipalé mo e Ngāue Temipalé
Kapau kuo teʻeki ai maʻu ʻe he kau faifekau toki uiuiʻi foʻoú e ʻenitaumeni fakatemipalé, ʻoku totonu ke nau fakahoko ia kimuʻa pea toki kamata ʻenau ngāue fakafaifekaú, ʻi he feituʻu ʻe lava aí (vakai, Tokāteline mo e Ngaahi Fuakava 43:15–16; 105:33). ʻOku kau heni ʻa e kau faifekau tokoní kapau ʻe feʻunga mo honau ngaahi tūkungá.
ʻE lava ke hoko ʻa e kau faifekau toki uiuiʻi foʻou kuo ʻosi maʻu ʻenitaumení ko ha kau ngāue ouau fakatemipale kimuʻa pea nau toki kamata ngāue fakafaifekaú, ʻo ka ʻaonga ke fai pehē (vakai, 25.5).
24.5.2
Ngaahi Houalotu Sākalamēnití
ʻE faʻa fakaafeʻi ʻe he kau pīsopelikí ʻa e kau faifekau toki uiuiʻí, ke nau lea ʻi he houalotu sākalamēnití kimuʻa pea toki kamata ʻenau ngāue fakafaifekaú. Ko ha houalotu sākalamēniti angamaheni pē ʻeni. ʻOku totonu ke tukutaha e tokangá ʻi he sākalamēnití mo e Fakamoʻuí.
24.5.3
Vaheʻi ʻo e Kau Faifekaú
ʻE vaheʻi ʻe he palesiteni ʻo e siteiki totonú ʻa e faifekau kotoa ʻo ofi ki hono ʻaho ke kamata ai he misioná. ‘I he ngaahi meʻa fakavavevave ʻoku ʻikai maʻu ai e palesiteni fakasiteikí, te ne lava ʻo fakamafaiʻi ha taha ʻo hono ongo tokoní ke ne vaheʻi ʻa e kau faifekaú.
ʻE vaheʻi ʻe he palesiteni fakamisioná pe taha ʻo hono ongo tokoní ʻa e kau faifekau ʻoku uiuiʻi mei he ngaahi vahefonua ʻi hono misioná. ʻOku ʻikai vaheʻi ʻe he palesiteni fakavahefonuá ʻa e kau faifekaú.
Ko ha tangata ʻe ngāue mavahe mei ʻapi, kuo pau ke ne ʻosi maʻu ʻa e Lakanga Taulaʻeiki Faka-Melekisētekí kimuʻa pea toki vaheʻi ko ha faifekau. ʻOku totonu ke maʻu ʻe ha tangata ʻe ngāue fakafaifekau tokoni ʻa e Lakanga Taulaʻeiki Faka-Melekisētekí kapau ʻe feʻunga mo hono ngaahi tūkungá.
24.6
Ngāue Mavahe mei ʻApí
24.6.2
ʻI he Malaʻe Ngāue Fakafaifekaú
24.6.2.5
Ngaahi Kole ke Tokoniʻi Fakapaʻanga ʻa e Niʻihi Kehé pe ʻi he Akó pe Hikifonuá
ʻOku ʻikai totonu ke fai ʻe he kau faifekaú mo honau fāmilí ha tokoni fakapaʻanga kiate kinautolu ʻoku nofo ʻi he feituʻu ʻoku ngāue ai e kau faifekaú, kau ai ha tokoni fakapaʻanga ki he akó. ʻOku ʻikai ke maluʻi (sponsor) ʻe he kau faifekaú mo honau ngaahi fāmilí ha kakai ʻoku fie hiki ki ha ngaahi fonua kehe (vakai, 38.8.19).
24.6.2.8
Lekooti Mēmipasipí mo e Vahehongofulú
ʻE tauhi ʻe he uooti totonu ʻo ha faifekau ʻa e lekooti mēmipasipí. ʻE lekooti foki ʻe he uooti totonú ʻene tuʻunga vahehongofulú. ʻOku ʻikai totongi vahehongofulu ʻa e kau faifekaú ʻi he paʻanga tokoni ʻoku nau maʻu mei he misioná. Ka neongo ia, te nau totongi vahehongofulu kapau ʻoku ʻi ai haʻanau paʻanga hū mai fakafoʻituitui.
24.6.3
Ko e Foki ki ʻApi mei ha Ngāue Fakafaifekaú
24.6.3.1
Ko e Foki ki ʻApi ʻo Fakatatau mo e Taimi-tēpile Totonú
ʻOku ʻikai totonu ke kole ʻe he kau faifekaú mo e kau mēmipa honau fāmilí ke tukuange vave pe fakalōloa e ngāué ʻi ha fiemaʻu fakafoʻituitui.
Ko e kau faifekau kei talavoú ʻoku totonu ke nau fononga hangatonu pē ki ʻapi mei heʻenau ngāue fakafaifekaú. ʻE toki lava pē ke fakangofua ha fononga mavahe kapau ʻoku kaungāfolau ʻa e faifekaú mo ha taha ʻo e ongomātuʻá pe tauhí.
ʻOku ʻikai tukuange ʻa e kau faifekaú kae ʻoua kuo nau lipooti ki heʻenau palesiteni fakasiteikí. Te nau muimui ki he ngaahi tuʻunga moʻui fakafaifekaú ʻo aʻu ki he taimi ko iá.
24.6.3.2
Ko e Foki Vave Ki ʻApí
ʻOku tukuange vave ha kau faifekau ʻe niʻihi ʻi ha ngaahi ʻuhinga ki he moʻui leleí, tuʻunga moʻui tāú, pe ko ha ngaahi ʻuhinga kehe. ʻE fai ʻe he pīsopé mo e palesiteni fakasiteikí ha tokoni makehe ki he kau faifekau ko ʻeni ʻoku fakafoki maí. ʻE tokoniʻi kinautolu ʻe he kau takí ke nau toe moʻui lelei pe toe foki ʻo ngāue ʻo ka lava.
24.7
Ngāue Fakafaifekau Tokoní
24.7.1
Ko Hono Kumi ha Ngaahi Faingamālie maʻá e Kau Faifekau Tokoní
ʻE fealēleaʻaki fakataha ʻa e pīsopé, palesiteni fakasiteikí, mo e faifekau tokoní ke ʻiloʻi ha ngaahi faingamālie fakalotofonua ke tokoni ai. Ki he kau faifekau tokoni kei talavoú, ʻe kau ha taki faifekau tokoni mo e ongomātuʻa ʻa e faifekaú pe ongo tauhí ʻi he aleá.
24.8
Hili e ʻOsi ʻa e Ngāue Fakafaifekau Tokoní
24.8.2
ʻInitaviu Tukuange ʻo e Faifekaú
Ko e palesiteni fakasiteikí ʻokú ne tukuange ʻa e kau faifekaú mo fakahoko e ʻinitaviu tukuangé. ʻI he ngaahi vahefonuá, ʻoku angamahení ko e palesiteni fakamisioná pe ko hano tokoni naʻe vahe ki ai te ne tukuange ʻa e kau faifekaú.
ʻE ala ʻaonga ki he ʻinitaviu ko ʻení ʻa e fakahinohino ko ʻení.
-
Poupouʻi ke nau hoko atu ko ha kau ākonga ʻa Sīsū Kalaisi ʻi he kotoa ʻo ʻenau moʻuí.
-
Faleʻi kinautolu ke nau langa ʻi he ngaahi ʻulungaanga lelei ne nau fakatupulaki ʻi heʻenau hoko ko e faifekaú.
-
Poupouʻi ke nau fakakaukauʻi mo teuteu ki he kahaʻú, kau ai ʻa e akó mo e ngāue maʻuʻanga moʻui maʻá e kau faifekau kei talavoú.
-
Poupouʻi ke nau moʻui taau maʻu pē ke maʻu ha lekomeni temipale.
24.8.4
Ngaahi Uiuiʻí
ʻE ʻoange taimi totonu ʻe he kau takí ha ngaahi fatongia fakaetauhi mo ha ngaahi uiuiʻi ki he kau faifekau ne toki tukuangé. ʻE kau heni hano fakakaukauʻi ke nau hoko ko ha kau ngāue ouau fakatemipale ʻo ka taau ke fakahoko ia (vakai, 25.5).
24.9
Ngaahi Maʻuʻanga Tokoni ki he Fakaongoongoleleí mo e Ngāue Fakafaifekaú
24.9.2
Ngaahi Uepisaití
-
MissionaryRecommendations.ChurchofJesusChrist.org (ʻoku ʻatā pē ʻeni ki he kau taki fakalotofonuá mo e kau teu ngāue fakafaifekaú)