25.

Aramid iti Templo ken Family History iti Ward ken Stake

25.0

Pakauna

Ti aramid iti templo ken family history ket ti wagas a mamagkaykaysa ken mangilantip kadagiti pamilia iti kinaagnanayon (kitaen iti Mateo 16:19). Mairaman ditoy nga aramid:

• Ti panangaramid kadagiti katulagan no umawattayo kadagiti bukodtayo nga ordinansa iti templo (kitaen iti Isaias 55:3; Doktrina ken Katulagan 84:19–23).

• Panangtakuat kadagiti pimmusayen a kapuonantayo [ancestors] ken panangannong kadagiti ordinansa para kadakuada iti templo tapno makaaramidda kadagiti katulagan iti Dios (kitaen iti Malakias 4:5–6; 1 Taga Corinto 15:29; Doktrina ken Katulagan 128:15–18).

• Ti masansan nga ipapan iti templo, iti lugar a mabalin, tapno agdaydayaw iti Dios ken mangannong kadagiti ordinansa para kadagiti annakna (kitaen iti Lucas 24:52–53; Doktrina ken Katulagan 109:13–14).

Ad-adu pay nga impormasion ti magun-od iti “Temples” ken “Family History” (Gospel Topics, topics.ChurchofJesusChrist.org).

25.1

Pannakiraman ti Miembro ken Lider iti Aramid iti Templo ken Family History

Adda pribilehio ken pagrebbengan dagiti miembro ti Simbaan a tumulong a mamagkaykaysa kadagiti pamiliada para iti kinaagnanayon. Isaganada ti bagbagida nga agaramid kadagiti katulagan bayat ti panangawatda kadagiti ordinansa iti templo, ket ikagkagumaanda a tungpalen dagita a katulagan.

Maallukoy dagiti miembro ti Simbaan a mangilasin kadagiti pimmusay a kabagian a saan a nakaawat kadagiti ordinansa ti templo. Kalpasanna annongen dagiti miembro dagiti ordinansa iti biang dagita a kabagian (kitaen iti Doktrina ken Katulagan 128:18). Iti lubong dagiti espiritu, mabalin a pilien dagiti pimmusay a tao nga umawat wenno saan nga umawat kadagiti ordinansa a naannong para kadakuada.

25.1.1

Bukod a Pagrebbengan para iti Idadar-ay iti Templo

Ikeddeng dagiti miembro para iti bagbagida no kaano ken kasano ti kasansan ti panagdayaw iti templo. Saan nga ipasdek dagiti lider dagiti quota wenno sistema ti panagireport para iti idadar-ay iti templo.

25.2

Panangbukel iti Aramid iti Templo ken Family History iti Ward

25.2.1

Bishopric

Makitunos ti bishopric kadagiti panguluen ti korum dagiti elder ken Relief Society bayat ti panangidauloda kadagiti panagkagumaan ti templo ken family history iti ward. Masansan nga agiinnuman dagitoy a lider.

Addaan met ti bishopric kadagiti sumaganad a pagrebbengan para iti aramid iti templo ken family history iti ward:

• Siguraduen a maisuro iti simbaan ti doktrina ken bendision ti aramid iti templo ken family history.

• Siguraduen ti bishopric a maitunos ti aramid iti templo ken family history kadagiti miting ti konseho iti ward ken konseho dagiti agtutubo iti ward.

• Imatonanna ti pannakaorganisa dagiti kurso iti panagsagana iti templo (kitaen iti 25.2.8).

• Mangisyu kadagiti temple recommend (kitaen iti kapitulo 26).

25.2.2

Dagiti Panguluen ti Korum dagiti Elder ken Relief Society

Dagiti panguluen ti korum dagiti elder ken Relief Society ti mangidaulo kadagiti inaldaw a panagkagumaan ti templo ken family history iti ward (kitaen iti 8.2.4 ken 9.2.4). Agtinnulongda a mangidaulo kadagitoy a panagkagumaan a kadua iti konseho ti ward, babaen ti panangitunos ti bishop.

Addaan dagitoy a lider kadagiti sumaganad a pagrebbengan:

• Mangtulong kadagiti miembro nga agsagana nga umawat kadagiti ordinansa iti templo ken agaramid kadagiti katulagan iti templo.

• Mangallukoy kadagiti miembro nga agdaydayaw iti templo a masansan no ipalubos dagiti kasasaadda.

• Mangallukoy kadagiti miembro a mangsursuro maipapan kadagiti kapuonanda ken mangannong kadagiti ordinansa iti templo para kadakuada.

• Mangidaulo iti aramid ti templo iti ward ken lider ti family history. No saan a maawagan daytoy a lider, maysa a miembro ti korum dagiti elder ti mangpunno iti daytoy nga akem (kitaen iti 25.2.3).

Mangdutok ti presidente ti korum dagiti elder ken ti presidente ti Relief Society iti tunggal maysa a miembro ti panguluen tapno tumulong a mangidaulo iti aramid iti templo ken family history iti ward. Agtinnulong nga agtrabaho dagitoy dua a miembro ti panguluen. Linawas a dar-ayanda dagiti miting ti panagtutunos iti templo ken family history iti ward (kitaen iti 25.2.7).

25.2.3

Lider iti Templo ken Family History iti Ward

Makiuman ti bishopric iti stake president tapno ikeddeng no mangawag iti maysa a lider iti templo ken family history iti ward. Nasken a maysa a Melchizedek Priesthood holder daytoy a tao.

Ti lider ti templo ken family history ti mangsuporta iti panguluen ti korum dagiti elder ken ti panguluen ti Relief Society kadagiti pagrebbenganda iti templo ken family history. Addaan pay kadagiti sumaganad a pagrebbengan:

• Mangidaulo kadagiti miting ti panagtutunos iti templo ken family history (kitaen iti 25.2.7).

• Mangisuro kadagiti consultant iti templo ken family history iti ward. Mangitunos kadagiti panagkagumaanda a mangtulong kadagiti miembro iti aramid iti templo ken family history.

• Makipagtrabaho iti lider ti mision ti ward ken dagiti misionario tapno matulongan dagiti agsursuro iti ebanghelio, baro a miembro, ken agsubsubli a miembro a makipaset iti aramid iti templo ken family history.

25.2.4

Dagiti Consultant iti Templo ken Family History iti Ward

Agserbi dagiti konsultant iti templo ken family history iti babaen ti panangiturong ti lider ti templo ken family history iti ward wenno ti miembro ti panguluen ti korum dagiti elder a mangpunno iti daytoy nga akem. Awagan ti bishopric dagitoy a miembro nga agserbi. Mabalin a maawagan dagiti nataengan ken agtutubo.

Addaan dagiti consultant kadagiti sumaganad a pagrebbengan:

• Mangtulong kadagiti miembro a mangpadas maipapan kadagiti bendision ti panangtakuat kadagiti kapuonanda ken mangannong kadagiti ordinansa iti templo para kadakuada.

• Mangtulong kadagiti miembro nga agsagana nga umawat kadagiti ordinansa iti templo ken agaramid kadagiti katulagan iti templo.

• Makiraman kadagiti miting ti panagtutunos iti templo ken family history (kitaen iti 25.2.7).

25.2.7

Dagiti Miting iti Panagtutunos iti Templo ken Family History iti Ward

Regular a maangay dagiti ababa nga impormal a miting ti panagtutunos iti templo ken family history. No maawagan ti maysa a lider ti templo ken family history iti ward, isu ti ag-conduct kadagitoy a miting. No saan, ti miembro ti korum dagiti elder a mangpunno iti daytoy nga akem ti ag-conduct.

Dagiti dadduma pay a maawis iramanna:

• Dagiti naidutok a miembro dagiti panguluen ti Relief Society ken korum dagiti elder.

• Maysa nga assistant iti korum dagiti priest.

• Maysa a miembro ti panguluen ti klase ti oldest Young Women.

• Dagiti consultant iti templo ken family history.

Panggep dagitoy a miting ti:

• Mangplano no kasano a matulongan dagiti naipangruna a miembro ti ward iti aramidda iti templo ken family history kas makiddaw.

Mabalin a maangay dagitoy a miting iti personal wenno virtual. Mabalin pay a maaramid ti panagtutunos iti dadduma pay a wagas, agraman dagiti tawag iti telepono, teks, ken email.

25.2.8

Kurso iti Panagsagana iti Templo

Iti babaen ti panangiturong ti bishop, mabalin a mabukel ti kurso ti panagsagana iti templo tapno matulongan dagiti miembro nga agsagana nga agaramid kadagiti katulagan bayat ti panangawatda kadagiti ordinansa iti templo. Maangay dagitoy a kurso iti ruar dagiti regular a miting iti Domingo iti oras a nagin-awa para kadagiti miembro. Mabalin a maangayda iti balay a pagmimitingan wenno iti maysa a pagtaengan.

Dagiti lesson ken instruksion iti panangbukel iti kurso ket adda iti Endowed from on High: Temple Preparation Seminar Teacher’s Manual. Maikkan dagiti participant kadagiti kopia ti Panagsagana a Sumrek iti Nasantuan a Templo. Para iti bukod a panagadal ken resources ti lesson, kitaen iti temples.ChurchofJesusChrist.org.

25.4

Dagiti Resources iti Family History

25.4.1

Ti Pamiliak: Dagiti Estoria a Mamagtipon Kadakami a Sangkamaysa

Ti Pamiliak: Dagiti Estoria a Mamagtipon Kadakami a Sangkamaysa [My Family: Stories That Bring Us Together] ket mangtulong kadagiti tao a mangtakuat kadagiti kabagian ken kapuonan ken mangummong kadagiti estoriada. Makatulong pay daytoy a booklet kadagiti miembro a mangrugi a mangisagana kadagiti family name para kadagiti ordinansa iti templo.

Mabalin nga i-download daytoy a booklet iti ChurchofJesusChrist.org. Mabalin a maorder dagiti naimprenta a kopia iti store.ChurchofJesusChrist.org.

25.4.2

FamilySearch.org ken ti FamilySearch Apps

FamilySearch.org ti website ti Simbaan para iti aramid ti templo ken family history. Matulonganna dagiti agur-usar a:

• Mangbuangay iti koneksion ken relasion iti family tree.

• Mangtakuat kadagiti kapuonan ken estoriada.

• Mangibinglay ken mangtaginayon kadagiti estoria, ladawan, ken pakasaritaan ti pamilia.

• Mangisagana kadagiti nagan ti pamilia [family name] para kadagiti ordinansa iti templo.

Ti FamilySearch Tree app ken FamilySearch Memories app ti mangpabalin a makipaset dagiti tao iti aramid iti templo ken family history kadagiti mobile device.

25.5

Panagrekomenda ken Panagawag kadagiti Temple Worker

25.5.1

Panagrekomenda kadagiti Temple Worker

Mailasin dagiti potensial a temple worker kadagiti sumaganad a wagas:

• Dagiti miembro nga inlasin ti bishop wenno sabali pay a lider iti ward

• Dagiti miembro nga immasideg iti bishop maipapan iti panangserbi

• Dagiti miembro nga inrekomenda ti temple president, ti matron, wenno sabali pay a lider iti templo

• Dagiti miembro nga agsagsagana para iti wenno nabiit pay a nagsubli manipud iti missionary service (kitaen iti kapitulo 24)

Maisumite ti nagnagan dagiti potensial a temple worker nga usaren ti Recommend Temple Worker tool. Adda a maaramat daytoy a tool kadagiti bishop, stake president, ken kadagiti panguluen ti templo.