pisap el oruh lohlngohk sin mukul se

26.

Pwepuh in Lwelah nuh Tempuhl

26.0

Ikucslah

Utyak nuh lun tempuhl el ohiyac na muhtahl se. Mwet kol ke ward ac stek ahkkweye mempucr nuh kwewa in nwacsnwacs ac in oasr pwepuh in lwelah se lalos ingena nuh tempuhl finne elos muhta loes liki tempuhl.

Mwet kol ke Alu uh suk inkacnek nuh kwewa in liye lah elos nuh kwewa ma utyak nuh lun tempuhl uh nwacsnwacs in oruh (liye Psalm 24:3–5).

Enenuh in oasr pwepuh in lwelah nuh tempuhl se luhn mempucr.

Pisap el eis kahsruh sin stek prestuhn lal fin oasr siyuck lal ke pwepuh in lwelah nuh tempuhl ma tiacna topukyucklac ke sapta se inge. Prestuhn luhn stek ac fah sruokyac Ohfuhs luhn Prestuhnsi Se Met ke kihsensiyuck inge.

26.1

Kain in Pwepuh in Lwelah nuh Tempuhl

Oasr atac tolu ke lwelah inge:

1. Pwepuh in lwelah nuh Tempuhl nuh sin mwet ma soenna eis mwe sang muhtahl. Ma lwelah ingacn ma nuh sin mwet ma soenna eis mwe sang muhtahl ma sil nuh sin pahpah ninac kuh oruh pacptais kacn mwet misac ac ahkkweyeyucklac. Elos ahkfahsryeyucklac yurun Leader and Clerk Resources (LCR). In etuh yohk ke mwe ahkkahlwemye se, liye 26.4.

2. Pwepuh in lwelah nuh sin mwet moul. Pwepuh in lwelah inge ma nuh sin mempucr ma eis mwe sang lalos sifacna kuh siliyucki nuh sin kiyac kuh tuhma. Pwepuh in lwelah nuh sin mwet moul inge fulfuli wi na pwepuh in lwelah na pwacye nuh tempuhl nuh sin mwet ma eis ma sang (ahkuhtweyucki ten).

3. Pwepuh in lwelah nuh tempuhl nuh sin mempucr ma eis mwe sang. Pwepuh in lwelah inge ma nuh sin mempucr ma eis ma sang tari. Elos ahkfahsryeyucklac yurun LCR. Elos srihsrngiyac mempucr se in wi ma oruh akwuck nuh kwewa tempuhl kacn mwet misac. Elos oacyacpac orekmakihnyuck ke pacl se mwet ma eis mwe sang tari elos sil nuh sin mwet moul kuh mwet misac pahpah ninac kuh tuhlihk. In etuh yohk ke mwe ahkkahlwemye se, liye 26.3.

26.2

Karihngihn Pwepuh in Lwelah nuh Tempuhl

26.2.1

Mwet kol ke Pristut elos Karihngihn Pwepuh in Lwelah nuh Tempuhl

Mwet kol ke pristut ma srihsrngiyucki in oasr puk nahtuh ke pwepuh in lwelah nuh tempuhl inge enenuh in arulacna karihngihn in wo.

Mwet kol ke pristut inge lohacng pac liye mwet ma tiacna srihsrngiyucki in tiac oasr inkacnek lalos in liye mwe ahkkahlwemye ke pwepuh in lwelah nuh tempuhl LCR.

26.2.3

Pwepuh in Lwelah Ma Tuhlac kuh Pihsrapasrlah

Pisap el ngihsre mempucr in sa ahkkahlwemye nuh sel fin tuhlac kuh pihsrapasrlah pwepuh lalos. El kuh mwet kahsruh se el srihsrngiyac kuh mwet in sihm orekmakihn LCR in silahklahk canceliyac pwepuh in lwelah sac. Fin inkacnek se inge tiac kuh in orekmakihnyuck, pisap el pahngonwack tempuhl ohfuhs in canceliyac pwepuh in lwelah sac.

26.2.4

Mwet Ma Sruok Pwepuh in Lwelah se inge Ma Tiac na Moul Suwohs

Fin pisap el sokwack tuh oasr mwet sruok pwepuh in lwelah se inge uh tiacna moul suwohs (liye 26.3), elac ngihsraclah pwepuh in lwelah sac yurun mempucr ingacn. El orekmakihn LCR in canceliyac pwepuh in lwelah sacn. Fin inkacnek se inge tiac kuh in orekmakihnyuck, pisrap el pahngonwack tempuhl ohfuhs in canceliyac pwepuh in lwelah sac.

26.3

Inkacnek in Ukweyuck ke Oraclah Pwepuh in Lwelah nuh Tempuhl

Mwet kol ke pristut enenuh in oraclah pwepuh in lwelah se fin mempucr se ingacn tohpohklah fal kwewa kihsensiyuck kac ngacn.

Kihsensiyuck nuh ke pwepuh in lwelah tempuhl uh tiac enenuh in salkweyuck. Elos enenuh in lukmac. Tuhsruhktuh, mwet se ma kihsensiyuck nuh se inge kuh in suli sie pac mwet mahtuh in wi.

Mwet kol ke pristut tiac enenuh in sang ma sahyac nuh ke puk se sihmihsyucklac ke pwepuh in lwelah nuh tempuhl ingacn. Kuh elos tiac enenuh in eislah kuhtuh ma kac ingacn.

Ke stek, mempucr se ke stek prestuhnsi kuh mwet in sihm ke stek oraclah in orekmakihnyuck pwepuh in lwelah nuh tempuhl sacn ke LCR tukun oreklac an. Ke tistrik, mempucr se ke misin prestuhnsi kuh mwet in sihm ke misin oraclah pwepuh in lwelah sacn in kuh in orekmakihnyuck. Lwelah nuh ke pacptaisiyacn mwet misac ac ahkkweyeyucklac kac an kuh in orekmakihnyuck fin printiyucki sin mempucr se ke pisaprik kuh sin pracns prestuhn.

26.3.1

Kihsensiyuck ke Pwepuh in Lwelah nuh Tempuhl nuh sin Mempucrs ke Ward ac Pracn

Ke ward se, pisap kuh mwet in kahsruh se lal ahkfahsrye kihsensiyuck ac oraclah sang pwepuh in lwelah ingacn fin elos suwohs. Ke pracns, pracns prestuhn muhkwena ahkfahsrye kihsensiyuck ac oraclah pwepuh in lwelah nuh tempuhl ingacn.

Ke ward se, pisap el ohsun na nuh sin mempucr sacn ac oruh lohlngohk lal suc ma:

• Eis mwe sang lalos sifacna (liye 27.1 ac 27.2).

• Ma ac siliyucki nuh sin tuhma kuh kiyac (liye 27.3).

Fin oasr elyah ma oruh pisap el tiac kuh in oraclah, el kuh in sang kuh nuh sin sie mwet kahsruh lal ingacn in ahkfahsrye kihsensiyuck inge.

Met liki na oreklac oacna sie kain in pwepuh ahkkahlwemyeyuck lucng inge, pisap el sifil liye ma sihmlac kacn mempucr sacn in ahkpwacyei lah tiacna oasr ma suhfal. Nuh sin mempucr ma ac eis mwe sang lalos sifacna kuh in sil nuh sin tuhma kuh kiyac, el enenuh pac in liye lah:

• Lwen in pacptais ac ahkkweyeyucklac luhn mwet se ingacn sihmlac oasr ke record luhn mempucr sacn.

• Tamuhlwel elos eis Melchizedek Pristut.

Tukun kihsensiyuck ingacn orek sin sie mempucr ke pisaprik kuh pracns prestuhn, mempucr se ke stek prestuhn oruh lohlngohk lal nuh sin mempucr ma muhta ke stek sacn. Mempucr se ke misin prestuhnsi oruh lohlngohk ahkluo nuh sin mempucr se ma muhta ke tistrik. Tistrik prestuhn el tiac ahkfahsrye lohlngohk nuh ke pwepuh in lwelah nuh tempuhl ingacn ne kena ahokiyucki sin Prestuhnsi se Met.

26.3.2

Kihsensiyuck ke Pwepuh in Lwelah nuh Tempuhl nuh sin Mempucrs ke Acn an Muhkwena

Kuhtuh mempucr uh muhta ke acn ma ac enenuh in moli yohk kuh upac in ohsun nuh sin mempucr ke stek kuh misin prestuhnsi. Ke srihpac inge, tempuhl prestuhn elac oruh lohlngohk lal nuh sin mwet sacn ac sainiyac pwepuh in lwelah sacn. Met liki el oruh lohlngohk lal, el sramsram sin stek kuh misin prestuhn. Pisap, mwet in kahsruh se ma srihsrngiyucki, kuh pracns prestuhn enenuh in eis lohlngohk tari sin mwet sacn ac sainiyac pwepuh in lwelah sacn.

26.4

Sang Pwepuh in Lwelah nuh Tempuhl nuh sin Mempucrs ma Soena Eis Mwe Sang Muhtahl

26.4.1

Ahkuhtweyac Fohn

Pwepuh in lwelah nuh tempuhl kuh in ituckyang nuh sin mempucr ma sonna eis mwe sang muhtahl oacna ke ahkkahlwemyeyuck ten inge:

• Nuh sin mempucr matwac yac 11 ac mahtuh in pacptais ac ahkkweyeyucklac kacn mwet misac. (Muhtwacn fuhsr ac mukul fuhsr ma akmuhsralah elos kuh in eis pwepuh in lwelah nuh tempuhl muhtwacwacack ke Jacnweri ke yac se elos eklac yac 12.)

• Nuh sin mempucr matwac yac 8 nuh ke 20 in siliyucki nuh sin pahpah ninac. Tuhlihk ma srihk liki 8 tiac enenuh pwepuh in lwelah in sil nuh sin pahpah ninac (liye 26.4.4).

• Nuh sin mempucr matwac yac 8 nuh ke 20 in muhta liye sil luhn tuhlihk wiyaclos ma moul,

Mempucr ma tuhfahna eis mwe sang muhtahl lalos elos tiac eis oacna sie pwepuh in lwelah ahkkahlwemyeyuck ke section se inge.

Mukul mempucr mahtuh se ke Alu uh ma fal tari matwac in sruok pristut enenuh in akmuhsralah el nuh ke ohfuhs luhn pristut met liki el eis pwepuh in lwelah nuh tempuhl.

26.4.2

Pwepuh in Lwelah nuh Tempuhl nuh sin Mempucr Tuhfahna in Pacptaislac

Pisap el oruh lohlngohk lal yurun mempucr tuhfahna in pacptaislac ma fal tari matwac in eis pwepuh in lwelah nuh tempuhl in oruh pacptais ke mwet misac ac ahkkweyeyucklac la. El ahkfahsrye lohlngohk se inge tukun na mempucr sacn ahkkweyeyucklac, fin sa tukun wik se (liye 26.4.1). Nuh sin tamuhlwel, lohlngohk se inge kuh in orek ipin pacna lohlngohk in eis Aaronic Pristut.

26.4.3

Pwepuh in Lwelah nuh Tempuhl in oruh Pacptais ke Mwet Misac ac Ahkkweyeyucklac Muhkwena

Pwepuh in lwelah nuh tempuhl ma oreklac muhkwena nuh ke pacptaiselah mwet misac ac ahkkweyeyucklac la an orekmakihnyuck muhkwena nuh ke srihpac sacn.

26.4.4

Pwepuh in Lwelah nuh Tempuhl nuh ke Sil nuh sin Tuhlihk Moul nuh sin Pahpah Ninac

Mempucr ma matwac yac 21 kuh mahtuh liki kuh in sil nuh sin pahpah ninac kiaclos kuh tuhmwaclos kuh muhta liye sil se fin elos (1) eis mwe sang muhtahl tari (2) ac oasr pwepuh in lwelah nuh tempuhl se lalos.

26.5

Sang Pwepuh in Lwelah nuh Tempuhl ke Ohiyac Special

26.5.1

Mempucr Elos Eis Mwe Sang Muhtahl Lalos Sifacna

Mempucr ma nwacsnwacs ma luhngse eis mwe sang muhtahl lalos sifacna kuh in oruh fin elos sun nohfohn ma enenweyuck nuh kac.

• Elos in kuh in yac 18 matwac.

• Elos in ahksahfyelah kuh srolah tari ke kuhlahs singucul luo ke high school, kuhlahs alkosr, kuh oacna sie.

• Elos pahselah yac se tukun ahkkweyeyucklac lalos.

• Elos puhla kena se in eis ac suhnakihn olwelah tempuhl ke moul lalos nohfohn.

In weacng pacna, mukul se enenuh in sruok Melchizedek Pristut met liki el eis mwe sang muhtahl lal. Mwe ahkkahlwemye nuh sin mempucr ma ahkolah in eis mwe sang muhtahl lalos sifacna, liye 25.2.8. Mwe ahkkahlwemye lah suc kuh in eis mwe sang muhtahl, liye 27.2.1.

26.5.3

Misineri Fuhsr Fohlohk liki Kuhlwacnsap Lalos Liki Lohm Selos

Misin prestuhn el mahkiyac ac suhmuhslah pwepuh in lwelah inge in tilac kuh in orekmakihnyuck tukun mahlwem tolu misineri se inge fohlohk nuh lohm sel ah.

Pisap el oruh lohlngohk lal nuh sin misineri ma fohlohk inge in sang sie pwepuh in lwelah sasuc se nuh tempuhl met liki mahlwem tolu se lal an tilac orekma ingacn.

26.5.4

Mempucr Ma Tiacna Muhta ke Ward se Ingacn Sahp Yac Se Ma

Pisap kuh mwet kahsruh se lal ma el srihsrngiyac sruokyac pisap se met ah met liki ahkfahsrye kihsensiyuck ke pwepuh in lwelah nuh tempuhl.

26.5.7

Mempucrs Ma Akihlenyuck muh Elos Transgender

Stek prestuhn el enenuh in eis kahsruh yurun Eria Prestuhnsi elan etuh in oruh sramsram lal uh nuh sin kais sie ke etuh ac luhngse oacna Kraist (liye 38.6.23).

26.5.8

Mempucrs Ma Oraclah Ma Koluk na Upac

Mempucr ma oraclah ma koluk na upac uh tiac enenuh in eis pwepuh in lwelah la nuh tempuhl ne kena el auliyak (liye 32.6).

26.5.9

Mempucrs Ma Sifil Ituckyang Ine Tukun Elos Eislah Inelos kuh Som liki Alu uh

26.5.9.1

Mempucr Ma Tiacna Eis Mwe Sang Muhtahl Met

Mempucr inge tiac enenuh in eis pwepuh in lwelah in eis mwe sang lalos sifacna ne kena sun yac na fohn se ke lwen se ma sifilpac ituckyang inelos nuh ke Alu uh ke pacptais ac ahkkweyeyucklac.

26.5.9.2

Mempucr Ma Eis Mwe Sang Muhtahl Met

Mempucr ma eis mwe sang muhtahl met tiac enenuh in eis oacna sie pwepuh in lwelah nuh tempuhl ne kena mwe insewowo lalos tempuhl fohlohk ke akwuck in fohlohkihnyuckyak luhn mwe insewowo.