27.

Mga Ordinansa sang Templo para sa Buhi

27.0

Introduksyon

Ang templo balay sang Ginuo. Ginatudlo kita sini sa aton Manluluwas nga si Jesucristo. Sa mga templo, nagapartisipar kita sa sagrado nga mga ordinansa kag nagahimo sang mga kasugtanan upod sa Amay nga Langitnon nga nagabugkos sa aton sa Iya kag sa aton Manluluwas. Ini nga mga kasugtanan kag mga ordinansa nagahanda sa aton sa pagbalik sa presensya sang Amay nga Langitnon kag para maselyohan bilang mga pamilya sa katubtuban.

Sa mga kasugtanan kag ordinansa sang templo, “ang gahum sang pagkadiosnon ginapakita” (Doktrina kag mga Kasugtanan 84:20).

Ang mga kasugtanan kag mga ordinansa sang templo sagrado. Ang mga simbolo nga konektado sa mga kasugtanan sang templo indi dapat paghambalan sa gwa sang templo. Indi man naton dapat hambalan ang balaan nga impormasyon nga ginpromisa naton sa templo nga indi pag-ipahayag. Pero, pwede naton hambalan ang panguna nga mga katuyuan kag doktrina sang mga kasugtanan kag ordinansa sang templo kag ang espirituhanon nga balatyagon naton sa sulod sang templo.

Ginahambalan sang mga lider sang ward kag stake ang impormasyon sa sining kapitulo upod sa mga miyembro nga nagahanda sa pagbaton sang ila endowment ukon mga ordinansa sang pagselyo.

27.1

Pagbaton sang mga Ordinansa sang Templo

27.1.1

Paghanda sa Pagbaton sang mga Ordinansa sang Templo

Ang mga miyembro dapat nga maghanda sang ila mga kaugalingon sa espirituhanon para magbaton sang mga ordinansa sang templo kag sa paghimo kag pagtuman sang mga kasugtanan sa templo.

Ang mga ginikanan may mayor nga responsibilidad sa pagbulig sang ila kabataan sa paghanda sa pagbaton sang mga ordinansa sang templo. Ang mga lider sa stake kag ward, mga ministering brother kag sister, kag ang mga paryente sang pamilya nagasuporta sa mga ginikanan sa sini nga buluhaton.

Ang mga balasahon para mabuligan ang mga miyembro sa paghanda sa pagbaton sang mga ordinansa sa templo ara sa temples.ChurchofJesusChrist.org.

Ang mga miyembro nga nagahanda sa pagbaton sang ila kaugalingon nga endowment ukon maselyohan sa bana/asawa ginapaisog sa pagpartisipar sa temple preparation course (tan-awa sa 25.2.8).

27.1.3

Mga Miyembro nga May Pisikal nga mga Kasablagan

Ang nagakaangay nga mga miyembro nga may pisikal nga mga kasablagan pwede magbaton sang tanan nga mga ordinansa sang templo. Ini nga mga miyembro ginapaisog sa pagkadto sa templo upod sa na-endow nga mga paryente ukon kaabyanan sang pareho ang kasarian (gender) nga pwede magbulig sa ila. Kon wala sang mag-upod sa mga miyembro nga pamilya ukon abyan, pwede nila tawgan ngadaan ang templo para mahibal-an kon ano ang pwede himuon nga pagpatigayon.

27.1.4

Bulig sa Paglubad ukon Interpretasyon

Kon kinahanglan sang mga miyembro sang bulig sa paglubad ukon interpretasyon, dapat nila nga daan kontakon ang templo para tan-awon kon may ari sini.

27.1.5

Bayo nga Dapat Suksukon sa Templo

Kon magkadto sa templo, dapat suksukon sang mga miyembro ang klase sang bayo nga suksukon nila sa sakramento nga miting.

Tan-awa sa 27.3.2.6 para sa impormasyon parte sa bayo nga suksukon sa kasal sa templo ukon pagselyo.

Tan-awa sa 38.5 para sa impormasyon parte sa:

• Bayo nga suksukon sa endowment kag mga ordinansa sang pagselyo.

• Pagkuha, pagsuksok, kag paghalong sang ceremonial temple clothing kag garment.

27.1.6

Pag-atipan sang Kabataan

Ang kabataan kinahanglan may bantay nga hamtong kon ara sila sa palibot sang templo. May mga temple worker nga pwede magbantay sang kabataan sa masunod lamang nga mga sirkumstansya:

• Kon selyohan sila sa ila ginikanan.

• Kon magaobserba sila sang pagselyo sang buhi nila nga mga utod, tapik nga utod, ukon mga utod sa tatay/nanay sa ila mga ginikanan.

27.1.7

Miting upod sa mga Miyembro Pagkatapos Nila nga Makabaton sang mga Ordinansa sa Templo

Ang mga miyembro masami may nga pamangkot pagkatapos nga mabaton ang mga ordinansa sa templo. Ang endowed nga mga miyembro sang pamilya, ang bishop, iban pa nga mga lider sang simbahan, kag ministering brother kag sister pwede nga makigkita sa mga miyembro para hambalan ang ila eksperiyensya sa templo.

Ang mga balasahon para makabulig sabat sa mga pamangkot ara sa temples.ChurchofJesusChrist.org.

27.2

Ang Endowment

Ang tinaga nga endowment nagakahulugan “regalo.” Ang endowment sa templo literal nga regalo halin sa Dios kon sa diin Iya ginabugayan ang Iya mga anak. Upod sa pila ka mga regalo nga mabaton sang mga miyembro paagi sa endowment sa templo ang:

• Mas dako nga ihibalo sang mga katuyuan kag pinanudlo sang Ginuo.

• Gahum para himuon ang tanan nga gusto ipahimo sang Amay nga Langitnon sa Iya mga anak.

• Diosnon nga direksyon samtang nagaserbisyo sa Ginuo, sa ila mga pamilya, kag sa iban.

• Mas dako nga paglaum, kaumpawan, kag kalinong.

Ang katumanan sining mga bugay nagadepende sa katutom sa ebanghelyo ni Jesucristo.

Ang endowment mabaton sa duha ka parte. Sa una nga parte, mabaton sang isa ka tawo ang una nga ordinansa nga ginatawag initiatory. Ang initiatory ginatawag man nga paghugas kag paghaplas sang lana (tan-awa sa Exodo 29:4–9). Upod sini ang espesyal nga mga bugay nga may kaangtanan sa diosnon nga ginhalinan kag potensyal sang isa ka tawo.

Sa initiatory, ginapahanugotan ang miyembro nga magsuksok sang temple garment. Ang garment nagarepresentar sang iya personal nga relasyon upod sa Dios kag ang pangako nga sundon ang mga kasugtanan nga ginhimo sa templo. Kon ang mga miyembro matinuohon sa ila mga kasugtanan kag ginasuksok ang garment sang husto sa bilog nila nga kabuhi, nagaserbe man ini nga proteksyon. Para sa impormasyon parte sa pagsuksok kag paghalong sang garment, tan-awa sa 38.5.5.

Sa ikaduha nga parte sang endowment, ginatudlo ang plano sang kaluwasan, dala ang Pagtuga, ang Pagkahulog ni Adan kag Eva sa sala, ang Pagbayad-Sala ni Jesucristo, ang Apostasiya, kag ang Pagpanumbalik. Nagabaton man ang mga miyembro sang instruksyon kon paano makabalik sa presensya sang Ginuo.

Sa endowment, ginaagda ang mga miyembro nga maghimo sang sagrado nga mga kasugtanan sa masunod:

• Ipangabuhi ang layi sang pagtuman kag tinguhaan nga tumanon ang mga kasuguan sang Amay nga Langitnon.

• Sundon ang layi sa pagsakripisyo, nga nagakahulugan sang pagsakripisyo para suportahan ang buluhaton sang Ginuo kag paghinulsol nga may masinulub-on nga tagipusuon kag mahinulsulon nga espiritu.

• Sundon ang layi sang ebanghelyo ni Jesucristo, ang mas mataas nga layi nga Iya gintudlo sang ari Sia sa duta.

• Tumanon ang layi sang kaputli, nga buot silingon ang miyembro pwede lang may sekswal nga relasyon sa tawo nga kasado sia sa legal sunod sa layi sang Dios.

• Tumanon ang layi sang pagkonsagrar, nga buot silingon ang mga miyembro magadedikar sang ila oras, mga talento, kag tanan nga ginbugay sa ila sang Ginuo para tukuron ang Simbahan ni Jesucristo sa duta.

Bilang balos, nagapromisa ang Amay nga Langitnon nga ang magapabilin nga matutum sa ila mga kasugtanan sa templo pagahatagan “sang gahum halin sa kahitaasan” (Doktrina kag mga Kasugtanan 38:32, 38; tan-awa man sa Lucas 24:49; Doktrina kag mga Kasugtanan 43:16).

27.2.1

Sin-o ang Pwede Magbaton sang Endowment

Ang tanan nga responsable nga hamtong nga mga miyembro sang Simbahan ginahagad sa paghanda kag pagbaton sang ila kaugalingon nga endowment. Ang tanan nga ginapangayo nga mga ordinansa kinahanglan mahikot kag marekord antes mabaton sang mga miyembro ang endowment (tan-awa sa 26.3.1).

27.2.1.1

Bag-o lang Mabunyagan nga mga Miyembro

Ang kaangay-angay nga hamtong nga bag-o nga mga miyembro pwede magbaton sang ila endowment pagsukat sang isa ka tuig sa petsa sang ila kumpirmasyon.

27.2.1.2

Miyembro nga ang Asawa/Bana Wala Pa Makabaton sang Endowment

Ang kaangay-angay nga miyembro nga ang bana/asawa wala pa makabaton sang endowment pwede nga magbaton sang iya kaugalingon nga endowment kon nasunod ang masunod nga kondisyones:

• Naghatag sang pahanugot ang wala pa ma-endow nga bana/asawa.

• Kompiyansa ang miyembro, ang bishop, kag stake president nga ang responsibilidad nga batunon upod sa mga kasugtanan sa templo indi mangin sablag sa ila pag-asawahay.

Ini nga kondisyones pagasundon bisan miyembro sang Simbahan ang asawa/bana ukon indi.

27.2.1.3

Mga Miyembro nga May Kakulangan sa Paminsaron

Ang mga miyembro nga may kakulangan sa paminsaron pwede nga magbaton sang ila endowment kon:

• Nabaton nila ang tanan nga ginapangayo nga una nga mga ordinansa (tan-awa sa 26.3.1).

• May intelektwal nga ikasarang sa pag-intiendi, paghimo, kag pagtuman sang naangot nga mga kasugtanan.

Nagapakighambal ang bishop sa miyembro, kag kon mahimo, sa iya mga ginikanan. Ginapangayo man niya ang direksyon sang Espiritu. Pwede man sia magkonsulta sa stake president.

27.2.2

Pagdesisyon kon San-o Magbaton sang Endowment

Ang desisyon sa pagbaton sang endowment personal kag dapat nga himuon sing mainampuon. Ang endowment isa ka bugay sang gahum kag rebelasyon sa tanan nga naghanda sa pagbaton sini. Pwede nga magpili ang mga miyembro nga batunon ang ila kaugalingon nga endowment kon mapasar na nila ang tanan nga kondisyones:

• Indi magnubo 18 anyos ang ila edad.

• Nakatapos sila ukon wala na nagaeskwela sa hayskul, secondary school, ukon katumbas sini.

• Nagsukat na isa ka tuig halin sa pagkumpirma sa ila.

• Gusto nila nga makabaton kag tumanon ang sagrado nga mga kasugtanan sa templo sa bilog nila nga kabuhi.

Ang mga miyembro nga nakabaton sang mission call ukon nagahanda nga maselyohan sa templo dapat nga makabaton sang endownment.

Antes mag-isyu sang temple recommend sa miyembro para magbaton sang endowment, dapat nga mabatyagan sang bishop kag stake president nga ang tawo handa sa pag-intiendi kag pagtuman sang sagrado nga mga kasugtanan sa templo. Ang ini nga kwalipikasyon indibidwal nga ginahibalo sa kada tawo.

27.2.3

Pagplano kag Pag-iskedyul sang Endowment

27.2.3.1

Pagbaton sang Recommend para sa mga Ordinansa para sa Buhi

Ang miyembro kinahanglan nga makabaton sang recommend para sa mga ordinansa para sa buhi agud makasulod sa templo kag makabaton sang endowment. Para sa impormasyon parte sini nga mga recommend, tan-awa sa 26.5.1.

27.2.3.2

Pagkontak sang Templo

Ang mga miyembro nga nagaplano sa pagbaton sang endowment dapat nga magkontak sa templo antes pa lang para iiskedyul ang ordinansa.

27.2.3.3

Mga Escort sang mga Miyembro nga Magabaton sang Endowment

Ang mga miyembro nga magabaton sang ila kaugalingon nga endowment pwede nga maghagad sang isa ka endowed nga miyembro halin sa pareho nga kasarian (gender) nga mag-akto bilang escort kag magbulig sa ila sa tion sang endowment session. Ang escort kinahanglan nga may current temple recommend. Ang templo pwede nga maghatag sang escort kon kinahanglan.

27.3

Pagselyo sang Bana kag Asawa

Ang pagselyo sa templo nagabugkos sang bana kag asawa sa katuigan kag sa tanan nga wala katapusan. Mabaton nila ining mga bugay kon matutum sila sa mga kasugtanan nga ila himuon sa templo. Paagi sa sining ordinansa, ang ila mga kabataan pwede man nga mangin bahin sang ila pamilya sa wala katapusan.

Ginapaisog sang mga lider sang Simbahan ang mga miyembro nga handaan ang pagpakasal kag maselyohan sa templo. Sa mga lugar nga wala ginakilala ang mga kasal sa templo, ang awtorisado nga mga lider sang Simbahan ukon iban pa pwede nga maghiwat sang sibil nga mga kasal nga pagasundan sang pagselyo sa templo (tan-awa sa 38.3). Ang ini nga pamaagi pwede man sundon kon ang pagpakasal sa templo magapabatyag sa mga ginikanan kag mga miyembro sang pamilya nga daw ginsikway tungod indi sila makatan-aw sa seremonya sa templo.

27.3.1

Sin-o ang Pwede Selyohan sa Templo

Ang tanan nga responsable nga wala pa makasal nga miyembro sang Simbahan ginaagda sa paghanda para sa pagselyo sa templo. Atong mga ginkasal sa sibil ginapaisog nga magpaselyo para sa katuigan kag sa wala katapusan sa templo sa tion nga handa na sila. Ang mga miyembro kinahanglan nga ma-endow antes sila maselyohan (tan-awa sa 27.2).

Ang mga mag-asawa nga ginaselyohan sa templo kinahanglan nga (1) nakasal sa sibil antes selyohan ukon (2) ginkasal kag selyohan sa pareho nga seremonya sa templo. Tan-awa sa 27.3.2.

27.3.1.2

Mga Miyembro nga May Kasablagan sa Paminsaron

Ang mga miyembro nga may kasablagan sa paminsaron pwede nga maselyohan sa ila bana/asawa, nobyo, ukon nobya kon:

• Nabaton nila ang tanan nga pauna nga mga ordinansa, upod ang endowment (tan-awa sa 27.2.1.3).

• May ara sila sang ikasarang sa paminsaron sa pag-intiendi, paghimo, kag pagtuman sang nagaupod nga mga kasugtanan.

Ginaistorya sang bishop ang miyembro kag ang iya bana/asawa, nobyo, ukon nobya. Ginapangayo man niya ang direksyon sang Espiritu. Pwede man sia nga magkonsulta sa stake president.

27.3.2

Pagplano kag Pag-iskedyul sang Kasal ukon Pagselyo sa Templo

27.3.2.1

Pagbaton sang Recommend para sa mga Ordinansa para sa Buhi

Ang miyembro kinahanglan nga makabaton sang recommend para sa mga ordinansa para sa buhi agud maselyohan sa ila bana ukon asawa. Para sa impormasyon parte sini nga mga recommend, tan-awa sa 26.3.

27.3.2.2

Pagkontak sang Templo

Ang mga miyembro nga nagaplano nga magpakasal ukon maselyohan sa bana/asawa dapat nga magkontak sa templo antes pa para iiskedyul ang ordinansa.

27.3.2.3

Pagkuha sang Marriage License

Antes kaslon, kinahanglan nga magkuha ang magnobya sang legal nga marriage license (lisensya sa pagpakasal) nga balido sa kon diin hiwaton ang kasal. Kon plano sang magnobya nga kaslon kag selyohan sa pareho nga seremonya, kinahanglan nila nga magdala sang balido nga marriage license sa templo.

Ang magnobya nga selyohan pagkatapos sang kasal sa sibil indi na kinahanglan nga magdala sang marriage license sa templo. Kundi, ginahatag nila ang petsa kag lokasyon sang ila kasal sa sibil bilang bahin sang proseso sang pagpamatuod sang rekord.

27.3.2.4

Mga Escort para sa Kalaslon

Ang kalaslon nga sister pwede nga updan sang na-endow nga sister para buligan sia sa dressing room. Pwede man ini himuon sang endowed nga brother sa kalaslon nga lalaki. Ang escort kinahanglan nga may current temple recommend. Ang templo pwede nga maghatag sang escort kon kinahanglanon.

27.3.2.5

Sin-o ang Nagahiwat sang Kasal ukon Pagselyo sa Templo

Ang kasal ukon pagselyo sa templo masami ginahiwat sang sealer nga naasayn sa templo kon diin kaslon ang magnobyahanay ukon selyohan ang mag-asawa. Kon may miyembro sang pamilya ukon abyan nga nagakapot sang awtoridad sa pagselyo kag naasayn sa templo kon diin sila kaslon ukon selyohan, pwede nila sia imbitahon sa paghiwat sang kasal ukon pagselyo.

27.3.2.6

Bagay nga Bayo para sa Kasal ukon Pagselyo sa Templo

Bayo sang Kalaslon nga Babayi. Ang bayo nga suksukon sang kalaslon nga babayi sa templo dapat puti, disente ang disenyo kag tela, kag wala sang madamo nga dekorasyon. Dapat man sini matabunan ang temple garment. Ang silangon nga tela dapat may sampaw nga tela sa idalom.

Para magbagay sa iban pa nga mga bayo nga ginasuksok sa templo, ang bayo sang kalaslon nga babayi dapat malaba ang pako ukon lab-ot sa butkon. Ang mga bayo dapat wala sang ikog (train) magluwas kon pwede ini pasakaon ukon kakason para sa seremonya sang pagselyo.

Ang templo pwede magpahulam sang bayo kon kinahanglanon ukon gusto.

Bayo sang Kalaslon nga Lalaki. Ang kalaslon nga lalaki nagasuksok sang normal nga bayo sa templo sa tion sang kasal ukon seremonya sang pagselyo (tan-awa sa 38.5.1 kag 38.5.2).

Mga Bayo sang Bisita. Ang mga magkadto sa kasal ukon seremonya sang pagselyo dapat nga magsuksok sang bayo nga pareho sang ila ginasuksok sa sakramento nga miting. Ang mga miyembro nga magatan-aw sa pagselyo halin sa endowment session pwede nga magsuksok sang ceremonial temple clothing.

Mga bulak. Ang kalaslon kag ang ila mga bisita wala dapat sang dala ukon ginasuksok nga bulak sa seremonya sang kasal kag pagselyo.

27.3.2.7

Pagbayluhanay sang mga Singsing pagkatapos sang Seremonya sang Kasal ukon Pagselyo

Ang pagbayluhanay sang mga singsing indi kabahin sang seremonya sang pagselyo sa templo. Pero, ang mag-asawa pwede nga magbayluhanay sang mga singsing pagkatapos sang seremonya sa sulod sang sealing room. Ang mga mag-asawa indi dapat magbayluhanay sang mga singsing sa iban nga oras ukon lugar sa templo ukon sa palibot sang templo.

Ang mag-asawa nga ginkasal kag ginselyohan sa pareho nga seremonya pwede nga magbayluhanay sang mga singsing sa lain nga tiyempo para sa mga miyembro sang pamilya nga wala nakakadto sa kasal sa templo. Indi dapat pagkopyahon sa pagbayluhanay ang bisan ano nga bahin sang seremonya sang kasal ukon pagselyo sa templo. Ang mag-asawa indi dapat nga magbayluhanay sang pangako pagkatapos sang kasal ukon pagselyo sa templo.

Ang mga mag-asawa nga ginkasal sa sibil antes sang ila pagselyo sa templo pwede nga magbayluhahnay sang mga singsing sa ila sibil nga seremonya, sa pagselyo sa templo, ukon sa duha ka seremonya.

27.3.4

Sin-o ang Pwede Magtan-aw sa Kasal ukon Pagselyo sa Templo

Ang mga mag-asawa dapat nga maghagad lamang sang malapit nga mga miyembro sang pamilya kag kaabyanan sa kasal ukon pagselyo sa templo. Ang responsable nga mga miyembro kinahanglan nga nakabaton na sang endowment kag may current nga temple recommend para makatan-aw.

Ang stake president pwede nga maghatag sang pahanugot sa tawo nga wala pa mabunyagan ukon ma-endow tungod sa kasablagan sa paminsaron nga magtan-aw sang kasal ukon pagselyo sang buhi niya nga mga utod sa templo. Ang tawo kinahanglan nga:

• Indi magnubo sa 18 anyos ang edad.

• Makasarang nga magpabilin nga matinahuron sa tion sang seremonya.

Ang stake president magasulat nga ang tawo awtorisado sa pagtan-aw sang pagselyo. Ini nga sulat ginapakita sa templo.

27.4

Pagselyo sang Buhi nga Kabataan sa mga Ginikanan

Ang kabataan nga natawo pagkatapos nga maselyohan ang ila nanay sa iya bana sa templo natawo sa sulod sang kasugtanan sina nga pagselyo. Indi na nila kinahanglan magbaton sang ordinansa sang pagselyo sa ginikanan.

Ang kabataan nga wala pa matawo sa sulod sang kasugtanan pwede mangin bahin sang wala katapusan nga pamilya paagi sa pagselyo sa ila natawhan ukon nag-adoptar nga mga ginikanan. Ini nga kabataan may kinamatarong sa pareho nga mga bugay sa mga natawo sa sulod sang kasugtanan.

27.4.2

Pagkontak sa Templo

Ang mag-asawa nga gusto nga maselyohan ang ila kabataan sa ila, ukon mga kabataan nga gusto maselyohan sa patay na nila nga ginikanan, dapat nga magkontak sa templo antes para iiskedyul ini nga ordinansa.