27.

Òdonans Tanp pou vivan

27.0

Entwodiksyon

Tanp la se kay Senyè a. Li pwente nou sou Sovè nou an, Jezikri. Nan tanp yo, nou patisipe nan òdonans sakre epi nou fè alyans avèk Papa nou ki nan Syèl la ki liye nou avèk Li epi avèk Sovè nou an. Alyans ak òdonans sa yo prepare nou pou nou retounen nan prezans Papa nou ki nan Syèl la epi sele ansanm antanke fanmi pou letènite.

Nan alyans ak òdonans tanp yo, “pouvwa Bondye manifeste” (Doktrin ak Alyans 84:20).

Alyans ak òdonans tanp yo sakre. Senbòl ki asosye avèk alyans tanp yo pa ta dwe diskite deyò tanp lan. Ni nou pa dwe diskite enfòmasyon sakre nou pwomèt nan tanp lan pou nou pa devwale yo. Men, nou ka pale sou objektif ak doktrin debaz alyans ak òdonans tanp yo ak santiman espirityèl nou genyen nan tanp lan.

Dirijan pawas ak pieu yo diskite enfòmasyon ki nan chapit sa a avèk manm k ap prepare pou resevwa dotasyon oswa òdonans sèlman yo.

27.1

Resevwa Òdonans Tanp yo

27.1.1

Prepare pou Resevwa Òdonans Tanp yo

Manm yo dwe prepare tèt yo espirityèlman pou yo resevwa òdonans tanp yo epi pou yo fè epi onore alyans tanp yo.

Paran yo gen responsablite prensipal pou yo ede pitit yo prepare yo pou yo resevwa òdonans tanp yo. Dirijan pieu ak pawas yo, frè ak sè sèvis pastoral yo, ak manm fanmi elaji yo soutni paran yo nan wòl sa a.

Resous pou ede manm yo prepare pou resevwa òdonans tanp yo disponib nan: temples.ChurchofJesusChrist.org.

Manm k ap prepare pou resevwa pwòp dotasyon pa yo oswa pou yo sele avèk mari oswa madanm yo ankouraje pou yo patisipe nan yon kou preparasyon pou tanp lan (gade 25.2.8).

27.1.3

Manm Ki Gen Andikap Fizik

Manm diy ki gen andikap fizik yo ka resevwa tout òdonans tanp yo. Nou ankouraje manm sa yo pou yo ale nan tanp lan avèk fanmi oswa zanmi ki dote ki menm sèks ki ka ede yo. Si manm yo pa ka ale avèk yon manm fanmi yo oswa yon zanmi, yo ka rele tanp lan davans pou wè ki aranjman ki ka fèt.

27.1.4

Asistans pou Tradiksyon oswa Entèpretasyon

Si manm yo bezwen asistans pou tradiksyon oswa entèpretasyon, yo dwe kontakte tanp lan davans pou wè si sa disponib.

27.1.5

Rad pou w Mete pou w ale nan Tanp

Lè yo pral nan yon tanp, manm yo dwe mete kalite rad yo mete nòmalman pou reyinyon Sentsèn yo.

Gade 27.3.2.6 pou enfòmasyon sou rad pou mete pou yon maryaj oswa yon sèlman nan tanp.

Gade 38.5 pou enfòmasyon sou:

• Rad pou mete pandan òdonans dotasyon ak sèlman.

• Jwenn, mete, ak pran swen rad seremoni ak gaman.

27.1.6

Swen pou Timoun

Timoun yo dwe gen sipèvizyon granmoun si yo nan lakou tanp lan. Ouvriye tanp yo disponib pou sipèvize timoun sèlman nan sikonstans sa yo:

• Si y ap sele avèk paran yo

• Si y ap asiste sèlman frè ak sè yo, bofrè ak bèlsè yo oswa demi frè ak demi sè ki vivan avèk paran yo.

27.1.7

Reyinyon avèk Manm yo apre yo fin Resevwa Odonans Tanp yo

Byen souvan, manm yo konn gen kesyon apre yo fin resevwa òdonans tanp yo. Manm fanmi ki dote, evèk la, lòt dirijan pawas, ak frè ak sè k ap sèvi yo ka rankontre avèk manm yo pou yo pale sou eksperyans tanp yo.

Resous pou ede reponn kesyon yo disponib nan temples.ChurchofJesusChrist.org.

27.2

Dotasyon an

Mo dotasyon an vle di “yon kado.” Dotasyon tanp lan se literalman yon kado Bondye kote Li beni pitit Li yo. Kèk nan kado manm yo resevwa atravè dotasyon tanp lan gen ladan yo:

• Pi gwo konesans sou objektif ak ansèyman Senyè a.

• Pouvwa pou fè tout sa Papa nou ki nan Syèl la vle pou pitit li yo fè.

• Direksyon divin lè y ap sèvi Senyè a, fanmi yo, ak lòt moun.

• Ogmantasyon esperans , rekonfò ak lapè.

Akonplisman benediksyon sa yo depann sou fidelite nan levanjil Jezikri a.

Dotasyon an resevwa an de pati. Nan premye pati a, yon moun resevwa yon òdonans preliminè ki rele inisyasyon. Yo rele inisyasyon an lavman ak onksyon tou (gade Egzòd 29:4–9). Sa gen ladan l benediksyon espesyal ki gen rapò ak eritaj ak potansyèl diven moun nan.

Pandan inisyasyon an, manm lan gen otorizasyon pou l mete gaman tanp lan. Gaman an reprezante relasyon pèsonèl li avèk Bondye ak angajman pou obeyi alyans ki te fèt nan tanp lan. Lè manm yo fidèl ak alyans yo epi yo mete gaman an byen pandan tout lavi yo, li sèvi kòm yon pwoteksyon tou. Pou enfòmasyon sou mete ak pran swen gaman an, gade 38.5.5.

Nan dezyèm pati dotasyon an, yo anseye plan sali a, ki gen ladan l Kreyasyon an, Chit Adan ak Èv la, Ekspyasyon Jezikri a, Apostazi a, ak Retablisman an. Manm yo resevwa enstriksyon tou sou fason pou yo retounen nan prezans Senyè a.

Nan dotasyon an, yo envite manm yo pou fè alyans sakre konsa:

• Viv lwa obeyisans la ak fè efò pou kenbe kòmandman Papa nou ki nan Syèl la.

• Obeyi lwa sakrifis la, ki vle di fè sakrifis pou sipòte travay Senyè a epi repanti avèk yon kè brize ak yon lespri kontri.

• Obeyi lwa levanjil Jezikri a, ki se pi gwo lwa Li te ansenye pandan Li te sou tè a.

• Kenbe lwa chastete a, ki vle di yon manm gen relasyon seksyèl sèlman avèk moun li legalman marye selon lalwa Bondye a.

• Kenbe lwa konsekrasyon an, ki vle di ke manm yo dedye tan yo, talan yo, ak tout bagay Senyè a ba yo kòm benediksyon pou yo bati Legliz Jezikri a sou tè a.

An retou, Papa nou ki nan Syèl la pwomèt ke moun ki rete fidèl nan alyans tanp yo ap dote “avèk pouvwa ki soti anwo” (Doktrin ak Alyans 38:32, 38; gade tou Lik 24:49; Doktrin ak Alyans 43:16).

27.2.1

Ki moun ki ka resevwa Dotasyon an

Tout manm adilt ki responsab nan Legliz la envite pou prepare yo epi resevwa pwòp dotasyon pa yo. Tout òdonans preliminè yo dwe fèt epi anrejistre anvan manm yo ka resevwa dotasyon an (gade 26.3.1).

27.2.1.1

Nouvo manm Batize yo

Nouvo manm adilt ki diy yo ka resevwa dotasyon yo omwen yon ane konplè apati dat konfimasyon yo a.

27.2.1.2

Manm ki gen yon konjwen ki pa gen dote

Yon manm diy ki gen yon konjwen ki pa dote ka resevwa pwòp dotasyon pa l lè kondisyon sa yo reyini:

• Konjwen ki pa dote a bay konsantman l.

• Manm lan, evèk la, ak prezidan pieu a gen konfyans ke responsablite a li asime avèk alyans tanp yo pap yon deranjman pou maryaj la.

Kondisyon sa yo aplike menmsi konjwen an se yon manm Legliz la ou pa.

27.2.1.3

Manm ki gen andikap entelektyèl

Manm ki gen andikap entelektyèl yo ka resevwa pwòp dotasyon pa yo si:

• Yo te resevwa tout òdonans preliminè yo (gade 26.3.1).

• Yo gen kapasite entelektyèl pou yo konprann, fè, epi kenbe alyans ki asosye yo.

Evèk la chita pale avèk manm la epi kote sa aplikab, avèk paran li. Li chèche direksyon Lespri a tou. Li dwe konsilte prezidan pieu a.

27.2.2

Deside kilè l ap resevwa Dotasyon an

Desizyon pou resevwa dotasyon an pèsonèl e yo ta dwe fèt nan lapriyè. Dotasyon an se yon benediksyon pouvwa ak revelasyon pou tout moun ki prepare pou resevwa li. Manm yo ka chwazi resevwa pwòp dotasyon pa yo lè yo satisfè tout kondisyon sa yo:

• Yo gen omwen 18 an.

• Yo fini oswa oswa yo pa ale nan lekòl segondè, oswa ekivalan an.

• Yon ane konplè pase depi konfimasyon yo.

• Yo santi yo anvi resevwa epi onore alyans tanp sakre yo pandan tout lavi yo.

Manm ki te resevwa yon apèl misyon oswa k ap prepare pou yo sele nan tanp lan ta dwe resevwa dotasyon an.

Anvan yo bay yon rekòmandasyon tanp pou yon manm resevwa dotasyon, evèk la ak prezidan pieu a ta dwe santi ke moun nan prepare pou l konprann ak kenbe alyans sakre tanp yo. Kalifikasyon sa a detèmine endividyèlman pou chak moun.

27.2.3

Planifye ak Pran Randevou pou Dotasyon

27.2.3.1

Resevwa yon Rekòmandasyon Òdonans pou Vivan

Yon manm dwe resevwa yon rekòmandasyon pou òdonans pou vivan pou l antre nan yon tanp epi resevwa dotasyon an. Pou enfòmasyon sou rekomandasyon sa yo, gade nan 26.5.1.

27.2.3.2

Kontakte Tanp lan

Manm ki ap planifye pou resevwa dotasyon an ta dwe kontakte tanp lan davans pou pran randevou pou òdonans lan.

27.2.3.3

Eskòt pou Manm k ap resevwa Dotasyon an

Manm k ap resevwa pwòp dotasyon yo ka envite yon manm ki dote ki menm sèks avèk li pou aji kòm yon eskòt epi asiste l pandan sesyon dotasyon an. Eskòt la dwe gen yon Rekòmandasyon Tanp ki valid tou. Tanp lan ka bay yon eskòt si sa nesesè.

27.3

Sèlman Mari ak Madanm

Yon sèlman tanp lye yon mari ak madanm ansanm pou letan ak tout letènite. Y ap resevwa benediksyon sa yo si yo fidèl ak alyans yo fè nan tanp lan. Gras ak òdonans sa a, pitit yo ka fè pati fanmi etènèl yo a tou.

Dirijan legliz yo ankouraje manm yo pou yo marye ak sele nan yon tanp. Kote maryaj tanp yo pa rekonèt legalman, dirijan Legliz ki otorize yo oswa lòt moun ka fè maryaj sivil apresa pou yo sele nan yon tanp (gade 38.3). Nou ka suiv egzanp sa a tou lè yon maryaj tanp ka lakòz paran yo oswa manm fanmi pwòch yo santi yo eskli paske yo pa ka asiste seremoni tanp lan.

27.3.1

Ki Moun ki Ka Sele nan yon Tanp

Tout manm selibatè responsab nan Legliz la envite pou prepare yo pou yon sèlman nan tanp. Moun ki marye sivil yo ankouraje pou yo sele pou tan ak letènite nan tanp lan kou yo fin prepare. Manm yo dwe dote anvan yo ka sele (gade 27.2).

Koup yo sele nan tanp lan dwe swa (1) marye sivil anvan yo sele oswa 2) marye epi sele nan menm seremoni tanp lan. Gade nan 38.6.5.

27.3.1.2

Manm ki gen andikap entelektyèl

Manm ki gen andikap entelektyèl yo ka sele avèk konjwen yo, oswa fiyanse si:

• Yo te resevwa tout òdonans preliminè, enkli dotasyon an (gade 27.2.1.3).

• Yo gen kapasite entelektyèl pou yo konprann, fè, epi kenbe alyans ki asosye yo.

Evèk la chita pale avèk manm lan ak konjwen li, oswa fiyanse l. Li chèche direksyon Lespri a tou. Li dwe konsilte prezidan pieu a.

27.3.2

Planifye ak pwogramw yon maryaj tanp oswa sèlman

27.3.2.1

Resevwa yon Rekòmandasyon Òdonans pou Vivan

Yon manm dwe resevwa yon rekòmandasyon òdonans vivan pou l sele ak konjwen li. Pou enfòmasyon sou rekòmandasyon sa yo, gade nan 26.3.

27.3.2.2

Kontakte Tanp lan

Manm k ap planifye pou yo marye oswa sele avèk yon konjwen ta dwe kontakte tanp lan davans pou programe òdonans lan.

27.3.2.3

Jwenn yon Lisans Maryaj

Anvan yo marye, yon koup dwe jwenn yon lisans maryaj legal ki valid kote maryaj la pral fèt la. Si koup la planifye pou yo marye ak sele nan menm seremoni an, yo dwe pote yon lisans maryaj valid la nan tanp lan.

Koup ki sele apre yon maryaj sivil pa bezwen pote yon lisans maryaj nan tanp lan. Olye de sa, yo bay dat la ak kote maryaj sivil la te fèt la ki fè pati pwosesis verifikasyon dosye a.

27.3.2.4

Eskòt pou Lamarye ak Lemarye a

Yon sè ki dote ka akonpaye lamarye a pou ede l nan sal abiye a. Yon frè ki dote ka fè menm bagay la pou lemarye a. Eskòt la dwe gen yon Rekòmandasyon Tanp ki valid tou. Tanp lan ka bay yon eskòt si sa nesesè.

27.3.2.5

Ki Moun ki fè yon Maryaj Tanp oswa Sèlman

Nòmalman, yon maryaj nan tanp oswa sèlman fèt pa yon selè ki asiyen nan tanp kote koup la pral marye oswa sele a. Si yon manm oswa yon zanmi fanmi an gen otorite pou sele a epi l asiyen nan tanp kote koup la pral marye oswa sele a, yo ka envite l pou l fè maryaj la oswa sèlman an.

27.3.2.6

Rad ki Apwopriye pou yon Maryaj oswa Sèlman nan Tanp

Rad lamarye a Yon rad lamarye mete nan tanp lan dwe blan, yon twal senp ini, ki pa gen okenn desen konplike. Li ta dwe kouvri gaman an tou Twal ki transparan ta dwe double

Pou konsistans avèk lòt rad yo mete nan tanp lan, rad yon lamarye ta dwe gen manch long oswa twa ka manch. Rad yo pa ta dwe gen trèn amwenske li ka tache oswa retire l pou seremoni sèlman an.

Tanp lan ka bay yon rad si sa nesesè oswa si moun nan vle.

Rad Mesye a. Lemarye a mete rad tanp nòmal pandan maryaj la oswa seremoni sèlman an (gade 38.5.1 ak 38.5.2).

Rad envite yo. Moun ki asiste yon maryaj oswa seremoni sèlman yo ta dwe mete rad ki sanble ak sa yo t ap mete nan yon reyinyon Sentsèn. Manm ki vini nan yon sèlman ki soti dirèkteman nan yon sesyon dotasyon ka mete rad seremoni tanp lan.

Flè. Koup la ak envite yo pa ta dwe mete flè pandan maryaj la oswa seremoni sèlman an.

27.3.2.7

Echanj Bag apre yon Maryaj Tanp oswa Sèlman

Echanj bag se pa yon pati nan seremoni tanp lan. Sepandan, koup yo ka chanje bag apre seremoni an nan sal sèlman an. Koup yo pa ta dwe chanje bag nan okenn lòt lè oswa kote nan yon tanp oswa nan lakou tanp lan.

Koup ki marye e ki sele nan menm seremoni an ka fè echanj bag pita nan yon moman pou yo satisfè manm fanmi yo ki pa kapab asiste yon maryaj nan tanp. Echanj la pa ta dwe replike okenn pati nan maryaj tanp lan oswa seremoni sèlman an. Koup la pa ta dwe fè echanj ve apre yo fin marye oswa sele nan tanp lan.

Koup ki marye sivil anvan sèlman tanp yo a ka fè echanj bag nan seremoni sivil yo a, nan sèlman tanp yo a, oswa nan tou de seremoni yo.

27.3.4

Ki moun ki ka asiste yon maryaj tanp oswa sèlman

Koup yo ta dwe envite sèlman manm fanmi yo ak zanmi yo nan yon maryaj tanp oswa yon sèlman. Manm responsab yo dwe dote epi gen yon rekòmandasyon tanp ki valid pou yo patisipe.

Prezidan pieu a ka otorize yon moun ki pa batize oswa ki pa dote akòz andikap entelektyèl pou obsève maryaj tanp oswa sèlman frè l oswa sè l. Moun nan dwe:

• Gen omwen 18 an.

• Kapab rete reveran pandan seremoni an.

Prezidan pieu a ekri yon lèt ki deklare ke moun nan gen otorizasyon pou obsève sèlman an. Yo prezante lèt sa a nan tanp lan.

27.4

Sele timoun vivan ak paran yo

Timoun ki fèt apre manman yo fin sele ak yon mari nan yon tanp fèt nan alyans sèlman sa a. Yo pa bezwen resevwa òdonans sèlman avèk paran yo.

Timoun ki pa fèt nan alyans lan ka vin fè pati yon fanmi etènèl lè yo sele ak paran nesans yo oswa paran adoptif yo. Timoun sa yo gen dwa ak menm benediksyon menmjan ak moun ki te fèt nan alyans lan.

27.4.2

Kontakte Tanp lan

Yon koup ki vle gen pitit yo sele avèk yo, oswa pitit ki vle sele avèk paran ki mouri yo, dwe kontakte tanp lan davans pou yo pwograme òdonans lan.