27.

Chedaol Ruoll er a Templo el kirir a re Ngar

27.0

Uchelel

A templo blil a Rubak. Ng oterkeklid el bedul a Osobel, Jesus Kristo. Ngara elsel a templo, ekede mo meruul aikal chedaol ruoll e meruul a telbiled lobengkel a Demad er a Babeluades el merenged er kid el mo er Ngii me a Osobel. Aikal telbiil me a chedaol ruoll a mengedmokl er kid el lemuut el mobengkel a Demad er a Babeluades e mo merenged el telungalek el mo cherechar.

Aikal telbiil me a chedaol ruoll er a templo, “ea klisichel a keldios a mo chemolt” (Doctrine and Covenants 84:20).

A telbiil me a ruoll era templo a chedaol. Aikal olangch el osisiu ngii me telbiil er a templo a diak el kired el mesaod sel om tobed er a templo. Ma diak dosaod aikel chedaol tekoi el blem yaksok er a chelsel a templo. Eng di, ng sebeched el mesaod aikel moktek ma llechul a chedaol ruoll ma telbiil er a templo ma ikel mlara rengud sel de ngara elsel a templo.

A remerredel er a ward ma stake a mo mesaod aikel tekoi er tial bliongel lobengterir a rechedal a Ikelesia el mengedmokl er tir el mo soiseb er a templo malechub a chedaol ruoll kirel a merenged.

27.1

Melai a Chedaol Ruoll er a Templo

27.1.1

Mengedmokl el mo Melai a Chedaol Ruoll er a Templo

A rechedal a Ikelesia a kirir el mengedmokl er tir er a chedaol tekoi el mo melai a chedaol ruoll er a templo e mo mengull a telbilir er a templo.

A roungalek a kirir lolngeseu er a rengelekir el mo mengedmokl er tir mo melai chedaol ruoll er a templo. A remerredel er a stake ma ward, rodam ma rodos el mesiou, me a rechad er a telungalek a mo olngeseu er a chedam ma chedil er tial omeruul.

Klekedall el ngosuterir a rechedal a ikelesia el mo ngmai a chedaol ruoll er a templo a ngarnii er a temples.ChurchofJesusChrist.org.

A rechedal a ikelesia el mengedmokl el mo melai a klengeltengat a lechub ete moak el mora rebecherir a kirir mo ngara omesuub (mesa 25.2.8).

27.1.3

Rechedal a Ikelesia el Sechudel a Bedengir

A reklikiid el chedal a ikelesia el sechudel a bedengir a sebechir el ngmai a chedaol ruoll er a templo. Tirkal chedal a ikelesia a kirir el mo er a templo lobengtrir a re sebechir el soiseb el chederir malechub a sechelirir ra osisiu el teletael el ngosuterir. Alsekum a rechedal a ikelesia diak el sebchir el mong lobengkel a chad ra telungalek malechub a sechelil, eng sebchir lomekedong er a templo lomes el kmo ngera sebechir kudmeklii.

27.1.4

Ngesou ra Oidel ma Oleuiid a tekoi

A rechad lousbech a ngesou ra oleuiid a tekoi, a kirir uchei ete mengedecheduch el mora ngara templo el uase ngarngii.

27.1.5

Bail ra mora Templo

Sel bora templo, ea rechad oubail aikel bail le blecheol loubail sel Sandei.

Mesa 27.3.2.6 ra omesodel a bail doubail sel bo debechiil a lechub ekede mo moak ra templo.

Mesa 38.5 el kirel omesodel a:

• Bail doubail ra temel a klengeltengat ma chedaol ruoll ra omerenged.

• Melai, oubail, e omekerreu a bail ra templo ma garment.

27.1.6

Ulekerreu ra ngalek

A rengalek a kirel ngarngii a klou el chad lomes er tir sel ngara maori ra templo. A roureor ra templo a ngarngii el omes ra rengalek ng di te oltirakl aikakid el teletael:

• Tirkal ngalek a mla merenged el mora rechad ra blirir.

• Alsekum te omes ra omerenged er a re ngar el bebil tir, diak el ta demerir a lechub a derir, a lechub ng diak el ta chedam ng chedil mora rechad ra blirir.

27.1.7

Miting lobengterir a Rechad ruriul ra Lengai Chedaol ruoll er a Templo

A rechad a blechoel ngarngii a rraureng er tir ruriul ra lengai a chedaol ruoll ra templo. Rechad ra telungalek el mla ngmai a klengeltengat, bebil ra oungerachel ra ward, ma rodam ma rodos loldingel a sebechir el mo kebetech lobenterir e mesaod a teletael ra templo.

Klekdall lolngeseu longer a ker a ngarngii ra temples.ChurchofJesusChrist.org.

27.2

Klengeltengat

A tekoi el klengeltengat a belkul a kmo “sengk.” A klengeltengat ra templo a mera er ngii a sengk ra Dios luchul e Ngii omekngeltengat er a Rengelekel. A bebil er a sengk el rechad a ngmai lokiu a templo a uldimukl er ngii a:

• Klou klemedengei ra moktek ma osischeklel a Rubak.

• Klisiich el mo meruul aikel rokui el Chedam ra Babeluades a soal a Rengelekel a bo loruul.

• Chedaol ulekrael sel losiou ra Rubak, telungalek, me a rebebil.

• Mo klou a urungulir, ongelaod, ma budech.

Aikal klengeltengat a ultuil ra blakereng ra ebangkelio ra Jesus Kristo.

A klengeltengat a mengai ra erul rolel. A kot, a chad a ngmai aikel uchelel chedaol ruoll el okedongall el initatory. A initiatory a dirrek dodengelii el omerisou ma omengedaol (mesa Exodus 29:4–9). Ngobengkel a tokubets el klengeltengat er sel chedaol kerresel ma ultekellel a chad.

Sel temel a initiatory, eng mo sebechel a chad loubail a garment. A garment a olchotel a deleuill ra chad ma Dios ma blakereng el mo oltirakl a telbiil meruul ra templo. Sel blak a rengrir a rechad loltirakl a telbilir e kerekikl lungil loubail a garment ra klengar tir, eng mo omecheliu er tir. A lmuut el bebil ra omesodel a doubail ma dongedmokl a garment, e mesa 38.5.5.

Sel ongeru el telengtengil a klengeltengat, el uldasu ra mo suobel a mosisechakl, a uldimukl a Blebelel a beluulechad, rebetel a Addam ma Eva, Tngakireng ra Jesus Kristo, ma Rebet, ma Oluut. A rechad a ngmai omesodel a kmo ng mekera deluut el mo ra rengedel a Rubak.

Chelsel a klengeltengat, a rechad a mo meruul a chedaol telbiil el uaikakid:

• Oltirakl ra llechul olngesenges e melasm loltirakl a llechul a Chedam ra Babeluades.

• Olngesenges ra llach ra mo chuarm, el belkul a kmo te mo chuarm el mesiou ra urerel a Rubak e ouchel a rengrir loba ngariou ma medemdemk el reng.

• Oltirakl ra llechul ebangkelio ra Jesus Kristo, el ngii a ngarbab llach el Ngii a ulsisechakl ra lengara beluulechad.

• Oltirakl ra llach ra teletael ra deleboes, el belkul a kmo a chedal a ikelesia a di meruul a teletael ra deleboes lobengkel a chad el tir a kaubuch loltirakl a llechul a Dios

• Oltirakl ra llechul a odars a omelenget, el belkul a kmo a rechedal a ikelesia a chemoit a temir, duch er tir, ma ikel rokui el Rubak a mla omekngletengat er tir el mo meleketek ra Ikelesia ra Kristo ra beluulechad.

Ea kuk, Chedam ra Babeluades a yaksok el kmo tirkel melemolem el blak a rengrir ra telbilir ra templo a mo ngmai a klengeltengat lobengkel a klisiich ra eanged (Doctrine and Covenants 38:32, 38; dirrek el mesa Lukas 24:49; Doctrine and Covenants 43:16).

27.2.1

Ng Techa Sebechel Ngmai a Klengeltengat

Rokui el meklunga el chedal a Ikelesia a sebechir el mengedmokl el mo ngmai a klengeltengat el kirir. A rokui ruoll ruchei a kirel mekedmokl e mo llechukl ruchei ra rechedal a ikelesia lengai a klengeltengat (mesa 26.3.1).

27.2.1.1

Beches el mla Metecholb el Chedal a Ikelesia

A klikiid el klou el chad el beches el chedal a ikelesia a sebchel ngmai a klengletengat el kesengil eng tal rak ruriul ra oterkeklel.

27.2.1.2

Rechedal a Ikelesia el Becherir a Dirkak el Ngai a Klengeltengat

A klikiid el chedal a ikelesia el bechil a dirkak el ngai a klengeltengat a sebchel ngmai alsekum aikakid a mekedmokl:

• A bechil el dirkak el ngai a klengeltengat a kongei.

• A chad, bisop, ma merredel ra stake a ungil a rengrir e medengei el uase a ngerachel lobengkel a telbiil ra templo a diak bol temelii a chebechiil.

Aikal teletael a morngii a lechad ra ikeleisa bechil ma lak.

27.2.1.3

Rechedal a Ikelesia el Ngarngii a Secherel a Bdelrir

Rechedal a ikelesia el ngarngii a secherel a bdelrir a sebechir el ngmai a klengeltengat el kirir alsekum:

• Te mla ngmai ikel rokui el chedaol ruoll (mesa 26.3.1).

• Te mui el medengei e bleketakl ra uldesuir, el meruul, e oltirakl a telbiil lobengkel.

A bisop a mengedechduch lobengkel a chad, ea lsebechel, ma rechad ra blil. Ng dirrek losiik a ulekrael ra Chedaol reng. Ng dirrek el sebechel mengedecheduch lobengkel a merredel ra stake.

27.2.2

Omdasou el kmo Oingerang eng mo Melai a Klengeltengat

A uldasou el mo melai a klengletengat a di iior ra chad e ngara nglunguuch el kirel. Aikang a klengeltengat ma chedaol ocholt el mora rokui el kldmokl mo ngmai. A rechad a sebechir melilt el mo ngmai a klengeltengat er tir sel bla lotirakl a ikakid el tekoi:

• Ng kirir kesengil eng teruich ma eai a rekrir.

• Te mla momerek a lechub eng mla mo diak el ngara high skuul, daingak, a lechub a uai ngii.

• Mla mo tal rak ra le moterekokl.

• Te semeriar el mo ngmai e mengull a chedaol telbill ra templo ra klengar tir.

A rechad el mla nguu okedong el mora mision a lechub ete mengedmokl er tir el mo merenged ra templo a kirir el ngmai a klengeltengat.

Uchei ra lenguu a babier ra mora templo el mo ngmai a klengeltengat, a bisop ma merredel ra stake a kirel omelchesiu el uase chad a kldmokl e medengei el mo oltirakl a telbiil ra templo. Tia di mo ultuil ra dersta el chad el mla mo sebechir el mong.

27.2.3

Melib ma Iioter ra melai a Klengeltengat

27.2.3.1

Melai ra Babier ra kengei el kirel Chedaol ruoll el kirir a re Ngar

A chad a kirel nguu a babier ra kengei el kirel chedaol ruoll ra re ngar el mo soiseb ra templo e melai a klegeltengat. A omesodel aikang el babier ra kengei, e mesa 26.5.1.

27.2.3.2

Mengedecheduch el mora Templo

A rechad el melatk el mo melai a klengeltengat a kirir mengedecheduch el mora templo ruchei el rulii a iioter tir.

27.2.3.3

Eskort ra Rechad el mo Melai a Klengeltengat

A rechad el melai a klengeltengat er tir a sebechir siotai ra mla ngmai a klengeltengat el chad el mo eskort e olngeseu er tir ra temel a sesion ra templo. A eskort a kirel loba beches el babier ngii ra mora templo. Ngarngii a re eskort ra templo a bo lusbechall.

27.3

Merenged ra Sechal ma Redil el mo Kaubuch

A omerenged ra templo a omak ra sechal ma redil mo dmak el mora ulebongel. Te mo ngmai ikal klengeltengat alsekum ete blak a rengrir loltirakl a telbilir meruul ra templo. Okiu tial chedaol ruoll, e a rengelekir a teloi er tir ra diak a ulebengelel telungalek.

A roungerachel a mengelechel ra rechad el mo kldmokl el mo bechiil e merenged er a templo. A basio el kuk diak longull a chebechiil ra templo, e a telutk loungerachel ra Ikelesia a lechub a rebebil a sebechir mekur a chebechiil loltirakl a teletelel omerenged ra templo (mesa 38.3). Tial teletael a dirrek el sebechel motirakl sel sekum a chebechiil ra templo a rulterir a rechad ra blil a lechub a re kmeed er ngii el chad el uaia lurbetakl le tir el diak el sebechir el mora merengel a chebechiil.

27.3.1

Ng Techa Sebechel mo Merenged er a Templo

A rokui el meklou el chad el diak el bechiil chad ra Ikelesia a sebechir el mo kldmokl el mo merenged ra templo. Tirkel di bechiil ra beluu a sebechir el mo merenged ra templo el mora ulebongel sel rechedir el mo kldmokl. A rechad a kirir mla ngmai a klengeltengat ruchei er a lemerenged (mesa 27.2).

A robekel mla moak ra templo a sebechir el (1) bechiil ra beluu ruchei ra bol merenged a lechub (2) e temo bechiil e merenged ra templo ra osisiu el taem. Mesa 27.3.2.

27.3.1.2

Rechad el ngarngii a Secherel a Bdelrir

A rechad el ngarngii a secherel a bdelrir a sebechir el mo merenged el mora rebecherir, redil bol kaubuch, a lechub a sechal bol kaubuch alsekum:

• Te mla ngmai ikel rokui el chedaol ruoll, luldimukl ra klengeltengat (mesa 27.2.1.3).

• Ng sebechir el mui el medengei, e meruul, e oltirakl a telbiil lobengkel.

A bisop a mengedecheduch ra chad ma bechil, a lechub, a chad el bol bechiil. Ng dirrek losiik a ulekrael er a Chedaol reng. Ng dirrek el mo mengedecheduch ra merredel ra stake.

27.3.2

Melib ma Iioter ra Chebechiil a lechub Omerenged ra Templo

27.3.2.1

Melai ra Babier el mora templo ra Chedaol ruoll ra re Ngar

A chad a kirel nguu a babier ra mora templo el kirel chedaol ruoll ra ngar el mo moak el mora bechil. A lmuut lomesodel aikal tekoi, e mesa 26.3.

27.3.2.2

Mengedecheduch el mora Templo

A rechad ra ikelesia el melatk el mo bechiil a lechub ete merenged el mora bechil a kirir di uchei ete mengedechduch el mora templo el rulii a iioter tir.

27.3.2.3

Melai ra Babier ra Chebechiil

Uchei ra bol bechiil, e a robekel a kirir el nguu a babier ra chebechielir lolecholt el kmo ng morngii er ker a merengel a chebechiil. Alsekum a robekel a sorir el mo bechiil e dirrek el merenged ra osisiu el taem, eng kirir el nguu a babier ra chebechiil el mora templo.

A robekel el mo merenged ruriul ra chebechiil ra beluu a diak a belkul loba babier ra chebechiil mora templo. Te di, ouchais ra sils ma basio el blol bechiil er ngii ra beluu meng mora record.

27.3.2.4

Eskort ra Redil ma Sechal mo Bechiil

A mla ngmai a klengeltengat lodos a sebechel mengelim ra redil mo bechiil lolngeseu el mengedmokl er ngii. A mla ngmai a klengeltengat el odam a sebechel meruul ra osisiu el mora sechal mo bechiil. A eskort a kirel loba beches el babier er a mora templo. A templo ngarngii a re eskort er ngii a bo lusbechall.

27.3.2.5

Ng Techa Meruul ra Chebechiil ma Omerenged ra Templo

A chebechiil ra templo a lechub omerenged a blechoel mekedmokl ra chad el merenged el ngii a mla moterekokl mora templo el robekel a mo bechiil a lechub e te mo merenged. Alsekum a chedal a telungalek a lechub a lodengelii el chad a oba ngerachel ra omerenged e moterekokl el mora templo el robekel a mo bechiil a lechub ete merenged, eng sebechir siotai er ngii el mo omak ra chebechiil a lechub omerenged.

27.3.2.6

Ungil Bail el Kirel a Chebechiil ma Omerenged ra Templo

Bilel a redil. A bilel a redil el mora templo a kirel becheleleu, e lungil a teletelel a resmelel, e diak louberberingel. Ng dirrek el kirel mertii a garment ra templo. A meliliut el bail a kirel ngarngii a chelsel.

Osisiu el uaikel bebil ra bail ra templo, e a bilel a redil mo bechiil a kirel mekemanget a chimal a lechub eng kirel a bkul chimal. Ng diak el ngarngii a kemanget lulkebekabes rullel riou aleskum eng diak el sebechel murodech a lechub el mengubet ra temel omerenged.

A templo a sebechel meskid a bail a dousbech a lechub a lsoad.

Bilel a sechal A sechal oubail a di bail ra templo ra temel a chebechiil a lechub omerenged (mesa 38.5.1 ma 38.5.2).

Bilir a re Okiak Tirkel ngara merengel a chebechiil a lechub omerenged a kirir loubail osisiu el bail omko te ngara miting ra sacrament. A rechad ra ikelesia el mei ra omerenged ruriul ra session a sebechir di oubail a bail ra templo.

Bung. A robekel ma re okiak er tir a diak lousbech a bung ra taem ra chebechiil a lechub a omerenged.

27.3.2.7

Melecha kabkab ruriul ra Chebechiil ra Templo a lechub Omerenged

A omelecha el kabkab a diak el telengtengil a chebechiil ra templo. Eng di, a robekel a sebechir locha kabkab ruriul ra chelsel sel delmerab ra omerenged. A robekel a diak lolecha kabkab ra ngii dil taem ma basio ra templo a lechub el maori ra templo.

A robekel el bechiil e moak ra osisiu el taem a sebechir locha kabkab ra uriul taem el kirir tirkel chad ra blirir el diak el sebechir el mei ra chebechiil ra templo. A melcha kabkab a diak el kirel mengaisisiu ra ngii di el ngerang ra chebechiil ra templo a lechub omerenged. A robekel a diak lolecha kabkab ruriul ra bol bechiil a lechub ete mla merenged ra templo.

A robekel bechiil ra beluu ruchei ra chebechiil ra templo a sebechir locha kabkab ra chebechielir ra beluu, ma chebechielir ra templo, a lechub e ngii eru el chebechiil.

27.3.4

Ng Techa Sebechel mora Chebechiil a lechub Omerenged ra Templo

A robekel a sebechir siotai ra re kmeed er tir el chederir ma resechelirir el mora chebechiil ra templo a lechub omerenged. A meklou el chad a kirir mla ngmai a klengeltengat e oba beches el babier ra mora templo.

A merredel ra stake a sebechel kongei ra tara chad el dirkak el metecholb a lechub eng mla ngmai a klengeltengat el iior ra secher a bdelul el mo omes a chebechiil ra templo ma omerenged ra rebebil er ngii. A chad a kirel.

• Kesengil eng teruich ma eai a rekil.

• Melemolem el ngara omengull ra temel a ceremony.

A merredel ra stake a luchesii a babier louchais el kmo ngkal chad oba kengei el mo omes omerenged. Tial babier a mocholt sel bora templo.

27.4

Merenged er a re Ngar el Ngalek el mora Rechad er a blirir

A rengalek el mechell ruriul ra delal a lemerenged el mora bechil ra chelsel a templo a mechell el ngara chelsel a telbiil. Ng diak a belkul lolai chedaol ruoll ra omerenged el mora rechad ra blirir.

A rengalek el dimlak el mechell ra chelsel a telbiil a sebechir mo chedal a telungalek el mora ulebongel el mo merenged el mora rulmechell er tir a lechub a remirrodel tir. Tirkal ngalek a sebechir ngmai osisiu el klengeltengat losisiu me tirkel mlechell ra chelsel a telbiil.

27.4.2

Melekoi el mora Templo

A robekel el sorir a rengelekir a le merenged el mor tir, a lechub ete rengalek el sorir el merenged el mora re mla mad el chad ra blirir, a kirir luchei ete melekoi el mora templo el rulii a iioter tir el kirel chedaol ruoll.