nobia ken nobio

27.

Dagiti Ordinansa iti Templo para kadagiti Sibibiag

27.0

Pakauna

Ti templo ket ti balay ti Apo. Itudonatayo iti Mangisalakan, ni Jesucristo. Kadagiti templo, makiramantayo kadagiti sagrado nga ordinansa ken mangaramid kadagiti katulagan iti Nailangitan nga Ama a mangibegkes kadatayo Kenkuana ken iti Mangisalakantayo. Dagitoy a katulagan ken ordinansa ti mangisagana kadatayo nga agsubli iti sidong ti Nailangitan nga Ama ken mailantip a sangkamaysa kas pamilia iti agnanayon.

Kadagiti katulagan ken ordinansa iti templo, “naipakita ti bileg ti kinadios” (Doktrina ken Katulagan 84:20).

Sagrado dagiti katulagan ken ordinansa iti templo. Saan koma a pagsasaritaan iti ruar ti templo dagiti simbolo a mainaig kadagiti katulagan iti templo. Wenno saantayo koma a pagsasaritaan ti nasantuan nga impormasion nga ikaritayo iti templo a saantayo nga ibutaktak. Nupay kasta, mabalintayo a pagsasaritaan dagiti kangrunaan a panggep ken doktrina dagiti katulagan ken ordinansa ti templo ken dagiti naespirituan a rikna nga adda kadatayo iti templo.

Pagsasaritaan dagiti lider ti ward ken stake ti impormasion iti daytoy a kapitulo kadagiti miembro nga agsagsagana nga umawat kadagiti ordinansa ti endowment wenno pannakailantip.

27.1

Panangawat kadagiti Ordinansa iti Templo

27.1.1

Panagsagana nga Umawat kadagiti Ordinansa iti Templo

Nasken a naespirituan nga isagana dagiti miembro ti bagbagida nga umawat kadagiti ordinansa iti templo ken agaramid ken agdayaw kadagiti katulagan iti templo.

Adda kangrunaan a pagrebbengan dagiti nagannak a mangtulong kadagiti annakda nga agsagana nga umawat kadagiti ordinansa iti templo. Dagiti lider ti stake ken ward, dagiti ministering brother ken sister, ken dagiti kabagyan a miembro ti mangsuporta kadagiti nagannak iti daytoy nga akem.

Dagiti resource a mangtulong kadagiti miembro nga agsagana nga umawat kadagiti ordinansa iti templo ket adda a magun-od iti temples.ChurchofJesusChrist.org.

Maallukoy dagiti miembro nga agsagsagana nga umawat iti bukodda nga endowment wenno mailantip iti asawa a makiraman iti kurso a panagsagana iti templo (kitaen iti 25.2.8).

27.1.3

Dagiti Miembro nga Addaan kadagiti Pagkurangan iti Bagi

Mabalin nga umawat iti amin nga ordinansa iti templo dagiti maikari a miembro nga addaan iti pagkurangan iti bagi. Maallukoy dagitoy a miembro a dumar-ay iti templo a kakuyogda dagiti na-endow a kabagian wenno gagayyem a kapada iti sekso a makatulong kadakuada. No saan a makadar-ay dagiti miembro a kakuyogda ti maysa a miembro ti pamilia wenno gayyem, mabalinda a tumawag a nasapsapa iti templo tapno kitaenda no ania dagiti pannakipagurnos a mabalin nga aramiden.

27.1.4

Tulong iti Panagipatarus wenno Panagyulog

No kasapulan dagiti miembro ti tulong iti panagipatarus wenno panagyulog, nasken a kontakenda a nasapsapa ti templo tapno makita no sidadaan a magun-od daytoy.

27.1.5

Kawes nga Isuot iti Templo

No mapan iti templo, nasken nga agsuot dagiti miembro iti kita ti kawes a gagangay nga isuotda iti miting ti sakramento.

Kitaen iti 27.3.2.6 para iti impormasion maipapan iti kawes nga isuot iti kallaysa wenno pannakailantip iti templo.

Kitaen iti 38.5 para iti impormasion maipapan iti:

• Kawes nga isuot bayat dagiti ordinansa ti endowment ken pannakailantip.

• Pananggun-od, panagisuot, ken panangaywan kadagiti seremonial a kawes ken garment iti templo.

27.1.6

Panangaywan iti Ubing

Nasken nga addaan dagiti ubbing iti superbision dagiti nataengan no addada iti paraangan ti templo. Sidadaan dagiti temple worker a mang-supervise kadagiti ubbing laeng kadagiti sumaganad a kasasaad:

• No mailantipda kadagiti nagannak kadakuada

• No imatanganda ti pannakailantip dagiti sibibiag a kakabsatda, stepsibling, wenno kakabsatda iti ama wenno ina kadagiti nagannak kadakuada

27.1.7

Pannakimiting kadagiti Miembro kalpasan ti Panangawatda kadagiti Ordinansa iti Templo

Masansan nga adda saludsod dagiti miembro kalpasan ti panangawatda kadagiti ordinansa iti templo. Mabalin a makipagmiting kadagiti miembro dagiti na-endow a miembro ti pamilia, ti bishop, dagiti dadduma pay a lider ti ward, ken dagiti ministering brother ken sister tapno pagsasaritaan ti padasda iti templo.

Dagiti resource a mangtulong a mangsungbat kadagiti saludsod ket adda a magun-od iti temples.ChurchofJesusChrist.org.

27.2

Ti Endowment

Ti balikas nga endowment kayatna a sawen ti “maysa a sagut.” Ti endowment iti templo ket literal a sagut manipud iti Dios a pangbendisionanna kadagiti annakna. Sumagmamano kadagiti sagut nga awaten dagiti miembro babaen ti endowment iti templo ket iramanna ti:

• Dakdakkel a pannakaammo kadagiti panggep ken pannursuro ti Apo.

• Bileg a mangaramid iti amin a pagayatan ti Nailangitan nga Ama nga aramiden dagiti annakna.

• Nadiosan a panangiturong no agserserbida iti Apo, kadagiti pamiliada, ken iti dadduma.

• Napadakkel a namnama, liwliwa, ken talna.

Ti pannakatungpal dagitoy a bendision ket agpannuray iti kinapudno iti ebanghelio ni Jesucristo.

Maawat ti endowment iti dua a paset. Iti umuna a paset, umawat ti maysa a tao iti umuna nga ordinansa a maawagan iti initiatory. Ti initiatory ket ammo pay a kas ti panangbuggo ken panangpulot (kitaen iti Exodo 29:4–9). Iramanna dagiti naisangsangayan a bendision a mainaig iti nadiosan a tawid ken potensial ti tao.

Kabayatan ti initiatory, autorisado ti miembro nga agkawes iti garment iti templo. Ti garment ti mangibagi iti personal a relasionna iti Dios ken ti panagkumitna nga agtungpal kadagiti katulagan a naaramid iti templo. No napudno dagiti miembro kadagiti katulaganda ken isuotda ti garment a siuumno iti unos ti panagbiagda, agserbi pay daytoy a maysa a salaknib. Para iti impormasion maipapan iti panangikawes ken panangaywan iti garment, kitaen iti 38.5.5.

Iti maikadua a paset ti endowment, maisuro ti plano ti pannakaisalakan, agraman ti Panagparsua, ti Pannakatnag da Adan ken Eva, ti Pannubbot ni Jesucristo, ti Apostasia wenno Ikakalilis iti Kinapudno, ken ti Pannakaisubli. Umawat pay dagiti miembro iti instruksion no kasano ti agsubli iti sidong ti Apo.

Iti endowment, maawis dagiti miembro nga agaramid kadagiti sagrado a katulagan kas iti sumaganad:

• Agbiag iti linteg ti panagtungpal ken ikarigatan a tungpalen dagiti bilin ti Nailangitan nga Ama.

• Agtungpal iti linteg ti panagsakripisio, a kayatna a sawen ti panagsakripisio a mangsuporta iti aramid ti Apo ken panagbabawi nga addaan iti nasneban a puso ken napnuan babawi nga espiritu.

• Agtungpal iti linteg ti ebanghelio ni Jesucristo, a daytoy ti nangatngato a linteg nga insurona kabayatan ti kaaddana iti daga.

• Agtungpal iti linteg ti kinadalus iti dayaw, a kayatna a sawen a ti maysa a miembro ket seksual a makinaig laeng iti tao a pakikallaysaanna a legal ken mayannurot iti linteg a maibatay iti linteg ti Dios.

• Agtungpal iti linteg ti panagkonsagrar, a kayatna a sawen nga idaton dagiti miembro ti panawenda, dagiti talentoda, ken amin nga imbendision ti Apo kadakuada iti pannakabangon ti Simbaan ni Jesucristo iti daga.

Kas supapak, ikari ti Nailangitan nga Ama a dagiti agtalinaed a napudno kadagiti katulaganda iti templo ket maparaburandanto iti “pannakabalin manipud iti ngato” (Doktrina ken Katulagan 38:32, 38; kitaen met iti Lucas 24:49; Doktrina ken Katulagan 43:16).

27.2.1

Asino ti Mabalin nga Umawat iti Endowment

Maawis ti amin nga addan sungsungbatanna a nataengan a miembro ti Simbaan nga agsagana ken umawat iti bukodda nga endowment. Nasken a maaramid ken mairekord ti amin a kasapulan nga ordinansa sakbay a makaawat dagiti miembro iti endowment (kitaen iti 26.3.1).

27.2.1.1

Dagiti Kabumbuniag a Miembro

Mabalin nga awaten dagiti maikari a nataengan a baro a miembro ti endowment-da iti saan a kumurang a maysa a naan-anay a tawen manipud iti petsa ti kumpirmasionda.

27.2.1.2

Dagiti Miembro nga Addaan iti Saan Pay a Na-endow nga Asawa

Ti maysa a maikari a miembro a saan a na-endow ti asawana ket mabalinna nga awaten ti bukodna nga endowment no matungpal dagiti sumaganad a kondision:

• Ited ti saan a na-endow nga asawa ti pammalubosna.

• Agtalek ti miembro, bishop, ken stake president a ti pagrebbengan a naibaklay kadagiti katulagan iti templo ket saanto a mangsinga iti panagasawa.

Mayaplikar dagitoy a kondision no miembro man ti asawa ti Simbaan wenno saan.

27.2.1.3

Dagiti Miembro nga Addaan kadagiti Intelektual a Pagkurangan

Dagiti miembro nga addaan iti intelektual a pagkurangan ket mabalinda ti umawat iti bukodda nga endowment no:

• Naawatdan amin a kasapulan nga ordinansa (kitaen iti 26.3.1).

• Addaanda iti intelektual a kapasidad a makaawat, mangaramid, ken mangtungpal kadagiti mainaig a katulagan.

Kauman ti bishop ti miembro ken, no mayaplikar, dagiti nagannak kenkuana. Kiddawenna pay ti panangiturong ti Espiritu. Mabalinna ti makiuman iti stake president.

27.2.2

Panangikeddeng No Kaano ti Panangawat iti Endowment

Personal ti pangngeddeng nga umawat iti endowment ken nasken nga aramiden a nainkararagan. Ti endowment ket maysa a bendision ti bileg ken paltiing kadagiti amin nga agsagana nga umawat iti daytoy. Mabalin a pilien dagiti miembro nga agtarigagay nga umawat iti bukodda nga endowment no matungpalda ti amin a sumaganad a kondision:

• Saan a kumurang a 18 ti tawenda.

• Nalpasdan wenno saandan nga agad-adal iti haiskul, sekondaria, wenno ti katupagna.

• Maysa a naan-anay a tawen ti napalabas manipud idi nakumpirmaanda.

• Mariknada ti tarigagay nga umawat ken mangdayaw kadagiti sagrado a katulagan iti templo iti unos ti panagbiagda.

Nasken nga umawat iti endowment dagiti miembro a nakaawat iti awag iti mision wenno agsagsagana a mailantip iti templo.

Sakbay ti panangisyu iti maysa a temple recommend iti maysa a miembro nga umawat iti endowment, nasken a marikna ti bishop ken stake president a nakasaganan ti tao a makaawat ken mangtungpal kadagiti sagrado a katulagan iti templo. Daytoy a pannakaikari ti mangikeddeng a saggaysa para iti tunggal tao.

27.2.3

Panangplano ken Panangiskediul iti Endowment

27.2.3.1

Panangawat iti Recommend para kadagiti Ordinansa para iti Sibibiag

Masapul nga umawat ti maysa a miembro iti recommend para kadagiti ordinansa para iti sibibiag tapno makastrek iti maysa a templo ken umawat iti endowment. Para iti impormasion maipapan kadagitoy a recommend, kitaen iti 26.5.1.

27.2.3.2

Panangkontak iti Templo

Dagiti miembro nga agplanplano nga umawat iti endowment ket kontakenda koma a nasapsapa ti templo tapno mangiskediul iti ordinansa.

27.2.3.3

Dagiti Escort para kadagiti Miembro nga Umaw-awat iti Endowment

Dagiti miembro nga umaw-awat iti bukodda nga endowment ket mabalinda ti mangawis iti maysa a na-endow a miembro a kapadana a lalaki wenno babai tapno agakem kas maysa nga escort ken mangtulong kadakuada bayat ti sesion ti endowment. Nasken nga addaan ti escort iti agdama a temple recommend. Mabalin ti templo ti mangipaay iti maysa nga escort no kasapulan.

27.3

Pannakailantip dagiti Agassawa

Ti pannakailantip iti templo ket mamagtipon iti agassawa para iti panawen ken iti amin a kinaagnanayon. Awatendanto dagitoy a bendision no napudnoda kadagiti katulagan nga aramidenda iti templo. Babaen iti daytoy nga ordinansa, mabalin pay a paset ti agnanayon a pamiliada dagiti annakda.

Allukoyen dagiti lider ti Simbaan dagiti miembro nga agsagana nga agkallaysa iti templo ken mailantip iti maysa a templo. Kadagiti lugar a saan a legal a mabigbig dagiti panagkallaysa iti templo, mabalin dagiti napusgan a lider ti Simbaan wenno dadduma a mangannong kadagiti sibil a panagkallaysa a sarunuen ti pannakailantip iti templo (kitaen iti 38.3). Mabalin pay a masurot daytoy a pagtuladan no ti panagkallaysa iti templo ti mabalin a pakaigapuan ti panagrikna dagiti nagannak wenno kapamilia a nailaksidda gapu ta saanda a makadar-ay iti seremonia ti templo.

27.3.1

Asino ti Mabalin nga Ilantip iti Templo

Maawis ti amin nga addan sungsungbatanna nga awan pay asawana a miembro ti Simbaan tapno agsagana para iti pannakailantip iti templo. Maallukoy dagiti nagkallaysa iti sibil a mailantip para iti panawen ken kinaagnanayon iti templo apaman a makapagsaganada. Nasken a ma-endow dagiti miembro sakbay a mabalinda a mailantip (kitaen iti 27.2).

Nasken a dagiti agassawa a mailantip iti templo a (1) nagkallaysada iti sibil sakbay a mailantipda wenno (2) agkallaysa ken mailantipda iti maymaysa a seremonia iti templo. Kitaen iti Moroni 38.6:5.

27.3.1.2

Dagiti Miembro nga Addaan kadagiti Intelektual a Pagkurangan

Dagiti miembro nga addaan iti intelektual a pagkurangan ket mabalinda ti mailantip iti asawa, nobio, wenno nobiada no:

• Naawatdan ti amin a kasapulan nga ordinansa, agraman ti endowment (kitaen iti 27.2.1.3).

• Addaanda iti intelektual a kapasidad a makaawat, mangaramid, ken mangtungpal kadagiti mainaig a katulagan.

Kauman ti bishop ti miembro ken ti asawa, nobio, wenno nobiana. Kiddawenna pay ti panangiturong ti Espiritu. Mabalinna ti makiuman iti stake president.

27.3.2

Panangplano ken Panangiskediul iti Kallaysa wenno Pannakailantip iti Templo

27.3.2.1

Panangawat iti Recommend para kadagiti Ordinansa para iti Sibibiag

Masapul nga umawat ti maysa a miembro iti recommend para kadagiti ordinansa para iti sibibiag tapno mailantip iti asawana. Para iti impormasion maipapan kadagitoy a recommend, kitaen iti 26.3.

27.3.2.2

Panangkontak iti Templo

Dagiti miembro nga agplanplano nga agkallaysa wenno mailantip iti asawa ket kontakenda koma a nasapsapa ti templo tapno mangiskediul iti ordinansa.

27.3.2.3

Pananggun-od iti Lisensia iti Panagkallaysa

Sakbay ti panagkallaysa, nasken a mangala ti agassawa iti legal a lisensia ti panagkallaysa a balido iti lugar a pakaaramidan ti kallaysa. No plano ti agassawa nga agpada a maikallaysa ken mailantip iti maymaysa a seremonia, masapul a mangitugotda ti balido a lisensia ti panagkallaysa iti templo.

Dagiti agassawa a mailantip kalpasan ti panagkallaysa iti sibil ket saan a nasken a mangitugotda ti lisensia ti kallaysa iti templo. Imbes ketdi, itedda ti petsa ken lugar ti nagkallaysaanda iti sibil kas paset ti proseso ti beripikasion iti rekord.

27.3.2.4

Dagiti Escort para iti Nobia ken Nobio

Mabalin a kuyogen ti na-endow a kabsat a babai ti nobia tapno tumulong kenkuana iti dressing room. Mabalin met nga aramiden ti maysa a na-endow a kabsat a lalaki ti kasta met laeng para iti nobio. Nasken nga addaan ti escort iti agdama a temple recommend. Mabalin ti templo ti mangipaay iti maysa nga escort no kasapulan.

27.3.2.5

Asino ti Mangannong iti Kallaysa wenno Pannakailantip iti Templo

Ti kallaysa wenno pannakailantip iti templo ket kadawyan nga aramiden ti maysa a sealer a nadutokan iti templo a pagkallaysaan wenno pakailantipan dagiti agassawa. No ti maysa a miembro ti pamilia wenno kaam-ammo ti addaan iti turay a mangilantip ken naidutok iti templo a pagkallaysaan wenno pakailantipan ti agassawa, mabalinda nga awisen isuna a mangannong iti kallaysa wenno pannakailantip.

27.3.2.6

Maitutop a Kawes para iti Kallaysa wenno Pannakailantip iti Templo

Bado ti Nobia. Nasken a ti bado ti nobia iti templo ket puraw, disente iti disenio ken tela, ken awanan iti nagarbo nga arkos. Nasken pay a daytoy ti mangabbong iti garment iti templo. Nasken a saan nga agsaragasag dagiti narasay a tela.

Tapno maitunos iti dadduma pay a kawes nga isuot iti templo, nasken nga atiddog ti manggasna wenno tallo a kakapat ti manggasna ti bado ti nobia. Awanan koma iti atiddog a tela iti likud dagiti bado malaksid no mabalin a yaspili wenno maikkat para iti seremonia ti pannakailantip.

Mabalin ti templo ti mangipaay iti maysa a bado no kasapulan wenno tarigagayan.

Kawes ti Nobio. Agsuot ti nobio iti gagangay a kawes iti templo bayat ti seremonia ti kallaysa wenno pannakailantip (kitaen iti 38.5.1 ken 38.5.2).

Kawes dagiti Sangaili. Agsuot dagiti dumar-ay iti seremonia ti kallaysa wenno pannakailantip iti kawes a kapada iti no ania ti kawesda iti miting ti sakramento. Dagiti miembro a mapan a dagus iti pannakailantip manipud iti sesion ti endowment ket mabalinda ti agsuot iti seremonial a kawes iti templo.

Sabsabong. Saan koma nga agusar ti agassawa ken dagiti sangailida iti sabsabong bayat ti seremonia ti kallaysa wenno pannakailantip.

27.3.2.7

Panagsinnukat iti Singsing kalpasan ti Kallaysa wenno Pannakailantip iti Templo

Saan a paset ti seremonia ti pannakailantip iti templo ti panagsinnukat iti singsing. Nupay kasta, mabalin nga agsinnukat dagiti agassawa iti singsing kalpasan ti seremonia iti siled a paglantipan. Saan koma nga agsinnukat dagiti agassawa iti singsing iti ania man a sabali nga oras wenno lugar iti templo wenno iti paraangan ti templo.

Dagiti agassawa nga agkallaysa ken mailantip iti maymaysa a seremonia ket mabalinda ti agsinnukat iti singsing iti nagabgabay nga oras tapno maaddaan iti gundaway dagiti miembro ti pamilia a saan a makadar-ay iti kallaysa iti templo. Ti panagsinnukat ket saan koma a mangtulad iti ania man a paset ti seremonia ti kallaysa wenno pannakailantip iti templo. Saan koma nga agsinnukat ti agassawa iti kari kalpasan ti panagkallaysa wenno pannakailantip iti templo.

Dagiti agassawa a nagkallaysa iti sibil sakbay ti pannakailantipda iti templo ket mabalinda ti agsinnukat iti singsing iti seremoniada iti sibil, iti pannakailantipda iti templo, wenno iti agpada a seremonia.

27.3.4

Asino ti Mabalin a Dumar-ay iti Kallaysa wenno Pannakailantip iti Templo

Nasken nga awisen laeng dagiti agassawa dagiti nasinged a miembro ti pamilia ken gagayyem iti kallaysa wenno pannakailantip iti templo. Nasken nga addaan dagiti addan sungsungbatanna a miembro iti agdama a temple recommend.

Mabalin a pusgan ti stake president ti maysa a tao a saan a nabuniagan wenno na-endow gapu kadagiti intelektual a pagkurangan tapno mangimatang iti kallaysa iti templo wenno pannakailantip dagiti sibibiag a kakbsatna. Nasken a ti tao:

• Saan a kumurang a 18 ti tawenna.

• Makapagtalinaed a naulimek bayat ti seremonia.

Agsurat ti stake president a mangdakamat a napusgan ti tao a mangimatang iti pannakailantip. Maidatag daytoy a surat iti templo.

27.4

Pannakailantip dagiti Sibibiag nga Annak kadagiti Nagannak

Dagiti annak a mayanak kalpasan a nailantip ti inada iti asawa iti templo ket mayanakda iti katulagan dayta a pannakailantip. Saan a nasken nga umawatda iti ordinansa ti pannakailantip kadagiti nagannak.

Dagiti annak a saan a mayanak iti katulagan ket makapagbalinda a paset ti agnanayon a pamilia babaen ti pannakailantip kadagiti nangipasngay wenno nangampon a nagannak kadakuada. Maikari dagitoy nga annak kadagiti isu met la a bendision a kas kadagiti nayanak iti katulagan.

27.4.2

Panangkontak iti Templo

Ti agassawa nga agtarigagay a mailantip dagiti annakda kadakuada, wenno annak nga agtarigagay a mailantip kadagiti pimmusay a nagannak kadakuada, ket kontakenda koma a nasapsapa ti templo tapno mangiskediul iti ordinansa.