28.

Sauniga o le Malumalu mo Ē ua Maliliu

28.0

O Le Faatomuaga

O sauniga e faatinoina i totonu o malumalu ua mafai ai e aiga ona faatasia mo le faavavau ma lagonaina le atoaga o le olioli i le afio’aga o le Atua.

Mo fanau a le Tama Faalelagi ina ia toe foi atu ia te Ia, e tatau ia i latou taitoatasi ona salamo, ia agavaa e maua sauniga o le faaolataga ma le faaeaga, ma faamamalu feagaiga e o faatasi ma sauniga taitasi.

Na silafia e le Tama Faalelagi o le toatele o Ana fanau o le a le mauaina nei sauniga i le taimi o o latou olaga faaletino. Sa Ia saunia se isi auala mo i latou e maua ai sauniga ma osia ai feagaiga ma Ia. I totonu o malumalu, e mafai ona faatino ai sauniga e ala i le fai ma sui [mo se ua maliu]. O lona uiga e maua e se tagata o loo soifua ia sauniga e fai ma sui mo se tasi ua maliu. I le lalolagi o agaga, e mafai e tagata ua maliliu ona filifili e talia pe teena sauniga na faatinoina mo i latou (tagai i le Mataupu Faavae ma Feagaiga 138:19, 32–34, 58–59).

Ua uunaia tagata o le Ekalesia e faailoa tauaiga ua maliliu o ē e le’i mauaina sauniga o le faaolataga ma le faaeaga. Ona faatino lea e tagata o le Ekalesia ia sauniga e fai ma sui o na tauaiga.

Afai e le’i saunia e tagata ni igoa o aiga mo galuega faalemalumalu (tagai i le 28.1.1), o igoa o tagata ua maliliu o ē e manaomia sauniga o le a tuuina atu i le malumalu.

28.1

Taiala Aoao mo le Faatinoina o Sauniga Sui

O tagata ua maliliu o ē ua ta‘i 8 tausaga pe matutua atu i le taimi na maliliu ai, e i ai sauniga sui e mafai ona faatinoina mo i latou. Sei vagana ai e pei ona ta’ua i le 28.3, e mafai ona faatinoina sauniga sui mo tagata uma ua maliliu i le taimi lava e mavae ai le 30 aso mai lo latou aso na maliu ai pe afai e faatatau ai se tasi o sauniga nei:

• E auina atu e se tagata vavalalata o le tauaiga o lē ua maliu (toalua e le’i tatalaina le faaipoipoga, fanau matutua, mātua, po o se uso/tuafafine/tuagane) le igoa mo sauniga o le malumalu.

• O le faatagaga e faatino ai sauniga e maua mai se tagata vavalalata o le tauaiga o lē ua maliu (toalua e le’i tatalaina le faaipoipoga, fanau matutua, mātua, po o se uso/tuafafine/tuagane).

Afai e leai se tasi o tulaga o i luga e faatatau i ai, e mafai ona faatinoina sauniga sui o le malumalu i le 110 tausaga talu ona mavae le fanau mai o le tagata ua maliu.

28.1.1

Sauniaina o Igoa o Tagata ua Maliliu mo Sauniga o le Malumalu

I nofoaga e mafai ai, o faamatalaga e faailoa ai tagata o le aiga ua maliliu e tatau ona taina i totonu o le FamilySearch.org a o le’i faatinoina sauniga o le malumalu (tagai i le 25.4.2).

28.1.1.1

Auina Atu o Igoa o Tagata o le Aiga

Pe a auina atu igoa mo sauniga sui o le malumalu, e masani lava, e tatau i tagata o le Ekalesia ona auina atu na o igoa o tagata latou te aiga i ai.

28.1.2

O Ai e Mafai Ona Auai i Sauniga mo Ē ua Maliliu

O tagata uma o le Ekalesia o loo i ai se pepa faataga o le malumalu o loo aoga e mafai ona auai i papatisoga ma faamauga mo ē ua maliliu. O tagata o le Ekalesia ua maua faaeega paia o loo i ai se pepa faataga aoga o le malumalu e mafai ona auai i sauniga uma mo ē ua maliliu. Tagai i le 26.3.

28.1.4

Faatulagaina

Atonu e manaomia e tagata o le Ekalesia ona faia se taimi faatulagaina a o le’i faatinoina sauniga mo ē ua maliliu. Tagai i le temples.ChurchofJesusChrist.org mo faamatalaga e faafesootai ai malumalu taitasi ma tulaga manaomia mo taimi faatulagaina.

28.2

Faatinoina o Sauniga o le Malumalu mo Tagata ua Maliliu

Pe a faatinoina sauniga sui, e mafai e se tagata o le Ekalesia ona fai ma sui mo na o se tagata ua maliu o le itupa e tasi na fanau mai ma le tagata.

28.2.1

Papatisoga ma Faamauga mo Ē ua Maliliu

Soo se tagata o le ekalesia e i ai se pepa faataga aoga o le malumalu e mafai ona valaaulia e auauna atu i se tofiga se tasi pe sili atu i le potu papatiso. O nisi o tofiga e mafai ona aofia ai:

• Galue e fai ma tagata sui mo papatisoga.

• Galue o se molimau mo papatisoga sui.

• Galue e fai ma tagata sui mo faamauga.

• Fesoasoani i tagata ulu.

E mafai ona valaaulia i latou e umia le Perisitua Mekisateko ma ositaulaga i le Perisitua Arona e faatino ia papatisoga mo ē ua maliliu. E mafai foi ona valaaulia i latou e umia le Perisitua Mekisateko e taitai i faamauga mo ē ua maliliu.

E na o alii ua maua faaeega paia e mafai ona valaaulia e:

• Avea ma tusi talafaamaumau i le vaipapatiso.

• Avea ma tusi talafaamaumau o le faamauga.

28.2.2

Faaeega Paia (E Aofia ai Sauniga Amata)

Pe a faatinoina faaeega paia sui mo ē ua maliliu, o le vaega o le sauniga amata o le faaeega paia e ese le taimi e faatino ma tusi faamaumauina ai (tagai i le 27.2). Soo se tagata ua maua faaeega paia o i ai se pepa faataga aoga o le malumalu e mafai ona fai ma sui ina ia maua nei sauniga.

28.2.3

Faamauina i le Toalua ma le Faamauina o Fanau i Matua

I totonu o le malumalu, e mafai ona faamauina tagata ua maliliu i taitoalua sa latou faaipoipo i ai a o soifua. O tagata ua maliliu e mafai foi ona faamauina a latou fanau o loo soifua pe ua maliliu ia i latou. O se tagata ua maua faaeega paia o loo i ai se pepa faataga aoga o le malumalu e mafai ona fai ma sui mo sauniga o faamauga.

28.3

Tulaga Faapitoa

O le vaega lenei o loo faamalamalama ai tulaga e le ono faatatau i ai nisi o taiala o loo i le 28.1 .

28.3.1

O Tamaiti e Maliliu a o le’i Fananau Mai (Tamaiti e Maliliu i le Manava ma Fafano)

E le manaomia pe faatinoina sauniga o le malumalu mo tamaiti e maliliu a o le’i fananau mai. Mo nisi faamatalaga, tagai i le 38.7.3.

28.3.2

Tamaiti e Maliliu a o lei Atoa le Valu Tausaga

E togiolaina tamaiti laiti e ala i le Togiola a Iesu Keriso ma “faaolaina i le malo selesitila o le lagi” (Mataupu Faavae ma Feagaiga 137:10). Mo lenei mafuaaga, e leai se papatisoga po o se faaeega paia e faatinoina mo se tamaitiiti na maliu a o le’i aulia le 8 tausaga. Peitai, o faamauga i matua e mafai ona faatinoina mo fanau o ē e le’i fananau mai i le feagaiga pe le’i mauaina lena sauniga a o soifua i le olaga (tagai i le 18.1).