faiʻanga papitaisó

28.

Ngaahi Ouau Fakatemipale maʻá e Pekiá

28.0

Talateú

ʻOku ʻai ʻe he ngaahi ouau ʻoku fakahoko ʻi he ʻū temipalé ke lava ʻa e ngaahi fāmilí ʻo fakataha ʻo taʻengata mo aʻusia ha fiefia kakato ʻi he ʻao ʻo e ʻOtuá.

Ke lava ʻo foki e fānau ʻa e Tamai Hēvaní kiate Ia, kuo pau ke nau takitaha fakatomala, taau ke maʻu e ngaahi ouau ʻo e fakamoʻuí mo e hakeakiʻi, mo tauhi e ngaahi fuakava fekauʻaki mo e ouaú takitaha.

Naʻe ʻafioʻi ʻe he Tamai Hēvaní he ʻikai maʻu ʻe ha tokolahi ʻo ʻEne fānaú ʻa e ngaahi ouau ko ʻení ʻi he lolotonga ʻenau moʻui fakamatelié. Naʻá Ne ʻomi leva ha founga ʻe taha ke nau maʻu ai ʻa e ngaahi ouaú mo fai ha ngaahi fuakava mo Ia. ʻE lava ke fakahoko fakafofonga ʻa e ngaahi ouaú ʻi he ngaahi temipalé. ʻOku ʻuhinga ʻeni ʻe maʻu ʻe ha taha moʻui ʻa e ngaahi ouaú ʻo fakafofongaʻi ha taha kuo pekia. ʻE lava ha taha kuo pekia ke fili ʻi he maama tataliʻanga ʻo e ngaahi laumālié, ke tali pe fakasītuʻaʻi ʻa e ngaahi ouau kuo ʻosi fakahoko maʻanautolú (vakai, Tokāteline mo e Ngaahi Fuakava 138:19, 32–34, 58–59).

ʻOku poupouʻi ʻa e kāingalotu ʻo e Siasí ke nau feinga ke ʻiloʻi ʻa e kāinga kuo pekia ka naʻe ʻikai ke nau maʻu e ouau ʻo e fakamoʻuí mo e hakeakiʻí. ʻE fakahoko leva ʻe he kāingalotú ʻa e ouaú ʻo fakafofongaʻi honau kāinga ko iá.

Kapau ʻoku teʻeki teuteuʻi ʻe he kāingalotú ha ngaahi hingoa fakafāmili ki he ngāue fakatemipalé (vakai, 28.1.1), ʻe ʻoatu ha hingoa ʻo ha kakai pekia ʻoku nau fiemaʻu ʻa e ngaahi ouaú, ʻi he temipalé.

28.1

Ngaahi Fakahinohino Fakalūkufua ki he Fakahoko ʻo e Ngaahi Ouau Fakafofongá

Ko e kakai pekia ko ia naʻe ‘osi taʻu 8 pe motuʻa ange ʻi he taimi ne nau pekia aí, ʻe lava ke fakahoko ha ngaahi ouau fakafofonga maʻanautolu. Tuku kehe, hangē ko hono fakamatalaʻi ʻi he 28.3, ʻe lava ke fakahoko ʻa e ngaahi ouau fakafofongá maʻá e kakai pekia kotoa pē, ʻi he ʻosi pē ʻa e ʻaho ʻe 30 mei honau ʻaho pekiá kapau ʻoku kaunga ki ai ha taha ʻo e ongo meʻa ko ʻení:

• Ko ha kāinga ofi ʻo e pekiá (hoa mali ne teʻeki ke na vete, fānau kuo lalahi, mātuʻa, pe tokoua/tuofefine/tuongaʻané) ʻoku nau fakahū mai e hingoá ki he ngaahi ouau fakatemipalé.

• Kuo maʻu e ngofua ke fakahoko ʻa e ngaahi ouaú mei ha kāinga ofi ʻo e pekiá (hoa mali ne teʻeki ke na vete, fānau kuo lalahi, mātuʻá, pe tokoua/tuofefine/tuongaʻane).

Kapau ʻoku ʻikai kaunga ha taha ʻo e ngaahi tūkunga ʻi ʻolungá, ʻe toki lava pē ke fakahoko e ngaahi ouau temipale fakafofongá ʻo ka ʻosi ha taʻu ʻe 110 mei he taʻu naʻe fāʻeleʻi ai ʻa e taha pekiá.

28.1.1

Ko Hono Teuteuʻi e Ngaahi Hingoa ʻo e Kakai Pekiá ki he Ngaahi Ouau Fakatemipalé

Ko e feituʻu ʻe lava aí, ʻoku totonu ke fakahū ʻa e fakamatala ʻoku hā ai ʻa e kau mēmipa pekia ʻo e fāmilí ki he FamilySearch.org kimuʻa pea toki fakahoko ʻa e ngaahi ouau fakatemipalé (vakai, 25.4.2).

28.1.1.1

Ko hono Fakahū e ʻū Hingoa ʻo e Kau Mēmipa ʻo e Fāmilí

Ko e taimi ʻoku fakahū ai e ngaahi hingoa ki he ngaahi ouau fakafofonga ʻi he temipalé, ʻoku totonu ke fakahū pē ʻe he kāingalotú ʻa e hingoa ʻo e kakai ʻoku nau kāinga mo iá.

28.1.2

Ko Hai ʻe Lava ʻo Kau ʻi he Ngaahi Ouau maʻá e Kau Pekiá

ʻE lava ke kau ʻa e kāingalotu kotoa pē ʻoku ʻi ai haʻanau lekomeni temipale ʻoku kei ʻaongá, ʻi he papitaiso mo e hilifakinima maʻá e kau pekiá. ʻE lava ke kau ʻa e kāingalotu ʻosi maʻu ʻenitaumeni ʻoku ʻi ai haʻanau lekomeni temipale ʻoku kei ʻaongá ʻi he ngaahi ouau kotoa maʻá e pekiá. Vakai, 26.3.

28.1.4

Ko hono Fakataimi-tēpileʻí

ʻE ala fiemaʻu ke fokotuʻu ʻe he kāingalotú ha taimi kimuʻa pea toki fakahoko e ngaahi ouau maʻá e pekiá. Vakai, temples.ChurchofJesusChrist.org ki he fakamatala fetuʻutaki ʻa e temipale takitaha mo e taimi tēpile ʻoku fiemaʻú.

28.2

Ko Hono Fakahoko ʻo e Ngaahi Ouau Fakatemipalé maʻá e Kakai Pekiá

Ko e taimi ʻoku fakahoko fakafofonga ai ʻa e ngaahi ouaú, ʻe toki lava pē ke fakafofongaʻi ʻe ha mēmipa ha taha kuo pekia ʻokú na tuʻunga tatau ko e tangata pe fefine ʻi hona fāʻeleʻí.

28.2.1

Papitaiso mo e Hilifakinima maʻá e Kau Pekiá

ʻE lava ke fakaafeʻi ha mēmipa pē ʻoku ʻi ai haʻane lekomeni temipale ʻoku kei ʻaonga. ke ngāue ʻi ha taha ʻo e ngaahi ngāue ʻi he faiʻanga papitaisó, pe toe lahi ange. Ko ha niʻihi ʻo e ngaahi ngāué ʻe ala kau ai ʻa e:

• Hoko ko e fakafofonga ki he papitaisó.

• Hoko ko ha fakamoʻoni ki he papitaiso fakafofongá.

• Hoko ko e fakafofonga ki he hilifakinimá.

• Tokoniʻi e kau pataloní.

ʻE lava ke fakaafeʻi ʻa e kau maʻu Lakanga Taulaʻeiki Faka-Melekisētekí mo e kau taulaʻeiki ʻi he Lakanga Taulaʻeiki Faka-ʻĒloné ke nau fakahoko ʻa e papitaiso maʻá e kau pekiá. ʻE lava foki ke fakaafeʻi mo e kau maʻu Lakanga Taulaʻeiki Faka-Melekisētekí ke nau ngāue ʻi he hilifakinima maʻá e kau pekiá.

Ko e kakai tangata pē kuo ʻosi maʻu ʻenitaumení ʻe lava ke fakaafeʻi ke:

• Hoko ko e tauhi lekooti ʻo e faiʻanga papitaisó.

• Hoko ko e tauhi lekooti ʻo e hilifakinimá.

28.2.2

ʻEnitaumení (Kau ai ʻa e ʻInisitolí)

Ko e taimi ʻoku fakahoko ai ha maʻu ʻenitaumeni fakafofonga maʻá e pekiá, ʻe fakahoko mavahe pē ʻa e konga ʻinisitoli ʻo e ʻenitaumení pea mo lekooti mavahe (vakai, 27.2). ʻE lava ke hoko ha mēmipa ʻosi maʻu ʻenitaumeni ʻoku ʻi ai haʻane lekomeni temipale ʻoku kei ʻaonga ko ha fakafofonga ke maʻu ʻa e ngaahi ouau ko ʻení.

28.2.3

Ko e Sila ki he Malí mo e Silaʻi ʻo e Fānaú ki he Mātuʻá

ʻI he temipalé, ʻe lava ke silaʻi ʻa e kakai pekiá ki honau ngaahi mali naʻa nau mali mo ia ʻi he moʻuí. ʻE toe lava foki ke silaʻi e fānau ʻa e kakai kuo pekiá kiate kinautolu pe silaʻi ha fānau kuo pekia kiate kinautolu. ʻE lava ke hoko ha mēmipa ʻosi maʻu ʻenitaumeni ʻoku ʻi ai haʻane lekomeni temipale ʻoku kei ʻaonga, ko ha fakafofonga ʻi he ngaahi ouau silá.

28.3

Ngaahi Tūkunga Makehe

ʻOku fakamatalaʻi ʻe he konga ko ʻení ʻa e ngaahi tūkunga he ʻikai ala fakaʻaongaʻi ai ʻa e ngaahi fakahinohino ʻi he 28.1 .

28.3.1

Fānau ʻOku Mate Kimuʻa Hono Fanauʻí (Fā‘eleʻi mai Kuo Mate mo Tamatoó)

‘Oku ʻikai fiema‘u ʻa e ngaahi ouau fakatemipalé ia ki he fānau ʻoku pekia teʻeki fanauʻí. Ke maʻu ha fakamatala lahi ange, vakai, 38.7.3

28.3.2

Fānau Ne Pekia Teʻeki Ke Nau Taʻu Valú

ʻOku huhuʻi e fānau īkí ʻo fakafou ʻi he Fakalelei ʻa Sīsū Kalaisí pea mo “fakamoʻui ʻi he puleʻanga fakasilesitiale ʻo e langí” (Tokāteline mo e Ngaahi Fuakava137:10). ʻI he ʻuhingá ni, ʻoku ʻikai fakahoko ai ha papitaiso pe maʻu ʻenitaumeni maʻa ha fānau naʻe mate ʻoku teʻeki taʻu 8. Neongo ia, ʻe lava ke fakahoko ʻa e sila ki he mātuʻá maʻá e fānau naʻe ʻikai fāʻeleʻi ʻi he fuakavá pe ʻikai maʻu ʻa e ouau ko iá ʻi he moʻuí (vakai, 18.1).