28.

Dagiti Ordinansa iti Templo para kadagiti Pimmusay

28.0

Pakauna

Dagiti ordinansa a maannong kadagiti templo ti mangaramid a posible para kadagiti pamilia a makapagdedenna iti kinaagnanayon ken makapadas iti naan-anay a rag-o iti sidong ti Dios.

Para iti panagsubli dagiti annak ti Nailangitan nga Ama Kenkuana, nasken nga agbabawi ti tunggal maysa kadakuada, agbalin a maikari nga umawat kadagiti ordinansa ti pannakaisalakan ken pannakaitan-ok, ken mangdayaw kadagiti katulagan a mainaig iti tunggal ordinansa.

Ammo ti Nailangitan nga Ama nga adu kadagiti annakna ti saan nga umawat kadagitoy nga ordinansa bayat ti mortal a panagbiagda. Nangipaay iti sabali a wagas para kadakuada nga umawat kadagiti ordinansa ken makitulag Kenkuana. Kadagiti templo, mabalin nga annongen dagiti ordinansa babaen ti proxy. Kayatna a sawen nga umawat ti sibibiag a tao kadagiti ordinansa nga agpaay iti maysa a tao a pimmusay. Iti lubong dagiti espiritu, mabalin a pilien dagiti pimmusay a tao nga umawat wenno mangilaksid kadagiti ordinansa a naannong para kadakuada (kitaen iti Doktrina ken Katulagan 138:19, 32–34, 58–59).

Maallukoy dagiti miembro ti Simbaan a mangilasin kadagiti pimmusay a kabagian a saan a nakaawat kadagiti ordinansa ti pannakaisalakan ken pannakaitan-ok. Kalpasanna, annongen dagiti miembro dagiti ordinansa nga agpaay kadagita a kabagian.

No saan a nangisagana dagiti miembro kadagiti family name para iti aramid iti templo (kitaen iti 28.1.1), maitedto iti templo ti nagnagan dagiti pimmusay a tao nga agkasapulan kadagiti ordinansa.

28.1

Dagiti Sapasap a Pangiwanwan para iti Panangannong kadagiti Pangisaup [Proxy] nga Ordinansa

Dagiti pimmusay a tao nga agtawen iti 8 wenno natataengan idi oras ti ipapatayda ket mabalin a maannong dagiti ordinansa babaen ti panangisaup [proxy] nga agpaay kadakuada. Malaksid kas nadakamat iti 28.3, mabalin a maannong dagiti ordinansa babaen iti panangisaup [proxy] para kadagiti amin a pimmusay a tao apaman a napalabas ti 30 nga aldaw manipud iti petsa ti ipapatayda no mayaplikar ti ania man kadagiti sumaganad:

• Maysa a nasinged a kabagian ti pimmusay (saan a diborsiado nga asawa, nataengan nga anak, nagannak, wenno kabsat) ti mangisumite iti nagan para kadagiti ordinansa ti templo.

• Maawat ti pammalubos a mangannong kadagiti ordinansa manipud iti maysa a nasinged a kabagian ti pimmusay (saan a diborsiado nga asawa, nataengan nga anak, nagannak, wenno kabsat).

No awan kadagiti nadakamat a kondision ti mayaplikar, mabalin a maannong dagiti ordinansa iti templo babaen ti panangisaup [proxy] 110 a tawen kalpasan ti pannakayanak ti pimmusay a tao.

28.1.1

Panangisagana kadagiti Nagan dagiti Pimmusay a Tattao para kadagiti Ordinansa iti Templo

Iti lugar a mabalin, nasken a maiserrek ti impormasion a mangilasin kadagiti pimmusay a miembro ti pamilia FamilySearch.org sakbay a maannong dagiti ordinansa iti templo (kitaen iti 25.4.2).

28.1.1.1

Panangisumite iti Nagnagan dagiti Miembro ti Pamilia

No mangisumite kadagiti nagan para kadagiti panangisaup [proxy] nga ordinansa iti templo, gagangay a nasken nga isumite laeng dagiti miembro ti nagnagan dagiti tao a a mainaig kadakuada.

28.1.2

Asino ti Mabalin a Makiraman kadagiti Ordinansa para iti Pimmusay

Mabalin a makiraman ti amin a miembro nga addaan iti agdama a temple recommend kadagiti panagbuniag ken kumpirmasion para kadagiti natay. Mabalin a makiraman dagiti na-endow a miembro nga addaan iti agdama a temple recommend iti amin nga ordinansa para iti pimmusay. Kitaen iti 26.3.

28.1.4

Panagiskediul

Mabalin a kasapulan dagiti miembro ti makipag-appointment sakbay nga aramidenda dagiti ordinansa para iti pimmusay. Kitaen iti temples.ChurchofJesusChrist.org para iti tunggal impormasion iti kontak iti templo ken dagiti kasapulan iti panagiskediul.

28.2

Panangannong kadagiti Ordinansa iti Templo para kadagiti Pimmusay a Tattao

No mangan-annong kadagiti ordinansa babaen ti panangisaup [proxy], mabalin nga agakem ti maysa a miembro kas proxy para laeng iti pimmusay a tao a kapada ti sekso wenno katatao ti miembro.

28.2.1

Dagiti Panangbuniag ken Kumpirmasion para kadagiti Natay

Maawis ti asino man a miembro nga addaan iti agdama a temple recommend nga agserbi kadagiti naidutok nga aramiden iti baptistry. Sumagmamano a naituding nga aramiden iramanna ti:

• Panagakem kas proxy para kadagiti panagbuniag ken kumpirmasion.

• Panagakem kas saksi para kadagiti panagbuniag babaen ti proxy.

• Panangtulong kadagiti patron.

Mabalin a maawis dagiti Melchizedek Priesthood holder ken priest iti Aaronic Priesthood tapno mangannong kadagiti panagbuniag para kadagiti natay. Mabalin pay a maawis dagiti Melchizedek Priesthood holder tapno mang-officiate kadagiti kumpirmasion para kadagiti natay.

Dagiti laeng na-endow a lallaki ti mabalin a maawis nga:

• Agserbi kas font recorder.

• Agserbi kas confirmation recorder.

28.2.2

Endowment (Agraman ti Initiatory)

No maan-annong dagiti proxy endowment para kadagiti pimmusay, maannong ti paset ti initiatory ti endowment ken mairekord a maisina (kitaen iti 27.2). Asino man a na-endow a miembro nga addaan iti agdama a temple recommend ket mabalin nga agakem a proxy nga umawat kadagitoy nga ordinansa.

28.2.3

Pannakailantip iti Asawa ken Pannakailantip dagiti Annak kadagiti Nagannak

Iti templo, mabalin a mailantip dagiti pimmusay a tattao kadagiti assawa a nakikallaysaanda iti biag. Mabalin met dagiti pimmusay a tao a mailantip kadakuada dagiti sibibiag wenno pimmusay nga annakda. Asino man a na-endow a miembro nga addaan iti agdama a temple recommend ket mabalin nga agakem a kas proxy nga umawat para kadagiti ordinansa ti pannakailantip.

28.3

Dagiti Naisangsangayan a Kasasaad

Ilawlawag daytoy a benneg dagiti kasasaad a sumagmamano kadagiti pangiwanwan iti 28.1 ket mabalin a saan a mayaplikar.

28.3.1

Dagiti Ubbing a Natay sakbay a Naipasngay (Ubbing a Natay a Nayanak ken Alis)

Saan a kasapulan wenno maannong dagiti ordinansa iti templo para kadagiti ubbing a matay sakbay ti pannakayanak. Para iti ad-adu pay nga impormasion, kitaen iti 38.7.3.

28.3.2

Dagiti Ubbing a Natay sakbay nga Agtawen iti Walo

Masubbot dagiti babassit nga ubbing babaen ti Pannubbot ni Jesucristo ken “maisalakan iti celestial a pagarian ti langit” (Doktrina ken Katulagan 137:10). Gapu iti daytoy, awan ti maannong a panagbuniag wenno endowment para iti ubing a natay sakbay ti edad a 8. Nupay kasta, mabalin a maannong dagiti pannakailantip kadagiti nagannak para kadagiti ubbing a saan a nayanak iti katulagan wenno saan a nakaawat iti dayta nga ordinansa iti biag (kitaen iti 18.1).