acn in pacptais

28.

Akwuck Tempuhl nuh sin Mwet Misac

28.0

Ikucslah

Akwuck ahkfahsryeyuck tempuhl uh oruh in fihsrwacsr nuh sin sucu in tuhkweni nuh tok ma pahtpaht ac puhlakihn fohnlahiyacn engan yurun God.

Nuh sin tuhlihk nahtuhl Pahpah Inkuhsrao in fohlohk nuh Yohrohl, kais sie selos enenuh in auliyak, nwacsnwacslah in eis akwuck in molwelah ac ma pahtpaht, ac karihngihn olwelah kuhpahsr nuh ke kais sie akwuck inge.

Pahpah Inkuhsrao El etuh lah puhs tuhlihk Nahtuhl ac tiac eis akwuck inge ke moul kawihl se inge. El akiyac inkacnek se sahyac nuh selos in eis akwuck inge ac oraclah olwelah nuh Sel. Lun tempuhl, akwuck uh kuh in ahkfahsryeyuck ke proxy. Kalmac pa mwet moul se eis akwuck ahollah mwet misac se. Ke facl luhn nguhn, mwet misac inge kuh in sulaclah in eis kuh tiac eis akwuck ma ahkfahsryeyuck kacltahl inge (liye Doctrine and Covenants 138:19, 32–34, 58–59).

Kwacfeyuck mempucr ke Alu uh in ahkkahlwemye mwet misac lalos ma tiac eis akwuck in molwelah ac ma pahtpaht. Na mempucr inge ac tuhfah aholuhlos oruh akwuck lalos.

Fin mempucr inge tiacna sang inen mwet ke sucu lalos in orekma kac tempuhl (liye 28.1.1), inen mwet misac ma enenuh akwuck ac fihliyucki tempuhl.

28.1

Mwe Ahkuhtweyac Fohn nuh ke Orekma ke Akwuck nuh sin Mwet Misac

Mwet misac ma matwac oasr ke yac 8 kuh mahtuh liki ke pacl elos misac mwet moul kuh in oruh akwuck kaclos. Sahyacn na ahkuhtweyucki ke 28.3, orekma ke mwet misac kuh in ahkfahsryeyuck nuh sin mwet misac nuhkwewa tukun lwen 30 tukun lwen se elos fin oasr selos ma tahklac ten inge:

• Sucu fototo se luhn mwet misac ingacn (mwet tiacna fahsrwelihk ke pahyuck la, tuhlihk mahtuh se, pahpah ninac, kuh tuhlihk wiyac) sang inelos nuh ke akwuck tempuhl.

• Lwelah in ahkfahsrye akwuck inge ituck sin sucu fototo se luhn mwet se ma misac inge (mwet tiac fahsrwelihk ke pahyuck la, tuhlihk mahtuh se, pahpah ninac, kuh tuhlihk wiyac).

Fin wacngihn selos ma ahkkahlwemyeyuck lucng ingacn, orek akwuck tempuhl nuh kacn mwet misac inge kuh in orek tukun yac 110 mwet se ma misac ingacn isuslac.

28.1.1

Ahkolah Inen Mwet Misac nuh ke Akwuck Tempuhl

Fin kuh, ma enenuh in etweyuck in ahkkahlwemye mwet misac se ke sucu enenuh in ituckyang nuh ke FamilySearch.org met liki ahkfahsryeyuck akwuck tempuhl uh (liye 25.4.2).

28.1.1

Suhpwaclah Inen Mwet ke Sucu

Ke pacl se suhpweyucklac inen mwet ma misac in eis akwuck tempuhl, mempucr enenuh in suhpwacng na inen mwet ma elos kuhpahsr nuh se uh.

28.1.2

Suc Kuh in Wi Oruh Akwuck luhn Mwet Misac

Mempucr nuh kwewa ma oasr pwepuh in lwelah la nuh tempuhl kuh in wi pacptais ac ahkkweyelah mwet misac. Mempucr ma eis mwe sang muhtahl tari ma oasr pwepuh in lwelah la nuh tempuhl kuh in wi oruh akwuck nuh kwewa kacn mwet misac se. Liye 26.3.

28.1.4

Pacl nuh kac

Mempucr enenuh in oraclah sie pacl ah met liki ahkfahsrye akwuck nuh sin mwet misac inge. Liye temples.ChurchofJesusChrist.org nuh ke kais sie mwe ahkkahlwemye contact ac ma enenuh nuh ke pacl.

28.2

Ahkfahsrye Akwuck Tempuhl nuh sin Mwet Misac

Ke mempucr oruh akwuck kacn mwet misac, mempucr enenuh in oruh muh elos mukul nuh ke mukul kuh muhtwacn nuh ke muhtwacn.

28.2.1

Pacptais ac Ahkkweyeyucklac luhn Mwet Misac

Oacna sie mempucr ma oasr pwepuh in lwelah la nuh tempuhl kuh in suliyuck in kuhlwacnsap oruh pacptais. Kuhtuh kuhlwacnsap inge pa:

• In mwet se ma misac ah nuh ke pacptais ac ahkkweyeyuck.

• In mwet loh suc ke pacptais luhn mwet misac inge.

• Kahsruh mwet orekma tempuhl.

Mwet ma sruok Melchizedek Pristut ac prist ke Aaronic Pristut kuh in suliyuck in oruh pacptais ke mwet misac. Mwet ma sruok Melchizedek Pristut kuh in suliyuck pac in kol ahkkweyeyucklac luhn mwet misac inge.

Mukul eis mwe sang muhtahl muhkwena suliyuck nuh ke:

• Kuhlwacnsap in rikohrt ma ke acn in pacptais sac.

• Kuhlwacnsap in suhmuhslah ahkkweyeyucklac ingacn.

28.2.2

Mwe Sang Muhtahl (Weacng Initiatory)

Ke oraclah akwuck luhn mwe sang muhtahl ahollah mwet misac, ip luhn initiatory luhn mwe sang muhtahl oreklac ac rikohrtiyuck sahyac (liye 27.2). Mempucr ma eis tari mwe sang muhtahl ma oasr pwepuh in lwelah la nuh tempuhl kuh in pa mwet se ma misac ingacn in eis akwuck inge.

28.2.3

Sil nuh sin Kiyac kuh Tuhma ac Sil nuh sin Tuhlihk Nahtuh ac Pahpah Ninac

Lin tempuhl, mwet misac inge kuh in sil nuh sin kiyac kuh tuhma ma elos pahyuckyak se fin facluh se inge. Mwet misac inge kuh pac in sil nuh sin tuhlihk moul kuh misac nahtuhlos. Mempucr ma eis mwe sang muhtahl tari ma oasr pwepuh in lwelah la nuh tempuhl elos kuh in ekihn mwet ma misac inge in eis akwuck ke sil inge.

28.3

Ohiyac Special

Sapta se inge ahkuhtweyac ohiyac ma kuhtuh ahkuhtweyac ke 28.1 sahp tiac orekmakihnyuck.

28.3.1

Tuhlihk Ma Misac Met liki Isuslac (Sonna isuslac ac Tuhlihk Puhtatlac)

Akwuck tempuhl tiac orek kuh enenuh nuh sin tuhlihk misac met liki isuslac. In etuh yohk kac, liye 38.7.3.

28.3.2

Tuhlihk Ma Misac Met liki Yac Alkosr

Tuhlihk srihsrihk uh elos moullac ke Iwaclah lal Jisus Kraist ac “moullac ke tohkohsrahi celestial inkuhsrao” (liye Doctrine and Covenants 137:10). Ke srihpac se inge, pacptais ac eis mwe sang muhtahl tiac ahkfahsryeyuck nuh sin tuhlihk se misac met liki yac 8. Tuhsruhktuh, sil nuh sin pahpah ninac kuh in ahkfahsryeyuck fin tuhlihk sacn tiacna isuslac ke olwelah kuh tiacna eis olwelah se ingacn ke moul se (liye 18.1).