29.

Sauniga po o Fonotaga i le Ekalesia

29.0

Faatomuaga

E potopoto faatasi le Au Paia o Aso e Gata Ai e tapuai, faamalamalama e le tasi le isi, ma a’oa’o atu ma a’oa’o mai le talalelei (tagai i le Alema 6:6; Moronae 6:5–6). Na folafola mai le Faaola, “Aua o le mea ua faapotopoto ai se toalua po o se toatolu i lo‘u igoa, ou te i ai faatasi ma i latou” (Mataio 18:20). O le potopoto faatasi o se tasi lea o auala e mafai ai e o tatou loto ona “fili faatasi i le lotogatasi ma le alofa” (Mosaea 18:21).

Peitai, o le faia o se fonotaga po o se sauniga e le tatau lava ona suitulaga i le tautuaina ma le auaunaga e pei ona sa faia e Iesu Keriso.

29.1

Fuafuaina ma le Taitaia o Sauniga po o Fonotaga

O taitai latou te fuafua ma taitaia ia fonotaga po o sauniga “e pei ona taitaia ai i latou e le Agaga Paia, e tusa ai ma poloaiga ma faaaliga a le Atua” (Mataupu Faavae ma Feagaiga 20:45; tagai foi i le Moronae 6:9; Mataupu Faavae ma Feagaiga 46:2). Latou te sailia auala e valaaulia ai le tosinaga a le Agaga i a latou sauniga po o fonotaga.

E faamautinoa e taitai o le aofai ma le uumi o sauniga po o fonotaga e le fatua’ia ai ni avega mamafa mo tagata o le au paia po o o latou aiga.

29.2

Fonotaga po o Sauniga a le Uarota

29.2.1

Sauniga/Lotu Faamanatuga

O Faamoemoega

Manatua Iesu Keriso e ala i le taumamafa i le faamanatuga. O isi faamoemoega e aofia ai le tapuai, fausia o le faatuatua ma molimau, ma faatautaia pisinisi faaleuarota.

Tagata e Auai

E valaaulia tagata uma ia auai.

E Faafia ona Fai

Aso Sa Taitasi.

29.2.1.1

Fuafuaina o le Lotu Faamanatuga

O le au epikopo e fuafuaina ma taitaia le lotu faamanatuga. Latou te faamautinoa o le taulaiga o le sauniga ua i ai lea i le faamanatuga ma le fausiaina o le faatuatua ia Iesu Keriso.

E tasi le itula le umi o le lotu faamanatuga. E mafai ona aofia ai mea nei:

1. Musika muai tataina (tagai i le 19.3.2 mo taiala).

2. Faatalofa ma le faafeiloaiga.

3. Faailoa aloaia taitai pulefaamalumalu po o isi taitai o loo asiasi mai.

4. Faasilasilaga. E tatau ona tausisia i se aofaiga itiiti.

5. Viiga ma le tatalo amata. Tagai i le 19.3.2 ma le 29.6.

6. Pisinisi faaleuarota ma faalesiteki, e pei o mea nei:

   • Lagolagoina ma le faamaloloina o taitai ma faiaoga (tagai i le 30.3 ma le 30.6).

   • Tuuina atu o igoa o uso ina ia faauuina i se tofi i le Perisitua Arona (tagai i le 18.10.3).

   • Faailoa aloaia o tagata fou o le uarota, e aofia ai tagata faatoa liliu mai.

7. Faaigoaina ma le faamanuiaina o tamaiti (tagai i le 18.6). E masani ona faia lenei mea i sauniga anapogi ma molimau (tagai i le 29.2.2).

8. Faamauina o tagata fou liliu mai (tagai i le 18.8).

9. Viiga o le faamanatuga ma le faafoeina o le faamanatuga. O le faamanatuga o le taulaiga autu lea o le sauniga. O lenei sauniga o se avanoa lea mo tagata o le au paia e tuusa’o atu ai o latou mafaufauga i le Faaola ma Lana taulaga mo i latou.

   Mo nisi faamatalaga e uiga i le sauniaina, faamanuiaina, ma le tufatufaina o le faamanatuga, tagai i le 18.9

10. Savali o le talalelei ma le usuina e le faapotopotoga o viiga, po o isi musika.

11. Viiga ma le tatalo faaiu.

12. Musika e mulia’i tataina.

29.2.1.4

Filifiliga o Failauga

E filifili e le au epikopo ia failauga mo le sauniga faamanatuga. E tele lava latou te valaaulia tagata o le uarota, e aofia ai le autalavou.

E tuuina atu e failauga ia molimau ia Iesu Keriso ma a’oa’o atu Lana talalelei e faaaoga ai tusitusiga paia (tagai i le Mataupu Faavae ma Feagaiga 42:1252:9

29.2.2

Sauniga Anapogi ma Molimau

Faamoemoega

Ia taumamafa i le faamanatuga ma faamalolosia e le tasi le isi, e ala i le tuuina atu o molimau e uiga ia Iesu Keriso ma Lana talalelei. Ua fautuaina tagata o le Ekalesia e o mai i le sauniga o loo anapopogi pe afai e mafai ona latou anapopogi.

Tagata e Auai

E valaaulia tagata uma ia auai.

E Faafia ona Fai

E taitasi i le masina, o le sauniga faamanatuga o se sauniga anapogi ma molimau. E masani lava o le Aso Sa muamua o le masina.

I se sauniga anapogi ma molimau, e leai ni failauga tofia po o ni musika faapitoa e filifilia. Ae, o le tagata e taitai e tuuina atu se molimau puupuu. Ona ia valaaulia lea o tagata o le potopotoga e tuu atu a latou molimau. Ina ia tuu atu molimau o lona uiga ia tautino atu upumoni o le talalelei e pei ona musuia ai e le Agaga Paia.

29.2.3

Konafesi a le Uarota

Faamoemoega

I le taimi o le konafesi a le uarota, e a’oa’o ai, lagolago, ma auauna atu taitai o le siteki i taitai ma tagata o le uarota. E lagolago e tagata o le uarota ia taitai aoao ma taitai i le lotoifale.

Tagata e Auai

E valaaulia tagata uma ia auai.

E Faafia ona Fai

E ta’itasi i le tausaga i se Aso Sa e ese mai le Aso Sa anapogi.

29.2.4

Fonotaga a le Au Epikopo

Faamoemoega

Fefautuaai faatasi ma faia faaiuga e uiga i mataupu e faatatau i le uarota.

Tagata e Auai

O le au epikopo, failautusi a le uarota, ma le failautusi faapitoa.

E Faafia Ona Fai

E masani lava e faalevaiaso.

O mataupu mo le iloiloga e mafai ona aofia ai:

• Faamaopoopoina o le galuega o le faaolataga ma le faaeaga i le uarota.

• Faamalolosia o tagata taitoatasi ma aiga i le uarota—aemaise lava o le autalavou ma tamaiti.

• Faailoaina o tagata e mafai ona saunia e maua sauniga, e aofia ai faauuga i le perisitua.

• Faailoaina o tagata e valaau i tofiga o le uarota.

29.2.5

Fonotaga a le Aufono a le Uarota

Faamoemoega

Fesoasoani e faataunuu le galuega a le Atua mo le faaolataga ma le faaeaga i le uarota (tagai i le 1.2).

Tagata e Auai

• O le au epikopo, failautusi a le uarota, ma le failautusi faapitoa a le uarota.

• Peresitene o le korama a toeaina, Aualofa, Tamaitai Talavou, Peraimeri, ma le Aoga Sa.

E Faafia Ona Fai

E masani lava e faalevaiaso (ae e mafai ona faaitiitia le fono soo).

O le epikopo e fuafuaina, pulefaamalumalu, ma taitai i fonotaga a le aufono a le uarota. E le faia e le aufono ni faaiuga tetele e aunoa ma le epikopo.

E auai taitai o faalapotopotoga a le uarota i fonotaga a le aufono a le uarota i matafaioi e lua:

1. O ni sui auai o le aufono a le uarota o loo fesoasoani ia faamanuiaina tagata uma o le uarota.

2. E avea ma sui o a latou faalapotopotoga.

Pe a latou potopoto faatasi, e talanoaina e sui auai o le aufono a le uarota ia mataupu o le a manuia ai mai taumafaiga soofaatasi a le aufono atoa. E fautuaina sui auai taitasi o le aufono e faasoa mai ona manatu ma musumusuga e uiga i nei mataupu.

O fonotaga a le aufono a le uarota e masani ona le silia ma le tasi le itula. Latou te amata i se tatalo ma ni lipoti pupuu o mea na totofi e fai mai fonotaga talu ai. E tuu atu e le epikopo le faamuamua i mataupu e sili ona manaomia ia faamanuiaina ai tagata taitasi ma aiga.

• Ola i le talalelei a Iesu Keriso. Fesoasoani i tagata uma o le au paia e fausia le faatuatua, maua sauniga faaola, ma tausi a latou feagaiga.

• Tausiga o i latou e le tagolima. Faasoa atu o punaoa ma tomai ia manuia ai tagata taitoatasi, aiga, ma le alaalafaga. Fesoasoani i tagata o le uarota ia ola-tutoatasi. (Tagai i le mataupu 22.)

• Valaaulia tagata uma ia talia le talalelei. Iloilo le alualu i luma o i latou o loo aoao e uiga i le talalelei, faapea foi tagata fou ma i latou ua toe foi mai. Talanoaina auala e mafai ai e tagata o le ekalesia ona faasoa atu le talalelei i isi. (Tagai i le mataupu 23.)

• Tuufaatasia o aiga mo le faavavau. Iloilo le alualu i luma o tagata o le ekalesia o e o loo sauniuni mo le mauaina o sauniga o le malumalu. Fuafuaina o auala e fesoasoani ai i ni tagata se toatele o le ekalesia ia agavaa mo se pepa faataga o le malumalu. Talanoaina ni auala e mafai ai e tagata o le ekalesia ona auai i le galuega o le malumalu ma talafaasolopito o aiga. (Tagai i le mataupu 25.)

E tatau foi i sui o le aufono ona tausisia le le faalauaiteleina o soo se faamatalaga patino pe maaleale (tagai i le 4.4.6

29.2.6

Fonotaga a le Aufono a le Autalavou o le Uarota

Faamoemoega

Faamalolosia le autalavou i le uarota. Fesoasoani ia i latou ia auai i le galuega a le Atua mo le faaolataga ma le faaeaga (tagai i le 1.2).

Tagata e Auai

• O le au epikopo.

• O se tasi o fesoasoani o le epikopo i le korama a ositaulaga ma peresitene o korama a a’oa’o ma tiakono.

• O peresitene o vasega a Tamaitai Talavou (po o le au peresitene atoa pe afai e na o le tasi le vasega a Tamaitai Talavou).

• O le peresitene o Tamaitai Talavou.

E Faafia Ona Fai

E masani ona ta’i masina.

A o le’i faia ia fonotaga taitasi, e iloilo e le epikopo ma le tagata o le a taitai ia mataupu o le a talanoaina.

• O le galuega o le faaolataga ma le faaeaga.

• Manaoga o le autalavou i le uarota ma auala e taulimaina ai.

• Taumafaiga e aapa atu ai i talavou ua le o toaaga mai po o tagata fou.

• Gaoioiga, e aofia ai avanoa e auauna atu ai ia i latou e manaomia. O le tele o le fuafuaga e faia i fonotaga a au peresitene o korama po o vasega (tagai i le mataupu 20).

• Auaunaga (tagai i le mataupu 21).

• A’oa’o faamasani ia au peresitene faato’ā valaau o korama ma vasega.

29.2.8

Faasologa mo Sauniga o le Aso Sa

E faaaoga e uarota se tasi o faasologa nei e lua-itula mo sauniga o le Aso Sa.

Fuafuaga 1

60 minute	Sauniga faamanatuga
10 minute	Taape i vasega ma fonotaga
50 minute	Aso Sa uma: Peraimeri, e aofia ai le vasega pepe Aso Sa muamua ma le lona tolu o le masina: Aoga Sa Aso Sa lona lua ma le lona fa: sauniga a Korama a le perisitua, sauniga a le Aualofa, ma sauniga a Tamaitai Talavou. Aso Sa Lona Lima: sauniga mo le autalavou ma tagata matutua. E filima’oti e le au epikopo le autu ma tofia faiaoga.

Fuafuaga 2

50 minute	Aso Sa uma: Peraimeri, e aofia ai le vasega pepe Aso Sa muamua ma le lona tolu o le masina: Aoga Sa Aso Sa lona lua ma le lona fa: sauniga a Korama a le perisitua, sauniga a le Aualofa, ma sauniga a Tamaitai Talavou. Aso Sa Lona Lima: sauniga mo le autalavou ma tagata matutua. E filima’oti e le au epikopo le autu ma tofia faiaoga.
10 minute	Taape i le sauniga faamanatuga
60 minute	Sauniga faamanatuga

29.3

Fonotaga po o Sauniga a le Siteki

29.3.1

Konafesi a le Siteki

Faamoemoega

O le faamoemoega autu lava o le konafesi faalesiteki o le faamalolosia lea o le faatuatua o tagata ia Iesu Keriso.

Tagata e Auai

E valaaulia tagata uma e auai i le sauniga aoao. O isi sauniga e mo tagata patino e auai ai, e pei ona faamatala atu i lalo.

E Faafia Ona Fai

Faalua i tausaga taitasi.

29.3.2

Sauniga Aoao a le Au Perisitua o le Siteki

Faamoemoega

A’oa’o ma musuia taitai perisitua i o latou tiute.

Tagata e Auai

I latou uma e umia le perisitua i totonu o le siteki.

E Faafia Ona Fai

E faa-tasi i le tausaga.

29.3.3

Fonotaga a le Au Taitai Perisitua o le Siteki

Faamoemoega

A’oa’o ia taitai perisitua i o latou tiute, faatele o latou tomai, ma faamalolosia lo latou faatuatua.

Tagata e Auai

• Au peresitene o le siteki.

• Fautua maualuga.

• Failautusi o le siteki ma uarota (ma failautusi fesoasoani pe a manaomia ai).

• Failautusi faapitoa o le siteki ma uarota.

• Au peresitene o Alii Talavou a le Siteki (ma failautusi pe afai ua valaauina).

• Au epikopo.

• O au peresitene o korama a toeaina ma failautusi.

• Fautua o korama a le Perisitua Arona.

E Faafia Ona Fai

E faia se fonotaga faaleautaitai perisitua o se vaega o konafesi taitasi a le siteki.

29.3.4

Fonotaga Faaleautaitai a le Siteki

Faamoemoega

A’oa’o atu taitai o faalapotopotoga a uarota i o latou tiute, fesoasoani ia i latou ia faaleleia le avea ai ma taitai ma faiaoga, ma faamalolosia lo latou faatuatua ia Iesu Keriso. I nei fonotaga, e fefautuaai faatasi foi ia taitai ma fefaasoaai aitia.

Tagata e Auai

O au peresitene ma failautusi uma o Aualofa, Tamaitai Talavou, Peraimeri, ma le Aoga Sa i le siteki ma uarota. O se tasi o le au peresitene o le siteki po o se fautua maualuga ua tofia e auai ma pulefaamalumalu. E mafai foi ona valaaulia faiaoga, faufautua, fautua maualuga, ma uso o au epikopo ua tofia i nei faalapotopotoga.

E Faafia Ona Fai

E faa-tasi i le tausaga.

29.3.5

Fonotaga a le Korama a Faitaulaga Sili o le Siteki

Faamoemoega

A’oa’o atu uso o le korama i o latou tiute ma a’oa’oga faavae e faatatau i le perisitua.

Tagata e Auai

O sui auai uma o le korama a faitaulaga sili a le siteki.

E Faafia Ona Fai

A itiiti o le faa-tasi i le tausaga.

29.3.6

Fonotaga a le Au Peresitene o le Siteki

Faamoemoega

Fefautuaai faatasi ma faia faaiuga e uiga i mataupu e faatatau i le siteki.

Tagata e Auai

O le au peresitene o le siteki, failautusi a le siteki, ma le failautusi faapitoa.

E Faafia Ona Fai

E le aunoa (e masani e faalevaiaso).

29.3.7

Fonotaga a le Aufono a Fautua Maualuga

Faamoemoega

Fefautuaai faatasi e uiga i le galuega a le Atua mo le faaolataga ma le faaeaga i totonu o le siteki (tagai i le 1.2).

Tagata e Auai

• Au peresitene o le siteki.

• Fautua maualuga.

• Failautusi a le siteki ma le failautusi faapitoa.

E Faafia Ona Fai

Faalua i le masina pe a talafeagai.

29.3.8

Fonotaga a le Aufono a le Siteki

Faamoemoega

Fefautuaai faatasi e uiga i le galuega a le Atua mo le faaolataga ma le faaeaga i totonu o le siteki (tagai i le 1.2).

Tagata e Auai

• Au peresitene o le siteki.

• Fautua maualuga.

• Failautusi a le siteki ma le failautusi faapitoa.

• Peresitene o le Aualofa a le Siteki, Tamaitai Talavou ma le Peraimeri.

• Taitai o talavou nofofua matutua ma taitai o tagata matutua nofofua a le siteki (pe afai ua valaauina).

E Faafia Ona Fai

Ta’i masina pe a talafeagai.

29.3.9

Fonotaga a le Komiti o le Au Taitai Matutua a le Siteki

Faamoemoega

Fefautuaai faatasi e uiga i le auala e lagolago ai taitai o uarota a o latou fesoasoani i le galuega a le Atua mo le faaolataga ma le faaeaga. Fuafua auala e fesoasoani ai e faatino le vaaiga mamao a taitai o le siteki mo lenei galuega i le siteki.

Tagata e Auai

• Au peresitene o le siteki.

• Au Peresitene o le Aualofa a le siteki (ma le failautusi pe afai ua valaauina).

• Fautua maualuga ua tofia e galulue ma korama a toeaina.

E Faafia Ona Fai

Pe a manaomia.

29.3.10

Fonotaga a le Komiti o le Au Taitai o le Autalavou a le Siteki

Faamoemoega

O taitai o le siteki ma le autalavou e (1) fefautuaai faatasi e uiga i le faamalolosia o le autalavou o le siteki ma (2) fuafuaina auaunaga ma gaoioiga.

E le gata i lea, e fefautuaai faatasi taitai o le siteki e uiga i le auala e faatonutonu ai ma lagolago ai taitai o uarota i le faaaofia ai o le autalavou i le galuega a le Atua mo le faaolataga ma le faaeaga. Latou te fuafuaina auala e fesoasoani ai e faatino le vaaiga mamao a le aufono a le siteki mo le autalavou i le siteki.

Tagata e Auai

• O se uso o le au peresitene o le siteki.

• O le au peresitene o Alii Talavou a le siteki (ma le failautusi pe afai ua valaau).

• O le au peresitene o Tamaitai Talavou a le siteki (ma le failautusi pe afai ua valaau).

• O le autalavou mai uarota taitasi i le siteki pe a aofia i fonotaga po o vaega o fonotaga ia mataupu e manuia ai mai lo latou aofia ai.

E Faafia Ona Fai

Pe a manaomia.

29.3.11

Fonotaga a le Aufono a Epikopo o le Siteki

Faamoemoega

Faasoa atu aafiaga, talanoaina fesili, ma tuuina atu faatonuga e faatatau patino lava i epikopo.

Tagata e Auai

O le peresitene o le siteki ma epikopo uma ma peresitene o paranesi i le siteki o sui auai ia o le aufono lenei. E auai atu foi i ai se failautusi a le siteki e tusia se faamaumauga o tofitofiga ma faaiuga.

E Faafia Ona Fai

A itiiti e faalekuata.

29.5

Falelauasiga ma Isi Sauniga mo Ē Ua Maliliu

29.5.1

Mataupu Faavae Lautele

O se faamoemoega taua o sauniga a le Ekalesia mo ē ua maliliu, o le molimau atu lea i le ata o le faaolataga, aemaise o le Togiola ma le Toetu o le Faaola. E tatau ona avea nei sauniga ma aafiaga mamalu, ma faaleagaga.

E le tatau i taitai o le Ekalesia ona faaaofia fua ni tu masani a isi tapuaiga po o vaega, i sauniga a le Ekalesia mo ē ua maliliu.

29.5.2

Ofoina Atu o le Fesoasoani i le Aiga

I le avea ai ma soo o Iesu Keriso, o taitai ma tagata o le Ekalesia e “faanoanoa faatasi ma e faanoanoa … ma faamafanafana i e ua tatau i ai le faamafanafanaga” (Mosaea 18:9). A maliu se tagata o le Ekalesia, e asiasi atu le epikopo i le aiga e avatu le faamafanafanaga.

E ofo atu e le epikopo le fesoasoani mai tagata o le uarota, e aofia ai le korama a toeaina ma le Aualofa.

29.5.4

Sauniga o Maliu (I Nofoaga e Masani Ai)

O se sauniga o se maliu e taitai e le epikopo, pe faia i se fale o le Ekalesia po o se isi nofoaga, o se sauniga lava a le Ekalesia ma o se sauniga faalelotu. E tatau ona avea o se faatasiga faaleagaga.

E tatau lava ona amata sauniga o maliu i le taimi tonu [na faapolokalama ai]. E masani lava, e le tatau ona umi atu nai lo le 1.5 itula, e avea o se faaaloalo ia i latou o e auai.

E le masani ona faia ni sauniga o maliu i le Aso Sa.

29.6

Tatalo i Sauniga a le Ekalesia

O tatalo i sauniga a le Ekalesia, e tatau ona pupuu, faigofie, ma taitaiina e le Agaga. Soo se tagata o le Ekalesia ua papatisoina, e mafai ona faia se tatalo amata po o le tatalo faaiu. O tamaiti e le’i papatiso e mafai ona tatalo i le Peraimeri.

29.7

Faasalalauina o Sauniga ma le Faia o Sauniga po o Fonotaga Faatekinolosi

E mafai e le epikopo, e avea o se tuusaunoaga, ona faataga se faasalalauga tuusao o se sauniga faamanatuga ma sauniga o maliu ma faaipoipoga e faia i falelotu.

O se sauniga faamanatuga e faasalalau tuusao e le tatau ona aofia ai le faatautaiga o le faamanatuga.

Mo nisi sauniga po o fonotaga, e mafai e le epikopo po o le peresitene o le siteki ona faataga ia tagata o le au paia e le mafai ona auai tino mai, e auai i ala faatekinolosi. O nei fonotaga e mafai ona aofia ai:

• Fonotaga faaleautaitai, e pei o fonotaga a le au peresitene po o le aufono.

• Fonotaga a Korama, Aualofa, ma Tamaitai Talavou.

• Vasega o le Aoga Sa.

• Vasega o le Peraimeri ma taimi o pesepesega.

29.8

Ata Pue ma Vitio Pue o Fonotaga

Ina ia faasaoina le paia o sauniga a le Ekalesia, e le tatau i se tasi ona pueina ata pe pueina vitio o sauniga faamanatuga po o konafesi faalesiteki.

Mo faamatalaga e uiga i le faasalalauina o fonotaga, tagai i le 29.7.