34.

Ol Faenens mo Ol Odit

34.0

Fas Toktok

Ol taeting mo ofring i mekem se Jos i save muvum wok blong Lod blong sevem man mo kam olsem god (luk long 1.2). Ol mane ia, oli tabu. Oli ripresentem sakrifaes mo fet blong ol memba blong Jos (luk long Mak 12:41–44).

34.2

Wod Faenens Lidasip

34.2.1

Bisoprik

Bisop i gat olgeta responsabiliti ia long saed blong faenens blong wod. Hem i givim sam long ol wok ia i go long ol kaonsela mo ol klak blong hem.

Bisop:

• Hem i givim insperesen long ol memba blong pem wan ful taeting mo blong oli givim ol gudfala ofring wetem bigfala hat (luk long 34.4).

• Hem i mekemsua se oli lukaotem gud mo kaontem gud evri mane blong wod (luk long 34.5).

• Hem i luklukbak long faenens stetmen evri manis mo i mekemsua se oli stretem eni problem we i stap kwiktaem.

• Hem i mekemsua se ol lida blong ol oganaesesen mo ol klak oli lanem responsabiliti blong olgeta long saed blong ol tabu mane blong Jos.

• Hem i rere mo lukaot long yia bajet blong wod (luk long 34.6).

• Hem i mit wetem ol memba blong wod evri yia blong kasem taeting dikleresen blong olgeta.

34.2.2

Ol Wod Klak

Bisop i givim wok long wod klak, o wan asisten wod klak blong help wetem wok blong kipim rekod blong faenens blong stek. Ol klak oli lukaotgud blong folem ol apdeit polisi blong mekem se oli putum ol mane blong Jos oli save sef oltaem, mo blong mekemsua we ol rekod blong Jos oli stret evriwan.

Klak i gat olgeta responsabiliti ia:

• Rekodem mo dipositim eni mane we oli kasem wetem wan memba blong bisoprik.

• Hem i luklukbak long faenens stetmen evri manis mo i mekemsua se oli stretem eni problem we i stap kwiktaem.

• Hem i helpem bisoprik blong rere long yia bajet blong wod (luk long 34.6.1 mo 34.6.2).

• Hem i mekemsua se ol memba oli gat akses long ol stetmen blong kontribusen blong olgeta mo help olsem we i nid.

Ol klak oli mas holem Melkesedek Prishud mo holem wan tempol rekomen we i laef.

34.3

Ol Kontribusen

34.3.1

Taeting

Taeting i wan donesen i go long Jos blong God, we i wan aot long ten long mane we wan man i kasem (luk long Doktrin mo Ol Kavenan 119:3–4; intres i minim mane we oli kasem). Evri memba we oli gat wan salari, o oli winim mane, oli mas pem taeting.

34.3.1.2

Taeting Dikleresen

Bisop i mit wetem wanwan memba long ol las las manis blong evri yia blong kasem taeting dikleresen blong olgeta.

Oli invaetem evri memba blong mit wetem bisop blong:

• Diklerem long bisop sapos hem i stap pem wan ful taeting.

• Mekemsua se ol rekod blong kontribusen blong olgeta oli stret.

Long eni taem we i posibol, evri memba blong wan famli we i tekem ol pikinini tu, oli sapos blong go long intaviu ia tugeta.

34.3.2

Ol Fas Ofring

Ol lida blong Jos oli leftemap tingting blong ol memba blong stap laef folem loa blong livim kakae. Hemia i tekem tu blong stap givim wan gudfala amaon blong mane i go long fast ofring (luk long 22.2.2).

Ol gaedlaen blong fasin blong yusum ol fast ofring, oli stap long 22.5.2

34.3.3

Mane Basket blong Ol Misinari

Ol kontribusen i go long wod misinari fand, oli yusum nomo blong mitim ol kimitmen we ol fultaem misinari blong wod oli stap givim.

Ol kontribusen i go long Jeneral Misinari Fand, Jos i stap yusum blong lukluk long evri misinari wok.

34.3.7

Oli No Save Givimbak Ol Kontribusen

Taem we oli givim ol taeting mo ol nara ofring i go long Jos, oli blong Lod nao. Oli givim i go long Hem.

Ol stek presiden mo ol bisop oli mas givim infomesen long olgeta we oli givim ol taeting mo ol nara ofring, se ol kontribusen ia, oli no save givimbak long olgeta.

34.4

Taeting mo Ol Narafala Ofring Oli Konfidensiol

Amaon blong taeting mo ol nara ofring we wan i stap pem, hem i konfidensiol. Bisop nomo mo olgeta we oli gat raet blong handelem mo luk ol kaen kontribusen olsem oli sapos blong gat akses long infomesen ia.

34.5

Stap Handelem Mane blong Jos

Stek presiden mo bisop oli mekemsua se evri mane blong Jos, oli handelem long wan stret wei. Oli leftemap tingting blong ol bisop mo ol klak blong luklukbak long vidio we i stap long “Ol Tabu Mane, Ol Tabu Responsabiliti” wan taem o moa evri yia.

34.5.1

Kompanionsip Prinsipol

Kompanionsip prinsipol i nidim tu man—wan memba blong bisoprik mo wan klak, o tu memba blong bisoprik—blong oli stap mo rekodem mo givimaot ol mane blong Jos.

Ol lida oli mas protektem mo neva serem paswod blong olgeta (luk long 33.9.1.1).

34.5.2

Taeting mo Ol Narafala Ofring

Lod i givim long ol bisop, tabu tras o wok ia blong kasem mo kaontem ol taeting mo ol nara ofring blong olgeta Sent (luk long Doktrin mo Ol Kavenan 42:30–33; 119). Bisop mo tufala kaonsela blong hem nomo, oli save kasem ol taeting mo ol nara ofring. I no mas gat wan taem nating we ol waef blong olgeta, ol nara memba blong famli blong olgeta, ol klak, o ol nara memba blong wod oli risivim ol kontribusen ia.

34.5.3

Jekem mo Rekodem Taeting mo Ol Narafala Ofring

Oli mas jekem mo rekodem ol kontribusen long semmak Sandei we oli kasem olgeta. Wan memba blong bisoprik mo wan klak, o tu memba blong bisoprik, oli openem wanwan envlop tugeta. Tufala i jekem se ol mane ia we oli stap insaed oli semfala amaon we oli raetem long fom blong Taeting mo Ol Narafala Ofring. Tufala i rekodem wanwan donesen long stret wei. Sapos ol mane ia mo amaon we oli raetem i defren, oli mas kontaktem hem we i mekem donesen kwiktaem, blong stretem wanem we i stap.

34.5.4

Dipositim Taeting mo Ol Narafala Ofring

Oli mas rere long wan diposit afta we oli mekemsua se ol amaon we oli rekodem i semmak long mane we oli kasem.

Long ol ples we i gat wan 24 aoa bank diposit sistem we i open i stap, bisoprik memba wetem wan narawan we i holem Melkesedek Prishud, i dipositim ol mane ia long bank long sem dei ia we oli openem mo jekem ol mane ia.

Long ol ples we i no gat wan 24 aoa bank diposit sistem we i open i stap, mo bank i klos long Sandei, bisop i jusum wan we i holem Melkesedek Prishud, blong mekem diposit ia long bank long nekis bisnis dei. Hem i mas:

• Mekemsua se, ol mane ia, oli putum i stap long wan ples we i sef gud, kasem taem oli dipositim.

• Karem wan diposit risit we i soem deit mo amaon blong diposit.

34.5.5

Kipim Mane blong Jos long Sef Ples

Ol memba we oli responsibol blong lukaotem ol mane blong Jos, oli neva mas livim olgeta i stap long mitinghaos ovanaet, o oli neva mas livim olgeta mane ia i stap we i no gat man i lukaot long eni taem, olsem long ol taem blong ol miting mo ol aktiviti.

34.5.7

Manejem Ol Peimen blong Stek mo Wod

I no gat wan mane blong stek o wod we oli save spendem o pem, sapos i no gat raet blong prisaeding ofisa.

Tu lida we oli kasem raet, oli mas apruvum wanwan peimen. Wan long tufala i mas wan memba blong stek presidensi o bisoprik. Nomata we ol kaonsela oli gat raet blong apruvum ol peimen, stek presiden o bisop i mas luklukbak long wanwan peimen. Ol lida oli no mas apruvum ol peimen we i gobak long olgetawan.

I nid blong gat apruvol long raeting, we i kam long stek presiden, bifo wan bisop i save yusum fas ofring, o bifo hem i apruvum wan oda blong bisop we i stap long nem blong hemwan o famli blong hem. I nid blong gat apruvol long raeting, we i kam long wan memba blong Eria Presidensi, bifo wan bisop i save yusum fas ofring, o blong apruvum oda blong bisop blong stek presiden o famli blong hem. Luk long 22.5.1.2 blong luk ol gaedlaen.

Wan memba we i stap askem blong oli givimbak mane blong hemwan i mas givim eni kopi blong pepa o lektronik risit o invoes. Hem i mas putum tu stamba tingting, amaon mo deit we hem i mekem peimen.

Sapos oli givim ol mane fastaem, memba i mas givim wan peimen rikwes fom, we i talemaot stamba tingting, amaon mo deit. Afta we oli pem ol samting blong pem, memba ia i mas (1) givim ol risit o invoes blong ol mane we oli spendem, mo (2) i mas givimbak ol mane we hem i no spendem. Ol mane we oli no spendem, oli mas dipositim bakegen long bank.

34.5.9

Holem Ol Faenens Rekod

Wanwan stek mo wod i mas holem i apdeit i stap, wan stret rekod blong faenens.

Blong gat infomesen abaot fasin blong yusum mo holemtaet ol rekod mo ol ripot, ol klak oli mas gobak long ol instraksen we i kam long ol hedkwota blong Jos, o long eria ofis. Ol faenens rekod, oli mas holemtaet olgeta blong wan taem blong tri yia, plas yia we i stap gohed.

34.6

Bajet mo Mane we Oli Spendem

Bajet mane program i givim ol jeneral mane blong Jos blong pem wanem i nid blong pem blong ol aktiviti mo ol program blong ol stek mo ol wod.

Plante long ol aktiviti, oli mas ol simpolwan mo oli gat smol mane nomo, o nogat mane blong spendem.

34.6.1

Ol Bajet blong Stek mo Wod

Evri stek mo wod oli rere mo wok wetem wan yia bajet. Stek presiden i manejem bajet blong stek, mo bisop i manejem bajet blong wod.

Ol gaedlaen oli stap long lis andanit ia:

• Luklukbak long ol amaon we oli bin spendem long yia bifo blong mekemsua se ol ol mane we oli spendem evri yia, oli teknot long olgeta.

• Oli askem ol oganaesesen blong oli skelem bajet nid blong olgeta long ditel.

• Putum tugeta bajet mo yusum ol praktis blong ol bajet we oli apruvum.

34.6.2

Bajet Mane

34.6.2.1

Serem Mane blong Bajet

Ol mane blong bajet oli stap seremaot long evri kwota folem atendens blong ol defren seksen ia:

• Sakramen miting

• Ol Yang Man

• Ol yang woman

• Ol praemeri pikinini, 7–10 yia

• Ol Yang Singgel Adalt

Hem i impoten blong ripotem atendens long stret wei mo long stret taem (luk long 33.5.1.1).

34.6.2.2

Yusum Bajet long Stret Wei

Ol stek presiden mo ol bisop oli mekemsua se mane we oli serem, oli spendem wetem waes.

Ol mane blong stek mo wod oli mas yusum olgeta blong pem spending blong evri aktiviti, program, lesenbuk, mo saplae.

34.6.2.3

Bajet We I Ova

Ol mane blong bajet we i ova, oli no mas spenem. Ol mane blong wod we oli no spendem, oli sendem i gobak long stek.

34.7

Ol Odit

34.7.1

Stek Odit Komiti

Stek presiden i jusum wan long stek odit komiti. Komiti i mekemsua se ol faenens blong stek mo wod oli handelem folem polisi blong Jos.

34.7.3

Faenens Odit

Ol stek odita oli mekem odit blong ol faenens rekod blong stek, blong ol wod mo blong ol FamilySearch senta, tu taem long wan yia.

Prisaeding ofisa blong yunit, mo klak we i gat wok blong lukaot long ol faenens, tufala i mas stap blong stap ansarem ol kwestin blong ol odit.

34.7.5

Lus, Stil, Fasin blong Karem o No Yusum Gud Mane blong Jos

Oli mas talemaot kwiktaem long stek presiden o jeaman blong stek odit komiti sapos:

• Oli bin lusum o stilim ol mane blong Jos.

• Wan lida i no bin stil o no yusum gud mane blong Jos.