“38. Masap ac Kahs in Kol ke Alu uh,” Ma Suleyucklac ke General Handbook (2023).

“38. Masap ac Kahs in Kol ke Alu uh,” Ma Suleyucklac ke General Handbook

Masap ac Kahs in kol ke Alu uh

38.1

Wi Alu

Pahpah Tuhmasr Inkuhsrao El luhngse tuhlihk Nahtuhl. “Nohfohnna oacna sie ye muhtahl God,” ac El suli nohfohn “in fahsr nuh yohrohl ac eis wo lal” (2 Nephi 26:33

38.1.1

Pihsen Mwet ke Miting luhn Alu uh

Mwet nuhkwewa suliyuck in wi alu, toeni sahyac ke Sacnri uh, ac kuhtuh pac toeni ke Alu luhn Jisus Kraist luhn Mwet Luhlahlfongi ke Lwen-sahflah. Mwet kol se ma prisait uh ma kunacl in liyacacng lah mwet nuh kwewa ma wi toeni uh ahkfuhlwactye toeni uh.

Mwet ma wi inge enenuh in tiac wakruh kuh ahktongongye alu kuh srihpac sahyac ke toeni se inge. Matwac nuh kwewa ac elah ma enenweyuck nuh ke kain in toeni luhn Alu uh enenuh in ahkfuhlwactyeyuck. Pa enenuh nuh ke in tiac sramsram in ahkluhkuhk ac nuknuk ma ac kuh in lusrong. Pa pac nuh ke sramsram in palitiks kuh sramsramkihn ohiyac in luhngse inmahsrlon mwet kuh ma sahyac ma eslah lohacng uh liki Mwet Lahngo lasr.

Fin oasr elah tiac fal, pisraprik kuh prestuhnsi luhn stek elos sun mwet se ke nguhn in luhngse. El pahtok mwet ma elah la tiac wo in lohacng in ahkwoye in kahsruh sruokyac na muhtahl se nuh sin mwet ma wi alu nuh sel Pahpah Tuhmasr Inkuhsrao ac Mwet Lahngo lasr.

Lohm in toeni luhn Alu uh ma luhn Alu oacna ke masap luhn Alu uh. Mwet ma tiac luhngse ukwe kahs in ukweyuck inge ac ngihsreyuck ke puhsra muhlahlah in tiac wi toeni luhn Alu uh.

38.2

Masap nuh ke Akwuck ac Mwe Insewowo

Mwe etweyuck yohk nuh ke akwuck ac mwe insewowo uh kuh in sukokyak ke sapta 18. Ma in etweyuck ke akwuck tempuhl uh oasr ke sapta 27 ac 28. Pisap el enenuh in ohsun nuh sin prestuhn ke stek fin oasr kihsensiyuck. Prestuhn ke Stek enenuh in ohsun nuh sin Prestuhnsi ke Eria fin oasr kihsensiyuck lalos.

38.3

Macruht

Mwet kol ke Alu uh kwacfe mempucr in nwacsnwacs nuh ke macruht tempuhl ac in macruhtlac ac sil tempuhl. Fin masap ke acn sacn lwelah, mwet kol ke Alu uh kuh, in, ahkfahsrye alu in macruht sacn.

Alu in macruht enenuh in ahkfahsryeyuck fal nuh ke masap ke acn se ma macruht sacn orek kac uh.

38.3.1

Suc Kuh in Ahkfahsrye Alu in Macruht se

Fin masap ke acn sacn lwelah, mwet kol ekahsr ke Alu uh ma srackna kuhlwacnsap ke kunohkohn lalos inge kuh in ahkfahsrye alu in macruht sacn.

Misin Prestuhn
Prestuhn luhn Stek
Prestuhn luhn Tistrik
Pisap
Prestuhn luhn Pracns

Mwet oasr wal la inge kuh in ahkfahsrye alu in macruht inmahsrlon mukul ac ac muhtwacn se. Ma inge kwewa enenuh in oasr:

Muhtwacn se ma ac macruht ingacn el mempucr se ke Alu uh kuh oasr lwen in pacptais se lal.
Oacna sie membership record luhn mukul se kuh muhtwacn se ma ac macruht ingacn, kuh tukun na pacptaislac, ke Alu uh ke acn se ma mwet kol se ingacn kol toeni sacn.
Mwet se ma kol ingacn oasr kuh lal in ahkfahsrye alu in macruht sacn ke acn in masap ke acn se ma macruht sacn orek kac.

38.3.4

Alu in Macruht Ahkfahsryeyuck ke Nien Alu

Alu in macruht kuh in ahkfahsryeyuck ke nien Alu fin tiac lusrohng oacna sie ma orek ke Alu an. Macruht uh tiac enenuh in orek ke lwen Sahpuht kuh ekuh in Mante. Macruht ahkfahsryeyuck ke nien Alu uh enenuh in fihsrwacsr ac muhtahl. On kac an enenuh in muhtahl, mihs, ac engan.

Macruht uh kuh in ahkfahsryeyuck lin lohm alu, ke acn luhlahp in toeni sac, kuh lin sie infuhkihl mwesahs ah. Macruht uh enenuh in ukwe masap oreklac lin lohm alu sacn.

38.3.6

Toeni ke Alu in Macruht

In ahkfahsrye alu in macruht se, mwet se kol Alu sacn paing siyacnyacn sacn ac fahk, “Nuhnak muhnahs eis sie sin sie ke lacpo lacyot” Elac tahfwelah in fahk, “[Ine fohn luhn mukul se ma ac macruht an] ac [ine fohn luhn muhtwacn se ma ac macruht an], kowos eis sie sin sie ke lacpo lacyot in akucl se ke olwelah se kowos ac ilyak nuh kac ye muhtuhn God ac mwet loh inge.” (Siyacnyacn sacn kuh in sulaclah kuh fahk nuh sin mwet loh inge met liki muhtwacwacack ah.)

Mwet kol sacn paing mukul se ma ac macruht ingacn ac siyuck, “[Ine fohn luhn mukul se ma ac macruht an], kuh kom eisacl [ine fohn luhn muhtwacn se ma ac macruht an] elan pa muhtwacn kiom, ac ke luhngse lom sifacna ac sulaclah lom olwelah tuh kowos in ma sefanna ac mukul tuhmwacl in masap lah kom ac fungyang nuh sel ac wacngihn sahyac; lah kom ac karihngihn masap nuh kwewa; kunohkohn, ac ma enenweyuck, fal nuh ke akwuck muhtahl ke macruht; ac lah kom ac luhngse, ahkfuhlwact, ac engan sel ke lusen pacl se kowos kwewa moul uh?”

Mukul se ma macruht ingacn topuk, “Ahok” kuh “Nga oruh.”

Mwet kol Alu se ingacn tahfwelah in pahngon inen muhtwacn sacn ac siyuck, “[Ine fohn luhn muhtwacn se ma ac macruht an], kuh kom eisacl [ine fohn luhn muhtwacn se ma ac macruht an] elan pa mukul tomom, ac ke luhngse lom sifacna ac sulaclah lom olwelah tuh kowos in ma sefanna ac muhtwacn kiacl in masap lah kom ac fungyang nuh sel ac wacngihn sahyac; lah kom ac karihngihn masap nuh kwewa; kunohkohn, ac ma enenweyuck, fal nuh ke akwuck muhtahl ke macruht; ac lah kom ac luhngse, ahkfuhlwact, ac engan sel ke lusen pacl se kowos kwewa moul uh?”

Muhtwacn se ma macruht ingacn topuk, “Ahok” kuh “Nga oruh.”

Na mwet kol Alu se ingacn fahk nuh sin siyacnyacn sacn, “Ke kuh luhn masap suc utuckuh nuh sihk ekihn elder se ke Alu luhn Jisus Kraist luhn Mwet Luhlahlfongi ke Lwen-sahflah, nga ahkkahlwemye nuh sum, [inen mukul se ma ac macruht ingacn] ac [inen muhtwacn se ma ac macruht ingacn], mukul tuhma ac muhtwacn kiyac, alu lac ke masap ac akwuck ke lusen moul lowos fin facluh.”

(Ine se sahyac nuh ke mwet in kahsruh oruh alu se inge suc tiac el pa kol Alu sacn: “Ke kuh luhn masap suc utuckuh nuh sihk ekihn mwet in kahsruh se ke [ipin acn in solse kuh u se inge], nga ahkkahlwemye nuh sum, [inen mukul se ma macruht ingacn] ac [inen muhtwacn se ma macruht ingacn], mukul tuhma ac muhtwacn kiyac, alu lac ke masap ac ke akwuck ke lusen moul lowos fin facluh.”)

“Lwelah tuh God Elan ahkinsewowoyelah insese lac lowos ke fuhfahsryucsr se ac tuhkweni in moul in engan se, ac lwelah tuh Elan ahkinsewowoye kowos in kuh in karihngihn olwelah muhtahl kowos oraclah inge. Mwe insewowo inge nga fihliyac yuruwos ke inen Leum Jisus Kraist, amen.”

Atac se in ngokyac sie sin sie el oacna sie, wiwina facsin luhn acn sacn.

38.4

Masap ke Sil

Akwuck in sil tempuhl uh oracni sucu uh nuh tok ma pahtpaht oacna ke mempucr uh kampare in ahkfuhlwactye wuhlweacng elos oraclah ke elos eis akwuck inge. Akwuck in sil uh pa:

Sil luhn mukul tuhma ac muhtwacn kiyac.
Sil luhn tuhlihk nuh sin pahpah ninac.

Elos suc ma karihngihn wuhlweacng lalos ac oasr na yohrohlos mwe insewowo ma ituckyang ke elos sil ah. Ma se inge pwacye finne sie selos kuhnaoslah wuhlweacng kuh srolah liki macruht sacn.

Tuhlihk ma muhta na ke luhlahlfongi lalos ma sil nuh sin pahpah ninac kuh isuslac ke wuhlweacng sruokyacna mwe insewowo ke pahpah ninac tuhmwaclos ac kiaclos ne tok ma pahtpaht. Ma se inge pwacye finne pahpah ninac tilac muhta ke sil in macruht lalos, eislah membership lalos ke Alu uh, kuh srolah tilac mempucr.

Mempucr enenuh in suk kahsruh sin pisap fin oasr kihsen siyuck ke masap ke sil inge. Pisap el ohsun kuh pahngonwack prestuhn luhn stek fin oasr kihsen siyuck. Prestuhn luhn stek kuh in ohsun nuh sin prestuhnsi ke tempuhl ke acn se ma tempuhl lalos oasr kac, Prestuhnsi ke Eria, kuh Ohfuhs luhn Prestuhnsi Se Met fin oasr kihsen siyuck.

38.5

Nuknuk ac Garment nuh Tempuhl

38.5.1

Nuknuk Tempuhl

Ke pacl se ma eis akwuck ac akwuck ke sil lin tempuhl, mempucr luhn Alu uh orekmakihn nuknuk fasrfasr. Muhtwacn uh orekmakihn nuknuk fasrfasr ekahsr inge: nuknuk loeloes paho kuh nuknuk luhlahp (kuh sikuct se ac frohk loes paho kuh frohk luhlahp se), socks kuh mwe lweyuck niac, ac fahluhk kuh sori.

Mukul elos nukum nuknuk fasrfasr ekahsr inge: fohrohk loes paho, necktie kuh bow tie, tuhrasis, sock, ac fahluhk ac sori.

Ke pacl se ma eis akwuck ac akwuck ke sil inge, mempucr elos sang pac nuknuk sahyac afihnyac nuknuk fasrfasr lalos inge.

38.5.2

Eis Nuknuk ac Garment nuh Tempuhl

Mwet kol ke ward ac stek elos ahkkweye mempucr ma eis akwuck lalos tari in oasr nuknuk in tempuhl lalos. Nuknuk ac garment nuh tempuhl uh kuh in moliyuck ke Church Distribution stoh kuh ke store.ChurchofJesusChrist.org. Clerk ke stek ac ward kuh in kahsruh mempucr in ohtohi nuknuk lalos.

38.5.5

Nukum ac Karihngihn Garment

Mempucr ma eis akwuck lalos elos olwelah in nukum na garment lalos tempuhl ah ke moul lalos nohfohn.

Suwohs na muhtahl se in nukum garment tempuhl. In nukum el fahkwack elah wowo se ke inseselac se insiom in ukwe Mwet Lahngo Jisus Kraist.

Garment el mwe ahkacsmak ke wuhlweacng oreklac lin tempuhl. Fin nukumyuck wo ke moul se inge, elac kahsruh in mwe lang se.

Garment uh enenuh in nukumyuck lin nuknuk nuhkwewa lihk uh. Ma na nuh ke ohiyac sifacna la in orekmakihn garment inge lihkihn nuknuk inge kuh ye garment tempuhl inge.

Garment inge tiac enenuh in sahruhkyucklac fin oasr mukwikwi kuh in orek ke nukumyuck garment an. Tiac enenuh in nukumyuck in mwe yucn nuh ke kain in atacn nuknuk uh.

Garment uh muhtahl ac enenuh in suhnakihnyuck ke ahkfuhlwact. Mempucr ma eis akwuck uh enenuh in suk kahsruh luhn Nguhn Muhtahl in topuk kihsensiyuck la sifacna ke nukumyen garment.

38.5.7

Tohllah Garment ac Nuknuk Orekmakihnyuck Tempuhl

Fin tohllah garment ma tilac orekmakihnyuck, mempucr enenuh in suhpuhklah ac kuhnaoslah mahk kac ah. Na mempucr uh suhpuhklah ipin nuknuk luhlah kac ah in muh te kahlwem lah garment se. Nuknuk luhlah kac ingacn kuh in totolac pac.

Mempucr kuh in sang garment ac nuknuk tempuhl ma srwackna wo ah nuh sin kuhtuh mempucr ma eis akwuck tari.

38.5.8

Nuknuk Tempuhl in Misac

Fin kuh, mempucr ma misac ma eis akwuck tari enenuh in pihkihnyucki kuh isisyak orekmakihn nuknuk tempuhl. Fin facsin luhn acn kuh atacn puckpuck sacn tiac fahsr fal nuh ke ohiyac se kuh fin upac, nuknuk an kuh in lihmihnyucki ac fihliyucki sisken mahno sacn.

Monun mukul se nukumyuckyang ke garment tempuhl ac ke nuknuk fasr ekahsr inge: frohk loes paho se, neckitie kuh bow tie, tuhrasis, sock, ac fahluhk kuh sori. Monun muhtwacn se nukumyuckyang ke garment tempuhl ac ke nuknuk fasrfasr ekahsr inge: frohk loeloes se kuh nuknuk luhlahp se (kuh sikuct se ac fohrohk loeloes se kuh frohk luhlahp se), sock kuh mwe lweyuck niac loeloes se, ac fahluhk kuh sori.

Nuknuk in orekmakihnyuck nuh ke puck mas se inge fihliyucki ke mahno sacn oacna ke lutiyuck ke pacl in eis akwuck ah. Sucl sac fihliyucki ke fin pihsac se nuh lacyot ac kapihri ke sucl se ke tuhkuh ke infulwac nuh lacsac. Apron ke mwe afyucf se fihliyucki raunwelah infulwen mwet sacn. Sash se fihliyucki pac raunwelah infulwacn mwet sac ac kapihri fin lacsac ke hip lom an. Cap se luhn mukul sacn kwacna fihliyucki sisken mahnol ne ke na pacl fal in afyucfi pohk kuh mwe nweinyuck sacn. Na ituckyang bow se nuh ke cap sacn lucng liki lacsacn insrwacl. Mwe lihsrlihsr se luhn muhtwacn se ngacn kuh in an tukun na insifacl ke ilul lal an. Mwe lihsrlihsr se nuh ke muhtuhn muhtwacn ke pacl se ma puckpuck kuh isis inge oacna sie, wiwina sulaclah luhn sucu an.

38.6

Masap ke elyah luhn Ma Wo ac Koluk

38.6.1

Uniyac Tuhlihk ke Srwackna an Insiacn Ninac Se

Leum El sapkihn, “Thou shalt not … kill, nor do anything like unto it” (Doctrine and Covenants 59:6). Alu uh lain ke ohiyac in eslah moul luhn tuhlihk se suc oan lun insiacn ninac se in sang wo nuh sin ninac sacn na kuh in sang wo nuh sin mwet sahyac. Mempucr tiac enenuh in insese nuh kac, oruh, ahkolah nuh kac, moli, kuh pahtok, kuh ahkweye in sislah tuhlihk se ma srwackna an lun insiacn ninac se. Ma na kuh in lwelah ohiyac se inge uh pa fin:

Pihtuctuc se inge ma ke srihpen rep kuh ahko nuh sin sucu fototo.
Taktuh se fahk lah moul kuh fokokoiyacn moul luhn ninac se inge sensen.
Taktuh el konwacack tuh ahwowo se inge oasr elyah la ma ac tuh pwacnwacng el tiacna kuh in pain moullac tukun el isuslac uh.

Finne ma inge tiacna arulacna oruh in wo uniyac moul luhn tuhlihk se suc oan insiacn ninac se uh. Tohllah tuhlihk se ke insiacn ninac se el elyah na upac se. Enenuh in motkeyucklac wo tukun na mwet se ma ac oruh ingacn eis lwelah kuh ahokiyucki ke pruhe. Mempucr enenuh in suk kahsruh yurin pisrap ekihn ip ke atac se inge.

38.6.2

Ahkngal

Ahkngal pa tiac oruh wo kuh sruhnga mwet sahyac ke atac ma oruh in ngal mahno, sruh in kuh, puhla, kuh elyah ke mani. Masap luhn alu uh pa in tiacna lwelah in oasr oacna sie kain in atac ke ahkngal. Elos suc ahkngalye muhtwacn kuh mukul tuhmwaclos, tuhlihk, kuhtuh sucu sahyac, kuh oacna sie mwet kuhnahoslah masap luhn God ac mwet uh.

Mempucr nuh kwewa sahyac, yohkiyac na ninac ac pahpah ac mwet kol, pahtokyuck in sensen ac lohacng yohk nuh kac ac oruh ma nuh kwewa ma elos kuh in karihngihn tuhlihk ac mwet sahyac liki ahkngal. Fin mempucr uh etwacack ke oacna sie atac ke ahkngal, elos fahkwacng nuh sin mwet liyacacng masap ah ac sramsram nuh sin pisap. Mwet kol ke alu uh enenuh in lihksreni lohacng ke fahkwack ke ahkngal inge ac tiac pihlesruh.

Mwet mahtuh nuh kwewa ma wi tuhlihk kuh mwet fuhsr orekma uh enenuh in ahksahfyelah treining nuh ke karihngihnyen tuhlihk ac mwet fuhsr ke lusen mahlwem se fah ahkkweyeyucklac el (liye ProtectingChildren.ChurchofJesusChrist.org). Elos enenuh in kalweni trein se inge ke yac tolu nuhkwewa.

Ke ahkngal uh sikyak uh, ma se emet ma enenuh mwet kol ke Alu uh in oruh pa in kahsruh mwet ma ahkngalyeyuck ac karihngihn mwet muhnahs kuh fihsrwacsr in ahkngalyeyuck ke pacl fahsruh uh. Mwet kol uh tiac enenuh in pahtok sie mwet in muhta na ke lohm sacn kuh ke ohiyacn ahkngal kuh in tiac sef.

38.6.2.1

Lain in Kahsruh ke Ahkkoluk

Ke kuhtuh muhtuhnfacl uh, Alu uh oraclah lain se nuh ke acnwuck ma ac tiac kuh in etweyuck sin mwet sahyac in kahsruh prestuhn luhn stek ac pisap. Mwet kol inge enenuh in silahklahk pahngon lain soko inge in fahk ke ohiyac nuhkwewa ma mwet se kuh in puhtatyang nuh ke ahkngalyeyuck—kuh sensenkihnyuck in oasr ke ahkngal. Elos enenuh pac in pahngon fin elos etwacack ke mempucr se el liye, moli, kuh kihte petsac koluk ke tuhlihk.

Ke muhtuhnfacl ma tiac oasr lain in kahsruh se inge, pisap se ma etwacack ke ahkngal enenuh in pahngon prestuhn luhn stek lal. El ac suk kolyuck sin likuhl eria ke kahsruh ke ohfuhs luhn eria ah.

38.6.2.2

Kahsruh ke Srihpen Ahkngal

Mwet ma ahkngalyeyuck uh kwacna kweok ke ongaiyac upac ac elos puhlakihn muh oasr ma koluk elos oraclah. Prestuhn luhn stek ac pisap uh ahkkweye sucu ke inse muhlahlah ac pahkomuhta. Mwet kol an enenuh in acsmak nuh selos ac sang kahsruh wowo in kahsrelos in kuhtanglah ohiyac koluk ma sikyak ke srihpen ahkngal.

Kuhtuh pacl uh mwet ahkngalyeyuck inge puhlakihn mwekihn ac koluk. Wacngihn ma koluk ma mwet ahkngalyeyuck inge oraclah. Mwet kol uh kahsrwelos ac sucu lalos in kahlwem ke luhngse luhn God ac onwelah se ma tuhkuh sel Jisus Kraist ac Iwaclah lal (liye Alma 15:8; 3 Nephi 17:9).

Prestuhn luhn stek ac pisap an enenuh in kahsrelos suc oraclah mukwikwi in ahkngal uh in auliyak ac in tui tilac oruh ohiyac in ahkngallalos. Fin sie mwet mahtuh el oraclah sruh in kuh koluk nuh sin sie tuhlihk, sahp ac arulacna upac in ekuhllah elah se ingacn. Ohiyac in auliyak uh sahp ac arulacna paht. Liye 38.6.2.3.

In weacng pac kahsruh mokleyuck luhn mwet kol luhn Alu uh, kahsruh luhn mwet suhmaht sahp ac enenweyuck nuh sin mwet ahkngalyeyucklac, mwet ahkngalye, ac sucu lalos an. Nuh ke mwe etwacack an, liye 31.3.6.

38.6.2.3

Ahkngalyeyuck Tuhlihk Srihsrihk kuh Tuhlihk Fuhsr

Ahkngalyeyacn sie tuhlihk srihsrihk kuh tuhlihk fuhsr uh pa sie ma koluk na upac (liye Luke 17:2). Oacna ke orekmakihnyuck inse, ahkngalyeyacn tuhlihk srihsrihk ac tuhlihk fuhsr nwacnwack ke ma tahklac inge:

Ahkngalye Acnwuck Mahno: Ahkngalye ne kihnet ke acnwuck mahno. Kuhtuh ngalyak uh tiac kuh in liyeyuck.
Ahkngalyeyuck ke Sruh in Kuh Kuh Kuhnaus: Oruh mukwikwi in oreyac sie tuhlihk srihsrihk kuh tuhlihk fuhsr kuh oruh in oacyac in lwelah kuh kahsruh mwet sahyac in oruh kain mukwikwi ingacn. Oacna ke orekmakihnyuck inge, ahkngalye ke sruh in kuh uh tiacna wi mukwikwi in orek ma lwelah inmahsrlon mwet fuhsr luo suc fototo imatwaclos.
Ahkngalye Ma Puhlakihnyuck: Orekmakihn mukwikwi ac kahs in sang kuhnahoslah tuhlihk srihsrihk kuh tuhlihk fuhsr se ke ohiyacn etuh sifacna suhnakuhnuhl kuh sifacna etuh yohk srihpaciyacl. Ma inge sikyak ke kalweniyuck ac fahfahlacna in fahklah kahs in ahkngalye, ahktonongye, ac suhfanyuck ma ac ahkmwekihnye ac srihkkihnyuck. Sooaru in liyacacng ac weacng pac ma inge.
Petsac koluk ke tuhlihk srihsrihk: Liye 38.6.6.

Fin sie pisap kuh prestuhn luhn stek el etwacack kac kuh luhma muh ahkkolukyeyuck sie tuhlihk srihsrihk kuh tuhlihk fuhsr, elan silahklahk ukwe mwe etuh ke 38.6.2.1. El oacyacpac mukwilac in kahsruh karuhnguhnwacng in tiac sifilpac ahkkolukyeyuck.

Council ke mempucrlac luhn Alu uh ac in sihmihsyucklac ke ma sihmlac an enenweyuck fin mwet mahtuh se ahkkolukyelah sie tuhlihk srihsrihk kuh tuhlihk fuhsr oacna ke ahkuhtweyucki ke section se inge. Liye pac 38.6.2.5.

Fin sie tuhlihk srihk liki matwac yac 18 el ahkkolukye siepac tuhlihk srihsrihk, prestuhn luhn stek elan pahngon Ohfuhs luhn Prestuhnsi Se Met in eis kolyuck.

38.6.2.4

Ahkngalye Mwet Pahyuck kuh Siepacna Mwet Mahtuh

Puhs pacl wacngihn kahs in ahkuhtweyac ahkngalma kuh in luhmweyuck nuh ke kain ohiyac nuh kwewa uh. Tuhsruhk, oasr kain in level ke upaciyacn elahwet in ahkngal uh. Kain in level inge muhtwacwacack ke orekmakihnyacn kahs kohsroh in sang ahkngalye in upac.

Fin sie pisap kuh prestuhn luhn stek el etwacack muh ahkkolukyeyuck sie mwet pahyuck kuh siepacna mwet mahtuh, el silahklahk ukwe mwe etuh ke 38.6.2.1. El oacyacpac mukwilac in kahsruh karihngihn in tiac sifilpac ahkngalyeyuck.

Mwet kol uh suk kolyuck luhn Nguhn in sulaclah lah piyac kac lah ac muhkwena sramsram nuh sin mwet sacn kuh council ke mempucrlac an pa fal emet in sramsramkihn ahkkolukyeyuck uh. Elos kuh pac in sramsram eis kahsruh sin mwet kol luhn pristut lalos ke ohiyac ingacn. Tuhsruhk, kuhtwena ahkngalye mwet pahyuck kuh siepacna mwet mahtuh ma somsomlah nuh ke level ma ahkuhtweyucki ten inge enenuh na in oasr council ke mempucrlac an.

Ahkngalye Acnwuck Mahno: Ahkngalye ne kihnet ke acnwuck mahno. Kuhtuh ngalyak uh tiac kuh in liyeyuck.
Ahkngalyeyuck ke Sruh in Kuh: Liye ohiyac ma ahkkahlwemyeyuck ke 38.6.18.3.
Ahkngalye Ma Puhlakihnyuck: Orekmakihn mukwikwi ac kahs uh in sang kuhnahoslah na upac sie mwet ke el sifacna suhnakuhnuhl kuh sifacna etuh yohk srihpaciyacl. Ma inge sikyak ke kalweniyuck ac fahfahlacna in fahklah kahs in ahkngalye, ahktonongye, ac suhfanyuck ma ac ahkmwekihnye ac srihkkihnyuck.
Ahkngalye ke Mani: Ahklahlfonye sie mwet ke ip luhn mani. Ma inge kuh in weacng ke kuhnausyucklac masap kuh tiac lwelah in orekmakihn ma, mani, kuh kuhtuh pac na ma sacohk sahyac luhn sie mwet. Ma inge kuh pac in weacng kuhtasrihk in eislah kuh ke ip luhn mani liki sie mwet. In weacng orekmakihn kuh ke ip luhn mani in fohrsi luhma kuh ohiyac.

38.6.2.5

Sihmihsyucklac luhn Kunohkohn ke Alu, Pwepuh in Lwelah nuh Tempuhl, ac Ma Sihmlac luhn Mempucr

Mempucr ma ahkngalye mwet sahyac an tiac enenuh in ituckyang kunohkohn luhn Alu ac in wacngihn pwelah in lwelah in utyak nuh tempuhl ne ke na elos auliyak, ac ma ma tulokihn mempucr lac luhn Alu uh in eisyucklac.

Fin sie mwet el ahkkolukyelah sie tuhlihk srihsrihk kuh tuhlihk fuhsr ke sruh in kuh, kuh ahkkolukyelah na upac sie tuhlihk srihsrihk kuh tuhlihk fuhsr ke ma puhlakihnyuck kuh ke acnwuck mahno, pwepuh in mempucr lal an ac sihmihsyucklac kac. El enenuh in tiac ituckyang kuhtwena pahng kuh kunohkohn ma oasr tuhlihk srihsrihk kuh tuhlihk fuhsr wi. Ma inge weacng in tiac ituckyang kunohkohn in kahsruh luti sie sucu ma oasr tuhlihk fuhsr kuh tuhlihk srihsrihk ke lohm se. Ma inge weacng pac in tiac ituckyang mwet fuhsr in weluhl kahsruh luti. Mwe kohsrkohsr inge enenuh in an na ne ke na Prestuhnsi Se Met lwelah in itucklac ma sihmlac kac ingacn.

38.6.2.6

Councils luhn Stek ac Ward

Ke toeni in eis kahsruh ke stek ac ward uh, prestuhnsi luhn stek ac pisaprik elos sifilpac lohacng nuh ke masap ac kolyuck luhn Alu uh nuh ke karihngihnyen ac in topuk kahsruh fuhkah ahkngal. Mwet kol ac mempucr ke kaunsucl suk kahsruh sin Nguhn ke elos luti ac sramsramkihn elyah na upac se inge.

Mempucr ke kaunsucl elos enenuh pac in ahksahfyelah treining se nuh sin tuhlihk srihsrihk ac mwet fuhsr (liye 38.6.2).

38.6.2.7

Elyah Ma Kuhpahsr Nuh ke Ahkkolukye

Fin mukwikwi in ahkkoluk luhn mempucr se lain masap uh, pisap kuh stek prestuhn el enenuh in pahtok mempucr se inge in fahkwack ke ma inge nuh sin puhlismacn ah kuh kuhtuh mwet kol sahyac ma fal in etuh ke ma inge.

Mwet kol ke Alu uh ac mempucr uh enenuh in ahkfalyelah ma enenuh nuhkwewa in fahk ke ahkkoluk se nuh sin puhlismacn ah.

38.6.4

Ohiyac in Tulokihnyac Isus

Kuh ac suwohs oasr sin siyacnyacn pahyuck se suc ma kuh in orek tuhlihk in use sie mahno nuh facluh nuh sin tuhlihk nuhtin God, suc ma kunaclos pa in tuhfahlah ac karuhnguhnwacng (liye 2.1.3). Sulaclah lah tuhlihk ekahsr ac ngac in oasr tuhlihk uh ma na nuh selos sifacna ac tiac arulacna etweyuck. Enenuh in ma na yurun siyacnyacn sacn ac Leum.

38.6.5

Nwacsnwacs ac Suwohs

Masap luhn Leum ke nwacsnwacs pa:

Tiac ahko nuh sin oacna sie mwet fin tiac pahyuck inmahsrlon mukul se ac muhtwacn se.
Suwohs lun pahyuck se.

Ahko inmahsrlon pahyuck se el oreklac in wolacna ac muhtahl. Oreklac sin God nuh ke oraclah luhn tuhlihk ac in ahkkahlwemye luhngse inmahsrlon mukul ac muhtwacn se ma pahyuck uh.

38.6.6

Petsac Koluk ke Tuhlihk Srihsrihk.

Alu uh tiacna ahkkweye oacna sie atac ke petsac koluk ke tuhlihk srihsrihk. Fin sie pisap kuh prestuhn luhn stek el etwacack muh mempucr se el wi oruh petsac koluk luhn tuhlihk srihsrihk, elan silahklahk ukwe mwe etuh ke 38.6.2.1.

38.6.8

Laslaslah Acn in Orek Tuhlihk luhn Muhtwacn

Alu uh tilac lwelah laslas ma ahkngalye acn in orek tuhlihk luhn muhtwacn.

38.6.10

Pihkasr

Alu uh tiacna ahkkweye oacna sie atac ke pihkasr. Ke orekmakihnyuck inse uh, pihkasr pa ahko inmahsrlon:

Ninac kuh pahpah ac tuhlihk se.
Ninac mahtuh kuh pahpah mahtuh ac tuhlihk se.
Tamuhlwel ac tahmtahel.
Uhngkuhl se kuh anti se ac nis kuh nacfiyu se.

Oacna ke orekmakihnyuck inse uh, tuhlihk, tuhlihk nuhtin tuhlihk nahtuh, tamuhlwel ac tahmtahel, muhtwacn nuhtin muhtwacn kuh mukul wiyac, ac mukul nuhtin muhtwacn kuh mukul wiyac weacng ma isuslac nahtuh, ma nuhtlac, ma nuhtin muhtwacn kuh mukul ma kom pahyuck tok se, kuh sucu tiac ma ke srah.

In eis kolyuck, mwet kol uh silahklahk pahngon lain in kahsruh nuh ke tuhlihk srihsrihk se ma oasr ke ohiyac luhn pihkasr ke yen ma oasr we (liye 38.6.2.1). Ke muhtuhnfacl sahyac, stek prestuhn el enenuh in suk kolyuck sin eria ke ohfuhs luhn eria uh. Ke acn sahyac an, mwet kol pahtokyuck pac in sruokyac mwet orekma luhn Mwe Kahsruh Sucu kuh manager luhn ohiyac wo ac sifacna kuh in liyacacng an ke ohfuhs luhn eria.

Council ke mempucrlac luhn Alu uh ac in sihmihsyucklac ke ma sihmlac an enenweyuck fin mwet mahtuh se ahkkolukyelah sie tuhlihk srihsrihk kuh tuhlihk fuhsr. Pihkasr uh el pacl nuh kwewa apkuhran in enenuh Alu uh in eslah inen mwet se inge liki alu uh elan tilac mempucr.

Fin sie tuhlihk srihk liki matwac yac 18 el pihkasr, prestuhn luhn stek elan pahngon Ohfuhs luhn Prestuhnsi Se Met in eis kolyuck.

Mwet ma puhtatyang nuh ke ohiyac luhn pihkasr uh kwacna kweok ke ongaiyac upac ac elos puhlakihn muh oasr ma koluk elos oraclah. Mwet kol uh elos sramsram nuh sin mwet inge ke luhngse ac pahkomuhta. Elos sang ahkkweyeyuck ke nguhn ac kahs in kahsruh in kahsrwelos kuhtanglah ma elos puhla kweokkihn ke pihkasr.

Kuhtuh pacl uh mwet inge puhla mwekihn ac koluk. Wacngihn ma koluk ma mwet ahkngalyeyuck inge oraclah. Mwet kol uh kahsrwelos ac sucu lalos in kahlwem ke luhngse luhn God ac ke onweyuck se ma tuhkuh kacl Jisus Kraist ac Iwaclah Lal (liye Alma 15:8; 3 Nephi 17:9).

In weacng pac kahsruh mokleyuck luhn mwet kol luhn Alu uh, kahsruh luhn taktuh sahp ac enenweyuck nuh sin mwet ahkkolukyeyucklac ac sucu lalos an. Nuh ke ke mwe etwacack pac, liye 38.6.18.2.

38.6.12

Inutnut

Inutnut uh el som yohk nuh ke acn lohsr ac pwacnlah mwet se in tuhlac. El kuhnaoslah luhlahlfongi kacl Kraist.

Inutnut el alu nuh sel Setuhn. El oacyacpac nwacnwack kuh orekmakihn mukwikwi ma tiac insese nuh ke wosasuc lal Jisus Kraist. Kuhtuh mukwikwi inge pa (tuh tiac pa nge nohfohn pa nuh ke) liye pacl fahsruh uh, selngawi, ac in onwelah mwet suc tiac ma tuhkuh ke kuh luhn pristut luhn God (liye Moroni 7:11–17).

Mempucr ke Alu uh tiac enenuh in wi oacna sie atac in ahkfuhlwact lal Setuhn kuh in wi ma orek ke atacn inutnut ma. Elos tiac enenuh in lohacng nuh ke kain in ma lohsr inge ke sramsram uh kuh ke toeni ke Alu uh.

38.6.13

Petsac Koluk

Alu uh tiacna ahkkweye oacna sie atac ke petsac koluk. Kuhtwena orekmakihnyacn petsac koluk uh kuhnahoslah moul luhn kais sie mwet, sucu, ac mura se. El oacyacpac luhslah Nguhn luhn Leum. Mempucr ke Alu uh enenuh in kahingkihn atac nuh kwewa ke petsac koluk ac lain oreklac la uh, kihtaclihk kac uh, ac orekmakihnyac.

Eis kahsruh la sifacna ac tulokihnyacn kuh luhn mempucr se kwacna fal in sang kahsruh mwet se in auliyak ke orekmakihnyacn petsac koluk uh. Toeni luhn mempucr tiac muhta orek. Tuhsruhktuh, miting se ac enenuh in orek ke orekmakihn yohk ke petsac koluk ma oraclah ongaiyac nuh ke sie pahyuck luhn mempucr kuh sucu (liye 38.6.5). Enenuh in orek sie miting ah fin mempucr se el oraclah, kihte, sruok, kuh kalweni na in liye petsac koluk ke tuhlihk srihsrihk (liye 38.6.6).

38.6.14

Ahkkoluk

Mwet nuh kwewa elos tuhlihk nuhtin God. Mwet nuh kwewa elos tamuhlwel ac tahmtahel suc ip ke sucu ne tok Lal (liye “Sucu: Sie Mwe Fahkwack nuh fin Facluh”). God “El orala mutanfahl nukewa sin mwet sefanna” (Orekma 17:26). “Mwet nuhkwewa in oacna sie” nuh sin God (2 Nephi 26:33). Kais sie mwet “sacohk ye muhtahl oacna mwet ngiac” (Jacob 2:21).

Sramsram in ahkkoluk tiac fahsr wi ma God El fahkwack uh. Luhngse ac sruhnga sin God wiwina ahkfuhlwact nuh Sel ac masap Lal, tiac srisri som nuh ke tuhn in mwet sacn kuh elah sahyac.

Alu uh ngihsre sin mwet nuh kwewa in tohllah elah ac mukwikwi in sruhnga lalos nuh sin oacna sie u kuh kais sie. Mempucr ke Alu uh enenuh in oraclah srihkasrak in ahkfuhlwact nuh sin tuhlihk nuhtin God nuh kwewa. Mempucr elos ukwe masap luhn Mwet Lahngo in luhngse mwet sahyac (liye Matthew 22:35–39). Elos kampare in mwet wowo nuh sin mwet nuh kwewa, tiac lohacng nuh ke sruhnga nuh sin oacna sie mwet. Ma inge nwacnwack sruhnga la nuh ke kain in tuhn, ohiyac, acn luhn mwet, sruf, mukul kuh muhtwacn, matwac, suhfas luhn mahno, kahsruhp kuh suhkahsruhp lalos, luhlahlfongi ke alu kuh tiac luhlahlfongi, ac atacn luhngse ahko luhn mwet se.

38.6.15

Luhngse ac Elah luhn Mukul nuh sin Mukul ac Muhtwacn nuh sin Muhtwacn

Alu uh ahkkweye sucu ac mempucr in kohllah paholos ke inse muhsahlah, luhngse, ac suhnak nuh sin mukul ma luhngse mukul kuh muhtwacn ma luhngse muhtwacn. Alu uh oacyacpac ahkyohkye kahlwem nuh sin mwet uh in ahkkahlwemye luti lalos ke kuhlwacng, oracni mwet nuh kwewa oacna sie, luhngse nuh sin mwet sahyac, ac suhnak ahkfuhlwact nuh sin mwet nuh kwewa. Alu uh tiac wi mokle ma sikyak ke mwet inge ekuhllah ataclos uh.

Masap luhn God tiac lwelah nuhnak fohkfohk, oacna sie inmahsrlon mukul se nuh sin muhtwacn se kuh mukul mukul ac muhtwacn muhtwacn. Mwet kol ke Alu uh ahkkweye mempucr ma kuhnaoslah masap luhn tiac kosro. Mwet kol kahsrelos in eis kahlwem wowo se ke luhlahlfongi ke Jisus Kraist ac Iwaclah Lal, inkacnek ke auliyak, ac srihpen moul se fin facluh inge.

Fin mempucr uh puhla luhngse inmahsrlon mukul mukul ac muhtwacn muhtwacn ac fin kampare moulkihn masap ke tiac kosro, mwet kol elos ahkkweyaclos ke kampare lalos. Mempucr inge kuh in eis kunohkohn lalos ke Alu, eis pwepuh in lwelah nuh tempuhl, ac eis akwuck ke tempuhl fin elos nwacsnwacs. Mukul mempucr ke Alu uh kuh in eis ac orekmakihn pristut.

Mempucr nuh kwewa ma karihngihn olwelah lalos ac fah eis mwe insewowo uliyucklac nuh tok ma pahtpaht finne ma elos oasr kuh uh lwelah kuh tiac lwelah nuh selos in eis mwe insewowo ke macruht ne tok ma pahtpaht ac ekihn pahpah ninac ke moul se inge (liye Mosiah 2:41).

38.6.16

Macruht Inmahsrlon Mukul Mukul ac Muhtwacn Muhtwacn

Oacna ke mwe luti se ke wuhlweacng, ma tuhkuh ke ma suhmuhslah, Alu uh ahkpwacyelah lah macruht inmahsrlon mukul se ac muhtwacn se el yohk srihpac nuh ke plwacn luhn Mwet Oraclah nuh ke moul ma pahtpaht nuh sin tuhlihk Nahtuhl. Alu uh oacyacpac ahkpwacyelah lah masap luhn God ahkuhtweyac macruht muh ituckyang lwelah ac sielac ke masap inmahsrlon mukul se ac muhtwacn se.

38.6.17

Lutlutkihn Ahko

Kunohkohn luhlahp se luhn pahpah ninac pac in luti tuhlihk nahtuhlos ke atacn ahko. Pahpah ninac enenuh in ahkkahlwemye in suwohs, kahlwem, ac sruhmuhn na sruhmuhn atacn ahko pwacye ac nwacsnwacs nuh sin tuhlihk nahtuhlos.

38.6.18

Ahkkoluk ke Ahko, Rep, ac Kuhtuh Ohiyac Koluk ke Ahko

Alu uh tiacna ahkkweye ahkkoluk ke ahko uh. Oacna ke orekmakihnyuck inse uh, ahkkoluk ke ahko ahkuhtweyucki uh pa ohiyac in ahko nuh kwewa ma mwet se tiac luhngse ac mwet se el oruh nuh sel. Ohiyac in ahko nuh sin sie mwet ma tiac kuh tiac luhngse el luhmweyuck muh ahkkoluk ke ahko. Ahkkoluk ke ahko kuh pac in sikyak sin mukul kuh muhtwacn kiom kuh mwet se kom wi uh. Nuh ke kuhtuh pac mwe etwacack ke fahkwack ke ahkkoluk ke ahko nuh sin tuhlihk kuh mwet fuhsr, liye 38.6.2.3.

Ahkngal ke ohiyac suhfal el oasr ke kain in ma puhkantwen, nuh ke acnwuck nuh ke rep ac kuhtuh ohiyac ke ahkkoluk ke ahko. Kuh in sikyak ke mahno, ke sramsram, ac ke atac pac sahyac. Nuh ke mwe kolyuck ke kahsruh mempucr suc puhlakihn ahkkoluk ke ahko, rep, kuh kuhtuh pac ohiyac sahyac ke ahkkoluk ke ahko, liye 38.6.18.2.

Fin mempucr uh luhman akihlen kuh etwacack ke ahkkoluk ke ahko, elos mukwiyak in karihngihn mwet ongaiyac kac uh ac mwet sahyac ke pacl na sa. Ma se inge weacng pac in fahk nuh sin puhlismacn ah ac fahk nuh sin pisap kuh stek prestuhn. Fin ahkkolukyeyuck tuhlihk se, mempucr uh enenuh in ukwe mwe ahkuhtweyac ke 38.6.2.

38.6.18.2

Ahkkoluk ke Ahko, Rep, ac Kuhtuh Ohiyac Koluk ke Ahko

Mwet ongaiyac ke ahkngal ke ahko, rep, kuh kuhtuh atac sahyac ke ahkkoluk ke ahko wacna kweokkihn wellac. Ke mempucr se ac sramsram nuh sin pisap kuh stek prestuhn, el topuk ke luhngse ac pahkomuhta. Mwet kol an enenuh in acsmak nuh selos ac sang kahsruh wowo in kahsrwelos in kuhtanglah ohiyac koluk ma sikyak ke srihpen ahkkolukyeyuck. In eis kolyuck, mwet kol uh silahklahk pahngon lain in kahsruh nuh ke acnwuck ke yen ma oasr we.

Kuhtuh pacl uh mwet ahkngalyeyuck inge puhlakihn mwekihn ac koluk. Wacngihn ma koluk ma mwet ahkkolukyeyuck inge oraclah. Mwet kol uh tiac sang koluk nuh sin mwet ongaiyac inge. Elos kahsruh mwet inge ac sucu lalos in kahlwem ke luhngse luhn God ac onweyuck se ma tuhkuh sel Jisus Kraist me ac Iwaclah Lal (liye Alma 15:8; 3 Nephi 17:9).

Ke kuhtuh mempucr uh ac kuh in sulaclah in fahk ke ahkkoluk se inge, mwet kol uh tiac enenuh in lohacng yohk ke ip srihsrihk kac an. Ma se inge kuh in ahkngalye mwet ingacn.

In weacng pac kahsruh mokleyuck luhn mwet kol luhn Alu uh, kahsruh luhn taktuh sahp ac enenweyuck nuh sin mwet ahkkolukyeyucklac, mwet ahkkolukye, ac sucu lalos an. In etuh yohk kac, liye 31.3.6.

38.6.18.3

Toeni Nuh Ke Mempucrsrip

Toeni kuh miting luhn mempucrsrip ac kuh in enenuh in orek luhn mwet se fin el oruh ohiyac suhfal kuh ahkngalye sie mwet. Toeni kuh miting luhn mempucrsrip enenuh in orek fin mempucr se el repiyac sie mwet kuh fwack muh el oraclah sie ohiyac suhfal ke ahko.

38.6.20

Sifacna Uniyac

Moul se facluh inge el mwe sang se yurun God—mwe sang yohk srihpac se suc enenuh in karihngihnyuck. Alu uh tahpuhk yohk in kohsraclah sifacna uniyac.

Inkaiyen mwet ma nuhnkuh ke sifacna uniyac elos luhngse sokwack monglac ke ngal elos puhlakihn ke mahno, nuhnak, elyah, ac nguhna. Kain in mwet inge elos enenuh luhngse, kahsruh, ac tahpuhk yurun sucu, mwet kol ke Alu, ac mwet suhmaht sahyac.

Pisap el kahsruh ke ma luhn nguhn fin mempucr sacn nuhnkuh kuh srihke in sifacna unilyac. El oacyacpac silahklahk in kahsruh mempucr sac in eis kahsruh yurun mwet pihsrlac.

Sahyacn na kampare luhn mwet luhngse inge, mwet kol, ac mwet pihsrlac, sifacna uniyac el tiac kuh in tiloki. El som sang insiac muhsahlah, welac in nuhnak, ac kihsensiyuck ma tiac kuh in toplac nuh sin mwet ma el luhngse ac mwet sahyac. Mwet kol enenuh in sang kahsruh ac muhtwacta yurun sucu inge. Elos kahsruh kihtaclos ac ahkkweyelos.

Tiac ma wowo se mwet se in sifacna eislah moul lal. Ne ohinge, God muhkwena pa kuh in oruh nuhnuhnkuh nuh ke nuhnak, mukwikwi, ohiyac, ac atacn oraclah luhn mwet se (liye 1 Samuel 16:7; Doctrine and Covenants 137:9).

Elos suc ma oasr mwet sacohk se la wacngihnlac ke srihpen sifacna uniyac kuh in sokwack finsrak ac onweyucklac yurun Jisus Kraist ac Iwaclah Lal.

38.6.23

Mwet ma Ekuhllah Ataclos

Mwet ma ekuhllah ataclos liki atac se elos isuslac kac ah sun ma upac. Mempucr ac mwet tiac mempucr suc etweyuck muh ekuhllah ataclos liki atac se elos isuslac kac ah—ac sucu lalos ac kawuck—enenuh in orek eltahl ke suhnak, kuhlwacng, luhngse, ac ke luhngse yohk luhn Kraist. Mwet nuhkwewa suliyuck in wi alu, sahyacn toeni ke Sacnri uh, ac kuhtuh pac toeni ke Alu uh (liye 38.1.1).

Atacn mukul kuh muhtwacn uh enenuh nuh ke plwacn in engan luhn Pahpah Luhng. Kalmac na pwacye nuh ke atac luhn mukul kuh muhtwacn ke sie mwe fahkwack nuh fin facluh pa atac se ma elos isuslac kac ah. Kuhtuh mwet uh puhlakihn muh elos siena liki atac se elos isuslac kac ah. Pwacnwacng, elos kuh in fwack muh elos ekuhllah ataclos. Alu uh tiac wi mokle ma sikyak ke mwet inge ekuhllah ataclos uh.

Inkaiyacn ma Alu uh wi oruh uh ac kuhtuh akwuck luhn pristut uh tiac wiwi na atacn mwet uh. Mwet ma ekuhllah ataclos uh kuh in pacptaislac ac ahkkweyeyucklac oacna ke sihmlac ke 38.2.8.10. Elos kuh pac in eis kuhfa luhn Leum ac eis mwe insewowo luhn pristut. Tuhsruhk, aluiyacn pristut ac akwuck lun tempuhl uh ituck fal nuh ke atac se ma kom isuslac oasr ke an.

Mwet kol ke Alu uh srihke in tulokihn mwet se ma nuhnkuh in ekuhllah atacl kain se nuh ke ekuhllah in muhtwacn lac kuh in mukul lac (“sex reassignment”). Mwet kol uh sang kahs in kahsruh lah orweyacn ma inge ac tuhfah oruh in tilokoh kuhtuh suwohs luhn mwet se ke Alu uh.

Mwet kol uh oacyacpac sramsramkihn in tiac ekuhllah atac nuh ke siena mwet. Eklac se inge pa in ekuhllah atacn nuknuk, kuh ekuhllah ine, in fahk muh kom siepacna mwet sahyac. Mwet kol uh sramsramkihn nuh sin mwet ke eklac inge ac tuhfah oasr mwe tulokihnyuck nuh selos ke Alu uh ke pacl se elos eklac inge.

Tulokihnyuck inge pa eis kuh orekmakihn pristut, eis kuh orekmakihn tempuhl rackuhmacn, ac eis kunohkohn la ke Alu uh. Finne kuhtuh suwohs luhn mempucr se inge uh tulokihnyucki, kuhtuh ma sahyac ke Alu uh el kuh in wi oruh.

Fin mempucr se el sulaclah in ekuhllah inel, inel na pwacye kuh in sihmlac ke rackuhrt lal ac inel el luhngse ke ohiyac in sang ine luhngse la. Mwet se inge kuh in pahngonyuck ke ine se el ke an ke ward an.

Ma ac sikyak uh kuh in yohk ma siena kac ke u nuh ke u ac mwet se nuh ke mwet se. Mempucr ac mwet kol uh tuhkweni sramsram ac nuh sin Leum. Prestuhnsi luhn Eria ac kahsruh mwet kol ke alu srihsrihk inge in etuh lah ke ac elos ac oruh ke kain in ohiyac inge. Pisap se el sramsram nuh sin stek prestuhn se ke kuhtuh ohiyac. Stek prestuhn ac misin prestuhn enenuh in suk kahsruh sin Prestuhnsi luhn Eria (liye 32.6.3).

38.7

Masap ke Ono ac Fokoko luhn Mahno

38.7.2

Pihkihnyucki ac Isisyak

Sucu luhn mwet se ma misac an sulaclah lah monun mwet sacn ac puckpuckuh kuh isisyak. Elos suhnakihn kena luhn mwet se ingacn.

Ke kuhtuh acn luhlahp ingoh, masap se pa in isisyak. Ke kuhtuh ohiyac sahyac, puckpuckuh tiac ma orek se kuh kuh in moliyucklac sin sucu an. Ke ohiyac nuhkwewa kac an, mahno se ingacn enenuh in kahlwem ke suhnak ac mihs. Mempucr enenuh in ahkacsmakihnyeyuck lah kuh ke Sifilpac Moulyak kuh in orekmakihnyuck inse (liye Alma 11:42–45).

Fin kuh, monun mempucr se ma misac ingacn fin el eis akwuck lal tempuhl enenuh in nukumyuckyang el ke nuknuk se tempuhl ke pacl se ma pihkihnyucki kuh isisyak uh (liye 38.5.8).

38.7.3

Tuhlihk Ma Misac Meet liki Isuslac (Isuslac Misac ac Tuhlihk Puhtatlac)

Pahpah ninac kuh in sulaclah lah elos ac oruh mas in puckpuck lalos.

Akwuck tempuhl tiac enenweyuck kuh ahkfahsryeyuck nuh sin tuhlihk ma misac meet liki isuslac. Tiac kalmac pa tuhlihk inge ac tiac wi sucu se ingacn nuh tok ma pahtpaht. Pahpah ninac elos kwacfeyuck in luhlahlfongi Leum ac suk kahsruh Lal.

38.7.4

Euthanasia

Moul se facluh inge el mwe sang na yohk se sin God. Euthanasia el ahksahfyelah moul luhn sie mwet el fin kweok ke mas na upac se kuh ohiyac sahyac. Mwet ma wi sun euthanasia, wi pacna mwet ma wi kahsruh in misac ke uniyac, kuhnaoslah masap luhn God ac kuh pac in kuhnaoslah masap ke acn sacn.

In tulokihnyac kuh sang life support kahsruh mwet se in fahlac na moul la tiac oacwac muh euthanasia (liye 38.7.11).

38.7.5

Mas ke HIV ac AIDS

Mempucr ma sun mas se inge HIV (human immunodeficiency virus) kuh suc ma oasr se AIDS (acquired immundodefeciency syndrome) enenuh in pahingyuck nuh ke toeni ac mukwikwi ke Alu uh. Oasr wi lalos uh tiac ma ac sang elyah nuh sin mwet sahyac.

38.7.8

Kahsruh nuh ke Ono ac Fokoko luhn Mahno

Suk kahsruh wowo nuh ke ono, orekmakihn luhlahlfongi, ac eis mwe insewowo ke mwe sang luhn pristut, tuhkweni orekma in sang onwelah, fahsr fal nuh ke kena luhn Leum.

Mempucr tiac na enenuh in orekmakihn kuh srihke ono ma ac oasr kihsensiyuck kac nuh ke moul se, in nguhn, ac nuh ke masap uh. Elos suc ma oasr elyah la ke mas in mahno enenuh in suk kahsruh sin mwet pihsrlac oasr etuh ac pwepuh la in orekmakihn ke acn ingacn.

38.7.8

Ono in Maru

Alu uh tiac pahtok orekmakihnyen maru nuh ke ma sahyacn ono. Liye 38.7.14.

38.7.11

Ahkloesyaclihk Moul (Orekmakihn Life Support)

Mempucr tiac enenuh in wi na ma fack nuh ke ahkloesyaclihk moul luhn mwet se fin enenweyuck. Sulaclah inge oreklac tuhkuh sin mwet sacn, fin kuh, kuh mempucr ke sucu sacn. Elos enenuh in suk kahsruh wowo yurun mwet acn in ono ah ac kolyuck ke pruhe.

38.7.13

Fakfuck in Kohsrkohsr

Fakfuck in kohsrkohsr el orek sin mwet suhmaht ke acn in ono ac karuhnguhnwacng moul uh. Mempucr ke Alu uh elos pahtokyuck in karuhnguhnuhlos sifacna, tuhlihk nahtuhlos, ac mura lalos ke elos eis fakfuck in kohsrkohsr.

Pwacye lah, kais sie ac sifacna sulaclah lah elos ac eis kuh tiac eis fakfuck in kohsrkohsr se. Fin oasr elyah luhn mempucr, elos kuh in suk kahsruh yurun mwet orekma ke acn in ono ac oacyacpac suk kolyuck yurun Nguhn Muhtahl.

38.7.14

Kahs in Lahlmwetmwet ac Moul Fokoko

Kahs in Lahlmwetmwet el masap se luhn God. Mwet pahluh elos ahkpwacyelah ke mwe luti ke Doctrine and Covenants 89 weacng pacna in tiac eis tobacco, mwe nihm upac (alcohol), ac mwet nihm fol (tea ac coffee).

Oasr pac mwe sensen ac elyah sahyac ma tiacna fwackyuck ke Kahs in Lahlmwetmwet kuh sin mwet kol ke Alu uh. Mempucr enenuh in orekmakihn lahlmwetmwet ac in pruhe oruh sulaclah wowo ke elos suk in fokoko ke mahnolos, nguhnalos, ac nuhnkwaclos.

38.8

Masap luhn Mwet Kol

38.8.1

Nuht Tuhlihk ac Acn in Liyeyuck Tuhlihk

Nuhtwelah tuhlihk ac sang acn in muhta luhn tuhlihk kuh in ahkinsewowoye tuhlihk ac sucu. Sucu luhngse, ac moul ma pahtpaht se kuh in oreklac ke nuht uh. Tiac elyah lah tuhlihk uh tuhkuh nuh ke sucu se ke nuht kuh isus, elos sacohk ac ma se fanna ke mwe insewowo uh.

Mempucr ma suk in nuht kuh sang acn in muhta nuh sin tuhlihk uh enenuh in ahkos kwewa masap ke acn elos muhta kac ac wi pac kafucrmacn.

38.8.4

Sain ac Petsac luhn General Authorities, General Officers, ac Mwet Itngucul ke Eria

Mempucr ke alu uh tiac enenuh in suk sain luhn General Authorities, General Officers, ke Mwet Itngucul ke Eria. Oruh ohinge lusrohng kunohkohn muhtahl lalos ac nguhn ke miting uh. Ac oacyacpac tulohkohnuhlos in tiac paing mempucr sahyac.

Mempucr tiac enenuh in eis petsac luhn General Authorities, kuh Mwet Itngucul ke Eria lun lohm alu ah.

38.8.7

Mackuhsin luhn Alu uh

Mackuhsin luhn Alu uh nwacnwack:

Kawuck ma nuh sin tuhlihk srihsrihk.
Mwe Ahkkweye Mwet Fuhsr ma nuh sin mwet fuhsr.
Liahona ma nuh sin mwet mahtuh.

Prestuhnsi Se Met kwacfe mempucr nuhkwewa in riti mackuhsin luhn Alu uh. Mackuhsin inge kahsruh mempucr in luti wosasuc luhn Jisus Kraist, lutlutkihn mwe luti luhn mwet pahluh moul, puhla fototo inmahsrlon sucu ke Alu uh fin facluh, kuhtanglah elyah ke luhlahlfongi, ac puhla fototo nuh sin God.

38.8.8

Ine ke Alu, Mahk ke Kahs, ac Sain

Inen Alu uh, mahk ke kahs, ac sain elos sang ahkuhtweyac ma ke Alu uh.

Mahk ke kahs ac Sain. Mahk in kahs kuh sain ke Alu uh (liye sroal se lucng inge) orekmakihnyuck muhkwena fin ahkkweyeyucklac sin Prestuhnsi Se Met ac U luhn Mwet Singucul Luo. Elos tiac orekmakihnyuck mwe yucn. Kuh orekmakihnyuck nuh ke ohiyac la sifacna, nuh ke petsac, kuh inkacnek in sruh mani.

38.8.10

Computers

Computers ac software orekmakihnyuck ke nien toeni ke Alu uh ma kahsreyuck ac tohuyak sin Church headquarters kuh ohfuhs luhn eria. Mwet kol ac mempucr orekmakihn kuhfa inge in kahsruh srihpen Alu uh, wi pacna orekma ke tahk sucu.

Software nuh kwewa ke computer uh enenuh in oreklac license la yurun Alu uh.

38.8.12

Kuhfwen Mwe Ahkuhtweyac in Lutiyuck

Alu uh sruhkwack kuhfa in kahsruh mempucr in lutlutkihn ac moulkihn wosasuc luhn Jisus Kraist. Ma inge nwacnwack ma suhmuhslah, pweng ke toeni luhlahp, mackuhsin, manual, puk, ac mwe kahsruh sahyac. Mwet kol elos kwacfe mempucr in orekmakihn ma suhmuhslah ac mwe kahsruh sahyac ma enenweyuck in lutlutkihn wosasuc in lohm selos.

38.8.14

Nuknuk ac Atac

Mempucr ke Alu uh elos kwacfeyuck in oruh suhnak lalos ke mahnolos ke sulaclah lalos ke nuknuk ac ataclos. Ma wo tiac oacna sie acn nuh kwewa ke facsin ac toeni uh.

38.8.16

Lwen in Lalo

Mempucr kuh in lalo ke pacl nuh kwewa. Tuhsruhktuh, elos kwacna srwelah muh Sahpuht se emet ke mahlwem pa lwen in lalo uh.

Lwen in lalo el nwacnwack pruhe, tiac mongo ac nihm ke sahp ao 24 (fin kuh uh), ac sang mwe sang ke lalo. Mwe sang ke lalo el mwe sang se in kahsruh elos suc enenuh (liye 22.2.2).

Kuhtuh pacl uh toeni ke acn se kuh fin facluh nohfohn orek ke Sahpuht se emeet ke mahlwem. Fin sikyak na, prestuhnsi ke stek ac sulaclah sie Sahpuht sahyac ah in lwen in lalo.

38.8.17

Sritacl Mani

Alu uh lain ac kahsruh in tiac sritacl mani ke ohiyac nuh kwewa. Ma inge nwacnwack pet ke sritacl ac lottery kuh lucky yurun kafucrmacn.

38.8.19

Som nuh ke Muhtuhnfacl Sahyac

Mempucr ma muhta na ke acn elos isuslac kac oasr inkacnek lalos in muhsahi ac ahkkweye Alu uh insac. Tuhsruhktuh, fin som liki acn sacn nuh ke siena acn el sulaclah na luhn mwet se.

Mempucr ma som nuh ke acn se sahyac enenuh in ahkos masap nuh kwewa ke acn sacn (liye Doctrine and Covenants 58:21).

Misineri tiac enenuh in sang kahsruh lalos nuh sin mwet ma ac som inge.

38.8.22

Masap ke Acn

Mempucr enenuh in ahkos, ahkfuhlwactye, ac ahkkweye masap ke oacna sie acn ma elos muhta kac kuh forfor nuh kac (liye Doctrine and Covenants 58:21–22; Ip Yohk ke Luhlahlfongi 1:12). Nwacnwack pacna masap se ma fahk muh in tiac forfor luti ah.

38.8.25

Sramsram luhn Mempucrs nuh sin Church Headquarters

Tiac pahtokyuck mempucr ke Alu uh in pahng, email, kuh sihm lwacta nuh sin General Authorities ke kihsensiyuck ke mwe luti, elyah lalos sifacna, kuh nguhsr. Mempucr elos kwacfeyuck in suk kahsruh yurin mwet kol lalos ke acn sacn, suc pa nuh ke Rilif Sosaiti kuh prestuhn ke u luhn elder, fin elos enenuh kolyuck luhn nguhn (liye 31.3).

38.8.27

Mempucrs ma Oasr acn Suhfal ke Mahno

Kwacfeyuck mempucr ac mwet kol in fahk nohfohnna enenuh luhn mwet ma weluhlos muhta. Mempucr ma oasr acn suhfal ke mahno elos yohk srihpac ac kahsreyuck ke ohiyac puhkantwen. Ma suhfal ke mahno inge kuh in som nuh ke etwacack, wi inmahsrlon mwet, nuhnak, kuh ke mahno.

38.8.29

Luhlahlfongi Sahyac

Puhs mwe moklweyuck, pwengpweng, ac yohk kalmac nuh ke suhnak uh kuh in sukokyak ke luhlahlfongi sahyac. Misineri ac mempucr sahyac enenuh in etuh ma inge ac suhnakihn luhlahlfongi ac facsin luhn mwet sahyac.

38.8.30

Mukwikwi ke Masap ac Mwet Kol

Kwacfeyuck mempucr ke Alu uh in wi oruh ma orek ke masap ac ke mura lalos. Ke acn puhs sahyac, ma inge pa:

Vote.
Wi kuh kuhlwacnsap ke acn in masap.
Kahsruh sang mani.
Sramsram aetuhilac yurin mwet kol ac candidates.
Kuhlwacnsap ekihn mwet solac kuh suleyucklac ke ohfuhs ke acn lom an ac kafucrmacn.

Kwacfeyuck pac mempucr in wi oruh ma wo ac sang ahkwoyelah mura lalos nuh ke acn wowo se in muhta ac tuhfahlah sucu se.

Mwet kol ke Alu uh ke acn sacn tiac enenuh in oracni mempucr in orek masap. Ac mwet kol tiac pac enenuh in pahtok mempucr ke ohiyac in wi.

Mwet kol ac mempucr enenuh in sensenkackihn pac pwepuh ma kuh in luhngasyucklac muh ma sin Alu uh ke oacna sie acn, ohiyac, masap, kuh yurin mwet.

38.8.31

Muhkwena luhn Mempucrs

Mwet kol ke Alu uh kuh in kahsruh karihngihn ke muhkwena luhn mempucr se. Ma sihmlac ke Alu uh, directories, ac mwe kahsruh ma oacna kain nge tiac orekmakihnyuck nuh sin mwet sacn, mwe petsac, kuh orekmakihn nuh ke masap.

38.8.35

Mwet Lihlihlyak

Sie kunohkohn in kahsruh elos suc enenuh (liye Mosiah 4:26), mempucr ke Alu uh sang pacl, talan, ac elos sifacna kawuckyak ac paing mwet lihlihlyak nuh ke mempucr ke mura lalos.

38.8.36

Nguhsr in Kahsruh nuh ke Mani yurun Alu uh

Mempucr ma oasr enenuh lalos elos kwacfeyuck in sramsram nuh sin pisap liki na in pahngonwack Church headquarters kuh ngihsre mani yurun mwet kol sahyac ke Alu uh kuh mempucr.