0.

Raici Vakararaba ni iVakamacala Taumada

0.0

iVakamacala Taumada

E vakavulica na Turaga, “Ia, sa kilikili ki na tamata yadua me vulica na nona itavi, io me vakayacora ena yalodina na itavi ni itutu sa lesi kina” (Vunau kei na Veiyalayalati 107:99). Ni ko iliuliu e Na Lotu i Jisu Karisito ni Yalododonu Edaidai, sa dodonu mo vakasaqara na ivakatakila yadua me vukei iko mo vulica ka qarava vakavinaka na nomu itavi.

Na nomu vulica na ivolanikalou kei na nodra ivakavuvuli na parofita ni gauna oqo ena vukei iko mo kila ka qarava vinaka na nomu itavi. Ni ko vulica na vosa ni Kalou, ko na ciqoma vakavinaka cake kina na veivakauqeti ni Yalo (raica na Vunau kei na Veiyalayalati 84:85).

O na vulica talega na nomu itavi ena nomu vulica na idusidusi eso e tiko ena ivola oqo. Na idusidusi oqo e rawa ni sureta na ivakatakila kevaka era vakayagataki me kilai kina na ivakavuvuli, na lawatu, kei na iwalewale me vakayagataki ni vakasaqarai na veituberi ni Yalo.

0.1

Na iVoladusidusi oqo

iVoladusidusi Raraba: Veiqaravi e Na Lotu i Jisu Karisito ni Yalododonu Edaidai e vakarautaka na veituberi vei ira na iliuliu raraba ni Lotu kei ira na iliuliu e veivanua. Sa vidai tu ki na veiwasewase:

• Yavu vakaivunau: Na iwase oqo e vakaraitaka na ivunau kei na ivakavuvuli sa yaga sara vakalevu ena veiqaravi ena loma ni Lotu. Era vakamacalataka:

  • Na ituvatuva ni bula marau ni Kalou, na Nona cakacaka ni veivakabulai kei na bula vakacerecerei, kei na inaki ni Lotu.

  • Na itavi ni matavuvale ena ituvatuva ni Kalou, ena Nona cakacaka ni veivakabulai kei na bula vakacerecerei ena itikotiko, kei na kedrau isema na vuvale kei na Lotu.

  • iVakavuvuli ni Matabete.

  • Na ivakavuvuli ni veiliutaki ena nona Lotu na iVakabula.

• Na iSoqosoqo ni Lotu: Na wase oqo e vakarautaka na idusidusi me baleta na mataveiliutaki ni iteki kei na matabisopi, iliuliu ni kuoramu ni matabete, veiliutaki ena mataisoqosoqo ni iteki kei na tabanalevu, kei ira tale eso era veiqaravi ena Lotu.

• Na Nona Cakacaka ni Veivakabulai kei na Bula Vakacerecerei na Kalou: Na veiwase oqo e veidusimaki ena uto ni cakacaka ni Lotu:

  • Bulataki ni kosipeli i Jisu Karisito

  • Nodra vukei o ira era gadreva tu na veivuke

  • Sureti ira na tamata kecega me ra ciqoma na kosipeli

  • Vakaduavatataki me tawamudu na matavuvale

• Cicivaki ni Lotu: Na iwase oqo e vakaraitaka na ikuri ni idusidusi me baleta na veiliutaki ena Lotu. Na veiulutaga e oka kina na soqoni, veikacivi, ivolatukutuku, veika vakailavo, kei na lawatu.

Na ulutaga kei na ulutaga lalai ena ivolavakarau oqo era sa nabataki tu me vakarawarawataka na kena kunei ka dusi. Me ivakaraitaki, na idusidusi me baleta o cei e rawa ni vauci ena valetabu e vakarautaki tu ena 27.3.1. Na naba 27 e vakaibalebaletaki ki na iwase, na naba 3 e dusia e dua na iwasewase ena wase oya, kei na naba 1 e dusia e dua na iwasewase lailai.

0.2

Vakamatautaki kei na iVurevure Digitaki

E sega ni tautauvata kece na nodra gagadre na iteki kei na tabanalevu. E tu ena ivoladusidusi oqo na idusidusi me baleta na veivakamatautaki vakakina na ivurevure ni so na ka e rawa ni caka:

• iDusidusi me baleta na veivakamatautaki () e vakarautaka na veidusimaki ena ivakarau me moici kina na mataisoqosoqo ni Lotu kei na parokaramu vei ira na tabanilotu e duidui na nodra gagadre kei na ivurevure.

• iVurevure ni veika tale e rawa ni caka () e tiko kina na ikuri ni itukutuku kei na veidusimaki ena rawa ni veivuke vei ira na iliuliu ni iteki kei na tabanalevu.

Era na vakasaqara na iliuliu na veivakauqeti me baleta na idusidusi kei na ivurevure ni veika e rawa ni caka me sotava na nodra gagadre na lewenilotu.

0.3

Vakadodonutaki

Ena dau vakadodonutaki ena veigauna eso na ivoladusidusi oqo. Sa tiko e dua na lisi ni veisau se qai caka wale tikoga oqo ena “iVakaleka ni Veisau Vou.”

0.4

Taro me Baleta na iDusidusi

Ni yaco mai na vakatataro e sega ni tukuni ena ivolanikalou, nodra vosa na parofita bula, se na ivola oqo, sa dodonu me ra vakararavi na lewe ni Lotu ena nodra veiyalayalati vata kei na Kalou, nodra ivakasala na nodra iliuliu, kei na veivakauqeti ni Yalo me veidusimaki.

Kevaka e tiko nodra taro na iliuliu me baleta na itukutuku ena ivola oqo se me baleta na leqa eso e sega kina na kena iwali, era na veitalanoa kei ira na nodra iliuliu vakatulewa.

0.5

iVolavosa

Vakavo ga na vanua e vakaraitaki kina ni duatani:

• Na vosa bisopi kei na matabisopi ena idusidusi oqo sa baleti ira talega na peresitedi ni tabana kei na mataveiliutaki ni tabana. Na vosa peresitedi ni iteki kei na mataveiliutaki ni iteki sa baleti ira talega na peresitedi ni tikina kei na mataveiliutaki ni tikina. Ena ivakalekaleka ni sala e duidui kina na lewa ni peresitedi ni tikina mai vei ira na peresitedi ni iteki, raica na 6.3.

• Ni cavuti na tabanalevu kei na iteki sa baleta talega na tabana, tikina, kei na tabana ni kaulotu.

• Ni cavuti na Sigatabu sa baleta na siga cava ga e rokovi me siga ni Vakacecegu ena noda dui vanua.

• Na vosa tabanilotu e vakatokai kina na tabanalevu kei na tabana.

• Ni cavuti na itubutubu sa baleti ira talega na dauniveisusu vakalawa.

Na veikacivi ni bisopi kei na peresitedi ni tabana e sega ni tautauvata na kena lewa kei na itavi, sa vakakina na veikacivi ni peresitedi ni iteki kei na peresitedi ni tikina. Na bisopi sa ikoya e dua na ilesilesi ena matabete, kei na veitabaki vakabete e vakatulewa duadua ga kina na Mataveiliutaki Taumada. Era kacivi na peresitedi ni iteki mai vei ira na Vakaitutu Raraba kei na Vitusagavulu ni iWasewase.

0.6

Veitaratara kei na Valenivolavola Liu ni Lotu se na Valenivolavola ni iWasewase

E so na iwase ni ivola oqo e oka kina na idusidusi ni veitaratara ki na valenivolavola liu ni Lotu se na valenivolavola ni iwasewase. Na idusidusi me ia na veitaratara ki na valenivolavola liu ni Lotu e sa baleti ira mai Amerika kei Kenada. Na idusidusi ni veitaratara ki na valenivolavola ni iwasewase e sa baleti ira ena taudaku kei Amerika kei Kenada.