0.

Ներածական ակնարկ

0.0

Նախաբան

Տերն ուսուցանել է․ «Թող ամեն տղամարդ սովորի իր պարտականությունը և ողջ ջանասիրությամբ գործի այն պաշտոնում, որում նշանակված է» (Վարդապետություն և Ուխտեր 107․99)։ Որպես Հիսուս Քրիստոսի Վերջին Օրերի Սրբերի Եկեղեցու ղեկավար, դուք պետք է փնտրեք անձնական հայտնություն, որը կօգնի ձեզ սովորել և կատարել ձեր կոչման պարտականությունները:

Սուրբ գրությունների և վերջին օրերի մարգարեների ուսմունքների ուսումնասիրությունը կօգնի ձեզ հասկանալ և կատարել ձեր պարտականությունները: Երբ ուսումնասիրեք Աստծո խոսքերը, դուք ավելի ընկալունակ կլինեք Հոգու ազդեցության հանդեպ (տես Վարդապետություն և Ուխտեր 84․85)։

Դուք կսովորեք նաև ձեր պարտականությունները, երբ ուսումնասիրեք սույն ձեռնարկի հրահանգները: Այս հրահանգների շնորհիվ կարող եք հայտնություն ստանալ, եթե դրանք օգտագործեք այն նպատակով, որ հասկանաք սկզբունքները, քաղաքականությունը և ընթացակարգերը, որոնք պետք է կիրառվեն Հոգու առաջնորդությունը փնտրելիս:

0.1

Այս ձեռնարկը՝

Ընդհանուր ձեռնարկ․ ծառայել Հիսուս Քրիստոսի Վերջին Օրերի Սրբերի Եկեղեցում, ուղեցույց է Եկեղեցու բարձրագույն և տեղական ղեկավարների համար։ Այն բաժանված է չորս բաժինների․

• Վարդապետության հիմունքներ․ Այս գլուխները ներկայացնում են վարդապետություններ և սկզբունքներ, որոնք հիմնարար են Եկեղեցում ծառայելու համար։ Դրանք բացատրում են․

  • Աստծո երջանկության ծրագիրը, փրկության և վեհացման աշխատանքը և Եկեղեցու նպատակը:

  • Աստծո ծրագրում ընտանիքի դերը, փրկության և վեհացման աշխատանքը մեր տներում և տան ու եկեղեցու միջև փոխհարաբերությունները:

  • Քահանայության սկզբունքները։

  • Առաջնորդող սկզբունքները Փրկիչի Եկեղեցում։

• Եկեղեցու կազմակերպությունը․ Այս գլուխներում տրվում են հրահանգներ ցցի նախագահությունների և եպիսկոպոսությունների, քահանայության քվորումի ղեկավարների, ցցերի և ծխերի կազմակերպությունների ղեկավարների և այն մարդկանց համար, ովքեր ծառայում են Եկեղեցում:

• Փրկության և վեհացման աշխատանքը․ Այս գլուխներում ուսուցանվում է Եկեղեցու հիմնական աշխատանքի մասին․

  • Ապրել Հիսուս Քրիստոսի ավետարանով

  • Հոգ տանել կարիքավորների մասին

  • Հրավիրել բոլորին ընդունել ավետարանը

  • Միավորել ընտանիքները հավերժության համար

• Եկեղեցու կառավարումը․ Այս գլուխներում ներկայացված են Եկեղեցին կառավարելու լրացուցիչ ուղեցույցներ: Ընդգրկված թեմաներն են՝ ժողովներ, կոչումներ, գրանցումներ, ֆինանսներ և քաղաքականություն:

Թեմաները հեշտ գտնելու և մեջբերելու համար այս ձեռնարկի վերնագրերն ու ենթավերնագրերը համարակալված են: Օրինակ՝ տաճարային ամուսնության վերաբերյալ հրահանգները բերված են 27.3.1-ում: 27 թիվը վերաբերում է գլխին, 3 թիվը վերաբերում է այդ գլխի տվյալ բաժնին, իսկ 1 թիվը վերաբերում է ենթաբաժնին։

0.2

Հարմարեցում և լրացուցիչ նյութեր

Ոչ բոլոր ծխերն ու ճյուղերն ունեն նույն կարիքները։ Այս ձեռնարկը պարունակում է հարմարեցման ուղեցույցներ, ինչպես նաև լրացուցիչ նյութեր.

• Հարմարեցման ուղեցույցները () պարունակում են ցուցումներ այն մասին, թե Եկեղեցու կազմակերպություններն ու ծրագրերը ինչպես հարմարեցնել տարբեր կարիքներ և միջոցներ ունեցող միավորներին:

• Լրացուցիչ նյութերը () պարունակում են լրացուցիչ տեղեկություններ և ցուցումներ, որոնք կարող են օգտակար լինել ցցերի և ծխերի ղեկավարներին:

Ղեկավարները ոգեշնչում են փնտրում այն մասին, թե որ ուղեցույցներն ու լրացուցիչ նյութերն օգտագործեն անդամների կարիքները բավարարելու համար:

0.3

Թարմացումներ

Այս ձեռնարկը պարբերաբար կթարմացվի: Վերջին փոփոխությունների ցանկը հասանելի է «Վերջին թարմացումների ամփոփում» բաժնում։

0.4

Հարցեր հրահանգների վերաբերյալ

Երբ հարցեր են առաջանում, որոնք չեն քննարկվում սուրբ գրություններում, ապրող մարգարեների խոսքերում կամ այս ձեռնարկում, առաջնորդության համար Եկեղեցու անդամները պետք է ապավինեն Աստծո հետ կապած իրենց ուխտերին, իրենց տեղական ղեկավարների խորհուրդներին և Հոգու ոգեշնչմանը։

Եթե ղեկավարները հարցեր ունենան այս ձեռնարկում տեղ գտած որևէ նյութի կամ այն խնդիրների վերաբերյալ, որոնք ընդգրկված չեն ձեռնարկում, նրանք պիտի խորհրդակցեն իրենց անմիջական նախագահող իշխանության հետ:

0.5

Տերմինաբանություն

Բացառությամբ այն դեպքերի, երբ այլ բան է նշված.

• Այս ձեռնարկում եպիսկոպոս և եպիսկոպոսություն եզրույթները վերաբերում են նաև ճյուղերի նախագահներին և ճյուղերի նախագահություններին։ Ցցի նախագահ և ցցի նախագահություն եզրույթները վերաբերում են նաև շրջանների նախագահներին և շրջանների նախագահություններին: Ամփոփելու համար, թե ինչպես են շրջանների նախագահների լիազորությունները տարբերվում ցցերի նախագահների լիազորություններից, տես 6․3։

• Ծխերին և ցցերին վերաբերող հղումները կիրառելի են նաև ճյուղերի, շրջանների և միսիաների համար:

• Կիրակի օրվան վերաբերող հղումները կիրառելի են այն օրվա համար, որը տվյալ երկրում պահում են որպես հանգստության օր։

• Միավոր եզրույթը վերաբերում է ծխերին ու ճյուղերին:

• Ծնողներին վերաբերող հղումները սովորաբար կիրառելի են նաև օրինական խնամակալների համար:

Եպիսկոպոսի և ճյուղի նախագահի կոչումները համարժեք չեն իրենց իշխանությամբ և պատասխանատվությամբ, համարժեք չեն նաև ցցի նախագահի և շրջանի նախագահի կոչումները: Եպիսկոպոսը քահանայության պաշտոն է, և ձեռնադրումը թույլատրվում է միայն Առաջին Նախագահության կողմից: Ցցի նախագահներին կանչում են Բարձրագույն իշխանությունները և Տարածքային յոթանասունականները:

0.6

Կապ հաստատել Եկեղեցու Գլխավոր վարչության կամ Տարածաշրջանի գրասենյակի հետ

Այս ձեռնարկի որոշ գլուխներ ներառում են Եկեղեցու Գլխավոր վարչության կամ Տարածաշրջանի գրասենյակի հետ կապ հաստատելու հրահանգներ: Եկեղեցու Գլխավոր վարչության հետ կապ հաստատելու հրահանգը վերաբերում է նրանց, ովքեր գտնվում են Միացյալ Նահանգներում և Կանադայում: Տարածաշրջանի գրասենյակի հետ կապ հաստատելու հրահանգը վերաբերում է ԱՄՆ-ից և Կանադայից դուրս գտնվողներին: