0.

Pakagupgopan ti Pakauna

0.0

Pakauna

Insuro ti Apo, “Adalen koma ti tunggal tao ti pagrebbenganna, ken agtignay iti takem a nakaitudinganna, iti amin a kinaregta” (Doktrina ken Katulagan 107:99). Kas maysa a lider iti Ti Simbaan ni Jesucristo dagiti Santo iti Ud-udina nga Aldaw, nasken nga agkalikagumka a manggun-od iti personal a paltiing a makatulong kenka a mangsursuro ken mangipatungpal kadagiti pagrebbengan ti takemmo.

Ti panagadal kadagiti nasantuan a kasuratan ken pannursuro dagiti propeta iti ud-udina nga aldaw ket makatulongto kenka a mangawat ken mangipatungpal kadagiti pagrebbengam. Bayat ti panagadalmo kadagiti balikas ti Dios, ad-addanto a managawatka iti impluensia ti Espiritu (kitaen iti Doktrina ken Katulagan 84: 85).

Mabalinmo met ti mangsursuro kadagiti pagrebbengam babaen ti panagadal kadagiti pangiturong iti daytoy a handbook. Mabalin a mangawis dagitoy a pangiturong iti paltiing no mausarda a mangipaay iti pannakaawat kadagiti pagbatayan, annuroten, ken wagas [procedures] a pangyaplikar kabayatan ti panagkalikagum a manggun-od iti pannarabay ti Espiritu.

0.1

Daytoy a Handbook

Ti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw mangipaay iti pannarabay para kadagiti sapasap ken lokal a lider iti Simbaan. Nabingay daytoy iti uppat a benneg:

• Pundasion a Mainaig iti Doktrina: Idatag dagitoy a kapitulo ti doktrina ken dagiti pagbatayan a kangrunaan iti panagserbi iti Simbaan. Ilawlawagda:

  • Ti plano ti Dios ti kinaragsak, ti aramid ti pannakaisalakan ken pannakaitan-ok, ken ti panggep ti Simbaan.

  • Ti akem ti pamilia iti plano ti Dios, ti aramid ti pannakaisalakan ken pannakaitan-ok iti pagtaengan ken ti pagnaigan ti pagtaengan ken ti Simbaan.

  • Dagiti pagbatayan ti priesthood.

  • Dagiti pagbatayan para iti panangidaulo iti Simbaan ti Mangisalakan.

• Organisasion ti Simbaan: Mangipaay dagitoy a kapitulo kadagiti pangiturong para kadagiti panguluen ti stake ken bishopric, dagiti lider iti korum ti priesthood, dagiti lider iti organisasion iti stake ken ward, ken dadduma pay nga agserbi iti Simbaan.

• Ti Aramid ti Pannakaisalakan ken Pannakaitan-ok: Mangiwanwan dagitoy a kapitulo iti napapateg nga aramid ti Simbaan:

  • Panagbiag iti ebanghelio ni Jesucristo

  • Panangaywan kadagiti agkasapulan

  • Panangawis iti amin nga umawat iti ebanghelio

  • Panamagkaykaysa kadagiti pamilia iti kinaagnanayon

• Panangimaton iti Simbaan: Idatag dagitoy a kapitulo dagiti nayon a pangiwanwan para iti panangimaton iti Simbaan. Mairaman kadagiti topiko dagiti miting, takem [calling], kasuratan [record], pakaseknan iti kuarta, ken annuroten.

Nanumeruan dagiti heading ken subheading iti daytoy a handbook tapno nalaka a masarakan ken agibasar kadagiti topiko. Kas pagarigan, dagiti pangiturong maipapan iti kallaysa iti templo ket maited iti 27.3.1. Ti numero 27 ket maibasar iti kapitulo, ti numero 2 ket maibasar iti benneg dayta a kapitulo, ken ti numero 1 ket maibasar iti subsection.

0.2

Panangibagay [Adaptation] ken Opsional a Resources

Saan nga agpapada dagiti kasapulan ti amin a stake ken ward. Naglaon daytoy a handbook kadagiti pangiwanwan para iti panangibagay [adaptation] kasta met dagiti opsional a resources:

• Dagiti pangiwanwan para iti panangibagay () ket mangted iti panangiturong no kasano nga ibagay dagiti organisasion ken programa ti Simbaan kadagiti yunit nga addaan iti agduduma a kasapulan ken resources.

• Opsional a resources () ket naglaon iti nayon nga impormasion ken pangiturong a makatulong kadagiti lider ti stake ken ward.

Agkalikagum a manggun-od dagiti lider iti pammaregta maipapan no ania a pangiwanwan ken opsional a resources ti mausar a mangipaay iti kasapulan dagiti miembro.

0.3

Dagiti update

Ma-updateto daytoy a handbook iti kada panawen. Adda magun-od a listaan dagiti kallabes a panagbalbaliw iti “Pakagupgopan dagiti Kallabes nga Update.”

0.4

Dagiti Saludsod maipapan kadagiti Pangiturong

No adda dagiti saludsod a saan a marisut kadagiti nasantuan a kasuratan, dagiti balikas dagiti sibibiag a propeta, wenno daytoy a handbook, nasken nga agpannuray dagiti miembro ti Simbaan kadagiti katulaganda iti Dios, iti balakad dagiti lokal a liderda, ken iti pammaregta ti Espiritu para iti pannarabay.

No adda saludsod dagiti lider maipapan iti impormasion iti daytoy a handbook wenno maipapan kadagiti isyu a di marisut, agpabalakadda iti kaasitgan a mangimatmaton a dadauloda [presiding authority].

0.5

Terminolohia

Malaksid laeng no nadakamat ti lugar:

• Dagiti balikas a bishop ken bishopric iti daytoy a handbook maibasar met kadagiti branch president ken branch presidency. Dagiti balikas a stake president ken stake presidency maibasar met kadagiti district president ken district presidency. Para iti pakagupgopan ti no kasano a maigiddiat ti turay dagiti district president iti turay dagiti stake president, kitaen iti 6.3.

• Dagiti panangibasar kadagiti ward ken stake ket mayaplikar met kadagiti branch, district, ken mision.

• Dagiti panangibasar iti Domingo ket mayaplikar iti no ania nga aldaw ti Sabbath ti masurot iti lugar.

• Ti termino a unit maibasar kadagiti ward ken branch.

• Dagiti panangibasar kadagiti nagannak ket gagangay a mayaplikar met kadagiti legal nga agay-aywan [guardian].

Saan nga agpada dagiti takem [calling] ti bishop ken branch president iti turay ken pagrebbengan, kasta met a saan nga agpada dagiti takem [calling] ti stake president ken district president. Ti bishop ket maysa a pagtakeman [office] iti priesthood, ken maawtorisado laeng ti panagorden babaen ti Umuna a Panguluen. Awagan dagiti General Authority ken Area Seventy dagiti stake president.

0.6

Panangkontak kadagiti Kuartel [Headquarters] ti Simbaan wenno ti Area Office

Iraman ti sumagmamano a kapitulo iti daytoy a handbook dagiti pangiturong iti panangkontak kadagiti kuartel [headquarters] ti Simbaan wenno ti area office. Mayaplikar ti pangiturong iti panangkontak kadagiti kuartel (headquarters) ti Simbaan kadagiti adda iti United States ken Canada. Mayaplikar ti pangiturong iti panangkontak iti area office kadagiti adda iti ruar ti United States ken Canada.