0.

Vaaiga Aoao i le Faatomuaga

0.0

Faatomuaga

Sa a’oa’o mai le Alii, “Ia tuu atu nei i tagata taitoatasi e a’oa’o lona tiute, ma galue i le tofi ua tofi i ai o ia, i le filiga atoa” (Mataupu Faavae ma Feagaiga 107:99). I le avea ai o se taitai i Le Ekalesia a Iesu Keriso o le Au Paia o Aso e Gata Ai, e tatau ona e saili atu i faaaliga faaletagata lava ia e fesoasoani ai ia te oe ia a’oa’o ma faataunuu ia tiute o lou valaauga.

O le suesueina o tusitusiga paia ma a’oa’oga a perofeta o aso e gata ai o le a fesoasoani e te malamalama ai ma faataunuu ou tiute. Pe a e suesue i afioga a le Atua, o le a atili ai ona e talia gofie uunaiga a le Agaga (tagai i le Mataupu Faavae ma Feagaiga 84:85).

E te a’oa’o foi ou tiute e ala i le suesueina o faatonuga o loo i totonu o lenei tusitaulima. O nei faatonuga e mafai ona valaaulia ai faaaliga pe afai e faaaoga ina ia maua ai se malamalama i mataupu faavae, o aiaiga faavae, ma faiga faavae e faaaoga a o saili atu i le taitaiga a le Agaga.

0.1

O Le Tusitaulima Lenei

Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai o loo avatu ai le taiala mo taitai aoao ma taitai o le Ekalesia i lotoifale. Ua vaevaeina i vaega:

• Faavae Faaleaoaoga Faavae: O loo tauaao atu i nei mataupu le a’oa’oga faavae ma mataupu faavae e taua tele i le auauna atu i le Ekalesia. O loo faamatala mai ai:

  • Le fuafuaga o le fiafia a le Atua, Lana galuega o le faaolataga ma le faaeaga, ma le faamoemoega o le Ekalesia.

  • O le matafaioi a le aiga i le fuafuaga a le Atua, o Lana galuega o le faaolataga ma le faaeaga i le aiga, ma le sootaga i le va o le aiga ma le Ekalesia.

  • Mataupu faavae o le perisitua.

  • Mataupu Faavae mo le taitaiga i le Ekalesia a le Faaola.

• Faatulagaga o le Ekalesia: O nei mataupu o loo avatu ai faatonuga mo au peresitene o siteki ma au epikopo, taitai o korama o le perisitua, taitai o faalapotopotoga a siteki ma uarota, ma isi o ē auauna atu i le Ekalesia.

• O Le Galuega a le Atua mo le Faaolataga ma le Faaeaga: O nei mataupu o loo a’oa’o atu ai le galuega autu a le Ekalesia:

  • Ola i le talalelei a Iesu Keriso

  • Tausiaina o i latou e le tagolima

  • Valaauliaina o tagata uma ia talia le talalelei

  • Tuufaatasiaina o aiga mo le faavavau

• Taitaiga o le Ekalesia: O loo tauaao atu i nei mataupu ni taiala faaopoopo mo le taitaiina o le Ekalesia. O mataupu e aofia ai fonotaga/sauniga, valaauga, faamaumauga, tupe, ma aiaiga faavae.

O ulutala ma soāulutala i lenei tusitaulima ua faanumeraina ia faigofie ai ona maua autu ma maufaasino i autu. Mo se faataitaiga, o faatonuga po o ai e mafai ona faamauina i se malumalu o loo tuuina atu i le 27.3.1. O le numera 27 e faasino i le mataupu, o le numera 3 e faasino i se vaega o i lena mataupu, ma le numera 1 e faasino i se soāvaega.

0.2

Fetuunaiga ma Punaoa e Filifili Ai

E le tutusa uma manaoga o siteki ma uarota. O le tusitaulima lenei o loo i ai taiala mo fetuunaiga faapea foi punaoa e filifili ai:

• Taiala mo fetuunaiga () o loo avatu ai faatonuga i le auala e fetuunai ai faalapotopotoga ma polokalama a le Ekalesia i iunite e ese mea e manaomia ma punaoa.

• Punaoa e filifili ai () o loo i ai faamatalaga faaopoopo ma faatonuga e mafai ona fesoasoani i taitai o siteki ma uarota.

E saili e taitai ia musumusuga e uiga i taiala ma punaoa e filifili ai e faaaoga e taulima ai manaoga o tagata o le au paia.

0.3

Faafouga

O lenei tusitaulima o le a faafouina i lea taimi ma lea taimi. O loo maua se lisi o suiga lata mai nei i le “Aotelega o Faafouga Lata Mai Nei.”

0.4

Fesili e uiga i Faatonuga

Pe a tulai mai fesili e le o ta’ua i tusitusiga paia, o upu a perofeta soifua, po o le tusitaulima lenei, e tatau i tagata o le Ekalesia ona faalagolago i a latou feagaiga ma le Atua, o fautuaga a o latou taitai i le lotoifale, ma le musumusuga a le Agaga mo se taitaiga.

Afai e i ai ni fesili a taitai e uiga i faamatalaga o i le tusitaulima lenei pe uiga foi i mataupu e le o ta’ua ai, latou te fefautuaai ma lo latou taitai pulefaamalumalu e fitoitonu i ai.

0.5

Vaogagana Faapitoa

Vagana o mea o ta’ua ai:

• O faaupuga epikopo ma le au epikopo i le tusitaulima lenei e faasino foi i peresitene o paranesi ma au peresitene o paranesi. O faaupuga peresitene o le siteki ma le au peresitene o le siteki e faasino foi i peresitene o itu ma au peresitene o itu. Mo se aotelega pe faapefea ona ese le pule a peresitene o itu mai peresitene o siteki, tagai i le 6.3.

• O faamatalaga e faasino i uarota ma siteki e masani foi ona faatatau i paranesi, itu, ma misiona.

• O faamatalaga e faasino i le Aso Sa e faatatau foi pe o le a lava le aso o loo tausia ai le Sapati i le lotoifale.

• O le faaupuga iunite e faasino i uarota ma paranesi.

• O faamatalaga e faasino i matua i se tulaga aoao, e faatatau foi ia i latou o loo vaaia faaletulafono ia fanau.

O valaauga o le epikopo ma le peresitene o le paranesi e le tutusa i le pule ma le tiutetauave, e le tutusa foi i valaauga o le peresitene o le siteki ma le peresitene o le itu. O le epikopo o se tofi i le perisitua, ma e na’o le Au Peresitene Sili e faatagaina le faauuga. O peresitene o siteki e valaauina e le Au Pulega Aoao ma Fitugafulu Eria.

0.6

Faafesootaiina o le Laumua o le Ekalesia po o le Ofisa o le Eria

O nisi mataupu i lenei tusitaulima o loo aofia ai faatonuga e faafesootai le laumua o le Ekalesia po o le ofisa o le eria. O le faatonuga e faafesootai le laumua o le Ekalesia, e faatatau ia i latou i le Iunaite Setete ma Kanata. O le faatonuga e faafesootai ai ofisa o le eria, e faatatau ia i latou i fafo atu o le Iunaite Setete ma Kanata.