0.

Vakai Fakalūkufua ki he Talateú

0.0

Talateu

Naʻe akoʻi ʻe he ʻEikí, “Tuku ke akó ni ʻo ʻilo ʻe he tangata kotoa pē ʻa hono fatongiá, pea ke ngāue ʻi he lakanga kuo fakanofo ia ki aí, ʻi he faivelenga kakato” (Tokāteline mo e Ngaahi Fuakava 107:99). ʻI hoʻo hoko ko e taki ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku totonu ke ke kumia ha fakahā fakafoʻituitui ke tokoni atu ke ke ʻilo mo fakahoko e ngaahi fatongia ʻo ho uiuiʻí.

ʻE tokoni atu ʻa hono ako ʻa e folofolá mo e ngaahi akonaki ʻa e kau palōfita ʻi he ngaahi ʻaho kimui ní ke mahino kiate koe ʻa hono fakahoko ho ngaahi fatongiá. ʻI hoʻo ako ʻa e ngaahi folofola ʻa e ʻOtuá, te ke ongoʻingofua ange ai ʻa e ivi tākiekina ʻo e Laumālié (vakai, Tokāteline mo e Ngaahi Fuakava 84:85).

ʻOkú ke toe ako foki ho ngaahi fatongiá ʻi hoʻo ako e ngaahi fakahinohino ʻi he tohi tuʻutuʻuni ko ʻení. ʻE lava ke fakaafeʻi ʻe he ngaahi fakahinohinó ni ha fakahā kapau ʻe fakaʻaongaʻi ia ke maʻu ai ha mahino ki he ngaahi tefitoʻi moʻoni, ngaahi tuʻutuʻuni, mo e ngaahi founga ngāue ke fakaʻaongaʻí lolotonga hono kumia e fakahinohino ʻa e Laumālié.

0.1

Tohi Tuʻutuʻuni Ko ʻEní

ʻOku ʻomi ʻe he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha fakahinohino ki he kau taki fakalūkufua mo fakalotofonua ʻo e Siasí. ʻOku vahevahe ia ki ha ngaahi konga:

• Fakavaʻe Fakatokāteline: ʻOku ʻomi ʻe he ngaahi vahe ko ʻení ha tokāteline mo ha ngaahi tefitoʻi moʻoni mahuʻinga ki he ngāue ʻi he Siasí. ʻOku nau fakamatalaʻi:

  • ʻA e palani ʻa e ʻOtuá ki he fiefiá, ko ʻEne ngāue ʻo e fakamoʻuí mo e hakeakiʻí, pea mo e taumuʻa ʻo e Siasí.

  • ʻA e tufakanga ʻo e fāmilí ʻi he palani ʻa e ʻOtuá, ko ʻEne ngāue ʻo e fakamoʻuí mo e hakeakiʻí ʻi he ʻapí, pea mo e fekauʻaki ʻa e ʻapí mo e Siasí.

  • Ngaahi tefitoʻi moʻoni ʻo e Lakanga Fakataulaʻeikí.

  • Ngaahi tefitoʻi moʻoni ki he taki ʻi he Siasi ʻo e Fakamoʻuí.

• Fokotuʻutuʻu ʻo e Siasí: ʻOku ʻomi ʻe he ngaahi vahe ko ʻení ha ngaahi fakahinohino ki he kau palesitenisī fakasiteikí mo e kau pīsopelikí, kau taki fakakōlomu ʻo e lakanga fakataulaʻeikí, kau taki houalotu ʻo e siteikí mo e uōtí, mo ha niʻihi kehe ʻoku ngāue ʻi he Siasí.

• Ko e Ngāue ʻa e ʻOtuá ki he Fakamoʻuí mo e Hakeakiʻí: ʻOku fakahinohinoʻi ʻe he ngaahi vahe ko ʻení ʻa e tefitoʻi ngāue ʻa e Siasí:

  • Ko hono moʻui ʻaki e ongoongolelei ʻo Sīsū Kalaisí

  • Ko hono tokangaʻi ʻo kinautolu ʻoku faingataʻaʻiá

  • Ko hono fakaafeʻi ʻo e kakaí kotoa ke nau maʻu e ongoongoleleí

  • Ko hono fakatahaʻi ʻo e ngaahi fāmilí ke taʻengatá

• Ko e Puleʻi ʻo e Siasí: ʻOku ʻomi ʻe he ngaahi vahe ko ʻení ha ngaahi fakahinohino makehe ki hono puleʻi ʻo e Siasí. ʻOku kau ʻi he ngaahi kaveingá ʻa e ngaahi fakatahaʻangá, ngaahi fatongiá, ʻū lekōtí, ngaahi meʻa fakapaʻangá, mo e ngaahi tuʻutuʻuní.

Ko e ngaahi ʻuluʻi tohi mo e ngaahi kaveinga ʻi he tohi tuʻutuʻuni ko ʻení ʻoku fakafikefika ia ke faingofua ʻa hono ʻiloʻi mo fakafekauʻaki ʻa e ngaahi tefitó. Hangē ko ʻení, ʻoku ʻoatu ʻi he 27.3.1 ha fakahinohino fekauʻaki mo kinautolu ʻe lava ke sila ʻi ha temipalé. ʻOku ʻuhinga ʻa e mataʻifika 27 ki he vahé, ko e mataʻifika 3 ʻoku ʻuhinga ia ki ha konga ʻi he vahe ko iá, pea ko e mataʻifika 1 ʻoku ʻuhinga ia ki ha kupu siʻi.

0.2

Ko Hono Fakafeʻungaʻí mo e Ngaahi Maʻuʻanga Tokoni ʻe Lava ke Fili Mei Aí

ʻOku ʻikai tatau e ngaahi fiemaʻu ʻa e siteiki mo e uooti kotoa pē. ʻOku ʻi he tohi tuʻutuʻuni ko ʻení ha ngaahi fakahinohino ki hono fakafeʻungaʻí kae pehē ki ha ngaahi maʻuʻanga tokoni ʻe lava ke fili mei ai:

• ʻOku ʻomi ʻe he Ngaahi fakahinohino ki hono fakafeʻungaʻí () ha fakahinohino ki he founga hono fakafeʻungaʻi ʻo e ngaahi houalotu mo e ngaahi polokalama ʻa e Siasí ki he ngaahi ʻiuniti ʻoku kehe ʻenau ngaahi fiemaʻú mo e maʻuʻanga tokoní.

• ʻOku ʻi he Ngaahi maʻuʻanga tokoni ʻe lava ke filí () ha fakamatala mo ha fakahinohino ʻe ala ʻaonga ki he kau taki ʻo e siteikí mo e uōtí.

ʻE kumi ʻa e kau takí ki ha tataki fakalaumālie fekauʻaki mo e ngaahi fakahinohino mo ha ngaahi maʻuʻanga tokoni ʻe lava ke fili ke fakaʻaongaʻi ki hono feau e ngaahi fiemaʻu ʻa e kāingalotú.

0.3

Fakamatala Fakamuimuitahá

ʻE ʻi ai pē ngaahi taimi ʻe fakatonutonu ai ʻa e tohi tuʻutuʻuni ko ʻení ki he fakamatala fakamuimuitahá. ʻOku ʻi ai ha lisi ʻo e ngaahi liliu fakamuimuitahá ʻi he “Summary of Recent Updates.”

0.4

Ngaahi Fehuʻi fekauʻaki mo e Ngaahi Fakahinohinó

Ko e taimi ʻoku hoko ai ha ngaahi fehuʻi ʻoku ʻikai fakamatalaʻi ʻi he folofolá, lea ʻa e kau palōfita moʻuí, pe ʻi he tohi tuʻutuʻuni ko ʻení, ʻoku totonu leva ke fakafalala ʻa e kāingalotu ʻo e Siasí ki heʻenau ngaahi fuakava mo e ʻOtuá, faleʻi ʻa honau kau taki fakalotofonuá, pea mo e ueʻi ʻa e Laumālié ki ha fakahinohino.

Kapau ʻoku ʻi ai ha fehuʻi ʻa e kau takí fekauʻaki mo ha fakamatala ʻi he tohi tuʻutuʻuni ko ʻení pe ko ha ngaahi palopalema ʻoku ʻikai ke fakamatalaʻi heni, te nau talanoa mo ʻenau maʻu mafai pule ofi tahá.

0.5

Ngaahi Foʻi Leá

Tukukehe kapau ʻoku fakamatalaʻi atu:

• Ko e foʻi lea pīsopé mo e kau pīsopelikí ʻi he tohi tuʻutuʻuni ko ʻení, ʻoku toe ʻuhinga pē ia ki he kau palesiteni fakakoló mo e kau palesitenisī fakakoló. Ko e foʻi lea palesiteni fakasiteikí mo e kau palesitenisī fakasiteikí ʻoku toe ʻuhinga pē ia ki he kau palesiteni fakavahefonuá mo e kau palesitenisī fakavahefonuá. Ke maʻu ha fakamatala fakanounou ki he kehekehe ‘o e mafai ʻo e kau palesiteni fakavahefonuá mei he mafai ʻo e kau palesiteni fakasiteikí, vakai ki he 6.3.

• Ko e ngaahi fakamatala ki he ngaahi uōtí mo e ngaahi siteikí ʻoku meimei ke toe fakaʻaongaʻi pē ia ki he ngaahi koló, ngaahi vahefonuá, pea mo e ngaahi misioná.

• ʻOku ʻuhinga e ngaahi fakamatala ki he Sāpaté ki ha ʻaho pē ʻoku tauhi fakalotofonua ko e Sāpate.

• Ko e foʻi lea ʻiunití ʻoku ʻuhinga ia ki he ngaahi uōtí mo e ngaahi kolo ʻo e Siasí.

• Ko e ngaahi fakamatala ki he mātuʻá ʻoku toe ʻuhinga pē ia ki he kau tauhi fakalaó.

ʻOku ʻikai ke tatau e uiuiʻi ʻo e pīsopé mo e palesiteni fakakoló ʻi hona mafaí mo e fatongiá, pe ko e uiuiʻi ʻo e palesiteni fakasiteikí mo e palesiteni fakavahefonuá. Ko e pīsopé ko ha tuʻunga ia ʻi he lakanga fakataulaʻeikí, pea ko hono fakanofó ʻoku toki fakamafaiʻi pē ʻe he Kau Palesitenisī ʻUluakí. ʻOku uiuiʻi ʻa e kau palesiteni fakasiteikí ʻe he Kau Taki Māʻolungá mo e Kau Fitungofulu Fakaʻēliá.

0.6

Ko e Fetuʻutaki ki he Hetikuota ʻo e Siasí pe ʻŌfisi Fakaʻēliá

ʻOku fakakau ʻi ha ngaahi vahe ʻe niʻihi ʻi he tohi tuʻutuʻuni ko ʻení ha fakahinohino ke fetuʻutaki ki he hetikuota ʻo e Siasí pe ʻōfisi fakaēliá. Ko e fakahinohino ke fetuʻutaki ki he hetikuota ʻo e Siasí, ʻoku ʻuhinga pē ia kiate kinautolu ʻi he ʻIunaiteti Siteití mo Kānatá. Ko e fakahinohino ke fetuʻutaki ki he ʻōfisi fakaʻēliá ʻoku ʻuhinga ia kiate kinautolu ʻi tuʻa mei he ʻIunaiteti Siteití mo Kānatá.