“1. Ti Plano ti Dios ken ti Akemmo iti Aramid ti Pannakaisalakan ken Pannakaitan-ok,” Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw (2020).

“1. Aramid ti Pannakaisalakan ken Pannakaitan-ok,” Sapasap a Handbook.

Ti Plano ti Dios ken ti Akemmo iti Aramid ti Pannakaisalakan ken Pannakaitan-ok

1.0

Pakauna

Naawaganka nga agserbi iti Ti Simbaan ni Jesucristo dagiti Santo iti Ud-udina nga Aldaw. Agyamanak kenka iti panagserbim. Mabendisionamto dagiti biag ken mapadasamto iti rag-o no agserbika a sipupudno.

Matulongannakanto daytoy a handbook a mangsursuro kadagiti pagbatayan ti panagserbi a kas ken ni Cristo ken makaawat kadagiti pagrebbengam. Agbalinkanto a kasamayan no itunosmo ti panagserbim iti Simbaan iti aramid ti Dios Ama ken ti Anakna, ni Jesucristo. Daytoy a kapitulo ti mangtulongto kenka a manggun-od iti maysa a pannirigan ti:

Plano ti Dios iti kinaragsak.
Aramid ti pannakaisalakan ken pannakaitan-ok.
Panggep ti Simbaan ni Jesucristo dagiti Santo iti Ud-udina nga Aldaw.

1.1

Ti Plano ti Dios iti Kinaragsak

Impaay ti Nailangitan nga Ama ti plano ti kinaragsak a mangpabael kadatayo nga agragsak iti amin a bendisionna. Aramid ken gloriana ti “mangipatungpal iti saan nga ipapatay ken agnanayon a biag ti tao” (Moises 1:39). Ti saan nga ipapatay wenno imortalidad ket ti panagbiag nga agnanayon nga addaan iti nagungar a pisikal a bagi. Ti agnanayon a biag, wenno pannakaitan-ok, ket ti panagbalin a kas iti Dios ken agnaed iti sidongna iti agnanayon kas pamilia.

Saantayo a magun-od ti saan nga ipapatay wenno imortalidad ken agnanayon a biag no awan ti tulong ti Dios. Iti daytoy a biag, makapadastayo iti basol ken ipapatay, a mamagsina kadatayo iti Nailangitan nga Ama ken manglapped kadatayo iti panagbalin nga ad-adda pay a kas Kenkuana.

Ni Jesucristo ti sentro iti plano ti Dios. Gapu iti awan patinggana nga ayat ti Nailangitan nga Ama para kadatayo, imbaonna ti Anakna a mangsubbot kadatayo manipud iti basol ken ipapatay babaen ti pangsubbot a sakripisiona (kitaen iti Juan 3:16). Babaen ti Pannubbotna, ipanamnama ni Jesucristo nga agungarto ti tunggal maysa kadatayo a mayanak ditoy daga ken magun-od ti saan nga ipapatay wenno imortalidad. Ti Pannubbotna pay ti makaaramid a posible a madalusantayo manipud iti basol ken mamagbalbaliw iti puspusotayo tapno makaawattayo iti agnanayon a biag ken pakabuklan ti rag-o.

Tapno umawat iti agnanayon a biag, nasken nga “umasidegtayo ken ni Cristo, ken agbalin a naan-anay kenkuana” (Moroni 10:32). Maited daytoy nga awis iti amin a nagbiagen wenno agbiagto pay laeng iti daga. Kayat ti Nailangitan nga Ama a pumili ti amin nga annakna nga agsubli Kenkuana.

1.2

Ti Aramid ti Pannakaisalakan ken Pannakaitan-ok

Bayat ti yaasidegtayo ken ni Cristo ken mangtulong iti dadduma a mangaramid met iti kastoy, makiramantayo iti aramid ti Dios iti pannakaisalakan ken pannakaitan-ok. Maiwanwan daytoy nga aramid babaen ti dua a naindaklan a bilin nga ayatentayo ti Dios ket ayatentayo dagiti kaarrubatayo (kitaen iti Mateo 22:37–39). Ipakitatayo ti ayattayo iti Dios no agtungpaltayo kadagiti bilinna ken agserbi kadagiti annakna (kitaen iti Juan 14:15).

Agpokus ti aramid ti pannakaisalakan ken pannakaitan-ok iti uppat a nadiosan a naituding a pagrebbengan. Nabalabala dagitoy iti baba.

Daytoy a handbook ti mangtulongto kenka tapno maawatam dagitoy uppat nga aspeto ti aramid ti Dios. Ti Espiritu Santo ti mangtarabayto kenka bayat ti panangaramidmo iti pasetmo iti pannakaipatungpal dagitoy (kitaen iti 2 Nephi 32: 5).

1.2.1

Panagbiag iti Ebanghelio ni Jesucristo

Ti panagbiag iti ebanghelio ni Jesucristo iramanna ti:

Panangaramat iti pammati ken ni Cristo, panagbabawi iti inaldaw, panagaramid kadagiti katulagan iti Dios no umawattayo kadagiti ordinansa ti pannakaisalakan ken pannakaitan-ok, ken panagibtur agingga iti panungpalan babaen ti panagtungpal kadagita a katulagan (kitaen iti 3.5.1).
Panagsursuro ken panangisuro iti ebanghelio ni Jesucristo iti pagtaengan ken iti simbaan.
Panagbalin a mapagpannuray iti bukod a kabaelan para iti bagbagitayo ken iti pamiliatayo, agpada nga espiritual ken temporal.

dagiti kabsat a babbai a misionario a mangisursuro iti babai

1.2.2

Panangaywan Kadagiti Agkasapulan

Ti panangaywan kadagiti agkasapulan iramanna ti:

Panagserbi ken panagminister kadagiti indibidual, pamilia, ken komunidad.
Panangibinglay kadagiti pamataudan [resources], agraman ti tulong ti Simbaan, kadagiti agkasapulan.
Panangtulong kadagiti dadduma nga agbalin a mapagpannuray iti bukodda a kabaelan [self reliant].

1.2.3

Panangawis iti Amin nga Umawat iti Ebanghelio

Ti panangawis iti amin nga umawat iti ebanghelio iramanna ti:

Pannakiraman iti aramid a misionario ken panagserbi kas misionario.
Panangtulong kadagiti baro ken agsubsublin a miembro [returning members] iti Simbaan iti panagdur-asda iti dana ti katulagan [covenant path].

1.2.4

Panamagkaykaysa kadagiti Pamilia para iti Kinaagnanayon

Ti panamagkaykaysa kadagiti pamilia para iti kinaagnanayon iramanna ti:

Panangaramid kadagiti katulagan no umawattayo kadagiti bukodtayo nga ordinansa iti templo.
Panangtakuat kadagiti pimmusayen a kapuonantayo [ancestors] ken panangannong kadagiti ordinansa para kadakuada iti templo tapno makaaramidda kadagiti katulagan iti Dios.
Ti masansan nga ipapan iti templo, iti lugar a mabalin, tapno agdaydayaw iti Dios ken mangannong kadagiti ordinansa para kadagiti annakna.

1.3

Ti Panggep ti Simbaan

Impasdek ni Jesucristo ti Simbaanna tapno mangpabael kadagiti indibidual ken pamilia a mangitrabaho iti aramid ti pannakaisalakan ken pannakaitan-ok (kitaen iti Taga Efeso 4:11–13; kitaen met iti benneg 2.2 iti daytoy a handbook). Tapno mangtulong a mangipatungpal iti nadiosan a panggep, mangipaay ti Simbaan ken dagiti liderna iti:

Turay ken dagiti tulbek ti priesthood.
Katulagan ken ordinansa.
Panangiturong ti propeta.
Nasantuan a kasuratan.
Suporta iti panagsursuro ken panangisuro iti ebanghelio.
Gundaway iti panagserbi ken panangidaulo.
Maysa a komunidad dagiti Santo.

1.3.1

Turay ken dagiti Tulbek ti Priesthood

Babaen ti priesthood, ipatungpal ti Dios ti aramid ti pannakaisalakan ken pannakaitan-ok. Ti turay ken dagiti tulbek ti priesthood a kasapulan a mangiturong iti aramid ti Dios iti daga ket naisubli ken ni Propeta Joseph Smith (kitaen iti Doktrina ken Katulagan 110:11– 6; 112:30; kitaen met iti 3.1 iti daytoy a handbook). Dagitoy a tulbek ti iggem dagiti lider ti Simbaan iti agdama. Awagan ken pusganda dagiti dadduma a tumulong iti aramid ti Dios (kitaen iti Doktrina ken Katulagan 107: 8, 65–67).

1.3.2

Dagiti Katulagan ken Ordinansa

Iti plano ti Nailangitan nga Ama, agaramidtayo kadagiti katulagan no umawattayo kadagiti ordinansa ti pannakaisalakan ken pannakaitan-ok, kas iti panagbuniag (kitaen iti Juan 3:5; kitaen met iti kapitulo 18 iti daytoy a handbook). Dagitoy dagiti katulagan ken ordinansa a kasapulan iti panagbalintayo nga ad-adda pay a kas iti Dios ken agsubli a makipagnaed iti sidongna (kitaen iti Doktrina ken Katulagan 84:19–22).

1.3.3

Panangiturong ti Propeta

Babaen dagiti napili a propetana, ipalgak ti Dios ti kinapudno ken ipaayna ti naparegta a pannarabay ken ballaag (kitaen iti Amos 3:7; Doktrina ken Katulagan 1:4). Tulongannatayo daytoy a pannarabay a sumrek ken agtalinaed iti dana a maiturong iti agnanayon a biag.

1.3.4

Dagiti Nasantuan a Kasuratan

Babaen ti panangiturong dagiti propeta ken apostol ti Apo, mangipaay ti Simbaan ken mangtaginayon iti balikas ti Dios a masarakan kadagiti nasantuan a kasuratan. Paneknekan dagiti nasantuan a kasuratan ni Cristo, mangisuro iti ebangheliona, ket matulongandatayo a mangaramat iti pammati Kenkuana (kitaen iti Jacob 7:10–11; Helaman 15:7).

1.3.5

Suporta iti Panagsursuro ken Panangisuro iti Ebanghelio

Mangsuporta ti Simbaan kadagiti indibidual ken pamilia iti pagrebbenganda a masursuruan kadagiti kinapudno ti ebanghelio ken isuroda dagitoy a kinapudno ti ebanghelio kadagiti miembro ti pamilia ken dadduma pay (kitaen iti Doktrina ken Katulagan 88: 77–78, 118; kitaen met iti 2.2.3 iti daytoy a handbook).

1.3.6

Dagiti Gundaway iti Panagserbi ken Panangidaulo

Babaen kadagiti takem [calling] ken naidutok nga aramiden iti Simbaan, mangted ti Dios kadagiti miembro iti gundaway nga agserbi ken mangidaulo. Mangipaay ti Simbaan iti istruktura a tumulong a mangaywan kadagiti miembro nga agkasapulan ken mangted iti tulong nga agpaay iti tao [humanitarian]iti dadduma (kitaen iti Mosiah 18:27–29).

1.3.7

Maysa a Komunidad dagiti Santo

Kas maysa a komunidad dagiti Santo, masansan nga aguummong dagiti miembro ti Simbaan tapno agdaydayaw iti Dios ken manglaglagip iti Mangisalakan babaen ti pannakiranud iti sakramento (kitaen iti Moroni 6:4–6; Doktrina ken Katulagan 20:77). Aggiinnaywan ken agtitinnarabay pay dagiti miembro (kitaen iti Taga Efeso 2:19).

1.4

Ti Akemmo iti Aramid ti Dios

Kas maysa a lider iti Simbaan, naawaganka a mangisuro ken mangsuporta kadagiti pagserbiam bayat ti pannakiramanda iti aramid ti pannakaisalakan ken pannakaitan-ok (kitaen iti 1.2). Agsungbatka a mangipatungpal iti takemmo ken “mangisuro … iti balikas ti Dios iti amin a kinaregta” (Jacob 1:19). Ti pannakipagtrabaho iti Apo iti bangkagna ket mangisangbay kenka iti naindaklan a rag-o (kitaen iti Jacob 5:70–72).

Addaan iti nalawag a pannakaawat iti aramid ti Dios, iti nangawisanna kenka nga aramidem, ken iti panggep ti Simbaanna ket mangtulongto kenka a mangipamaysa kadagiti panagkagumaanmo iti panangyeg kadagiti kararua ken ni Cristo. Iti panangpampanunotmo iti daytoy a pannirigan ket mangitunosto kenka iti Mangisalakan ken mangiwanwan iti amin nga aramidem kas maysa a lider iti Simbaan.

Masansan nga agibasarka kadagiti pagbatayan iti daytoy a kapitulo. Sikakararag nga agkalikagumka a mangammo no kasano a makatulongka a mangipatungpal kadagiti panggep ti Dios iti biag dagiti pagserbiam. Iturongnakanto ti Dios babaen kadagiti parikna [promptings] ti Espiritu Santo.