10.

Doulul ko an Priesthood eo an Aron

10.1

Jibadbad eo im Doulul eo

Doulul eo an Priesthood eo an Aron ej jipan̄ kōpooj ajri ro nejin Anij n̄an jepļaak n̄an Ippān. Ej kabwijer “ki ko an kōjeraam̧m̧an ko an enjeļ raņ, im an gospel in ukeļo̧k eo, im an peptaij” (Katak im Bujen Ko 13; bar lale 3.3.2 ilo bok in bōk meļeļe in).

10.1.1

Jibadbad eo

Doulul ko an Priesthood eo an Aron ej jipan̄ likao ro kōm̧m̧an im kōjparok bujen ko rekwojarjar im kam̧wūlaļļo̧k oktak tok eo aer n̄an Jisōs Kraist im gospel eo An.

Juon doulul ej juon kurup kar ejaak an rikabwijer priesthood eo. Jibadbad eo an juon doulul eo ej n̄an jipan̄ rikabwijer priesthood ro jerbal ippān doon n̄an kōtōprak jerbal in lo̧mo̧o̧r eo an Anij im mour ijo eutije tata. Ilo doulul ko aer, rikabwijer Priesthood eo an Aron rej jipan̄ ro jet, kakūrm̧ool eddo ko, kalōk bōro kuk, im ekkatak im mour kōn katak ko.

10.1.2

Unin Tōl eo an Doulul eo an Priesthood eo an Aron

Doulul eo an Priesthood eo an Aron emaron̄ jipan̄ kajjojo likao meļeļe kadkad in ekwojarjar im jibadbad eo an āinwōt juon rikabwijer priesthood. Likao ro im ritōl ro rej āliji unin tōl in ilo jinoin kweilo̧k ko an doulul eo im ilo iien ippān doon ko an doulul ko jet. Unin Tōl eo ej riit āinwōt in:

“N̄a ij juon ļaddik ejitōn bōro nejin Anij, im ewōr juon An jerbal ij aikuj kōm̧m̧ane.

“Kōn aolepān būruwō, maron̄, ļōmņak, im kajoor, inaaj iakwe Anij, kōjparok bujen ko aō, im kōjerbal priesthood eo An n̄an jipan̄ ro jet, jino ilowaan m̧weeo im̧ō.

“llo aō kajjieon̄ jerbal, kōjerbal tōmak, ukweļo̧k, im em̧m̧anļo̧k kajjojo raan, inaaj karbab n̄an bōk kōjeraam̧m̧an ko an tampeļ im n̄an niknik lan̄lōn̄ kōn gospel in.

“Inaaj kōppopo n̄an erom̧ juon mijenede eo etiljek, ļeo pālele ettā, im baba eo eļap iakwe ippān n̄an erom̧ juon rikaļoor eo em̧ool an Jisōs Kraist.

“Inaaj jipan̄ kōpooj laļ in n̄an Itok eo Kein Karuo an Rilo̧mo̧o̧r ilo aō karuwaineneik aolep n̄an itok n̄an Kraist im bōk kōjeraam̧m̧an ko an Pinmuur eo An.”

10.1.3

Doulul ko

Bisop eo ej kōllaajrake rikabwijer Priesthood ro an Aron n̄an doulul ko kar kōmeļeļe kaki ijin itulaļ. (Barāinwōt lale Katak im Bujen Ko 107:85–88.)

10.1.3.1

Doulul eo an Tikōn ro

Likao ro rej koba ippān doulul eo an tikōn ro ilo jinoin Jānwōde ilo iiō eo me ej jejjet 12 aer iiō. Ilo iien in remaron̄ ekkapit āinwōt tikōn ro eļan̄n̄e repojak im erreo.

Juon membōr in doulul eo ej juon tikōn em̧ōj an ekkapit ej jerbal āinwōt būreejtōn eo an doulul eo. N̄e emaron̄, juon ak ruo rikakpilōklōk ro im juon rijeje rej aikuj in jerbal ippān. Rikakpilōklōk ro im juon rijeje rej aikuj bwe ren tikōn.

Jerbal ko an juon tikōn kar kōmeļeļeik ilo Katak im Bujen Ko 20:57–59; 84:111. Jerbal ko jet ekoba ajije kwojkwoj eo im jipan̄ bisop eo “kajeikik aolep men ko an jidimkij” (Katak im Bujen Ko 107:68).

10.1.3.2

Doulul eo an Rūkaki ro

Likao ro remaron̄ koba ippān doulul eo an rūkaki ro ilo jinoin Jānwōde ilo iiō eo me ej jejjet 14 aer iiō. Ilo iien in remaron̄ ekkapit āinwōt rūkaki ro eļan̄n̄e rej pojak im erreo.

Juon membōr in doulul eo ej kūr im em̧ōj an ekkapit āinwōt juon rūkaki ej jerbal āinwōt būreejtōn eo an doulul eo. N̄e emaron̄, juon ak ruo rikakpilōklōk ro im juon rijeje rej aikuj in jerbal ippān. Rikakpilōklōk ro im juon rijeje rej aikuj in ekkapit āinwōt rūkaki ro.

Rūkaki ro jon̄an wōt juon jerbal ko aer āinwōt tikōn ro. Rej barāinwōt kōpooj kwojkwoj eo im jerbal āinwōt rikarejar m̧aan ro. Eddo ko jet kar kōmeļeļeiki ilo Katak im Bujen Ko 20:53–59; 84:111.

10.1.3.3

Doulul an Pris ro

Likao ro rej koba ippān doulul eo an pris ilo jinoin Jānwōde ilo iiō eo ej jejjōt 16 aer iiō. Ilo iien in remaron̄ ekkapit āinwōt pris ro eļan̄n̄e rej pojak im erreo.

Bisop eo ej būreejtōn n̄an doulul eo an pris ro (lale Katak im Bujen Ko 107:87–88). Ej kūr juon ak ruo membōr in doulul eo n̄an jerbal āinwōt rijipan̄ ro an. Juon rijeje maron̄ barāinwōt kūr. Rijipan̄ ro im rijeje ro aikuj ekkapit āinwōt pris ro.

Pris ro jon̄an wōt juon jerbal ko aer āinwōt tikōn im rūkaki ro. Jerbal ko jet kar kōmeļeļeik ilo Katak im Bujen Ko 20:46–52, 73–79.

10.1.4

Ki ko an Priesthood

Kajjojo doulul ej tōl jān juon būreejtōn eo ej kabwijer ki ko an priesthood. Būreejtōn eo an doulul eo an tikōn ro, būreejtōn eo an doulul eo an rūkaki ro, im bisop eo rej kabwijer ki ko an priesthood eo. N̄an meļeļe ko reļļapļo̧k kōn ki kein, lale 3.4.1

10.1.5

Ukukōt Doulul ko n̄an Aikuj ko an Ijo Jokwe ie

Ilo juon ward ak branch me jejjo wōt likao ie, doulul eo an Priesthood eo an Aron emaron̄ kweilo̧k ippān doon n̄an bōk meļeļe kōn m̧akūtkūt ko.

Eļan̄n̄e juon ward ewōr eļōn̄ļo̧k jān 12 tikōn ie, bisop eo emaron̄ ajeeje doulul eo an tikōn ro. Ejja menin wōt eļan̄n̄e ewōr elōn̄ļo̧k jān 24 rūkaki ro (lale Katak im Bujen Ko 107:85–86). N̄e ej kōm̧m̧ane jokālōt in, bisop eo ej ļōmņak kōn an jelōt ro uwaan doulul eo.

10.2

Bōk Koņaad ilo Jerbal in Lo̧mo̧o̧r eo an Anij im Mour Ijo Eutiej Tata

Anij ej karuwaineneik aolep n̄an itok n̄an Kraist im jipan̄ ilo jerbal in An ilo ad:

• Mour kōn gospel eo an Jisōs Kraist.

• Kea kōn ro rej aikuj.

• Karuwaineneik aolep n̄an bōk gospel eo.

• Kakobaik baam̧le ko n̄an mour indeeo.

Bisoprik eo im ritōl ro an doulul eo an jodikdik, kōn jipan̄ jān rikapilōk ro (lale 10.5), kapilōk ippān doon kōn ekōjkan jipan̄ kōtōprak jerbal in. N̄an meļeļe ko reļļapļo̧k ikkijeen jerbal in lo̧mo̧o̧r eo an Anij im mour ijo eutiej tata, ekkatak jepta 1.

10.2.1

Mour kōn Gospel eo an Jisōs Kraist

10.2.1.1

Jerbal ko an Jinen im Jemān Ajri ro im Ritōl ro

Jinen im jemān ajri ro rej eddoik katakin ajri ro nejier gospel eo im jipan̄ er mour kake (lale Katak im Bujen Ko 68:25–28). Bisoprik eo im ritōl ro an doulul eo an jodikdik ro, kōn jipan̄ jān rikapilōk ro, rej jipan̄ jinen im jemān ajri ro ilo eddo ko aer āinwōt aer ellaajrak:

• Rōjan̄ n̄an kōm̧m̧an kōnono ko ikōtaan likao ro im baam̧le ko aer.

• Lukkuun lale bwe m̧akūtkūt ko an jodikdik ro ren jipan̄ im kōjeraam̧m̧an baam̧le ko.

• Jipan̄ jinen im jemān ajri ro kōpooj ļaddik ro nejier n̄an ekkapit n̄an bōk priesthood im n̄an bōk Melkisedek Priesthood eo.

• Jipan̄ jinen im jemān ajri ro kōpooj ļaddik ro nejier n̄an bōk menin letok kwojarjar an tampeļ, jerbal in mijenede aolep raan, m̧are ilo tampeļ, im jerbal an juon jemān baam̧le.

Ritōl ro rej aikuj jouj im em̧m̧an n̄an jodikdik ro me ejabwe jipan̄ jān baam̧le ko aer n̄an mour kōn gospel eo.

Jinen im jemān ajri ro im ritōl ro rej kajjieon̄ erom̧ jet waanjon̄ok ko rem̧m̧an n̄an jodikdik ro. Rej jipan̄ jodikdik ro ilo kijejeto ko aer n̄an erom̧ āinwōt Jisōs Kraist. Būrookraam̧ eo an Ajri ro im Jodikdik ro emaron̄ jipan̄ ilo kijejeto kein (lale ChildrenandYouth.ChurchofJesusChrist.org).

10.2.1.2

Ekkatak Gospel eo

Bisoprik eo, ritōl ro an doulul eo an jodikdik ro, im rikapilōk ro rej rojan̄ likao im baam̧le ko aer n̄an ekkatak gospel eo ilo m̧weo. Ritōl ro im rikapilōk ro rej ekkatak gospel eo im kwaļo̧k n̄an likao ro ta eo rekar ekkatak. Rej karuwaineneik ro uwaan doulul eo n̄an kwaļo̧k ilo m̧ōnjar eo ta eo rekar ekkatak ilo m̧ōko.

Doulul ko an Priesthood eo an Aron rej kweilo̧k ilo Jabōt ko n̄an kōkajoorļo̧k tōmak, kalōk bōro kuk, kōkajoorļo̧k baam̧le ko im m̧ōko, im kōmmane karōk ko n̄an kōtōprak jerbal in lo̧mo̧o̧r eo an Anij im mour ijo eutiej ata. Bisoprik im ritōl ro an doulul eo an jodikdik, kōn jipan̄ jān rikapilōk ro, rej karōk kweilo̧k ko an Jabōt.

Kweilo̧k ko an doulul eo rej kōm̧m̧an ilo Jabōt ruo im emen ilo kajjojo allōn̄. 50 minit aeitokan. Kweilo̧k ko rej ijjino kōn juon jar. Juon membōr in būreejtōnji eo an doulul eo (ak juon rijipan̄ an bisop eo ilo doulul eo an pris) ej kōjeikik. Ej tōl doulul eo ilo an ba unin tōl eo im kapilōk doon kōn ijjitōn̄ ko, jerbal ko, im men ko jet raorōk.

Juon uwaan kūlaaj eo ak juon ritōl erūtto ej tōl kōmeļeļe ko an gospel. Ritōl ro an doulul eo kweilo̧k ippān rikapilōk ro kōn wōn eo ej aikuj katakin. Laajrak in kweilo̧k eo rej waļo̧k ilo Itok, Ļoor Eō. Kweilo̧k ko rej aikuj jem̧ļo̧k kōn jar.

Ekkā, an kajjojo doulul eo an Priesthood eo an Aron kweilo̧k makeļo̧k (lale 10.1.5 Likao im jiron̄ ro remaron̄ koba ippān doon ejjab aolep iien n̄an juon katak ilo Jabōt, ilo an kōtōbalbal jān bisoprik eo im būreejtōnji eo an Jiron̄ ro.

Likao ro rej rojan̄ er n̄an bōk koņaer ilo jemenere (lale 15.1).

10.2.1.3

Jerbal in Jipan̄ im M̧akūtkūt ko

Bisoprik eo im ritōl ro an doulul eo an jodikdik ro, kōn jipan̄ jān rikapilōk ro, rej karōk jerbal in jipan̄ im m̧akūtkūt ko. Men kein rej aikuj jipan̄ kōtōprak jerbal in lo̧mo̧o̧r eo an Anij im mour ijo eutiej tata. Jerbal in Jipan̄ im m̧akūtkūt ko rej aikuj kalōk naan in kam̧ool ko, kōkajoorļo̧k baam̧le ko, kōkajoorļo̧k bōro kuk an kūlaaj eo, im leļo̧k iien ko rem̧m̧an n̄an kōjeraam̧m̧an ro jet. Rej aikuj jon̄an wōt juon ilubwiljin eria ko emān ikkijeen eddōkļo̧k an juon make: ilo jetōb, iiaio, kanniōk, im jeļāļo̧kjeņ.

Eiten aolep m̧akūtkūt ko an jodikdik ro rej kōm̧m̧an ilo iien ko ijjeļo̧kin ilo Jabōt ko im ilo joteenin Mande otemjej. Ekkā aer kōm̧m̧an ilo kajjojo wiik. Ilo jet eria ko, jon̄an ettoļo̧kin jikin ko, jokne, im men ko jet me rej kōm̧m̧an bwe m̧akūtkūt ko ren jab bōk jikier. Ilo eria kein, m̧akūtkūt kein emaron̄ jeja aer kōm̧m̧an, ak rej aikuj kōm̧m̧an diktata juon kōttan ilo juon allōn̄. M̧akūtkūt kein maron̄ karōki ilo Sample Service and Activity Planner, me epād ilo ChurchofJesusChrist.org.

Jet jerbal in jipan̄ im m̧akūtkūt ko rej aikuj koba jim̧or jiron̄ im likao ro, eļaptata jodikdik ro rerūtto.

Jodikdik ro remaron̄ jeraam̧m̧an jān aer iiaio ilo kurup ko elōn̄ uwaer. Jodikdik ro ilo juon ak elōn̄ļo̧k ward ko remaron̄ emakijkij aer koba ippān doon n̄an jerbal in jipan̄ im m̧akūtkūt ko. Stake ko ak district ko remaron̄ jān iien n̄an iien karōk iien im m̧akūtkūt ko n̄an jodikdik ro (lale 20.3.2).

Ritōl ro rerūtto rej jipan̄ lukkuun lale bwe m̧akūtkūt ko en ejjeļo̧k jorrāān ie (lale safety.ChurchofJesusChrist.org; bar lale 20.7 ilo bok in bōk meļeļe in). Diktata ruo ritōl rūtto ro rej aikuj pād ilo aolep m̧akūtkūt ko (lale 10.8.1

N̄an elōn̄ļo̧k meļeļe, lale AaronicPriesthoodQuorums.ChurchofJesusChrist.org. Barāinwōt lale JustServe.org ijo epād ie. Kein jipan̄ kein rej letok aitia ko ikkijeen jerbal in jipan̄ im m̧akūtkūt ko.

M̧akūtkūt ko ilo Juon Iiō. Ilo kakobaba n̄an m̧akūtkūt ko an jodikdik ro aolep iien, likao ro remaron̄ barāinwōt bōk koņaer āinwōt kein rej ellaajrak ilo kajjojo iiō:

• Juon kweilo̧k n̄an jodikdik ro im jineer im jemāer m̧okta jān jinoin juon iiō. Emaron̄ bar kōm̧m̧an n̄an likao im jiron̄ ro ilo aer jepelļo̧k ilo kūlaaj ak koba ippān doon ilo kūlaaj ko. Emaron̄ barāinwōt kōm̧m̧an ilo ward ak stake ļābōļ. Ej karōk im tōl jān rijipan̄ ro n̄an bisop eo ilo doulul eo an pris im būreejtōnji eo an kūlaaj eo erūtto ilo Doulul eo an Jiron̄ ro. Jiron̄ ro me ejejjet 12 aer iiō ilo iiō eo remaron̄ bōk kōkaļļe (emblems) ko aer n̄an kwaļo̧k karuwainene eo ilo kweilo̧k in (lale 10.8.3). N̄an elōn̄ļo̧k meļeļe, lale ChildrenandYouth.ChurchofJesusChrist.org.

• Kāām eo an Doulul eo an Priesthood eo an Aron (lale Aaronic Priesthood Quorum Camp Guide). Likao ro remaron̄ bōk kuņaer ilo kāām ko jet me ebōk juon bon̄ likio, im m̧akūtkūt ko ilo aolepān iiō eo, ijo epidodo kōm̧m̧ane.

• Juon kweilo̧k eļap an jodikdik ro ilo stake ak juon ward ak juon kweilo̧k eļap N̄an Kōkajoorļo̧k Jodikdik ro (N̄KJ). N̄an eļōn̄ļo̧k meļeļe kōn N̄KJ kweilo̧k ko reļļap, lale FSY.ChurchofJesusChrist.org N̄an elōn̄ļo̧k meļeļe ko kōn kūr ko im eddo ko an N̄KJ ilo ward im stake, lale FSYLeader.ChurchofJesusChrist.org (n̄an U.S. im Canada) ak ilo FSY.Planning Guide (n̄an eria ko jet).

• Dik tata juon m̧akūtkūt ej kobaik pedped in katak ko ilo N̄an Kōkajoorļo̧k Jodikdik ro: Juon Unin Tōl n̄an Kōm̧m̧ani Kāālet ko. Iien in eaorōk emaron̄ koba jim̧or likao im jiron̄ ro. Jinen im jemān ajri ro remaron̄ bar kobatok.

Menin Aikuj ko n̄an Iiō ko. Kōn mālim eo an pāāren ro, likao ro remaron̄ bar pād ilo kāām ko an Doulul eo an Jiron̄ ro me ebōk juon bon̄ likio ilo jinoin Jānwōde ilo iiō eo me ej jejjet 12 aer iiō. Remaron̄ pād ilo iien dance ko, kweilo̧k ko an jodikdik ro, im kweilo̧k ko an N̄KJ (FSY) jino ilo Jānwōde ilo iiō eo me rej jejjet 14 aer iiō.

Kōļļā n̄an M̧akūtkūt ko. M̧akūtkūt ko, ekoba kein jerbal ko jet, rej kōļļāiki jān ward bajōt eo. Em̧akūtkūt im jon̄an jāān joļo̧k rejjab aikuj eļļā jān jon̄an aikuji.

Ijeļo̧kin wōt, eļan̄n̄e bajet eo an ward eo ejjabwe n̄an jejjōt in jāān ko n̄an kōllāik m̧akūtkūt kein, ritōl ro remaron̄ kajjitōk ippān ro rej bōk koņaer n̄an jipan̄ kōllāik er: Ijoke, juon likao ej aikuj jab bōbrare e jān an bōk koņaan eļan̄n̄e ejjab maron̄ jipan̄ kōļļā. Eļan̄n̄e eļap jāān emenin aikuj wōt, bisop eo emaron̄ kōmālim juon m̧akūtkūt in kabajet kajjojo iiō (lale 20.6.5).

Bisoprik eo ej lukkuun lale bwe bajōt eo im m̧akūtkūt ko n̄an likao ro im jiron̄ ro ren bwe im jejjet. Bajōk eo n̄an doulul eo an Priesthood eo an Aron ej pedped wōt ioon oran likao ro ilo ward eo. Bajet eo n̄an doulul eo an jiron̄ ro ej pedped wōt ioon oran jiron̄ ro ilo ward eo.

Lale FSY.ChurchofJesusChrist.org n̄an elōn̄ļo̧k meļeļe ko ikkijeen kōļļāik kweilo̧k ko reļļap an N̄KJ.

10.2.1.4

Eddōkļo̧k An Juon Make

Ilo kijejeto ko aer n̄an erom̧ āinwōt Rilo̧mo̧o̧r, jodikdik ro kar karuwaineneik er n̄an kōm̧m̧ani kōttōpar ko aer n̄an eddōkļo̧k ilo mour in jetōb, iiaio, ānbwin, im jeļāļo̧kjeņ (lale Luk 2:52). Jodikdik ro rej kappukot im̧we n̄an jeļā ta eo rej aikuj jerbale. Kōn jipan̄ eo jān ro jineer im jemeer, rej kōm̧m̧an karōk ko, jerbale karōk eo aer, im kejakļo̧kjeņ kōn ta eo rekar ekkatak. Ritōl ro rej leļo̧k jipan̄ n̄e emenin aikuj. Ijoke, rej aikuj jab etale kōttōpar ak eddōkļo̧k an likao ro. Ro jineer im jemeer im ritōl ro remaron̄ letok ļōmņak ikkijeen kōttōpar ko, ak rej kōtļo̧k an jodikdik ro kappukot im̧we ko aer make kōn ta kōttōpar ko n̄an kōttōpari.

Jodikdik ro kar kōketak er n̄an kadedeikļo̧k diktata ruo kōttōpar ilo kajjojo eria ko emān ilo kajjojo iiō. Remaron̄ kōjerbal Eddōkļo̧k An Juon Make: Bok In Unin Tōl an Jodikdik ak Gospel Living app eo n̄an kōm̧m̧ani im rekooti kōttōpar ko.

N̄an elōn̄ļo̧k meļeļe, lale ChildrenandYouth.ChurchofJesusChrist.org.

10.2.2

Kea kōn Ro Riaikuj

Rikabwijer Priesthood eo an Aron rej jipan̄ bisop eo ilo an “kajeikik aolep men ko an jidimkij” (Katak im Bujen Ko 107:68). Jiron̄ ro rej aikuj wōr aer iien ko rem̧m̧an aolep iien n̄an jipan̄ ro jet ilo im ippān baam̧le ko aer, ilo iien m̧akūtkūt ko an jodikdik ro, im m̧akūtkūt ko aer make. Ļōmņak ko n̄an jerbal in jipan̄ repād ilo ChildrenandYouth.ChurchofJesusChrist.org. Ijo ewōr ie, JustServe.org ej elmakote iien ko rem̧m̧an n̄an jerbal in jipan̄ ilo jukjuk in pād eo.

10.2.2.1

Jerbal in Karejar

Jerbal in karejar ej kea kōn ro jet āinwōt an nej kar Rilo̧mo̧o̧r kea. Rikabwijer Priesthood eo an Aron rej bōk ijjitōn̄ in jerbal in karejar ko jino ilo Jānwōde ilo iiō eo me ej jejjet 14 aer iiō. N̄an meļeļe ko reļļapļo̧k, lale jebta 21

10.2.3

Karuwaineneik Aolep n̄an Bōk Gospel eo

Rikabwijer Priesthood eo an Aron ro ewōr aer jerbal n̄an “karuwaineneiktok aolep n̄an itok n̄an Kraist” (Katak im Bujen Ko 20:59). Jet wāween ko remaron̄ kōm̧m̧an rej ellaajrak ijin ilaļ:

• Kōm̧m̧ane juon waanjon̄ok em̧m̧an āinwōt rikaļoor ro an Jisōs Kraist.

• Kwaļo̧k naan in kam̧ool ko aer ippān ro m̧ōttaer im ro uwaan baam̧le eo.

• Jerbal in karejar n̄an membōr ro rejāniknik an doulul ko aer.

• Karuwaineneik ro m̧ōttami n̄an itok im jar ak pād m̧akūtkūt ko an jodikdik ro.

• Karuwaineneik ro m̧ōttad n̄an bōk koņaer ilo būrokūraam̧ eo an Ajri ro im Jodikdik ro. Ritōl ro rej jerbal ippān pāāren ro an jodikdik rein n̄an jipan̄ meļeļe kōn būrokūraam̧ eo im karōk wāween aer im ajri ro nejier naaj kōņaan bōk koņaer.

• Karuwaineneik ro m̧ōttad bwe ren ekkatak ippān mijenede ro.

Jinen im jemān ajri ro im ritōl ro rej rōjan̄ likao ro n̄an kōpooj er n̄an etal im mijen im n̄an kwaļo̧k gospel eo ilo aolepān mour ko aer. Jet wāween ko remaron̄ kōm̧m̧an rej ellaajrak ijin ilaļ:

• Rojan̄ likao ro n̄an bōk juon naan in kam̧ool kōn karōk eo ekam̧ōņōņō an Jemedwōj Ilan̄, Pinmuur eo an Jisōs Kraist, im jepļaaktok eo an gospel eo An.

• Katakin likao ro kōn kōjeraam̧m̧an itok jān etal im mijen im ta eo naaj kōtmene jān er.

• Leļo̧k iien ko rem̧m̧an n̄an jerbal ilo Kabun̄ in.

• Leļo̧k iien ko rem̧m̧an n̄an katakin gospel eo ilo kweilo̧k ko an doulul eo im iien ko jet raorōk.

Āinwōt m̧ōttanļo̧k kōppopo in, bisoprik eo ak stake būreejtōnji eo emaron̄ ejaake juon kūlaaj in kōppopo n̄an ro rej kōppopo n̄an erom̧ mijenede. Kein jipan̄ ko reļļap n̄an kūlaaj in rej jeje ko rekwojarjar, Missionary Standards for Disciples of Jesus Christ, im Kwaļo̧k Gospel eo Aō: Juon Unin Tōl n̄an Jaketo Jaketak Gospel eo an Jisōs Kraist. Kūlaaj in ejjab kōm̧man aolep iien ilo kweilo̧k ko an Jabōt.

Missionary.ChurchofJesusChrist.org ej leļo̧k kein jipan̄ ko jet me remaron̄ jipan̄ likao ro ilo aer kōppopo n̄an jerbal āinwōt mijenede ro. Lale jebta 23 im 24 n̄an meļeļe ko reļļapļo̧k.

10.2.4

Kakobaik Baam̧le ko n̄an Mour Indeeo

Rikabwijer Priesthood eo an Aron remaron̄ jipan̄ kakobaik baam̧le ko n̄an indeeo ilo elōn̄ wāween ko. Jet iaan wāween kein rej ellaajrak ijin ilaļ:

• Kautiej ro jineer im jemāer im kwaļo̧k juon waanjon̄ok in mour āinwōt Kraist ilo m̧ōko m̧ōer.

• Kōppopo n̄an wōr aer make baam̧le n̄an indeeo.

• Wōr juon peba in mālim an tampeļ ekāāl.

• Kōppopo n̄an bōk im kejparok bujen ko im kain̄i ko an tampeļ, ekoba m̧are n̄an indeeo.

• Ekkatak kōn baam̧le ko nukier im ro jibūn im jim̧m̧an (lale My Family: Stories That Bring Us Together

• Kile ro jibūn im jim̧m̧an me rej aikuji kain̄i ko an tampeļ (lale FamilySearch.org).

• Bōk koņaer ilo peptaij im kapen ilo etan ro remej en ekutkut pedped wōt ioon jekjek ko.

• Bōk koņaer ilo indexing (lale FamilySearch.org/indexing).

• Jerbal āinwōt rijipan̄ ro ilo tampeļ im menmenbwij ko an baam̧le, āinwōt kar kūr er jān bisoprik ro (lale 25.2.4).

10.3

Bisoprik

Bisoprik eo ej būreejtōnji eo an Priesthood eo an Aron ilo ward eo (lale Katak im Bujen Ko 107:13–15). Rej tōl jerbal eo an doulul ko an Priesthood eo an Aron. Eddo eo eaorōk an bisop eo ej kea kake diktak in epepen eo ilo ward eo an. Ej ekkatak etaer im meļeļe kōn jekjek ko rej pād ie ilo m̧ōko m̧ōer. Ej pād ilo m̧akūtkūt ko aer im ilo kweilo̧k ko ekkā kōm̧m̧ani ilo Jabōt.

Bisop eo ej būreejtōn eo an dolulul eo an pris ro. Jerbal eo an “ej n̄an tōl pris [ro], im jijet ilo ko̧o̧njeļ ippāer, n̄an katakin er eddo ko an opij eo aer” (Katak im Bujen Ko 107:87).

Rikakpilōklōk eo kein kajuon ilo bisoprik eo ewōr an eddo n̄an doulul eo an rūkaki ro. Rikakpilōklōk eo kein karuo ewōr an eddo n̄an doulul eo an tikōn ro.

N̄e juon membōr in bisoprik ej pād ilo juon kweilo̧k an doulul eo, ej tōl kweilo̧k eo.

Bisoprik eo ewōr aer bar eddo ko jet ilo doulul eo an Priesthood eo an Aron rej elaajrak:

• Jipan̄ būreejtōnji ro an doulul eo im rijipan̄ ro an bisop ilo doulul eo an pris ro. Jipan̄ er meļeļe im kakūrm̧ool eddo kein āinwōt ritōl ro. N̄an kōm̧m̧ane menin, bisoprik eo ej kōjerbal jeje ko rekwojarjar im “Aaronic Priesthood and Young Women Class Presidency Orientation” (lale AaronicPriesthoodQuorums.ChurchofJesusChrist.org. Remaron̄ barāinwōt kōjerbal jebta 4 ilo bok in bōk meļeļe in.

• Intōrpiuik kajjojo likao diktata ruo kōttan ilo juon iiō (lale 31.3.1).

• Loloorjake katakin ko ilo doulul ko an Priesthood eo an Aron.

• Jipan̄ likao ro kōppopo n̄an bōk Melkisedek Priesthood (lale 10.6).

• Loloorjake rekoot, riboot, im jāān ko an doulul ko an Priesthood eo an Aron.

Rikapilōk im ro retijem̧ļo̧k ilo doulul eo rej jipan̄ kōn eddo kein n̄e kajjitōk bwe ren jipan̄ (lale 10.5).

10.4

Ritōl ro an Doulul eo an Jodikdik ro

10.4.1

Kūr, Ekkapit, im Kōjenolo̧k

Bisop eo ej kūr juon ak ruo pris n̄an erom̧ rijipan̄ ro an n̄an tōl doulul eo an pris ro. Juon membōr in bisoprik eo maron̄ barāinwōt kūr e āinwōt juon rijeje n̄an doulul eo.

Juon membōr in bisoprik eo ej kūr būreejtōn ro an tikōn im rūkaki ro ilo doulul eo. N̄e ebwe oran rikabwijer Priesthood eo an Aron n̄an jerbal, likao rein rej jar im lukkuun ļōmņak kōn membōr ro ilo doulul eo n̄an leļo̧k etaer āinwōt rikakpilōklōk ro im juon rijeje. Bisoprik eo ej kile ļōmņak im kajjitōk in aer n̄an leļo̧k kūr ko.

Mokta jān kajjitōk ippān juon likao n̄an jerbal ilo jabdewōt kūr kein, membōr in bisoprik eo ej kajjitōk mālim jān jinen im jemān likao eo.

Ālkin leļo̧k kūr kein, juon uwaan bisoprik eo ej kwaļo̧k etan ritōl ro an doulul an jodikdik ro n̄an rejtak ilo kweilo̧k an doulul eo aer. Bisop eo ej kōjenolo̧k rijipan̄ ro an im tikōn ro im būreejtōn ro an doulul eo an rūkaki ro. Ej leļo̧k ki ko an priesthood n̄an būreejtōn ro an doulul eo. Emaron̄ jitōn̄ rikakpilōklōk ro an n̄an kōjenoļo̧k membōr ro jet an būreejtōnji eo im rijeje ro.

Juon membōr in bisoprik eo ej kwaļo̧k kūr kein ilo kweilo̧k in kwojkwoj eo. Ak ejjab kwaļo̧k etaer n̄an rejetak.

10.4.2

Eddo ko

Būreejtōn eo an Doulul eo an Priesthood eo an Aron, ekoba bisop eo, ewōr aer eddo āinwōt kein rej ellaajrak. Rikakpilōklōk rein im rijipan̄ ro an bisop eo ilo doulul eo an pris ro rej jeere eddo kein.

• Tōl kijejeto ko an doulul eo n̄an bōk koņaad ilo jerbal in lo̧mo̧o̧r eo an Anij im mour ijo eutiej tata (lale jepta 1).

• Jeļā kajjien im jerbal n̄an ro uwaan doulul eo, ekoba ro rejjab pād ilo kweilo̧k ko an kūlaaj eo. Jeļā kōn aikuj ko aer im jekjek ko.

• Jerbal im jipan̄ ilo ko̧o̧njeļ an jodikdik ilo ward eo (lale 10.4.4).

• Bōk koņaad ilo kijejeto ko an ward eo n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok. Juon rijipan̄ jān doulul eo an pris ro en pād ilo kweilo̧k in kōtōbalbal ko (lale 23.4)

• Bōk koņaad ilo jerbal in tampeļ im menmenbwij an ward eo. Juon rijipan̄ jān doulul eo an pris ro en pād ilo kweilo̧k in kōtōbalbal ko (lale 25.2.7).

• Katakin ro uwaan doulul eo kōn jerbal ko an priesthood eo aer (lale Katak im Bujen Ko 107:85–88). Jipan̄ er ilo aer kakūrm̧ool jerbal kein.

• Karōk im tōl kweilo̧k ko an doulul eo (lale 10.2.1.2).

• Karōk im kōm̧m̧ani jerbal in jipan̄ im m̧akūtkūt ko an doulul eo (lale 10.2.1.3).

N̄e rijeje ro ilo doulul eo rej kūr, rej kōpooj laajrak in būrookūraam̧ eo n̄an kweilo̧k, je kein kakeememej ko. Rej barāinwōt jipan̄ ward kūļōk eo ak juon jān doulul eo ej rekoote etan ro rej pād ilo kūlaaj eo.

Membōr in bisoprik eo ej katakin likao ro kōn eddo ko aer (lale 10.3 Rikakpilōklōk ro an doulul eo raikuj lukkuun jipan̄ (lale 10.5).

10.4.3

Kweilo̧k eo an Būreejtōnji an Doulul eo

Doulul eo an Priesthood eo an Aron emakijkij aer kweilo̧k ippān doon. Būreejtōnji eo an Priesthood eo an Aron ej tōl kweilo̧k kein. Diktata ruo rūtto ro rej lōke rej aikuj pād—juon membōr in bisoprik, juon rikapilōk, ak juon eo etijem̧ļo̧k. Ilo iien kweilo̧k kein, ritōl ro rej kapilōk doon im kappukot revelesōn kōn akilaan Irooj n̄an doulul ko aer. Laajrak in būrookūraam̧ emaron̄ koba ekkōnono kōn aitōm̧ kein rej ellaajrak:

• Jipan̄ kōtōprak jerbal in lo̧mo̧o̧r eo an Anij im mour ijo eutiej tata

• Jipan̄ ro uwaan doulul eo, kōn jipan̄ eo ejenoļo̧k n̄an jipan̄ membōr ro rekāāl im pukotļo̧k membōr ro me rejaniknik.

• Loļo̧k ro jet rej uwaan tōmak ko jet ak kabun̄ ko jet

• Karōk kweilo̧k ko an doulul eo, jerbal in jipan̄, im m̧akūtkūt ko

• Kōmeļeļe kōn wāween tōl jān ritōl ro an doulul eo ak rikapilōk ro

Juon Sample Presidency Meeting Agenda epād ilo ChurchofJesusChrist.org.

10.4.4

Ko̧o̧njeļ an Jodikdik ilo Ward eo

Jibadbad eo an ko̧o̧njeļ eo an jodikdik ro ilo ward ej n̄an jipan̄ jodikdik ro boktok ro jet n̄an Jisōs Kraist im n̄an jipan̄ kōtōprak jerbal in lo̧mo̧o̧r eo an Anij im mour ijo eutiej tata.

Bisop eo ej tōl ilo ko̧o̧njeļ an jodikdik ilo ward eo. Membōr ro ilo doulul in ekoba:

• Bisoprik eo.

• Juon iaan rijipan̄ ro an bisop eo ilo doulul eo an priest ro im rūkaki ro im būreejtōn ro an doulul eo an tikōn ro.

• Būreejtōn ro an kūlaaj eo ilo Doulul eo an Jiron̄ ro (ak aolepān būreejtōnji eo an kūlaaj eo eļan̄n̄e ward eo ewōr wōt juon kūlaaj ilo Doulul eo an Jiron̄ ro).

• Būreejtōnji eo an Doulul eo an Jiron̄ ro

Membōr ro an ward kenono kake wāwein ko n̄an jipan̄ kajjojo armej ejaake naan in kam̧ool ko, bōk kain̄i in lo̧mo̧o̧r ko, kōjparok bujen ko, im erom̧ rikaļoor ro an Jisōs Kraist reweppān (lale Moronai 6:4–5). Rej kapilōk doon kōn aikuj ko an likao ro im jiron̄ ro ilo ward eo. Remaron̄ kōmeļeļeiki m̧akūtkūt ko n̄an kakke aikuj ko. Ijoke, karōk in m̧akūtkūt ko ralikkar rej aikuj bōk jikier ilo kweilo̧k ko an būreejtōnji eo an kūlaaj eo.

Lale 29.2.6 n̄an meļeļe ko reļļapļo̧k kōn ko̧o̧njeļ eo an jodikdik ro an ward.

10.5

Rikapilōk ro im ro Retijem̧ļo̧k

Juon membōr in bisoprik eo ej kūr im kōjenolo̧k em̧m̧aan ro n̄an erom̧ rikapilōk ro an doulul eo an Priesthood eo an Aron. Rikapilōk rein rej jipan̄ bisoprik eo ilo eddo ko aer n̄an doulul ko an Priesthood eo an Aron. Rej kwaļo̧k aorōk in n̄an katakin juon likao, katakin er wāween tōl kōn im̧we, im jipan̄ er erom̧ eļapļo̧k āinwōt Jisōs Kraist. Āinwōt aikuji ilo imminene, elōn̄ļo̧k jān juon rikakpilōklōk maron̄ kūri n̄an kajjojo doulul.

Bisoprik eo emaron̄ bar kūr rijipan̄ ro n̄an doulul eo n̄an jipan̄ ilo iien ko rekkar, ko āinwōt juon iien kāām, kweilo̧k eļap an jodikdik ro, ak ikkure ko.

Diktata ruo kōrā ro rerūtto ro rej lōke er rej aikuj pād ilo kajjojo kweilo̧k in kūlaaj eo im m̧akūtkūt an doulul eo. An rikapilōk im ritijem̧ļo̧k ro rej pād im kōm̧m̧an bwe en pidodo an membōr in bisoprik ro n̄an barāinwōt loļo̧k kūlaaj ko an Doulul eo an Jiron̄ ro im Būraimere im m̧akūtkūt ko. Rikapilōk ro im ro retijem̧ļo̧k rej aikuj kadedeikļo̧k kaminene ilo ProtectingChildren.ChurchofJesusChrist.org (lale 10.8.1).

10.6

Jipan̄ Likao ro rej Kōppopo n̄an Bōk Melkisedek Priesthood

N̄e juon likao ejejjet 18 an iiō, emaron̄ bōk Melkisedek priesthood im ekkapit āinwōt juon elder eļan̄n̄e ej pojak im mour erreo. Ej kapilōk ippān ro jinen im jemān im bisop eo n̄an kōm̧m̧ane kāālet in.

Ilo an 19 iiō ak m̧okta jān etal ettoļo̧k jān m̧weo (āinwōt etal n̄an college ak jerbal ilo military), ej aikuj ekkapit āinwōt juon elder eļan̄n̄e ej erreo. Men̄e ejjab ekkapit āinwōt juon elder n̄e 19 an iiō, maron̄ karuwaineneiki n̄an kweilo̧k ko an doulul eo an elder ro.

Jinen im jemān ajri ro ewōr aer eddo eaorōk n̄an jipan̄ ļaddik ro nejier kōppopo n̄an bōk Melkisedek priesthood. Bisoprik eo im rikapilōk ro an doulul eo remaron̄ jipan̄ ilo aer leļo̧k n̄an rikabwijer Priesthood eo an Aron iminene ko me renaaj kōpooj er n̄an juon iien ilo aolepān mour ko aer n̄an jerbal in jipan̄ āinwōt elder ro. Kōppopo eo em̧m̧antata n̄an bōk Melkisedek Priesthood eo ej n̄an kakūrm̧ool jerbal ko an Priesthood eo an Aron.

Ro rej bōk Melkisedek Priesthood rej aikuj kajjieon̄ bwe ren meļeļe.

• Kallim̧ur eo im bujen eo an priesthood eo (lale Katak im Bujen Ko 84:33–44).

• Jerbal ko an juon elder (Katak im Bujen Ko 20:38–45; 42:44; 107:11–12).

• Jibadbad eo an kain̄i ko an priesthood eo im kōjeraam̧m̧an ko an im wāween kōm̧m̧ani (lale jebta 18).

• Ekōjkan an em̧m̧aan ro im kōrā ro jerbal ippān doon n̄an jipan̄ kōtōprak jerbal eo an Anij.

N̄an elōn̄ļo̧k meļeļe ko kōn unin kōnono kein, lale “Melchizedek Priesthood,” im “Priesthood,” im “Women in the Church” (Topics and Questions, topics.ChurchofJesusChrist.org).

Būreejtōnji eo an doulul an elder ro im rikarejar jeiū ak jatū m̧aan ro remaron̄ jipan̄ leļo̧k kōmeļeļe in. Emaron̄ bōk jikin ippān kajjojo ilo m̧ōko m̧ōn likao ro ak ilo kūlaaj eo ej kōm̧m̧an ijjeļo̧kin ilo iien kweilo̧k ko an Jabōt

10.7

Ritōl ro an Doulul eo an Likao ro ilo Stake

Stake būreejtōnji eo ej kūr im kōjenolo̧k juon riko̧o̧njel eutiej n̄an jerbal āinwōt būreejtōn eo an Doulul eo an Likao ro ilo stake. Ro uwaan ko̧o̧njel eo eutiej kar jitōn̄ er n̄an Doulul eo an Jiron̄ ro im Būraimere remaron̄ kūr er im kajenolo̧k er n̄an jerbal āinwōt rikakpilōklōk ro an. Ak, eļan̄n̄e stake eo ekilep, rikabwijer ro jet an Melkisedek Priesthood jān stake eo remaron̄ kūr er āinwōt rikakpilōklōk ro. (Lale 6.5.)

Būreejtōn eo an Doulul eo an Likao ro ilo stake rej jerbal ium̧win tōl eo an stake būreejtōnji eo. E im rikakpilōklōk ro an im rijeje eo rej jerbal ilo kamiti in tōl eo an jodikdik ro ilo stake (lale 29.3.9). E im rikakpilōklōk ro an rej jipan̄ bisop eo ilo aer katakin er eddo ko aer ilo doulul ko an Priesthood eo an Aron.

Juon brother jān uwaan stake eo emaron̄ kūr rijeje eo an Doulul eo an Likao ro ilo stake.

N̄an meļeļe ko reļļapļo̧k ikkijeen eddo ko an būreejtōnji eo im rijeje eo an Doulul eo an Likao ro ilo stake, lale 5.7.2 im 5.7.3.

10.8

Kakobaba ko Jet kōn Laajrak in Unin tōl im Kakien ko

10.8.1

Kōjparok Jodikdik ro

N̄e rūtto ro rej aitōltōl jodikdik ro ilo m̧akūtkūt ko an Kabun̄ in, diktata ruo rūtto ro rej lōke er rej aikuj pād turier. Emaron̄ menin aikuj n̄an kobaik doulul ko jet n̄an kakūrm̧ool menin.

Aolep rūtto ro rej jerbal ippān jodikdik ro rej aikuj kadedeikļo̧k kaminene eo n̄an kōjparok ajri ro im jodikdik ro ilowaan juon allōn̄ jān iien eo kar rejtake er (ProtectingChildren.ChurchofJesusChrist.org). Rej āliji kaminene eo ļo̧kin jilu iiō tokālik.

N̄an meļeļe ko reļļapļo̧k kōn wāween an laajrak in tōl kein iookļo̧k kampānien ro an jerbal in karejar, lale 21.2.2.

10.8.2

Doulul eo an Likao ro im ro Ewōr Utam̧we ko ilo Ānbwinnier

Ritōl ro an doulul eo rej leļo̧k juon kea ejeņoļo̧k n̄an likao ro me ewōr utam̧we ko ilo ānbwinnier. N̄an eļōn̄ļo̧k meļeļe ko kōn jipan̄ likao rein, lale disability.ChurchofJesusChrist.org; bar lale 38.8.27 ilo bok in bōk meļeļe in.

10.8.3

Emblem (Nōbar in Kōkkaļļe) an Ajri ro im Jodikdik ro

Likao ro rej bōk kōkaļļe ko (emblems) āinwōt m̧ōttanļo̧k būrookūraam̧ eo an Ajri ro im Jodikdik ro. N̄e juon likao ej erom̧ juon membōr in doulul eo an Priesthood eo an Aron ej kab kein kajuon, ej bōk juon kōkaļļe (emblem) jān ritōl ro an doulul eo. Ej barāinwōt bōk juon kape in Personal Development: Youth Guidebook. Menin emaron̄ kōm̧m̧an n̄e ritōl ro an doulul eo rej kweilo̧k ippān n̄an karuwaineneik tok e n̄an doulul eo. Emaron̄ bar kōm̧m̧an ilo juon iien kweilo̧k ilo juon iiō n̄an jodikdik ro im jineer im jemāer (lale 10.2.1.3).

Ilo Jānwōde ilo iiō eo juon likao ejejjet 18 an iiō, ej bōk emblem ko jet.

Likao ro remaron̄ bōk kōkaļļe eo (emblem) in tōprak ilo aer kajjieon̄ erom̧ āinwōt Rilo̧mo̧o̧r.

N̄an elōn̄ļo̧k meļeļe ko kōn kakōļļe (emblem) ko, lale ChildrenandYouth.ChurchofJesusChrist.org.

10.8.4

Aiini Joortak in Jitlo̧k ko

Ilo ward ko me rej loloorjake jikin ko rej pād ilo boundary eo an, bisop emaron̄ tōl rikabwijer ro an Priesthood eo an Aron n̄an loļo̧k membōr ro kajjojo allōn̄ im karuwaineneik er n̄an leļo̧k joortak in jitlo̧k ko aer. Ilo kōm̧m̧ane jokāālet in, bisop eo ej ļōmņak kōn oran rikabwijer ro an Priesthood eo an Aron repād, ineem̧m̧an eo aer, im kōjeraam̧m̧an eo n̄an ro uwaan me remaron̄ jab leļo̧k jipan̄ (lale 34.3.2).

Ro rikabwijer preisthood eo rej aikuj in ilo̧k ruo ilo̧k n̄e rej aiin joortak in jitlo̧k ko. Ro im rej aiini joortak in jitlo̧k ko rej kajim̧weik aer leļo̧ki ilo jejjet n̄an juon eo ej uwaan bisoprik eo.

Membōr rejjab aikuj lilo̧k menin liļo̧k ko jet, āinwōt juon m̧ōttan jōn̄oul ak joortak ko jet, n̄an ro me rej aiini joortak in jitlo̧k ko.