10.

Ol Kworom blong Aronik Prishud

10.1

Stamba Tingting mo Oganaesesen

Aronik Prishud i helpem ol pikinini blong God blong rere blong gobak stap wetem Hem, long ples blong Hem. Hem i holem “ol ki blong seves blong ol enjel, mo blong gospel blong sakem sin, mo blong baptaes” (Doktrin mo Ol Kavenan 13; luk tu long 3.3.2 insaed long hanbuk ia).

10.1.1

Stamba Tingting

Ol kworom blong Aronik Prishud oli helpem ol yang man blong oli mekem mo kipim ol tabu kavenan, mo tu, blong oli mekem ol dip jenis long laef blong olgeta i go long Jisas Kraes mo gospel blong Hem.

Wan kworom i wan grup blong ol brata we oli holem prishud, mo oli oganaesem olgeta. Stamba tingting blong gat wan kworom hem i blong helpem ol brata we oli holem prishud blong wok tugeta blong tekpat long wok blong God blong fasin blong sevem man mo fasin blong kam olsem wan god, i hapen. Insaed long kworom blong olgeta, ol brata we oli holem Aronik Prishud oli wok tugeta, oli mekem ol prishud diuti, oli bildimap yuniti, mo oli lan mo laef folem doktrin.

10.1.2

Stamba Toktok blong Aronik Prishud Kworom

Stamba Toktok blong Aronik Prishud Kworom i save helpem wanwan yang man blong i andastanem tabu aedentiti blong hem, mo stamba tingting blong hem olsem wan man we i holem prishud. Ol yang man mo ol lida blong olgeta, oli ripitim stamba toktok ia long stat blong ol kworom miting, mo tu, long ol nara kam tugeta blong kworom. Stamba toktok ia i rid i go olsem:

“Mi mi pikinini boe blong God we Hem i lavem, mo Hem i gat wan wok blong mi mekem.

“Wetem ful hat, ful paoa blong tingting, ful maen mo ful paoa, bae mi lavem God, stap biaen long ol kavenan, mo yusum prishud blong Hem blong givim seves long ol narawan, statem long hom blong miwan.

“Taem mi stap traehad blong givim seves, praktisim fet, sakem sin, mo kam antap evri dei, bae mi kwalifae blong kasem ol blesing blong tempol mo blong kasem glad we i stap oltaem long gospel.

“Bae mi rere blong kam wan misinari we i wok had oltaem wetem strong tingting, stap wan fetful hasban, mo wan gudfala papa taem mi stap olsem wan tru disaepol blong Jisas Kraes.

“Bae mi help blong mekem wol i rere long taem we Sevya bae i kambak taem mi stap invaetem evriwan blong kam long Kraes mo kasem ol blesing blong Atonmen blong Hem.

10.1.3

Ol Kworom

Bisop i oganaesem ol man we oli holem Aronik Prishud i go long ol kworom olsem we i stap daon ia. (Luk tu long Doktrin mo Ol Kavenan 107:85–88.)

10.1.3.1

Kworom blong Ol Dikon

Ol yang man oli joenem kworom blong ol dikon stat long Jenuware blong yia we oli kasem 12 yia. Long taem olsem, oli save odenem olgeta oli kam ol dikon sapos oli rere mo sapos oli klin inaf.

Wan memba blong kworom we oli odenem hem i wan dikon i stap olsem presiden blong kworom. Taem we i posibol, bae i gat wan o tu kaonsela, wetem wan sekretari we oli save wok wetem hem. Tufala kaonsela mo sekretari, oli mas ol dikon.

Ol diuti blong wan dikon oli stap insaed long Doktrin mo Ol Kavenan 20:57–59; 84:111. Sam nara diuti i blong pasem sakramen mo stap helpem bisop blong “lukaotem evri samting we i blong laef long wol ia” (Doktrin mo Ol Kavenan 107:68).

10.1.3.2

Kworom blong Ol Tija

Ol yang man oli joenem kworom blong ol tija stat long manis Jenuware blong yia we bae oli kasem 14 yia. Long taem olsem, oli save odenem olgeta oli kam ol tija sapos oli rere mo sapos oli klin inaf.

Wan memba blong kworom we oli odenem hem i wan tija, i stap olsem presiden blong kworom. Taem we i posibol, bae i gat wan o tu kaonsela, wetem wan sekretari we oli save wok wetem hem. Tufala kaonsela mo sekretari, tufala tu i mas ol tija.

Ol tija oli gat ol semmak diuti olsem ol dikon. Mo tu, oli rere long sakramen, mo oli wok olsem ol givhan brata. Oli tokbaot sam moa diuti insaed long Doktrin mo Ol Kavenan 20:53–59; 84:111.

10.1.3.3

Kworom blong Ol Pris

Ol yang man oli joenem kworom blong ol pris stat long manis Jenuware blong yia we bae oli kasem 16 yia. Long taem olsem, oli save odenem olgeta oli kam ol pris sapos oli rere mo sapos oli klin inaf.

Bisop i presiden blong kworom blong ol pris (luk long Doktrin mo Ol Kavenan 107:87–88). Bisop i singaotem wan o tu memba blong kworom blong oli stap olsem ol asisten blong hem. Hem i save singaotem wan sekretari tu. Ol asisten mo sekretari, oli mas odenem olgeta olsem ol pris.

Ol pris oli gat ol semfala diuti olsem ol dikon mo ol tija. Oli gat sam moa diuti we oli tokbaot insaed long Doktrin mo Ol Kavenan 20:46–52, 73–79.

10.1.4

Ol Ki blong Prishud

Wanwan kworom, i gat wan presiden i lidim, mo hem i holem ol ki blong prishud. Presiden blong kworom blong ol dikon, presiden blong kworom blong ol tija mo bisop, oli olgeta we oli holem ol ki blong prishud. Blong gat moa infomesen long saed blong ol ki ia, luk long 3.4.1.

10.1.5

Stretem Ol Kworom Folem Ol Lokol Nid

Long wan wod o branj wetem samfala yang man nomo, ol kworom blong Aronik Prishud oli save mit tugeta blong kasem instraksen mo gat ol aktiviti.

Sapos wan wod i gat moa long 12 dikon, bisop i save serem kworom blong ol dikon ia. I semmak sapos i gat moa long 24 tija (luk long Doktrin mo Ol Kavenan 107:85–86). Taem hem i mekem desisen ia, bisop i skelem wanem nao hemia bae i mekem long ol memba blong kworom.

10.2

Stap Tekpat long Wok blong God blong Fasin blong Sevem Man mo Fasin blong Kam Olsem Wan God

God i stap invaetem evriwan blong i go long Kraes mo help long wok ia blong Hem taem oli:

• Stap laef folem gospel blong Jisas Kraes.

• Yumi stap kea long olgeta we oli stap long nid.

• Yumi stap invaetem evriwan blong akseptem gospel.

• Yumi stap joenem ol famli blong taem we i no save finis.

Bisoprik mo ol lida blong kworom blong ol yut, we ol advaesa oli sapotem (luk long 10.5), oli kaonsel tugeta abaot olsem wanem blong help blong mekem wok ia i kamtru. Blong gat moa infomesen abaot wok blong God blong fasin blong sevem man mo fasin blong kam olsem wan god, stadi long japta 1.

10.2.1

Stap Laef Folem Gospel blong Jisas Kraes

10.2.1.1

Rol blong Ol Papa mo Mama mo Ol Lida blong Jos

Papa mo mama, tufala i responsibol blong stap tijim ol pikinini blong tufala abaot gospel mo blong stap helpem olgeta blong laef folem gospel ia (luk long Doktrin mo Ol Kavenan 68:25–28). Bisoprik mo ol lida blong kworom blong ol yut, wetem help blong ol advaesa, oli sapotem papa mo mama long wei ia:

• Oli leftemap tingting blong i mas gat komunikesen bitwin ol yang man mo ol famli blong olgeta.

• Oli meksua se ol yut aktiviti oli sapotem mo blesem ol famli.

• Oli helpem ol papa mo mama blong oli mekem ol boe blong olgeta oli rere blong kasem ol odinesen blong prishud mo blong kasem Melkesedek Prishud.

• Oli helpem ol papa mo mama blong mekem ol boe blong olgeta oli rere blong kasem tempol endaomen, go long wan fultaem misinari seves, kasem mared long tempol, mo kam wan papa.

Ol lida oli mas lisin mo luklukgud long ol yut we oli no stap kasem famli sapot blong stap laef folem gospel.

Ol papa mo mama, mo ol lida oli traehad blong stap ol gudfala eksampol long ol yut. Oli tijim tingting blong ol yut blong olgeta taem oli stap hadwok blong oli kam moa olsem Jisas Kraes. Program ia blong Ol Pikinini mo Ol Yut i save help long ol traehad wok ia (luk long ChildrenandYouth.ChurchofJesusChrist.org).

10.2.1.2

Stap Lanem Gospel

Bisoprik, ol lida blong yut kworom, mo ol advaesa oli leftemap tingting blong ol yang man mo famli blong olgeta blong oli lanem gospel insaed long hom. Ol lida mo ol advaesa oli stadi long gospel mo oli serem wanem we oli lanem wetem ol yang man. Oli stap invaetem ol memba blong kworom blong oli serem, insaed long Jos, wanem we oli stap lanem long hom.

Ol kworom blong Aronik Prishud oli stap mit long ol Sandei blong mekem fet i kam strong moa, blong bildimap yuniti, blong mekem ol famli mo ol hom oli kam strong moa, mo blong mekem ol plan blong help blong mekem wok ia blong God blong fasin blong sevem man mo fasin blong kam olsem wan god, oli hapen. Bisoprik mo ol lida blong ol yut kworom, we ol advaesa oli sapotem, oli mekem plan blong ol Sandei miting ia.

Ol kworom miting, oli holem olgeta long nambatu mo nambafo Sandei blong manis. Oli blong 50 minit. Ol miting oli mas stat wetem wan prea. Wan memba blong kworom presidensi (o wan long ol asisten blong bisop insaed long kworom blong ol pris) i lidim miting ia. Hem i lidim kworom blong talem baehat stamba toktok, mo blong stap toktok raon long ol asaenmen, ol diuti, mo ol nara mata.

Wan memba blong kworom, o wan adalt lida, i lidim gospel instraksen. Ol lida blong kworom oli kaonsel wetem ol advaesa abaot huia ia nao bae i tij. Ol miting aotlaen, bae yufala i faenem long Kam Folem Mi. Ol miting oli mas en wetem wan prea.

Long nomol taem, wanwan kworom blong Aronik Prishud i mas mit seperet (luk long 10.1.5 Wanwan taem, ol yang woman mo ol yang man oli mit tugeta blong holem wan Sandei lesen, olsem we bisoprik mo presiden blong Ol Yang Woman i kodinetem.

Oli mas leftemap tingting blong ol yang man blong oli tekpat long seminari (luk long 15.1).

10.2.1.3

Seves mo Ol Aktiviti

Bisoprik mo ol lida blong ol yut kworom, we ol advaesa oli sapotem, oli mekem plan blong holem ol seves mo ol aktiviti. Ol seves mo aktiviti ia oli sapos blong help blong mekem wok blong God blong fasin blong sevem man mo fasin blong kam olsem wan god, i hapen. Ol seves mo ol aktiviti ia, oli mas bildimap ol testemoni, mekem ol famli oli kam strong moa, pusum yuniti insaed long kworom, mo i givim ol janis blong blesem ol narawan. Oli mas gat balens long ol fofala eria blong groap yumiwan: long saed blong spirit, long saed blong sosol laef, long saed blong bodi, mo long saed blong waes.

Plante long ol yut aktiviti ia, plante taem oli holem long wan dei we i no Sandei, o, i no Mandei. Plante taem oli holem evri wik. Long samfala eria, ol samting olsem ples we i longwe, sefti, o ol nara samting i save mekem se i no posibol blong holem ol aktiviti ia evri wik. Long ol eria ia, bae i oraet sapos oli no holem ol aktiviti ia evri wik, be oli mas holem aktiviti wan taem long wan manis. Ol aktiviti ia, oli save wokemaot plan blong olgeta taem oli yusum Eksampol blong Seves mo Aktiviti Plan, we i stap long ChurchofJesusChrist.org

Samfala seves mo aktiviti, insaed i mas gat tugeta, ol yang man mo ol yang woman, speseli ol yut we oli bigwan.

Ol yut bae oli kasem fulap samting taem oli gat wan sosol laef insaed long ol bigfala grup. Ol yut, we oli stap long tu o moa long tu wod, wanwan taem oli save mit tugeta blong gat seves mo ol aktiviti. Ol stek mo ol distrik, wanwan taem oli save mekem plan blong holem seves mo ol aktiviti blong ol yut (luk long 20.3.2).

Ol adalt lida oli help blong meksua se ol aktiviti ia oli sef (luk long safety.ChurchofJesusChrist.org; luk tu long 20.7 insaed long hanbuk ia). Meksua se i gat tu (2) adalt we oli gat responsibol fasin blong mas stap long evri aktiviti (luk long 10.8.1

Blong kasem moa infomesen, luk long AaronicPriesthoodQuorums.ChurchofJesusChrist.org. Luk tu long JustServe.org long ol ples we i gat hemia i stap. Olgeta risos ia oli givim seves mo ol aedia blong aktiviti.

Ol Yia Aktiviti. Antap long ol yut aktiviti we i hapen oltaem, ol yang man oli save tekpat tu, evri yia, long:

• Wan miting blong ol yut mo papa mo mama blong olgeta kolosap long stat blong yia. Oli save holem miting ia blong ol yang man mo ol yang woman i seperet, o i tugeta. Oli save holem long level blong wod, o, long level blong stek. Ol asisten blong bisop nao oli mekem plan blong miting ia insaed long pris kworom blong olgeta mo wetem presidensi blong klas blong ol yang woman we yia blong olgeta i moa bigwan. Ol yang man we bae oli kasem 12 yia tru aot long yia, oli save kasem ol simbol aedentiti blong olgeta long taem blong miting ia (luk long 10.8.3). Blong kasem moa infomesen, luk long ChildrenandYouth.ChurchofJesusChrist.org.

• Wan Aronik Prishud Kworom kamp (luk long Aaronic Priesthood Quorum Camp Guide). Ol yang man oli save tekpat long sam moa ovanaet kamp, samting we bae i hapen, mo ol aktiviti truaot long yia, taem we i posibol.

• Wan wod o stek yut konfrens, o wan konfrens blong, Blong Ol Yut Oli Kam Strong(BYKS). Blong kasem moa infomesen abaot ol FSY konfrens, luk long FSY.ChurchofJesusChrist.org. Blong gat moa infomesen abaot ol koling mo ol responsabiliti blong wod mo stek FSY, luk long FSYLeader.ChurchofJesusChrist.org (blong U.S. mo Kanada) o long FSY Planning Guide (blong evri nara eria).

• I mas gat wan aktiviti we i tokbaot bigwan ol prinsipol we oli stap insaed long Blong Ol Yut Oli Kam Strong: Wan Gaed Buk blong Stap Mekem Ol Joes. Long taem ia, ol yang man mo ol yang woman oli save mit tugeta. Oli save invaetem tu ol papa mo mama.

Ol Samting we I Mas Gat Folem Yia blong Wanwan. Wetem raet blong papa mo mama blong olgeta, ol yang man oli save go long wan ovanaet Aronik Prishud kamp; hemia stat long Jenuware blong yia ia we oli kasem 12 yia. Oli save go long ol danis, ol yut konfrens, mo ol BYKS konfrens, hemia stat long manis Jenuware blong yia ia we oli kasem 14 yia.

Mane blong Mekem Ol Aktiviti. Ol aktiviti, wetem ol saplae blong holem aktiviti, oli pem wetem bajet blong wod. Ol travel mo mane we oli spendem, oli no mas sas tumas.

Olsem wan eksepsen, sapos bajet blong wod i no gat inaf mane blong pem ol maltidei aktiviti, olsem ol kamp, ol lida oli save askem wanwan we i tekpat blong i help blong oli pem olgeta samting ia. Be, oli no mas stopem wan yang man blong kam long aktiviti ia sapos hem i no save pem blong help. Sapos oli nidim moa mane, bisop i save givim raet blong oli holem wan fanresing nomo long wanwan yia (luk long 20.6.5).

Bisoprik i meksua se bajet mo ol aktiviti blong ol yang man mo ol yang woman, oli inaf mo oli serem i ikwol. Ol bajet blong ol kworom blong Aronik Prishud, i folem namba blong ol yang man we oli stap insaed long wod. Bajet blong ol yang woman i folem namba blong ol yang woman insaed long wod.

Luk long FSY.ChurchofJesusChrist.org blong kasem moa infomesen abaot fasin blong kasem mane blong pem samting blong ol BYKS konfrens.

10.2.1.4

Divelopmen blong Yuwan

Long ol hadwok blong olgeta blong oli kam moa olsem Sevya, oli stap invaetem ol yut blong setem ol gol blong groap long saed blong spirit, sosol laef, bodi mo waes (luk long Luk 2:52). Ol yut oli lukaotem insperesen blong faenemaot wanem we oli nid blong wok long hem. Wetem help blong ol papa mo mama, oli mekem ol plan, oli mekem samting i folem plan blong olgeta, mo oli soemaot wanem we oli lanem. Ol lida mo ol advaesa oli givim sapot tu olsem we i nid blong mekem. Be, oli no sapos blong folemap ol gol o progres blong ol yang man. Ol mama mo papa, mo ol lida oli save givim tingting blong samfala gol, be oli letem ol yut blong lukaotem insperesen we i kam long olgeta abaot ol gol we oli mas kasem mo mekem i hapen.

Oli leftemap tingting blong ol yut blong flatem tu gol long wanwan long ol fo eria ia evri yia. Oli save yusum Divelopmen blong Yuwan: Gaedbuk blong Ol Yut o ap blong Laef Folem Gospel blong setemap mo rekodem ol gol blong olgeta.

Blong kasem moa infomesen, luk long ChildrenandYouth.ChurchofJesusChrist.org.

10.2.2

Stap Kea long Olgeta long Nid

Olgeta we oli kasem Aronik Prishud oli helpem bisop blong “lukaotem evri samting we i blong laef long wol ia” (Doktrin mo Ol Kavenan 107:68). Oli mas gat ol taem we i tekem ples oltaem blong oli givim seves long ol narawan, mo tu ol taem blong givim seves long famli blong olgeta, long taem blong ol yut aktiviti, mo tu, long taem blong olgetawan nomo. Ol aedia blong wei blong givim seves oli stap long ChildrenandYouth.ChurchofJesusChrist.org. Long weaples i gat, JustServe.org i givim sam janis blong mekem komuniti seves.

10.2.2.1

Wok blong Givhan

Wok blong givhan i blong stap kea long ol narafala man olsem we Sevya bae i mekem. Olgeta we oli holem Aronik Prishud, oli kasem ol givhan wok we oli givimaot long olgeta stat long manis Jenuware blong yia ia we oli kasem 14 yia. Blong kasem moa infomesen, luk long japta 21.

10.2.3

Stap Invaetem Evriwan blong Akseptem Gospel

Olgeta we oli kasem Aronik Prishud oli gat diuti ia blong “invaetem evriwan blong kam long Kraes” (Doktrin mo Ol Kavenan 20:59). Sam wei blong oli save mekem olsem, oli stap andanit ia:

• Stap olsem wan gud eksampol blong stap wan disaepol blong Jisas Kraes.

• Serem ol testemoni blong olgeta wetem ol fren mo ol memba blong famli.

• Givhan long olgeta we oli lesaktiv insaed long ol kworom blong olgeta.

• Invaetem ol fren blong kam long jos o long wan yut aktiviti.

• Invaetem ol fren blong oli tekpat long program blong Ol Pikinini mo Ol Yut. Ol lida oli mas wok kolosap moa wetem ol mama mo papa blong ol yut ia blong helpem olgeta oli andastanem program ia mo blong luksave olsem wanem nao olgeta mo ol pikinini blong olgeta oli wantem pat long program ia.

• Invaetem ol fren blong ol misinari oli tijim olgeta.

Ol papa mo mama, mo ol lida, oli leftemap tingting blong ol yang man blong rere blong givim seves long ol fultaem misin, mo tu, blong oli serem gospel truaot long laef blong olgeta. Sam wei blong oli save mekem olsem, oli stap andanit ia:

• Leftemap tingting blong ol yang man blong kasem wan testemoni blong olgetawan abaot plan blong hapines blong Papa long Heven, Atonmen blong Jisas Kraes, mo restoresen blong gospel blong Hem.

• Tijim ol yang man abaot ol blesing blong stap givim seves long ol misin mo wanem nao oli wantem luk olgeta oli mekem long tetaem ia.

• Givim ol janis long olgeta blong oli givim seves insaed long Jos.

• Givim ol janis blong tijim gospel long ol miting blong kworom, mo long ol nara ples.

Olsem pat blong fasin ia blong rere, bisoprik o stek presidensi oli save oganaesem wan misin priperesen klas. Ol stamba risos blong klas ia, oli ol skripja, Ol Misinari Standet blong Ol Disaepol blong Jisas Kraes, mo Prijim Gospel blong Mi: Wan Gaed blong Stap Serem Gospel blong Jisas Kraes. Klas ia oli no holem long taem blong ol nomol Sandei miting.

Missionary.ChurchofJesusChrist.org i givim sam moa risos we i save helpem ol yang man taem oli stap rere blong givim seves olsem ol misinari. Luk long ol japta 23 mo 24 blong kasem moa infomesen.

10.2.4

Stap Joenem Ol Famli blong Taem we I No Save Finis

Olgeta we oli holem Aronik Prishud oli save help blong yunaetem ol famli blong taem we i no save finis long plante wei. Sam wei blong help, oli stap andanit ia:

• Givim ona long papa mo mama blong olgeta mo stap olsem wan eksampol blong fasin blong stap laef insaed long hom blong olgeta, we i olsem fasin blong Kraes.

• Rere blong gat stret famli blong olgeta we i no save finis.

• Gat wan tempol rekomen we i laef i stap.

• Rere blong mekem mo kipim ol kavenan mo kasem ol odinens blong tempol, we i tekem tu mared we i no save finis.

• Lanem abaot ol narafala famli mo bubu blong olgeta (luk long Famli blong Mi: Ol Stori we Oli Karem Mifala I Kam Tugeta).

• Faenemaot nem blong ol bubu we oli nidim blong kasem ol odinens blong tempol (luk long FamilySearch.org).

• Tekpat long ol baptaes mo ol konfemesen blong olgeta we oli ded plante taem olsem we situesen blong olgeta i letem olgeta.

• Tekpat long wok blong indeksing (luk long FamilySearch.org/indexing).

• Givim seves olsem ol tempol mo famli histri konsalten, olsem we bisoprik i singaotem olgeta (luk long 25.2.4).

10.3

Bisoprik

Bisoprik hem i presidensi blong Aronik Prishud insaed long wod (luk long Doktrin mo Ol Kavenan 107:13–15). Oli lidim wok blong ol kworom blong Aronik Prishud. Fasfala mo moa impoten responsabiliti blong bisop, hem i blong helpem jeneresen ia we i stap kam antap insaed long wod blong hem. Hem i lanem nem blong olgeta mo hem i andastanem hom situesen blong olgeta. Hem i go long ol aktiviti blong olgeta mo ol Sandei miting oltaem.

Bisop i presiden blong kworom blong ol pris. Diuti blong hem i blong “prisaed ova long [ol] pris, mo blong sidaon long kaonsel wetem olgeta, blong tijim olgeta long ol diuti blong ofis blong olgeta” (Doktrin mo Ol Kavenan 107:87).

Fas kaonsela insaed long bisoprik i gat responsabiliti ia blong lukaotem kworom blong ol tija. Seken kaonsela i gat responsabiliti blong lukaotem kworom blong ol dikon.

Taem wan memba blong bisoprik i go long wan miting blong kworom, hem i stap prisaed insaed long miting ia.

Bisoprik i gat olgeta responsabiliti ia moa long saed blong ol kworom blong Aronik Prishud:

• Lidim mo tijim tingting blong ol presidensi blong kworom, mo asisten blong bisop insaed long kworom blong ol pris. Helpem olgeta blong oli andastanem mo mekem diuti blong olgeta olsem ol lida. Blong mekem hemia, bisoprik i yusum ol skripja mo “Orientesen blong Klas Presidensi blong Ol Klas blong Aronik Prishud mo blong Ol Yang Woman” (luk long AaronicPriesthoodQuorums.ChurchofJesusChrist.org). Oli save yusum japta 4 blong hanbuk ia tu.

• Stap intaviu long wanwan yang man tu (2) taem long wan yia (luk long 31.3.1).

• Lukluk ova long tijing we i stap tekples insaed long ol kworom blong Aronik Prishud.

• Helpem ol yang man blong stap rere blong kasem Melkesedek Prishud (luk long 10.6).

• Lukluk ova ol rekod, ol ripot, bajet, mo ol faenens blong oganaesesen blong ol kworom blong Aronik Prishud.

Ol kworom advaesa mo ol speselis oli help wetem ol responsabiliti ia olsem we oli askem olgeta (luk long 10.5).

10.4

Ol Yut Kworom Lida

10.4.1

Stap Singaotem, Sastenem, mo Setem Apat Ol Yang Man

Bisop i singaotem wan o tu long ol pris blong oli stap olsem ol asisten blong hem long wok ia blong stap lidim kworom blong ol pris. Wan memba blong bisoprik i save singaotem wan sekretari blong kworom.

Wan memba blong bisoprik i singaotem ol presiden blong kworom blong ol dikon mo hemia blong ol tija. Taem we i gat inaf man we i kasem Aronik Prishud blong givim seves, ol yang man ia oli prea blong tingting long ol memba blong kworom blong givim nem olsem ol kaonsela mo wan sekretari. Bisoprik i save tingting long ol nem ia, mo oli save givimaot koling.

Bifo oli askem wan yang man blong givim seves long eni long ol koling ia, bisoprik memba i askem raet blong papa mo mama blong yang man ia.

Afta we oli givimaot ol koling ia, wan memba blong bisoprik i presentem ol yut kworom lida ia blong oli sastenem olgeta insaed long kworom miting blong olgeta. Bisop i setem apat ol asisten blong hem, mo tu, ol presiden blong kworom blong ol dikon mo hemia blong kworom blong ol tija. Hem i pasem o givim ol prishud ki long ol presiden blong kworom. Hem i save givimaot wok long ol kaonsela blong hem blong oli setem apat ol nara memba blong presidensi mo ol sekretari.

Wan memba blong bisoprik i mekem anaonsmen blong olgeta koling ia long taem blong sakramen miting. Hem i no nid blong presentem olgeta blong oli sastenem olgeta.

10.4.2

Ol Responsabiliti

Ol Aronik Prishud presiden blong ol kworom, wetem bisop tu, oli gat olgeta responsabiliti ia: Ol kaonsela blong olgeta, mo ol asisten blong bisop insaed long kworom blong ol pris, oli serem ol semfala responsabiliti ia.

• Oli lidim ol hadwok blong kworom blong tekpat long wok blong God blong fasin blong sevem man mo hemia blong kam olsem wan god (luk long japta 1).

• Kam blong save mo givim seves long wanwan memba blong kworom, wetem olgeta we oli no stap go long ol miting blong kworom. Oli kam blong save ol nid mo ol situesen blong olgeta.

• Oli givim seves, o stap insaed long wod yut kaonsel (luk long 10.4.4).

• Tekpat long ol wok blong wok blong stap serem gospel mo mekem ol memba we oli niu mo olgeta we oli kambak, oli kam strong moa. Wan asisten insaed long kworom blong ol pris i go long ol kodinesen miting ia (luk long 23.4).

• Tekpat long ol wok insaed long wod, long saed blong tempol mo famli histri. Wan asisten insaed long kworom blong ol pris, i go long ol kodinesen miting (luk long 25.2.7).

• Oli tijim ol memba blong kworom long saed blong ol prishud diuti blong olgeta (luk long Doktrin mo Ol Kavenan 107:85–88). Sapotem olgeta blong oli mekem ol responsabiliti ia.

• Mekem plan mo lidim ol kworom miting ia (luk long 10.2.1.2).

• Mekem plan mo kareaot ol seves mo aktiviti blong kworom (luk long 10.2.1.3).

Taem oli singaotem ol sekretari blong kworom, oli mekem rere ol ajenda blong holem ol miting, mo oli tekem ol not. Mo tu, oli helpem klak blong wod o wan kworom advaesa, blong oli kipim wan rekod blong atendens.

Ol memba blong bisoprik oli tijim ol yang man abaot responsabiliti blong olgeta (luk long 10.3 Ol kworom advaesa oli mas strong mo aktiv blong help (luk long 10.5).

10.4.3

Kworom Presidensi Miting

Ol kworom presidensi blong ol Aronik Prishud oli mit oltaem. Kworom presiden i lidim ol miting ia. I mas gat tu (2) adalt i stap long miting ia—wan memba blong bisoprik, wan advaesa, o wan speselis. Long taem blong ol miting ia, ol lida oli kaonsel tugeta mo oli lukaotem blong kasem revelesen abaot tingting blong Lod long saed blong kworom blong olgeta. Insaed long ajenda, i gat ol toktok raon long olgeta wok ia:

• Help blong mekem wok blong God blong fasin blong sevem man mo fasin blong kam olsem wan god

• Stap givim seves long ol memba blong kworom, mo spesel lukluk blong stap sapotem ol niu memba mo stap go lukaotem mo helpem ol lesaktiv memba.

• Go aot long olgeta we oli blong defren jos o fet, mo no gat ol sem bilif

• Mekem plan blong ol miting, ol seves, mo ol aktiviti blong kworom

• Lidasip instraksen we i kam long ol lida mo ol advaesa blong kworom.

Wan Eksampol blong Presidensi Miting Ajenda i stap long ChurchofJesusChrist.org.

10.4.4

Wod Yut Kaonsel

Stamba tingting blong gat wod yut kaonsel hem i blong helpem ol yut blong oli tekem ol narawan oli kam long Jisas Kraes, mo blong help blong mekem wok blong God blong fasin blong sevem man mo fasin blong kam olsem wan god.

Bisop i prisaed ova long wod yut kaonsel. Ol memba blong kaonsel ia, insaed i gat:

• Bisoprik.

• Wan long ol asisten blong bisop insaed long kworom blong ol pris mo presiden blong kworom blong ol tija mo presiden blong kworom blong ol dikon.

• Ol presiden blong Ol Klas blong Ol Yang Woman (o ful klas presidensi sapos wod i gat wan Yang Woman klas nomo).

• Presiden blong Ol Yang Woman.

Yut wod kaonsel i toktok raon long ol wei blong helpem ol narawan blong oli bildimap testemoni blong olgeta, blong oli kasem ol odinens we i sevem man, blong oli mekem mo kipim ol kavenan, mo blong oli kam ol man mo ol woman we oli stap folem Jisas Kraes (luk long Moronae 6:4–5). Oli kaonsel tugeta abaot ol nid blong ol yang man mo ol yang woman insaed long wod. Oli save toktok raon long ol aktiviti blong lukluk long ol nid ia. Be, ol ditel plan blong ol aktiviti, i mas hapen insaed long ol kworom o ol klas presidensi miting.

Luk long 29.2.6 blong kasem moa infomesen abaot wod yut kaonsel.

10.5

Ol Advaesa mo Ol Speselis

Wan memba blong bisoprik i singaotem mo i setem apat ol man we oli stap olsem ol kworom advaesa blong Aronik Prishud. Ol advaesa ia, oli sapotem bisoprik long ol responsabiliti blong olgeta long saed blong ol kworom blong Aronik Prishud. Oli lukluk plante nao blong tijim tingting blong ol yang man, mo tijim olgeta olsem wanem blong lidim man tru long insperesen, mo stap helpem olgeta blong oli kam moa olsem Jisas Kraes. Olsem we i nid, mo olsem we i posibol blong mekem, oli save singaotem moa long wan advaesa blong stap long wanwan kworom.

Bisoprik i save singaotem ol kworom speselis blong help wetem wan spesel taem, olsem wan kamp, wan yut konfrens, o wan spot taem.

Meksua se i gat tu (2) adalt we oli gat responsibol fasin blong mas stap long wanwan miting blong kworom o aktiviti. Blong gat ol advaesa mo ol speselis oli stap, i mekem se i posibol blong ol memba blong bisoprik oli visitim tu ol klas blong Ol Yang Woman mo Praemeri, mo tu ol aktiviti blong olgeta. Ol advaesa mo ol speselis oli mas komplitim trening we i stap long (luk long ProtectingChildren.ChurchofJesusChrist.org (luk long 10.8.1).

10.6

Stap Helpem Ol Yang Man blong Stap Rere blong Kasem Melkesedek Prishud

Taem wan yang man i kasem 18 yia o moa, hem i save kasem Melkesedek Prishud mo blong oli odenem hem i kam wan elda sapos hem i rere gud mo sapos hem i klin inaf. Hem i kaonsel o toktok wetem papa mo mama blong hem, mo wetem bisop blong mekem desisen ia.

Taem hem i kasem 19 yia, o bifo hem i aot long hom (blong go long yunivesiti o givim seves long ami), oli mas odenem hem i kam wan elda sapos hem i klin inaf. Iven sapos oli no odenem hem i kam elda taem hem i kasem 19 yia, oli stap invaetem hem blong go long ol miting blong kworom blong ol elda.

Ol papa mo mama oli gat fasfala responsabiliti ia blong helpem ol boe blong olgeta blong oli rere blong kasem Melkesedek Prishud. Bisoprik mo ol advaesa blong kworom oli save help tu blong givim olgeta we oli holem Aronik Prishud blong gat ol eksperiens we bae i mekem olgeta oli rere from wan seves olsem ol elda long ful laef blong olgeta. Bes wei blong rere blong kasem Melkesedek Prishud, hem i blong mekem gud ol diuti blong Aronik Prishud.

Olgeta we oli kasem Melkesedek Prishud oli mas traehad blong andastanem:

• Strong promes mo kavenan blong prishud (luk long Doktrin mo Ol Kavenan 84:33–44).

• Ol diuti blong wan elda (Doktrin mo Ol Kavenan 20:38–45; 42:44; 107:11–12).

• Ol stamba tingting blong ol odinens mo ol blesing blong prishud, mo olsem wanem blong mekem olgeta odinens ia mo ol blesing ia (luk long japta 18).

• Olsem wanem ol man mo ol woman oli wok tugeta blong help blong mekem wok blong God.

Blong gat moa infomesen long saed blong ol topik ia, luk long “Melchizedek Priesthood,” “Priesthood,” mo “Women in the Church” (Topics and Questions, topics.ChurchofJesusChrist.org).

Presidensi blong kworom blong ol elda, mo ol givhan brata oli save help blong givim instraksen ia. I save hapen long wanwan insaed long hom blong ol yang man, o insaed long wan klas we oli holem aotsaed long ol nomol miting blong Sandei.

10.7

Ol Stek Yang Man Lida

Stek presidensi i singaotem mo i setem apat wan hae kaonsela blong hem i stap olsem stek presiden blong Ol Yang Man. Ol memba blong hae kaonsel we oli kasem wok blong lukaot long Ol Yang Woman mo Praemeri; oli save singaotem mo setem apat olgeta blong givim seves olsem ol kaonsela blong hem. O, sapos wan stek i bigwan inaf, ol nara man we oli holem Melkesedek Prishud, we oli stap long stek, oli save singaotem olgeta olsem ol kaonsela. (Luk long 6.5.)

Stek Yang Man presiden i givim seves anda long daereksen blong stek presidensi. Hem mo ol kaonsela blong hem, mo sekretari, oli givim seves long stek yut lidasip komiti (luk long 29.3.9). Hem mo ol kaonsela blong hem, oli helpem ol bisoprik taem oli stap tijim olgeta long saed blong ol responsabiliti blong olgeta long saed blong ol kworom blong Aronik Prishud.

Wan brata we i kamaot long membasip blong stek, oli save singaotem hem olsem stek Yang Man Sekretari.

Blong kasem moa infomesen abaot ol responsabiliti blong stek Yang Man presidensi mo sekretari, luk long 6.7.2 mo 6.7.3.

10.8

Sam Moa Gaedlaen mo Polisi

10.8.1

Kipim Ol Yut Oli Sef Oltaem

Taem i gat ol adalt we oli stap tijim ol yut, i mas gat tu (2) responsibol adalt tu, we oli mas stap. Maet bae i nid blong ol kworom oli mit tugeta blong mekem hemia i posibol.

Evri adalt we oli wok wetem ol yut i mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org). Oli ripitim trening ia evri tri yia afta long hemia.

Blong kasem moa infomesen long wei we ol gaedlaen ia oli blong ol givhan kompanion, luk long 21.2.2.

10.8.2

Ol Yang Man we Oli Gat Disabiliti

Ol lida blong kworom oli givim spesel kea long ol yang man we oli gat disabiliti. Blong kasem moa infomesen abaot olsem wanem blong stap helpem ol yang man ia, luk long disability.ChurchofJesusChrist.org; luk tu long 38.8.27 insaed long hanbuk ia.

10.8.3

Ol Simbol blong Ol Pikinini mo Ol Yut

Ol yang man oli kasem ol simbol blong olgeta olsem pat blong program blong Ol Pikinini mo Ol Yut. Taem wan yang man i kam wan memba blong fas Aronik Prishud kworom, hem i kasem wan aedentiti simbol we i soem se hem i pat, we i kam long ol kworom lida blong hem. Mo tu, hem i kasem wan kopi blong smol buk ia Divelopmen blong Yuwan: Gaedbuk blong Ol Yut. Hemia oli save mekem taem ol lida blong kworom oli mit wetem hem blong welkamem hem i kam insaed long kworom. Oli save mekem tu long wan yia miting blong ol yut mo papa mo mama blong olgeta (luk long 10.2.1.3).

Long Jenuware blong yia ia we wan yang man i kasem 18 yia, hem i kasem wan moa aedentiti simbol.

Ol yang man oli save winim wan medol blong ajivmen taem oli traehad blong kam moa olsem Sevya.

Blong gat moa infomesen long saed blong ol simbol ia, luk long ChildrenandYouth.ChurchofJesusChrist.org.

10.8.4

Stap Kolektem Ol Fast Ofring

Long ples we ol memba long wod oli stap laef kolkolosap long olgeta, bisop i save askem olgeta we oli holem Aronik Prishud, blong oli visitim ol memba, long evri manis, mo stap invaetem olgeta blong givim samting i go long fas ofring. Taem hem i mekem desisen ia, bisop i tingting long namba blong olgeta we oli holem Aronik Prishud i stap, we oli fri, sefti blong olgeta, mo blesing blong ol memba we bae oli no save givim samting long nara wei (luk long 34.3.2).

Olgeta we oli holem prishud ia, oli go tutu taem oli go tekem ol fas ofring. Olgeta we oli stap kolektem ol fast ofring, oli givim olgeta kwiktaem i go long wan memba blong bisoprik.

Ol memba oli no mas givim ol nara kontribusen, olsem taeting, long olgeta we oli stap karem ol fas ofring.