13.

Sunday School

13.1

Katuyoan

Ang Sunday School magtabang nga matuman ang buhat sa Dios sa kaluwasan ug kahimayaan. Naghimo kini niini pinaagi sa pagtabang sa mga anak sa Dios nga makat-on ug mosunod sa ebanghelyo ni Jesukristo. Ang mga lider, mga magtutudlo, ug mga klase sa Sunday School:

• Molig-on sa hugot nga pagtuo diha sa Langitnong Amahan ug ni Jesukristo pinaagi sa pagtudlo “sa doktrina sa gingharian” (Doktrina ug mga Pakigsaad 88:77).

• Mosuporta sa nakasentro sa panimalay ug gisuportahan sa Simbahan nga pagkat-on ug pagtudlo sa ebanghelyo.

• Motabang sa mga miyembro sa pagtudlo sumala sa pamaagi sa Manluluwas.

13.2

Pagpangulo sa Sunday School sa Ward

13.2.1

Bishopric

Ang bishopric modumala sa Sunday School. Sa kasagaran ang bishop mosangon sa usa sa iyang mga magtatambag sa pagtuman niini nga responsibilidad ubos sa iyang direksyon.

Kining gisangonan nga magtatambag makigmiting sa presidente sa Sunday School kanunay. Sila magtinambagay mahitungod sa mga panginahanglan sa Sunday School, kon sa unsang paagi nga kini nakatuman sa katuyoan niini, ug sa mga responsibilidad nga gilatid diha sa 13.2.2.2.

13.2.2

Presidente sa Sunday School

13.2.2.1

Pagtawag og Presidente sa Sunday School

Ang bishop motawag ug mo-set apart og usa ka naghupot sa Melchizedek nga Pagkapari nga mahimong presidente sa Sunday School. Sila maghisgot kon motawag ba og mga magtatambag. Kon ang mga magtatambag gikinahanglan, ug kon adunay igong mga lalaki nga moserbisyo niini nga mga posisyon, ang presidente sa Sunday School mahimong morekomendar og usa o duha ka magtatambag. Kon ang bishopric motugot, ang usa ka sakop sa bishopric motawag kanila.

Ang usa ka sakop sa bishopric mopresentar sa mga sakop sa kapangulohan sa Sunday School diha sa panagtigom alang sa sakramento aron paluyohan sa mga miyembro sa ward. Ang usa ka sakop sa bishopric mo-set apart usab kanila.

Sa usa ka dako nga ward, ang bishopric mahimong motawag ug mo-set apart og usa ka lalaki nga mahimong secretary sa Sunday School. Ang presidente sa Sunday School mahimong morekomendar kinsa ang tawagon. Ang secretary makatabang sa kapangulohan sa pagsubay sa mga buluhaton o sa nanambong, kon gikinahanglan.

13.2.2.2

Mga Responsibilidad

Ang presidente sa Sunday School aduna sa mosunod nga mga responsibilidad. Kon siya adunay mga magtatambag, sila moabag kaniya.

• Moserbisyo diha sa konseho sa ward. Siya moserbisyo isip (1) usa ka sakop sa konseho kinsa motabang sa pagtubag sa mga panginahanglan sa ward ug mangita og mga kasulbaran ug (2) usa ka representante sa Sunday School (tan-awa sa 29.2.5).

• Sila modumala sa mga paningkamot sa pagpalambo sa pagkat-on ug pagtudlo sa ebanghelyo diha sa panimalay ug sa simbahan.

• Moorganisar sa mga klase sa Sunday School, uban sa pagtugot sa bishopric (tan-awa sa 13.3). Morekomendar ngadto sa bishopric og hamtong nga mga miyembro nga moserbisyo isip mga magtutudlo sa Sunday School.

• Mosuporta, moawhag, ug motudlo sa mga magtutudlo sa Sunday School. Motabang kanila nga mahimong mas epektibo nga mga magtutudlo sa ebanghelyo pinaagi sa pagsunod sa mga baroganan sa mga kasulatan ug sa Pagtudlo sumala sa Pamaagi sa Manluluwas. Moawhag nila sa pagtuon sa Pagtudlo sumala sa Pamaagi sa Manluluwas.

• Mangulo sa mga miting sa konseho sa magtutudlo sumala sa giya sa bishop (tan-awa sa Pagtudlo sumala sa Pamaagi sa Manluluwas, 38–39).

• Moawhag sa mga magtutudlo nga mangita sa mga miyembro nga dili motambong og mga klase.

• Makigtambayayong sa mga magtutudlo sa pagtipig og mga rekord sa nanambong. I-report ang nanambong matag tulo ka bulan ngadto sa klerk sa ward o diha sa LCR o sa Member Tools. Ang secretary, kon adunay natawag, makatabang niini nga responsibilidad.

13.2.3

Mga Magtutudlo sa Sunday School

Ang presidente sa Sunday School mahimong morekomendar og mga miyembro nga moserbisyo isip mga magtutudlo sa Sunday School. Kon aprobahan sa bishopric, ang usa ka sakop sa bishopric motawag nila, mopresentar nila diha sa panagtigom alang sa sakramento aron paluyohan sa mga miyembro sa ward, ug mo-set apart nila.

Ang mga magtutudlo sa Sunday School makig-ila-ila sa mga sakop sa klase, lakip niadtong kinsa dili motambong og mga klase. Ang mga magtutudlo mosuporta sa mga miyembro sa ilang mga paningkamot sa pagkat-on ug pagtuman sa ebanghelyo ni Jesukristo.

Sa pag-andam sa pagtudlo, ang mga magtutudlo sa Sunday School mogamit sa mga kasulatan ug sa Dali, Sunod Kanako. Sila mosunod sa mga baroganan sa Pagtudlo sumala sa Pamaagi sa Manluluwas ug sa kapitulo 17 niini nga tamdanan nga basahon.

Ang mga magtutudlo sa Sunday School motambong sa matag tulo ka bulan nga mga miting sa konseho sa magtutudlo (tan-awa sa 17.4).

13.3

Mga Klase sa Sunday School

Ang mga klase sa Sunday School ipahigayon sa una ug ikatulong mga Dominggo sa bulan. Kini molungtad og 50 ka minuto. Ang mga klase sugdan ug taposon pinaagi sa pag-ampo.

Uban sa pagtugot sa bishopric, ang presidente sa Sunday School moorganisar og mga klase alang sa mga hamtong ug kabatan-onan. Kon siya adunay mga magtatambag, sila moabag kaniya.

Ang gidaghanon sa mga klase magdepende kon (1) pila ka miyembro ang anaa sa ward ug (2) sa gidaghanon ug gidak-on sa mga kwarto nga magamit. Kasagaran, ang gagmay nga mga klase mas makapasayon sa mas daghang tawo nga aktibong moapil ug magkat-on. Ang konseho sa ward makatabang sa presidente sa Sunday School sa paghukom pila ka klase sa Sunday School ang i-organisar.

Ang mga batan-ong lalaki ug mga batan-ong babaye sa kasagaran magsugod sa pagtambong og mga klase sa Sunday School sa kabatan-onan sugod sa tuig nga sila mag-edad og 12. Sila mahimong magsugod sa pagtambong sa klase sa hamtong kon sila mag-edad na og 18.

Ang presidente sa Sunday School mo-organisar og daghang mga klase sa kabatan-onan sumala sa gikinahanglan. Ang kabatan-onan kinahanglang ibutang ngadto sa mga klase sumala sa ilang edad. Kon adunay pipila lang ka batan-on sa usa ka grupo sa kaedad, sila mahimong tip[o]non sa usa ka klase uban sa susama nga grupo sa kaedad. Sila magpabilin nianang sama nga klase hangtod sa Enero sa sunod tuig.

Dili mominos sa duha ka responsable nga mga hamtong ang anaa sa matag klase sa kabatan-onan. Ang mga hamtong mahimong duha ka lalaki, duha ka babaye, o minyo nga magtiayon. Aron matuman kini nga kinahanglanon, ang mga klase kinahanglan nga tipunon.

Ang tanang hamtong nga naglihok uban sa kabatan-onan kinahanglang mokompleto sa pagbansay sa pagpanalipod sa kabataan ug kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Sila mosubli sa pagbansay matag tulo ka tuig human niana.

13.3.1

Gamay nga mga Branch

Sa usa ka gamay nga branch, ang presidente sa Sunday School tingali mao lamang ang lider ug magtutudlo sa Sunday School. Siya motudlo og klase sa Sunday School alang sa tanang kabatan-onan ug mga hamtong diha sa branch.

13.3.2

Ang mga Klase sa Sunday School alang sa Piho nga mga Grupo

Kon gikinahanglan, ang presidente sa Sunday School mahimong moorganisar og mga klase sa Sunday School alang sa piho nga mga grupo. Ang kurikulom alang niini nga mga klase mao ang Dali, Sunod Kanako.

Ang mga grupo nga makabenepisyo gikan sa ilang kaugalingong klase sa Sunday School maglakip sa:

• Mga young single adult.

• Mga miyembro kinsa dili makasulti sa nag-unang pinulongan sa ward.

• Bag-ong mga miyembro, mibalik nga mga miyembro, ug kadtong kinsa nagkat-on mahitungod sa Simbahan.

• Ubang mga grupo sumala sa gipahibalo sa bishop.

13.4

Pagpalambo sa Pagkat-on ug Pagtudlo diha sa Ward

Ang mga lider sa ward mao ang responsable sa pagpalambo sa pagkat-on ug pagtudlo diha sa ilang mga organisasyon. Naglakip kini sa pagtudlo sa bag-ong gitawag nga mga magtutudlo (tan-awa sa Pagtudlo sumala sa Pamaagi sa Manluluwas, 40). Sila makapangayo og tabang sa presidente sa Sunday School sa ward kon gikinahanglan.

Ang mga miting sa konseho sa magtutudlo himoon matag tulo ka bulan atol sa 50 minutos nga panahon sa klase sa Dominggo (tan-awa sa 17.4). Ang ilang katuyoan mao ang pagtabang sa pagpalambo sa pagkat-on ug pagtudlo. Ang Pagtudlo sumala sa Pamaagi sa Manluluwas mao ang importante nga kapanguhaan alang niini nga mga miting.

Ang konseho sa ward modumala ug moeskedyul sa mga miting sa konseho sa magtutudlo. Usa ka sakop sa kapangulohan sa Sunday School kasagaran maoy mangulo sa mga miting. Hinoon, ang bishopric mahimong mohangyo og laing miyembro sa pagpangulo niini.

Alang sa dugang nga impormasyon, tan-awa sa “Alang sa mga Lider—Pagtabang sa mga Magtutudlo nga Molampos” diha sa Pagtudlo sumala sa Pamaagi sa Manluluwas (mga pahina 38–40).

13.5

Pagpalambo sa Pagkat-on ug Pagtudlo diha sa Panimalay

Ang mga ginikanan mao ang responsable alang sa pagtudlo sa ebanghelyo ngadto sa ilang mga anak.

Ang konseho sa ward mahimong moorganisar og mga miting sa konseho sa magtutudlo alang sa mga ginikanan atol sa 50 ka minuto nga oras sa klase sa Dominggo. Kini nga mga miting pasiugdahan sa usa ka sakop sa kapangulohan sa Sunday School o laing tawo nga gisangonan sa bishopric. Ang Pagtudlo sumala sa Pamaagi sa Manluluwas mao ang importante nga kapanguhaan alang niini nga mga miting.

Alang sa dugang nga impormasyon mahitungod sa mga miting sa konseho sa magtutudlo alang sa mga ginikanan, tan-awa sa 17.5.

13.6

Mga Lider sa Sunday School sa Stake

Ang presidente sa stake mosangon sa usa sa iyang mga magtatambag sa pagdumala sa Sunday School sa stake. Siya usab motawag ug mo-set-apart og usa ka high councilor nga mamahimong presidente sa Sunday School sa stake.

Ang mga responsibilidad sa presidente sa Sunday School gilatid diha sa 6.7.1 ug 6.7.3. Kon ang mga magtatambag gitawag, sila moabag kaniya.

13.7

Dugang nga mga Lagda

13.7.1

Mga Miyembro nga adunay mga Kakulangan

Ang mga magtutudlo sa Sunday School mohatag og espesyal nga pag-atiman ngadto sa mga sakop sa klase kinsa adunay mga kakulangan. Alang sa impormasyon mahitungod sa pagtudlo sa mga miyembro kinsa adunay mga kakulangan, tan-awa sa disability.ChurchofJesusChrist.org; tan-awa usab sa 38.8.27 niini nga tamdanan nga basahon.

13.7.2

Sentro sa Kapanguhaan [Resource Center]

Ang pipila ka meetinghouse adunay sentro sa kapanguhaan (librarya) aron sa pagtabang sa mga miyembro nga makat-on ug makatudlo sa ebanghelyo. Ang presidente sa Sunday School sa ward modumala sa sentro sa kapanguhaan. Ang mga ward nga parehong naggamit sa usa ka meetinghouse makagamit usab sa sentro sa kapanguhaan. Ang mga klase sa seminary ug institute ug mga sentro sa FamilySearch makapagamit sa sentro sa kapanguhaan ngadto sa mga ward.

Sa mga meetinghouse nga adunay sentro sa kapanguhaan, ang bishopric motawag og espesyalista sa sentro sa kapanguhaan. Ang presidente sa Sunday School mahimong morekomendar kon kinsa ang tawagon. O ang bishopric mahimong mohangyo sa usa ka sakop sa kapangulohan sa Sunday School nga maoy mahimong espesyalista. Kini nga tawo:

• Moorganisar ug moatiman sa mga kapanguhaan.

• Motabang sa mga lider, mga magtutudlo, ug sa ubang mga miyembro nga makakuha ug makagamit niini nga mga kapanguhaan.

Ang presidente sa Sunday School mokonsulta sa espesyalista sa sentro sa kapanguhaan sa pagtino kon magkinahanglan ba og tinuig nga badyet alang sa sentro sa kapanguhaan. Siya dayon mohimo og rekomendasyon ngadto sa bishopric.

Ang espesyalista sa sentro sa kapanguhaan kinahanglang motambong kanunay sa tigom alang sa sakramento matag semana ug sa ubang mga miting sa Dominggo. Kon gikinahanglan, ang bishopric mahimong motawag og kaabag ngadto sa espesyalista.

Alang sa dugang nga impormasyon, tan-awa sa “Resource Centers” sa ChurchofJesusChrist.org.