Alang sa mga Lider—Pagtabang sa mga Magtutudlo nga Molampos

Tinagsa-tagsa nga mga Pakigsinultihay

Kasagaran ang labing maayo nga paagi sa pagtubag sa talagsaong mga panginahanglan sa mga magtutudlo mao ang pinaagi sa tinagsa-tagsa nga mga pakigsinultihay. Sama pananglitan, isip usa ka lider, kamo makahimo og usa ka daklit nga panaghisgotan uban sa usa ka magtutudlo sa dili pa o sa human sa klase sa paghisgot sa mga baroganan sa Pagtudlo Sumala sa Pamaagi sa Manluluwas. Kamo makapangandam alang niini nga panaghisgotan pinaagi sa pagtan-aw sa magtutudlo nga nagtudlo. Paningkamot sa pagsabot og mas maayo sa mga kalig-on sa magtutudlo ug sa pagdiskobre og mga paagi nga kamo makatanyag og suporta.

Ang pagtukod diha sa mga kalig-on sa magtutudlo sama ka importante sa pag-ila sa mga oportunidad alang sa pagpalambo. Kini makatabang sa pagsugod sa mga panaghisgotan uban sa mga magtutudlo pinaagi sa paghangyo kanila sa paghunahuna alang sa ilang mga kaugalingon kon unsa ang maayong dagan ug asa sila mibati nga makahimo og pag-uswag.

Samtang kamo makigkita sa mga magtutudlo, paghunahuna og mga paagi sa paglig-on kanila ug pag-awhag kanila uban ang kaluoy ug pasalamat alang sa serbisyo nga ilang gihatag.

Mga Miting sa Konseho sa Magtutudlo

Ang matag ward kinahanglang mopahigayon og mga miting sa konseho sa magtutudlo kada tulo ka bulan diin ang mga magtutudlo magkatinambagay mahitungod sa mga baroganan sa Kristohanong pagtudlo. Ang mga miting sa konseho sa magtutudlo mahimo usab nga ipahigayon alang sa mga ginikanan (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 13.5, ChurchofJesusChrist.org).

Kanus-a Kinahanglan Ipahigayon Kini nga mga Miting?

Ang mga miting sa konseho sa magtutudlo ipahigayon atol sa 50-minutos nga panahon sa klase sa Dominggo.

• Ang mga magtutudlo sa Pagkapari, Relief Society, ug Young Women mahimong makatambong bisan hain sa una o ikatulo nga Dominggo, sumala sa pagtino sa lokal nga mga lider.

• Ang mga magtutudlo sa Sunday School mahimong makatambong bisan hain sa ikaduha o ikaupat nga Dominggo, sumala sa pagtino sa lokal nga mga lider.

• Ang mga magtutudlo sa Primary mahimong makatambong sa bisan hain nga Dominggo, sumala sa pagtino sa mga kapangulohan sa Primary ug sa Sunday School sa ward. Kon gitinguha, ang mga magtutudlo sa Primary mahimong maglain og miting gikan sa ubang mga magtutudlo aron sa pagtambag mahitungod sa talagsaon nga mga aspeto sa pagtudlo sa kabataan. Kini mahitabo atol sa 20-minutos nga panahon sa pag-awit, sa wala pa o human sa regular nga mga miting sa Dominggo, o sa ubang adlaw sa semana. Sobra sa usa ka miting sa konseho sa magtutudlo ang mahimong ipahigayon kada tulo ka bulan alang sa mga magtutudlo sa Primary aron tanan sila dili ma-absent sa mga klase sa Primary sa samang semana. (Pahinumdom: Ingon nga gikinahanglan, ang kapangulohan sa Primary motudlo og puli nga mga magtutudlo, mohiusa sa mga klase, o mohimo og laing mga paghan-ay aron matugotan ang mga magtutudlo sa Primary sa pagtambong sa mga miting sa konseho sa magtutudlo.)

• Ang mga miting sa konseho sa magtutudlo alang sa mga ginikanan mahimong ikapahigayon sa bisan hain nga Dominggo ingon sa pagtino sa konseho sa ward.

Kinsa ang Kinahanglang Motambong?

Ang tanan kinsa nagtudlo og usa ka korum o klase sa ward kinahanglang motambong, uban sa labing minos usa sa mga lider sa pagkapari o organisasyon nga may responsibilidad niadto nga mga korum o mga klase. Kon gikinahanglan, ang mga partisipante mahimong bahinon ngadto sa mga grupo sumala sa mga panginahanglan niadtong ilang gitudloan. Sama pananglitan, ang mga magtutudlo sa kabatan-onan o sa mga kabataan mahimong makapahimulos gikan sa paglahi og miting sa usa ka higayon aron sa paghisgot og piho nga mga isyu nga may kalabotan sa pagtudlo sa kabatan-onan o sa kabataan.

Sa mga miting sa konseho sa magtutudlo alang sa mga ginikanan, ang konseho sa ward magtino kon dapiton ba ang piho nga mga ginikanan o himoon ang pagtambong nga abli ngadto sa tanan kinsa gusto nga moapil.

Kinsa ang Mangulo Niini nga mga Miting?

Ang konseho sa ward, uban sa tabang sa kapangulohan sa Sunday School, magdumala sa mga miting sa konseho sa magtutudlo. Magtinambagay sila mahitungod sa mga panginahanglan sa mga magtutudlo ug sa mga tigkat-on pinasikad sa unsay ilang na-obserbahan sa mga klase ug sa mga miting. Mag-uban sila sa pagtrabaho sa pagtino hain nga mga baroganan ug mga pagbansay gikan sa Pagtudlo Sumala sa Pamaagi sa Manluluwas ang labing motubag sa mga panginahanglan nga ilang naila.

Kasagaran, usa ka sakop sa kapangulohan sa Sunday School mangulo sa mga miting sa konseho sa magtutudlo. Hinoon, ang ubang mga sakop sa ward mahimong itudlo sa pagpangulo usahay sa mga miting. Ang mga kapangulohan sa korum ug organisasyon molig-on ngadto sa ilang mga magtutudlo sa mga baroganan ug mga pagbansay nga gihisgotan diha sa miting.

Unsay Kinahanglang Mahitabo sa Miting sa Konseho sa Magtutudlo?

Ang miting sa konseho sa magtutudlo kinahanglang mosunod niini nga pamaagi:

• Pagpakigbahin ug pagtinambagay sa usag usa. Dapita ang mga magtutudlo sa pagpakigbahin og bag-ong mga kasinatian sa pagtudlo, pagpangutana nga may kalabotan sa pagtudlo, ug sa pagpakigbahin og mga ideya sa pagbuntog sa mga hagit. Kini nga bahin sa miting mahimong maglakip og rebyo sa mga baroganan nga gihisgotan sa miaging mga miting.

• Pagkat-on og dungan. Dapita ang mga magtutudlo sa paghisgot og usa sa mosunod nga mga baroganan nga gipresentar dinhi niini nga kapanguhaan: tutoki si Jesukristo, higugmaa kadtong imong gitudloan: pagtudlo pinaagi sa Espiritu, itudlo ang doktrina ug pagdapit og makugihon nga pagkat-on. Ang mga baroganan mahimong hisgotan sa bisan unsa nga han-ay, ug gawas kon pagbuot sa konseho sa ward, ang mga partisipante sa miting mahimong mopili sa sunod nga baroganan nga pagahisgotan. Mahimong makagahin kamo og labaw sa usa ka miting sa usa ka baroganan kon gikinahanglan.

• Pagplano ug pagdapit. Tabangi ang mga magtutdlo sa pagplano kon unsaon nila sa paggamit ang baroganan nga ilang gihisgotan. Ingon nga angay, kamo makapraktis usab og dungan sa usa ka kahanas nga inyong nahisgotan. Dapita sila sa pagrekord ug pagbuhat sa bisan unsang mga panghunahuna nga ilang madawat mahitungod kon unsaon paggamit sa baroganan diha sa ilang pagtudlo—lakip sa ilang mga paningkamot sa pagtudlo diha sa ilang mga panimalay. Awhaga sila sa pagsugod sa pagtuon sa sunod nga baroganan nga pagahisgotan.

Kutob sa mahimo, ang mga miting sa konseho sa magtutudlo kinahanglang mopakita og panig-ingnan sa mga baroganan nga gihisgotan.

Ang mga miting sa konseho sa magtutudlo makatabang sa mga magtutudlo nga mas makasabot ug makagamit sa mga baroganan sa Kristohanong pagtudlo.

Pagpasinati sa Bag-ong Natawag nga mga Magtutudlo

Isip usa ka lider, kamo adunay responsibilidad nga “makigtagbo sa bag-ong natawag nga mga magtutudlo” sa inyong organisasyon ug “motabang kanila sa pag-andam sa ilang mga calling” (Kinatibuk-ang Tamdanan, 17.3, ChurchofJesusChrist.org). Kini nga mga miting mga oportunidad sa pagpaila sa bag-ong mga magtutudlo ngadto sa ilang sagradong mga calling ug sa pagdasig kanila uban sa usa ka panglantaw kon unsay ipasabot sa pagtudlo sumala sa pamaagi sa Manluluwas. Isip usa ka lider, makatabang kamo sa bag-ong mga magtutudlo nga mangandam sa pagserbisyo pinaagi sa pagbuhat sa mosunod:

• Pagpahayag og pagsalig nga ang Manluluwas motabang kanila sa ilang calling (tan-awa sa Doktrina ug mga Pakigsaad 88:78).

• Paghatag sa bag-ong mga magtutudlo og kopya niini nga kapanguhaan ug pag-awhag kanila sa pagpangita og mga paagi sa paggamit sa mga baroganan niini diha sa ilang pagtudlo.

• Pakigbahin ngadto sa bag-ong mga magtutudlo og bisan unsa nga mahitungod sa inyong organisasyon nga makatabang kanila nga mahibaloan.

• Ingon nga gikinahanglan, pakigsulti sa bag-ong mga magtutudlo hain nga kwarto magklase ug sa unsa nga leksiyon magsugod. Paghatag og bisan unsang impormasyon nga ilang gikinahanglan mahitungod sa ilang klase ug sa mga sakop sa klase.

• Pagpasabot ngadto sa bag-ong mga magtutudlo nga kamo makatabang kanila sa ilang calling. Pagtanyag og suporta diha sa klasehanan ug sa paggamit sa mga kapanguhaan sa pagtudlo kon gikinahanglan.

• Pagtanyag nga mo-obserba usahay sa mga klase sa mga magtutudlo, ug mohatag og feedback ingon nga giaghat sa Espiritu.

• Pagdapit sa mga magtutudlo sa pag-apil sa matag tulo ka bulan nga mga miting sa konseho sa magtutudlo.