“Tabangi ang mga Estudyante sa Pagduol ngadto ni Jesukristo,” Pagtudlo Sumala sa Pamaagi sa Manluluwas: Alang sa Tanan Kinsa Nagtudlo diha sa Panimalay ug diha sa Simbahan (2022)
Tabangi ang mga Estudyante sa Pagduol ngadto ni Jesukristo,” Pagtudlo Sumala sa Pamaagi sa Manluluwas
Isip mga magtutudlo sa ebanghelyo ni Jesukristo, kita nagtabang sa uban sa pagsabot ug sa pagsalig diha sa Iyang mga pagtulun-an, gahom ug gugma.
Tabangi ang mga Estudyante sa Pagduol ngadto ni Jesukristo
Kamo walay mabuhat isip usa ka magtutudlo nga mopanalangin sa mga estudyante labaw kay sa pagtabang kanila nga makaila sa Langitnong Amahan ug ni Jesukristo ug mobati sa Ilang gugma (tan-awa sa Juan 17:3). Paghunahuna og mga kasinatian nga nagtabang kaninyo nga makaila ug mahigugma sa Langitnong Amahan ug ni Jesukristo. Unsa ang inyong gihimo sa pagkat-on mahitungod sa Ilang mga hiyas, gahom, ug gugma? Sa unsang paagi nga ang inyong gugma alang sa Langitnong Amahan ug ni Jesukristo magdala kaninyo og hingpit nga kalipay? Dayon hunahunaa kon unsay mabuhat sa Ilang gugma ug gahom alang sa matag tawo nga inyong tudloan. (Tan-awa sa Alma 26:16; Moises 5:11.)
Ang atong kataposang tumong niini nga kinabuhi mao ang mahimong mas mahisama sa atong Langitnong Amahan ug mobalik ngadto Kaniya. Ang pamaagi nga atong matuman kana nga tumong mao ang pagduol ngadto ni Jesukristo (tan-awa sa Juan 14:6). Kini mao ngano, ingon nga gitudlo ni propeta Nephi, “kami naghisgot mahitungod ni Kristo, kami nalipay diha kang Kristo” (2 Nephi 25:26).
Ang matag anak sa Dios nagkinahanglan sa kahayag ug kamatuoran nga nagagikan sa Manluluwas ug makapili sa pagtubag ngadto niini. Ang pagkamahimong usa ka magtutudlo sa ebanghelyo ni Jesukristo nagpasabot og pagtabang sa uban nga masabtan ug masaligan ang Iyang mga pagtulon-an, matubsanong gahom, ug hingpit nga gugma. Hunahunaa sa unsang paagi ang mosunod nga mga ideya makatabang kaninyo sa pagdasig sa uban nga mas makaila ni Jesukristo ug makasunod Kaniya.
Tabangi ang mga Estudyante sa Pag-ila sa Gugma, Gahom, ug Kaluoy sa Ginoo diha sa Ilang mga Kinabuhi
Kini maayo nga mahibalo mahitungod sa gugma, gahom, ug kaluoy, sa Manluluwas, apan kita nagkinahanglan usab sa pagsinati niini. Nahibalo kon sa unsa nga paagi Siya mipanalangin ug miayo sa mga tawo diha sa mga kasulatan nagtabang kanato sa pagpalambo og mas dakong hugot nga pagtuo nga Siya makapanalangin ug makaayo kanato. Sama pananglitan, ang pagkat-on mahitungod sa mga kasinatian ni Daniel kulang kon kini dili modasig kanato sa pagsalig sa Ginoo kon nagsinati kita sa atong pasumbingay nga kaugalingong langob sa mga leon.
Samtang kamo nagtabang sa mga estudyante sa pag-ila sa “malumo nga mga kaluoy” (1 Nephi 1:20), diha sa mga kasulatan ug diha sa ilang kaugalingong mga kasinatian, sila mobati ug mahibalo nga ang Ginoo nagauban kanila ug mahigugmaong mobarog uban kanila (tan-awa sa Doktrina ug mga Pakigsaad 68:6). Ilang makita ug mabati ang pagkatinuod sa gugma ug kaluoy sa Ginoo diha sa ilang personal nga mga panginahanglan ug mga kahimtang.
Makatabang ang mga magtutudlo sa mga estudyante sa pagsinati sa gugma, gahom, ug kaluoy sa Manluluwas.
Tabangi ang mga Estudyante sa Paglig-on sa Ilang Relasyon ngadto sa Langitnong Amahan ug ni Jesukristo
Ang katuyoan sa pagtudlo ug pagkat-on mahitungod ni Jesukristo mao ang pagtabang sa matag tawo nga mas mapaduol ngadto Kaniya ug sa atong Langitnong Amahan. Tabangi ang mga tawo nga inyong tudloan sa dili gayod pagkalimot niana nga katuyoan. Awhaga sila sa paglig-on sa ilang relasyon ngadto sa Langitnong Amahan ug ni Jesukristo pinaagi sa pagtuon sa mga kasulatan, paghinulsol sa kanunay, pakigsulti sa Amahan diha sa pag-ampo, ug sa pagpamatuod kabahin sa Amahan ug sa Anak. Tudloi ang mga estudyante pinaagi sa pulong ug panig-ingnan kon sa unsang paagi ang paghimo ug pagsunod sa mga pakigsaad magbugkos kanato ngadto Kanila. Tabangi sila nga mahibalo kon unsa kita ka bililhon ug ka pinalangga ngadto Kanila. Lig-ona ang ilang hugot nga pagtuo nga si Jesukristo, pinaagi sa gahom sa Iyang hingpit nga Pag-ula, mao lamang ang dalan balik ngadto sa atong Amahan. Paghatag og mga oportunidad alang sa mga estudyante sa pagdawat og saksi gikan sa Espiritu Santo, “diin nagpamatuod sa Amahan ug sa Anak” (Moises 5:9).
Tabangi ang mga Estudyante nga Tuyoong Maningkamot nga Mahimong Mas mahisama ni Jesukristo
Sa kataposan, ang pagkat-on mahitungod ni Jesukristo nagdasig kanato nga mahimong mas mahisama Kaniya. Apan ang mahimong sama Kaniya mahitabo lamang samtang kita maglihok diha sa hugot nga pagtuo, sa sulod ug sa gawas sa klase, naghimo og tinuyoang mga pagpili sa pagsunod sa Iyang ehemplo ug sa pagdawat sa Iyang grasya. Dapita ang mga estudyante sa pagpaningkamot sa tabang sa Espiritu Santo sa pag-ila sa mga pamaagi nga sila mahimong mas mahisama sa Manluluwas. Pagtanyag og giya ug suporta samtang ang mga estudyante naghimo og paningkamot nga mahimong sama Kaniya nga usa ka tibuok kinabuhing paninguha.
Gitudlo ni Jacob nga ang “tanan nga mga butang diin gikahatag sa Dios gikan sa sinugdanan sa kalibotan” makatudlo kanato mahitungod ni Jesukristo (2 Nephi 11:4). Ang inyong pagtudlo mahimong usa niadtong mga butanga. Ibutang si Jesukristo diha sa sentro sa matag pagtudlo ug kasinatian sa pagkat-on. Samtang kamo ug ang mga estudyante “naghisgot mahitungod ni Kristo, … nalipay diha ni Kristo, … nagsangyaw mahitungod ni Kristo” (2 Nephi 25:26), ang Espiritu Santo makatanom og lawom sa usa ka saksi sa Manluluwas diha sa hunahuna ug kasingkasing sa matag tawo. Samtang kamo nagtabang sa inyong mga estudyante nga moabot sa pagkaila sa Langitnong Amahan ug ni Jesukristo alang sa ilang mga kaugalingon, sila mahimong mas may kalagmitan nga moduol ngadto Kanila alang sa panabang, paglaom, ug pagkaayo sa tibuok nila nga mga kinabuhi.