Itudlo ang Doktrina

Bisan og si Jesus mitubo sa kaalam ug kahibalo sa tibuok Niyang kinabuhi, Siya wala ma-edukar sa pormal nga paagi sama sa ubang relihiyosong mga lider sa Iyang panahon. Ug gani kon Siya mitudlo, ang mga tawo nahibulong, nag-ingon, “Naunsa bang may hingkat-onan man kining tawhana nga wala man unta siya maka-eskwela?” Nganong ang Iyang mga gitudlo hilabihan ka gamhanan? “Ang doktrina dili akong kaugalingon,” ang Manluluwas mipasabot, “kon dili iya sa nagpadala kanako” (Juan 7:15–16). Ang dokrina usa ka mahangtorong kamatuoran—makaplagan diha sa mga kasulatan ug sa mga pulong sa mga propeta sa ulahing mga adlaw—nga nagpakita kanato sa paagi nga mahimong sama sa atong Amahan sa Langit ug mobalik ngadto Kaniya. Bisan unsa ka kasinati isip usa ka magtutudlo, makatudlo ka uban sa gahom, sama sa gibuhat sa Manluluwas, pinaagi sa pagtudlo sa doktrina sa Amahan. Ikaw ug kadtong imong tudloan mahibulong sa mga panalangin nga gipadala sa Dios kon ang inyong pagtudlo ug pagkat-on gipasikad diha sa Iyang pulong.

Sa Pagtudlo sa Doktrina

• Pagkat-on sa doktrina ni Jesukristo alang sa imong kaugalingon.

• Pagtudlo gikan sa mga kasulatan ug sa mga pulong sa mga propeta sa ulahing mga adlaw.

• Pagtabang sa mga tigkat-on sa pagpangita, pag-ila, ug pagsabot sa mga kamatuoran diha sa mga kasulatan.

• Pagtutok diha sa mga kamatuoran nga modala ngadto sa pagkakabig ug paglig-on sa hugot nga pagtuo diha ni Jesukristo.

• Pagtabang sa mga tigkat-on sa pagkaplag og personal nga kalabotan diha sa doktrina ni Jesukristo.

Mikat-on ang Manluluwas sa Doktrina

Kini ingon og tataw nga ang Manluluwas mikat-on gikan sa mga kasulatan sa Iyang kabatan-on samtang Siya mitubo sa “kaalam … ug sa kahimuot sa Dios” (Lucas 2:52). Ang Iyang lawom nga pagsabot sa doktrina sa Amahan nahimong klaro sa dihang nakaplagan Siya sa Iyang mga ginikanan didto sa templo sa batan-ong edad, nagtudlo sa Judeo nga mga magtutudlo ug nagtubag sa ilang mga pangutana (tan-awa sa Hubad ni Joseph Smith, Lucas 2:46 ). Wala madugay, sa dihang si Satanas mihatag kaniya og grabe nga tintasyon didto sa kamingawan, ang kahibalo ni Jesus sa doktrina diha sa mga kasulatan mitabang Kaniya sa pagsagubang sa tintasyon (tan-awa sa Lucas 4:3–12).

Ikaw usab makatinguha sa pagkat-on og tinuod nga doktrina sa labaw ka hingpit sa dili pa kamo magtudlo niini. Samtang ikaw nag-andam sa pagtudlo ug sa pagkat-on kauban sa uban, tan-awa sa mainampingong paagi ang unsay gisulti sa Ginoo mahitungod sa mga kamatuoran nga ikaw nagtudlo. Siksika ang mga kasulatan ug ang mga pulong sa buhing mga propeta alang sa pagpasabot ug pagtambag. Ang pagpuyo ug paggamit sa mga kamatuoran nga imong gitun-an modapit sa Espiritu sa pagtudlo kaninyo sa doktrina gani sa mas makahuloganon nga mga paagi ug sa pagmatuod sa kamatuoran sa doktrina diha sa mga kasingkasing niadtong imong tudloan.

Mga Pangutana nga Pamalandongan: Nganong importante ang pagsabot sa mga kamatuoran sa ebanghelyo alang sa imong kaugalingon? Giunsa nimo pag-angkon og mas hingpit nga pagsabot sa mga kamatuoran sa ebanghelyo? Unsa ang imong gibati nga nadasig sa pagbuhat sa pagpalambo sa imong pagtuon sa mga kasulatan ug sa mga pulong sa buhing mga propeta?

Gikan sa mga Kasulatan: Mga Proverbio 7:1–3; 2 Nephi 4:15–16; Doktrina ug mga Pakigsaad 11:21; 88:118

Ang Manluluwas Mitudlo gikan sa mga Kasulatan

Human sa kamatayon sa Manluluwas, duha sa Iyang mga disipulo naglakaw ug nagsultihanay nga may nasagol nga kasubo ug katingala diha sa ilang mga kasingkasing. Unsaon nila paghatag og katarongan sa unsay nahitabo pa lamang? Si Jesus nga Nazaretnon, ang tawo nga ilang gisaligan nga mahimo nilang Manunubos, namatay sulod sa tulo ka adlaw na karon. Ug unya dihay mga taho nga ang Iyang lubnganan walay sulod, uban sa mga anghel nga nagpahayag nga siya buhi! Diha niining importante nga higayon sa hugot nga pagtuo niini nga mga disipulo, usa ka estranghero mikuyog sa ilang panaw. Mihupay siya kanila pinaagi sa “[pag]patin-aw ngadto kanila sa mga butang diha sa mga kasulatan kalabot sa [Manluluwas].” Sa kadugayan, ang mga magpapanaw nakaamgo nga ang ilang magtutudlo mao si Jesukristo Mismo ug nga Siya sa pagkatinuod nabanhaw. Giunsa nila sa pag-ila Kaniya? “Dili ba ang atong mga kasingkasing nagdilaab man sa sulod nato,” sa kadugayan sila namalandong, samtang siya nagsulti kanato diha sa dalan, ug samtang nagsaysay siya kanato sa mga kasulatan?” (Lucas 24:27, 32).

Si Elder D. Todd Christofferson mitudlo, “Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo” (“Ang Panalangin sa Kasulatan,” Liahona, Mayo 2010, 34). Sa Iyang tibuok nga pangalagad, gigamit ni Jesus ang mga kasulatan sa pagtudlo, pagkorihir, ug pagdasig sa uban. Siguroha nga ang imong pagtudlo dili mapalayo gikan sa mga kasulatan ug sa mga pulong sa mga propeta. Samtang ikaw matinud-anong mosalig diha sa pulong sa Dios sa imong pagtudlo, ikaw makahimo alang sa uban kon unsa ang gibuhat sa Manluluwas. Ikaw makatabang kanila nga makaila Kaniya, tungod kay tanan kita nagkinahanglan sa atong hugot nga pagtuo diha sa Manluluwas nga malig-on sa kanunay. Ang imong gugma alang sa mga kasulatan mahimong klaro ngadto niadtong imong tudloan, ug ang imong pagtudlo modapit sa Espiritu sa paghimo sa ilang mga kasingkasing nga magdilaab uban sa pagpamatuod kabahin sa Amahan ug sa Anak.

Mga Pangutana nga Pamalandongan: Sa unsang paagi ka na-impluwensiya sa usa ka magtutudlo kinsa migamit sa mga kasulatan sa pagtabang kanimo nga makaila og mas maayo sa Manluluwas? Unsa ang mahimo nimong buhaton sa pagsalig pa diha sa mga kasulatan ug sa mga pulong sa mga propeta samtang ikaw nagtudlo? Unsaon nimo nga makatabang niadtong imong tudloan nga mahibalo ug mahigugma sa pulong sa Dios?

Gikan sa mga Kasulatan: Lucas 4:14–21; Alma 31:5; Helaman 3:29–30;3 Nephi 23

Gitabangan sa Manluluwas ang mga Tawo sa Pagtinguha, Pag-ila ug Pagsabot sa Kamatuoran

Usa ka batid sa balaod makausa nangutana ni Jesus, “Magtutudlo, unsa may akong buhaton aron makapanunod sa kinabuhing dayon?” Agi og tubag, ang Manluluwas migiya sa nangutana ngadto sa kasulatan: Unsa may nahisulat sa kasugoan? unsa may imong nabasa?” Kini migiya sa tawo dili lamang ngadto sa iyang tubag—“Higugmaa ang Ginoo nga imong Dios … ug ang imong silingan”—apan ngadto usab sa nagsunod nga pangutana: “Ug kinsa man ang akong silingan?” Ang Manluluwas mitubag niini nga pangutana uban sa usa ka sambingay mahitungod sa tulo ka mga tawo kinsa nakakita og usa ka isig magpapanaw nga nanginahanglan. Usa lamang sa tulo, usa ka Samarianhon, kinsa gikasilagan sa mga Judeo tungod lamang sa diin siya nagagikan, ang mihunong sa pagtabang. Dayon gidapit ni Jesus ang batid sa balaod nga tawo sa pagtubag sa iyang kaugalingong pangutana: “Hain man niining tutulo ang nagpakita nga silingan sa tawo?”(tan-awa sa Lucas 10:25–37).

Ngano sa imong hunahuna ang Manluluwas mitudlo niini nga paagi—nagtubag ngadto sa mga pangutana uban sa mga pagdapit sa pagsiksik, pamalandong, ug pagdiskobre? Kabahin sa tubag mao nga ang Ginoo naghatag og bili sa mga paninguha sa pagpangita sa kamatuoran. “Pangita ug kamo makakaplag,” Siya nagbalik-balik sa pagdapit (tan-awa , sama pananglitan sa Mateo 7:7; Lucas 11:9; Doktrina ug mga Pakigsaad 4:7). Nagganti Siya sa mga lihok sa hugot nga pagtuo ug pagpaubos sa tigpangita.

Sama sa Manluluwas, ikaw makatabang niadtong imong tudloan sa pag-ila ug pagsabot sa kamatuoran. Ang mga kasulatan, sama pananglitan, napuno sa mga kamatuoran sa ebanghelyo, apan usahay kini nagkinahanglan og tinuyo nga paninguha sa pagpangita niini. Samtang kamo nagkat-on og dungan gikan sa mga kasulatan, hunong ug pangutana niadtong imong tudloan kon unsa nga kamatuoran sa ebanghelyo ang ilang namatikdan. Tabangi sila sa pagkakita kon giunsa niini nga mga kamatuoran pagpakiglabot ngadto sa plano sa Langitnong Amahan sa kaluwasan. Usahay ang mahangtorong mga kamatuoran gipahayag diha sa mga kasulatan, ug usahay kini ilarawan diha sa mga istorya ug mga kinabuhi sa mga tawo nga atong gibasa. Kini makatabang usab ang pagsusi og dungan sa makasaysayanong kaagi sa mga bersikulo nga inyong gibasa, ingon man sa kahulogan sa mga bersikulo ug giunsa kini paggamit kanato karon.

Mga Pangutana nga Pamalandongan: Unsaon ninyo pag-ila ang mahangtorong mga kamatuoran diha sa mga kasulatan o sa mga pulong sa mga propeta? Giunsa niadto nga mga kamatuoran pagpanalangin sa inyong kinabuhi? Unsa ang pipila ka mga paagi nga kamo makatabang sa mga estudyante sa pag-ila ug pagsabot sa mga kamatuoran nga mahimong makahuloganon ngadto kanila ug magdala kanila nga mas maduol ngadto sa Dios?

Gikan sa mga Kasulatan: Juan 5:39; 1 Nephi 15:14; Doktrina ug mga Pakigsaad 42:12

Makatabang kita niadtong atong tudloan sa pagpangita ug pag-ila sa kamatuoran alang sa ilang mga kaugalingon.

Gitudlo sa Manluluwas ang mga Kamatuoran nga Naggiya ngadto sa Pagkakabig ug Paglig-on sa Hugot nga Pagtuo

Usa ka Igpapahulay nga Adlaw, ang Manluluwas ug ang Iyang mga disipulo, mibati og kagutom, miagi sa usa ka umahan ug misugod sa pagpangaon og lugas. Ang mga Pariseo, kanunay nga naghinamhinam sa paghatag og gibug-aton sa mas maayong mga punto sa balaod ni Moises, mipasabot nga ang pagpangutlo og mga lugas sa praktikal nga paghunahuna usa ka matang sa trabaho nga gidili sa Igpapahulay (tan-awa sa Marcos 2:23–24). Sa paggamit sa hugpong sa mga pulong ni propeta Jacob diha sa Basahon ni Mormon, ang mga Pariseo “nagtan-aw lapas sa tumong” (Jacob 4:14). Sa lain nga pagkasulti, sila hilabihan nga pagkatutok sa kinaraang mga paghubad sa mga sugo nga ilang nalaktawan ang balaang katuyoan niadto nga mga sugo—nga mas mapaduol kita ngadto sa Dios. Sa pagkatinuod, ang mga Pariseo wala gani makaamgo nga ang Usa kinsa mihatag sa sugo sa pagtahod sa Igpapahulay nagbarog sa ilang atubangan.

Migamit ang Manluluwas niini nga oportunidad sa pagpamatuod sa Iyang balaang pagkatawo ug sa pagtudlo ngano ang Igpapahulay importante. Kini gimugna alang kanato isip usa ka adlaw sa pagsimba sa Ginoo sa Igpapahulay, si Jesukristo Mismo (tan-awa sa Marcos 2:27–28). Ang ingon nga mga kamatuoran nagtabang kanato sa pagsabot nga ang mga sugo sa Dios labaw pa kay sa mahitungod lamang sa atong panggawas nga kinaiya. Kini gihimo sa pagtabang kanato sa pag-usab sa atong mga kasingkasing ug mahimong mas hingpit nga nakabig.

Sa paagi nga mabinantayon hunahunaa ang doktrina ug mga baroganan nga kamo nagdesisyon sa pagtutok. Samtang adunay daghang mga kamatuoran diha sa mga kasulatan nga mahisgotan, kini labing maayo ang pagtutok diha sa mga kamatuoran sa ebanghelyo nga modangat sa pagkakabig ug paglig-on sa hugot nga pagtuo diha ni Jesukristo. Ang yano, sukaranang mga kamatuoran nga gitudlo ug gipakita sa Manluluwas aduna sa labing dako nga gahom sa pag-usab sa atong mga kinabuhi—mga kamatuoran mahitungod sa Iyang Pag-ula, ang plano sa kaluwasan, ang mga sugo sa paghigugma sa Dios ug ang paghigugma sa atong silingan, ug uban pa. Dapita ang Espiritu sa pagsaksi niini nga mga kamatuoran, pagtabang niini nga motuhop og lawom ngadto sa mga kasingkasing niadtong imong tudloan.

Mga Pangutana nga Pamalandongan: Unsa ang pipila ka mga kamatuoran sa ebanghelyo ang nakatabang kanimo nga nahimong mas nakabig ngadto ni Jesukristo ug nagbaton og mas dakong hugot nga pagtuo diha Kaniya? Giunsa sa usa ka magtutudlo pagtabang kanimo sa pagtutok diha sa labing importanteng mga kamatuoran sa ebanghelyo? Unsa ang imong matudlo nga motabang sa uban mga mahimong mas lig-on ang pagkakabig ngadto ni Jesukristo?

Gikan sa mga Kasulatan: 2 Nephi 25:26; 3 Nephi 11:34–41; Doktrina ug mga Pakigsaad 19:31–32; 68:25–28; 133:57; Moises 6:57–62

Gitabangan sa Manluluwas ang mga Tawo sa Pagpangita og Personal nga Kalabotan diha sa Iyang Doktrina

“Kining tawhana nagaabiabi sa mga makasasala, ug nakigsalo kanila sa pagpangaon,” ang mga Pariseo mireklamo mahitungod ni Jesus—nagpasabot nga kini dili angay nga kinaiya alang sa usa ka espirituhanong magtutudlo (Lucas 15:2). Nakita ni Jesus nga kini oportunidad sa pagtudlo kanila og pipila ka lawom nga espirituhanong mga kamatuoran. Unsaon Niya sa paghimo niini? Unsaon Niya pagtabang sa mga Pariseo nga makakita nga ang ilang mga kasingkasing—dili ang Iya—ang dili putli ug nagkinahanlan og pagkaayo? Unsaon Niya paggamit ang Iyang doktrina sa pagpakita kanila nga ang ilang paghunahuna ug kinaiya nagkinahanglan og kausaban?

Gihimo Niya kini pinaagi sa pagpamulong ngadto kanila kabahin sa usa ka karnero nga nahisalaag gikan sa panon ug sa usa ka salapi nga nawala. Namulong siya kabahin sa masukolong anak nga lalaki kinsa nangayo og kapasayloan ug kabahin sa magulang nga igsoong lalaki kinsa midumili sa pagdawat kaniya o pagkaon uban kaniya. Ang matag usa niini nga sambingay milangkob og mga kamatuoran nga may kalabotan ngadto kon giunsa sa mga Pariseo sa pagtan-aw ang uban, nagtudlo kanila nga ang matag kalag adunay dakong bili (tan-awa sa Lucas 15). Wala mosulti ang Manluluwas sa mga Pariseo—o bisan kinsa kanato—kinsa ang mailhan sa Iyang mga sambingay. Usahay kita ang mabalak-on nga amahan. Usahay kita ang masinahong igsoon nga lalaki. Kasagaran kita ang nawala nga karnero o ang buang nga anak nga lalaki. Apan bisan unsa ang atong kahimtang, pinaagi sa Iyang mga sambingay, ang Manluluwas nagdapit kanato sa pagpangita og kalabotan diha sa Iyang mga pagtulun-an—sa pagdiskobre unsa ang iyang gusto kanato nga makat-onan ug unsa ang kinahanglan nga atong usbon sa atong kaugalingong paghunahuna ug kinaiya.

Mahimong imong mamatikdan nga ang pipila sa mga tigkat-on dili makakita ngano nga ang pipila sa mga kamatuoran importante kanila. Samtang ikaw naghunahuna sa mga panginahanglan niadtong imong tudloan, hunahunaa kon sa unsang paagi ang mga kamatuoran diha sa mga kasulatan mahimong makahuloganon ug mapuslanon diha sa ilang mga sitwasyon. Usa ka paagi nga ikaw makatabang sa mga tigkat-on nga makakita sa kalabotan sa mga kamatuoran nga sila nagdiskobre mao ang pagpangutana sama sa “Unsaon nga kini makatabang kanimo sa usa ka butang nga ikaw nagsinati karon?” “Nganong importante alang kanimo nga masayod niini?” “Unsa ang kalainan nga mahimo niini diha sa imong kinabuhi?” Paminaw ngadto niadtong imong tudloan. Tugoti sila sa pagpangutana. Awhaga sila sa paghimo og mga koneksyon tali sa mga pagtulun-an sa Manluluwas ug sa ilang kaugalingong mga kinabuhi. Kamo makahimo usab sa pagpakigbahin kon giunsa ninyo sa pagkakaplag og kalabotan sa imong kaugalingong kinabuhi diha sa unsay imong gitudlo. Ang pagbuhat niini makadapit sa Espiritu sa pagtudlo sa mga tigkat-on sa tinagsa nga paagi kon unsaon sa doktrina nga makahimo og kalainan sa ilang mga kinabuhi.

Mga Pangutana nga Pamalandongan: Unsa kini nga naghimo sa mga kamatuoran sa ebanghelyo nga makahuloganon ug mapuslanon nganha kanimo? Unsa ang nagtabang kanimo sa pagkaplag og personal nga kalabotan samtang ikaw nagtuon sa ebanghelyo? Unsa ang imong gibuhat sa pagtutok sa mga kamatuoran nga may kalabotan ngadto niadtong imong tudloan?

Gikan sa mga Kasulatan: 1 Nephi 19:23; 2 Nephi 32:3; Doktrina ug mga Pakigsaad 43:7–9

Pipila ka mga Paagi sa Paggamit Unsay Imong Nakat-onan

• Timbang-timbanga ang unsay imong itudlo sa pagsiguro nga ikaw nagtudlo og tinuod nga doktrina. Kini nga mga pangutana makatabang:

  • Ang ako bang giplanohang itudlo gipasikad diha sa mga kasulatan ug sa mga pulong sa mga propeta sa ulahing mga adlaw?

  • Nakatudlo ba ang lainlaing mga propeta niini? Unsa ang gitudlo sa mga lider karon sa Simbahan mahitungod niini?

  • Unsaon niini pagtabang sa uban sa paglig-on sa hugot nga pagtuo diha ni Jesukristo, paghinulsol, ug pag-uswag subay sa dalan sa pakigsaad?

  • Kini ba subay sa mga pag-aghat sa Espiritu Santo, o gibati ko ba ang espirituhanong kahasol mahitungod niini?

• Kada adlaw pagtuon sa pulong sa Dios sa pagkat-on sa tinuod nga doktrina alang sa imong kaugalingon.

• Hangyoa ang mga tigkat-on sa pagbasa sa mga kasulatan ug sa mga pulong sa mga propeta karon samtang ikaw nagtudlo.

• Tudloi ang mga estudyante kon unsaon paggamit ang mga footnote, ang Giya ngadto sa mga Kasulatan, ug ubang mga kapanguhaan samtang nagtuon sila sa mga kasulatan.

• Dapita ang mga tigkat-on sa pagpangita og mga kamatuoran diha sa usa ka tudling sa kasulatan o istorya.

• Pagpamatuod kon giunsa nimo pagkahibalo nga ang usa ka doktrina tinuod.

• Gamit og mga istorya o mga pasumbingay sa pagtabang sa mga estudyante sa pag-angkon og mas lawom nga pagsabot sa mga kamatuoran sa ebanghelyo.