Higugmaa Kadtong Imong Tudloan

Ang tanan nga gibuhat sa Manluluwas sa tibuok Niya nga yutan-ong pagpangalagad gidasig sa gugma. Samtang kita naningkamot nga mahimong tinuod nga mga sumusunod ni Kristo, kita mahimong mapuno sa samang gugma (tan-awa sa Juan 13:34–35; Moroni 7:47–48; 8:26). Kon ang gugma sa Manluluwas anaa sa atong mga kasingkasing, mangita kita sa matag posible nga paagi sa pagtabang sa uban nga mokat-on kabahin ni Kristo ug moduol ngadto Kaniya. Ang gugma ang mahimong magdasig alang sa atong pagtudlo.

Aron sa Paghigugma Niadtong Imong Tudloan

• Tan-awa ang mga tigkat-on sa paagi nga ang Dios nagtan-aw kanila.

• Paningkamot sa pag-ila kanila—sabta ang ilang mga kahimtang, mga panginahanglan, ug mga kalig-on.

• Pag-ampo alang kanila gamit ang ilang ngalan.

• Paghimo og luwas nga palibot diin ang tanan gitahod ug nahibalo nga ang ilang mga tampo gihatagan og bili.

• Pangita og angay nga mga paagi sa pagpahayag sa imong gugma.

Nakita sa Manluluwas ang Balaanong Potensiyal sa Tanan nga Iyang Gitudloan

Kadaghanan sa mga tawo sa Jerico mihunahuna nga sila nahibalo sa tanan nga angay nilang mahibaloan mahitungod ni Zaqueo. Siya usa ka maniningil sa buhis—ang punoang maniningil sa buhis, sa tinuod—ug siya adunahan. Sa dayag, nahunahuna nila, siya tingali tikasan ug kurakot. Apan gitan-aw ni Jesus ang kasingkasing ni Zaqueo ug nakita ang usa ka talahorong “anak ni Abraham” (tan-awa sa Lucas 19:1–10). Ang Manluluwas nagtan-aw sa mga tawo dili lamang ingon nga sila makita nga mao apan ingon nga sila gayod mao—ug ingon nga sila mamahimo. Diha sa dili hapsay og hitsura nga mga mangingisda sama ni Simon, Andres, Santiago, ug Juan, nakita Niya ang umaabot nga mga lider sa Iyang Simbahan. Diha sa gikahadlokan nga manggugukod nga si Saulo, nakita Niya ang “usa ka pinili nga galamiton,” kinsa mosangyaw sa Iyang ebanghelyo sa atubangan sa mga hari ug mga nasod (tan-awa sa Mga Buhat 9:10–15). Ug diha kaninyo ug sa matag tawo nga inyong tudloan, nagtan-aw ang Manluluwas og usa ka anak nga lalaki o anak nga babaye sa Dios nga walay kinutoban ang potensiyal.

Diha sa mga tawo nga imong tudloan, ikaw malagmit adunay pipila kinsa ingon og matinud-anon ug nakabig ug ang uban kinsa ingon og dili interesado o gani masinupakon. Pagmatngon nga dili maghimo og mga pangagpas base lamang diha sa unsay imong nakita. Ang Espiritu Santo makatabang kanimo sa pagkakita diha sa matag tawo sa pipila sa unsay nakita sa Manluluwas—ug makatabang kaninyo sa pagsugod sa paghigugma kanila sa paagi nga Siya naghimo.

Mga Pangutana nga Pamalandongan: Paghunahuna mahitungod sa matag tawo nga imong tudloan, ug pamalandonga kon unsa ang pagbati sa Langitnong Amahan ug ni Jesus mahitungod sa matag usa. Unsa kaha ang Ilang makita diha kaniya? Unsaon niini nga mga hunahuna pag-apekto sa paagi sa imong pagtudlo niana nga tawo?

Gikan sa mga Kasulatan: 1 Samuel 16:7; Salmo 8:4–5; Mga Taga-Roma 8:16–17; Doktrina ug mga Pakigsaad 18:10–14

Nakaila Kanato ang Manluluwas ug Nakasabot sa Atong mga Kahimtang, mga Panginahanglan, ug mga Kalig-on

Ang babaye nga Samarianhon wala moanha sa atabay sa pagpaminaw og mensahe sa ebanghelyo. Mianha siya sa pagkuha og tubig. Apan ang Manluluwas nakasabot nga ang iyang kauhaw mas labaw kay sa pisikal. Nahibalo Siya nga siya adunay gubot nga kagahapon tungod sa dili lig-on nga mga relasyon. Busa gigamit ni Jesus ang pisikal nga panginahanglan nga nakuha dihadiha ang iyang interes—tubig nga nagpatunhay sa kinabuhi—ug gikonektar kini sa iyang mas lawom nga espirituhanong panginahanglan alang sa “buhing tubig” ug “kinabuhing dayon.” Sa kataposan sa ilang panagsultihanay, ang babaye dihay personal nga saksi nga si Jesus mao ang Kristo, nadasig sa usa ka bahin pinaagi kon unsa ka maayo Siya nakaila kaniya. “[Siya] mitug-an kanako sa tanang nabuhat ko,” siya miingon. “Mao ba kaha kini ang Kristo?” (tan-awa sa Juan 4:6–29).

Ang pagka-Kristohanong magtutudlo naglakip sa pag-ila sa mga tawo nga imong tudloan ug pagtinguha sa pagsabot kon unsa ang anaa sa ilang mga kasingkasing. Makabaton ka og interes sa ilang mga kinabuhi ug makapakita ug kaluoy. Mahimo kang mangita og mga paagi sa pagsabot sa ilang mga kaagi, mga talento, mga interes, ug mga panginahanglan. Mahimo nimong sutaon kon unsaon nila pagkat-on sa labing maayo. Mahimo kang mangutana, makapaminaw og maayo, ug makapaniid. Labaw sa tanan, mahimo kang mag-ampo alang sa panabot nga ang Espiritu lamang ang makahatag. Kon mas mailhan nimo og maayo ang usa ka tawo, mas maayo kang makatabang kaniya sa pagkaplag og personal nga kahulogan ug gahom diha sa ebanghelyo ni Jesukristo. Sa dihang masabtan nimo ang kauhaw sa usa ka tawo sa pagkat-on ug pagsunod kang Jesukristo, ang Espiritu makatudlo kanimo kon unsaon sa pagtabang og wagtang niini pinaagi sa buhing tubig sa Manluluwas.

Mga Pangutana nga Pamalandongan: Unsa ang imong nahibaloan na mahitungod sa mga tawo nga imong tudloan? Unsa ang importante ngadto kanila? Unsa ang ilang mga kalig-on? Unsa ang ilang gipakigbisog? Unsa ang imong mabuhat sa pagsabot kanila og mas maayo?

Gikan sa mga Kasulatan: Salmo 139:1–5; Mateo 6:25–32; Marcos 10:17–21; Juan 10:14; 3 Nephi 17:1–9

Giampo sa Manluluwas Kadtong Iyang mga Gitudloan

Hunahunaa kon unsa gyod kaha ang gibati ni Simon Pedro sa dihang iyang nadungog ang Manluluwas nga nagsulti ngadto kaniya, “Simon, Simon, tan-awa! Gipangayo kamo ni Satanas, … apan nangamuyo ako alang kanimo, nga unta dili makabsan ang imong pagsalig” (Lucas 22:31–32). Unsaon niini pag-apektar kanimo nga mahibalo nga si Jesukristo nag-ampo ngadto sa Amahan alang kanimo? Ang mga tawo sa karaang Amerika dihay kasinatian nga sama niini, ug ilang gihulagway kini niini nga paagi: “Walay usa nga nakasabot sa kalipay nga mipuno sa among mga kalag sa panahon nga kami nakadungog [ni Jesus] nga nag-ampo alang kanamo ngadto sa Amahan” (3 Nephi 17:17).

Mahimo usab kang maghunahuna mahitungod sa unsay nahitabo sa sulod nimo kon ikaw mag-ampo alang sa usa ka tawo—kanunay, pinaagi sa ngalan. Sa unsang paagi ang imong mga pag-ampo nag-apekto sa paagi nga ikaw mobati mahitungod niana nga tawo? Sa unsang paagi kini nag-apekto sa imong mga lihok? Sa tinuod ang atong Amahan sa Langit nagdungog ug nagtubag sa sinserong mga pag-ampo sa usa ka magtutudlo kinsa nagtinguha sa pagtabang sa usa ka tigkat-on. Ug sa daghang mga hitabo, usa ka paagi Siya nagtubag niadtong mga pag-ampo mao ang pagtandog sa kasingkasing sa magtutudlo ug sa pagdasig kaniya sa pagbuhat o pagsulti og usa ka butang nga motabang sa estudyante sa pagbati sa Iyang gugma.

Mga Pangutana nga Pamalandongan: Samtang ikaw naghunahuna mahitungod sa mga tawo nga imong tudloan, aduna bay usa ka tawo kinsa imong gibati nga adunay usa ka espesyal nga panginahanglan alang sa imong mga pag-ampo? Unsay imong gibati nga nadasig sa pag-ampo alang kaniya? Unsa nga mga panalangin ang mahimong moabot samtang kamo nagdapit sa mga tigkat-on sa pag-ampo alang sa usag usa?

Gikan sa mga Kasulatan: Juan 17; Alma 31:24–36; 3 Nephi 18:15–24; 19:19–23, 27–34

Gipaniguro sa Manluluwas Nga ang Tanan Mibati nga Gitahod ug Gihatagan og Bili

Ang kinatibuk-ang kinaiya diha sa relihiyosong mga lider sa panahon ni Jesus mao nga ang mga makasasala kinahanglan nga pagalikayan. Tungod niini, kon kini nga mga lider nakakita ni Jesus nga nakigsultihanay sa mga makasasala, sila nalisang. Unsaon sa usa ka tawo kinsa nakig-uban sa ingon nga mga tawo mahimong espirituhanong magtutudlo?

Si Jesus, sa dayag, adunay lahi nga paagi. Siya naninguha sa pag-ayo niadtong kinsa mga masakiton sa espirituhanong paagi (tan-awa sa Marcos 2:15–17; Lucas 4:17–18). Siya sa kanunay mitabang niadtong kinsa lahi gikan niadtong naglibot kanila o kinsa adunay gubot nga nangagi, ug Siya nakigsultihanay uban niadtong kinsa nakasala. Siya midayeg sa hugot nga pagtuo sa sundalong Romano (tan-awa sa Mateo 8:5–13). Siya mitawag og wala saligi nga tigkolekta og buhis nga mahimong usa sa Iyang sinaligan nga mga disipulo (tan-awa sa Marcos 2:14). Sa dihang usa ka babaye gipasanginlan og panapaw, gihimo Niya nga mobati siya nga luwas ug gidasig siya sa paghinulsol ug sa pagpuyo og mas maayong kinabuhi (tan-awa sa Juan 8:1–11).

Apan gibuhat ni Jesus ang mas labaw pa niana. Mipasiugda Siya niining sama nga kinaiya sa pagdawat ug paghigugma diha sa Iyang mga sumusunod. Ang iyang ehemplo sa tinuod diha sa mga kasingkasing sa Iyang Apostoles sa dihang miabot na ang panahon nga ilang dad-on ang ebanghelyo ngadto sa tanang katawhan. Kini makita diha sa mga pulong ni Pedro: “Sa pagkatinuod naila ko nga ang Dios wala diay pinalabi sa mga tawo” (Mga Buhat 10:34).

Adunay dako kaayo nga purohan nga hapit tanan nga ikaw gitawag sa pagtudlo nakigbisog sa pipila ka paagi aron mobati nga gitahod ug gihatagan og bili. Sa paagi nga ikaw nahigugma ug nagtahod kanila, ikaw makasulti nga sila dili lamang kay giabiabi apan gikinahanglan. Kamo makatabang niadtong kinsa wala motambong, kinsa nakigbisog, o kinsa ingon og wala ma-interesado, nga magmapailobon kon ang pag-uswag ingon og hinay. Ikaw makatabang sa tanan nga mobati nga luwas ug haruhay nga makigbahin sa ilang mga kabalaka sa kauban nga mga tumutuo. Ug ikaw makahimo og mas daghan pa kay sa niana. Ikaw makadasig sa tanang mga estudyante sa pagtabang kanimo og mugna sa usa ka palibot diin ang doktrina gitudlo diha sa espiritu sa pagtahod, pagkanahisakop, ug gugma.

Mga Pangutana nga Pamalandongan: Unsa ang makatabang nga ang usa ka tawo mobati nga gitahod ug gihatagan og bili? Unsa ang nagdasig sa usa ka tawo sa pagtahod ug paghatag og bili sa uban? Samtang ikaw mainampoong naghunahuna mahitungod sa mga tawo nga imong tudloan, unsa ang giaghat nga imong buhaton aron silang tanan mobati nga giabiabi ug gikinahanglan?

Gikan sa mga Kasulatan: Juan 4; 2 Nephi 26:27–28, 33; Alma 1:26; 3 Nephi 18:22–25

Ang mga magtutudlo makatabang niadtong ilang tudloan nga mobati nga gihigugma.

Gipahayag sa Manluluwas ang Iyang Gugma alang Niadtong Iyang Gitudloan

Sa kataposan sa usa ka nindot, makabayaw nga adlaw sa pagtudlo ug pagpangalagad diha sa mga Nephite, naobserbahan ni Jesus nga kini panahon alang Kaniya sa pagbiya. Siya adunay ubang mga tawo nga bisitahan. “Pamauli kamo sa inyong mga panimalay,” Siya mingon, “ug i-andam ang inyong mga hunahuna alang sa ugma.” Apan ang mga tawo milingkod lamang didto “naghilak,” nagtan-aw kaniya ingon og nagpasabot nga sila mohangyo kaniya sa pagpabilin og diyutay pa nga panahon uban kanila.” Nakasabot sa ilang dili masulti nga panginahanglan ug “napuno sa kapuangod,” si Jesus mipabilin og dugay-dugay (3 Nephi 17:3, 5–6). Siya mipanalangin sa ilang masakiton ug nag-antos. Siya miluhod ug nag-ampo uban kanila. Siya mihilak duyog kanila, ug Siya nagmaya uban kanila.

Paghunahuna og mainampoong pagtuon sa mga pulong ug mga lihok sa Manluluwas diha sa 3 Nephi 17. Pamalandonga ang gugma nga Siya mipahayag alang niadtong Iyang gitudloan. Pangita og mga pamahayag sa Iyang gugma diha sa ubang mga dapit sa mga kasulatan. Dayon paghunahuna mahitungod sa mga tawo nga imong tudloan. Unsaon nimo pagpahayag ang gugma sa tukmang paagi alang kanila? Tugoti nga mogiya kanimo ang Espiritu. Kon ikaw nalisdan sa pagbati o pagpahayag sa gugma alang niadtong imong tudloan, pagsugod pinaagi sa pagpamatuod sa gugma sa Dios. Dayon “pag-ampo ngadto sa Amahan uban sa tibuok kusog sa kasingkasing, nga kamo unta mapuno niini [nga putli nga gugma ni Kristo], diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo” (Moroni 7:48). Ug hinumdomi nga ang imong kabalaka alang sa pagtudlo og usa ka leksiyon kinahanglan nga dili gayod mopalinga kanimo gikan sa pagpahayag og gugma pinaagi sa imong mga pulong ug mga lihok. Kasagaran ang paagi sa imong pagtagad sa mga tawo sama lamang ka importante sa unsay imong itudlo kanila.

Mga Pangutana nga Pamalandongan: Giunsa sa Manluluwas pagtabang kanimo nga mahibaloan ang Iyang gugma alang kanimo? Giunsa sa usa ka ginikanan o sa ubang magtutudlo pagtabang kanimo sa pagbati sa Iyang gugma? Nasayod ba ang mga tawo nga imong tudloan nga gihigugma nimo sila? Nahibalo ba sila nga ang Manluluwas nahigugma kanila?

Gikan sa mga Kasulatan: Marcos 6:31–42; Juan 13:3–16, 34–35; 15:12–13; 1 Mga Taga-Corinto 13:1–7; 1 Juan 4:7–11

Pipila ka mga Paagi sa Paggamit Unsay Imong Nakat-onan

• Kon kamo nagtudlo og usa ka klase, kat-oni ang mga ngalan sa mga tigkat-on ug gamita kini kon kamo magtudlo.

• Ipahayag ang imong pasalamat kon ang mga estudyante nagtampo.

• Pakig-istoryahanay sa mga tigkat-on sa wala pa ug sa human na ang imong pagtudlo.

• Tabangi ang mga tigkat-on sa pagpalambo og pagbati sa gugma ug pagtahod alang sa usag usa.

• Paminaw og maayo—kon ikaw nagtudlo ug sa ubang mga panahon.

• Paghimo og mga buhat sa serbisyo alang niadtong inyong tudloan.

• Pangandam sa pag-usab sa imong mga plano sa pagtudlo aron sa paggahin og mas daghan pang panahon sa mga baroganan nga makahuloganon ngadto niadtong imong tudloan.