Jesus nagbitad ni Pedro gikan sa mapintas nga tubig

Finisher of Faith [Tighingpit sa Hugot nga Pagtuo], ni J. Alan Barrett

Pagdapit og Makugihon nga Pagkat-on

Kini sa tinuod makapahingangha nga magtan-aw sa Manluluwas nga naglakaw diha sa tubig. Apan kadto dili igo alang ni Pedro. Gusto niya nga buhaton unsa ang gibuhat sa Manluluwas, kon hain Siya atua siya, ug magbaton og samang kasinatian sa iyang kaugalingon. “Paanhaa ako diha kanimo sa ibabaw sa tubig,” miingon siya. Mitubag ang Manluluwas sa usa ka yanong pagdapit: “Umari ka.” Uban niana, si Pedro milukso gikan sa kaluwasan sa sakayan ug mipakita kanato nga ang pagkadisipulo dili usa ka manunutong kasinatian (tan-awa sa Mateo 14:24–33). Kini nagkinahanglan og hugot nga pagtuo diha ni Jesukristo ug makugihon nga paningkamot. Apan kini nagdala usab og buhong nga ganti sa paglakaw uban sa Manluluwas.

“Umari ka.” “Umari kamo, ug makita ninyo.” “Umanhi ka, ug sumunod kanako.” “Lakaw, ug buhata ang ingon”, (Mateo 14:29; Juan 1:39; Lucas 18:22; 10:37). Gikan sa sinugdanan sa Iyang pagpangalagad, gidapit sa Manluluwas ang Iyang mga sumusunod sa pagsinati alang sa ilang mga kaugalingon sa mga kamatuoran, gahom, ug gugma nga Iyang gitanyag. Siya mibuhat niini tungod kay kini mao ang tinuoray nga pagkat-on. Kini dili lamang ang pagpaminaw o pagbasa; kini mao usab ang pag-usab, paghinulsol, ug pag-uswag. Sa mga pulong sa Manluluwas, ang pagkat-on moabot “pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118;). Ug ang hugot nga pagtuo naglakip sa paglihok alang sa atong mga kaugalingon, dili lamang pagaaghaton (tan-awa sa 2 Nephi 2:26).

Kon kita mosunod sa ehemplo sa Manluluwas, kita nagdapit niadtong atong tudloan sa pagpangutana, pagpangita, ug pagtuktok––ug niana pagkaplag (tan-awa sa Mateo 7:7–8). Ug kita nagdawat niana nga pagdapit sa atong mga kaugalingon. Nag-uban, pinaagi sa atong hugot nga pagtuo diha ni Kristo ug sa makugihong paningkamot, moabot kita sa pagkahibalo alang sa atong mga kaugalingon kon unsa ang kahulogan sa paglakaw uban Kaniya.

Sa Pagdapit og Makugihon nga Pagkat-on

• Tabangi ang mga estudyante nga mangako og responsibilidad alang sa ilang kaugalingon nga pagkat-on.

• Awhaga ang mga estudyante sa pag-ila sa Manluluwas pinaagi sa pagtuon sa ebanghelyo sa matag adlaw.

• Dapita ang mga estudyante sa pagpangandam sa pagkat-on.

• Awhaga ang mga estudyante sa pagpakigbahin sa mga kamatuoran nga ilang nakat-onan.

• Dapita ang mga estudyante sa pagpuyo sa unsay ilang nakat-onan.

Gitabangan sa Manluluwas ang Uban nga Mangako og Responsibilidad alang sa Ilang Pagkat-on

Ang pagtukod og mga barko nga luwas motabok sa mga lawod mahimong usa ka malisod nga buluhaton alang ni bisan kinsa. Ang igsoong lalaki ni Jared “gimandoan sa kanunay pinaagi sa kamot sa Ginoo” (Ether 2:6), nagdawat og mga panudlo mahitungod sa porma sa mga barko ug sa unsang paagi kini mahimong mapahanginan. Apan unsa ang inyong namatikdan mahitungod kon giunsa sa Ginoo pagtubag sa dihang ang igsoong lalaki ni Jared nangutana mahitungod sa paghatag og kahayag sa mga barko? (tan-awa sa Ether 2:22–25). Giunsa pagpanalangin ang igsoong lalaki ni Jared pinaagi sa pagdapit sa pagbansay sa iyang hugot nga pagtuo niini nga paagi?(tan-awa sa Ether 3:1–16).

Kini mahimong ingon og mas sayon sa pagsulti lamang sa mga estudyante sa tanang mga butang nga imong gihunahuna nga kinahanglan nga ilang mahibaloan. Bisan pa, mitambag si Elder David A. Bednar: “Ang atong hunahuna dili ‘Unsay akong isulti nila?’ Imbis, ang pangutana mao ang pagpangutana sa atong kaugalingon, “‘Unsay akong idapit nga ilang buhaton? Unsa nga dinasig nga mga pangutana ang akong ipangutana nga, kon sila andam nga motubag, masugdan ang pagdapit sa Espiritu Santo ngadto sa ilang mga kinabuhi?’” (gabii uban sa usa ka General Authority, Peb. 7, 2020, broadcasts.ChurchofJesusChrist.org).

Hunahunaa sa kon sa unsang paagi kamo makadapit sa mga estudyante nga mangako og responsibilidad alang sa ilang pagkat-on. Sama pananglitan, ikaw makadapit kanila sa pagpangutana sa ilang kaugalingong mga pangutana, pagsiksik alang sa mga tubag, pagpamalandong, ug sa pagpakigbahin o pagrekord sa ilang mga hunahuna ug mga pagbati. Samtang sila nagbuhat, molig-on sila sa ilang hugot nga pagtuo, modiskobre og mga kamatuoran diha sa pulong sa Dios, ug maadunay ilang kaugalingong mga kasinatian uban niini nga mga kamatuoran. Samtang kita mangako og responsibilidad alang sa atong kaugalingong pagkat-on, kita makasulti, ingon sa gibuhat ni Joseph Smith, “Ako nakahibalo alang sa akong kaugalingon” (Joseph Smith––Kasaysayan 1:20).

Mga Pangutana nga Palandungon: Nganong importante alang sa mga estudyante nga maaktibo kay sa mag-uyon-uyon sa ilang pagkat-on? Unsaon ninyo pagtabang kanila nga mangako sa responsibilidad sa ilang pagkat-on? Giunsa sa mga magtutudlo pagtabang kaninyo sa pagbuhat niini? Unsa nga mga ehemplo gikan sa mga kasulatan ang inyong mahunahuna kon diin ang mga tawo gidapit sa pagkat-on alang sa ilang mga kaugalingon? Sa unsang paagi kini nga mga ehemplo nag-apekto kon giunsa ninyo pagtudlo?

Gikan sa mga Kasulatan: 1 Nephi 11; Doktrina ug mga Pakigsaad 9:7–8; 58:26–28; 88:118–125; Joseph Smith—Kasaysayan 1:11–20

Giawhag sa Manluluwas ang Uban sa Pag-ila Kaniya pinaagi sa Pagtuon sa Iyang Pulong

Sa dihang miabot na ang panahon alang sa Manluluwas aron opisyal nga itukod ang Iyang Simbahan sa ulahing mga adlaw, gisultihan Niya ang Iyang mga sulugoon, “Mosalig niana nga mga butang nga nahisulat” (Doktrina ug mga Pakigsaad 18:3). Sa tinuod, ang Basahon ni Mormon, nga hapit na nila mahuman sa paghubad, naglangkob og makatabang nga panudlo alang sa buluhaton, lakip ang unsaon sa pagbunyag, unsaon sa pagpangalagad sa sakramento, ug ubang bililhon nga mga detalye. Apan ang Manluluwas gusto usab sa Iyang mga sulugoon nga motan-aw sa Iyang mga pagpadayag isip usa ka oportunidad sa pagpaminaw Kaniya ug sa pag-ila Kaniya sa mas hingpit nga paagi. Diha sa samang pagpadayag, misulti Siya kanila, “Kini mao ang akong tingog nga namulong [niini nga mga pulong] nganha kaninyo; … busa, kamo makapamatuod nga kamo nakadungog sa akong tingog, ug nahibalo sa akong mga pulong” (Doktrina ug mga Pakigsaad 18:35–36).

Hunahunaa ang mga tawo nga inyong gitudloan. Giunsa nila pagtan-aw ang pagtuon sa kasulatan? Alang niana nga butang, giunsa ninyo pagtan-aw kini? Kini ba labaw pa kay sa obligasyon kada adlaw? Kon kamo magtuon sa mga kasulatan, gibati ba ninyo nga ang Manluluwas direkta nga nakigsulti nganha kaninyo? Si Presidente Russell M. Nelson mitudlo: “Asa man kita makapaminaw Kaniya? Kita makaadto sa mga kasulatan. … Ang inadlaw nga pagbasa sa pulong sa Dios importante alang sa espirituhanong kaluwasan, ilabi na niining mga panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon” (“Paminaw Kaniya,” Liahona, Mayo 2020, 89). Samtang kamo nagtudlo, awhaga ang mga estudyante sa pagtuon sa mga kasulatan uban sa katuyoan sa pagpangita sa Manluluwas––dili lamang sa pagpangita sa mga bersikulo o mga katinuoran mahitungod Kaniya apan sa pagpangita Kaniya. Ang pagkadungog sa tingog sa Ginoo sa matag adlaw diha sa mga kasulatan usa ka sukaranan ngadto sa tibuok kinabuhi nga makugihon, kaugalingon nga pagtuon sa ebanghelyo.

Mga Pangutana nga Palandungon: Hunahunaa ang inyong kaugalingong mga nabatasan nga pagtuon sa kasulatan. Giunsa sa pagtuon sa pulong sa Dios paglig-on sa inyong relasyon ngadto Kaniya? Unsa ang inyong mahimo sa pagpalambo sa inyong pagtuon? Unsaon ninyo sa pagdasig sa uban sa pagtuon sa pulong sa Dios sa makugihon ug kanunay nga paagi? Unsa nga mga panalangin ang ilang madawat samtang sila nagbuhat?

Gikan sa mga Kasulatan: Josue 1:8; 2 Timoteo 3:15–17; 2 Nephi 32:3; Jacob 2:8; 4:6; Doktrina ug mga Pakigsaad 33:16

Gidapit sa Manluluwas ang Uban sa Pagpangdam sa Pagkat-on

Bisan ang labing maayo nga mga liso dili makatubo diha sa gahi, batoon, o tunukon nga yuta. Sa samang paagi, bisan ang labing bililhon ug nagpasiugda og hugot nga pagtuo nga doktrina dili tingali makausab og usa ka kasingkasing nga dili andam sa pagdawat niini. Kana usa ka bahin sa mensahe sa sambingay sa Manluluwas mahitungod sa magpupugas, mga binhi, ug sa yuta nga nagkalainlain ang mga kondisyon. Kini diha sa “maayong yuta”––ang kasingkasing nga nahumok ug nalimpyo sa espirituhanong mga bato ug mga sampinit––nga ang pulong sa Dios mamunga og makahatag og kinabuhi nga bunga (tan-awa sa Mateo 13:1–9, 18–23).

Ang espirituhanong pag-andam importante––alang kaninyo ug sa mga tawo nga inyong tudloan. Busa unsaon nato pagtabang og andam ang atong mga kasingkasing aron kini mahimong “maayong yuta” alang sa pulong sa Dios? Hunahunaa ang mosunod nga mga baroganan sa pagpangandam, nga inyong magamit sa inyong kinabuhi ug mag-awhag sa mga kinabuhi niadtong inyong tudloan. Pag-ampo nga mahibalo kon unsa ang gusto sa Ginoo kaninyo nga makat-onan. Pagpuyo sa paagi nga magdapit sa Iyang presensiya diha sa inyong kinabuhi. Paghinulsol sa matag adlaw. Amumaha ang inyong tinguha sa pagkat-on pinaagi sa pagpangutana og sinsero nga mga pangutana. Tun-i ang pulong sa Dios uban sa hugot nga pagtuo nga Siya mogiya kaninyo ngadto sa mga tubag. Ablihi ang inyong kasingkasing ngadto sa bisan unsa nga Iyang itudlo kaninyo.

Samtang ang mga estudyante nag-andam sa pagkat-on niini nga paagi, sila makabaton og espirituhanong mga mata nga makakita ug dalunggan nga makadungog kon unsay buot sa Ginoo kanila nga mahibaloan (tan-awa sa Mateo 13:16).

Mga Pangutana nga Palandungon: Unsa ang inyong buhaton sa pag-andam sa inyong kaugalingon sa pagkat-on? Sa unsang paagi ang pagpangandam nag-apekto sa paagi sa inyong pagkakita, pagkabati, ug pagsabot sa pulong sa Dios? Unsaon ninyo pagdasig ang uban sa pagpangandam sa pagkat-on? Unsang kalainan ang mahimo niana sa paagi sa ilang pagdawat sa mga kamatuoran sa ebanghelyo?

Gikan sa mga Kasulatan: Enos 1:1–8; Alma 16:16–17; 32:6, 27–43; 3 Nephi 17:3

bata nagbasa sa mga kasulatan diha sa klase

Ang mga estudyante nagpahimulos gikan sa mga oportunidad sa pagpakigbahin ngadto sa usag usa sa unsay ilang nakat-onan.

Giawhag sa Manluluwas ang Uban sa Pagpakigbahin sa mga Kamatuoran nga Ilang Nakat-onan

“Ako dili maayo nga mosulti,” gikasubo ni Enoch sa dihang ang Ginoo mitawag kaniya sa pagsangyaw sa ebanghelyo. Apan ang kabatid sa pagsulti wala gayod mahimong usa ka panginahanglan alang sa usa ka sulugoon sa Ginoo. Hinoon, misaad ang Ginoo ni Enoch nga kon siya adunay igo nga hugot nga pagtuo sa pag-abli sa iyang ba-ba, ang mga pulong manggawas. “Ako mohatag kanimo og igsusulti,”Siya miingon (Moises 6:31–32). Gigamit ni Enoch ang iyang hugot nga pagtuo, ug ang Ginoo sa tinuod misulti pinaagi kaniya, uban sa mga pulong nga hilabihan sa kagamhanan nga sila mihimo sa mga katawhan sa pagkurog (tan-awa sa Moises 6:47). Sa pagkatinuod, sila mihimo sa yuta sa pagkurog sa kaugalingon niini. Ang mga bukid nahanaw, ang mga suba nabalhin ang ilang mga agianan, ug ang mga nasod nahadlok sa mga katawhan sa Dios, “gamhanan kaayo ang pulong ni Enoch, ug dako ang gahom sa pinulongan nga gihatag sa Dios kaniya” (Moises 7:13).

Ang Ginoo gusto sa tanan kanato––dili lamang sa iyang mga propeta––nga adunay gahom sa pagpamulong sa Iyang pulong. Siya buot niana alang kanatong tanan, lakip alang sa mga tawo nga inyong tudloan (tan-awa sa Doktrina ug mga Pakigsaad 1:20–21). Ang atong mga pulong mahimong dili mopabalhin og mga bukid o mousab sa agianan sa mga suba, apan kini makatabang sa pag-usab sa mga kasingkasing. Kana mao ngano nga kini importante kaayo sa paghatag sa mga estudyante og mga oportunidad sa pagpakigbahin ngadto sa usag usa unsay ilang nakat-onan mahitungod sa Manluluwas ug sa Iyang ebanghelyo. Ang pagbuhat niini motabang kanila sa pagsulod diha sa kaugalingon sa mga kamatuoran nga gitudlo kanila ug sa pagpahayag niini. Kini usab motabang kanila sa pag-angkon og pagsalig sa kaugalingon diha sa ilang abilidad sa pagpakigbahin sa mga kamatuoran sa ubang mga sitwasyon.

Mga Pangutana nga Palandungon: Paghunahuna mahitungod sa usa ka panahon nga kamo misulti mahitungod sa usa ka kamatuoran sa ebanghelyoi ngadto sa usa ka tawo. Unsa ang inyong nakat-onan gikan sa kasinatian? Kanus-a kamo mapasalamaton nga usa ka tawo dihay kaisog sa pagpakigbahin sa ilang mga hunahuna ug mga pagtuo? Unsaon sa mga tawo nga inyong tudloan sa pagpahimulos gikan sa mga oportunidad sa pagsulti mahitungod sa mga butang nga ilang nakat-onan? Unsa nga mga oportunidad kamo makamugna alang kanila?

Gikan sa mga Kasulatan: Alma 17:2–3; Moroni 6:4–6; Doktrina ug mga Pakigsaad 84:85; 88:122; 100:5–8

Gidapit sa Manluluwas ang Uban sa Pagpuyo sa Unsay Iyang Gitudlo

“Ipadan-ag ang inyong kahayag sa atubangan sa mga tawo.” “Higugmaa ang inyong mga kaaway.” “Pangayo, ug kamo pagahatagan.” Sulod kamo sa higpit nga ganghaan.” (Mateo 5:16, 44; 7:7, 13.) Ang pipila sa labing tin-aw, halamdumon nga mga pagdapit sa tibuok yutan-on nga pagpangalagad sa Manluluwas gipamulong samtang gitudloan Niya ang Iyang mga disipulo diha sa daplin sa bukid nga nagdung-aw sa Dagat sa Galilea. Ang katuyoan sa Manluluwas mao ang pag-usab sa mga kinabuhi, ingon nga gihimong tataw pinaagi sa Iyang panapos nga pagdapit: “Bisan kinsa nga magapatalinghog niining akong mga pulong ug magatuman niini, mahisama siya sa usa ka tawong but-an nga nagatukod sa iyang balay ibabaw sa bato” (Mateo 7:24).

Mibundak ang ulan, mibul-og ang mga baha ug ang lunop miabot ug mihuros ang mga hangin mihapak sa tanang kinabuhi. Ang pagkat-on mahitungod sa ebanghelyo dili igo kon ang mga estudyante kinahanglan nga makigharong sa tanang pagsulay nga ilang atubangon. Kini mao nganong kita kinahanglan nga dili magduha-duha sa pagdapit og mga estudyante sa paghunahuna kon unsaon nga sila makapuyo sa unsay ilang nakat-onan. Gumikan sa pagtahod sa kabubut-on sa uban, daghan sa atong mga pagdapit mahimong kinatibuk-an: “Unsa ang inyong gibati nga angay buhaton?” Usahay ang atong mga pagdapit mahimong nagkinahanglan nga himoong mas klaro: “Mopili ka ba og usa ka hiyas sa Manluluwas nga gusto nimong buhaton?” Samtang ikaw naghatag og mga oportunidad alang sa mga estudyante sa pagpaminaw, pag-ila, ug pagpakigbahin sa mga pag-aghat gikan sa Espiritu Santo, Siya motudlo kanila kon unsang personal nga mga lihok ilang kinahanglang himoon. Tabangi ang mga estudyante sa paghunahuna sa mga panalangin nga mosunod samtang sila maglihok sumala sa unsay ilang nakat-onan, ug awhaga sila sa pagpadayon bisan kon kini magkalisod. Ang pagpuyo sa kamatuoran mao ang labing dali nga dalan ngadto sa mas dakong hugot nga pagtuo, pagpamatuod, ug pagkakabig. Ingon sa gisulti sa Manluluwas, ang pagpuyo sa doktrina sa Amahan mao ang paagi alang kanatong tanan nga mahibalo sa tinuoray nga ang doktrina tinuod (tan-awa sa Juan 7:17).

Mga Pangutana nga Palandungon: Kanus-a kamo nadasig sa paglihok tungod sa usa ka pagdapit nga gihatag sa usa ka tawo? Sa unsa nga paagi nga ang inyong kinabuhi nausab isip resulta? Alinggati ang mga pagdapit nga nahatag diha sa mga kasulatan ug pinaagi sa mga lider sa Simbahan. Unsa ang inyong nakat-onan nga makatabang kaninyo samtang kamo nagdapit sa uban sa paglihok? Sa unsang mga paagi kamo maka-follow up sa inyong mga pagdapit?

Gikan sa mga Kasulatan: Lucas 10:36-37; Juan 7:17; Santiago 1:22; Mosiah 4:9–10; Doktrina ug mga Pakigsaad 43:8–10; 82:10

Pipila ka mga Paagi sa Paggamit Unsay Inyong Nakat-onan

• Hangyoa ang uban sa pag-anha nga andam sa pagpakigbahin og usa ka butang nga gitudlo sa Espiritu Santo kanila, sama sa usa ka panabot gikan sa usa ka makahuluganong tudling sa kasulatan.

• Hatagi ang mga estudyante og mga oportunidad sa pagtudlo og bahin sa usa ka leksiyon.

• Awhaga ang mga estudyante sa pagrebyo og usa ka video, kasulatan o mensahe sa dili pa kamo magkita.

• Pugngi ang kalagmitan sa pagtubag sa matag pangutana. Apila ang uban sa pagpangita sa mga tubag.

• Sa dili pa makigbahin sa inyong mga panabot mahitungod sa usa ka kasulatan, hangyoa ang mga estudyante sa pagpakigbahin sa ilang kaugalingon.

• Pangutana nga nag-awhag sa mga estudyante sa pagpangita sa mga tubag diha sa pulong sa Dios.

• Dapita ang mga estudyante sa pagpangutana sa ilang kaugalingong mga pangutana mahitungod sa unsay ilang nakat-onan.

• Paghatag og panahon alang sa tanang mga estudyante sa pagpamalandong og pangutana sa dili pa mohangyo kanila sa pagpakigbahin sa ilang mga tubag.

• Hunahunaa ang pagbahin sa mga estudyante ngadto sa ginagmay nga mga grupo sa panaghisgot, ingon nga angay.

• Pagpahayag og tataw nga mga pagdahom aron sa pagtabang sa mga estudyante sa pagtubo.

• Paghatag og mga pagdapit nga modasig sa mga estudyante sa paglambo apan dili makasanap. Pag-follow up ug dapita ang mga estudyante sa pagpakigbahin sa ilang mga kasinatian.

• Tabangi ang mga estudyante sa pagkat-on gikan sa mga kasulatan pinaagi sa:

  • Pagmarka og makahuloganong mga tudling, kon gitinguha.

  • Pagdapit og pagpadayag pinaagi sa pagpamalandong ug pag-ampo.

  • Pagsulat og espirituhanong mga panumdoman.

  • Pagtipig og journal sa pagtuon.

  • Paghimo og mga tumong sa paglihok sa unsay ilang nakat-onan.