14.

Membōr Ro Ejjeļo̧k Pāleer

14.0

Kadkad in

Rilo̧mo̧o̧r ej karuwaineneik aolep n̄an itok n̄an E im m̧ōttanļo̧k Kabun̄ eo An (lale 2 Nipai 26:24). Em̧m̧aan im kōrā ro me rejjan̄in kar m̧are ak ro rej jepel ak mej pāleer rej ejaake juon m̧ōttan eaorōk ilo aer uwaan Kabun̄ in. Eaorōk bwe aolep ren lo kōjatdikdik kōn Pinmuur eo an Jisōs Kraist (lale Ether 12:4). M̧ool ko indeeo me rej elaajrak remaron̄ jipan̄ ejaake kain kōjatdikdik in:

• Jeje ko rekwojarjar im rikanaan ro ilo raan ko āliktata rej kapen bwe eo ej tiljek ilo kōjparok bujen ko an gospel eo naaj wōr an iien em̧m̧an n̄an mour āinwōt Anij.

• Jetjet in iien eo im jekjek eo me kōjeraam̧m̧an ko an mour āinwōt Anij kar litok ejjab aolepeer kar kwaļo̧k. Bōtaab kōjeraam̧m̧an ko an mour āinwōt Anij rej m̧ool men̄e jetjet in iien im jekjek eo ejjab alikkar (lale Mosaia 2:41).

• Kōttar Irooj ej lukkuun kōmlet wōnm̧aanļo̧k in pokake im eddōkļo̧k ilo jetōb n̄an E (lale Aiseia 64:4).

• Anij ej leļo̧k mour indeeo n̄an aolep ajri ro Nejin. Aolep ro rej karbōb n̄an menin letok ejouj an Rilo̧mo̧o̧r kōn jeorļo̧k bōd im mour kōn kien ko An renaaj bōk mour indeeo. (Lale Mosaia 26:30; Moronai 6:8).

• Lōke ilo kam̧ool kein ej itok jān tōmak eo epen ilo Jisōs Kraist. Kōn jouj eo An, aolep men rej iookļo̧k mour jab wabanban rej likūt ilo laajrak eo ejetjet (lale Alma 7:11–13).

Anij ej aikuji aolep membōr ro n̄an jipan̄ ilo jerbal in lo̧mo̧o̧r eo An ilo ward ko im stake ko aer (lale 1 Korint 12:12–27). Āinwōt tōl jān Jetōb, membōr ro ejjeļo̧k pāleer rej kūr n̄an jerbal in tōl im katakin. Kūr in tōl ko remaron̄ koba jerbal ilo jerbal kein rej elaajrak:

• Būreejtōnji ro an doulul an ward im stake

• Būreejtōni ko an Doulul Elder ro

• Rikakpilōklōk ro ilo bisoprik eo

• High ko̧o̧njeļ ro

• Rikakpilōklōk ro ilo stake būreejtōnji eo

Ilo jepta in:

• “Membōr ro ejjeļo̧k pāleer” ej kōnono kōn aolep membōr ro rōrūtto an Kabun̄ in me rej jan̄in m̧are.

• “Rūm̧m̧an ded ro ejjeļo̧k pāleer” ej kōnono kōn ro iiō ko aer rej 18–35.

• “Rūtto ro ejjeļo̧k pāleer” ej kōnono kōn ro iiō ko aer rej 36 im rūttoļo̧k.

14.1

Membōr ro Ejjeļo̧k Pāleer ilo Iunit ko Ijo Rej Jokwe Ie

Enan̄in aolep membōr ro ejjeļo̧k pāleer rej etal n̄an juon iunit eo ijo rej jokwe ie ippān aolep membōr ro me aolep kain ded. Ewōr aer iien ko rem̧m̧an n̄an jerbal, katakin, tōl, im koba ippān armej ro ilo elōn̄ jekjek ko.

14.1.1

Ritōl ilo Stake eo

14.1.1.1

Stake Būreejtōnji

An stake būreejtōnji eo bōk koņaan eļap tata an aorōk n̄an kōjerbal membōr ro ejjeļo̧k pāleer ilo jerbal in lo̧mo̧o̧r eo an Anij im mour ijo eutiej tata.

Stake būreejtōn eo emaron̄ kappeik juon iaan rikakpilōklōk ro an im juon high ko̧o̧njeļ n̄an jerbal ippān rūtto ro ejjeļo̧k pāleer. E emaron̄ barāinwōt kappeik juon rikakpilōklōk im juon high ko̧o̧njeļ n̄an jerbal ippān rūm̧m̧an ded ro ejjeļo̧k pāleer. E emaron̄ bar kajjitōk ippān būreejtōn eo an Doulul eo an Kōrā ro n̄an jitōn̄ juon uwaan būreetōnji eo n̄an jipan̄ rūtto ro ejjeļo̧k pāleer im rūm̧m̧an ded ro ejjeļo̧k pāleer. Ejja ritōl rein wōt remaron̄ kappe n̄an kumi kein jim̧or.

Stake būreejtōnji eo ej kanooj lale eļap tata rūm̧m̧an ded ro me ejjeļo̧k pāleer—ejja āinwōt aer lale aolep membōr ro an diktak in epepen eo.

Stake būreejtōnji eo ej kōmlet eļan̄n̄e m̧akūtkūt ko n̄an rūm̧m̧an ded ro me ejjeļo̧k pāleer rej aikuj bōk jikin ilo ward lābōļ, stake labōļ, ak emaron̄ kobain lābōļ kein jim̧or. M̧akūtkūt ko n̄an rūtto ro ejjeļo̧k pāleer rej bōk jikin ilo stake im multistake lābōļ. (Lale jebta 20).

N̄e oran membōr ro ejjeļo̧k pāleer ilo juon jikin ebwe an lōn̄, stake būreejtōn ro remaron̄ kōm̧m̧an elmakot n̄an kajutak juon ward an rūm̧m̧an ded ro ejjeļo̧k pāleer ak rūtto ro ejjeļo̧k pāleer (lale 14.3).

Juon stake (ak juon kumi an stake epaak) emaron̄ jab bwe oran membōr ro ejjeļo̧k pāleer n̄an kajutak juon ward an rūm̧m̧an dede ro ak rūtto ro ejjeļo̧k pāleer. Ilo jekjek in, Eria Jiljilimjuonn̄oul emaron̄ kōmālim juon stake būreejtōn n̄an karuwaineneik aolepān membōr rein n̄an membōr in juon ward in jikin ko em̧ōj karōki. Menin ej kōm̧m̧an bwe rūtto ro me ejjeļo̧k pāleer ak rūm̧m̧an ded ro ejjeļo̧k pāleer ren jerbal im kabun̄ jar ippān doon. Eria Būreejtōnji eo ej kapilōk membōr in Būreejtōnji eo an Jiljilimjuonn̄oul eo im Doulul eo an Jon̄oulruo Rijilōk ro me kar jitōn̄e.

14.1.1.2

Kamiti ko an Rūm̧m̧an Ded ro Ejjeļo̧k Pāleer im Rūtto ro Ejjeļo̧k Pāleer an stake im ward.

Membōr ro ejjeļo̧k pāleer rej jerbal n̄an ajri ro nejin Anij kōn aer bōk koņaer ilo jerbal in lo̧mo̧o̧r eo An im mour ijo eutiej tata (lale 1.2 im 14.2) N̄an jipan̄ er kōm̧m̧ane āindein, stake būreejtōnji eo ej ejaake juon kamiti an rūm̧m̧an ded ro ejjeļo̧k pāleer. Kamiti in ej ejaak in ritōl ro jān kajjojo ward an rūm̧m̧an ded ro ejjeļo̧k pāleer.

Juon likao im juon jiron̄ rūm̧m̧an ded ejjeļo̧k pāleen ej kūr n̄an tōl kamiti eo. Rej jerbal ilo stake ko̧o̧njel eo.

Eļan̄n̄e ejjab bwe rūm̧m̧an ded ro ejjeļo̧k pāleer n̄an ejaake juon kamiti ilo juon stake, juon kurup jān stake ko repaak remaron̄ ejaake juon kamiti jān mālim eo an Eria Būreejtōnji eo.

Stake būreejtōnji eo emaron̄ barāinwōt ejaake juon kamiti an rūtto ro ejjeļo̧k pāleer. Ej ejaak in jejjo rūtto ro ejjeļo̧k pāleer jāņ kajjojo ward. Juon em̧m̧aan im juon kōrā rūtto ejjeļo̧k pāleen rej kūr n̄an tōl kamiti eo. Rej jerbal ilo stake ko̧o̧njel eo.

Eļan̄n̄e ejjab bwe rūtto ro ejjeļo̧k pāleer n̄an ejaake juon kamiti ilo stake eo, juon kurup jān stake ko repaak remaron̄ ejaake juon kamiti jān mālim eo an Eria Būreejtōnji eo.

Kamiti ko rej kappukot n̄an rejtake membōr ro kōn jemjerā im iien ko rem̧m̧an n̄an bōk koņaer ilo jerbal in lo̧mo̧o̧r im mour indreo āinwōt Anij (lale 14.2). Rej karōk iien ko rem̧m̧an n̄an ekkatak gospel eo im n̄an jerbal in jipan̄ im m̧akūtkūt ko.

Kamiti ko rej kweilo̧k āinwōt aikuji. Memōr eo kar kappeik an stake būreejtōnji eo ak būreejtōnji eo an Doulul eo an Kōrā ro im aae ko̧o̧jeļ eo kar kappeik maron̄ pād ilo kweilo̧k kein n̄an rejtak.

Kamiti ko an rūm̧m̧an ded ro ejjeļo̧k pāleer rej jerbal ippān būrookraam̧ ko an institute ilo kāāmbōj eo, n̄e ewōr.

Ekkā wōt an kamiti ko an rūtto ro ejjeļo̧k pāleer im rūm̧m̧an ded ro ejjeļo̧k pāleer jerbal makeļo̧k jān doon.

14.1.2

Ritōl an Ward

14.1.2.1

Bisoprik

Bisoprik eo ej kii eo n̄an kōjerbal membōr ro ejjeļo̧k pāleer ilo jerbal in lo̧mo̧o̧r eo an Anij im mour ijo eutiej tata. Rej jerbal ippān ward ko̧o̧njeļ eo n̄an kile kūr ko eļap meļeļeier im ijjitōn̄ ko n̄an membōr ro ejjeļo̧k pāleer. Rej kile im kajjieon̄ n̄an jipan̄ tōpar aikuj ko an pāāren ro me ejjeļo̧k pāleer.

Ilo m̧ool, bisoprik eo ej rie membōr ro ejjeļo̧k pāleer ejja wōt aer rie membōr ro an doulul eo an elder ro im Doulu eo an Kōrā ro. Ijowōt ke, kōnke kōn eddo eo aer eļap tata n̄an diktak in epepen eo, bisoprik eo ej barāinwōt kōm̧m̧ane men kein:

• Juon membōr in bisoprik eo ej kweilo̧k ippān kajjojo rūm̧m̧an ded ejjeļo̧k pāleen dik tata juon alen juon iiō.

• Bisoprik eo ej eo̧ron̄ ennaan kōn mour im ājmour an rūm̧m̧an ded ro ejjeļo̧k pāleer. Būreejtōn eo an doulul eo an elder ro im būreejtōn eo an Doulul eo an Kōrā ro rej ekōnono kōn aikuj ko an rūm̧m̧an ded ro ejjeļo̧k pāleer ilo kweilo̧k eo an ward ko̧o̧ņjeļ. Ritōl ro an kamiti eo an rūm̧m̧an ded ro ejjeļo̧k pāleer maron̄ karuwaineneiki n̄an aer pād.

• Bisoprik eo emaron̄ ejaake juon kamiti an rūm̧m̧an ded ro ejjeļo̧k pāleer ilo ward eo (lale 14.1.2.4). (Kamiti ko an rūtto ro ejjeļo̧k pāleer n̄an iiō ko 36 im rūttoļo̧k rej ejaak ilo jon̄ak eo an stake).

14.1.2.2

Membōr ro an Būreejtōnji eo an Doulul eo an Elder ro im Doulul eo an Kōrā ro Kar Jitōn̄ Er n̄an lale Rūm̧m̧an Ded ro Ejjeļo̧k Pāleer.

Būreejtōn ro an doulul eo an elder ro im Doulul eo an Kōrā ro erro jim̧or maron̄ kappeik juon uwaan būreejtōnji ko aer n̄an rejtake rūtto ro ejjeļo̧k pāleer. Membōr rein ilo būreejtōnji in rej ekkatak kōn kajoor ak em̧m̧an ko an rūm̧m̧an ded ro ejjeļo̧k pāleer im jipan̄ tōpar aikuj ko aer.

Būreejtōn eo an doulul an elder im būreejtōn eo an Doulul an Kōrā ro maron̄ riboot ioon jerbal kein ilo kweilo̧k eo an ward ko̧o̧njel. Eļan̄n̄e ewōr juon kamiti an rūm̧m̧an ded ro ejjeļo̧k pāleer an ward eo, ritōl ro an kamiti eo rej ruwainene n̄an pād im riboote kijejeto ko aer.

Membōr rein an būreejtōnji kein rej rie kamiti eo an rūm̧m̧an ded ro ejjeļo̧k pāleer an ward eo eļan̄n̄e ewōr juon ekar ejaak (lale 14.1.2.4).

14.1.2.3

Ritōl ro an Rem̧m̧an Ded Ejjeļo̧k Pāleer

Ilo juon ward me elōn̄ rūm̧m̧ad ded ro ejjeļo̧k pāleer, bisoprik eo emaron̄ kūr juon em̧m̧aan im kōrā rūm̧m̧an ded ejjeļo̧k pāleer āinwōt ritōl ro an rūm̧m̧an ded ro ejjeļo̧k pāleer. Eddo ko aer ekoba:

• Jipan̄ rūm̧m̧an ded ro ejjeļo̧k rejtaier bōk koņaer ilo jebal in lo̧mo̧o̧r eo an Anij im mour ijo eutije tata (lale 14.2).

• Jerbal ilo stake kamiti eo an rūm̧m̧an ded ro ejjeļo̧k pāleer.

• Tōl kamiti eo an rūm̧m̧an ded ejjeļo̧k pāleer eļan̄n̄e ewōr juon.

• Kweilo̧k iien otemjej ippān būreejtōnji eo an doulul eo an elder ro im būreejtōnji eo an Doulul eo an Kōrā ro. Ilo kweilo̧k kein, rej ekōnono kōn kōkajoorļo̧k rūm̧m̧an ded ro ejjeļo̧k pāleer im ekōjkan aer jipan̄ tōprak aikuj ko aer. Rej barāinwōt pedped ioon jerbal in karejar eo n̄an rūm̧m̧an ded ro ejjeļo̧k pāleer.

• Etal ilo kweilo̧k ko an ward ko̧o̧njeļ eo n̄e kar karuwainenik.

14.1.2.4

Ward Kamiti an Rūm̧m̧an Ded Ejjeļo̧k Pāleer

Jet ward ko elōn̄ aer rūm̧m̧an ded ro ejjeļo̧k pāleer. Ilo ward kein, bisop eo maron̄ en̄jake bwe ritōl ro rūm̧m̧an ded ro ejjeļo̧k pāleer maron̄ jipan̄ jān kamiti eo an rūm̧m̧an ded ro ejjeļo̧k pāleer an ward. (Kamiti ko an rūtto ro ejjeļo̧k pāleer rej ejaak ilo jon̄ak eo an stake. (Lale 14.1.1.2.)

Ro uwaan kamiti eo ekoba:

• Ritōl ro an rūm̧m̧an ded ro ejjeļo̧k pāleer an ward eo.

• Rūm̧m̧an ded ro ejjeļo̧k pāleer jet rej karuwaineneik bisoprik eo.

• Ro uwaan būreejtōnji ko an doulul eo an elder ro im Doulul eo an Kōrā ro kar kappeik n̄an jipan̄ rūm̧m̧an ded ro ejjeļo̧k pāleer.

14.2

Bōk Koņaad ilo Jerbal in Lo̧mo̧o̧r eo an Anij im Mour Ijo Eutiej tata

Anij ej kūr aolep n̄an itok n̄an Kraist im bōk kuņaan ilo jerbal in lo̧mo̧o̧r eo an Anij im mour ijo eutiej tata kōn:

• Mour kōn gospel eo an Jisōs Kraist.

• Kea kōn ro rej aikuj.

• Karuwaineneik aolep n̄an bōk gospel eo.

• Kakobaik baam̧le ko n̄an mour indeeo.

Membōr ro ejjeļo̧k pāleer rej bōk ko̧ņaer ilo jerbal in ilo m̧weo im ilo m̧ōn jar eo. Rej bōk koņaer ilo dolulul eo an elder ro im Doulul ko an Kōrā ro. Rej jerbal ilo kūr ko im ijjitōn̄ ko, ekoba jerbal in karejar. Ward ko im stake ko remaron̄ karōk m̧akūtkūt ko ļōmņak n̄e kāālet (optional) me rej n̄an wōt membōr ro ejjeļo̧k pāleer me rej kāālet n̄an bōk koņaer ie (lale 14.2.1.3).

14.2.1

Mour kōn Gospel eo an Jisōs Kraist

14.2.1.1

Nokon in Jota im Ekkatak Gospel eo

Ritōl ro ak membōr ro me rej kōņaan bōk koņaer maron̄ ejaake juon ak elōn̄ļo̧k nokon in jota an kumi ko n̄an rūtto ro ejjeļo̧k pāleer im kumi ko jet an rūm̧m̧an ded eo ejjeļo̧k pāleer. Ilo m̧ool, ro me rej bōk koņaer ejjab aikuj wōr nejier ajri ilo m̧weo. Ilo stake ko me jejjo wōt membōr ro ejjeļo̧k pāleer ie, nokon in jota an kumi ko maron̄ kejoone bukon ko an ward ko.

N̄an kakkobaba, membōr ro ejjeļo̧k pāleer maron̄ kāālet n̄an kobaļo̧k ilo online ak ilo likio in armej n̄an ekkatak gospel eo ilo m̧weo. Itok, Ļoor Eō maron̄ juon kein jipan̄.

Aolep rūm̧m̧an ded ro ejjeļo̧k pāleer rej rōjan̄ er n̄an deļon̄e institute eo (lale 15.2).

14.2.1.2

Kūlaaj ko an Jabōt Jikuuļ

Ium̧win tōl eo an bisop eo, būreejtōn eo an Jabōt Jikuuļ emaron̄ ejaake juon kūlaaj in Jabōt Jikuuļ n̄an rūm̧m̧an ded ro ejjeļo̧k pāleer (lale 13.3.2).

14.2.1.3

M̧akūtkūt ko

Ium̧win tōl eo an ritōl ro an ward ak stake, rūm̧m̧an ded ro ejjeļo̧k pāleer remaron̄ karōk im bōk koņaer ilo m̧akūtkūt ko me rej n̄an wōt er. M̧akūtkūt kein remaron̄ bōk jikier ilo jon̄ak eo an ward ak stake. Waanjon̄ak ko remaron̄ koba:

• Loļo̧k ko n̄an tampeļ.

• Jerbal in menmenbwij an baam̧ļe.

• Kwaļo̧k gospel eo.

• Jerbal in jipan̄ ilo jukjukinpād.

• Al im iien m̧akūtkūt ko kōn m̧anit.

• Ikkure ko.

Ium̧win tōl eo an ritōl ro an stake, rūtto ro ejjeļo̧k pāleer maron̄ karōk m̧akūtkūt ko reierļo̧k wōt ilo jon̄ak eo an stake.

Eria Jiljilimjuonn̄oul ro maron̄ jerbal ippān stake būreejtōn ro n̄an ejaaki kamiti ko n̄an karōk m̧akūtkūt ko an elōn̄ļo̧k jān juon stake n̄an membōr ro ejjeļo̧k pāleer.

Kōļļāik m̧akūtkūt ko rej itok jān bajet ko an stake im ward. N̄e m̧akūtkūt ko an elōn̄ļo̧k jān juon stake ak eria rej kōm̧m̧an, ritōl ro rej kanooj lale juon jon̄an in kōjjemo̧o̧j eo em̧m̧an ikkijeen kōļļāik m̧akūtkūt eo ilubwiljin stake ko.

Jāān n̄an m̧akūtkūt ko rej aikuj in jejjōt ekkar n̄an kakien ko ilo 20.2.6. Āinwōt n̄an kōm̧m̧an oktak ejeņoļo̧k, membōr ro remaron̄ kōļļāik jet iaan men ko n̄e m̧akūtkūt ko an elōn̄ļo̧k jān juon stake ak eria rej bōk jikier. Ritōl ro rej kanooj lale bwe aolep ren bōk koņaer.

Kōn unin tōl ko an m̧akūtkūt ko rellōn̄ļo̧k, lale 20.2 im 20.3).

14.2.2

Kea kōn Ro Riaikuj

14.2.2.1

Jerbal in Jipan̄

Āinwōt aolep rikaļoor ro an Jisōs Kraist, membōr ro ejjeļo̧k pāleer ewōr aer iien ko rem̧m̧an iien otemjej n̄an jerbal n̄an ro jet makeļo̧k ak ilo kurup. Jerbal in jipan̄ an jukjuk in pād ej ilubwilijin wāween ko raorōk tata me rūm̧m̧an ded ro ejjeļo̧k pāleer rej kajoorļo̧k ilo jetōb.

M̧akūtkūt in jerbal in jipan̄ ko remaron̄ pedped ioon:

• Menin Jipan̄ im Un̄n̄are Peid Make.

• Menmenbwij an Baam̧le.

• Loļo̧k (outreach) jukjuk in pād.

• Kwaļo̧k gospel eo.

• Kōkajoorļo̧k membōr ro rekāāl im rej kab bar ro̧o̧ltok.

• Aikuj ko an armej ro ijo rej jokwe ie ak ijoko jet.

Ijo ewōr ie, JustServe.org ej elmakote iien ko rem̧m̧an n̄an jerbal in jipan̄ n̄an jim̧or kajjojo armej im kumi ko.

14.2.2.2

Jerbal in Karejar

Kajjojo em̧m̧aan ejjeļo̧k pāleen elōn̄ an rikarejar m̧aan ro ak ministering brothers. Kajjoro kōrā ejjeļo̧k pāleen elōn̄ an rikarejar kōrā ro ak ministering sisters. Ijjitōn̄ ko rej kōm̧m̧an n̄an kajjojo armej, ejjab n̄an kumi ko ak apartment ko. (Lale jebta 21.)

14.2.3

Karuwaineneik Aolep n̄an Bōk Gospel eo

Membōr ro ejjeļo̧k pāleer ewōr juon aer iien em̧m̧an n̄an karuwaineneik aolep n̄an bōk kōjeraam̧m̧an ko an gospel eo an Jisōs Kraist. Rej kōm̧m̧ane menin ilo aer kwaļo̧k gospel eo, kōkajoorļo̧k membōr rekāāl im membōr ro rej kab bar ro̧o̧ltok, im pukōtļo̧k ro me rejjab bōk koņaer. (Lale jebta 23.)

Jet rūm̧m̧an ded ro ejjeļo̧k pāleer emakijkij aer em̧m̧akūt. Rūm̧m̧an ded ro ejjeļo̧k pāleer remaron̄ karōk m̧akūtkūt ko jān iien n̄an iien n̄an pukōt im karuwaineneik rūm̧m̧an ded ro et me ejjeļo̧k pāleer ilo stake eo. M̧akūtkūt kein remaron̄ barāinwōt kōm̧m̧an ippān stake ko repaake er.

Rūm̧m̧an ded ro ejjeļo̧k pāleer remaron̄ jipan̄ eļaptata ilo katakin ippān mijinede ro im rie mijenede ro me rej jerbal aolep raan ak full-time mijinede ro.

14.2.4

Kobaik Baam̧le ko n̄an Indeeo

Āinwōt kajjojo armej im āinwōt kumi ko, membōr ro ejjeļo̧k pāleer remaron̄ jipan̄ kobaik baam̧le ko n̄an indeeo. N̄an waanjon̄ak, remaron̄:

• Kōppopo n̄an kōm̧m̧ani bujen ko ippān Anij kōn bōk kain̄i ko, ekoba menin letok kwojarjar an tampeļ (lale 27.2.2).

• Jerbal āinwōt rijerbal in kain̄i ko an tampeļ ak baļintier (lale 25.5).

• Bōk koņaan ilo kain̄i ko n̄an ro remej.

• Ekkatak kōn baam̧le ko nukier im ro jibūn im jim̧m̧an (lale My Family: Stories That Bring Us Together

• Kile ro jibūn im jim̧m̧an me rej aikuji kain̄i ko an tampeļ (lale FamilySearch.org

• Jerbal āinwōt rikapilōk ro an tampeļ im menmenbwij an baam̧le (lale 25.2.4).

• Bōk koņaan ilo indexing (lale FamilySearch.org/indexing).

14.3

Ward ko im Stake ko an Rūm̧man Ded Ejjeļo̧k Pāleer im Ward ko an Rūtto ro Ejjeļo̧k Pāleer

Elōn̄ wōt membōr ro ejjeļo̧k pāleer rej etal n̄an ward ko ilo ijoko rej jokwe ie. Āinwōt n̄an kōm̧m̧an oktak ejeņoļo̧k, n̄e membōr ro ejjeļo̧k pāleer rej jokwe epaakeļo̧k doon, ritōl ro an priesthood remaron̄ elmakote n̄an ejaake iunit kein. Iunit kein rej aikuj tōpar jon̄ak eo ilo jepta 37.

• Juon ward an rūm̧m̧an ded ro ejjeļo̧k pāleer n̄an iiō ko 18–35 (lale 37.2)

• Juon stake an rūm̧m̧an ded ro ejjeļo̧k pāleer n̄an iiō ko 18–35 (lale 37.3)

• Juon ward n̄an rūtto ro ejjeļo̧k pāleer n̄an iiō ko 36–45 (lale 37.5)

Ilo jikin ko elōn̄ uwaan rūm̧m̧an ded ro ejjeļo̧k pāleer ie, ritōl ro an priesthood eo remaron̄ kajitōk n̄an kōm̧m̧an:

• Juon ward an rūm̧m̧an ded ro ejjeļo̧k pāleer n̄an iiō ko 18–35.

• Juon ward an rūm̧m̧an ded ro ejjeļo̧k pāleer n̄an iiō ko 26–35.

Iunit kein rej kōjerbal būrookram̧ eo emmakijkij an Kabun̄ in n̄an jon̄an eo emaron̄. Rej ļoor naan in kōmeļeļe ko ilo bok in tōl in.

Membōr ro remaron̄ maron̄ kāālet n̄an erom̧ membōr in ward eo an rūm̧m̧an ded ro ejjeļo̧k pāleer ak ward eo an rūtto ro ejjeļo̧k pāleer, ijo ewōr. Ak rej maron̄ kāālet n̄an erom̧ membōr ro an ward eo aer ijo rej jokwe ie.

Pād im erom̧ membōr in juon ward an rūm̧m̧an ded ro ejjeļo̧k pāleer ak juon ward an rūtto ro ejjeļo̧k pāleer ej an jidik wōt iien.

• N̄e juon membōr ejjeļo̧k pāleen ej m̧are, armej eo ej erom̧ juon membōr in ward eo ijo rej jokwe ie.

• N̄e juon membōr in juon ward an rūm̧m̧an ded ro ejjeļo̧k pāleer ej tōpar iiō eo 36, ļeo ak lieo ej erom̧ juon membōr in ward eo an rūtto ro ejjeļo̧k pāleen (eļan̄n̄e ewōr juon ijo armej eo ej jokwe ie) ak juon ward ijo ej jokwe ie.

• N̄e juon membōr in juon ward an rūtto ejjeļo̧k pāleen ej tōpar iiō eo 46, armej eo ej erom̧ juon membōr in ward eo ijo ej jokwe ie.

N̄e iien jānij eo ikōtaan ward ko, membōr eo im ritōl ro an armej eo rej kōnono ippān ritōl ro an ward eo ijo ej jokwe ie (geographic). Ritōl ro an ward eo ekāāl rej jitōn̄ļo̧k an rikarejar m̧aan im kōrā ro ak ministering brothers im sisters. Rej karōk n̄an juon kūr ak ijjitōn̄ me ej jipan̄ membōr eo en̄jake an ruwainene im bōk koņaan ilo jerbal eo an ward eo.

14.4

Unin Tōl im Kakien Ko Jet

14.4.1

Jikin Aindoon ko

Juon jikin aindoon ej juon jikin ejenolo̧k ijo rūm̧m̧an ded ro ejjeļo̧k pāleer im ro m̧ōttaer remaron̄ aindoon n̄an m̧ōttāik doon im bōk koņaer ilo jabdewōt wāween kein:

• Ekkatak gospel eo, ekoba institute

• Kūlaaj ko an un̄n̄are peid make, iien ko rem̧m̧an ikkijeen jeļāḷọkjeṇ, im rejtaki kumi ko

• Jerbal in Jipan̄ im m̧akūtkūt ko

• Kwaļo̧k gospel eo im jipan̄ ļo̧k (outreach) jukjuk in pād

• Jerbal an tampeļ im menmenbwij an baam̧le

• Būrookraam̧ ko jet an Kabun̄ in

Aolep jikin aindoon ko kar kōjenolo̧ki aikuj in kōmālim jān Eria Būreejtōnji eo. Stake būreejtōn ro im bisop ro rej lali jikin aindoon ko. Rej ejaaki ilo ijo ewōr m̧ōn jar in ie ak Kabun̄ in, ko āinwōt juon im̧ōn kweilo̧k ak m̧ōn institute. Stake būreejtōn ro me rej kōņaan kajutak juon jikin aindoon n̄an rūm̧m̧an ded ro ejjeļo̧k pāleer rej aikuj kepaak Eria Būreejtōnji eo.

14.4.2

Joteen in M̧ande ko

Āinwōt n̄an kōm̧m̧an oktak ejeņoļo̧k, m̧akūtkūt ko an ward ko an rūm̧man ded ro ejjeļo̧k pāleer im ward ko an rūtto ro ejjeļo̧k pāleer maron̄ kōm̧m̧ani ilo joteen M̧ande, ekoba ilo im̧ōko im̧ōn Kabun̄ in (lale 20.5.3).

14.4.3

Kakkobaba in Doulul ko an Elder ro im Doulul eo an Kōrā ro

Kōn mālim eo jān stake būreejtōn eo, bisop eo an juon ward n̄an membōr ro ejjeļo̧k pāleer maron̄ ejaake elōn̄ļo̧k jān juon Doulul an Kōrā ro im doulul an elder ro. (Lale 8.1.3 im 9.1.3).

14.4.4

Membōr ro kar Kūr Er n̄an Jerbal ilo Iunit ko an Membōr ro Ejjeļo̧k Pāleer

Bisop eo im stake būreejtōn eo wōt ilo iunit ko an membōr ro ejjeļo̧k pāleer aikuj in kūr jān juon ward ijo rej jokwe ie (geographic). Āinwōt kar tōl jān Jetōb, elōn̄ bar kūr ko jet me maron̄ kanni jān ro ilo iunit eo n̄an membōr ro ejjeļo̧k pāleer.

Ro kar kūr jān ward eo aer ijo rej jokwe ie (geopraphic) n̄an jerbal ilo juon iunit an membōr ro ejjeļo̧k pāleer ekkā aer jerbal ejjab ļapļo̧k jān ļalem iiō ko ilo iunit kein. Tōreen iien in ekoba ļapļo̧k in jerbal in jipan̄ eo ilo kūr ko rooktak.

Ritōl ro an stake ko ijo jokwe ie (geopraphic) rej aikuj in rie n̄e membōr ro rej ļōmņak in jerbal ilo iunit ko n̄an membōr ro ejjeļo̧k pāleer. Ijo wōt ke, ritōl ro rej kapilōk ippān doon n̄an meļeļe jekjek ko an membōr ro.

Kūr ko maron̄ liļo̧k n̄an kajjojo armej ak n̄an ripālele ro. Ilo jet jekjek ko, juon ripālele emaron̄ aikuj in pād wōt ilo juon ward ijo ej jokwe ie (geographic) ilo an eo juon jerbal ilo juon ward an membōr ro ejjeļo̧k pāleer.

Membership rekoot ko an bisop ro im baam̧le ko aer ekkā wōt aer pād wōt ilo ward eo aer ijo rej jokwe ie (geographic) ilo aer jerbal ilo ward ko an membōr ro ejjeļo̧k pāleer. Ejjeļo̧k oktak ejja menin wōt n̄an ro me rej jerbal ilo stake būreejtōnji eo ak bisoprik eo, ilo high ko̧o̧njeļ eo, ak ilo stake būreejtōnji eo an Doulul eo an Kōrā ro eļan̄n̄e membōr rein rej kūr n̄an jerbal ilikin ward eo aer ijo rej jokwe ie (geographic). Membōr rein im baam̧le ko aer rej kōļļā juon m̧ōttan jon̄oul im joortak ko aer ilo ward eo ijo rej jokwe ie (geographic). Rej barāinwōt etal n̄an ippān ritōl ro an ward im stake eo aer ijo rej jokwe ie (geographic) n̄an intōrpiu n̄an bōk mālim n̄an deļo̧n̄e tampeļ.

14.4.5

Kakkije ko an Jikuuļ

Eļan̄n̄e emaron̄, ward ko an rūm̧m̧an ded ro ejjeļo̧k pāleer rej jerbal ilo iien kakkije ko jān jikuuļ. Elōn̄ļo̧k jān juon ward an rūm̧m̧an ded ro ejjeļo̧k pāleer remaron̄ kweilo̧k ippān doon eļan̄n̄e emenin aikuj. Ilo kain jekjek rōt kein, ward ko rej kōjenolo̧k aer kōm̧m̧an rekoot ko, riboot ko kōn etan ro rej pād, im ikkijeen jāān ko.

14.4.6

Intōrpiu ko ilo Ward ko im Stake ko an Rūm̧m̧an Ded ro Ejjeļo̧k Pāleer

Ilo eitōn aolep jekjek ko, stake būreejtōn eo ej intōrpiuk membōr ro me:

• Bōk menin letok kwojarjar eo aer make ak endowment.

• Liāp ippān eo pāleen

• Em̧ōj kar leļo̧k etan n̄an bōk Melkesidek Priesthood eo.

• Em̧ōj kar leļo̧k etan n̄an etal im mijen.

Āinwōt n̄an kōm̧m̧an oktak ejeņoļo̧k, stake būreejtōn eo an juon rūm̧m̧an ded ejjeļo̧k pāleen ilo stake eo emaron̄ kōmālim rikakpilōklōk ro an n̄an kōm̧m̧ane jet iaan intōrpiu ko.

Ilo ward ko reļļap an rūm̧m̧an ded ro ejjeļo̧k pāleer, bisop ro remaron̄ kōmālim rikakpilōklōk ro n̄an kōm̧m̧ani intōrpiu ko n̄an membōr ro me rej:

• Bōk menin letok kwojarjar eo aer make ak endowment.

• Liāp ippān eo pāleen (Lale 26.3.1.)

14.4.7

Bōk Koņaan ilo M̧akūtkūt ko n̄an Membōr ro Ejjeļo̧k Pāleer

Juon armej eo me ejjab jokwe ippān armej eo pāleen ak ej tōn jepel ej bōk koņaan ilo ward eo ijo ej jokwe ie (geographic). E armej eo emaron̄ etal n̄an juon ward ak m̧akūtkūt ko an membōr ejjeļo̧k pāleer n̄e armej eo ededeļo̧k aer kōm̧m̧ane pepa in jepel ko aer.

14.4.8

Pāāren ro me Ejjeļo̧k Pāleer

Membōr ro im ritōl ro rej kile im kajjieon̄ n̄an jipan̄ tōpar aikuj ko rejenolo̧k an pāāren ro me ejjeļo̧k pāleer. Pāāren ro me ejjeļo̧k pāleer me ewōr nejier ajri rej jokwe ippāer ilo m̧weo remaron̄ jar ilo ward eo ilo jikin eo rej jokwe ie (geographic). Ilo aer kōm̧m̧an menin ej kōtļo̧k bwe ajri ro ren niknik ilo Būraimere im doulul ko an jodikdik ro. Pāāren ro ejjeļo̧k pāleer remaron̄ etal n̄an m̧akūtkūt ko an juon ward an rūm̧m̧an ded ro ejjeļo̧k pāleer ak rūtto ro ejjeļo̧k pāleer.