14.

Ol Singgel Memba

14.0

Fas Toktok

Sevya i stap invaetem evriwan blong kam long Hem mo kam pat blong Jos blong Hem (luk long 2 Nifae 26:24). Ol man mo ol woman, we oli no mared yet, o, oli bin divos o oli wido, oli wan bigfala namba long membasip ia blong Jos. Hem i impoten blong evriwan i faenem hop tru long Atonmen blong Jisas Kraes (luk long Ita 12:4). Olgeta trutok ia we oli no save finis, oli save help blong developem kaen hop ia:

• Ol skripja mo ol profet blong ol las dei ia oli konfemem se evriwan we oli fetful blong kipim ol kavenan blong gospel, bae oli gat janis blong laef olsem wan god.

• Stret taem mo fasin we ol blesing ia blong kam olsem wan god bae oli kam, i no kamaot evriwan yet tru long revelesen. Be nomata long hemia bae i oli kam Mosaea 2:41).

• Blong stap wet long Lod i minim blong gohed blong stap obei mo kam antap long saed blong spirit blong gohed blong wokbaot i go from Hem (luk long Aesea 64:4).

• God i givim laef we i no save finis long evriwan long ol pikinini blong Hem. Evriwan we oli kwalifae blong kasem presen we Sevya i givim wetem gladhat blong Hem, we i presen blong fogivnes, mo laef folem ol komanmen blong Hem, bambae oli kasem laef we i no save finis. (Luk long Mosaea 26:30; Moronae 6:8.)

• Blong trastem olgeta promes ia, i mas gat rus blong hem insaed long fet long Jisas Kraes. Tru long gladhat blong Hem, evri samting long saed blong laef long wol ia, bae oli kam stret (luk long Alma 7:11–13).

Lod i nidim evri memba blong oli help long wok blong Hem blong plan blong fasin blong sevem man insaed long ol wod mo stek blong olgeta (luk long 1 Korin 12:12–27). Olsem we Spirit i lidim, oli singaotem ol singgel memba blong holem ol posisen blong lidasip mo blong tij. Long saed blong ol lidasip koling, i gat seves long olgeta posisen ia:

• Presidensi blong ol wod mo ol stek oganaesesen

• Ol presidensi blong kworom blong ol elda

• Kaonsela long bisoprik

• Ol Hae kaonsela

• Kaonsela long stek presidensi

Insaed long japta ia:

• Toktok ia, “singgel memba,” i tokbaot evri adalt memba blong jos we oli no mared i stap.

• Toktok ia, “Yang Singgel Adalt,” i tokbaot olgeta we yia blong olgeta i 18 kasem 35 yia.

• Toktok ia, “Singgel Adalt,” i tokbaot olgeta yia blong olgeta i stat long 36 yia i go antap.

14.1

Ol Singgel Memba long Ol Jeografik Yunit

Plante long ol singgel adalt memba oli stap go long wan jeografik yunit wetem ol memba we oli gat ol defren yia. Oli gat ol janis blong givim seves, tij, lid, mo joen wetem ol pipol long plante kaen situesen.

14.1.1

Stek Lidasip

14.1.1.1

Stek Presidensi

Blong stek presidensi i tekpat fulwan blong wok wetem ol singgel memba insaed long wok blong God blong fasin blong sevem man mo kam olsem wan god, hem i impoten tumas.

Stek presiden i save givim wok long wan long ol kaonsela blong hem mo wan hae kaonsela blong oli sapotem ol singgel adalt. Hem i save givim wok tu long wan kaonsela mo wan hae kaonsela blong sapotem ol yang singgel adalt. Hem i save askem stek Rilif Sosaeti presiden tu blong givim wok long wan memba blong presidensi blong sapotem ol singgel adalt mo ol yang singgel adalt. Ol semmak lida ia oli save givim wok blong tugeta grup long olgeta.

Stek presidensi i lukluk speseli long ol yang singgel adalt—semmak olsem we oli mekem evri memba blong jeneresen ia we i stap kam antap.

Stek presidensi i disaed tu se bae ol aktiviti ia oli tekples long level blong wod, stek, o tufala tugeta. Ol aktiviti blong ol singgel adalt oli save tekples long level blong stek, mo maltistek. (Luk long japta 20).

Taem we namba blong ol singgel memba we oli stap long wan ples i inaf, ol stek presiden oli save rekomendem blong stap oganaesem wan yang singgel adalt wod, o wan singgel adalt wod (luk long 14.3).

Wan stek (o wan grup blong ol stek we oli kolkolosap long olgeta) bae oli no save gat inaf singgel memba blong krietem wan yang singgel adalt o wan singgel adalt wod. Long situesen olsem, Eria Presidensi i save givim raet long wan stek presiden blong invaetem evriwan long ol memba ia blong oli memba blong wan jeografik wod we oli jusum. Hemia bae i letem ol singgel adalt o ol yang singgel adalt blong oli givim seves mo oli wosip tugeta. Eria Presidensi i kaonsel wetem memba blong Presidensi blong Olgeta Seventi mo Kworom blong Olgeta Twelef Aposol we oli gat wok blong lukaot long olgeta.

14.1.1.2

Ol Komiti blong Stek Yang Singgel Adalt mo Singgel Adalt

Ol singgel memba oli givim seves long ol pikinini blong God taem oli tekpat long wok blong Hem blong fasin blong sevem man mo fasin blong kam olsem wan god (luk long 1.2 mo 14.2). Blong helpem olgeta blong mekem olsem, stek presidensi i save krietem wan yang singgel adalt komiti. Komiti ia, insaed i gat ol yang singgel adalt lida we oli kamaot long wanwan wod.

Oli singaotem wan yang singgel adalt man mo yang singgel adalt woman blong lidim komiti. Oli givim seves long stek kaonsel.

Sapos i nogat inaf yang singgel adalt blong mekem wan komiti insaed long wan stek, wan grup blong ol stek we oli stap klosap oli save krietem wan komiti we Eria Presidensi i apruvum.

Stek presidensi i save krietem wan singgel adalt komiti. Komiti ia, insaed i gat sam singgel adalt we oli kamaot long wanwan wod. Oli singaotem wan singgel adalt man mo wan singgel adalt woman blong lidim komiti ia. Oli givim seves long stek kaonsel.

Sapos i nogat inaf singgel adalt blong mekem wan komiti insaed long wan stek, wan grup blong ol stek we oli stap klosap oli save krietem wan komiti we Eria Presidensi i apruvum.

Ol komiti oli mas lukaotem blong sapotem ol memba tru long frensip mo ol janis blong tekpat insaed long wok blong God blong fasin blong sevem man mo fasin blong kam olsem wan god (luk long 14.2 Oli mekem plan blong gat ol janis blong lanem gospel, mo givim seves mo gat ol aktiviti.

Ol komiti ia, oli mit olsem we i nid. Memba blong stek presidensi mo stek Rilif Sosaeti presidensi we oli givim wok ia long hem mo hae kaonsela we oli givimaot wok ia long hem, i save go long ol miting ia blong givim sapot.

Ol yang singgel adalt komiti oli kodinetem ol wok wetem ol institiut program we i stap long yunivesiti, sapos i gat.

Plante taem, komiti blong ol singgel adalt mo komiti blong ol yang singgel adalt, oli wok seperet long wanwan long tufala.

14.1.2

Wod Lidasip

14.1.2.1

Bisoprik

Bisoprik i ki ia blong mekem ol singgel memba oli tekpat insaed long wok blong God blong fasin blong sevem man mo fasin blong kam olsem wan god. Oli wok wetem wod kaonsel blong faenem ol koling mo ol wok we oli save givimaot, we oli gat mining, hemia blong ol singgel memba. Oli luksave mo traehad blong help blong lukluk long ol nid blong ol singgel papa o mama.

Plante taem, bisoprik i sapotem ol singgel memba semmak olsem we oli stap sapotem evri memba blong kworom blong ol elda mo Rilif Sosaeti. Be, from se nambawan responsabiliti blong hem i blong lukluk long jeneresen we oli stap kam antap, bisoprik i mekem olgeta samting ia tu:

• Wan memba blong bisoprik i mit wetem wanwan yang singgel adalt wan taem long wan yia o moa.

• Bisoprik i kasem ol apdeit oltaem long saed blong gudlaef blong ol yang singgel adalt. Presiden blong kworom blong ol elda mo presiden blong Rilif Sosaeti oli toktok raon long ol nid blong ol yang singgel adalt long taem blong wod kaonsel miting. Ol lida blong komiti blong ol yang singgel adalt, oli save invaetem olgeta tu long miting ia.

• Bisoprik i save oganaesem wan wod yang singgel adalt komiti (luk long 14.1.2.4). (Ol singgel adalt komiti blong olgeta we oli gat 31 yia i go antap, oli stap oganaesem olgeta long level blong stek.)

14.1.2.2

Ol Memba blong Kworom blong Ol Elda mo Rilif Sosaeti we Oli Gat Wok blong Lukaotem Ol Yang Singgel Adalt

Presiden blong kworom blong ol elda, mo presiden blong Rilif Sosaeti, wanwan long tufala i givim wok long wan memba blong presidensi blong tufala blong sapotem ol yang singgel adalt. Ol memba blong presidensi ia, oli lanem ol samting we ol yang singgel adalt oli strong long hem, mo oli helpem olgeta blong lukluk long ol nid blong olgeta.

Presiden blong kworom blong ol elda, mo presiden blong Rilif Sosaeti i save givim ripot blong ol hadwok ia i go long wod kaonsel miting. Sapos i gat wan wod yang singgel adalt komiti, oli invaetem ol lida blong komiti ia blong go mo givim ripot long ol wok blong olgeta.

Ol memba blong ol presidensi ia, oli pat blong wod yang singgel adalt komiti sapos i gat wan we oli oganaesem i stap (luk long 14.1.2.4).

14.1.2.3

Ol Yang Singgel Adalt Lida

Long wan wod we i gat inaf namba blong ol yang singgel adalt, bae bisoprik i save singaotem wan yang singgel adalt brata mo wan yang singgel adalt sista, blong tufala i stap olsem ol yang singgel adalt lida. Ol responsabiliti blong tufala, i gat olgeta ia:

• Helpem ol yang singgel adalt blong oli tekpat long wok blong God blong fasin blong sevem man, mo fasin blong kam olsem wan god (luk long 14.2).

• Stap givim seves long stek yang singgel adalt komiti.

• Lidim wod yang singgel adalt komiti sapos i gat wan we oli oganaesem i stap.

• Mit oltaem wetem presidensi blong kworom blong ol elda mo presidensi blong Rilif Sosaeti. Long ol miting ia, oli toktok raon long wanem nao ol yang singgel adalt oli strong long hem, mo wei blong helpem olgeta blong lukluk long ol nid blong olgeta. Oli lukluk plante tu blong oli mekem wok blong givhan long ol yang singgel adalt.

• Go long ol wod kaonsel miting taem oli invaetem tufala.

14.1.2.4

Wod Yang Singgel Adalt Komiti

Insaed long sam wod, i gat plante yang singgel adalt. Insaed long ol wod ia, bisop i save filim se bae wan wod yang singgel adalt komiti bae i save helpem ol yang singgel adalt lida long wok blong tufala. (Ol singgel adalt komiti, oli stap oganaesem olgeta long level blong stek. Luk long 14.1.1.2.)

Ol memba blong komiti, insaed i gat:

• Ol wod yang singgel adalt lida.

• Sam moa yang singgel adalt we bisoprik i save invaetem.

• Ol memba blong presidensi blong kworom blong ol elda mo blong presidensi blong Rilif Sosaeti, we oli kasem wok blong sapotem ol yang singgel adalt.

14.2

Stap Tekpat long Wok blong God blong Fasin blong Sevem Man mo Fasin blong Kam Olsem Wan God

God i stap invaetem evriwan blong oli go long Kraes mo tekpat insaed long wok blong Hem blong fasin blong sevem man mo fasin blong kam olsem wan god taem:

• Yumi stap laef folem gospel blong Jisas Kraes.

• Yumi stap kea long olgeta we oli stap long nid.

• Yumi stap invaetem evriwan blong akseptem gospel.

• Yumi stap joenem ol famli blong taem we i no save finis.

Ol singgel memba oli mekem wok ia insaed long hom mo long jos. Oli tekpat insaed long ol kworom blong ol elda, mo insaed long ol Rilif Sosaeti. Oli givim seves long ol koling mo ol wok we ol lida oli givimaot long olgeta, we i tekem tu, wok blong givhan. Olgeta wod mo stek oli save mekem plan blong gat sam moa aktiviti we oli blong ol singgel memba nomo we oli jusum blong tekpat long olgeta (luk long 14.2.1.3).

14.2.1

Stap Laef Folem Gospel blong Jisas Kraes

14.2.1.1

Haos Naet mo Gospel Stadi

Ol lida mo ol memba we oli disaed blong tekpat, oli save oganaesem, wan o moa long wan haos naet grup blong ol singgel adalt, mo ol nara grup blong ol yang singgel adalt. Plante taem, olgeta we oli tekpat, oli no gat ol pikinini long hom. Long ol stek we i gat smol namba blong ol singgel adalt, ol haos naet grup ia oli save krosem ol baondri blong wod.

Antap long hemia, ol singgel memba oli save jusum blong kam tugeta onlaen, o fes tu fes, blong mekem hom gospel stadi. Kam Folem Mi i stap olsem wan risos blong yusum.

Oli leftemap tingting blong evri yang singgel adalt blong oli enrol mo tekpat long institiut klas (luk long 15.2).

14.2.1.2

Ol Sandei Skul Klas

Anda long daereksen blong bisop, presiden blong Sandei Skul long wod i save oganaesem wan klas blong Sandei Skul blong ol yang singgel adalt (luk long 13.3.2).

14.2.1.3

Ol Aktiviti

Anda long daereksen blong ol lida blong wod o stek, ol yang singgel adalt oli save mekem plan mo oli save tekpat long ol aktiviti we i blong olgeta nomo. Ol aktiviti ia oli save tekples long level blong wod, o blong stek. Samfala eksampol oli go olsem:

• Ol tempol visit.

• Wok blong famli histri.

• Stap serem gospel.

• Komuniti seves.

• Ol taem blong miusik mo kalja.

• Ol spot.

Anda long daereksen blong ol lida blong stek, ol yang singgel adalt oli save mekem plan blong holem ol semmak aktiviti long level blong stek.

Ol Eria Seventi oli save wok wetem ol stek presiden blong stanemap ol komiti blong mekem plan blong ol maltistek aktiviti blong ol singgel memba.

Mane blong ol aktiviti i kam long bajet blong stek o blong wod. Taem oli holem ol maltistek o ol eria aktiviti, ol lida oli meksua se i gat inaf mane we i kam long wanwan long ol stek ia.

Mane blong mekem ol aktiviti ia, i mas go wetem ol polisi we oli stap long 20.2.6 Sapos i gat eksepsen, ol memba oli save pem sam pat blong mane blong spendem taem oli holem ol aktiviti long level blong maltistek, o blong eria. Ol lida oli meksua se evriwan i save tekpat.

Blong gat sam moa aktiviti gaedlaen, luk long 20.2 mo 20.3.

14.2.2

Stap Kea long Olgeta long Nid

14.2.2.1

Seves

Semmak olsem evri disaepol blong Jisas Kraes, ol singgel memba oli gat ol janis we oli stap oltaem blong givim seves long wanwan man o woman, o givim seves long ol grup blong ol pipol. Komuniti seves i stap olsem wan long ol bigfala wei we ol yang singgel adalt oli save kam strong long saed blong spirit.

Ol seves aktiviti oli save lukluk nomo long:

• Welfea mo indipenden laef.

• Famli histri.

• Komuniti program blong kea.

• Stap serem gospel.

• Stap mekem ol niu memba mo ol memba we oli stap kambak oli kam strong moa.

• Yumaniterian nid long homples o long narafala ples.

Long weaples i gat, JustServe.org i givim sam janis blong givim seves long wanwan man, woman, mo ol grup.

14.2.2.2

Wok blong Givhan

Wanwan singgel brata i gat ol givhan brata we oli lukaot long hem. Wanwan singgel sista i gat ol givhan sista mo ol givhan brata we oli lukaot long hem. Ol wok ia, oli givimaot long wanwan man o woman, be i no long ol grup, o ol apatmen. (Luk long japta 21).

14.2.3

Stap Invaetem Evriwan blong Akseptem Gospel

Ol singgel memba oli gat wan janis blong invaetem evriwan blong kasem ol blesing blong gospel blong Jisas Kraes. Oli mekem hemia taem oli serem gospel, taem oli mekem ol niu memba mo ol memba we oli stap kambak, oli kam strong moa, mo taem oli go luk mo toktok wetem olgeta we oli no stap tekpat. (Luk long japta 23).

Sam yang singgel adalt oli stap muv plante taem. Wanwan taem, ol yang singgel adalt oli save oganaesem ol aktiviti blong oli go faenem mo welkamem ol nara yang singgel adalt insaed long stek. Olgeta aktiviti ia, bae oli mekem tu i joen wetem ol stek we oli stap kolosap.

Bae ol yang singgel adalt oli save help blong save tij wetem, mo blong save sapotem ol fultaem misinari.

14.2.4

Stap Joenem Ol Famli blong Taem we I No Save Finis

Olsem wanwan man, woman mo olsem wan grup, ol singgel memba oli save help blong mekem ol famli oli kam wan, blong taem we i no save finis. Eksampol. Oli save:

• Rere blong mekem ol kavenan wetem God taem oli kasem ol odinens, we i tekem tempol endaomen tu (luk long 27.2.2).

• Givim seves olsem ol tempol odinens wokman, o volontia (luk long 25.5).

• Tekpat long ol odinens long bihaf blong ol dedman.

• Lanem abaot ol narafala famli mo bubu blong olgeta (luk long Famli blong Mi: Ol Stori we Oli Karem Mifala I Kam Tugeta).

• Faenemaot nem blong ol bubu we oli nidim blong kasem ol odinens blong tempol (luk long FamilySearch.org).

• Blong stap givim seves olsem ol konsalten blong tempol mo famli histri wok (luk long 25.2.4).

• Tekpat long wok blong indeksing (luk long FamilySearch.org/indexing).

14.3

Ol Yang Singgel Adalt Wod mo Stek mo Ol Singgel Adalt Wod

Plante long ol singgel memba oli stap go long ol jeografik wod. I gat eksepsen long ples ia we i gat plante singgel memba we oli stap laef kolkolosap, nao ol prishud lida oli save rekomendem blong krietem olgeta yunit ia. Ol yunit ia, oli mas folem ol standet we oli stap long japta 37.

• Wan yang singgel adalt wod blong olgeta we oli gat 18–35 yia (luk long 37.2)

• Wan yang singgel adalt stek blong olgeta we oli gat 18–35 yia (luk long 37.3)

• Wan singgel adalt wod blong olgeta we oli gat 36–45 yia (luk long 37.5)

Long ol eria we oli gat ol bigfala namba blong ol yang singgel adalt, ol prishud lida oli save givim tingting blong krietem:

• Wan yang singgel adalt wod blong olgeta we oli gat 18–25 yia.

• Wan yang singgel adalt wod blong olgeta we oli gat 26–35 yia.

Olgeta yunit ia oli yusum nomol program blong Jos olsem we i posibol. Oli folem ol instraksen insaed long hanbuk ia.

Ol memba we oli save pat blong yunit ia, oli save jusum blong kam memba blong yang singgel adalt wod, o singgel adalt wod, taem we i gat. O oli save jusum blong pat blong jeografik wod blong olgeta.

Membasip blong wan insaed long wan yang singgel adalt wod, o singgel adalt wod, i blong sot taem nomo:

• Afta we wan singgel memba i mared, hem i kam pat blong wan jeografik wod.

• Taem wan memba blong wan yang singgel adalt wod i kasem 31 yia, hem i kam memba blong wan singgel adalt wod (sapos i gat wan long ples we hem i stap laef long hem), o i kam pat blong wan jeografik wod.

• Afta we wan singgel memba i kasem 46 yia, hem i kam pat blong wan jeografik wod.

Taem memba i stap muv bitwin ol wod ia, memba mo ol lida blong hem oli toktok wetem ol lida blong jeografik wod. Ol lida blong niu wod oli givim wok long ol givhan brata mo sista blong lukaotem hem. Oli putum plan blong givim wan koling o wok we bae i helpem memba ia blong hem i filim se hem i welkam mo i tekpat long wok blong wod.

14.4

Sam Moa Gaedlaen mo Polisi

14.4.1

Ol Ples blong Kam Tugeta

Wan ples blong kam tugeta, hem i wan ples we ol yang singgel adalt mo ol fren blong olgeta oli save kam tugeta blong felosip mo tekpat long eniwan long ol samting ia:

• Blong stap lanem gospel, i tekem tu institiut

• Ol kos blong indipenden laef, ol janis blong kasem edukesen, mo ol sapot grup

• Seves mo ol aktiviti

• Stap serem gospel mo go aot long komuniti

• Tempol mo famli histri wok

• Ol narafala program blong Jos

Evri ples blong kam tugeta, bae Eria Presidensi i mas apruvum. Eni ples blong kam tugeta long hem, ol stek presiden mo ol bisop oli lukaot long olgeta. Oli ol bilding blong Jos we oli stap finis, olsem wan mitinghaos o wan institiut bilding. Ol stek we oli wantem blong stanemap wan ples blong kam tugeta blong ol yang adalt, oli mas kontaktem Eria Presidensi.

14.4.2

Ol Mandei Naet

Ol taem nomo we oli no folem rul (eksepsen), ol wod blong ol yang singgel adalt, mo ol wod blong ol singgel adalt, oli save holem ol aktiviti long ol Mandei naet, mo oli save yusum ol bilding blong Jos (luk long 20.5.3).

14.4.3

Sam Moa Kworom blong Ol Elda mo Rilif Sosaeti

Wetem apruvol blong stek presiden, bisop blong wan wod blong ol singgel memba i save oganaesem moa bitim wan Rilif Sosaeti mo kworom blong ol elda. (Luk long 8.1.3 mo 9.1.3.)

14.4.4

Ol Memba we Oli Singaotem blong Givim Seves insaed long Ol Singgel Adalt Yunit

Bisop mo stek presiden nomo long ol yunit blong ol singgel memba, bae oli singaotem olgeta. Olsem we Spirit i talem, olgeta we oli stap long yunit blong ol singgel memba oli save singaotem ol narawan blong holem ol koling.

Olgeta we oli singaotem olgeta long koling blong givim seves long wan yunit blong ol singgel memba we i stap aotsaed long jeografik wod blong olgeta, plante taem, oli no givim seves i bitim tri o faef yia long ol yunit ia. Ol taem limit ia, i tekem tu ol seves we i folfolem olgeta long ol defren koling.

Ol lida blong ol jeografik stek oli mas givim sapot taem oli lukluk blong singaotem ol memba blong givim seves long ol yunit blong ol singgel memba. Be, ol lida ia, oli kaonsel tugeta long save andastanem situesen blong ol memba.

Oli save givim koling long wanwan man, woman, o long ol kapol. Long sam situesen, bae waef o hasban i nid blong stap long jeografik wod, mo narawan i save givim seves long wan wod blong ol singgel memba.

Membasip rekod blong ol bisop mo famli blong olgeta, plante taem oli stap long jeografik wod blong olgeta taem we oli givim seves long ol wod blong ol singgel memba. I semmak wetem olgeta we oli givim seves insaed long stek presidensi o bisoprik, long hae kaonsel, o insaed long stek presidensi blong Rilif Sosaeti sapos oli singaotem ol memba ia blong givim seves aotsaed long jeografik wod blong olgeta. Olgeta lida ia, wetem famli blong olgeta, oli pem taeting mo ofring blong olgeta tru long jeografik wod blong olgeta. Oli go tu long jeografik wod mo stek lida blong olgeta blong kasem intaviu blong ol tempol rekomen.

14.4.5

Skul Holidei

Sapos i posibol, ol yang singgel adalt wod oli save gohed blong wok long taem blong ol skul holidei. Sapos i nid, plante yang singgel adalt wod oli save mit tugeta. Long ol situesen olsem, ol wod oli kipim wan seperet rekod, wetem seperet ripot blong atendens, mo faenens.

14.4.6

Ol Intaviu insaed long Ol Yang Singgel Adalt Wod mo Stek

Long plante long ol situesen olsem, stek presiden nao i intaviu long ol memba we:

• Oli kasem endaomen blong olgeta bakegen.

• Oli sil long hasban o waef.

• Oli sendem nem blong olgeta blong oli kasem Melkesedek Prishud.

• Oli sendem nem blong olgeta blong oli givim seves long misin.

Olsem wan eksepsen, stek presiden blong wan yang singgel adalt stek i save givim raet long ol kaonsela blong hem blong oli mekem sam long ol intaviu ia.

Long ol bigfala wod blong ol yang singgel adalt, ol bisop oli save givim raet long ol kaonsela blong olgeta blong oli holem intaviu blong ol memba we oli:

• Oli kasem endaomen blong olgeta bakegen.

• Oli sil long hasban o waef. (Luk long 26.3.1.)

14.4.7

Tekpat long Ol Aktiviti blong Ol Singgel Memba

Wan memba we i seperet long hasban o waef blong hem, o i stap gotru long wan divos, i stap nomo long wan jeografik wod. Hem i save go long wan wod o long ol aktiviti blong ol singgel memba taem nomo divos oda blong hem i faenol.

14.4.8

Ol Yang Singgel Papa o Mama

Ol memba mo ol lida oli luksave mo traehad blong help blong lukluk long ol spesifik nid blong ol singgel papa o mama. Ol singgel adalt papa o mama we oli gat ol pikinini long hom, oli stap nomo long jeografik wod blong olgeta. Taem oli mekem olsem, ol pikinini bae oli save stap aktiv insaed long ol oganaesesen blong Praemeri mo yut. Ol singgel papa o mama oli save go long ol aktiviti blong wan yang singgel adalt wod, o wan singgel adalt wod.