15.

Ol Seminari mo Ol Institiut blong Relijin

15.0

Fas Toktok

Ol Seminari mo Ol Institiut blong Relijin (S&I) oli helpem ol papa mo mama mo ol lida blong Jos blong stap helpem ol yut mo ol yang adalt blong mekem fet blong olgeta i kam moa bigwan long Jisas Kraes mo long gospel blong Hem we i kambak. Hemia, oli mekem taem oli sapotem wan stadi blong skripja long hom, mo ol toktok blong ol profet we oli stap laef mo ol nara lida blong Jos.

Ol program blong Seminari mo Institiut, Bod blong Edukesen nao i stanemap ol polisi we i rulum olgeta. Presiden blong Jos nao i daerektem bod ia. Stek presiden i mekem ol program ia oli hapen insaed long stek mo ol wod. Ol lida blong stek mo wod oli luklukbak long hamas ol yut oli tekpat long ol program blong Seminari mo Institiut.

Oli givim wok long wan ripresentativ blong S&I insaed long wanwan stek blong helpem ol lida blong mekem ol program blong S&I oli gohed gud.

15.1

Seminari

Seminari i wan program blong fo yia, we insaed long hem, ol yut oli stap stadi long gospel blong Jisas Kraes olsem we i stap insaed long ol skripja mo insaed long ol tijing blong ol lata-dei profet. Plante taem, ol seminari studen oli gat 14–18 yia.

Oli stap mekem ol klas long ol dei blong wik taem skul i stap gohed. Namba blong ol dei we Seminari klas i stap kam tugeta long hem evri wik, oli save jenisim folem ol lokol situesen. (Luk long Seminary Class Options blong gat moa infomesen.) Ol klas o onlaen asaenmen i sapos blong tekem samples fo aoa evri wik blong oli finisim.

Bisoprik, ol lida blong yut, mo ol presidensi blong kworom mo klas oli leftemap tingting blong evri yut blong tekpat fulwan long seminari. Bisoprik i leftemap tingting blong ol papa mo mama blong rejistarem ol pikinini blong olgeta evri yia bifo seminari klas i stat. Blong gat moa infomesen, luk long Seminari Rejistresen long ChurchofJesusChrist.org.

Wan lokol bod blong edukesen bae i save stanap long ples we i gat plante stek wetem ol seminari klas (we i tekem tu ol hom stadi klas) oli kolosap mo oli gat ol sem wari mo jalenj. Luk long seminary.ChurchofJesusChrist.org.

15.1.1

Ol Tija

Ol tija blong seminari, oli mas ol memba blong Jos we oli gat fet long Lod Jisas Kraes, mo oli gat wan testemoni abaot gospel blong Hem we i kambak. Oli mas laef folem ol prinsipol we oli stap tijim mo oli wok gud wetem ol yut. Taem i posibol, ol tija oli sapos blong gat wan tempol rekomen we i laef i stap.

Wan memba blong stek presidensi i toktok wetem bisop, stek supavaesa, mo ripresentativ blong S&I ripresentativ blong save huia i save kam wan seminari tija. Wan memba blong stek presidensi, o wan hae kaonsela we i kasem wok ia, i singaotem, i setem apat, mo i rilisim ol tija blong seminari mo ol stek supavaesa. Afta we oli singaotem wan mo setem hem apat, S&I ripresentativ i trenem mo i sapotem hem.

Blong protektem ol tija mo ol studen, tu adalt oli mas stap insaed long bilding o insaed long hom we seminari klas i stap hapen long hem. Oli save singaotem wan moa tija, o wan nara responsibol adalt i save kasem wok ia blong hem i mas stap. Seken adalt ia, hem i save waef o hasban blong tija, o hem i save papa o mama blong wan memba blong klas. Hem i mas sem seks olsem tija, be nomo sapos man o woman ia, i wan adalt memba blong famli blong tija ia. Wan tija i neva mas stap hemwan wetem wan studen, be nomo sapos studen ia, i pikinini blong tija. I semmak samting long eni nara ples olsem wan klasrum, wan bilding, wan kam tugeta onlaen, o wan trak.

15.1.2

Ol Bilding, Ol Tul blong Wok, mo Ol Buk

Ol lida blong stek mo wod oli meksua se ol ples olsem ol mitinghaos, o hom blong ol memba oli open i stap blong oli save holem ol klas blong seminari. Oli no mas rentem ol bilding o ol rum blong save holem ol klas blong seminari. Sapos oli holem klas insaed long wan mitinghaos, ol tija oli mas gat akses long ol tul blong wok we oli stap insaed long risos senta ia.

Ripresentativ blong S&I i givim ol buk blong ol tija mo ol studen blong wanwan klas. Ol studen oli mas tekem ol skripja blong olgetawan i kam; ol skripja ia, i save hemia we oli printim, o i dijitol.

15.1.3

Ol Ofisa blong Klas mo Ol Aktiviti

Wan seminari tija i save jusum huia ol ofisa blong klas, olsem wan presiden, ol vaes presiden, mo wan sekretari. Ol tija oli kontaktem papa mo mama blong studen faswan, mo bisop blong evriwan i agri. Oli no sastenem o setem apat ol klas ofisa ia. Oli save helpem tija wetem ol evri dei diuti blong klasrum, mo leftemap ol nara studen blong kam mo tekpat.

Ol tija blong seminari oli no sapos blong gat ol aktiviti aotsaed long ol nomol taem blong klas, o longwe long klasrum. Blong gat wan eksepsen, i nidim ol lokol prishud blong oli mas agri wetem.

15.1.4

Kredit mo Graduesen

Ol seminari studen oli save lan moa gud mo mekem jenis long laef blong olgeta i moa tru, sapos oli kam long klas oltaem, tekpat, mo stadi long ol skripja aotsaed long taem blong klas. Taem oli stap mekem olgeta samting ia, oli stap winim sam seminari kredit evri yia, mo oli save graduet long seminari.

Sam studen, oli save faenem i had blong winim ol seminari kredit from se oli gat problem blong save rid, o sam nara risen. Tija i save stretem ol samting blong i go stret wetem ol nid blong ol studen. S&I ripresentativ i save askem blong mekem ol jenis blong wan ful program. Ol jenis ia i nidim blong S&I administresen i apruvum.

Blong wan studen i graduet long seminari, hem i mas winim fo yia kredit, mo i mas kasem wan eklesiastik endosmen we i kam long wan memba blong bisoprik. Endosmen ia, i jekem se wan studen i klin inaf mo hem i stap komitim hemwan blong laef folem ol standet blong laef.

Evri yia, stek i holem wan seminari graduesen. Taem ia, wan memba blong stek presidensi o wan hae kaonsela nao i plan from. Ripresentativ blong S&I i save help. Blong kasem sam moa infomesen, luk long Wan Gaed blong Seminari Graduesen mo Institiut Graduesen Eksasaes.

15.1.5

Rilis Taem Seminari

Long sam eria long Yunaeted Stet mo Kanada, ol lokol loa oli letem ol studen oli aot long skul mo oli go long seminari long taem blong aoa blong skul. Jos Bod blong Edukesen i apruvum hemia long ol ples we oli givim raet blong kaen seminari ia i tekples long hem. Blong gat moa infomesen, luk long Released-Time Seminary long ChurchofJesusChrist.org

15.2

Institiut

Institiut i givim janis blong gat ol klas long dei blong wik blong stadi long gospel; ol klas ia oli save mekem fet mo testemoni long Jisas Kraes mo gospel blong Hem we i kambak, i kam strong moa. Ol stek lida oli mekem sua se institiut i stap blong evri yang singgel adalt we oli gat 18–30 yia.

Oli leftemap tingting blong evri yang singgel adalt blong go long ol institiut klas nomata sapos oli stap go long skul o no. Oli save go long ol institiut klas we i stap long ol kampas (sapos i gat). Oli save go tu long ol onlaen klas blong institiut o ol klas we stek i oganaesem.

Luk long Stake Institute blong ol gaedlaen blong ol samting ia:

• Blong stanemap mo lukaotem ol institiut klas we stek i oganaesem

• Mekem plan blong ol fasiliti

• Givim koling long ol tija

• Stap luksave wok we studen i winim

15.2.1

Ol Nara Klas blong Relijin

Ol stek presidensi oli maet wantem blong givim ol relijin klas blong ol adalt we yia blong olgeta i stat long 31 i go antap. Olgeta klas ia, oli no wan wok anda long S&I mo oli no stap singaotem olgeta institiut klas. Be, oli save yusum ol tul mo lesenbuk blong institiut.

15.3

Ol Jos Skul mo Jos Edukesen Sistem

Blong kasem infomesen long saed blong ol praemeri mo sekendri skul, BYU-Pathway Worldwide, mo ol ples blong kasem moa hae edukesen, luk long CES.ChurchofJesusChrist.org. Infomesen blong stap finisim ol eklesiastik endosmen blong go long ol skul ia, i stap long ples ia tu.

Antap long hemia, infomesen abaot eklesiastik kliarens blong wok tru long CES Ecclesiastical Clearance Office, yu save faenem long help.ChurchofJesusChrist.org.