15.

Semineri kei na Inisitute ni Lotu

15.0

iVakamacala Taumada

Semineri kei na Inisitute ni Lotu (S&I) e vukei ira na itubutubu kei na iliuliu ni Lotu ena nodra vukei na itabagone kei na itabagone qasecake me vakatitobutaki na nodra vakabauti Jisu Karisito kei na Nona kosipeli vakalesui mai. Sa vakayacori oqo ena kena tokoni na vulici e vale ni ivolanikalou kei na nodra vosa na parofita bula kei ira na iliuliu tale eso ni Lotu.

Na parokaramu ni semineri kei na inisitute e cicivaki ena lawatu e tauyavutaka na Matabose ni Vuli ni Lotu. Na matabose oqo e dusimaki mai vua na Peresitedi ni Lotu. Eratou na vakayacora ena iteki kei na tabanalevu na parokaramu oqo na mataveiliutaki ni iteki. Era dau railesuva wasoma na iliuliu ni iteki kei na tabanalevu na nodra vakaitavi na nodra itabagone ena parokaramu ni semineri kei na inisitute.

E dua na mata ni S&I ena lesi ki na iteki yadua me vukei ira na iliuliu ena cicivaki ni parokaramu ni S&I.

15.1

Semineri

Na semineri e dua na parokaramu yabaki va ka ra vulica kina na itabagone na kosipeli i Jisu Karisito me vaka e kunei ena ivolanikalou kei na nodra ivakavuvuli na parofita ni gauna oqo. O ira na gonevuli ni semineri, vakararaba, o ira na yabaki 14–18.

E dau vakayacori na kalasi ena loma ni macawa ni yaco tiko na gauna ni vuli. Na levu ni siga e dau sota kina na kalasi ni semineri e veimacawa e rawa ni moici me veiganiti kei na ituvaki ni vanua. (Raica na Digidigi ni Kalasi ni Semineri me baleta na ikuri ni ivakamacala.) Na kalasi se ilesilesi ena monalivaliva e dodonu me taura e rauta ni va na auwa dua na macawa me vakacavari kina.

Sa nodratou itavi na matabisopi, iliuliu ni itabagone, kei na mataveiliutaki ni kuoramu kei na kalasi me ra dau veivakayaloqaqataki vei ira yadua na itabagone me ra vakaitavi vakavinaka ena semineri. Eratou na vakayaloqaqataki ira na itubutubu o iratou na matabisopi me ra rejisitataka na luvedra ena veiyabaki ni se bera ni tekivu na kalasi ni semineri. Me baleta na ikuri ni ivakamacala, raica na Rejisita ni Semineri ena ChurchofJesusChrist.org.

E dua na matabose ni vuli ena rawa me tauyavutaki ena vanua ka tiko kina e vica vata na iteki ka vakayacori tiko kina na kalasi ni semineri, (oka kina na kalasi ni vuli e vale) se erau veivolekati na rua oqo ka tautauvata na nodrau kauwai kei na bolebole. Raica na seminary.ChurchofJesusChrist.org.

15.1.1

Qasenivuli

O ira na qasenivuli ni Semineri e dodonu me ra lewe ni Lotu era vakabauta na Turaga o Jisu Karisito ka vakadinadinataka na Nona kosipeli vakalesui mai. E dodonu mera bulataka na ivakavuvuli era vakavulica ka rawa ni cakacaka vakavinaka kei ira na itabagone. Kevaka e rawa, e dodonu me tiko na nodra ivolatara vakabau ni valetabu na qasenivuli.

Ena veivakasalataki e dua na lewe ni mataveiliutaki ni iteki kei bisopi, supavaisa ni iteki, kei na mata ni S&I me baleti ira e rawa ni ra qasenivuli ni semineri. E dua na lewe ni mataveiliutaki ni iteki se dua ena matabose e cake sa lesi, ena kaciva, vakatikora, ka vagalalataka na qasenivuli ni semineri ena iteki kei na supavaisa ni iteki. Ni sa kacivi ka vakatikori oti, ena tuberi koya ka tokoni koya tiko na mata mai na S&I.

Me ra taqomaki kina na qasenivuli kei na gonevuli, sa dodonu me rau dau tiko e rua na uabula ena vale se itikotiko e vakavulici tiko kina na kalasi. E rawa me kacivi e dua tale na qasenivuli, se rawa ni lesi e dua tale na uabula nuitaki me tiko. Na ikarua ni uabula e rawa ni o wati qasenivuli se nona itubutubu e dua na lewe ni kalasi. E dodonu me tagane se yalewa vata kei qasenivuli, vakavo kevaka e lewe ni matavuvale qase cake nei qasenivuli. E sega ni dodonu vei qasenivuli me tiko duadua vata kei na dua na gonevuli vakavo kevaka e luvena o gonevuli. Oqo e vakayagataki ena ituvaki cava ga, me vaka e dua na rumu ni kalasi, vale, soqoni ena sarasara, se motoka.

15.1.2

Veivale, iYaya, kei na iYaragi

Me ra raica na iliuliu ni iteki kei na tabanalevu ni tu na veivanua me vaka na valenilotu se nodra vale na lewenilotu me baleta na kalasi ni semineri. Me kakua ni redetaki na vale se rumu me baleta na kalasi ni semineri. Kevaka era sota na kalasi ena dua na valenilotu, sa dodonu me rawa ni vakayagataka o qasenivuli na iyaya ena valenivolavola ni ivurevure eso.

Ena vakarautaka o koya na mata ni S&I na nodra iyaragi na qasenivuli kei na gonevuli me baleta na kalasi yadua. Me ra kauta mai na gonevuli na nodra dui ivolanikalou, ivola se vakalivaliva.

15.1.3

Vakailesilesi ni Kalasi kei na iTaviqaravi

E rawa ni digitaka o qasenivuli ni semineri eso na vakaitutu ena kalasi, me vaka na peresitedi, ivukevuke ni peresitedi, kei na dua na sekeriteri. Me na veitaratara mada o qasenivuli kei ira na itubutubu vata kei bisopi me baleta na veivakadonui. Era na sega ni tokoni se vakatikori na vakaitutu ni kalasi. E rawa ni ra vukei qasenivuli ena itavi eso ni veisiga e valenivuli ka vakayaloqaqataki ira eso tale na gonevuli mera lako mai ka vakaitavi.

Me ra kakua ni caka itaviqaravi na qasenivuli ena taudaku ni gauna ni kalasi se me caka tani mai valenivuli. Ke dua na kena veisau ena gadrevi kina na nodra veivakadonui na nodra iliuliu ni matabete.

15.1.4

iDole kei na Tuvaitutu

E rawa ni ra vuli vakavinaka sara na gonevuli ni semineri ka vakatitobutaka na nodra saumaki mai kevaka era dau tiko wasoma ena kalasi, vakaitavi ka vulica na ivolanikalou ena taudaku ni kalasi. Ni ra vakayacora na veika oqo, era na rawata na idole ni semineri ena veiyabaki ka rawa ni tauri ivola mai na semineri.

Eso na gone ena dredre beka nodra rawata e dua na idole ni semineri ena vuku ni dredre ni wilivola se so tale na vuna. E rawa ni moica o qasenivuli na veika e gadrevi me sotava nodra leqa na gonevuli oqo. Sa rawa vua na mata ni S&I me kerea na veivakamatautaki ni parokaramu taucoko. Na valenivolavola ni S&I me vakadonua na veisau oqo ke gadrevi.

Me tauri ivola mai na semineri, sa dodonu me na rawata e dua na gonevuli na idole ni va na yabaki kei na veitokoni vakalotu mai vua e dua ena matabisopi. Na veitokoni oqo ena vakadeitaka ni sa kilikili ka dau yalodina na gonevuli oqo ena bulataki ni ivakatagedegede vakosipeli.

Ena dau vakayacora e veiyabaki na iteki e dua na tuvaitutu ni semineri. Ena tuvaka me baleta na soqo oqo e dua ena mataveiliutaki ni iteki se lewe ni matabose e cake. E rawa ni veivuke na mata mai na S&I. Me baleta na ikuri ni ivakamacala, raica na Na iDusidusi ni ka Dau Caka ena Taurivola ni Semineri kei na Inisitute.

15.1.5

Semineri ena Gauna ni Vuli

Ena so na vanua e Amerika kei Kenada, na lawa e vakatarai ira na gonevuli mera sa biu vuli ka tauri semineri ena gauna ni vuli. Ena vakadonuya na Matabose ni Vuli ena Lotu na vanua me vakayagataki kina na mataqali semineri vaqo. Me baleta na ikuri ni ivakamacala, raica na Released-Time Seminary ena ChurchofJesusChrist.org.

15.2

Inisitute

Na inisitute e vakarautaka na kalasi ni vuli kosipeli ka na vaqaqacotaki kina na vakabauta kei na ivakadinadina kei Jisu Karisito kei na Nona kosipeli vakalesui mai. Mera vakadeitaka na iliuliu ni iteki ni sa vakarautaki tu na inisitute vei ira kece na itabagone qase cake yabaki 18–35.

Mera vakauqeti kece na itabagone qase cake mera laki tauri kalasi ni inisitute, veitalia ga kevaka era vuli tiko se sega. E rawa nira tiko ena kalasi ni inisitute yavutaki vakakoronivuli (kevaka e rawa). E rawa talega nira tiko ena kalasi ni inisitute ena monalivaliva se kalasi yavutaki ena iteki.

Raica na Inisitute ni iTeki me baleta na idusidusi ena veika oqo:

• Kalasi ni inisitute tauyavutaki ka cicivaki ena iteki

• Tuvatuva baleta na iyauqaqa

• Veikacivi ni qasenivuli

• Vakacaucautaki nodra rawaka na gonevuli

15.2.1

Na Kalasi ni Lotu Tale Eso

Ke ratou gadreva na mataveiliutaki ni iteki e rawa ni vakarautaki na kalasi ni lotu baleti ira na uabula yabaki 36 lako cake. Na veikalasi oqo e sega ni cakacaka ni S&I ka sega ni vakatokai me kalasi ni inisitute. Ia, e rawa ni vakayagataki na lewenivuli ni inisitute me baleta na kalasi.

15.3

Koronivuli ni Lotu kei na iVakarau ni Vuli ni Lotu

Me baleta na itukutuku ni koronivuli ni Lotu na paraimiri kei na sekenidri, Salatu ki BYU e Vuravura Raraba, kei na koronivuli ni vuli torocake raica na CES.ChurchofJesusChrist.org. Sa vakarautaki tale tu ga kina na veitokoni vakalotu me baleta na curu ki na veikoronivuli oqori.

Kena ikuri, na itukutuku me baleta na vagalalataki mai na cakacaka vakalotu ena Valenivolavola ni Veivagalalataki mai na Cakacaka Vakalotu ni VVL, ena rawa ni kunei ena help.ChurchofJesusChrist.org.