17.

Katakin kōn Gospel eo

Jej katakin kōn gospel eo n̄an jipan̄ armej ro kōkajoorļo̧k tōmak eo aer ilo Jemedwōj Ilan̄ im Jisōs Kraist. Jej kappukot n̄an jipan̄ armej erom̧ āinwōt Rilo̧mo̧o̧r, bōk kajoor eo An ilo mour ko aer, im āliktata bōk mour indeeo. N̄e naan eo an Anij ej katakin im bōke jān Jetōb, ewōr an kajoor n̄an ukōt bōro ko im im̧we oktak tok eo. Ekar wōr “ļapļo̧k kajoor in an jelōt ļōmņak ko an armej ro jān … jabdewōt men” (Alma 31:5).

17.1

Pedped in Katak ko kōn Katakin āinwōt Kraist

N̄e katakin kōn gospel eo, jinen im jemān ajri ro, rūkaki ro, im ritōl ro rej ļoor waanjon̄o̧k eo an Jisōs Kraist, eo ej M̧aajta Rūkaki. Katakin ilo wāween eo an Rilo̧mo̧o̧r ej juon lōke im eddo ekwojarjar.

Ritōl ro rej kwaļo̧k pedped in katak kein kōn katakin āinwōt Kraist ippān rūkaki ro ilo doulul ko aer. Pedped in katak kein rej kōmeļeļeik ilo eļap tipdikin ilo Teaching in the Savior’s Way.

17.1.1

Iakwe Ro Kwoj Katakin Er

Aolep men ko Rilo̧mo̧o̧r ekar kōm̧m̧ani ej kōn kwaļo̧k iakwe eo An (lale 2 Nipai 26:24). Ritōl ro im rūkaki ro rej ļoor waanjon̄ak eo An kōn kwaļo̧k iakwe n̄an ro ej katakin er. Rej jar kōn ro rej katakin er kōn etāer, kappukot n̄an ekkeijel im meļeļe kōn er, im mije wōt aikuj ko an kajjojo. Rej pukōtļo̧k ro uwaan kūlaaj eo ak doulul eo aer me rejjab kobaļo̧k.

17.1.2

Katakin jān Jetōb eo

N̄an im̧we armej ro n̄an wōr tōmak ilo Jisōs Kraist, rūkaki ro rej aikuj katakin jān jetōb eo. Rūkaki ro rej kappukot tōl eo an Jetōb ilo aer m̧aanjabpopo im katakin, im rej kajjieon̄ mour erreo kōn im̧we eo An kajjojo raan.

17.1.3

Katakin Katak eo

Rilo̧mo̧o̧r ekar katakin katak eo an Jemān. Ļoor waanjon̄ak eo an Rilo̧mo̧o̧r, rūkaki ro rej pedped wōt ioon m̧ool ko an gospel eo me raorōk im rej n̄an lo̧mo̧o̧ren. Rej katakin ilo aer kōjerbal jeje ko rekwojarjar, katak ko an rikanaan ro ilo raan ko āliktata, laajrak in kein katakin ko kar kōmālimi. Rūkaki ro rej tōl juon iien ekōnono eim̧we im lukkuun lale bwe katak ko aer en kōketak im ren lukkuun katak ko rem̧ool. Kein katakin ko kar kōmālimi rej ellaajrak ilo Instructions for Curriculum eo ekāāl ilo ChurchofJesusChrist.org.

17.1.4

Karuwaineneik Niknik Ekkatak

Rūkaki ro rej kōketak membōr ro n̄an eddoiki ekkatak eo aer make. Rej rie membōr ro ilo kijejeto ko aer n̄an ekkatak gospel eo ippāer make im ippān baam̧le ko aer. Rej kajjitōk ippān membōr ro n̄an kwaļo̧k ta eo rej ekkatak kake im n̄an jerbale. Tōmak eo an juon armej ej eddōkļo̧k n̄e e ej niknik ilo bōk koņaan ilo ekkatak gospel eo im mour kōn pedped in katak ko an ilo mour raan otemjeļo̧k.

17.2

Ekkatak im Katakin Gospel eo Pedped ilo M̧weo

N̄an erom̧ rioktak tok n̄an Irooj Jisōs Kraist, kajjojo membōr ilo Kabun̄ in ej bōk eddo in n̄an ekkatak gospel eo kōn e make. N̄an kakobaba, pāāren ro rej aer eddo n̄an katakin gospel eo n̄an ajri ro nejier. Ekkatak gospel eo im katakin ej aikuj in pedped ilo m̧weo. Ritōl im rūkaki ro an Kabun̄ in rej kōketak ekkatak im rie m̧weo me ej pedped ioon ekkatak im katakin kōn gospel eo.

Ritōl ro im rūkaki ro rej kōketak membōr ro n̄an kappukot im̧we eo aer make kōn ekōjkan ekkatak im katakin gospel eo. Kein jipan̄ ko aer reļļap tata ej aikuj in jeje ko rekwojarjar im ennaan ko an kweilo̧k eo eļap. Rie kein jipan̄ ko maron̄ koba Itok, Ļoor Eō im māākjiin ko an Kabun̄ in.

17.3

Eddo ko an Ritōl ro

Ritōl ro rej eddoik katakin im ekkatak ilo doulul ko aer make. Jet iaan wāween ko rej kakūrm̧ool eddo in rej ellaajrak ijin ilaļ.

• Kōm̧m̧ane juon waanjon̄ak kōn ekkatak im katakin kōn gospel eo ilo wāween eo an Rilo̧mo̧o̧r.

• Lukkuun lale bwe katakin ilo doulul ko ej kalōk tōmak im en jim̧we an kōjerbal katak ko.

• Eļan̄n̄e ritōl ro rej membōr in ward ko̧o̧njeļ eo, ekōnono ippān ro jet uwaan ko̧o̧njeļ eo kōn kōkōm̧anm̧anļo̧k wāween ekkatak im katakin ilo ward eo. Bisop eo emaron̄ karuwaineneik būreejtōn eo an Jabōt Jikuuļ n̄an tōl iien ekōnono kein.

• N̄e emenin aikuj, leļo̧k et ko n̄an ro uwaan bisoprik ro n̄an kūr er āinwōt rūkaki ilo doulul eo, ilo aer ļoor unin tōl ko ilo 30.1.

• Kweilo̧k ippān rūkaki ro rekāāl me rej kab kūr er im jipan̄ er maanjabpopo n̄an kūr ko aer (lale Katakin ilo Wāween eo an Rilo̧mo̧o̧r, 40).

• Leļo̧k jipan̄ eo ejjeļo̧k jem̧ļo̧kin n̄an rūkaki ro ilo doulul ko aer. Kōnono n̄an rūkaki ro iien otemjeļo̧k kōn kijejeto ko aer n̄an kalōk tōmak ilo armej ro rej katakin er. Eļan̄n̄e emenin aikuj, kajjitōk ippān būeejtōn eo an Jabōt Jikuuļ kōn jipan̄.

17.4

Kweilo̧k ko an Ko̧o̧njeļ eo an Rūkaki

Ilo kweilo̧k ko an ko̧o̧njeļ eo an rūkaki, rūkaki rej kapilōk ippān doon kōn pedped in katak ko kōn katakin āinwōt Kraist. Rej barāinwōt kapilōk kōn wāween n̄an kōkm̧anm̧anļo̧k ekkatak im katakin gospel eo. Rej kōjerbal Teaching in the Savior’s Way āinwōt juon kein jipan̄.

Kweilo̧k ko an ko̧o̧njeļ eo an rūkaki rej kōm̧m̧an aolep kuwata ilowaan wōt 50 minit in kūlaaj eo ilo Jabōt.

• Kweilo̧k ko n̄an priesthood, Doulul eo an Kōrā ro, im rūkaki ro an Doulul eo an Jiron̄ ro maron̄ kōm̧m̧an ilo Jabōt eo kein kajuon ak kajilu.

• Kweilo̧k ko an rūkaki ro an Jabōt Jikuuļ maron̄ kōm̧m̧an ilo Jabōt eo kein karuo ak kein kemen.

Ko̧o̧njeļ ko an Būraimere būreejtōnji eo ippān juon membōr in bisoprik eo n̄an ļōmņake wāween kōkajoorļo̧k katakin ilo Būraimere. Būeejtōn eo an Jabōt Jikuuļ emaron̄ jipan̄ n̄e emenin aikuj. Wāween ko jet rej ellaajrak itulaļ:

• Rūkaki ro an Būraimere maron̄ pād ilo kweilo̧k ko an ko̧o̧njeļ eo an rūkaki ippān rūkaki ro jān doulul ko jet.

• Kōjenolo̧k kweilo̧k ko an ko̧o̧njeļ eo an rūkaki maron̄ in kōm̧m̧an n̄an rūkaki ro an Būraimere. Kweilo̧k kein remaron̄ kōm̧m̧an ilo iien al eo an Būraimere me 20 minit. Āinwōt an okoktak, remaron̄ kōm̧m̧an m̧okta ak ālkin kweilo̧k ko an Jabōt ak ilo bar juon raan ilo wiik eo.

• Membōr ro an būreejtōnji eo an Būraimere remaron̄ loļo̧k kūlaaj ko an Būraimere im kapilōk ippān rūkaki ro ālkin wōt kōn wāween katakin ilo wāween eo an Rilo̧mo̧o̧r.

Ward ko̧o̧njeļ eo ej eddoiki im jikejuuļi kweilo̧k ko an ko̧o̧njeļ eo an rūkaki ro. Juon membōr in būreejtōnji eo an Jabōt Jikuuļ ej tōl kweilo̧k eo. Ijoke, bisoprik ro remaron̄ kajjitōk ippān bar juon membōr n̄an tōl er.

N̄an elōn̄ļo̧k meļeļe ko lale “Kweilo̧k ko na Ko̧o̧njeļ eo an Rūkaki” ilo Katakin ilo Wāween eo an Rilo̧mo̧o̧r (peij 38–39).

17.5

Kweilo̧k ko an Ko̧o̧njeļ an Rūkaki n̄an Ro Jinen im Jemān

Ward ko̧o̧njeļ eo emaron̄ karōk kweilo̧k ko an ko̧o̧njeļ eo an rūkaki n̄an pāāren ro n̄an jipan̄ er kōkōm̧anm̧anļo̧k wāween katakin kōn gospel eo ilo m̧weo. Āinwōt kweilo̧k ko jet an ko̧o̧njeļ eo an rūkaki, rej kōm̧m̧an ilo iien kūlaaj eo ilo Jabōt 50 minit.

Ilo kweilo̧k kein, ro jinen im jemān rej ko̧o̧njeļ ippān doon kōn ekōjkan kōjerbal pedped in katak ko an katakin āinwōt an Kraist ilo aer katakin ajri ro nejier. Rej kōjerbal Katakin ilo Wāween eo an Rilo̧mo̧o̧r āinwōt juon kein jipan̄, ekoba jekjōk taitōļ eo “Home and Family” (peij 30–31). Remaron̄ barāinwōt ekōnono kōn katakin im ekkatak jeje ko rekwojarjar ej elmakoti ilo Itok, Ļoor Eō, eo āinwōt jekjōn taitōļ eo “Preparing Your Children for a Lifetime on God’s Covenant Path.”

Ward ko̧o̧njeļ eo ej bōk eddo in im jikejuuļi kweilo̧k ko an ko̧o̧njeļ an rūkaki n̄an ro jinen im jemān. Rej kōmlet eļan̄n̄e rej karuwaineneik ro jinen im jemān remarkeļo̧k n̄an pād ak n̄an leļo̧k juon kūr n̄an aolep ro jinen im jemān ilo ward eo.

Juon membōr in būreejtōnji eo an Jabōt Jikuuļ ej tōl kweilo̧k eo. Ijoke, bisoprik ro remaron̄ kajjitōk ippān bar juon membōr n̄an tōl er.

N̄an elōn̄ļo̧k meļeļe ko lale “Kweilo̧k ko an Ko̧o̧njeļ eo an Rūkaki” ilo Katakin ilo Wāween eo an Rilo̧mo̧o̧r (peij 38–39).