Kūlaaj in Jabōt Jikuuļ eo

N̄an Ritōl ro—Jipan̄ Rūkaki ro Tōprak

Iiaio ko Juon-illo̧k-Juon

Emakijkij an wāween eo em̧m̧an tata n̄an tōpar aikuj ko ejej uwaer an rūkaki ro ej ilo iiaio ko juon-illo̧k-juon. N̄an waanjon̄ak, āinwōt juon ritōl, emaron̄ wōr juon am̧ iien kōnono ekadu ippān juon rūkaki m̧okta ak ālkin kūlaaj eo n̄an kōnono kōn pedped in katak ko an Katakin ilo Wāween eo an Rilo̧mo̧o̧r. Kwomaron̄ kōppopo n̄an iien ekōnono in kōn lale an rūkaki eo katakin. Pukōt n̄an em̧m̧anļo̧k meļeļe kajoor ko an rūkaki eo im lo wāween ko kwomaron̄ leļo̧k jipan̄.

Kalōk kajoor ko an juon rūkaki eaorōk in wōt kile iien ko rem̧m̧an n̄an kōkōm̧anm̧anļo̧k. Ejipan̄ n̄an jino iien ekōnono ko ippān rūkaki ro n̄an kajjitōk ippāer n̄an ļōmņak kōn er make ta eo em̧m̧an im ia eo rej en̄jake eddōkļo̧k emaron̄ in kōm̧man.

Ilo am̧ kweilo̧k ippān rūkaki ro, ļōmņak kōn wāween ko n̄an kōkajoorļo̧k er im kōketak er kōn jouj im kam̧m̧oolol kōn jerbal in jipan̄ eo rej kōm̧m̧ane.

Kweilo̧k ko an Ko̧o̧njeļ eo an Rūkaki

Kajjojo ward ej aikuj kōm̧mane kweilo̧k ko an ko̧o̧njeļ eo an rūkaki kuwōta otemjeļo̧k eo me rūkaki ro remaron̄ ko̧o̧njeļ ippān doon kōn pedped in katak ko an katakin āinwōt Kraist. Kweilo̧k ko an ko̧o̧ņjeļ eo an rūkaki emaron̄ barāinwōt kōm̧m̧an n̄an ro jinen im jemān (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 13.5, ChurchofJesusChrist.org).

N̄āāt Eo Kweilo̧k Kein Raikuj Kōm̧m̧an?

Kweilo̧k ko an ko̧o̧njeļ eo an rūkaki rej kōm̧m̧an ilo iien kūlaaj eo 50 minit ilo Jabōt.

• Rūkaki ro an Priesthood, Doulul eo an Kōrā ro, Doulul eo an Jiron̄ ro remaron̄ pād ilo Jabōt juon ak jilu, āinwōt kāālet jān ritōl ro ijo jokwe ie.

• Rūkaki ro an Jabōt Jikuuļ remaron̄ pād ilo Jabōt ruo ak emen, āinwōt kāālet jān ritōl ro ijo jokwe ie.

• Rūkaki ro an Būraimare remaron̄ pād ilo jabdewōt Jabōt, āinwōt kāālet jān būreejtōnji ko an ward Būraimere im Jabōt Jikuuļ. Eļan̄n̄e kōņaan, rūkaki ro an Būraimere emaron̄ kweilo̧ makeļo̧k jān rūkaki ro jet n̄an ko̧o̧njeļ kōn jekjek ko rejenolo̧k an katakin ajri ro. Menin emaron̄ kōm̧m̧an ilo iien al eo 20 minit, m̧okta ak ālkin kweilo̧k ilo Jabōt ekkar kōm̧m̧ani ak ilo bar juon raan ilo wiik eo. Kweilo̧k in ko̧o̧njeļ eo an elōn̄ļo̧k jān juon rūkaki emaron̄ kōm̧m̧an kuwōta otemjeļo̧k n̄an rūkaki ro an Būraimere bwe ren jab aolep jako jān kūlaaj ko an Būraimere ilo ejja wiik eo wōt. (Kakeememej: N̄e aikuj, būreejtōnji eo an Būraimere ej kappeik rūkaki ribōk jikin ro, kobaik kūlaaj ko, ak kōm̧mani bar jet ijjitōn̄ ko n̄an kōm̧m̧an bwe rūkaki ro an Būraimere ren pād ilo kweilo̧k ko an ko̧o̧njeļ eo an rūkaki).

• Kweiļok ko an ko̧o̧njel eo an rūkaki n̄an jinen im jemān ajri ro remaron̄ kōm̧m̧an ilo jabdewōt Jabōt, āinwōt kōmlet jān ward ko̧o̧njeļ eo.

Wōn Aikuj Pād?

Aolep ro rej katakin juon doulul ak kūlaaj lo ward eo rej aikuj pād, ippānļok juon iaan ritōl ro an priesthood ak doulul eo ej eddoik doulul ko ak kūlaaj ko. Eļan̄n̄e emenin aikuj, ro rej bōk koņaer remaron̄ in ajej n̄an kurupko ekkar n̄an aikuj ko an ro kwoj katakin er. N̄an waanjon̄ak, rūkaki ro an jodikdik ro ak ajri ro remaron̄ jeraam̧m̧an jān kweilo̧k makeļo̧k ejjab aolep iien n̄an ekōnono kōn unin kōnono ko rejenolo̧k n̄an katakin jodikdik ro ak ajri ro.

N̄an kweilo̧k ko an ko̧o̧ņjeļ eo an rūkaki n̄an ro jinen im jemān, ward ko̧o̧njeļ eo ej kōmelet n̄an kūrtok ro jinen im jemān rejenolo̧k ak n̄an kōm̧m̧an bwe en peļļo̧k n̄an aolep ro me rekōņaan bōk koņaer.

Wōn Ej Tōl Kweilo̧k Kein?

Ward ko̧o̧njeļ eo, kōn jipan̄ eo jān būreejtōnji eo an Jabōt Jikuuļ, rej eddoik kweilo̧k ko an ko̧o̧njeļ eo an rūkaki. Rej ko̧o̧ņjeļ ippān doon kōn aikuj ko an rūkaki ro im rūkkatak ro pedped ioon ta eo raar lale ilo kūlaaj ko im kweilo̧k ko. Rej jerbal ippān doon n̄an kōmlet ewi wōt pedped in katak ko im kaminene ko jān Katakin ilo Wāween eo an Rilo̧mo̧o̧r enaaj em̧m̧antata n̄an tōpar aikuj ko raar kūli.

Ekkā wōt, juon membōr in būreejtōnji eo an Jabōt Jikuuļ ej tōl kweilo̧k ko an ko̧o̧njeļ eo an rūkaki. Ijo wōt ke, ro jet uwaan ward eo maron̄ kappe n̄an tōl kweilo̧k ko ejjab aolep iien. Būreejtōnji ro an Doulul eo im ra ko rej lale ippān rūkaki ro pedped in katak ko im iminene ko kar kōnono kaki ilo kweilo̧k eo.

Ta Eaikuj Waļok ilo juon Kweilo̧k in Ko̧o̧njeļ eo an Rūkaki?

Kweilo̧k in ko̧o̧njeļ eo an rūkaki aikuj in ļoor jon̄ak in:

• Kwaļo̧k im ko̧o̧njeļ ippān doon. Kajjitōk ippān rūkaki ro n̄an kwaļo̧k en̄jake in katakin ko aer kiiō epaak, kajjitōk kajjitōk ko reiookļo̧k katakin, im kwaļo̧k ļōmņak ko n̄an anjo̧ ioon apan̄ ko. M̧ōttan kweilo̧k in emaron̄ koba juon etale in pedped in katak ko kar kōnono kaki ilo kweilo̧k ko m̧oktaļo̧k.

• Katak ippān doon. Kajjitōk ippān rūkaki ro n̄an kōnono kōn juon iaan pedped in katak kein kar kwaļo̧ki ilo kein jipan̄ in: pedped ioon Jisōs Kraist, iakwe ro kwoj katakin er, katakin kōn Jetōb, katakin katak eo, im karuwaineneik niknik ekkatak. Pedped in katak ko maron̄ in kōnono kaki ilo jabdewōt ellaajrak, im ijello̧kin tōl jān ward ko̧o̧njeļ eo, ro rej bōk koņaer ilo kweilo̧k eo remaron̄ kāālet pedped in katak eo tok juon n̄an kōnono kake. Kwomaron̄ joļo̧k elōn̄ļo̧k jān juon kweilo̧k kōn juon pedped in katak eļan̄n̄e emenin aikuj.

• Karōk im kūr. Jipan̄ rūkaki ro karōk ekōjkan aer naaj kōjerbal pedped in katak eo raar ekōnono kake. N̄e ekkar, kwomaron̄ barāinwōt kaminene ippān doon juon kapeel kom̧ kar ekōnono kake. Kajjitōk ippāer n̄an rekoote im jerbalke jabdewōt im̧we ko rej būki kōn ekōjkan kōjerbal pedped in katak eo ilo katakin eo aer—ekoba ilo kijejeto ko aer n̄an katakin ilo im̧ōko im̧weer. Kōketak er n̄an jino ekkatak pedped in katak eo tok juon naaj kōnono kake.

Jon̄an wōt eo emaron̄, kweilo̧k ko an ko̧o̧njeļ eo an rūkaki raikuj in ļam pedped in katak eo kōnono kake.

jiron̄ ro rej jibur doon

Kweiļo̧k ko an ko̧o̧njel eo an rūkaki remaron̄ jipan̄ rūkaki em̧m̧anļo̧k aer meļeļe im kōjerbal pedped in katak ko an katakin āinwōt Kraist.

Kajiniet Rūkaki ro Rekāāl kar Kūr Er

Āinwōt juon ritōl, ewōr ippam̧ eddo eo n̄an “kweiļo̧k ippān rūkaki ro rekāāl emōj kūr” ilo ra eo am im “jipan̄ er kapopo n̄an kūr eo aer” (Bok in Bōk Meļeļe Eļap, 17.3, ChurchofJesusChrist.org). Kweiļo̧k kein rej juon iien em̧m̧an n̄an kwaļo̧k kadkad in rūkaki kāāl ro n̄an kūr ko aer rekwojarjar im im̧we er kōn juon visōn kōn ta meļeļe in n̄an katakin ilo wāween eo an Rilo̧mo̧o̧r. Āinwōt juon ritōl, kwomaron̄ jipan̄ rūkaki ro rekāāl kappopo n̄an jerbal jān kōm̧m̧an men kein:

• Kwaļo̧k lōke bwe Rilo̧mo̧o̧r eo enaaj jipan̄ er ilo kūr eo aer (lale Katak im Bujen Ko 88:78).

• Leļo̧k n̄an rūkaki kāāl ro juon kape in kein jipan̄ in, im kōketak er n̄an pukōt wāween ko n̄an kōjerbal pedped in katak ko an ilo katakin eo aer.

• Kwaļo̧k ippān rūkaki ro rekāāl jabdewōt men kōn ra eo am me emaron̄ jipan̄ er jeļā.

• N̄e aikuj, ba n̄an rūkaki kāāl ro ewi wōt ruum̧ eo rej rūkaki ie im ta katak eo rej jino kake. Leļo̧k jabdewōt meļeļe ko rej aikuji n̄an kūlaaj eo aer im membōr in kūlaaj eo.

• Kōmeļeļe n̄an rūkaki kāāl ro bwe kwomaron̄ jipan̄ er ilo kūr eo aer. Leļo̧k rie ilo kūlaaj ruum̧ eo im tōpar kein jipan̄ katakin ko eļan̄n̄e emenin aikuj.

• Ba kwonaaj lale kūlaaj ko an rūkaki ro jet iien, im leļo̧k kōļmenļo̧kjeņ ko āinwōt kar imwe jān Jetōb.

• Kajjitōk ippān rūkaki ro n̄an bōk koņaer ilo kweilo̧k ko an ko̧o̧ņjeļ eo an rūkaki kajjojo kuwōta (quarterly).