Katakin Katak eo

Mekarta Jisōs ekar rūttoļo̧k ilo māletlet im jeļāļo̧kjen ilo aolepen mour eo An, E ekar jab lukkuun jikuuļ āinwōt ritōl in kabun̄ ro jet ilo iien eo An. Im aaet n̄e E ekar katakin, armej ro raar bwiļōn̄ “Elmen an armej in jeḷā leta ko, bwe Ear jab katak kaki?” Etke katak ko An rekar lukkuun kajoor? “Naan in katak eo Aō, e jab Aō,” Rilo̧mo̧o̧r eo ekar kōmeļeļeik, “a an Eo ear jilkintok Eō” (Jon 7:15–16). Katak ej m̧ool eo indeeo—loe ilo jeje ko rekwojarjar im naan ko an rikanaan ro ilo raan ko āliktata—eo ej kwaļo̧k n̄an kōj iaļ eo n̄an erom āinwōt Jemedwōj Ilan̄ im bar ro̧o̧l n̄an E. Jekdo̧o̧n ewi jon̄an am̧ iminene āinwōt juon rūkaki, kwomaron̄ katakin kōn kajoor, āinwōt an kar Rilo̧mo̧o̧r eo kōm̧m̧ane, jān katakin katak ko an Jemān. Kwe im ro kwoj katakin er naaj bwiļōn̄ kōn kōjeraam̧m̧an ko Anij ej jilkinwaj elan̄n̄e katakin im ekkatak ko am rej pedped ioon naan ko An.

N̄an Katakin Katak eo

• Ekkatak katak eo an Jisōs Kraist n̄an kwe make.

• Katakin jān jeje ko rekwojarjar im naan ko an rikanaan ro ilo raan ko āliktata.

• Jipan̄ rūkatak ro kapukōt, kile, im meļeļe m̧ool ko ilo jeje ko rekwojarjar.

• Pedped ioon m̧ool ko rej tōl n̄an oktak eo im kalōk tōmak ilo Jisōs Kraist.

• Jipan̄ rūkkatak ro lo ekkeijel eo aer make ekkartata ilo katak eo an Jisōs Kraist.

Rilo̧mo̧o̧r ekar Ekkatak Katak eo

Ealikkar bwe Rilo̧mo̧o̧r ekar ekkatak jān jeje ko rekwojarjar ilo jodikdik eo An ke E kar ļapļo̧k “ilo mālōtlōt … im ilo jouj ippān Anij” (Luk 2:52). Meļeļe eo an em̧wilaļ kōn katak eo an Jemān ekar erom kein kam̧ool ke Ro Jinem im Jemān rekar loe E ilo tampeļ eo ilo juon iiō eo edik, katakin rūkkaki in Riju ro im uwaaki kajjitōk ko aer (lale Josep Smith Ukook, Luk 2:46 [ilo Luk 2:46, footnote c]). Tokālik, ke Setan ekar kwaļo̧k e ilo juon kapo eļap ilo āne jem̧aden, jeļāļo̧kjen eo an Jisōs kōn katak eo ilo jeje ko rekwojarjar rekar jipan̄ E jum̧ae kapo eo (lale Luk 4:3–12).

Kwomaron̄ barāinwōt pukōt n̄an ekkatak katak eo em̧ool em̧wilaļļok m̧okta jān am̧ katakin kake. Ilo am keppopo n̄an katakin im ekatak ippān ro jet, lukkuun lale ta eo Irooj ekar ba kōn m̧ool ko kwoj katakin. Etale jeje ko rekwojarjar im naan ko an rikanaan ro remour n̄an kōmeļeļe im ko̧o̧njel. Mour im kōjerbal m̧ool ko kwoj ekkatak enaaj karuwaineneik tok Jetōb eo n̄an an katakin eok katak eo ilo wāween ko em̧ool rōm̧wilaļļo̧k im n̄an kapen tarlep in m̧ool eo an katak eo ilo būruōn ro kwoj katakin er.

Kajjitōk ko n̄an koļmānļo̧kijeņ kaki: Etke eaorōk n̄an meļeļe m̧ool ko an gospel eo ippam̧ make? Elmen am̧ kar bōk juon meļeļe em̧wilaļļo̧k kōn m̧ool ko an gospel in? Ta eo kwoj en̄jake ekar im̧we eok n̄an kōkm̧anm̧anļo̧k am̧ ekkatak jeje ko rekwojarjar im naan ko an rikanaan ro remour?

Jān Jeje ko Rekwojarjar: Jabōn Kōnnaan Ko 7:1–3; 2 Nipai 4:15–16; Katak im Bujen Ko 11:21; 88:118

Rilo̧mo̧o̧r E ekar Katakin jān Jeje ko Rekwojarjar

Ālkin mej eo an Rilo̧mo̧o̧r, ruo iaan rikaļoor ro An rekar etetal im kōnono kōn menin būromōj im bwilōn̄ ilo būruer. Elmen aer meļeļe kōn ta eo ej kab waļo̧k? Jisōs riNazareth, em̧m̧aan eo rekar lōke n̄an an erom aer Ripinmuur, ekar mej ilo jilu raan kiiō. Innām ekar itok naan eo ke lōb eo An ekar ejjeļo̧k kobban, ippān enjel ro rej ba ke E mōj an mour! Ilo iien in aorōk ilo tōmak eo an rikaloor ro, juon ruwamejet ekar kobatok ilo ial eo aer. E ekar kaenōm̧m̧an er jān “kōmmeḷeḷ[eik] n̄an erro ilo Jeje ko otemjej men ko kōn [Rilo̧mo̧o̧r eo].” Āliktata, ritotak ro raar kile bwe rūkaki eo aer ekar Jisōs Kraist Make im bwe em̧ool E em̧ōj an jerkak. Elmen aer kar kile E? “Būrued e jab bwil ilowad ke,” rekar tokālik kejekļo̧kjeņ, “Ear kōnono n̄an kōj ilo iaḷ eo, im ke Ear kōmmeḷeḷeik Jeje ko n̄an kōjro ke?” (Luk 24:27, 32).

Elder D. Todd Christofferson ekar katakin, “Jibadbad eo ioļap tata an aolep jeje ko rekwojarjar ej n̄an kaobrak jetōb ko ad kōn tōmak ilo Anij Jemen im ilo Nejin, Jisōs Kraist” (“The Blessing of Scripture,” Liahona, May 2010, 34). Ilo aolepen jerbal in karejar eo An, Jisōs ekar kōjerbal jeje ko rekwojarjar n̄an katakin, kajim̧we, im im̧we ro jet. Lukkuun lale bwe am katakin en jab inojeik jān jeje ko rekwojarjar im naan ko an rikanaan ro. Ilo am̧ tiljek atartar ioon naan ko an Anij ilo katak eo am̧, kwomaron̄ kōm̧m̧ane n̄an ro jet ta eo Rilo̧mo̧o̧r eo ekar kōm̧m̧ane. Kwōmaron̄ jipan̄ er n̄an jeļā E, bwe kōjwōj aolep aikuji kōkajoorļo̧k tōmak eo ad ilo Rilo̧mo̧o̧r iien otemjej. Am̧ iakwe n̄an jeje ko rekwojarjar enaaj erom kein kam̧ool n̄an ro kwoj katakin er, im am̧ katakin enaaj karuwaineneik tok Jetōb eo n̄an kōm̧m̧an bwe būruier en bwil itulowa kōn juon naan in kam̧ool kōn Jemen im Nejin.

Kajjitōk ko n̄an Kōļmenļo̧kjeņ kaki: Ekōjkan an kar juon bar rūkkaki eo ekar kōjerbal jeje ko rekwojarjar im̧we eok n̄an jipan̄ eok jeļāļo̧k kōn Rilo̧mo̧o̧r? Ta eo kwomaron̄ kōm̧m̧ane n̄an pedped eļapļo̧k ioon jeje ko rekwojarjar im naan ko an rikanaan ro ilo am̧ katakin? Elmen am jipan̄ ro kwoj katakin er jeļā im iakwe naan ko an Anij?

Jān Jeje ko Rekwojarjar: Luk 4:14–21; Alma 31:5; Hilamōn 3:29–30;3 Nipai 23

Rilo̧mo̧o̧r Ekar Jipan̄ Armej Kapukōt, Kile, im Meļeļe Mool eo

Juon rikien ekar kajjitōk ippān Jisōs, “Ri Kaki, ta men eo I naaj kōṃṃane, bwe in bōk aō jolōt mour indeeo?” Ilo uwaak, Rilo̧mo̧o̧r eo ekar bōkļo̧k rikajjitōk eo n̄an jeje ko rekwojarjar: “Ta men eo jeje ilo kien? Ekōjkan aṃ kōnono kake?” Menin ekar jab bōkļok wōt em̧m̧aan in n̄an uwaak eo an—“Kwōn yokwe Irooj aṃ Anij … im ri turuṃ”—ak barāinwōt n̄an loore ļo̧k n̄an bar juon kajjitōk: “Im wōn eo ri turū?” Rilo̧mo̧o̧r eo ekar uwaake kajjitōk in kōn juon būrabōļ kōn jilu em̧m̧aan ro me raar lo ritoktak eo m̧ōttaer ilo aikuj. Juon wōt iaan rein jilu, juon ri Samaria, eo Riju ro raar dike kōn wōt ia eo ej itok jāne, ekar bōjrak in jipan̄. Jisōs ekar karuwainene rikien in n̄an uwaak kajjitōk in an make: “Wōn iaerjil, kwōj ḷōmṇak, ej ri turun eo ear pooḷ ippān ri rakimi ro?” (lale Luk 10:25–37).

Etke kwoj ļōmņak Rilo̧mo̧o̧r eo ekar katakin ilo wāween in—uwaak n̄an kajjitōk ko kōn kūr ko n̄an etale, kōļmenļo̧kjeņ, im loe? Jidik in uwaak eo ej bwe Irooj ej kaorōk kijejeto eo kōn kappukōt m̧ool eo. “Kappukot, im koṃ naaj loe,” E ekar karuwainene im bar karuwainene (lale, n̄an waanjon̄ak Matu 7:7; Luk 11:9; Katak im Bujen Ko 4:7). E ej kōjeraam̧m̧an jerbal in tōmak ko im kijenmej eo an eo ej kappukōt.

Āinwōt Rilo̧mo̧o̧r, kwomaron̄ jipan̄ ro kwoj katakin er kile im meļeļe m̧ool eo. Jeje ko rekwojarjar, n̄an waanjon̄ak, rej obrak kōn m̧ool ko an gospel in, ak jet iien ebōk kijejeto in kile eo n̄an kappukōti. Ilo am̧ ekkatak ippān doon jān jeje ko rekwojarjar, bōjrak im kajjitōk ippān ro kwoj katakin er ta m̧ool ko an gospel in rej kūli. Jipan̄ er lo elmen an m̧ool kein iookļo̧k karōk in lo̧mo̧o̧r eo an Jemedwōj Ilan̄. Jet iien m̧ool ko indeeo rej kōnono kaki ilo jeje ko rekwojarjar, im jet iien rej kōmeļeļeik bwebwenato ko im mour ko an armej ro jej riit kōn er. Emaron̄ barāinwōt jipan̄ n̄an etale ippān doon kōmeļeļe in bwebwenato in eoon ko kwoj riiti, barāinwōt meļeļe eo an eoon ko im ekōjkan aer jerbal n̄an kōj rainin.

Kajjitōk ko n̄an Kōļmenļo̧kjeņ kaki: Elmen am jeļā m̧ool ko indeeo ilo jeje ko rekwojarjar im naan ko an rikanaan ro? Elmen an m̧ool ko kōjeram̧m̧an mour eo am? Ta jet iaan wāween ko kwomaron̄ jipan̄ rukatak ro kile im meļeļe m̧ool ko me renaaj ļap meļeļeier n̄an er n̄an kepaakļo̧k er n̄an Anij?

Jān Jeje ko Rekwojarjar: Jon 5:39; 1 Nipai 15:14; Katak im Bujen Ko 42:12

Jemaron̄ jipan̄ ro jej katakin er lo im kile m̧ool eo kōn er make.

Rilo̧mo̧o̧r Ekar Katakin M̧ool ko Rej Tōlļo̧k n̄an Oktak n̄an Kalōk Tōmak

Juon raan in Jabōt, Rilo̧mo̧o̧r im rikaļoor ro An, raar kwole, rekar etaļ tūrin juon jikin kallib im jino m̧ōn̄āik grain ko. Parisi ro, aolep iien repojak in bok kwonaer ilo kien Moses, rekar kwaļo̧k ke aiin grain ko ekar juon wāween jerbal, eo ekar mo ilo Jabōt (lale Mark 2:23–24). N̄an kōjerbal naan eo an Jekab rikanaan in Bok in Mormon, Riparasi ro raar “reilo̧k jān kakōļļe eo,” (Jekab 4:14). Ilo bar jet naan, rekar pedped wōt ioon imminene ko an kien ko ke rekar elā ioon un eo ekwojarjar an kien ko—n̄an kepaakeļo̧k kōj n̄an epaake Anij. Ilo m̧ool, Parasi ro raar jab lukkuun kile bwe E eo ekar letok kien eo n̄an im̧aan mejeer n̄an kōjparok Jabōt

Rilo̧mo̧o̧r ekar bōk iien in em̧m̧an n̄an kam̧ool kōn paotok eo An ekwojarjar im n̄an katakin etke Jabōt eaorōk. Ekar kōm̧anm̧an n̄an kōj āinwōt juon raan in kabun̄jar n̄an Irooj eo an Jabōt, Jisōs Kraist E make (lale Mark 2:27–28). Kain m̧ool kein rej jipan̄ kōj meļeļe bwe kien ko an Anij reļļapļo̧k jān baj m̧wil eo ad itulikid Rej n̄an jipan̄ kōj ukōt būruer im erom lukkuun oktak.

Kanooj ļōmņak kōn katak eo im pedped in katak ko kwoj karōki n̄an pedped ioer. Ilo an lōn̄ m̧ool ko ilo jeje ko rekwojarjar me remaron̄ kōnono kaki, em̧m̧antata n̄an pedped ioon m̧ool ko an gospel in me rej tōlļo̧k n̄an oktak eo n̄an kalōk tōmak ilo Jisōs Kraist. M̧ool ko reļam waan, im̧aan tata Rilo̧mo̧o̧r eo ekar katakin im waanjon̄ak kaki ekar wōr kajoor eo eļap tata n̄an ukōt mour ko ad—m̧ool ko kōn Pinmuur eo An, karōk in lo̧mo̧o̧r eo, kien ko n̄an iakwe Anij im iakwe eo rūturid, im ko eierļo̧k. Karuwaineneiktok Jetōb eo n̄an kwaļo̧k kam̧ool eo an m̧ool kein, jipan̄ bwe ren deļōn̄ ilo m̧wilaļ in būruōn ro kwoj katakin er.

Kajjitōk ko n̄an Kōļmenļo̧kjeņ kaki: Ta jet iaan m̧ool ko an gospel in me raar jipan̄ eok erom oktakļo̧k n̄an Jisōs Kraist n̄an bōk eļapļo̧k tōmak ilo E? Elmen an juon kar rūkaki jipan̄ eok pedped ioon m̧ool ko raorōktata an gospel eo? Ta eo kwomaron̄ katakin emaron̄ jipan̄ ro jet m̧wilaļļo̧k oktak eo aer n̄an Jisōs Kraist?

Jān Jeje ko Rekwojarjar: 2 Nipai 25:26; 3 Nipai 11:34–41; Katak im Bujen Ko 19:31–32; 68:25–28; 133:57; Moses 6:57–62

Rilo̧mo̧o̧r ekar Jipan̄ Armej Lo Ekkeijel eo Ekkar tata ilo Katak eo An

“Armej in ej bōk ri jerọwiwi im m̧ōn̄ā ippāer,” Parisi ro rej elotaan kōn Jisōs—ba ke ejjab juon m̧wil ekkar n̄an juon rikaki eo ilo Jetōb (Luk 15:2). Jisōs ekar lo bwe menin ekar juon iien em̧m̧an n̄an katakin er jet m̧ool ko raorōk ilo jetōb. Elmen An naaj kar kōm̧m̧ane? Elmen An naaj kar jipan̄ Parasi ro lo bwe ekar būruier—ejjab Būruōn—me ekar etoon im kar aikuj kemour? Elmen An naaj kar kōjerbal katak eo An n̄an kwaļo̧k bwe aer ļōmņak im m̧wilier kar aikuj in oktak?

E ekar kōm̧m̧ane menin jān kōnono n̄an er kōn juon sip eo ekar jejļo̧k jān rilale sip eo im kōn jāān dekā eo me ekar jako. Ekar kōnono kōn juon nejin eo enana m̧wilin eo ekar kajjitōk jeorļo̧k bwod im kōn juon jein emakoko in bōke ak m̧ōn̄ā ippān. Kajjojo būrabōļ kein ekar pād ie m̧ool ko me rejetjet n̄an ekōjkan an Riparasi eo kar lale ro jet, katakin er bwe aolep jetōb ewōr juon aer aorōk eļap (lale Luk 15). Rilo̧mo̧o̧r eo ekar jab jiron̄ Riparisi ro—ak jabdewōt iaad—wōn eo n̄an kwaļo̧ke ilo būrabōļ ko An. Jet iien jej jemen eo ej inepata. Jet iien jej jein eo ebanban. Ekkā ad sip eo ejebwābwe ak nejin eo ebwebwe. Bōtaab jekdo̧o̧n ta jekjek eo ad, jān būrabōļ ko An, Rilo̧mo̧o̧r ej kajjitōk ippād n̄an pukōt ekkejel eo ekkar ilo katak ko An—n̄an lo ta eo E ekōņaan bwe jen ekkatak im ta eo jemaron̄ aikuj in ukōte ilo ļōmņak eo ad ak m̧wil eo.

Komaron̄ loe bwe jet rūkkatak rejjab loe etke jet m̧ool raorōk n̄an er. Ilo am ļōmņak kōn aikuj ko an ro kwoj katakin er, ļōmņak kōn elmen an mool ko ilo jeje ko rekwojarjar ewōr meļeļeier im wōr tokjeer n̄an jekjek ko aer. Juon wāween komaron̄ jipan̄ rikatak ro loe ekkejel eo ekkar an mool ko rej loe ej jān kajjitōk kajjitōk ko āinwōt “Ekōjkan an menin jipan̄ eok kōn juon men eo kwoj kiiō en̄jake?” “Etke eaorōk n̄an eok n̄an jeļā menin?” “Ta oktak eo menin emaron̄ kōm̧m̧ane n̄an mour eo am?” Ron̄jake ro kwoj katakin er. Kōtļo̧k bwe ren kajjitōk kajjitōk ko. Kōketak er n̄an kōm̧m̧ani ekkejel ko ikōtaan katak ko an Rilo̧mo̧o̧r im mour ko aer make. Kwōmaron̄ barāinwōt kwaļo̧k elmen am kar loe ekkar ko ilo mour eo am make ilo ta eo kwoj katakin. Kōmm̧ane menin emaron̄ karuwainene Jetōb n̄an katakin rikatak ro kajjojo elmen an katak eo maron̄ kōm̧m̧an oktak ilo mour ko aer.

Kajjitōk ko n̄an Kōļmenļo̧kjeņ kaki Ta eo ej kōm̧m̧an bwe mool ko an gospel en wōr meļeļeier im jerbal n̄an eok? Ta eo ej jipan̄ eo kapukōt men ko rekkar n̄an kwe make ilo am ekkatak gospel eo? Ta eo kwoj kōm̧m̧ane n̄an pedped ioon mool ko ekkar n̄an ro kwoj katakin?

Jān Jeje ko Rekwojarjar: 1 Nipai 19:23; 2 Nipai 32:3; Katak im Bujen Ko 43:7–9

Jet Wāween ko n̄an Kōjerbal Ta eo Kwoj Ekkatak

• Etale ta eo kwoj katakin n̄an lukkuun lale ke kwoj katakin katak ko remool. Kajjitōk ko rej elaajrak remaron̄ jipan̄:

  • Ta eo ij katakin rej ke waļo̧k ilo jeje ko rekwojarjar im naan ko an rikanaan ro ilo raan kein āliktata?

  • Elōn̄ wōt ke rikanaan raar katakin mennin? Ta eo ritōl ro an Kabun̄ rej katakin rainin?

  • Elmen an nej menin jipan̄ ro jet kalōk tōmak ilo Jisōs Kraist, ukweļo̧k, waanmaanļo̧k ilo ial in bujen?

  • N̄e menin ej juon wōt ilo im̧we ko an Jetōb Kwojarjar, ak ij ke en̄jake jetōb eo ejjab jim̧we kōn men in?

• Ekkatak aolep raan naan an Anij n̄an katak katak ko remool ippam̧ make.

• Kajjitōk ippān rikatak ro n̄an riiti jeje ko rekwojarjar im naan ko an rikanaan ko rainin ilo am katakin.

• Katakin rikatak ro n̄an kojerbale footnote ko, Unin Tōl ko an Jeje Ko Rekwōjarjar, im kein jipan̄ ko jet ilo aer ekkatak jeje ko rekwojarjar.

• Karuwainene rikatak n̄an kapukōt mool ilo eoon ko ilo jeje ko rekwojarjar ak ilo juon bwebwenato.

• Kwaļo̧k am naan in kamool kōn elmen am kar jeļā juon katak ej emool.

• Kōjerbale bwebwenato ko ak kein jipan̄ ko ainwōtļo̧k n̄an jipan̄ rikatak ro bōke juon meļeļe em̧wilaļ kōn gospel in.