Iakwe Ro Kwoj Katakin Er

Aolep men ko Rilo̧mo̧o̧r ekar kōm̧mani ilo aolepān jerbal in karejar eo An ilo laļ in ekar ellowetak kōn iakwe. Ilo ad kajjieon̄ in erom rikaļoor ro rem̧ool an Kraist, jemaron̄ obrak kōn ejja iakwe in wōt (lale Jon 13:34–35; Moronai 7:47–48; 8:26). N̄e iakwe eo an Rilo̧mo̧o̧r ej pād ilo būruōd, jej pukōt aolep wāween ko rem̧m̧an n̄an jipan̄ ro jet ekkatak kōn Kraist im itok n̄an E. Iakwe ej erom ellowetak n̄an ad katakin.

N̄an Iakwe Ro Kwoj Katakin Er

• Lo rūkkatak ro ilo wāween eo Anij ej lo er.

• Pukōt n̄an jeļā kajjier—meļeļe jekjek ko aer, aikuj ko, im kajoor ko.

• Jar kake er kōn etaer.

• Kōm̧m̧ane juon mejatoto eo ejokne ijo aolep rej kauteij im jeļā bwe ijo kwoņaer rej aorōk.

• Kwaļo̧k wāween ko rekkar n̄an kwaļo̧k iakwe eo am̧.

Rilo̧mo̧o̧r eo ekar Lo Kōjatdikdik eo Ekwojarjar ilo Aolep ro Ekar Katakin Er

Enan̄in aolep armej ro ilo Jericho rekar ļōmņak rōjeļā aolepān men eo raar aikuj jeļā kōn Zakkiōs. E ekar juon rikien im juon ritōltōl eowōj—jeban rikien, ilo m̧ool—e ekar m̧weie. Ealikkar, raar ļōmņak, emaron̄ juon eo eriab im etoon an jerbal. Bōtaab Jisōs ekar kalimjōk būruōn Zakkiōs im lo juon “nejin Ebream” em̧ool (lale Luk 19:1–10). Rilo̧mo̧o̧r ekar lo an armej ro ejjab āinwōt aer kar waļo̧k n̄an erom bōtaab āinwōt aer kar lukkuun—im āinwōt aer maron̄ kar erom. Ilo ippān rieon̄ad ro rejjab jeļā, āinwōt Simōn, Andrew, Jemes, im Jon, E ekar lo ritōl ro ilju jekļaj eo an Kabun̄ eo An. Ippān juon rikinaakļo̧k eo kar mijake Saul, E ekar lo “juon jāpe eo Ij kāālōt e,” eo enaaj kar kwaļo̧k gospel eo An im̧aan kiin̄ ro im laļ ko . (lale Jerbal 9:10–15). Im ilo kwe im kajjojo armej kwoj katakin er, Rilo̧mo̧o̧r ej lo juon ļaddik ak leddik nejin Anij kōn kōjatdikdik eo ejjeļo̧k jon̄an.

Ibwilijin armej ro kwoj katakin er, emaron̄ wōr juon ippam̧ eo āinwōt etiljek im kar oktak im ro jet me āinwōt rejjab itok limo ak em̧ool jum̧ae. Mejmejkaruo n̄an jab kōm̧m̧ani kōtmene ko pedped wōt ioon ta eo kwoj loe. Jetōb Kwojarjar emaron̄ jipan̄ eok lo ilo kajjojo armej jet iaan ta eo Rilo̧mo̧o̧r ej loi—im jipan̄ kwe n̄an jino iakwe er ilo wāween eo E ekar.

Kajjitōk ko n̄an Kōļmenļo̧kjeņ kaki: Ļōmņak kōn kajjojo armej kwoj katakin er, im kōļmenļo̧kjeņ kōn ekōjkan an Jemedwōj Ilan̄ im Jisōs Kraist en̄jake kōn kajjojo iaer. Ta eo Remaron̄ in lo ilo ļeo ak lio? Elmen an nej ļōmņak kein jelet wāween am katakin armej eo?

Jān Jeje ko Rekwojarjar: 1 Samuel 16:7; Sam Ko 8:4–5; Rom 8:16–17; Katak im Bujen Ko 18:10–14

Rilo̧mo̧o̧r eo Ejeļā Kōj im Emeļeļe Jekjek ko Ad, Aikuj ko, im Kajoor ko

Kōrā in Samaria eo ekar jab itok n̄an aibōj laļ eo n̄an ron̄jake ennaan eo an gospel eo. Eaar itok n̄an an ettein̄ dān. Bōtaab Rilo̧mo̧o̧r eo emaron̄ kar jeļā bwe an maro ekar ļapļo̧k jān men an kanniōk. E ekar jeļā bwe ekar jab em̧m̧an mour in an m̧okta kōn jemjerā ko rejjab pen. Kōn menin Jisōs ekar bōk aikuj eo ilo kanniōk me ekar m̧ōkaj an itok limo in liin—dān eo ekar rie mour—im kar kobaiki ippān aikuj ko rem̧wilaļ an liin kōn “dān in mour” im “mour in indeeo.” Ālkin aer kennaan, kōrā in ekar bōk juon kam̧ool bwe Jisōs ekar RiKraist, kōn im̧we in ekar lukkuun ļap An jeļā kajjien. “[Eaar] ba n̄an n̄a men otemjej iar kōṃṃani,” liin ekar ba. “Bwe E in ri Kraist ke?” (lale Jon 4:6–29).

Erom juon rūkaki āinwōt Kraist ekoba jeļā kajjien armej ro kwoj katakin er im kajjieon̄ n̄an meļeļe ta eo epād ilo būruier. Kwomaron̄ kwaļo̧k itok limo eo am̧ ilo mour ko aer n̄an kwaļo̧k meanwōd. Kwomaron̄ pukōt wāween ko n̄an meļeļe bwebwenato in mour ko aer, tōļan ko, itok limo ko, im aikuj ko. Kwomaron̄ lale wāween eo em̧m̧antata ilo aer ekkatak. Kwomaron̄ kajjitōk kajjitōk ko, lukkuun ron̄jake, im etale. Ilōn̄ in aolep men, kwomaron̄ jar n̄an meļeļe bwe Jetōb eo wōt en maron̄ lewaj. An em̧m̧anļok am̧ jeļā kōn juon armej, em̧m̧anļo̧k n̄an am̧ jipan̄ e lo meļeļe eo an juon make im kajoor eo ilo gospel eo an Jisōs Kraist. N̄e kwomeļeļe kōņaan eo an armej eo, Jetōb emaron̄ katakin eok wāween jipan̄ kapolel kōn dān in mour eo an Rilo̧mo̧o̧r.

Kajjitōk ko n̄an Kōļmenļo̧kjeņ kaki: Ta eo kwojeļā kadede kōn armej eo kwoj katakin? Ta eo eaorōk n̄an er? Ta kajoor ko aer? Ta eo rej apan̄ kaki? Ta eo kwomaron̄ kōm̧m̧ane n̄an am̧ m̧eļeļeļo̧k kōn er?

Jān Jeje ko Rekwojarjar: Sam Ko 139:1–5; Matu 6:25–32; Mark 10:17–21; Jon 10:14; 3 Nipai 17:1–9

Rilo̧mo̧o̧r Ekar Jar kōn Ro Ekar Katakin Er

Ļōmņake ļo̧k ekōjkan an Saimōn Piter kar en̄jake ke ekar ron̄ an Rilo̧mo̧o̧r ba n̄an e, “Saimōn, Saimōn, lo, Setan ear kōṇaan bōk eok, … a I ar jar kōn eok bwe aṃ tōmak e jāmin jako” (Luk 22:31–32). Elmen an naaj kar jelet eok n̄an jeļā bwe Jisōs Kraist ekar jar n̄an Jemen kōn kwe? Armej in Amedka ro etto ekar wōr aer en̄jake āinwōt in, im raar kōmeļeļeiki ilo wāween in: “Ejjeļo̧k juon emaron̄ ļōmņake lan̄lōn̄ eo eaar kobrak būruōm̧ ilo iien eo kōm ar ron̄ An [Jisōs] jar kōn kōm n̄an Jemān.” (3 Nipai 17:17).

Kwomaron̄ barāinwōt ļōmņak kōn ta eo ej waļo̧k itulowaam̧ n̄e kwōj jar kōn juon armej—ejjab bōjrak, kōn etaer. Elmen an jar ko am jelet wāween am ļōmņak kōn armej eo? Elmen aer jelet makūtkūt ko am? Ejjeļo̧k pere Jemedwōj Ilan̄ ej ron̄ im uwaaki jar ko rem̧ool an juon rūkaki eo ikdeelel n̄an jipan̄ juon rūkkatak. Im ilo elōn̄ wāween ko, juon wāween Ej uwaaki jar ko ej kōn un̄ur bōruwōn rūkaki eo im im̧we e n̄an kōm̧m̧an ak ba juon men me enaaj jipan̄ rūkkatak eo en̄jake iakwe eo An.

Kajjitōk ko n̄an Kōļmenļo̧kjeņ kaki: Ilo am ļōmņak kōn armej ro kwoj katakin er, ewōr ke juon eo kwoj en̄jake ewōr juon an aikuj ejenolo̧k n̄an am̧ jar? Ta eo kwoj en̄jake eim̧we n̄an jar kake ilo etan ļeo ak lio? Ta kōjeraam̧m̧an ko remaron̄ itok ilo am̧ karuwaineneik rūkkatak ro n̄an jar kōn doon?

Jān Jeje ko Rekwojarjar: Jon 17; Alma 31:24–36; 3 Nipai 18:15–24; 19:19–23, 27–34

Rilo̧mo̧o̧r ekar Kanooj Lale Bwe Aolep Rekar En̄jake Kautiej im Kaorōk

M̧wil eo eļap ibwilijin ritōl ro an kabun̄ ilo raan ko an Jisōs ekar bwe rijerawiwi ro rej aikuj in kar kowaan er. Kōnke kōn menin, ke ritōl rein raar lo an Jisōs ikitōltōl ippān rijerawiwi ro, raar lukkuun kōraat. Elmen an juon maron̄ ikitōltōl ippān kain armej rōt in ej pojak ilo jetōb?

Aaet, Jisōs, ekar oktak jekjek eo an. E ekar kajjieon̄ pukōt ro me raar nan̄inmej ilo jetōb (lale Mark 2:15–17; Luke 4:17–18). E ekar jab bōjrak an pukōtļo̧k ro me raar oktak jān ro ipeļakier ak ro ekar jorrāān mour ko aer, im E ekar iaaio ippān ro me raar jerawiwi. E ekar nōbar tōmak eo juon ritariņae an Rirom (lale Matu 8:5–13). E ekar kūr juon ritōltōl eowōj kar jab lōke n̄an an erom juon An rikaļo̧or kar lōke (lale Mark 2:14). Ke kōrā eo kar ņa ruōn kōn lōn̄, E ekar kōm̧m̧an bwe liin en en̄jake kōjparok im kar imwe liin n̄an an ukweļo̧k im mour juon mour em̧m̧anļok (lale Jon 8:1–11).

Bōtaab Jisōs ekar kōm̧m̧an eļapļo̧k jān in. E ekar kōketak ejja m̧wil in wōt n̄an bōke im iakwe n̄an rikaļoor ro An. Waanjon̄ak eo An ekar ilo m̧ool pād ilo bōro ko an Rijilōk ro An ke iien eo ekar itok n̄an er n̄an bōk gospel eo n̄an aolep armej. Ej waļo̧k ilo naan ko an Piter: “E ṃool, ij kile bwe Anij e jab ḷōmṇak kōn okōtan armej” (Jerbal 10:34).

Ewōr juon iien elukkuun em̧m̧an me enan̄in aolep ro kwoj kūr er n̄an katakin ej ļon̄tak ilo jet wāween n̄an en̄jake kautiej im kaorōk. Ilo wāween eo kwoj iakwe im kautiej er, kwomaron̄ kwaļo̧k bwe rejjab ruwainene wōt bōtaab aikuji er. Kwomaron̄ pukōtļo̧k ro rejjab kobatok, rej ļon̄tak, ak ro me āinwōt rejjab itok limo, kijenmej eļan̄n̄e jekjek ej āinwōt rum̧wij. Kwomaron̄ jipan̄ aolep en̄jake kōjparok im kaenōm̧m̧an ilo kwaļo̧k n̄ūrbōktak ko aer ippān rittōmak ro m̧ōttaer. Kwomaron̄ kōm̧m̧ane eļapļo̧k jān jon̄an in. Kwomaron̄ im̧we aolep rūkkatak ro n̄an jipan̄ eok ejake juon mejatoto eo ijo katak eo ej katakin ilo juon jetōb in kautiej, uwaan, im iakwe.

Kajjitōk ko n̄an Kōļmenļo̧kjeņ kaki: Ta eo ej jipan̄ juon armej en̄jake uteij im aorōk? Ta eo ej im̧we juon armej n̄an kauteij im kaorōk ro jet? Ilo am̧ ļōmņak in jar kōn armej ro kwoj katakin er, ta eo kwoj im̧we n̄an kōm̧m̧ane bwe ren aolep maron̄ en̄jake ruwainene im aikuj?

Jān Jeje ko Rekwojarjar: Jon 4; 2 Nipai 26:27–28, 33; Alma 1:26; 3 Nipai 18:22–25

Rūkaki ro remaron̄ jipan̄ ro rej katakin en̄jake iakwe.

Rilo̧mo̧o̧r eo Ekar Kwaļo̧k Iakwe eo An n̄an Ro Ekar Katakin

Ilo jemļokin juon raan em̧m̧an, ebōbōkak ilo an katakin im jerbal in karejar ilubwiljin Rinipai ro, Jisōs ekar jeļā bwe ekar iien An etal. Ekar wōr armej ro ej aikuj bar loļo̧k. “Kom̧in ilo̧k n̄an m̧ōko im̧ōmi,” E ekar ba, “im kōpooj būruōmi n̄an ilju.” Ak armej ro rekar jijjōt ijo “raar jan̄,” mijōk “wōt E āinwōt n̄e raar kajjitōk ippān n̄an pād wōt aetokļo̧k ippāer.” Kile aikuj eo aer ilo aer jab kōnono “reobrak kōn tūriam̧o kake,” Jisōs ekar bar pād aitokļo̧k (3 Nipai 17:3, 5–6). Kōjeraam̧m̧an rinan̄inmej im riajlaļ. E eaar bukelōlō im jar kōn er. Ekar jan̄ ipper, im E kar m̧ōņōņō ipper.

Ļōmņak in jar ilo ekkatak naan ko im jerbal ko an Rilo̧mo̧o̧r eo ilo 3 Nipai 17. Lin̄uri iakwe eo An ekar kwaļo̧k n̄an ro E kar katakin. Kapukōt en̄jake ko ilo iakwe eo An ilo ijo jet ilo jeje ko rekwojarjar. Innām ļōmņak kōn armej ro kwoj katakin. Elmen am lukkuun kwaļo̧k iakwe n̄an er? Kōtļo̧k bwe Jetōb en tōl eok. N̄e kwoj loe an pen am en̄jake ak kwaļo̧k iakwe n̄an ro kwoj katakin, jino n̄an kamool kōn iakwe eo an Anij. Innām “jar n̄an Jemād kōn aolep kajoor in bōro, bwe kom̧in maron̄ obrak kōn [iakwe eo an Kraist erreo], eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist;” (Moronai 7:48). Im keememej bwe inepata eo am ilo katakin juon katak ejjab aikuj kamad kwe jān kwaļo̧k iakwe ilo naan ko im jerbal ko am̧. Ekkā an wāween am kōm̧m̧an n̄an armej ej aorōk āinwōt ta eo kwoj katakin er.

Kajjitōk ko n̄an Kōļmenļo̧kjeņ kaki: Elmen an Rilo̧mo̧o̧r kar jipan̄ eok jeļā kōn iakwe eo An n̄an kwe? Ekōjkan an kar juon jinen im jemān ak rūkaki eo juon jipan̄ eok en̄jake iakwe eo An? Armej ro kwoj katakin rejeļā ke kwōj iakwe er? Rejeļā ke bwe Rilo̧mo̧o̧r ej iakwe er?

Jān Jeje ko Rekwojarjar: Mark 6:31–42; Jon 13:3–16, 34–35; 15:12–13; 1 Korint 13:1–7; 1 Jon 4:7–11

Jet Wāween ko n̄an Kōjerbal Ta eo Kwoj Ekkatak

• Eļan̄n̄e kwoj katakin juon kūlaaj, jeļā kajjien rūkkatak ro im kōjerbali n̄e kwoj katakin.

• Kwaļo̧k am kam̧m̧oolol n̄e rūkkataki ro rej bōk kwonaer.

• Pād ippān rūkkatak ro m̧okta im ālkin am katakin.

• Jipan̄ rūkkatak ro kadōkļo̧k juon mejatoto in iakwe im kauteij n̄an doon.

• Kanooj leļo̧k am̧—n̄e kwoj katakin im ilo iien ko jet.

• Kōm̧m̧ani jerbal ko an jerbal in jipan̄ n̄an ro kwoj katakin er.

• Kōm̧m̧an bwe kwon maron̄ ukōt karōk in katakin ko am n̄an bōk eļap iien ilo katak ko ewōr meļeļeier n̄an ro kwoj katakin er.