Katakin kōn Jetōb

Ke Rilo̧mo̧o̧r ekar kakien Josep Smith im Sidney Rigdon n̄an kwaļo̧k gospel eo An, E ekar kallim̧uri er “Jetōb Kwōjarjar enaaj ererakļo̧k ilo kwaļo̧k kam̧ool eo n̄an aolep men ko otemjej kom̧ro naaj ba.” (Katak im Bujen Ko 100:8; bar lale Katak im Bujen Ko 42:15–17; 50:17–22). Ejja kallim̧ur in wōt ej jerbal n̄an aolep ro me rej kwaļo̧k gospel eo, ekoba kwe. Ilo am̧ kwaļo̧k gospel eo an Jisōs Kraist, kwomaron̄ bōk Jetōb Kwojarjar eo ippam̧ n̄an tōl eok im n̄an kam̧ool kōn m̧ool eo n̄an ļōmņak ko im bōro ko an ro kwoj katakin er (lale Katak im Bujen Ko 8:2). Kwoj jab make iaam̧ n̄e kwōj kwaļo̧k, bwe “e jab koṃ eo koṃij kōnono, a Jetōb Kwōjarjar” (Mark 13:11).

Jetōb Kwojarjar ej rūkaki m̧ool. Ejjeļo̧k rūkaki bajjōk, jekdo̧o̧ņ ewi jon̄an kapeel ak iminene, emaron̄ bōk jikin jerbal eo An n̄an kam̧ool kōn m̧ool eo, kam̧ool kōn Kraist, n̄an ukōt bōro ko. Bōtaab aolep rūkaki remaron̄ erom kein jerbal ko n̄an jipan̄ ajri ro nejin Anij ekkatak jān Jetōb.

N̄an Katakin kōn Jetōb

• Kōpooj eok make ilo jetōb.

• Iien otemjej pojak n̄an uwaake im̧we ko ilo jetōb kōn aikuj ko an rūkkatak ro.

• Ejake jekjek ko im iien ko rem̧m̧an n̄an rūkkatak ro n̄an katakin kōn Jetōb Kwojarjar.

• Jipan̄ rūkkatak ro pukōt, kile, im jerbale revelesōn an juon make.

• Kōmakijkij kwaļo̧k naan in kam̧ool, im kajjitōk ippān rūkkatak ro n̄an kwaļo̧k en̄jake ko aer, iminene ko, im naan in kam̧ool ko.

Rilo̧mo̧o̧r ekar Kōpooj E Make ilo Jetōb n̄an Katakin

N̄an keppooj jerbal in karejar eo An, Rilo̧mo̧o̧r ekar joļo̧k 40 raan ilo āne jem̧aden “n̄an pād ippān Anij.” (Josep Smith Ukok, Matu 4:1 [ilo Matu 4:1, footnote b]). Bōtaab m̧aanjabpopo in jetōb eo An ekar ijjino m̧oktaļo̧k. Ke Setan ekar kapo E, E kar maron̄ pedped ioon “naan ko in mour,” me Ekar kaorōki n̄an “ejja awa eo wōt” ke Ekar aikuji er (Katak im Bujen Ko 84:85). Ļōmņak kōn kijejeto ko am̧ make n̄an kepooje eok make ilo jetōb n̄an katakin. Ta ko kwoj ekkatak jān Matu 4:1–11 kōn elmen am̧ loore waanjon̄ak eo an Rilo̧mo̧o̧r ilo kepopo eo am ilo Jetōb?

Jetōb ej rūkaki eo em̧ool im un jen jipan̄ eo em̧ool n̄an oktak. Kwaļo̧k gospel eo ekajoor ejjab baj kepooj juon katak ak ej n̄an kepooj eok make m̧okta jen am̧ jino katakin. Eļan̄n̄e kwonaaj pojak ilo jetōb, enaaj em̧m̧anļo̧k am̧ ron̄jake im ļoor im̧we ko an Jetōb ilo am̧ katakin. Wāween eo n̄an karuwaineneik Jetōb Kwojarjar ilo am̧ katakin ej n̄an karuwaineneik E n̄an mour eo am̧. Menin ekoba niknik ilo kajjieon̄ n̄an ļoor waanjon̄ak eo an Rilo̧mo̧o̧r im mour kōn gospel eo An kōn aolepān būruōm̧. Im kōnke ejjeļo̧k iaad ej kōm̧m̧an menin ilo weppān, ej barāinwōt meļeļe in ukweļo̧k kajjojo raan.

Kajjitōk ko n̄an Kōļmenļo̧kjeņ kaki: Ta meļeļein n̄an kwe n̄an kepooj kwe make ilo jetōb n̄an katakin? Ta eo kwoj en̄jake eim̧we n̄an kōm̧m̧ane n̄an kōkōm̧anm̧anļo̧k wāween eo kwoj kōpooj eok make ilo jetōb? Ewi am̧ ļōmņak n̄an pojak ilo jetōb me emaron̄ kōm̧m̧an oktak ilo am̧ katakin?

Jān Jeje ko Rekwojarjar: Ezra 7:10; Luk 6:12; Alma 17:2–3, 9; Katak im Bujen Ko 11:21; 42:13–14

Rilo̧mo̧o̧r Ekar Iien Otemjej Pojak n̄an Uwaake Aikuj ko an Ro Jet

Jairōs, irooj in im̧ōn kweiļo̧k eo, ekar bun̄ ioon neen Jisōs, akweļap n̄an E n̄an jipan̄ leddik eo nejin emej. Jisōs im rikaļoor ro An rekar etal ilo iaļ eo aer ilubwiljin armej ro ilo iaļ ko n̄an m̧weo im̧ōn Jairōs ke ejidimkij an Jisōs kar bōjrak. “Wōn ej un̄n̄ūr Eō?” Eaar kajjitōk. Ekar āinwōt juon kajjitōk ekōjak—ilo aer pād ilo kitōltōl in armej ro, eo ekar jab jibwe E? Bōtaab Rilo̧mo̧o̧r ekar jeļā bwe ilo jarlepju eo, juon ekar jibadōkļo̧k E kōn juon aikuj ejenolo̧k im kōn tōmak eo n̄an bōk kemour eo Ekar leļo̧k. Enaaj kar wōr wōt iien n̄an loļo̧k leddik eo nejin Jairōs. Bōtaab m̧okta Ekar ba n̄an kōrā eo me ekar jibwe nuknuk eo An, “Nejū, aṃ tōmak ear kemour eok; kwōn ilọk ilo aenōṃṃan” (lale Luk 8:41–48).

Āinwōt juon rūkaki, jet iien kwomaron̄ lo am̧ make ekaririr n̄an kwaļo̧k juon men eo kwar kōpooje n̄an katakin. Ilo an men jab in maron̄ aorōk, kanooj lale bwe ilo am̧ ekairir kwojjab ļōmņak wōt in ekairir kōn juon aikuj eo ejej uwaan an juon eo kwoj katakin. Ilo kakobaba n̄an tōl ilo jetōb kwoj kappukōte ilo am̧ pojak n̄an katakin, pukōte m̧okta tōl eo an Jetōb ilo am̧ katakin. Kajjieon̄ in jeļā kōn aikuj ko, kajjitōk ko, im itok limo ko an rūkkatak ro. Jetōb Kwojarjar emaron̄ jipan̄ eok kile jeļā elmen an juon rūkkatak bōk ak meļeļe juon me eo kwar katakin. Emaron̄ im̧we kwe, ilo iien ko, n̄an ukōt karōk ko am̧. N̄an waanjon̄ak, kwomaron̄ im̧we n̄an joļo̧k eļapļo̧k iien jān am̧ kōņaan ilo juon unin kōnono ak n̄an joļo̧k jet iaan iien ekōnono ko n̄an tokālik n̄an juon men eo me eļapļo̧k an aorōk n̄an rūkkatak ro kiiō.

Kajjitōk ko n̄an Kōļmenļo̧kjeņ kaki: N̄āāt eo kwar en̄jake bwe juon m̧am̧a ak baba ak juon rūkaki ekar jeļā kōn aikuj ko am̧ āinwōt juon rūkkatak? Ro kwoj katakin er rejeļā ke eļapļo̧k an itok limoiūm̧ ilo ekkatak eo aer n̄an kadedeļo̧k juon katak? Elmen an maron̄ em̧m̧anļo̧k am̧ kōnono kōn ikdeelel eo am̧?

Jān Jeje ko Rekwojarjar: 1 Piter 3:15; Alma 32:1–9; 40:1; 41:1; 42:1

Rilo̧mo̧o̧r ekar Letok Iien ko Rem̧m̧an n̄an an Armej ro Katakin kōn Jetōb Kwojarjar

Ekar pen n̄an elōn̄ ilo tōre eo an Jisōs n̄an meļeļe kar wōn lukkuun E, bōtaab ekar lōn̄ ļōmņak ko. “Jet re ba, Jon ri peptaij,” rikaloor ro An rekar riboote, “jet, Ilaija; im bar jet, Jeremaia, ak juon iaan ri kanaan ro.” Ak innām Jisōs ekar kajjitōk juon kajjitōk eo ekar karuwainene rikaloor ro An n̄an leliktak naan ko an ro jet im lale lowaan būruer make: “Wōn N̄a ilo ami ba?” Ekar kōņaan pukōte uwaak eo aer ejjab jān “kanniōk im bōtōktōk” ak kaju jān “Jema ej pād i lan̄.” Ekar juon kain kam̧ool—revelesōn an juon make jān Jetōb Kwojarjar—eo ekar kōtļo̧k Piter bwe en ba, “Kwe Ri Kraist, Nejin Anij e mour” (lale Matu 16:13–17).

N̄an mour ilo jetōb ilo raan kein āliktata, armej ro kwoj katakin er renaaj aikuj juon kam̧ool ilo jetōb an m̧ool eo. Kwojjab maron̄ leļo̧k n̄an er, bōtaab kwomaron̄ karuwainene, kōketak, im̧we, im katakin er n̄an kappukōt e. Kwomaron̄ kalikkare—ilo naan ko im makūtkūt ko am̧—ewi jon̄an an aorōk an Jetōb Kwojarjar n̄an ekkatak gospel in. Ļōmņak, n̄an waanjon̄ak, mejatoto in jikin katakin eo kwoj kōm̧m̧an im rōjan̄. Juon men eo eļam waan āinwōt karōkan jea ko ilo ruum̧ eo ak wāween am̧ karuwainene im ikitōltōl ippān rūkkatak ro ej ejake jetjet ilo jetōb n̄an an rūkkatak ro en̄jake. Kwomaron̄ barāinwōt karuwaineneik rūkkatak ro n̄an m̧aanjabpopo ilo jetōb n̄an ekkatak, ejja āinwōt am̧ m̧aanjabpopo ilo jetōb n̄an katakin. Kajjitōk ippāer n̄an bōk eddo in jetōb eo rej bōktok. Im kwomaron̄ leļo̧k iien ko rem̧m̧an n̄an er n̄an en̄jake an Jetōb eo kam̧ool kōn Jisōs Kraist im gospel eo An. Kam̧ool jab in enaaj erom juon “deka” n̄an er, “im kōjām ko an Hell re jāmin [ioomi]” (Matu 16:18).

Kajjitōk ko n̄an Kōļmenļo̧kjeņ kaki: Ta eo kwar lale bwe ej kōm̧m̧ane juon mejatoto ilo jetōb n̄an ekkatak gospel eo? Ta eo ej ka weļo̧k e? Ta eo ejipan̄ armej ro kwoj katakin kōn Jetōb? Ļōmņak kōn jikin eo ekkā am katakin ie? Elmen am en̄jake n̄e kwoj pād ijo? Elmen am̧ kōm̧m̧an bwe en em̧m̧anļo̧k am̧ karuwaineneik Jetōb n̄an an pād ijo?

Jān Jeje ko Rekwojarjar: Luk 24:31–32; Jon 14:26; 16:13–15; Moronai 10:4–5; Katak im Bujen Ko 42:16–17; 50:13–24

Ilo ad katakin, jemaron̄ kajjitōk ippān rūkkatak ro n̄an pukōt kam̧ool eo aer make ilo jetōb kōn m̧ool eo.

Rilo̧mo̧o̧r Ekar Jipan̄ Ro Jet Kapukōt, Kile, im Jerbale Revelesōn eo An Make

Irooj ej kōņaan kōnono ippād—im E ej kōņaan bwe jen jeļā bwe E ej kōnono ippād. Ilo1829 eo, juon rūkaki in jikuuļ 22 iiō dettan ekar etan Oliver Cowdery ekar ekkatak kōn katak eo eļap, ekaitoktok limo me jabdewōt emaron̄ bōk revelesōn an juon make. Bōtaab kajjitōk ko an rekar āinwōt ta eo elōn̄ iaad kar kajjitōk: “Irooj ej ke lukkuun kajjieon̄ in kōnono n̄an eō? Im ekōjkan aō maron̄ jeļā ta eo E ej ba?” N̄an uwaake kajjitōk kein, Jisōs Kraist ekar kajjitōk ippān Oliver n̄an ļōmņak likļo̧k kōn tōre eo ekar kappukot ilo jetōb. “Iaar jab kwaļo̧k aenōm̧m̧an n̄an am ļōmņak?” Ekar kajjitōk (lale Katak im Bujen Ko 6:21–24). Tokālik, E ekar katakin Oliver kōn wāween ko jet Jetōb eo emaron̄ kōnono n̄an e (lale Katak im Bujen Ko 8:2–3; 9:7–9; bar lale Katak im Bujen Ko 11:12–14).

Mour ilo juon laļ eo me ekanooj emakijkij an meļo̧kļo̧k men ko an jetōb, jej aolep aikuj jipan̄ n̄an kile ainikien Jetōb eo. Jemaron̄ in kar en̄jake Jetōb ilo jab kile. Im jemaron̄ aolep ekkatak eļapļo̧k kōn wāween pukōt Jetōb, kile kareel eo An, im jerbale im̧we ko E ej litok n̄an kōj. Ilo am katakin, jipan̄ rūkatak ro pukōt wāween ko Jetōb emaron̄ kōnono—im elmen An kar kōnono ippāer. Juon iaan menin leļo̧k ko reļļap tata kwomaron̄ leļo̧k āinwōt juon rūkaki ej n̄an jipan̄ ro kwoj katakin er eddōkļo̧k n̄an kappukōt to̧o̧n wōt am̧ mour kōn revelesōn an juon make.

Kajjitōk ko n̄an Kōļmenļo̧kjeņ kaki: Etke eaorōk n̄an ekkatak n̄an bōk revelesōn eo an juon make? Ekar wōr ke juon ekar jipan̄ eok meļeļe ekōjkan n̄an pukōt im kile revelesōn eo? Ekōjkan am̧ maron̄ kōketak ro kwoj katakin er n̄an pukōt, kile, im jerbale revelesōn eo jān Jetōb Kwojarjar?

Jān Jeje ko Rekwojarjar: Galetia 5:22–23; Alma 5:45–47; Katak im Bujen Ko 42:61; 121:33; Josep Smith—Bwebwenato 1:8–20

Rilo̧mo̧o̧r ekar Kwaļo̧k Naan in Kam̧ool n̄an Ro Ekar Katakin

Ilo juon iien eo aorōk eļap an katakin im jerbal in karejar, Jisōs ekar pukōt n̄an kaenōm̧m̧an eo M̧ōttan Martha, eo būratōr eo an ekar mej. E ekar kwaļo̧k ippān liin juon naan in kam̧ool eļem waan kōn juon m̧ool indeeo: “Jeoṃ im jatūṃ ṃaan enaaj bar jerkak” (Jon 11:23). Kam̧ool eo An ekar im̧we Martha n̄an kwaļo̧k naan in kam̧ool eo an make: “I jeḷā enaaj bar jerkak ilo jerkakpeje eo ilo raan āliktata” (Jon 11:24). Lale ewi jon̄an emakijkij in an waļo̧k ilo Jon 11:25–27. Ta eo ej kabwilōn̄ eok kōn waanjon̄ak eo an Rilo̧mo̧o̧r? Etke ej m̧ōttan eo eaorōk n̄an kwaļo̧k naan in kamool eo an m̧ool ko ilo gospel in?

Naan in kam̧ool eo am̧ emaron̄ wōr juon an kareel ekajoor ioon ro kwoj katakin er. Ejjab aikuj in jejjet ak aitok. Im ejjab aikuj jino kōn “Ikōņaan kwaļo̧k aō naan in kamool.” Baj kwaļo̧k wōt ta eo kwojeļā kōn kajoor eo an Jetōb Kwojarjar. Juon naan in kamool eo emool ekajoor n̄e ej kaju im ilo itok jān bōro. Emakijkij kwaļo̧k naan in kam̧ool eo kōn Rilo̧mo̧o̧r, gospel eo An, im kajoor eo An ilo mour eo am̧, im rōjan̄ ro kwoj katakin n̄an kōm̧m̧an ejjā āinwōt in. Im keememej bwe jet iien kam̧ool eo ekajoortata ej waļo̧k ejjab jān rūkaki eo bōtaab jān juon rūkkatak.

Kajjitōk ko n̄an Kōļmenļo̧kjeņ kaki: Kapukōt waanjon̄ak ko ilo jeje ko rekwojarjar rej kwaļo̧k kajoor in im̧we eo an juon armej ej kwaļo̧k an naan in kamool. Ta eo kwoj ekkatak jān waanjon̄ak ko? N̄āāt eo kwar jeraam̧m̧an kōn naan in kam̧ool eo an ro jet? Elmen am̧ kwaļo̧k naan in kam̧ool eo am̧ n̄an kareel ro kwoj katakin er? Elmen an kar kareel eok?

Jān Jeje ko Rekwojarjar: Jerbal 2:32–38; Mosaia 5:1–3; Alma 5:45–48; 18:24–42; 22:12–18; Katak im Bujen Ko 46:13–14; 62:3

Jet Wāween ko n̄an Kōjerbal Ta eo Kwoj Ekkatak

• Kajjitōk ippān rūkkatak ro n̄an kwaļo̧k ta eo Jetōb Kwojarjar ekar katakin er ilo aer ekkatak naan ko an Anij.

• Kōppopo m̧oktaļo̧k n̄an bōk im̧we ko ilo jetōb ilo am̧ katakin.

• Je im̧we ko ilo jetōb me rej itok ilo am̧ kōppopo.

• Leļo̧k iien ko rem̧m̧an ejjab aolep iien n̄an ro uwaan kūlaaj eo n̄an ikōn̄ n̄an kōļmenļo̧kjeņ kōn ta eo Jetōb ej katakin er.

• Kōjerbal al ko rekwojarjar im pija ko n̄an karuwainene im̧we an Jetōb.

• Ron̄jake im̧we ko ilo am kōpopo im katakin, im n̄an maron̄ ukōt karōk ko am̧.

• Leļo̧k iien em̧m̧an n̄an aolep rūkkatak bwe ren kwaļo̧k aer naan in kamool kōn ta ko rekar ekkatak.

• Jipan̄ ro jet kile n̄e Jetōb ej pād.

• Mour kōn m̧ool ko kwoj katakin bwe kwon maron̄ kam̧ool kaki.

• Ļo̧o̧r im̧we ko n̄an katakin ilo iien ko rej make waļo̧k, jab karōki.