17.

A’oa’o Atu o le Talalelei

Tatou te a’oa’o atu le talalelei e fesoasoani ai i tagata ia faamalolosia lo latou faatuatua i le Tama Faalelagi ma Iesu Keriso. Tatou te saili e fesoasoani i tagata ia avea atili e faapei o le Faaola, maua Lona mana i o latou olaga, ma i’u ai ina maua le ola e faavavau. Pe a oo ina a’oa’o atu le afioga a le Atua ma mauaina e ala i le Agaga, ua i ai le mana e suia ai loto ma musuia le liuaina. E i ai sona “uiga mamana tele atu i luga o mafaufau o tagata nai lo … se isi lava mea” (Alema 31:5).

17.1

Mataupu Faavae o le A’oa’o Atu Faapei o Keriso

Pe a a’oa’o atu le talalelei, e mulimuli matua, faiaoga, ma taitai i le faataitaiga a Iesu Keriso, o le Faiaoga o Faiaoga. O le A’oa’o Atu i le Ala a le Faaola o se matafaioi ma se tiutetauave paia.

E fefaasoaai e taitai ia mataupu faavae nei o le a’oa’o atu faapei o Keriso i faiaoga i a latou faalapotopotoga. O loo faamalamalama auiliili atu nei mataupu faavae i le A’oa’o Atu i le Ala a le Faaola.

17.1.1

Alofa Ia I Latou E Te A’oa’oina

O mea uma e fai e le Faaola o se faailoaga o Lona alofa (tagai i le 2 Nifae 26:24). E mulimuli ia taitai ma faiaoga i Lana faataitaiga e ala i le faaalia o le alofa mo i latou o loo latou a’oa’oina. Latou te tatalo mo i latou o loo latou a’oa’oina, i o latou igoa, e saili e fesootai ma ia malamalama ia te i latou, ma taulai atu i manaoga o tagata taitoatasi. Latou te aapa atu i tagata o a latou vasega po o korama o e e le o auai mai.

17.1.2

A’oa’o atu e ala i le Agaga

Ina ia musuia tagata ia faatuatua ia Iesu Keriso, e tatau i faiaoga ona a’oa’o atu e ala i le Agaga. E sailia e faiaoga le taitaiga a le Agaga a o latou tapenapena ma a’oa’o atu, ma latou te taumafai malosi e ola agavaa mo Lana tosinaga i aso taitasi.

17.1.3

A’oa’o Atu le A’oa’oga Faavae

Na a’oa’o atu e le Faaola le a’oa’oga faavae a Lona Tama. O le mulimuli i le faataitaiga a le Faaola, e taulai atu faiaoga i upumoni taua, laveai o le talalelei. Latou te a’oa’o atu e faaaoga ai tusitusiga paia, o a’oa’oga a perofeta o aso e gata ai, ma anomea o mataupu a’oa’oina ua faamaonia mai. E taitai e faiaoga ia talanoaga musuia ma faamautinoa e faagaeetia ma sa’o ona a’oa’oga faavae. O anomea ua faamaonia o loo lisi atu i Faatonuga mo Mataupu A’oa’oina o i ai nei i luga o le ChurchofJesusChrist.org.

17.1.4

Valaaulia le A’oa’oina ma le Filiga

E fautuaina e faiaoga ia tagata o le au paia o i latou lava e nafa mo lo latou a’oa’oina. Latou te lagolagoina tagata o le au paia i a latou taumafaiga e a’oa’o le talalelei e le tagata lava ia, faapea ma o latou aiga. Latou te valaaulia tagata o le au paia e faasoa atu mea o loo latou a’oa’oina ma ia galulue e faatino. E tuputupu a’e le faatuatua o se tagata pe a auai atoatoa o ia i le a’oa’oina mai o le talalelei ma faaaoga ona mataupu faavae i le olaga i aso taitasi.

17.2

A’oa’o Mai ma le A’oa’o Atu o le Talalelei e Faatotonugalemu-i-le-Aiga

Ina ia liua i le Alii o Iesu Keriso, e nafa tagata taitasi o le Ekalesia ma le a’oa’oina mai o le talalelei mo ia lava. E le gata i lea, e nafa matua ma le a’oa’oina atu o le talalelei i a latou fanau. O le a’oa’o mai ma le a’oa’o atu o le talalelei e tatau ona faatotonugalemu i le aiga. E fautuaina ma lagolagoina e taitai ma faiaoga o le Ekalesia le a’oa’o mai ma le a’oa’o atu o le talalelei e faatotonugalemu i le aiga.

E fautuaina e taitai ma faiaoga ia tagata o le au paia e sailia a latou lava musumusuga e uiga i le ala e suesue ai ma a’oa’o atu ai le talalelei. E tatau ona avea tusitusiga paia ma savali o konafesi aoao ma a latou punaoa autu. O punaoa lagolago e mafai ona aofia ai le Sau, Mulimuli Mai ia te A’u ma mekasini a le Ekalesia.

17.3

O Tiutetauavae o Taitai

O taitai e nafa ma le a’oa’o atu ma le a’oa’o mai i a latou faalapotopotoga. O loo otooto atu i lalo nisi o auala latou te faataunuu ai lenei tiutetauave.

• Fai se faataitaiga e ala i le a’oa’o mai ma le a’oa’o atu o le talalelei i le ala a le Faaola.

• Faamautinoa o le a’oa’o atu i a latou faalapotopotoga e fausia ai le faatuatua ma e sa’o faalea’oa’oga faavae.

• Afai o taitai o ni sui auai o le aufono a le uarota, ia talanoaina ma isi sui auai o le aufono ni auala e faaleleia ai le a’oa’o mai ma le a’oa’o atu i totonu o le uarota. E mafai e le epikopo ona valaaulia le peresitene o le Aoga Sa e taitai nei talatalanoaga.

• Pe a manaomia, fautua atu ni igoa i le au epikopo, o tagata o le uarota e valaau e faiaoga i a latou faalapotopotoga, i le mulimuli ai i taiala o i le 30.1.

• Fono ma faiaoga faatoa tofia ma fesoasoani ia i latou e tapenapena mo o latou valaauga (tagai i le A’oa’o Atu i le Ala a le Faaola,, 40).

• Tuu atu le lagolago faifai pea i faiaoga i a latou faalapotopotoga. Talanoa e le aunoa i faiaoga e uiga i a latou taumafaiga e fausia le faatuatua i tagata o loo latou a’oa’oina. Afai e manaomia, fesili i le peresitene o le Aoga Sa mo se fesoasoani.

17.4

Fonotaga a le Aufono a Faiaoga

I fonotaga a le aufono a faiaoga, e fefautuaai faatasi ia faiaoga e uiga i mataupu faavae o le a’oa’o atu e faapei o Keriso. Latou te fefautuaai foi e uiga i auala e faaleleia ai le a’oa’o mai ma le a’oa’o atu o le talalelei. Latou te faaaogaina le A’oa’o Atu i le Ala a le Faaola e fai ma punaoa.

O aufono a faiaoga e faia faalekuata i le taimi o le vasega e 50-minute i le Aso Sa.

• E mafai ona fai ia fonotaga mo faiaoga a le au perisitua, Aualofa, ma Tamaitai Talavou i se Aso Sa muamua po o le lona tolu.

• E mafai ona fai fonotaga mo faiaoga o le Aoga Sa i se Aso Sa lona lua po o le lona fa.

O le au peresitene o le Peraimeri e fefautuaai ma se tasi o le au epikopo e fuafua ai pe faapefea ona faamalolosia le a’oa’o atu i le Peraimeri. E mafai ona fesoasoani le peresitene o le Aoga Sa pe a manaomia ai. O loo lisi atu i lalo nisi itu e filifili ai:

• E mafai e faiaoga o le Peraimeri ona auai i fonotaga a le aufono a faiaoga faatasi ai ma faiaoga mai isi faalapotopotoga.

• E mafai ona fai ese se fonotaga a le aufono a faiaoga mo faiaoga a le Peraimeri. E mafai ona fai nei fonotaga i le taimi o pesepesega 20-minute a le Peraimeri. O se isi faiga e sui ai, e mafai ona faia a o lei amataina ia sauniga masani o le Aso Sa po o le mae’a ai foi, po o se isi aso o le vaiaso.

• E mafai e uso o le au peresitene o le Peraimeri ona asiasi i vasega a le Peraimeri ma fefautuaai ma faiaoga pe a mae’a e uiga i le a’oa’o atu i le ala a le Faaola.

O le aufono a le uarota e vaavaaia ma faatulaga ia fonotaga a le aufono a faiaoga. O se tasi o le au peresitene o le Aoga Sa e masani ona taitaia fonotaga. Peitai, e mafai e le au epikopo ona talosagaina se isi tagata o le au paia na te taitaia.

Mo nisi faamatalaga, tagai i le “Fonotaga a le Aufono a Faiaoga” i le Aoao Atu i le Ala a le Faaola (itulau 38–39).

17.5

Fonotaga a le Aufono a Faiaoga mo Matua

E mafai e le aufono a le uarota ona faatulaga ia fonotaga a le aufono a faiaoga mo matua e fesoasoani ai ia i latou ia faaleleia le a’oa’o atu o le talalelei i le fale. E pei foi o isi fonotaga a le aufono a faiaoga, e faia nei fonotaga i le taimi o vasega e 50-minute i le Aso Sa.

I nei fonotaga, e fefautuaai faatasi matua e uiga i le auala e faaaoga ai mataupu faavae o le aoao atu e faapei o Keriso a o latou aoao atu a latou fanau. Latou te faaaogaina le Aoao Atu i le Ala a le Faaola e fai ma punaoa, e aofia ai le vaega ua faaautuina ”Aiga ma le Auaiga” (itulau 30– 31). E mafai foi ona latou talanoaina fautuaga o le aoao atu ma le suesueina o tusitusiga paia i le Sau, Mulimuli Mai ia te Au, e pei o le vaega ua faaautuina “Sauniaina o A Outou Fanau mo se Olaga Atoa i luga o le Ala o Feagaiga a le Atua.“

O le aufono a le uarota e vaavaaia ma faatulaga ia fonotaga a le aufono a faiaoga mo matua. Latou te filima’otia pe valaaulia ni matua patino e auai pe tuuina atu se valaaulia i matua uma o le uarota.

O se tasi o le au peresitene o le Aoga Sa e masani ona taitaia fonotaga. Peitai, e mafai e le au epikopo ona talosagaina se isi tagata o le au paia na te taitaia.

Mo nisi faamatalaga, tagai i le ”Fonotaga a le Aufono a Faiaoga” i le Aoao Atu i le Ala a le Faaola (itulau 38–39).