Mo Taitai—Fesoasoani i Faiaoga ia Manuia

Fegalegaleaiga Taitoatasi

E masani lava o le auala sili e taulima ai manaoga tulaga ese o faiaoga o fegalegaleaiga taitoatasi. Mo se faataitaiga, i le avea ai ma se taitai, e mafai ona e faia se talanoaga puupuu ma se faiaoga a o lei amataina le vasega po o le uma foi o le vasega e talanoaina mataupu faavae o le Aoao Atu i le Ala a le Faaola. E mafai ona e saunia mo lenei talanoaga e ala i le tagai i le faiaoga ao aoao atu. Saili ia malamalama atili i malosiaga o le faiaoga ma saili ni auala e mafai ona e ofoina atu ai le lagolago.

O le atiaeina i luga o malosiaga o se faiaoga e taua tele e pei o le faailoaina o avanoa mo le faaleleia atili. E aoga le amata o talanoaga ma faiaoga e ala i le fai atu ia i latou e mafaufau mo i latou lava po o le a le mea o loo lelei ma o fea latou te lagona e mafai ona latou alualu ai i luma.

A o outou feiloai ma faiaoga, mafaufau i ni auala e faamalosia ai i latou ma uunaia i latou i le agalelei ma le lotofaafetai mo le auaunaga latou te tuuina atu.

Fonotaga a le Aufono a Faiaoga

E tatau i uarota ona faia ni fonotaga a le aufono a faiaoga faalekuata lea e mafai ai e faiaoga ona fefaasoaai ai faatasi e uiga i mataupu faavae o le aoao atu e faapei o Keriso. E mafai foi ona faia fonotaga a le aufono a faiaoga mo matua (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 13.5, ChurchofJesusChrist.org).

O Le a le Taimi e Tatau Ona Faia Ai Nei Fonotaga?

O aufono a faiaoga e faia i le taimi o le vasega e 50-minute i le Aso Sa.

• E mafai ona auai faiaoga a le au Perisitua, Aualofa, ma Tamaitai Talavou a le o le Aso Sa muamua po o le lona tolu, pe a fuafuaina ai e taitai i le lotoifale.

• E mafai ona auai faiaoga o le Aoga Sa a le o le Aso Sa lona lua po o le lona fa, pe a fuafuaina ai e taitai i le lotoifale.

• E mafai ona auai faiaoga o le Peraimeri i soo se Aso Sa, pe a fuafuaina ai e au peresitene o le Peraimeri ma le Aoga Sa. Pe a manaomia ai, e mafai ona fono eseese faiaoga o le Peraimeri mai isi faiaoga e fefautuaai ai e uiga i vaega faapitoa i le aoaoina o tamaiti. E mafai ona tupu lenei mea i le taimi o pesepesega e 20-minute, a o lei faia po o le maea ai o sauniga masani o le Aso Sa, po o se isi aso o le vaiaso. E mafai ona sili atu ma le tasi se fonotaga e faia i le kuata mo faiaoga o le Peraimeri ina ia latou le misia uma ai ia vasega o le Peraimeri i le vaiaso lava lena. (Manatua: Pe a manaomia, o le au peresitene o le Peraimeri e tofiaina ni faiaoga le tumau, tuufaatasi vasega, pe faia nisi fuafuaga e mafai ai ona auai faiaoga o le Peraimeri i fonotaga a le aufono a faiaoga.)

• O fonotaga a le aufono a faiaoga mo matua e mafai ona faia i soo se Aso Sa, pe a fuafuaina ai e le aufono a le uarota.

O Ai e Tatau Ona Auai?

O i latou uma e aoaoina se korama po o se vasega i le uarota e tatau ona auai, faatasi ai ma se tasi o taitai perisitua po o faalapotopotoga e nafa ma na korama po o vasega. Afai e manaomia, o sui auai e mafai ona vaevae i ni vaega e tusa ma manaoga o i latou o loo latou aoaoina. Mo se faataitaiga, o faiaoga o le autalavou po o fanau e ono manuia mai le fono eseese mai i lea taimi i lea taimi e talanoaina mataupu faapitoa e faatatau i le aoaoina o le autalavou po o fanau.

Mo fonotaga a le aufono a faiaoga mo matua, e fuafua e le aufono a le uarota pe valaaulia ni matua patino pe tatala le auai i tagata uma o e mananao e auai.

O Ai e Taitaia Nei Fonotaga?

O le aufono a le uarota, faapea ma se fesoasoaniga mai le au peresitene o le Aoga Sa, e vaavaaia le fonotaga a le aufono a faiaoga. Latou te fefautuaai faatasi e uiga i manaoga o faiaoga ma tagata aoao e faavae i mea sa latou matauina i vasega ma fonotaga. Latou te galulue faatasi e fuafua po o a mataupu faavae ma faiga mai le Aoao Atu i le Ala a le Faaola o le a sili ona faafetaiaia ai manaoga ua latou faailoaina.

E masani lava, o le peresitene o le Aoga Sa e taitaia fonotaga a le aufono a faiaoga. Ae, e mafai ona tofia isi tagata o le uarota e taitaia fonotaga i nisi taimi. E faamalosia e au peresitene o korama ma faalapotopotoga a latou faiaoga i mataupu faavae ma faiga masani o loo talanoaina i le fonotaga.

O Le A le Mea e Tatau Ona Tupu i le Fonotaga a le Aufono a Faiaoga?

O le fonotaga a le aufono a faiaoga e tatau ona mulimuli i le mamanu lenei:

• Faasoa ma fefautuaai faatasi. Valaaulia faiaoga e faasoa mai ni aafiaga o le aoao atu lata mai, fai fesili e faatatau i le aoao atu, ma faasoa mai ni manatu mo le foiaina o faafitauli. O lenei vaega o le fonotaga e mafai ona aofia ai se toe tagatagai i mataupu faavae sa talanoaina i fonotaga ua maea.

• Aoao faatasi. Valaaulia faiaoga e talanoaina se tasi o mataupu faavae nei o loo tuuina atu i lenei punaoa: taulai atu ia Iesu Keriso, alofa ia i latou e te aoaoina, aoao atu e ala i le Agaga, aoao atu le aoaoga faavae, ma valaaulia le aoaoina ma le filiga. O mataupu faavae e mafai ona tuuina atu i soo se faatulagaga, sei vagana ua faatonuina e le aufono a le uarota, e mafai e sui auai i le fono ona filifili le isi mataupu faavae e talanoaina. E mafai ona e faaaluina le sili atu ma se fonotaga se tasi i se mataupu faavae pe a manaomia ai.

• Fuafua ma valaaulia. Fesoasoani i faiaoga e fuafua pe faapefea ona latou faaaogaina le mataupu faavae sa latou talanoaina. Pe a talafeagai ai, e mafai foi ona outou faataitai faatasi se tomai sa outou talanoaina. Valaaulia i latou e faamaumau ma faatino i luga o soo se lagona latou te maua e uiga i le auala e faaaoga ai le mataupu faavae i la latou aoaoga—e aofia ai a latou taumafaiga e aoao i totonu o o latou aiga. Faamalosia i latou e amata ona suesue le isi mataupu faavae e talanoaina.

I le mea e gata ai le mafai, o fonotaga a le aufono a faiaoga e tatau ona tuuina atu ai se mamanu o le mataupu faavae o loo talanoaina.

O fonotaga a le aufono a faiaoga e mafai ona fesoasoani i faiaoga ia malamalama atili ma faaaoga mataupu faavae o le aoao atu e faapei o Keriso.

Aoaoina Faamasani o Faiaoga Faatoa Valaau

I le avea ai ma se taitai, ua ia te oe le tiutetauave e “fono ma faiaoga faatoa valaauina” i lau faalapotopotoga ma “fesoasoani ia i latou e saunia mo o latou valaauga” (Tusitaulima Aoao, 17.3, ChurchofJesusChrist.org). O nei fonotaga o se avanoa e faailoa ai faiaoga fou i o latou valaauga paia ma uunaia i latou i se vaaiga po o le a le uiga o le aoao atu i le ala a le Faaola. I le avea ma se taitai, e mafai ona e fesoasoani e saunia faiaoga fou e auauna atu e ala i le faia o mea nei:

• Faaali atu le talitonuga o le a fesoasoani le Faaola ia i latou i o latou valaauga (tagai i le Mataupu Faavae ma Feagaiga 88:78).

• Tuu atu i faiaoga fou se kopi o lenei punaoa, ma uunaia i latou e vaavaai mo auala e faaaoga ai ona mataupu faavae i a latou aoaoga.

• Faasoa atu i faiaoga fou soo se mea e uiga i lau faalapotopotoga o le a fesoasoani mo i latou ia iloa.

• Pe a manaomia, ta‘u atu i faiaoga fou po o le fea potu e aoao atu ai ma po o le a le lesona e amata ai. Tuu atu soo se faamatalaga latou te manaomia e uiga i a latou vasega ma tagata o le vasega.

• Faamalamalama atu i faiaoga fou e mafai ona e fesoasoani ia i latou i lo latou valaauga. Ofo atu le lagolago i le potuaoga ma le mauaina o punaoa faafaiaoga pe a manaomia.

• Ofo atu e matau vasega a faiaoga i nisi taimi, ma tuuina atu manatu faaalia e pei ona uunaia ai e le Agaga.

• Valaaulia faiaoga e auai i fonotaga faalekuata a le aufono a faiaoga.