O Iesu ma Ona soo i le Tausamaaga Mulimuli

Ou Te Tuuina Atu Ia Te Outou Le Manuia, saunia e Walter Rane

Aoao Atu e uiga ia Iesu Keriso e Tusa Lava po o A Mea O E Aoao Atu

E tele mea e aoao atu e uiga i le talalelei toefuataiina a Iesu Keriso—mataupu faavae, poloaiga, valoaga, ma tala o tusitusiga paia. Ae o lala uma nei o le laau lava e tasi, aua e tasi lo latou faamoemoega: ia fesoasoani i tagata uma ia o mai ia Keriso ma ia faaatoatoaina ia te Ia (tagai Iaroma 1:11; Moronae 10:32). E tusa lava po o a mea o loo e aoaoina atu, ia manatua o loo e aoao moni atu e uiga ia Iesu Keriso ma le ala e avea ai e faapei o Ia. E mafai ona fesoasoani le Agaga Paia ia te oe e aoao ia iloa upumoni e uiga i le Faaola ma Lona mana togiola i mataupu faavae taitasi o le talalelei, poloaiga, ma aoaoga faaperofeta (tagai Iakopo 7:10–11).

O e aoao atu e uiga i le ositaulaga? Mafaufau e sailiili ma tagata aoao pe faapefea e osigataulaga tatou te faia ona faasino atu ai o tatou agaga i le “taulaga tele ma le mulimuli” a le Faaola (Alema 34:10). O e aoao atu e uiga i le lotogatasi? Mafaufau e talanoaina le lotogatasi na ausia e Iesu Keriso ma Lona Tama ma Lana valaaulia mo i tatou ina ia tasi ma i Laua (tagai Ioane 17). Tagai i autu uma o le talalelei o se avanoa e aoao atu ai ma aoao mai e uiga ia Iesu Keriso.

O poloaiga uma foi e maua ai lenei avanoa. Aua le na ona taulai atu i tulafono o le talalelei—aoao foi e uiga i le Faitulafono. Afai tou te talanoaina le Upu o le Poto ma taofi i mea e fai ma mea e le o ola maloloina, ua e misia le avanoa e mafaufau loloto ai i le loloto e tatau ona popole ai Iesu Keriso ia i tatou—o lo tatou manuia faaleagaga ma le faaletino—ia tuuina mai ai ia i tatou lenei tulafono. Taulai atu pe faapefea e le naunau ma le popole o le Faaola ia faamanuia i tatou i Lona mana e fesoasoani ai ia i tatou ia ola i Ana tulafono. O poloaiga uma Na te tuuina mai ia i tatou e faaalia ai se mea e uiga i Lona mafaufau ma Lona finagalo ma le loto—ia maua le olioli i le iloaina faatasi o lenei mea!

Faamamafa le Faataitaiga a Iesu Keriso

E mafai ona tatou tuu Iesu Keriso i le totonugalemu o le aoao atu ma le aoao mai e ala i le iloaina ma faamamafa atu o Ia o le faataitaiga atoatoa o mataupu faavae uma o le talalelei. I le avea ai ma soo, tatou te le na ona mulimuli i mataupu faavae—tatou te mulimuli ia Iesu Keriso. A o tatou taulai atu i le faataitaiga atoatoa a le Faaola, o le a molimau mai le Agaga Paia ia te Ia ma musuia i tatou e mulimuli ia te Ia.

Vaai faalemafaufau mo sina taimi o loo e aoaoina atu le mataupu faavae o le tumau e oo i le iuga. O se talanoaga e uiga i le ala e avea ai le Faaola o se faataitaiga o le tumau e oo i le iuga, e mafai ona aumaia ai lagona o le migao matagofie mo Ia. O le a se mea e mafai e i latou e te aoaoina ona aoaoina ma lagonaina mai Lana faataitaiga?

O le Faaola o loo faamaloloina se tagata o loo taoto i luga o le eleele

Na faatulagaina e le Alii se faataitaiga atoatoa mo i tatou uma. Sa Ia Faamaloloina i Latou Uma, saunia e Michael Malm

Aoao atu e uiga i Faalagiga, Matafaioi, ma Uiga Paia o Iesu Keriso

E tele faalagiga o Iesu Keriso i tusitusiga paia. E tofu atagia mai ia i latou taitoatasi se tasi o Ana matafaioi i le fuafuaga a le Atua ma aoao i tatou e uiga i Ona uiga paia. Atonu e te mafaufau e sailiili ma tagata aoao po o a faalagiga e pei o le Tamai Mamoe a le Atua, Fautua, Faaatoatoa o lo Tatou Faatuatua, ma le Malamalama o le Lalolagi ua aoaoina ai i tatou e uiga ia Iesu Keriso. Ma le isi, a o e fesoasoani i tagata aoao ia iloa atili e uiga i le Faaola, alu i tala atu o mea na Ia fetalai ai ma faia i le tagata ua i ai o Ia ma pe o le a foi le matafaioi e finagalo o Ia e fai i o tatou olaga. A o outou aoao faatasi e uiga i le tagata ma uiga o le Faaola, o le a faalolotoina e le Agaga Paia lou malamalama ma le alofa mo Ia.

Vaavaai mo Faailoga e Molimau ia Iesu Keriso

“O mea uma,” na tautino mai ai le Alii, “na foafoaina ma faia e molimau ia te au” (Mose 6:63; tagai foi 2 Nifae 11:4). Faatasi ai ma lena upumoni i le mafaufau, e mafai ai ona tatou aoao e vaai i le tele o faatusa i tusitusiga paia o loo molimau mai e uiga i le Faaola. O nei faatusa e aofia ai mea e pei o le areto, vai, ma le malamalama. O le taimi lava tatou te malamalama ai pe faapefea ona fesootai nei mea faitino i le Faaola, e mafai ona latou aoao i tatou i Lona mana ma uiga auaumama. E mafai foi ona e maua mea e tutusa ai ma le soifuaga o le Faaola i olaga o perofeta ma isi alii ma tamaitai faamaoni i tusitusiga paia. O le vaavaai mo faatusa e faaalia ai upumoni e uiga i le Faaola i nofoaga e te ono le vaai i ai.