O le Faamoemoega o le Aoao Atu i le Ala a le Faaola

O mataupu faavae o loo faamatalaina i totonu o lenei punaoa e mafai ona fesoasoani i faiaoga uma o le talalelei e aoao atu ai i le ala a le Faaola. E aofia ai matua, uso ma tuafafine o auaunaga, faiaoga seminare ma inisitituti, ma soo se tasi o lona valaauga i le Ekalesia e tuuina atu ai ia i latou avanoa e aoao atu ai.

E mafai ona e suesue e oe lava ia lenei punaoa pe faaaoga foi e taiala ai talanoaga ma isi e uiga i le auala e avea ai ma se faiaoga e sili atu ona lelei. Mo se faataitaiga, e mafai ona faaaoga lenei punaoa i afiafi faaleaiga, fonotaga a le au peresitene, fonotaga a le aufono a le uarota po o le siteki, fonotaga faafaiaoga a le seminare ma le inisitituti, ma fonotaga a aufono a faiaoga (tagai “Mo Taitai—Fesoasoani i Faiaoga ia Manuia”).

Auala o Loo Faatulaga Ai le Punaoa Lenei

Vaega 1 o loo faamamafa mai ai le taua o le taulai atu ia Iesu Keriso i soo se taimi tatou te aoao atu ai mataupu faavae o Lana talalelei. O lenei vaega o loo faamatala mai ai mea tatou te aoao atu.

Vaega 2 o loo faamamafa mai ai mataupu faavae o le aoao atu e faapei o Keriso. O lenei vaega o loo faamatala mai ai le auala tatou te aoao atu ai.

Vaega 3 o loo tuuina mai ai ni fautuaga aoga e fesoasoani ai i faiaoga e faaaoga ia mataupu faavae o le aoao atu e faapei o Keriso.