e reirei te tina nakon natina te mwaane

17.

Angareirei n te Euangkerio

Ti reirei te euangkerio ni buokiia aomata ni kakorakoraa aia onimaki iroun Tamara are i Karawa ao Iesu Kristo. Ti ukora buokakiia tabeman n riki n aiaron te Tia Kamaiu, ni karekea Mwaakana i nanon maiuia, ao ni karekea te maiu ae akea tokina. N te tai are e taekinaki ana taeka te Atua ao e butimwaeaki iroun te Tamnei, iai mwaakana ni bitii naano ao ni karekea te rairaki. Iai “rakan korakorana iaon aia iango aomata nakon … te bwai riki teuana” (Aramwa 31:5).

17.1

Tuua n Ana Angareirei Kristo

N aia anga reirei taekan te euangkerio, kaaro, taan reirei, ao taan kairiiri a ira ana katooto Iesu Kristo, are bon te Mataniwi n Tia Reirei. Te Anga Reirei n ana Kawai te Tia Kamaiu bon te onimakinaki ao te tibwanga ae tabu.

Taan kairiiri a tibwauai tuua n Ana angareirei Kristo ma taan reirei n aia bootaki nako. A bwarabwara raoi tuua aikai i nanon Reirei n ana Kawai te Tia Kamaiu.

17.1.1

Tangiria Naake ko Reireiniia

Bwaai ni kabane ake E karaoi te Tia Kamaiu bon kaotan Ana tangira (taraa 2 Nibwaai 26:24). Taan kairiiri ao taan reirei a ira Ana katooto man kaotan aia tangira ibukiia naake a reirei nakoia. A tataro ibukiia naake a reireiniia n araia, a ukora te reitaki ao kinakiia, ao a tabeakin kainnanoia n tatabemania. A reitaki nakoia kaain aia kiraati ke kooram ake a aki roroko.

17.1.2

Reirei man te Tamnei

Ni kaungaia aomata bwa a na karekea te onimaki iroun Iesu Kristo, a riai taan reirei n anga reirei ma te Tamnei. Taan reirei a ukora ana kairiiri te Tamnei n aia katauraoi n anga reirei, ao a uaiakina te maiu ae raoiroi bwa a na karekea Ana kairiiri ni katoa bong.

17.1.3

Reirei te Reirei

E reirei te Tia Kamaiu Ana reirei Tamana. Irakin ana katooto te Tia Kamaiu, taan reirei a kabotoa aia iango ni baika a kakaawaki, koaua ni kamaiu n te euangkerio. A reirei ni kabongai koroboki aika a tabu, aia reirei burabeti ni bong aika kaitira, ao karikiram aika a kariaiakaki. Taan reirei a kairii marooro ao a taraia bwa aia anga reirei e kaungaa te nano ao e eti. Boki aika kariaiakaki a kaotaki rinaniia n te Instructions for Curriculum iaon ChurchofJesusChrist.org.

17.1.4

Karaoa Te Kamatebwai ae Nanomatoa

Taan reirei a kaungaia membwa bwa a na tabe ma oin reireiaia. A boutokaia membwa n aia waaki n reiakina te euangkerio n tatabemaniia ao aia utu. A kaoia membwa n tibwauai baike a reiakin ao a mwakuri iaona. Ana onimaki te aomata e rikirake ngkana teuanne ke neienne e waaki n reirei n te euangkerio ao e mwakurii baike e reiakini i nanon maiuna.

17.2

Kamatebwaian te Euangkerio ae Boboto n te Mwenga ao Reiakinana

Te rairaki nakon te Uea Iesu Kristo, kaain te Ekaretia n tatabemaniia nako a katabeaki bwa ana reiakina te euangkerio bon ibukin teuanne ke neienne. N reita anne, kaaro a katabeaki bwa a na reirei te euangkerio nakoia natiia. Kamatebwaian ao reiakinan te euangkerio e riai ni karaoaki n te mweenga. Taan kairiiri ao taan reirei n te Ekaretia a kaungaa ao a boutoka kamatebwaian te euangkerio ae boboto n te mwenga ao ae reiakinanaki.

Taan kairiiri ao taan reirei a kaungaia membwa bwa a na ukora oin aia kaotioti bwa a na kanga ni reiakina ao n anga reirei te euangkerio. Aia moan boki bon koroboki aika a tabu ao marooro ni maungatabu ni kabuta. Aikai bwaai n ibuobuoki aika a rangi n bongana Nakomai, Iriirai—Ibukiia Aomata n Tatabemaniia ao Utu ao Ana maekatiin te Aro.

17.3

Tabeia Taan Kairiiri

A katabeaki taan kairiiri ibukin te anga reirei ao n reiakinaki n aia bootaki nako. Tabeua kawai ake a kona ni kakoroi nanon tibwangaia iai bon aikai.

• Katea te banna ni katooto iaon kamatebwaiakan te euangkerio ao te reirei n ana kawai te Tia Kamaiu.

• Taraia bwa te anga reirei n aia bootaki e katea te onimaki ao e eti raoi.

• Ngkana taan kairiiri bon kaain te kauntira n te uoote, marooro ma kaain kauntira ake tabeman bwa e na kanga ni katamaroaki reiakinan ao te anga reirei n te euangkerio n te uoote. E kona te bitiobi ni kaoa te beretitenti n te Reirei n Taabati ni kairii marooro aikai.

• Ngkana e kainnanoaki, e anga aara man te uoote nakon te bitiobiriki bwa a na weteaki bwa taan reirei n aia bootaki, in iran kainibaire ake n 30.1.

• Marooro ma taan reirei aika a boou ao e buokiia ni katauraoiia nakon weteakiia (taraa Reirei n Ana Kawai te Tia Kamaiu,,40).

• E teimatoa n anga te boutoka nakoia taan reirei n aia bootaki. E marooro ma taan reirei n aia waaki ni kakorakora ao ni karikirakea te onimaki irouia aomata ake a reireiniia. Ngkana e kainnanoaki, bubuti te ibuobuoki mairoun te beretitenti n te Reirei n Taabati.

17.4

Aia Boowi Kauntira n Tia Reirei

N aia boowi kauntira n tia reirei, taan reirei a marooro iaon kawai n reirei n aiaron Kristo. A marooro naba iaon aron katamaroan reiakinan ao te anga reirei n te euangkerio. A kabongana Reirei n ana Kawai te Tia Kamaiu bwa te bwai n ibuobuoki.

Aia bowi taan reirei a karaoaki ni katoa kuata n te maan ae 50 te miniti n te Tabati.

• Aia bowi taan reirei n te nakoanibonga, Bootaki n Aine, ao Ataeinnaine a kona ni karaoaki n te moan ao te kateniua n Tabati.

• Bowi ibukiia taan reirei n te Reirei n Taabati e kona ni karaoaki n te kauoua ao te kaaua n Tabati.

Te beretitentii n te Moanrinan e marooro ma te membwa n te bitiobiriki n baireia bwa tera aron katamaroaan te anga reirei n te Moanrinan. Te beretitenti n te Reirei n Tabati e kona n ibuobuoki ngkana e kainnanonaki. Aikai tabeua kawai:

• Taan reirei n te moanrinan a kona ni kaea aia bowi kauntira n tia reirei n raonaki ma taan reirei ni bootaki ake tabeua.

• E kona aia bowi kauntira n Tia Reirei ae kaokoro ni karaoaki ibukiia taan reirei n te moanrinan. Bowi aikai a kona ni karaoaki n tain te Anene n te Moanrinan are te 20 ni Miniti. Irarikin aei, e kona ni karaoaki imwain ke imwin bootaki n te Tabati ke n te bong teuana i nanon te wiki.

• Kaain te beretitentii n te Moanrinan a kona ni kawarii kiraati n te Moanrinan ao ni marooro ma taan reirei imwina iaon te angareirei n ana Kawai te Tia Kamaiu.

Kauntiran te uoote e tararuai ao e katei tain aia bowi ni kauntira taan reirei. N angiin te tai te beretitenti n te Reirei n Tabati e kairi bowi aikai. Ma, e kona te bitiobiriki ni butiia temanna kaaina bwa e na kairia.

Ibukin rongorongona riki, taraa “Teacher Council Meetings” inanon Reirei n Ana Kawai te Tia Kamaiu (iteraniba 38–39).

17.5

Aia boowi kauntira n Tia Reirei ibukiia kaaro

E kona kauntiran te uoote ni bairei bowi n tia reirei ibukiia kaaro ni buokiia ni katamaroa aia anga reirei n te euangkerio ni mwengaia. N aron aia bowi taan reirei ake tabeua, a karaoaki aikai n tain te kiraati ae 50 te miniti n te Tabati.

Inanon boowi aikai, kaaro a na marooro n ikotaki iaon bwa e na kanga ni karinaki moan reirei man ana angareirei Kristo ngkana a reireiia aia ataei. A na kabongana Reirei n ana Kawai te Tia Kamaiu ngkai bwa te bwai n ibuobuoki, n reitaki ma te mwakoro ae atuunaki “Home and Family” (iteraniba 30–31). . A kona ni marooroakina te angareirei ao kamatebwaian koroboki aika tabu n iango inanon Nakomai, Iriirai, n aron te mwakoro ae atuunaki “Katauraoaia Natimi ibukin Maiuakinan ana Kawai ni Berita te Atua.”

Kauntiran te uoote a na noori ao ni bairei tain aia boowi kauntira n tia reirei ibukiia kaaro. A na baireia ngkana a na kaoiia kaaro n onoti n roko ke te kakao nakoia ni kabane kaaro n te uoote.

N angiin te tai te membwa man te beretitentii n te Reirei n Tabati e kairi boowi aikai. Ma, e kona te bitiobiriki ni butiia temanna kaaina bwa e na kairia.

Ibukin rongorongona riki, taraa “Reirei n Ana Kawai te Tia Kamaiu” inanon Reirei n Ana Kawai te Tia Kamaiu (iteraniba 38–39).