18.

20. Faatinoina o Sauniga ma Faamanuiaga o le Perisitua

18.0

Faatomuaga

O sauniga ma faamanuiaga o faatinoga paia e faatinoina e ala i le pule o le perisitua ma i le suafa o Iesu Keriso. A o faatinoina e ē umia le perisitua ia sauniga ma faamanuiaga, latou te mulimuli i le faataitaiga a le Faaola o le faamanuiaina o isi. O sauniga ma faamanuiaga o le perisitua e maua ai le mana o le Atua (tagai i le Mataupu Faavae ma Feagaiga 84:20).

O sauniga ma faamanuiaga e ao ona faatinoina i le faatuatua i le Tama Faalelagi ma Iesu Keriso ma e tusa ai ma le taitaiga a le Agaga Paia. E faamautinoa e taitai o loo latou faatinoina i le faamaoniga e tatau ai (i tulaga talafeagai), faatasi ai ma le pule e moomia o le perisitua, i le ala e tatau ai, ma e i latou ua agavaa e faatinoina (tagai i le 18.3).

Mo aiaiga faavae e uiga i sauniga ma faamanuiaga o le perisitua, tagai i le 38.2.

18.1

Sauniga o le Faaolataga ma le Faaeaga

O le perisitua e aofia ai le pule e faatautaia ai sauniga o le talalelei ia e tatau ai mo le faaolataga ma le faaeaga. E osia e tagata ia feagaiga paia ma le Atua a o latou mauaina nei sauniga. O sauniga o le faaolataga ma le faaeaga o loo lisi atu i lalo:

• Papatisoga

• Faamauga ma le meaalofa o le Agaga Paia

• Faaeeina o le Perisitua Mekisateko ma le faauuga i se tofi (mo alii)

• Faaeega paia o le malumalu

• Faamauga i le malumalu

Mo faamatalaga e uiga i le faatinoina o nei sauniga mo i latou e i ai faaletonu faalemafaufau, tagai i mea nei:

• Mo papatisoga ma faamauga (38.2.8.1)

• Mo faauuga i se tofi i le Perisitua Mekisateko (38.2.9.7)

• Mo faaeega paia o le malumalu ma faamauga (27.2.1.3 ma le 27.3.1.2)

Afai e maliu se tamaitiiti na fanau i totonu o le feagaiga a o lei atoa le 8 tausaga, e leai ni sauniga e manaomiaina pe faatinoina. Afai e le’i fanau le tamaitiiti i totonu o le feagaiga, na pau le sauniga na te manaomia o le faamauina lea i matua. Ona o le Togiola a le Faaola, o fanau uma e maliliu a o lei atoa le ta’i 8 tausaga ua “faaolaina i le malo selesitila o le lagi” (Mataupu Faavae ma Feagaiga 137:10; tagai foi i le Moronae 8:8–12).

18.2

O Isi Sauniga ma Faamanuiaga

O isi sauniga ma faamanuiaga ua mafai ai e fanau a le Atua ona maua Lona mana, faamalologa, faamafanafanaga, ma le taitaiga. O nei sauniga ma faamanuiaga o loo lisi atu i lalo:

• Faaigoaina ma le faamanuiaina o fanau

• O le faamanatuga

• Faaeeina o le Perisitua Mekisateko ma le faauuga i se tofi (mo alii talavou ma alii)

• Vaetofiaina o tagata o le au paia e auauna atu i valaauga

• Faapaiaina o le suauu

• Faauuina o ē mama’i

• Faamanuiaga o faamafanafanaga ma fautuaga, e aofia ai faamanuiaga faatamā

• Faapaiaina o fale

• Faapaiaina o tuugamau

• Faamanuiaga faapeteriaka e peteriaka faauuina

18.3

Auai i le Faatinoga o se Sauniga po o se Faamanuiaga

O i latou e faatinoina pe auai i le faatinoina o se sauniga po o se faamanuiaga e tatau ona i ai le pule e tatau ai o le perisitua ma ia agavaa. E masani lava, o le tulaga faatonuina o le agavaa e o faatasi ma le umia o se pepa faataga o le malumalu. Peitai, e pei ona taialaina ai e le Agaga ma faatonuga o i le mataupu lenei, e mafai e epikopo ma peresitene o siteki ona faataga ia tamā ma tane o ē umia le tofi e tatau ai o le perisitua e faatino pe auai i le faatinoina o ni sauniga ma faamanuiaga tusa lava pe le o agavaa atoatoa mo le malumalu. O sē e umia le perisitua o i ai ni agasala matuia e lei foiaina, e le tatau ona auai i le faatinoina.

E masani lava, e na o taitai perisitua ma isi e umia le perisitua o ni tagata vavalalata o aiga ma uo, e auai i le faatinoina o se sauniga po o se faamanuiaga.

O le tagata o loo mauaina le sauniga, tagata o le aiga, ma taitai perisitua e fefautuaa’i faatasi e filima’oti pe fuafua po o ai ae pe toafia foi o le a auai ai. E tatau ona vave fai le faaiuga lea a o lei taitai ona faatinoina le sauniga.

Pe a na o se toatasi pe toalua ē umia le perisitua e auai i le faatinoina, e tuu faamāmā e i la’ua uma o la lima i luga o le ulu o le tagata. Pe a toatele ē e auai i le faatinoina, latou te tutu i se li’o faataamilo i le tagata e mauaina le sauniga po o le faamanuiaga. E tuu faamāmā e tagata taitoatasi lona lima taumatau i luga o le ulu o le tagata (pe sapasapai le pepe o loo faamanuiaina) ma lona lima tauagavale i luga o le tauau o le uso o loo i lona itu tauagavale. E toatasi e avea ma siufofoga e faatinoina le sauniga pe tuuina atu le faamanuiaga.

O le faatinoina po o le mauaina o ni sauniga ma faamanuiaga e manaomia ai le faamaoniga mai se taitai pulefaamalumalu o lē o loo umiaina ki e tatau ai o le perisitua (tagai i le 3.4.1). Pe a manaomia ai, e mafai ona tuu atu le faamaoniga e se fesoasoani na te faatagaina. Tagai i siata nei. O faasinoga i peresitene o siteki e faatatau foi i peresitene o misiona. O faasinoga i epikopo e faatatau foi i peresitene o paranesi.

O Ai Taitai e Umia Ki e Avatu ai le Faamaoniga e Faatino pe Mauaina ia Sauniga o le Faaolataga ma le Faaeaga?

Sauniga	O Ai e Umia Ki
Sauniga Papatisoga	O Ai e Umia Ki Epikopo (mo tamaiti ua ta’i 8 tausaga le matutua ma mo tagata ua i ai pepa faamaumau ua ta’i 9 tausaga ma matutua atu, sa faatuai o latou papatisoga ona o tulaga le atoatoa o le malosi faaleatamai) Peresitene o le misiona (mo tagata liliu mai)
Sauniga Faamauga ma le meaalofa o le Agaga Paia	O Ai e Umia Ki Epikopo (mo tamaiti ua ta’i 8 tausaga le matutua ma mo tagata ua i ai pepa faamaumau ua ta’i 9 tausaga ma matutua atu, sa faatuai o latou papatisoga ona o tulaga le atoatoa o le malosi faaleatamai) Peresitene o le misiona (mo tagata liliu mai)
Sauniga Faaeeina o le Perisitua Mekisateko ma le faauuga i se tofi (mo alii)	O Ai e Umia Ki Peresitene o le Siteki
Sauniga Faaeega paia o le malumalu	O Ai e Umia Ki Epikopo ma le peresitene o le siteki
Sauniga Faamauga i le malumalu	O Ai e Umia Ki Epikopo ma le peresitene o le siteki

O Ai Taitai e Umia Ki e Avatu ai le Faamaoniga e Faatino pe Mauaina ia Isi Sauniga ma Faamanuiaga?

Sauniga po o le Faamanuiaga	O Ai e Umia Ki
Sauniga po o le Faamanuiaga Faaigoaina ma le faamanuiaina o fanau	O Ai e Umia Ki Epikopo
Sauniga po o le Faamanuiaga O le faamanatuga	O Ai e Umia Ki Epikopo
Sauniga po o le Faamanuiaga Faaeeina o le Perisitua Arona ma le faauuga i se tofi (mo alii talavou ma alii)	O Ai e Umia Ki Epikopo
Sauniga po o le Faamanuiaga Vaetofiaina o tagata o le au paia e auauna atu i valaauga	O Ai e Umia Ki Tagai i le 30.8
Sauniga po o le Faamanuiaga Faapaiaina o le suauu	O Ai e Umia Ki E le manaomia se faamaoniga
Sauniga po o le Faamanuiaga Faauuina o ē mama’i	O Ai e Umia Ki E le manaomia se faamaoniga
Sauniga po o le Faamanuiaga Faamanuiaga o faamafanafanaga ma fautuaga, e aofia ai faamanuiaga faatamā	O Ai e Umia Ki E le manaomia se faamaoniga
Sauniga po o le Faamanuiaga Faapaiaina o fale	O Ai e Umia Ki E le manaomia se faamaoniga
Sauniga po o le Faamanuiaga Faapaiaina o tuugamau	O Ai e Umia Ki O le taitai perisitua o lē e pulefaamalumalu i le sauniga
Sauniga po o le Faamanuiaga Faamanuiaga faapeteriaka	O Ai e Umia Ki Epikopo

18.4

Sauniga mo Fanau e Le’i Aulia Tausaga e Ta’u Tagata Matua Ai

O taiala mo le mauaina o le faamaoniga mai matua po o tagata e vaaia se tamaitiiti laitiiti e maua ai sauniga ma faamanuiaga ua taua i lalo, o loo tuuina atu i vaega o loo lisi atu i lalo:

• Mo le faaigoaina ma le faamanuiaina: 38.2.7.2 ma le 38.2.7.3

• Mo le papatisoga ma le faamauga: 38.2.8.2

• Mo le faauuga i se tofi o le perisitua: 38.2.9.2

Mo fesili e uiga i aia tatau faaletulafono a matua po o tagata o loo vaaia, e sailia e le epikopo po o le peresitene o le siteki se fautuaga faaletulafono mai le Ofisa Sili Faufautua a le Ekalesia pe mai i le ofisa o le eria (tagai i le 38.8.23).

18.5

Sauniga e Faatino mo, ma Tagata E I Ai ni Manaoga Faapitoa

Tagai i le 38.2.4 ma le 38.2.5.

18.6

Faaigoaina ma le Faamanuiaina o Fanau

“E tatau i tagata taitoatasi o le ekalesia a Keriso ua i ai fanau, ona aumai i latou i toeaina i luma o le ekalesia, o e e tatau ona faaee o latou lima i luga o i latou i le suafa o Iesu Keriso, ma faamanuia i latou i lona suafa” (Mataupu Faavae ma Feagaiga 20:70).

E masani lava ona faaigoa ma faamanuia fanau i le taimi o le sauniga anapogi ma molimau i le uarota e nonofo ai o latou matua. E tonu lenei mea e tusa lava pe ua faaipoipo matua o le tamaitiiti. Afai e le nonofo faatasi ia matua, e masani ona faatinoina le sauniga i le uarota o le a muai ola a’e ai le tamaitiiti.

O tuusaunoaga i le taimi ma le nofoaga masani o le faamanuiaga o le tamaitiiti e tatau ona faamaonia e le epikopo. O tuusaunoaga e ono i ai, e aofia ai faamanuiaga e le faia i Aso Sa anapogi, aemaise i uarota e toatele pepe fou, faamanuiaga i se isi uarota e nonofo ai matua matutua o le tamaitiiti po o le toatele o le aiga. E mafai foi e le epikopo ona faatagaina i latou e umia le Perisitua Mekisateko e faamanuia le tamaitiiti i le fale. O se tasi o le au epikopo e pulefaamalumalu.

Mo faamatalaga e uiga i le faaigoaina ma le faamanuiaina o fanau i tulaga faapitoa, tagai i le 38.2.7.

18.6.1

O Ai e Tuuina Atu le Faamanuiaga

O le sauniga o le faaigoaina ma le faamanuiaina o se tamaitiiti e faatinoina e i latou e umia le Perisitua Mekisateko, e ogatusa ma le Mataupu Faavae ma Feagaiga 20:70. E logoina e taitai perisitua ia tagata o le au paia i lenei mea a o le’i faaigoaina ma faamanuiaina a latou fanau. E tatau i taitai ona faia ia taumafaiga uma ina ia aloese ai mai le faamaina po o le faatiga i tagata taitoatasi po o aiga.

O se tagata po o se aiga e mananao ia maua e se tamaitiiti se igoa ma se faamanuiaga, latou te faamaopoopoa faatasi ma le epikopo le sauniga. O loo ia umiaina ki mo le faaigoaina ma le faamanuiaina o fanau i le uarota.

E mafai e se epikopo ona faatagaina se tamā o loo umia le Perisitua Mekisateko e faaigoa ma faamanuia lona atalii/afafine e tusa lava pe le o agavaa atoatoa le tamā mo le malumalu (tagai i le 18.3). E uunaia e epikopo ia tamā e saunia i latou lava e faamanuia a latou lava fanau.

Ina ia avea ma sē e faaleoina le faamanuiaga o se tamaitiiti, o se tagata e i fafo atu o lana lava uarota e tatau ona faaali atu se pepa faataga o le malumalu i le taitai pulefaamalumalu. E mafai foi ona ia faaali atu se Pepa Faataga e Faatino ai se Sauniga ua sainia e se tasi o lana au epikopo.

18.6.2

Faatonuga

I lalo o le taitaiga a le au epikopo, o ē umia le Perisitua Mekisateko e potopoto i se li’o e faaigoa ma faamanuia se tamaitiiti. Latou te tuu o latou lima i lalo o se pepe, pe latou te tuu faamāmā foi o latou lima i luga o le ulu o se tamaitiiti. O lē o le a faaleoina:

1. E faalagi le Tama Faalelagi e pei ona faia i se tatalo.

2. E ta’u atu faapea o loo faatinoina le faamanuiaga e ala i le pule o le Perisitua Mekisateko.

3. Tuu atu i le tamaitiiti se igoa.

4. Ta’u le igoa o le tamaitiiti.

5. Tuu atu se faamanuiaga i le tamaitiiti e pei ona taitai ai e le Agaga.

6. Faaiu i le suafa o Iesu Keriso.

18.6.3

Fomu o le Pepa Faamaumau o le Tamaitiiti ma le Tusi Faamaonia o le Faamanuiaga

A o le’i faamanuiaina se tamaitiiti, e faaaoga e se failautusi le Punaoa mo Taitai ma Failautusi (PTF) e saunia ai se Fomu o le Pepa Faamaumau o le Tamaitiiti. A maea le faamanuiaga, na te fatuina le pepa faamaumau i le polokalama lena ma saunia ai se Tusi Faamaonia o le Faamanuiaga. O lea tusi faamaonia e sainia e le epikopo ma tuuina atu i matua po o ē o vaaia.

O le igoa o i luga o le pepa faamaumau ma le tusi faamaonia e tatau ona tutusa lelei ma le pepa fanau, lesitala faalemalo o le fanau mai, po o le igoa faaletulafono o i ai nei.

18.7

Papatisoga

O le papatisoga e ala i le faatofuina i le vai e se tasi o i ai le pule, e tatau mo se tagata ina ia avea ai ma tagata o le Ekalesia ma maua le Agaga Paia. O i latou uma o ē sailia le faaeaga e tatau ona mulimuli i le faataitaiga a le Faaola e ala i le mauaina o nei sauniga. (Tagai i le Mataio 3:13–17; Ioane 3:3–7; Galuega 2:37–38; 2 Nifae 31:5–21.)

Mo faamatalaga e uiga i le papatisoga i tulaga faapitoa, tagai i le 38.2.8.

18.7.1

Faamaoniga mo se Tagata Ina Ia Papatisoina ma Faamauina

18.7.1.1

O Tamaiti O Ē Auai i le Ekalesia ma i Ai Pepa Faamaumau

O le epikopo e umia ki o le perisitua mo le papatisoina o [tamaiti] ua ta’i 8-tausaga ua i ai pepa faamaumau i se uarota. O tamaiti nei e tatau ona papatiso ma faamauina i o latou aso fanau lona 8, po o se taimi vave e talafeagai ai (tagai i le Mataupu Faavae ma Feagaiga 68:27). O fanau nei o ē ua uma ona i ai pepa faamaumau i le Ekalesia (tagai i le 33.6.2). Pe a latou aulia le ta’i 8 tausaga, ia mautinoa e le epikopo ua latou maua avanoa uma e taliaina ai le talalelei ma ia papatisoina ma faamauina.

Mo faamatalaga e uiga i le papatisoina ma le faamauina o se tagata e i ai se faaletonu faalemafaufau, tagai i le 38.2.4 ma le 38.2.8.1.

E faatalanoa e le epikopo po o se fesoasoani ua tofia ia tamaiti ua i ai faamaumauga mo le papatisoga ma le faamauga. O loo maua faatonuga i le 31.2.3.1.

Mo faamatalaga e uiga i le faatumuina o Faamaumauga o le Papatisoga ma le Faamauga, tagai i le 18.8.3.

E tuu atu le gauaiga faapitoa a epikopo i fanau ua ta’i 7 tausaga le matutua i totonu o le uarota, ia mautinoa o loo fesoasoani o latou matua, taitai ma faiaoga o le Peraimeri, ma i latou o faia auaunaga i o latou aiga, e saunia i latou mo le papatisoga ma le faamauga. E faamalosiauina foi e taitai o le korama a toeaina ma le Aualofa ia matua ina ia saunia a latou fanau mo nei sauniga.

18.7.1.2

Tagata Liliu Mai

O le peresitene o le misiona e umia ki mo le papatisoina o tagata liliu mai i se misiona. Mo lea mafuaaga, ua faatalanoa ai e faifeautalai faamisiona tagata liliu mai mo papatisoga ma faamauga. O loo maua faatonuga i le 31.2.3.2.

Mo faamatalaga e uiga i le faatumuina o Faamaumauga o le Papatisoga ma le Faamauga, tagai i le 18.8.3.

18.7.1.3

O Fanau E Le’i Faaipoipo o Latou Matua (E Aofia ai le Tete’a)

Mo taiala e uiga i le papatisoina ma le faamauina o fanau e lei aulia tausaga e ta’u tagata matua ai, tagai i le 38.2.8.2

18.7.2

Sauniga o le Papatisoga

O se sauniga o le papatisoga e tatau ona faigofie, puupuu, ma siitia faaleagaga. E mafai ona aofia ai mea nei:

1. Musika e mua’i tataina

2. O se faafeiloaiga puupuu mai le uso o loo taitaia le sauniga

3. Se viiga amata ma le tatalo amata

4. Tasi pe lua ni savali pupuu e uiga i mataupu o le talalelei, e pei o le papatisoga ma le meaalofa o le Agaga Paia

5. Se musika filifilia

6. O le papatisoga

7. O se taimi o le migao a o sui i latou sa auai i le faatinoga o le papatisoga i o latou la’ei mamago (e mafai ona tatā pe lagiina ni viiga po o pese a le Peraimeri i le taimi lea)

8. O le faamauga o tagata ua ta’i 8 tausaga ua i ai pepa faamaumau; o le faamauga o tagata liliu mai (tagai i le 18.8)

9. Tuuina atu o molimau e tagata fou ua liliu mai, pe a mananao ai

10. Se viiga faaiu ma le tatalo faaiu

11. Musika e mulia’i tataina

A sauni se tamaitiiti ua i ai faamaumauga ina ia papatisoina, e fefautuaai se tasi o le au epikopo ma le au peresitene o le Peraimeri ma le aiga e fuafua ma faatulaga se sauniga o le papatisoga. O se tasi o le au epikopo e taitaia le sauniga. Afai e sili atu ma le tasi le tamaitiiti o le a papatisoina i le masina lava lea e tasi, e mafai ona latou auai faatasi i se sauniga o le papatisoga.

I siteki e toatele tamaiti ua i ai pepa faamaumau, e mafai e tamaiti mai uarota e tele ona auai i lea sauniga o le papatisoga e tasi. I tulaga faapea, o se tasi o le au peresitene o le siteki po o le au peresitene o le Peraimeri a le siteki po o se fautua maualuga e fefautuaai ma aiga o tamaiti ua papatisoina e fuafua ma faatulaga ia sauniga o papatisoga. O se tasi o le au peresitene o le siteki po o se fautua maualuga ua tofia e taitaia le sauniga. E mafai ona potopoto eseese uarota po o aiga mo se vaega o le sauniga ina ia faailoa ai tamaiti taitoatasi. E mafai ona avea lenei mea, mo se faataitaiga, mo le sauniga o le papatisoga, le faamauga, po o se lauga a se tagata o le uarota po o le aiga. O se tasi o le au epikopo e taitaia lena vaega o le sauniga.

O sauniga o papatisoga o tagata liliu mai e tatau ona faatulagaina i se taimi vave lava latou te ausia ai tulaga e agavaa ai o loo i le 31.2.3.2. E le tatau ona tolopoina le papatisoga o se tagata o le aiga se’i mafai e le tamā ona maua le perisitua ma faatino ai e ia lava le papatisoga.

I lalo o le taitaiga a le au epikopo, o le taitai misiona o le uarota, (pe afai ua valaauina se tasi) po o se sui o le au peresitene o le korama a toeaina e taitaia le galuega faamisiona i le uarota, na te fuafuaina ma taitaia ia sauniga papatisoga mo tagata liliu mai. Na te fuafuaina foi le faamauga o tagata liliu mai sei vagana ai o le a faamauina i latou i le lotu faamanatuga. Na te faamaopoopoa faatasi ma faifeautalai faamisiona.

18.7.3

O Ai e Faatinoina le Sauniga

O le sauniga o le papatisoga e faatino e se ositaulaga po o sē e umia le Perisitua Mekisateko. O le tagata na te faatinoina se papatisoga e tatau ona faamaonia mai e le epikopo (po o le peresitene o le misiona pe afai o loo faatinoina e se faifeautalai faamisiona le papatisoga).

E mafai e se epikopo ona faatagaina se tamā o avea ma ositaulaga pe o loo umia le Perisitua Mekisateko e papatisoina lona atalii/afafine tusa lava pe le o agavaa atoatoa le tamā mo le malumalu (tagai i le 18.3). E uunaia e epikopo ia tamā e saunia i latou lava e papatiso a latou lava fanau.

Ina ia faatinoina se papatisoga, o se tagata e i fafo atu o lana lava uarota e tatau ona faaali atu se pepa faataga o le malumalu o loo aogā i le taimi nei, i le taitai pulefaamalumalu. E mafai foi ona ia faaali atu se Pepa Faataga e Faatino ai se Sauniga ua sainia e se tasi o lana au epikopo.

18.7.4

Nofoaga e Faatinoina ai le Sauniga

E tatau ona faatinoina papatisoga i se vai papatiso pe afai o i ai. Afai e leai se vai papatiso, e mafai ona faaaoga se auvai saogalemu. E tatau ona lava le telē mo le tagata e faatinoina le sauniga ma le tagata o loo papatiso e tutu ai i totonu. E le faapaiaina le vai mo papatisoga.

Afai o faaaoga se vai papatiso, e faatulaga le taimi e ala atu i se tasi o le au paia ua tofia i le uarota a le epikopo o loo vaaia le falesa.

Mo le saogalemu, e tatau ona i ai se tagata matua faatuatuaina a o faatumuina le vai papatiso ma nofo ai pea se’ia uma ona toe faamatūtū, faamama, ma ua saogalemu. E tatau ona faamatūtū le vai papatiso i le taimi lava e maea ai sauniga papatisoga taitasi. E tatau ona loka faitotoa o le vai papatiso pe a le o faaaogaina.

18.7.5

Lavalava

O se tagata e faatinoina se papatisoga ma se tagata o loo papatisoina, e oofu i ofu papa’e e le valavala pe a susū. O se tagata ua maua ona faaeega paia, e fai ona ofusa o le malumalu i lalo o ona laei a o faatinoina se papatisoga. O iunite i lotoifale e faatauina mai laei mo papatisoga i tupe o le paketi, ma e le totogia le faaaogaina.

E mafai ona oka ia laei mo papatisoga i le store.ChurchofJesusChrist.org.

18.7.6

Molimau

E toalua molimau, e faamaonia e le taitai pulefaamalumalu, e mata’ituina papatisoga taitasi ma faamautinoa o loo faatinoina lelei. O tagata o le Ekalesia ua papatisoina, e aofia ai tamaiti ma le autalavou, e mafai ona avea ma molimau.

E tatau ona toe faia se papatisoga pe afai e le o sa’o lelei le ta’uga o upu e pei ona tuuina mai i le Mataupu Faavae ma Feagaiga 20:73. E tatau foi ona toe faia pe afai e le’i lilofia atoa i le vai se vaega o le tino, lauulu, po o laei o le tagata.

18.7.7

Faatonuga

Ina ia faatinoina le sauniga o le papatisoga, o se ositaulaga po o sē e umia le Perisitua Mekisateko:

1. E tu i totonu o le vai faatasi ma le tagata o loo papatiso.

2. E u’uina le tapulima taumatau o le tagata i lona lima tauagavale (mo le faafaigofieina ma le saogalemu). O le tagata o loo papatisoina na te u’uina le tapulima tauagavale o lē e umia le perisitua, i lona lima tauagavale.

3. E si’i lona lima taumatau i le sikuea.

4. Ta’u le igoa atoa o le tagata ma faapea atu, “Ona ua tofia a’u e Iesu Keriso, ou te papatiso ia te oe i le suafa o le Tamā, ma le Alo, ma le Agaga Paia. Amene” (Mataupu Faavae ma Feagaiga 20:37).

5. Fai i le tagata e u’u lona isu i lona lima taumatau (mo le faafaigofieina), ona tuu lea o lona lima taumatau ia faamaualuga i le papatua o le tagata ma faatofu atoa le tagata, ia aofia ai ma lavalava. E faigofie atu ona faatofu pe afai e faalolo’u e le tagata ona tulivae.

6. Fesoasoani i le tagata e alu a’e i luga mai le vai.

18.7.8

Faamaumauga o le Papatisoga

Mo faamatalaga e uiga i le faiga o faamaumauga o papatisoga, tagai i le 18.8.3.

18.8

Faamauga ma le Meaalofa o le Agaga Paia

A uma ona papatisoina se tagata, e faamauina o ia o se tagata o le Ekalesia ma maua le Agaga Paia e ala i le faaee atu o lima (tagai i le Mataupu Faavae ma Feagaiga 20:41; Galuega 19:1–6). E avea le tagata o se tasi o le Ekalesia pe a mae’a uma nei sauniga e lua ma ua faamaumauina faalelei (tagai i le Ioane 3:5; Mataupu Faavae ma Feagaiga 33:11; 3 Nifae 27:20).

Mo faamatalaga e uiga i le faamauga i tulaga faapitoa, tagai i le 38.2.8.

O le epikopo e umiaina ki o le perisitua mo le faamauina o tagata ua ta’i 8 tausaga ua i ai pepa faamaumau i lana uarota. O le peresitene o le misiona e umiaina ki mo le faamauina o tagata liliu mai (mo se faauigaga o se papatisoga o se tagata liliu mai, tagai i le 31.2.3.2).

O le epikopo e vaaia faamauga o fanau ua ta’i 8 tausaga le matutua ua i ai faamaumauga. O tamaiti ta’i-valu-tausaga e masani lava ona faamau i le aso e papatisoina ai.

E galulue faatasi faifeautalai faamisiona ma taitai o le uarota e fuafua le faamauga o tagata liliu mai e pei ona ta’ua i le 18.7.2. E mafai ona faamauina tagata liliu mai i le sauniga o le papatisoga po o le lotu faamanatuga i le uarota o loo latou nonofo ai i se taimi vave e mafai ai pe a uma o latou papatisoga.

O tagata fou o le ekalesia e aloaia ma taliaina o se tagata fou o le uarota i le sauniga faamanatuga pe a maea lo latou faamauga (tagai i le 29.2.1.1).

18.8.1

O Ai e Faatinoina le Sauniga

O le sauniga o le faamauga e faatino e i latou e umia le Perisitua Mekisateko. O le tagata e fai ma fofoga e tatau ona faamaonia mai e le epikopo (po o le peresitene o le misiona pe afai o loo faatinoina e se faifeautalai faamisiona le faamauga).

E na’o sē e umia le Perisitua Mekisateko o loo agavaa mo le malumalu e mafai ona avea ma fofoga mo se faamauga. Peitai, e mafai e se epikopo ona faatagaina se tamā o loo umia le Perisitua Mekisateko e tu i le li’o mo le faamauga o lona atalii/afafine tusa lava pe le o agavaa atoatoa le tamā mo le malumalu (tagai i le 18.3).

A itiiti ia tasi se sui o le au epikopo e auai ai i le faatinoga o lenei sauniga. Pe afai na a’oa’oina e faifeautalai faamisiona se tagata liliu mai, e valaaulia e le epikopo i la’ua e auai atu i ai.

Ina ia avea ma se fofoga i lenei sauniga, o se tagata e i fafo atu o lana lava uarota e tatau ona faaali atu se pepa faataga o le malumalu o loo aoga i le taitai pulefaamalumalu. E mafai foi ona ia faaali atu se Pepa Faataga e Faatino ai se Sauniga ua sainia e se tasi o lana au epikopo.

18.8.2

Faatonuga

I lalo o le taitaiga a le au epikopo, e toatasi pe sili atu i latou e umia le Perisitua Mekisateko e mafai ona auai i se faamauga. Latou te tuu faamāmā o latou lima i luga o le ulu o le tagata. O le tagata e fai ma fofoga:

1. E ta’u le tagata i lona igoa atoa.

2. E ta’u atu o loo faatinoina le sauniga i le pule o le Perisitua Mekisateko.

3. E faamauina le tagata o se tagata O Le Ekalesia a Iesu Keriso o le Au Paia o Aso e Gata Ai.

4. E ta’u atu “talia le Agaga Paia” (e lē o le “talia le meaalofa o le Agaga Paia”).

5. E tuu atu upu o faamanuiaga e pei ona taiala ai e le Agaga.

6. Faaiu i le suafa o Iesu Keriso.

18.8.3

Faamaumauga ma le Tusi Faamaonia o le Papatisoga ma le Faamauga

A o le’i faatalanoaina se tamaitiiti o lē ua i ai se pepa faamaumau mo le papatisoga, e faaaoga e se failautusi le PTF e saunia ai se Fomu o le Papatisoga ma le Faamauga. O le epikopo po o se fesoasoani ua tofia, e faatautaia le faatalanoaga ma saini le fomu. A mae’a le papatisoga ma le faamauga, e faaaoga e se failautusi le fomu lenei e faafou ai faamatalaga o le pepa faamaumau o le tamaitiiti i le PTF.

Pe a faatalanoa e se faifeautalai faamisiona se tagata liliu mai mo le papatisoga, na te faatumuina le Faamaumauga o le Papatisoga ma le Faamauga e faaaoga ai le polokalama (app) o le Tala’i La’u Talalelei. A maea le papatisoga ma le faamauga, e faamaumau e faifeautalai ia faamatalaga i le app ma auina atu faaeletonika i le failautusi a le uarota. E iloilo e le failautusi a le uarota ia faamatalaga i le PTF ma fatuina le pepa faamaumau.

A uma ona fatuina se pepa faamaumau, e saunia e se failautusi se Tusi Faamaonia o le Papatisoga ma le Faamauga. O lea tusi faamaonia e sainia e le epikopo ma tuuina atu i le tagata.

O le igoa o i luga o le pepa faamaumau ma le tusi faamaonia e tatau ona tutusa lelei ma le pepa fanau, lesitala faalemalo o le fanau mai, po o le igoa faaletulafono o i ai nei.

18.9

O Le Faamanatuga

O tagata o le Ekalesia e potopoto i le aso Sapati e tapuai i le Atua ma taumamafa i le faamanatuga (tagai i le Mataupu Faavae ma Feagaiga 20:75; 59:9; Moronae 6:5–6). I le taimi o lenei sauniga, latou te taumamafa ai i le areto ma le vai e manatua ai le ositaulagaina e le Faaola o Lona tino ma le toto ma toefaafou ai a latou feagaiga paia (tagai i le Mataio 26:26–28; Faaliliuga Iosefa Samita, Mareko 14:20–25; Luka 22:15–20; 3 Nifae 18; Moronae 6:6). E tatau i tagata uma ona migao i le taimi o le faamanuiaga ma le tufatufaga o le faamanatuga.

18.9.1

Faamaoniga e Faatautaia ai le Faamanatuga

O le epikopo e umia ki o le perisitua mo le faatautaiga o le faamanatuga i le uarota. O i latou uma o ē auai i le tapenaina, faamanuiaina, ma le tufatufaina o le faamanatuga, e tatau ona maua le faamaoniga mai ia te ia po o se tasi i lalo o lana taitaiga.

Afai e le mafai e tagata o lana uarota ona taumamafa i le faamanatuga ona ua tausiesea i le fale, i nofoaga autu e tausi ai, po o le maota gasegase, e mafai e le epikopo ona faatagaina ē umia le perisitua e avatu le faamanatuga ia i latou. E mafai ona ia faatagaina lenei mea e tusa lava pe o latou i ai i fafo atu o tuaoi o le uarota mo se taimi e le tumau. Peitai, e le mafai ona ia faatagaina le faamanatuga e avatu i tagata o le au paia e i fafo atu o tuaoi o lana uarota i nisi tulaga.

I tulaga e le masani ai, e ono le faia le sauniga faamanatuga mo se taimi faaumiumi. I tulaga faapenei, e mafai e le epikopo ona faataga i latou e umia le perisitua o loo agavaa i lana uarota e saunia ma faatautaia le faamanatuga i totonu o o latou fale i Sapati taitasi. E mafai foi e epikopo ona faatagaina i latou e saunia ma faatautaia le faamanatuga i tagata o le uarota o ē e leai nisi e umia le perisitua i o latou fale.

Pe a faatagaina e le epikopo le faamanatuga ia saunia ma faatautaia i fafo atu o sauniga faatonuina a le Ekalesia, o faatonuga o i le 18.9.2 pe o ai e faatinoina le sauniga o loo faaaogaina pea.

18.9.2

O Ai e Faatinoina le Sauniga

• O a’oa’o, ositaulaga, ma i latou e umia le Perisitua Mekisateko e mafai ona tapenaina le faamanatuga.

• O ositaulaga ma i latou e umia le Perisitua Mekisateko e mafai ona faamanuiaina le faamanatuga.

• O tiakono, a’oa’o, ositaulaga, ma i latou e umia le Perisitua Mekisateko e mafai ona tufaina le faamanatuga.

Pe a lava i latou e umia le Perisitua Arona, e masani lava o i latou e faatinoina nei tiute. Pe a lē lava tiakono e tufaina le faamanatuga, e fefautuaa’i le peresitene o le korama a tiakono ma le epikopo e uiga i ē e valaaulia e fesoasoani atu. E masani lava, na te talosaga atu i a’oa’o ma ositaulaga e fesoasoani atu a o le’i talosagaina le au toeaina ma faitaulaga sili.

18.9.3

Taiala mo le Faamanatuga

Ona o le natura paia o le faamanatuga, e tatau i taitai perisitua ona saunia ma le faaeteete ina ia faatulagaina lelei ma le migao. O ie laulau o le faamanatuga e tatau ona papa’e, mamā, ma mafolafola. O fata o le faamanatuga e tatau ona mamā. O fata ma ipu o le faamanatuga e tatau ona vave ona oka.

O sapalai o le faamanatuga e mafai ona okaina i le store.ChurchofJesusChrist.org.

O i latou o ē faatautaia le faamanatuga e tatau ona faia i se uiga mamalu, ma le iloa o loo fai i latou ma sui o le Alii. E uunaia i latou e le au epikopo ina ia mafaufau loloto i le Togiola a le Faaola a o latou tapenaina, faamanuia, ma tufa le faamanatuga.

O i latou o ē faatautaia le faamanatuga e tatau ona teuteu ma laei lelei ma ia mamā. E le tatau ona fai ni o latou lavalava po o ni teuga fe’ilafi e ono tata’iese ai [le agaga] mai le tapuaiga ma le osigā feagaiga, o le faamoemoega lea o le faamanatuga. Afai e manaomia e le epikopo ona fautua atu i sē o umia le perisitua e uiga i mataupu faapena, na te faia ma le alofa. Na te faitaulia foi le tulaga matua o le tagata i le Ekalesia.

O le tufaina o le faamanatuga e tatau ona faia i le uiga moni lava e masani ai, ae aua le soona faamamalu. Mo se faataitaiga, o taga patino (e pei o le tuu o le lima tauagavale i tua) po o foliga vaaia (e pei o le faatutusa o le faiga o lavalava) e le tatau ona talosagaina.

E lagiina e le potopotoga se viiga o le faamanatuga a o tofitofi le areto. E le tatau ona suia le viiga lea i ni pese taitoatasi po o ni musika e na o mea faaili e leai ni leo usu. E le tatau ona taina se musika i le taimi e tufa ai le faamanatuga po o le taimi tonu foi e mae’a ai.

Afai e i ai ni tagata o le au paia e afaina i ni meaai, pe le mafai ona onosaia le vavale [o saito fai falaoa], latou te talanoaina ma se tasi o le au epikopo po o a fetuunaiga e faia mo le faamanatuga. Pe a manaomia, e mafai e le au epikopo ona fetuunai le faiga mo le faatautaiga o le faamanatuga ia i latou.

E masani lava, e tatau ona tofitofi le falaoa o se vaega o le sauniga faamanatuaga. Ae peitai, ina ia mautinoa le maloloina ma le saogalemu o se tagata patino o le au paia, e mafai e lena tagata ona aumai se falaoa e le maua ai se vavale po o se isi mea e sui a’i e vaevaeina e pei o le falaoa ma aumai i totonu o se taga pepa palasitika po o se ipu ua faamauina. Latou te tuuina atu lea falaoa i se tasi e umia le perisitua e tuu i luga o se isi fata e ese ai. E fesoasoani le au epikopo ia i latou o ē e tufaina le faamanatuga ia iloa pe o ai tagata o le au paia e tatau ona tufa atu i ai le falaoa e lē i ai se vavale.

Tagai i le disability.ChurchofJesusChrist.org mo taiala e uiga i meaai e afaina ai.

E ui o le faamanatuga e mo tagata o le Ekalesia, ae e leai se mea e tatau ona fai e taofia ai isi mai le taumamafa ai.

18.9.4

Faatonuga

1. O i latou e tapenaina, faamanuiaina, pe tufaina le faamanatuga e muai fufulu o latou lima i le fasimoli po o isi vailaau faamamā.

2. O a’oa’o, ositaulaga, po o i latou e umia le Perisitua Mekisateko e faamautinoaina ua i ai fata o le falaoa faatasi ai ma falaoa e le’i tofitofia, fata o le vai faatasi ma ipu vai mamā, ma ie laulau mamā ua saunia lelei a o le’i amataina le sauniga.

3. A o lagiina e tagata o le uarota se viiga o le faamanatuga, o i latou o le a faamanuiaina le faamanatuga e tutulai ma le migao, aveese le ie o loo ufiufi ai fata o le falaoa, ma tofitofi le falaoa i le tetelē o fasimea e ūina.

4. A uma le viiga, ona tootuli lea o le tagata e faamanuiaina le areto ma fai le tatalo o le faamanatuga mo le areto (tagai i le Mataupu Faavae ma Feagaiga 20:77).

5. E faamautinoa e le epikopo o ta’u manino, ma ia sa’o atoatoa, ma mamalu ia tatalo o le faamanatuga. Afai e sese se upu e ta’u e le tagata ma faasa’o e ia lava, e le toe manaomia se isi faasa’oga. Afai e le faasa’oina e le tagata sana mea sese, e talosagaina ma le agalelei o ia e le epikopo e toe fai le tatalo. E faaaoga e le epikopo lana faautautaga poto pe a talosagaina le toe faia o le tatalo. Na te faamautinoaina o le toe faia, e le matua’ia ai se maasiasi e le tusa ai pe aveesea ai le taua mai le sauniga. E mafai ona fesoasoani se isi tagata o i le laulau faamanatuga pe a manaomia.

6. A mae’a le tatalo, e tufaina atu ma le migao e i latou e umia le perisitua le areto i tagata o le au paia. E muamua talia e le taitai pulefaamalumalu, a mae’a e leai se faatulagaga tāmau o le faasologa. A tuu atu loa se fata i tagata o le au paia, e mafai ona latou pasi atua mai le tasi i le isi.

7. E faaaoga e tagata o latou lima taumatau e tagofia ai pe a mafai.

8. A ua uma ona tufa atu le areto i tagata uma, e toe faafoi e i latou o loo tufaina le faamanatuga ia fata i le laulau faamanatuga. O i latou e faamanuiaina le faamanatuga e tuuina se ie i luga o fata falaoa ma aveese le ufiufi o fata vai.

9. O le tagata e faamanuiaina le vai e tootuli ma fai le tatalo faamanatuga mo le vai (tagai i le Mataupu Faavae ma Feagaiga 20:79). Na te faaaogaina le upu vai nai lo le uaina.

10. A mae’a le tatalo, e tufaina atu ma le migao e i latou e umia le perisitua le vai i tagata o le au paia. E muamua talia e le taitai pulefaamalumalu, a mae’a e leai se faatulagaga tāmau o le faasologa.

11. A ua uma ona tufa atu le vai i tagata uma, e toe faafoi e i latou o loo tufaina le faamanatuga ia fata i le laulau faamanatuga. O i latou e faamanuiaina le faamanatuga e tuuina se ie i luga o fata, ma nonofo i lalo ma le migao i latou o e na faamanuiaina ma tufatufa le faamanatuga.

12. A mae’a le sauniga, o i latou na saunia le faamanatuga e faamamāina, gaugau ie laulau, ma aveese ni falaoa sa le’i faaaogaina.

18.10

Faaeeina Atu o le Perisitua ma le Faauuina i se Tofi

E lua vaega o le perisitua: o le Arona ma le Mekisateko (tagai i le 3.3; Mataupu Faavae ma Feagaiga 107:1, 6). Pe a faaee atu le perisitua i luga o se tagata, e faauuina foi o ia i se tofi o lena perisitua. A mae’a ona faaee atu se tasi o nei perisitua, e na ona faauuina lava o se alii i isi tofi e manaomia i lena perisitua.

Mo faamatalaga e uiga i faauuga i le perisitua i tulaga faapitoa, tagai i le 38.2.9.

18.10.1

Perisitua Mekisateko

O le peresitene o le siteki e umia ki o le perisitua mo le faaeeina atu o le Perisitua Mekisateko ma le faauuina i tofi o le toeaina ma le faitaulaga sili. Ae peitai, e masani ona tuuina atu e le epikopo ia fautuaga mo nei faauuga.

18.10.1.1

Toeaina

E mafai e uso agavaa ona mauaina le Perisitua Mekisateko ma faauuina o ni toeaina pe a 18 o latou tausaga pe matutua atu foi. E faavae i tulaga faaletagata lava ia, e filima’oti e le epikopo pe tatau ona fautuaina atu se alii talavou ina ia faauuina o se toeaina i se taimi vave pe a mavae lona aso fanau 18 pe toe nofo umi foi i le korama a ositaulaga. O nei tulaga e aofia ai se alii talavou i lana:

• Molimau ma le matua.

• Faauuga o le aoga.

• Manao e faaauau pea ma lana tupulaga.

• Auai i le kolisi.

I le faia o lenei faaiuga, e feutagai muamua le epikopo ma le alii talavou ma ona matua po o e o vaaia. O alii agavaa e tatau ona faauuina o ni toeaina pe a 19 tausaga po o le ae latou te lei tuua le aiga e auai i le kolisi, auauna atu i se misiona talai, auauna atu i le militeli, po o le taliaina o se galuega tumau.

O alii faatoa papatisoina ua ta‘i 18 tausaga ma matutua atu e faauuina o ni toeaina pe a uma ona:

• Maua le Perisitua Arona ma auauna atu o ni ositaulaga.

• Lava le malamalama ua atiina ae o le talalelei.

• Faaalia lo latou agavaa.

E le moomia se taimi patino e avea ai ma se tagata o le Ekalesia.

18.10.1.2

Faitaulaga Sili

E faauuina alii o ni faitaulaga sili pe a valaauina i latou i se au peresitene o le siteki, fautua maualuga, po o le au epikopo. E mafai foi ona faauuina i latou i isi taimi pe a filima’oti ai e le peresitene o le siteki e ala i le iloiloina ma le agaga tatalo ma musumusuga.

18.10.1.3

Faatalanoaina ma le Lagolagoina

Faatasi ai ma le faamaoniga a le au peresitene o le siteki, e faatalanoa e le epikopo le uso e pei ona faatonuina ai i luga o le Faamaumauga o le Faauuga i le Perisitua Mekisateko. Ona faatalanoaina foi lea o ia e se tasi o le au peresitene o le siteki. Faatasi ai ma le faamaoniga mai le peresitene o le misiona, e mafai e le peresitene o le itu ona faatalanoaina se uso ina ia faauuina o se toeaina (tagai i le 6.3). Mo faatonuga e uiga i nei faatalanoaga, tagai i le 31.2.6.

A maea le faatalanoaga, ona talosaga atu lea o le au peresitene o le siteki i fautua maualuga ina ia lagolagoina le faaiuga e faauuina le uso. E tuuina atu e se tasi o le au peresitene o le siteki o ia mo le lagolagoina i le sauniga aoao o le konafesi a le siteki (tagai i le 18.10.3). Faatasi ai ma le faamaoniga mai le peresitene o le misiona, e mafai e se peresitene o le itu ona tuuina atu se uso mo le lagolagoina ina ia faauuina o se toeaina (tagai i le 6.3).

18.10.2

Perisitua Arona

O le epikopo e umia ki mo le faaeeina atu o le Perisitua Arona ma faauuga i tofi o le tiakono, a’oa’o, ma le ositaulaga. O uso agavaa e masani ona faauuina i nei tofi i tausaga nei, ae le faia a’o lei aulia:

• Tiakono i le amataga o le tausaga e atoa i ai lo latou ta’i 12

• A’oa’o i le amataga o le tausaga e atoa i ai lo latou ta’i 14

• Ositaulaga i le amataga o le tausaga e atoa i ai lo latou ta’i 16

E faatalanoa e le epikopo po o se fesoasoani ua tofia i latou o le a faauuina o ni tiakono po o ni a’oa’o e filima’oti ai pe ua saunia faaleagaga i latou. O le epikopo e faatalanoaina ia uso o e o le a faauuina o ni ositaulaga.

A o lei faatalanoaina se alii talavou mo le faauuina i le perisitua, e maua mai e le epikopo le faatagaga tuugutu mai matua po o e o vaaia. E le manaomia le faatagaga mai se matua po o se tagata e vaaia le tamaitiiti e leai se faavae faaletulafono mo le tetee atu i le faatinoga.

Afai e agavaa le uso i se faatalanoaga, e tuuina atu e se tasi o le au epikopo o ia mo le lagolagoina i le sauniga faamanatuga (tagai i le 18.10.3).

Mo faamatalaga e uiga i le faauuina o uso faatoa papatisoina, tagai i le 38.2.9.1.

18.10.3

Tuuina Atu o se Tagata o le Ekalesia ina ia Lagolagoina a o lei Faauuina o Ia

A uma ona faatalanoaina se uso ma maua ua agavaa e faauuina i se tofi o le perisitua, e tuuina atu o ia mo le lagolagoina (tagai i le Mataupu Faavae ma Feagaiga 20:65, 67). O uso e faauuina o ni toeaina po o ni faitaulaga sili e tuuina atu e se tasi o le au peresitene o le siteki i le sauniga aoao o le konafesi a le siteki (tagai i le 6.3 mo faatonuga mo peresitene o itu). O uso e faauuina o ni tiakono, aoao, po o ni ositaulaga e tuuina atu e se tasi o le au epikopo i le sauniga faamanatuga.

O le tagata e taitaia le lagolagoina e fai atu i le uso e tula’i. Na te faasilasila atu le lafo e faaee atu le Perisitua Arona po o le Mekisateko (pe a manaomia) ma faauu le uso i le tofi o le perisitua. Ona ia valaaulia lea o tagata o le ekalesia e lagolagoina le lafo. Mo se faataitaiga, ina ia tuuina atu se uso ina ia faauuina o se toeaina, e mafai ona ia faaaogaina upu e pei o nei:

“Matou te tuuina atu ia [igoa] ia maua le Perisitua Mekisateko ma faauuina o se toeaina. O e finagalo i ai, ia faailoa mai i le sii o le aao. [Faatali laitiiti.] O i latou e faatuiese, pe afai e i ai, ia faailoa mai. [Faatali laitiiti.]”

O le tagata o loo tuuina atu lona suafa, e tatau ona auai i le lagolagoina. Afai e sili atu ma le tasi ni tagata o loo tuuina atu, e mafai ona lagolagoina faatasi o se vaega.

Afai e i ai se tagata o le au paia o tulaga lelei e tetee i le faauuga, e feiloai faalilolilo i la’ua ma le taitai pulefaamalumalu po o se taitai perisitua e tofia pe a maea le sauniga. E saili le taitai ia malamalama pe aisea na tetee ai le tagata. E fesili atu o ia pe o iloa e le tagata lea se amioga e mafai ona faaleagavaaina ai le tagata mai le faauuina i le tofi o le perisitua.

E na o tagata e tulaga lelei e mafai ona auai i le palota lagolago. Peitai, afai e le o tulaga lelei se tagata o le au paia po o se tagata e le o se tagata o le ekalesia e tetee i le faatinoga, e mafai e le epikopo po o le peresitene o le siteki ona faalogo atu i lona popolega i se tulaga faalilolilo i fafo atu o le sauniga.

I nisi tulaga, atonu e manaomia ona faauuina se uso o se toeaina po o se faitaulaga sili a o lei mafai ona tuuina atu o ia i le konafesi a le siteki. Pe a tupu lenei mea, e tuuina atu o ia i le sauniga faamanatuga a lana uarota mo le lagolagoina. Ona tuuina atu lea o ia i le isi konafesi a le siteki e sosoo ai e faamaonia ai le faauuga (fetuunaia o le faagasologa mo le lagolagoina, o loo faamatalaina atu i luga). E aofia ai i lea le tuuina atu i tagata o le siteki o se avanoa e lagolago pe tetee ai i le faatinoga.

18.10.4

O Ai e Faatinoina le Sauniga

O le peresitene o le siteki po o se e umia le Perisitua Mekisateko, i lalo o lana taitaiga e mafai ona faauuina se alii i le tofi o le toeaina. Faatasi ai ma le faamaoniga mai le peresitene o le misiona, o le peresitene o le itu po o se tasi i lalo o lana taitaiga e mafai ona faatinoina le faauuga (tagai i le 6.3). E na o ē umia le Perisitua Mekisateko e mafai ona tutū i le li’o.

O le peresitene o le siteki po o se faitaulaga sili i lalo o lana taitaiga e mafai ona faauuina se alii i le tofi o le faitaulaga sili. E na’o faitaulaga sili e mafai ona tutū i le li’o.

O se tagata e faauuina se alii i se tofi o le Perisitua Mekisateko e tatau ona agavaa mo le malumalu. O le peresitene o le siteki po o se tasi na te filifilia e tatau ona i ai.

O se ositaulaga po o se tasi e umia le Perisitua Mekisateko e mafai ona faauuina se uso i le tofi o le tiakono, a’oa’o, po o le ositaulaga. E tatau ona faatagaina o ia e le epikopo. E tatau ona i ai le epikopo po o se tasi na te tofiaina.

Ina ia auai i se faauuga o le Perisitua Arona, e tatau ona avea se tagata o se ositaulaga po o sē umia le Perisitua Mekisateko.

E mafai e se epikopo ona faatagaina se tamā o avea ma ositaulaga pe o loo umia le Perisitua Mekisateko e faauuina lona atalii i le tofi o le tiakono, a’oa’o, po o le ositaulaga tusa lava pe le o agavaa atoatoa le tamā mo le malumalu (tagai i le 18.3). E uunaia e epikopo ia tamā e saunia i latou lava e faauu o latou lava atalii.

Ina ia avea ma se fofoga i lenei sauniga, o se tagata e i fafo atu o lana lava uarota e tatau ona faaali atu se pepa faataga o le malumalu o loo aoga i le taitai pulefaamalumalu. E mafai foi ona ia faaali atu se Pepa Faataga e Faatino ai se Sauniga ua sainia e se tasi o lana au epikopo.

18.10.5

Faatonuga

Ina ia faaee atu le perisitua ma faauuina se tagata i se tofi o le perisitua, e tuu faamāmā e se toatasi pe sili atu o i latou ua faatagaina o loo umia le perisitua, o latou lima i luga o le ulu o le tagata. O le tagata e avea ma fofoga:

1. E ta’u le tagata i lona igoa atoa.

2. E ta’u atu le pule o loo ia umia patino e faatino ai le sauniga (Perisitua Arona po o le Perisitua Mekisateko).

3. Faaee atu le Perisitua Arona po o le Perisitua Mekisateko, se’i vagana ua uma ona faaee atu.

4. E faauuina le tagata i se tofi o le Perisitua Arona po o le Perisitua Mekisateko ma tuu atu i ai aiā tatau, mana, ma le pule o lena tofi. (E le tuuina atu ia ki o le perisitua pe a faaee atu le perisitua pe faauuina i se tofi, se’i vagana ai pe a faauuina se epikopo.)

5. E tuu atu upu o faamanuiaga e pei ona taiala ai e le Agaga.

6. Faaiu i le suafa o Iesu Keriso.

Ina ia faauuina se tagata i se tofi o le perisitua pe a ua uma ona faaee atu ia te ia le perisitua talafeagai, e le faia e le tagata o loo faatinoina le faauuga le laasaga 3.

O se faauuga o se avanoa e tuu atu ai se faamanuiaga. O fautuaga ma faatonuga auiliili e uiga i tiute o se tagata, e tuuina atu a o le’i faia le faauuga ma pe a mae’a. E le tatau ona avea i latou ma taula’iga o le faamanuiaga. E le talafeagai ona faia ni tatalo, molimau, po o ni faatonuga pe a faauuina se tasi.

18.10.6

Faamaumauga ma le Tusi Faamaonia o le Faauuga

A o le’i faatalanoaina se alii ina ia faauuina i se tofi i le Perisitua Mekisateko, e faaaoga e se failautusi le PTF e saunia ai se Faamaumauga o le Faauuga i le Perisitua Mekisateko. O le peresitene o le siteki po o se fesoasoani ua tofia, e faatautaia le faatalanoaga ma saini le fomu pe a ua ausia tulaga uma o le agavaa.

A mae’a le faauuga, e faatumu e le peresitene o le siteki po o sona sui ua tofia le fomu ma avatu i se failautusi. Na te faamaumauina le faauuga i le PTF ma saunia le tusi faamaonia o le faauuga. O lea tusi faamaonia e sainia e le peresitene o le siteki ma tuuina atu i le tagata.

A o le’i faatalanoaina se uso e faauuina i se tofi i le Perisitua Arona, e faaaoga e se failautusi le PTF e saunia ai se Faamaumauga o le Faauuga i le Perisitua Arona. O le epikopo po o se fesoasoani ua tofia, e faatautaia le faatalanoaga ma saini le fomu pe a ua ausia tulaga uma o le agavaa.

A mae’a le faauuga, e faatumu e le epikopo po o sona fesoasoani ua tofia le fomu ma avatu i se failautusi. Na te faamaumauina le faauuga i le PTF ma saunia le tusi faamaonia o le faauuga.

O le igoa o i ai nei o se tagata ua aloaia faaletulafono, e tatau ona faaaogaina i luga o faamaumauga ma le tusi faamaonia o le faauuga.

18.11

Vaetofiaina o Tagata o le Au Paia e Auauna Atu Ai i Valaauga.

O tagata o le Ekalesia e valaauina ma lagolagoina i le tele o tofiga o le Ekalesia e tatau ona vaetofia e auauna atu ai i lena tofiga (tagai i le Ioane 15:16; Mataupu Faavae ma Feagaiga 42:11; tagai foi 3.4.3.1 i le tusitaulima lenei). I le taimi e vaetofia ai, e tuuina atu i le tagata (1) le pule e galue ai i le valaauga ma (2) upu o le faamanuiaga e pei ona taialaina ai e le Agaga.

O peresitene o siteki, epikopo, ma peresitene o korama e mauaina ki o le taitaiga pe a vaetofia i latou (tagai i le 3.4.1.1). Peitai, o le upu ki e le tatau ona faaaogaina pe a vaetofia tagata o le au paia e galulue i isi valaauga, e aofia ai fesoasoani i au peresitene.

Mo faamatalaga e uiga i le valaauina, faauuina, ma le vaetofiaina o epikopo, tagai i le 30.7.

18.11.1

O Ai e Faatinoina le Vaetofiaina

O sē e umia le Perisitua Mekisateko e faatinoina se vaetofiaina. E tatau ona ia mauaina le faamaoniga mai le taitai o loo umia ia ki talafeagai o le perisitua. O i latou e faatagaina e faatino se vaetofiaga, o loo ta’ua i le 30.8. E le tatau i se toeaina ona fai ma fofoga e faaleoina pe tu i le li’o pe afai o loo vaetofiaina se alii i se tofi e manaomia ai ona avea o ia o se faitaulaga sili.

I lalo o le taitaiga a le taitai pulefaamalumalu, e toatasi pe sili atu i latou e umia le Perisitua Mekisateko e mafai ona auai ai i le vaetofiaina. O peresitene e muamua vaetofia a o le’i vaetofiaina o latou fesoasoani.

E mafai e se taitai pulefaamalumalu ona faatagaina se tane po o se tamā o loo umia le Perisitua Mekisateko e tu i le li’o mo le vaetofiaina o lona toalua po o le fanau tusa lava pe le o agavaa atoatoa le tamā mo le malumalu (tagai i le 18.3).

18.11.2

Faatonuga

E tuu faamāmā e se toatasi pe sili atu o i latou o loo umia le Perisitua Mekisateko o latou lima i luga o le ulu o le tagata. O le tagata e fai ma fofoga:

1. E ta’u le tagata i lona igoa atoa.

2. E ta’u atu faapea o loo ia faia i le pule o le Perisitua Mekisateko.

3. E vaetofiaina le tagata i le valaauga i le siteki, uarota, korama, po o se vasega.

4. Faaee atu ki pe afai e tatau i le tagata ona mauaina.

5. E tuu atu upu o faamanuiaga e pei ona taiala ai e le Agaga.

6. Faaiu i le suafa o Iesu Keriso.

O se vaetofiaina e le o se sauniga aloaia e fai ai ni tatalo ma ni molimau. E le o se taimi foi e tuu atu ai ni faatonuga auiliili. E tuu atu na mea i le taimi o aoaoga faamasani, ae le o se vaega o le faamanuiaga.

18.12

Faapaiaina o le Suauu

E tatau i ē umia le Perisitua Mekisateko ona faapaiaina le suauu olive a o le’i faaaogaina e faauu ai ē mama’i po o ē mafatia (tagai i le Iakopo 5:14). E le tatau ona faaaogaina se isi lava suauu.

O loo maua tamai fagu suauu i le store.ChurchofJesusChrist.org.

E le tatau i tagata o le au paia ona inuina le suauu paia pe faaaoga i luga o vaega mafatia o le tino.

18.12.1

O Ai e Faatinoina le Sauniga

E toatasi pe sili atu i latou e umia le Perisitua Mekisateko e mafai ona faapaiaina le suauu. Latou te le tau sailia se faamaoniga mai se taitai perisitua.

18.12.2

Faatonuga

Ina ia faapaiaina le suauu, o sē e umia le Perisitua Mekisateko:

1. E uuina se fagu o le suauu olive o matala.

2. E faalagi le Tama Faalelagi e pei ona faia i se tatalo.

3. E ta’u atu o loo ia faia i le pule o le Perisitua Mekisateko.

4. E faapaiaina le suauu (ae le o le fagu) ma vaetofia mo le faauuina ma le faamanuiaina o ē mama’i ma ē mafatia.

5. Faaiu i le suafa o Iesu Keriso.

18.13

Faauuina o Ē Mama’i

E masani lava, o le faauuina o ē mama’i e tatau ona faia i le talosaga mai a le tagata e tuu atu i ai le faamanuiaga, po o le talosaga foi a isi o ē o popole ina ia faia le faamanuiaga e tusa ai ma lo latou faatuatua (tagai i le Iakopo 5:14; Mataupu Faavae ma Feagaiga 24:13–14; 42:43–44, 48–52).

O le faauuina o ē mama’i “e ala i le faaee atu o lima” e lua ona vaega: faauuina i le suauu ma le faamauina o le faauuga i se faamanuiaga. Afai e le o i ai se suauu ua faapaiaina, e mafai lava ona tuuina atu se faamanuiaga e ala i le pule o le Perisitua Mekisateko e aunoa ma le faauuina.

Afai e talosagaina e se tagata le sili atu ma le tasi ni faamanuiaga mo le gasegase lava e tasi, e le toe tau faia se isi faauuga. E mafai e sē e umia le perisitua ona tuuina atu se isi faamanuiaga e ala i le faaee atu o lima ma le pule o le Perisitua Mekisateko. Peitai, e mafai foi ona toe faia se isi faauuga.

O ē umia le Perisitua Mekisateko e asiasi atu i le falemai, e le tatau ona talosagaina ni avanoa e faauu ai ē mama’i.

18.13.1

O Ai e Tuuina Atu le Faamanuiaga

E na’o ē umia le Perisitua Mekisateko o loo agavaa e mafai ona faauuina ē mama’i pe mafatia. Latou te le tau sailia se faamaoniga mai se taitai perisitua. Afai e mafai, o se tamā o loo umiaina le Perisitua Mekisateko e faauuina tagata mama’i o lona aiga.

E masani lava, e toalua pe sili atu i latou e umia le Perisitua Mekisateko e faauuina ē mama’i. Peitai, e mafai foi ona faatino e le toatasi le faauuga ma le faamauga.

18.13.2

Faatonuga

O le faauuina o ē mama’i e lua ona vaega: faauuina i le suauu ma le faamauina o le faauuga.

O le faauuina i le suauu e faia e se tagata se toatasi e umiaina le Perisitua Mekisateko. Na te:

1. Tuu se matāua o le suauu paia i luga o le ulu o le tagata.

2. Tuu faamāmā ona lima i luga o le ulu o le tagata ma ta’u le tagata i lona igoa atoa.

3. E ta’u atu o loo ia faia i le pule o le Perisitua Mekisateko.

4. E ta’u atu ua ia faauuina i le suauu ua faapaiaina mo le faauuina ma le faamanuiaina o ē mama’i ma e mafatia.

5. Faaiu i le suafa o Iesu Keriso.

Ina ia faamauina le faauuga, e tuu faamāmā e se toatasi pe sili atu o ē umia le Perisitua Mekisateko o latou lima i luga o le ulu o le tagata. O lē o le a faamauina le faauuga:

1. E ta’u le tagata i lona igoa atoa.

2. E ta’u atu o loo ia faamauina le faauuga i le pule o le Perisitua Mekisateko.

3. E tuu atu upu o faamanuiaga e pei ona taiala ai e le Agaga.

4. Faaiu i le suafa o Iesu Keriso.

18.14

Faamanuiaga o Faamafanafanaga ma Fautuaga, e Aofia ai Faamanuiaga Faatamā

18.14.1

O Ai e Tuuina Atu le Faamanuiaga

E mafai e i latou e umia le Perisitua Mekisateko ona tuuina atu ia faamanuiaga o le faamafanafanaga ma fautuaga i tagata o le aiga ma isi e talosagaina. O nei faamanuiaga e masani lava ona tuuina atu e tagata o le aiga, o uso o auaunaga, po o taitai perisitua.

O se tamā o loo umiaina le Perisitua Mekisateko e mafai ona tuuina atu faamanuiaga faatamā i lana fanau. O nei faamanuiaga e mafai ona fesoasoani tele aemaise pe a ō le fanau i aoga, o i misiona, faaipoipo, ulufale atu i le tautua faamiliteli, pe feagai foi ma luitau faapitoa. E uunaia e matua a latou fanau e saili atu i faamanuiaga faatamā i taimi e manaomia ai. E mafai ona pu’eina faamanuiaga faatamā mo le faaaogaina e le tagata lava ia.

E le manaomia le tau sailia e se o umia le Perisitua Mekisateko se faamaoniga mai se taitai perisitua e tuu atu ai se faamanuiaga o le faamafanafanaga ma fautuaga po o se faamanuiaga faatamā.

18.14.2

Faatonuga

Ina ia tuuina atu se faamanuiaga o le faamafanafanaga ma fautuaga po o se faamanuiaga faatamā, e faaee atu e se toatasi pe sili atu o i latou e umia le Perisitua Mekisateko o latou lima i luga o le ulu o le tagata. O le tagata e fai ma fofoga:

1. E ta’u le tagata i lona igoa atoa.

2. E ta’u atu o loo faia le faamanuiaga i le pule o le Perisitua Mekisateko.

3. E tuu atu upu o faamanuiaga, faamafanafanaga, ma fautuaga e pei ona taiala ai e le Agaga.

4. Faaiu i le suafa o Iesu Keriso.

18.15

Faapaiaina o Fale

E mafai e tagata o le Ekalesia ona faapaiaina o latou fale e ala i le pule o le Perisitua Mekisateko. E le tau moomia ona onaina se fale, pe leai se aitalafu ina ia faapaiaina ai. E le pei o fale o le Ekalesia, o fale o aiga e le faapaiaina i le Alii.

18.15.1

O Ai e Faatinoina le Faapaiaga

E faapaiaina se fale e sē e umia le Perisitua Mekisateko. Afai e leai se tasi e umia le Perisitua Mekisateko i le aiga:

• E mafai e se aiga ona valaaulia se uo mamae, se tasi o le aiga, po o se uso o auaunaga e umia le Perisitua Mekisateko na te faapaiaina le fale. E le tau sailia e le tagata se faamaoniga mai se taitai perisitua.

• E mafai ona faapotopoto se aiga ma faia se tatalo e pei ona taiala ai e le Agaga. O le tatalo e mafai ona aofia ai elemene o loo ta’ua i le 18.15.2, numera 3.

18.15.2

Faatonuga

Ina ia faapaiaina se fale, o sē e umia le Perisitua Mekisateko:

1. E faalagi le Tama Faalelagi e pei ona faia i se tatalo.

2. E ta’u atu o loo ia faia i le pule o le Perisitua Mekisateko.

3. E faapaiaina le fale o se nofoaga paia e mafai ona afio ai le Agaga Paia ma tuu atu isi upu e pei ona taiala ai e le Agaga Mo se faataitaiga, e mafai ona ia faamanuiaina le fale ia avea ma nofoaga e mafai ona tapuai ai tagata o le aiga, maua ai le saogalemu mai le lalolagi, ola a’e ai faaleagaga, ma saunia ai mo sootaga faaleaiga e faavavau.

4. Faaiu i le suafa o Iesu Keriso.

18.16

Faapaiaina o Tuugamau

18.16.1

O Ai e Faapaiaina le Tuugamau

O se tagata e faapaiaina se tuugamau e tatau ona umia le Perisitua Mekisateko ma ia faatagaina e le taitai perisitua o loo pulefaamalumalu i le sauniga.

Afai e mananao ai le aiga, e mafai ona faia se tatalo i le mea o i ai le tuugamau nai lo se tatalo o le faapaiaga. E mafai ona faia e soo se tasi e filifili e le aiga.

Ina ia avea ma sē e faaleoina le faapaiaga o se tuugamau, o se tagata e i fafo atu o lana lava uarota e tatau ona faaali atu se pepa faataga o le malumalu o loo aoga i le taitai perisitua o loo pulefaamalumalu i le sauniga. E mafai foi ona ia faaali atu se Pepa Faataga e Faatino ai se Sauniga ua sainia e se tasi o lana au epikopo.

18.16.2

Faatonuga

Ina ia faapaiaina se tuugamau, o sē e umia le Perisitua Mekisateko:

1. E faalagi le Tama Faalelagi e pei ona faia i se tatalo.

2. E ta’u atu o loo ia faia i le pule o le Perisitua Mekisateko.

3. E faapaiaina ma faamanuia le vaega mo le tanuga e avea o se nofoaga e mapu i ai le tino o lē ua maliu.

4. E tatalo o le a faapaiaina le nofoaga ma puipuia seia oo i le Toetutu (i le mea e talafeagai).

5. Ōle atu i le Tama Faalelagi ina ia faamafanafana i le aiga ma faailoa atu mafaufauga e pei ona taialaina ai e le Agaga.

6. Faaiu i le suafa o Iesu Keriso.

Afai e susunuina le tino o se tagata o le Ekalesia, e faaaoga e le taitai pulefaamalumalu lana faautautaga e fai ai se faaiuga pe faapaia le nofoaga o loo teu ai le lefulefu. Na te faitaulia foi ia moomooga o le aiga ma agaifanua ma tulafono i le lotoifale. O le uso ua avea ma fofoga na te fetuuna’ia ia faatonuga mo le faapaiaina o se tuugamau.

18.17

Faamanuiaga Faapeteriaka

O tagata agavaa uma, ua papatisoina ua i ai le aiā e maua ai se faamanuiaga faapeteriaka, lea e maua ai le taitaiga musuia mai le Tama Faalelagi (tagai i le Kenese 48:14-16; 49; 2 Nifae 4:3–11). E uunaia e matua ma taitai o le Ekalesia ia tagata o le au paia e sauniuni faaleagaga ia maua o latou faamanuiaga faapeteriaka.

E faatalanoa e le epikopo po o se fesoasoani e tofia ia tagata e mananao e maua se faamanuiaga faapeteriaka. Afai ua agavaa se tagata o le ekalesia, e saunia e lē na faia le faatalanoaga se Pepa Faataga mo Faamanuiaga Faapeteriaka. Na te auina atu e ala i le Patriarchal Blessing System i luga o le ChurchofJesusChrist.org.

O le tagata e tuuina atu se Pepa Faataga mo Faamanuiaga Faapeteriaka e faamautinoaina ua lava le matua o le tagata e malamalama ai i le taua ma le natura paia o le faamanuiaga. O le mea sili, ia lava le talavou o le tagata aua o le tele o faaiuga taua i le olaga o loo i luma atu pea. Peitai, e fautuaina foi tagata matutua atu ina ia maua o latou faamanuiaga faapeteriaka. E le tatau i taitai perisitua ona faatulaga se tausaga laitiiti faatapulaa mo se tagata ina ia maua ai se faamanuiaga faapeteriaka.

E tatau i se tagata fou faatoa liliu mai ona malamalama i aoaoga faavae autu o le talalelei a o lei mauaina se faamanuiaga faapeteriaka.

Mo faamatalaga e uiga i faamanuiaga faapeteriaka i tulaga faapitoa, tagai i le 38.2.10.

18.17.1

Mauaina o se Faamanuiaga Faapeteriaka

A mae’a ona maua se pepa faataga, e faafesootai e le tagata le peteriaka e faatulaga se aso ma se taimi e maua ai se faamanuiaga faapeteriaka. I le aso ua tuupoina, e tatau i le tagata ona alu i le peteriaka ma se uiga faaalia o le lototatalo ma i laei o le Aso Sa. E mafai ona anapopogi tagata o le au paia, ae e le manaomia ai se anapogi.

O faamanuiaga faapeteriaka taitasi e paia, e le faalauaiteleina, ma e patino mo le tagata lava ia. O le mea lea, e tuuina atu ai i se tulaga patino, se’i vagana ai mo se numera tapulaa o tagata o le aiga e mafai ona i ai.

O se tagata e mauaina se faamanuiaga faapeteriaka e tatau ona faatauaina ona upu, mafaufau loloto i ai, ma ola ia agavaa e maua ia faamanuiaga folafolaina i le olaga nei ma i le faavavau.

E le tatau i tagata o le Ekalesia ona faatusatusa ia faamanuiaga ma e le tatau ona latou faasoaina atu se’i vagana ai tagata vavalalata o le agia. E le tatau ona faitau atu i sauniga faale-Ekalesia po o isi faatasiga faitele ia faamanuiaga faapeteriaka.

Afai e le o aofia ai i se faamanuiaga faapeteriaka se tautinoga o le gafa, e mafai e le peteriaka ona tuuina atu se faamatalaga faaopoopo e ta’u atu ai le gafa.

18.17.2

Mauaina o Kopi o Faamanuiaga Faapeteriaka

O se tagata ua maua se faamanuiaga faapeteriaka, e tatau ona malupuipuia ma le faaeteete le kopi lolomi. Peitai, afai e leiloa lea kopi pe faatamaiaina, e mafai e le tagata ona talosagaina se kopi fou. E mafai ona ia faia le talosaga lenei i le Faamanuiaga Faapeteriaka i luga o le ChurchofJesusChrist.org. Afai e le mafai ona fai lenei mea, e faafesootai e le tagata lona epikopo mo se fesoasoani.

18.17.3

Isi Faamatalaga

Mo nisi faamatalaga e uiga i faamanuiaga faapeteriaka, tagai i le 38.2.10 ma le “Faamanuiaga Faapeteriaka.”

18.18

Faaeega Paia i le Malumalu ma Faamauga

Mo faamatalaga e uiga i faaeega paia i le malumalu ma sauniga o faamauga, tagai i le mataupu e 27.

18.19

Siata o Faauuga

Tofi	Fautuaina atu e	Faamaonia e	Lagolagoina e	Faatalanoa ma faauu e
Tofi Peteriaka	Fautuaina atu e Au peresitene o le siteki	Faamaonia e Korama a Aposetolo e Toasefululua	Lagolagoina e Tagata o le Ekalesia i konafesi faalesiteki	Faatalanoa ma faauu e Peresitene o le siteki ina ua uma ona maua mai le faamaoniga mai le Korama a Aposetolo e Toasefululua; po o se tasi o le Au Peresitene Sili po o le Korama a Aposetolo e Toasefululua
Tofi Faitaulaga sili	Fautuaina atu e Epikopo ma le au peresitene o le siteki	Faamaonia e Au peresitene o le siteki ma fautua maualuga	Lagolagoina e Tagata o le Ekalesia i konafesi faalesiteki	Faatalanoa ma faauu e Faatalanoaina e le epikopo ma le peresitene o le siteki po o se fesoasoani e tofia; faauuina i lalo o le taitaiga a le peresitene o le siteki
Tofi Toeaina	Fautuaina atu e Epikopo	Faamaonia e Au peresitene o le siteki ma fautua maualuga	Lagolagoina e Tagata o le ekalesia i konafesi a le siteki po o le konafesi a le itu	Faatalanoa ma faauu e Faatalanoaina e le epikopo ma le peresitene o le siteki po o se fesoasoani ua tofia (i se itu, e faatalanoaina e se tasi o le au peresitene o le misiona po o le au peresitene o le itu pe afai e tofia ai; tagai i le 6.3) Faauuina i lalo o le taitaiga a le peresitene o le siteki (i se itu, e faauuina i lalo o le taitaiga a le peresitene o le misiona po o le peresitene o le itu pe afai e tofia ai)
Tofi Epikopo	Fautuaina atu e Au peresitene o le siteki, e faaaoga ai le PTF	Faamaonia e Au Peresitene Sili ma le Korama a Aposetolo e Toasefululua	Lagolagoina e Tagata o le Ekalesia i le sauniga faamanatuga	Faatalanoa ma faauu e O le peresitene o le siteki ina ua uma ona maua mai le faamaoniga mai le Au Peresitene Sili (tagai i le 30.7)
Tofi Ositaulaga	Fautuaina atu e Epikopo	Faamaonia e Au Epikopo	Lagolagoina e Tagata o le Ekalesia i le sauniga faamanatuga	Faatalanoa ma faauu e Faatalanoaina e le epikopo; faauuina i lalo o le taitaiga a le epikopo
Tofi Aoao po o le tiakono	Fautuaina atu e Epikopo	Faamaonia e Au Epikopo	Lagolagoina e Tagata o le Ekalesia i le sauniga faamanatuga	Faatalanoa ma faauu e Faatalanoaina e le epikopo po o se fesoasoani e tofia; faauuina i lalo o le taitaiga a le epikopo