Vaaiga Aoao

O tagata agavaa uma o le Ekalesia ua papatisoina ua i ai le aia tatau e maua ai se faamanuiaga faapeteriaka, lea e tuuina mai ai le taitaiga musuia mai le Alii. O faamanuiaga faapeteriaka e aofia ai se folafolaga o le tupuaga o se tagata i le aiga o Isaraelu ma e i ai foi fautuaga patino mai le Alii. A o suesue e se tagata lona faamanuiaga faapeteriaka ma mulimuli i fautuaga o loo i ai, o le a tuuina mai ai se taitaiga, faamafanafanaga, ma le puipuiga.

Folafolaga o le Tupuaga

O se faamanuiaga faapeteriaka e aofia ai se folafolaga o le tupuaga, e fai mai o le tagata e mai i le aiga o Isaraelu—o se tupuga mai ia Aperaamo, e auai i se ituaiga faapitoa o Iakopo. O le toatele o le Au Paia o Aso e Gata Ai o le ituaiga o Efaraima, o le ituaiga ua tuuina atu i ai le tiutetauave autu e taitaia le galuega a le Alii i aso e gata ai.

Ona o i tatou taitoatasi e tele ni laina o toto o loo fegasoloai i totonu o i tatou, e toalua sui o le aiga e tasi e mafai ona folafolaina i ai ni ituaiga ese o Isaraelu.

E le afaina pe o le tupuaga o se tagata i le aiga o Isaraelu e ala atu i laina o toto pe ala i le vaetama. O tagata o le Ekalesia e faitaulia o se tupuaga o Aperaamo ma o se suli i folafolaga ma faamanuiaga uma e i ai i le feagaiga Faa-Aperaamo (tagai i le Feagaiga Faa-Aperaamo).

Aoaoina mai se Faamanuiaga Faapeteriaka

O i latou o e maua se faamanuiaga faapeteriaka e tatau ona faitau soo i ai, ma le lotomaulalo, ma le agaga tatalo. O loo i ai faaaliga ma faatonuga patino mai le Tama Faalelagi, o le e silafia o tatou malosiaga, vaivaiga, ma gafatia e faavavau. O faamanuiaga faapeteriaka e mafai ona aofia ai folafolaga, apoapoaiga, ma lapataiga.

O i latou o e mulimuli i fautuaga o loo i o latou faamanuiaga faapeteriaka o le a le ono se ese pe taitaiseseina. E na o le mulimuli i fautuaga o loo i se faamanuiaga faapeteriaka e mafai ai e se tagata ona maua faamanuiaga o loo i ai i totonu.

E ui ina i ai i se faamanuiaga faapeteriaka ni fautuaga ma ni folafolaga musuia, e le tatau ona faamoemoeina e tali ai fesili uma a se tagata e mauaina pe auiliili atu ai mea uma o le a tutupu i lona olaga. Afai e le ta’ua i le faamanuiaga se mea taua e tupu, e pei o se misiona faafaifeautalai po o se faaipoipoga, e le tatau i le tagata ona faapea o le a ia le maua lena avanoa.

E faapena foi, o le tagata e maua le faamanuiaga e le tatau ona manatu o mea uma na ta’ua i le faamanuiaga o le a faataunuuina i le olaga lenei. O se faamanuiaga faapeteriaka e faavavau, ma o ona folafolaga e mafai ona oo atu i le faavavau. Afai e agavaa se tagata, o le a faataunuuina folafolaga uma i le taimi a le Alii. O na folafolaga ma faamanuiaga e le ausia i lenei olaga o le a faataunuuina i le olaga a sau.

O faamanuiaga faapeteriaka e paia ma patino. E mafai ona faasoaina atu i ni tagata o le aiga patino, ae e le tatau ona faitauina leotele i tagata lautele pe faitau pe faaliliuina e isi. E le tatau foi i le peteriaka po o le epikopo po o le peresitene o le paranesi ona faaliliuina.

O i latou ua mauaina se faamanuiaga faapeteriaka e tatau ona faatauaina ona upu, mafaufau loloto i ai, ma ola ia agavaa e maua ia faamanuiaga folafolaina i le olaga nei ma le olaga a sau.

Ina ia iloa le ala e maua ai se faamanuiaga faapeteriaka, e tatau i tagata o le Ekalesia ona talanoa ma o latou epikopo po o le peresitene o le paranesi.