O Le Matafaioi a Perofeta

O le sailia o tali i a tatou fesili e mafai ona tatou latalata atili ai ia Iesu Keriso pe afai tatou te faaaogaina mataupu faavae lelei. E taua le malamalama i le auala e maua ai faaaliga pe a sailia ni tali. Tagai i le autu “Ia Iloa o Faaaliga o se Faagasologa” e suesue ai nisi motugaafa i le taliina o fesili.

Vaaiga Aoao

Talu mai aso anamua, ua valaauina e le Atua perofeta e molimau ia Iesu Keriso ma folafola atu Lana afioga. E saunia, valaauina, ma taitai e le Atua perofeta e faataunuu Ana faamoemoega e faavavau. O loo i ai i tusitusiga paia aoaoga a le tele o perofeta, e pei o Mose, Isaia, Elia, ma Nifae. Sa talanoa atu i latou taitoatasi i tagata i la latou gagana, taimi, ma nofoaga, ma tuuina atu le taitaiga musuia ma lapataiga talafeagai.

O loo faaauau pea ona valaauina e le Atua perofeta i o tatou taimi. Na maua e le Perofeta o Iosefa Samita le pule mai le Atua e faatautaia ai feagaiga o le talalelei ma sauniga o le perisitua ma toefuatai mai ai le Ekalesia a Iesu Keriso. Sa ia mauaina foi faaaliga e faamanino ai upumoni taua e uiga i le Atua ma Lana fuafuaga mo Lana fanau. O e na suitulaga ia te ia o se Peresitene o le Ekalesia ua i ai le pule lava lea e tasi e maua ai faaaliga e faaopoopo atu i le malamalama o le talalelei ma taialaina ai le Ekalesia. O lenei mataupu faavae o faaaliga faifai pea o se vaega totonugalemu lea o le talalelei toefuataiina.

E lagolagoina e le Au Paia o Aso e Gata Ai le Peresitene o le Ekalesia, ona fesoasoani i le Au Peresitene Sili, ma sui o le Korama a Aposetolo e Toasefululua, o ni perofeta, tagatavaai ma talifaaaliga. O aoaoga a le Ekalesia ua folafola mai e le leo autasi o nei perofeta soifua. O le aoaoga faavae e folafola atu ma faaliliuina e le Peresitene o le Ekalesia ma lagolagoina e le Au Peresitene Sili ma le Korama a le Toasefululua o loo galulue i le autasi, e mulimuli i le mamanu o loo tuuina mai i le Mataupu Faavae ma Feagaiga 107:27–31.

Ua valaauina e le Alii tagata faaletino e avea ma Ana perofeta. E pei o fanau uma a le Atua, latou te oo i tofotofoga o le olaga faaletino, ae e galue le Alii e ala mai ia i latou e faatino Lana galuega. Ua Ia poloaiina le Ekalesia ina ia utagia a latou fautuaga “i le onosai ma le faatuatua atoa.” Afai tatou te faia, ua Ia folafola mai e “faasalalau ese mana o le pouliuli mai [i o tatou, luma, ma faatupuina le lagi ia luluina mo [lo tatou] lelei.”

Taiala e faatatau i le suesueina o le talalelei:

“Perofeta”
“Ki o le Perisitua”

Suesueina o Au Fesili

Aisea e taua ai mo a’u le faalogo i perofeta?

Na toefuatai mai e Iesu Keriso Lana Ekalesia i aso e gata ai e fesoasoani ia te Ia e faataunuu Lana galuega ofoofogia: E finagalo o Ia e aoao atu faamanuiaga o feagaiga, faafaigofie le faamagaloga mo agasala, ma ofo atu le fesoasoani e ala i tofotofoga i fanau uma a le Atua; tuufaatasia se lalolagi fevaevaea’i i Ana aoaoga ma faataitaiga; ma faafesootai augatupulaga uma o le aiga o tagata e ala i sauniga o le faaolataga ma le faaeaga.

E valaauina e le Alii perofeta ma tuuina atu ia i latou le pule e taitai ai lenei galuega. Na te tuuina atu ia i latou faaaliga e fesoasoani ia i latou ia iloa ai mea e faamamafa atu ma le auala e agai ai i luma le galuega a le Atua. E ui lava o perofeta e o mai mai tulaga eseese ma e eseese taleni ma vaaiga, ae latou te saili ma le lotomaualalo ma maua le finagalo o le Alii mo Lana Ekalesia.

O le sailia o le malamalama ma le faamaoniga o valaauga paia o perofeta e ala i le faaaogaina ma le faamaoni o a latou aoaoga o se elemene o le avea ma soo. O le mulimuli i perofeta e mafai ona manaomia ai le “onosai ma le faatuatua” aua atonu tatou te le malamalama i taimi uma i le faamoemoega paia o faaaliga ma aoaoga ua faaalia i se perofeta. E ui atonu e i ai ni a tatou fesili, ae ua talosagaina i tatou e le Alii e mulimuli i le taitaiga a Ana auauna ma le faatuatua i Lona malamalama atoatoa ma le mana o Lana Togiola.

Pe a tatou utagia upu a perofeta, ua tatou valaaulia le Agaga Paia i o tatou olaga. Ua tatou auai i se nuu i le lalolagi atoa o soo o Iesu Keriso ua tautino atu e fausia le malo o le Atua i le lalolagi. A o tatou mulimuli i fautuaga faaperofeta, tatou te maua faamanuiaga o le mana paia ma le filemu e faavavau ua folafola mai ia i latou o e ulu atu i ai ma tausia feagaiga o le talalelei.

E mafai faapefea ona ou maua se molimau e taialaina e le Alii Lana Ekalesia e ala i perofeta?

E finagalo le Atua i Ana fanau ia faalogo ma faatuatuaina Ana perofeta. A o tatou saili ma le faamoemoe moni, e mafai ona tatou maua se molimau patino o loo Ia taialaina Lana Ekalesia i aso nei.

E mafai ona tatou faatinoina le fautuaga a le perofeta o Alema. “Tofotofo i au upu,” na ia uunaia ai sa Sorama, “ma faaaoga sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o au upu”

Na faamatala atili atu Alema: “O le a tatou faatusaina le upu i se fatu. O lea, afai e te tuu ane se avanoa, e mafai ona toto ai o se fatu i lou loto, faauta, afai o se fatu moni, po o se fatu lelei,” ma “afai e te le tia’ia i fafo i lou le talitonu, … o le a amata ona malena ae i totonu o lou fatafata” ma o le a e faapea, “Ua tatau ona lelei lenei fatu, pe ua lelei le afioga, ona ua amata ona faalauteleina ai lo’u agaga; ioe, ua amata ona faamalamalama ai lo’u malamalamaaga, ioe , ua amata ona suamalie ia te au.”

E pei ona aoao mai Alema, e mafai ona tatou faataita’ia upu a perofeta. Mo se faataitaiga, pe a mafai, e mafai ona tatou galulue i le fautuaga a le perofeta e faia se tofiga masani e tapuai ai i le maota o le Alii. A o tatou faia, e mafai ona tatou vaavaai mo faamanuiaga na folafola mai e le perofeta. O le iloaina o nei faamanuiaga e faamalosia ai lo tatou faatuatua i upu a perofeta soifua.

O le atiina a’e o le fatu e ala i lo tatou faatuatua o se faagasologa o le olaga atoa, ae e mafai ona tatou amata i le aso ina ia maua le faamautinoaga faaleagaga o perofeta soifua ma utagia a latou fautuaga ma le onosai ma le faatuatua.

Pe e le mafaaseseina taitai o le Ekalesia?

Ua na o Iesu Keriso na soifua i se olaga e atoatoa. E taumafai taitai o le Ekalesia e ola i olaga amiotonu ma aumai tagata ia Iesu Keriso e ala i a latou upu ma amioga, ae e i ai vaivaiga faaletagata. O taitai o Le Ekalesia a Iesu Keriso o le Au Paia o Aso e Gata Ai e le atoatoa.

Ae e lē tatau ona tatou faagaloina la latou matafaioi tāua. Ua valaauina e le Alii sui o le Au Peresitene Sili o le Ekalesia ma le Korama a Aposetolo e Toasefululua e avea ma “molimau faapitoa o le suafa o Keriso” ma galulue o ni perofeta, tagatavaai, ma talifaaaliga i o tatou aso. E pei o perofeta anamua, latou te fesootai ma le Atua ma faaali mai Lona finagalo. Ua ia i latou le pule paia e taialaina ai le Ekalesia e ala i faaaliga, faatautaia sauniga o le talalelei, ma taitaia le galuega a le Alii i le lalolagi. E le faapea la ua latou iloa mea uma. Latou te galulue e tusa ai ma le malamalama ua tuuina mai e le Alii ia i latou, saili atili le malamalama e ala i faaaliga faifai pea, ma faalagolago i le mana faamalosi latou te maua e ala mai ia Iesu Keriso ma Lana Togiola.

Sa galue pea le Alii e ala mai i perofeta faaletino e ui lava i o latou vaivaiga. E pei o Iona na sola ese mai lona valaauga i Nineva, o Peteru o loo tipi ese le taliga o le fitafita, po o Iosefa Samita o tuuina atu itulau mai le faaliliuga o le Tusi a Mamona ia Matini Harisi, e ono faia e perofeta i nisi taimi ni mea sese. I tulaga faapena, e faasa’o e le Alii Ana auauna, ma a uma ona latou salamo, na te faamanuiaina i latou e faataunuu le galuega na Ia valaauina i latou e fai.

E taua le manatuaina o le auala ua faavaeina ai le aoaoga faavae o le Ekalesia. O le aoaoga faavae e folafola atu ma faaliliuina e le Peresitene o le Ekalesia ma lagolagoina e le Au Peresitene Sili ma le Korama a le Toasefululua o loo galulue i le autasi, e mulimuli i le mamanu o loo tuuina mai i le Mataupu Faavae ma Feagaiga 107:27–31. “O lenei tulaga manaomia o le autasi, e fesoasoani e taulima ai le faaituau ma mausa faaletagata lava ia. E mautinoa ai o loo taitai le Atua e ala i le Agaga, ae le o le tagata e ala i le toatele po o le fetuutuunai.” O se aoaoga a se taitai e toatasi o le Ekalesia e ono faatusa i “se manatu patino, e ui ina mafaufau lelei i ai, ae e le o se manatu aloaia pe faamauina mo le Ekalesia atoa.”

E ala mai i le Agaga Paia, e mafai ai e i tatou taitoatasi ona maua se faamautinoaga patino e faapea, ua valaauina perofeta e le Atua ma o loo Ia taitaia Lana galuega e ala mai ia i latou.

O le a le uiga o le le taitaiseseina e le perofeta o le Ekalesia?

Na saunoa Peresitene Uilifoti Uitilafi, “O le a lē faatagaina lava e le Alii a’u po o se isi lava tagata e tulai e fai ma Peresitene o lenei Ekalesia e taitaieseina outou. Ua toe faamautu mai e perofeta ma aposetolo lenei aoaoga i augatupulaga uma. O le aoaoga faavae e folafola atu ma faaliliuina e le Peresitene o le Ekalesia ma lagolagoina e le Au Peresitene Sili ma le Korama a le Toasefululua o loo galulue i le autasi, e mulimuli i le mamanu o loo tuuina mai i le Mataupu Faavae ma Feagaiga 107:27–31.

E talitonu le Au Paia o Aso e Gata Ai o le atoatoaga o le talalelei toefuataiina ma le pule o le perisitua o le a le toe aveesea lava mai le lalolagi. O lona uiga o le a taialaina pea e le Atua perofeta ina ia mautinoa ua faataunuuina e le Ekalesia lana misiona e saunia Ai Ana fanau mo faamanuiaga o le ola e faavavau. O le a faaauau pea ona Ia faaali mai Lona finagalo i perofeta i lea fuaitau ma lea fuaitau, ma faateleina lo tatou malamalama ma aveesea mea sese o se vaega o le Toefuataiga o le talalelei o loo faaalia mai.

Aisea e suia ai nisi o mea i le Ekalesia i le aluga o taimi?

I le Mataupu Faavae ma Feagaiga 1:30, ua tautino mai ai e le Alii o le Ekalesia ua “na o le pau lea o le ekalesia moni ma ola i le lalolagi atoa.” Ae o meaola uma lava e atiina a’e ma suia. Ua ese faiga masani a le Ekalesia i aso nei nai lo na o ni nai tausaga ua mavae. O se vaega taua lenei o le Ekalesia, lea na faavae i luga o le mataupu faavae o faaaliga faifai pea. E talitonu le Au Paia o Aso e Gata Ai o le a “faaalia mai e le Atua le tele o mea tetele ma taua.”

O faaaliga faifai pea e mafai ona faalauteleina pe faaleleia ai lo tatou malamalama, taitai atu ai i tatou e suia nisi o a tatou tu ma aga masani, ma fesoasoani ia i tatou e latalata atili atu ai i le tulaga o Siona. E fetuunai e le Ekalesia i le lalolagi atoa ina ia mafai ona fetaui ana aiaiga ma manaoga o taimi ma nofoaga patino. O le mea moni lava, o manaoga o le Au Paia i tuaoi o Amerika i le seneturi lona 19 sa matuai ese lava mai manaoga o le faitau miliona o tagata o le Ekalesia ua salalau solo i le lalolagi i aso nei.

O le tele o suiga tatou te oo i ai i le Ekalesia e aofia ai le faatinoina moni o mataupu faavae o le talalelei, e pei o le auala tatou te faatautaia ai tapuaiga i le Sapati pe auauna atu ai le tasi i le isi i a tatou uarota ma paranesi. O nisi taimi o faaaliga ua taitai atu ai i suiga e sili atu ona taua i aoaoga ma faiga masani a le Ekalesia. O faataitaiga e aofia ai tautinoga aloaia o loo maua i le Mataupu Faavae ma Feagaiga, lea na taitai atu ai i le faaiuga o le faiga o faaipoipoga faaautaunonofo ma faamanuiaga e tuuina atu o le perisitua ma le malumalu i tagata uma e tusa lava po o le a le ituaiga.

Pe sili atu ea le taua o aoaoga a perofeta soifua nai lo tusitusiga paia po o taitai o le Ekalesia ua mavae?

O perofeta soifua, tusitusiga paia, ma taitai o le Ekalesia ua mavae e taua uma lava. O le faamoemoega autu o nei punavai e tolu o le upumoni o le molimau atu lea i le misiona faaola a Iesu Keriso. E tatau ona tatou saili ia malamalama i le matafaioi taua o loo faia e punavai taitasi ma le auala e fesootai ai le tasi i le isi.

O tusitusiga paia o se punavai o upumoni taua ua faaalia mai i le silia ma le faitau afe o tausaga ma i le tele o nofoaga faaleaganuu. Latou te tausia pea upumoni taua o le talalelei i o tatou luma. Latou te molimau atu ia Keriso ma tuuina mai le avanoa mo le Agaga e fetalai mai ai ia i tatou. O aoaoga a perofeta ua mavae o le Toefuataiga ua tuuina mai ai se punaoa faaleagaga faapena. E tatau ona tatou saili ia malamalama i tusitusiga paia ma aoaoga a perofeta ua mavae i le talaaga lea na tuuina atu ai ia i latou ma talia ma le agaga faafetai upumoni faaalia o loo latou faasoa mai.

O perofeta soifua o loo umia ki o le perisitua e manaomia e taitai ai le Ekalesia ma faatautaia ai sauniga o le talalelei i aso nei. Latou te faaopoopo atu la latou molimau ia Keriso ia i latou na faaalia e perofeta ua mavae. E fesoasoani ia i tatou e iloa ai le auala e faatatau ai upumoni o le talalelei i o tatou tulaga o i ai nei. Latou te maua faaaliga fou mo le Ekalesia, e fetuunai ai faatonuga ua tuanai i tulaga o i ai nei e pei ona faatonuina ai e le Alii. O nisi taimi e sili atu a latou aoaoga nai lo aoaoga a perofeta ua mavae. O le tele lava o taimi, o a latou upu e faamalolosia ai aoaoga o tusitusiga paia ma upu a perofeta ua mavae.

Aoao atili

Russell M. Nelson, “Faaaliga mo le Ekalesia, Faaaliga mo o Tatou Olaga,” LiahonaMe 2018, 93–96
Neil L. Andersen, “O Le Perofeta a le Atua,” Liahona, Me 2018, 24–27)