O Le Foafoaga

O le faamoemoega o le Atua i le foafoaina o mea uma mo Lana fanau

O le a le taimi mulimuli na e tilotilo atu ai i fetu i le lagi i le po, faalogologo i galu i luga o se matafaga, pe savali sopo i fafo? Ua tatou ola i se lalolagi matagofie. E ui tatou te le iloa le tele o faamatalaga e uiga i le ala na foafoaina ai le lalolagi, ae ua tatou iloa na foafoaina e Iesu Keriso i lalo o le taitaiga a le Atua le Tama. Ma ua tatou iloa le mafuaaga na faia ai. Sa aoaoina e le perofeta o Mose i se tasi taimi i se faaaliga faalelagi faapea na foafoaina e le Atua lalolagi e le mafaitaulia (tagai Mose 1:7–8, 27–29). Na fetalai le Atua ia Mose na Ia foafoaina le lalolagi i le “aumaia o le tino ola pea ma le ola faavavau o le tagata” (Mose 1:39). A tatou malamalama o le Foafoaga sa faataunuuina e ala i le taitaiga ma le mana o le Atua lava Ia, e amata ona tatou vaai i le taua o Lana fuafuaga mo lo tatou faaolataga.

O Le A le Foafoaga?

I lalo o le taitaiga a le Atua le Tama, na foafoaina ai e Iesu Keriso le lagi ma le lalolagi ma mea uma i luga o le fogaeleele. Na foafoaina e le Tama Faalelagi ia Atamu ma Eva i Lona lava faatusa, ma mafai ai e Ana fanau ona fananau mai i lenei lalolagi.

Vaaiga aoao i autu: Foafoaga

Taiala fesootai mo le suesueina o le talalelei: Fuafuaga o le Faaolataga, Muai Olaga, Iesu Keriso, Pau o Atamu ma Eva, Olaga Faitino

Vaega 1

Na Foafoaina e Iesu Keriso le Lalolagi i lalo o le Taitaiga a le Tama Faalelagi

I le fono i le muai olaga i le lagi, sa tautino mai ai e le Atua le Tama Lana fuafuaga e saunia se lalolagi e mafai ai e Ana fanau ona oo i le olaga faitino (tagai Aperaamo 3:24–25). Ua faaalia i tusitusiga paia na faataunuuina e Iesu Keriso le Foafoaga i lalo o le taitaiga a le Atua le Tama (tagai Mose 2:1). O le Foafoaga o le lalolagi na tupu i laasaga e ono, lea ua ta’ua e tusitusiga paia o “aso” (tagai Mose 2:1–31; Kenese 1:3–31; Aperaamo 4:1–31). E lei faaalia mai e le Alii le umi o “aso” taitasi (tagai Mataupu Faavae ma Feagaiga 101:32–34). E taulai atu tusitusiga paia i le faamoemoega o le Foafoaga nai lo le i ai i le faagasologa na faaaoga e le Atua e faataunuu ai. O mea uma e uiga i le Foafoaga o loo molimau mai i lona foafoa, o Iesu Keriso (tagai Mose 6:63).

Mea e mafaufau i ai

Faitau ia tala autu faatusi paia e tolu o le foafoaga o le lalolagi: Kenese 1:1–25; Mose 2:1–25; ma le Aperaamo 4:1–25. O le a se mea e mafai ona e aoaoina e ala i le faatusatusaina o nei tala?
Faitau le Mataupu Faavae ma Feagaiga 101:32–34. O le iloaina e tele naua mea e lei faaalia mai, e faapefea ona e faaaogaina mea ua faaalia mai e uiga i le Foafoaga e faamalosia ai lou faatuatua i aso nei?

Gaoioiga mo le aoao faatasi ma isi

Tuu atu i tagata taitasi se lau pepa. Fai atu ia i latou e gagau faatolu i le ’afa ona tatala lea ina ia vaevaeina i ni vaega se valu. Tuu atu ia i latou e tusi pe tusi se ata i luga o a latou pepa le mea na tupu i aso taitasi o le Foafoaga, tasi le aso i le vaega, faanumera aso a o latou faia. I le faatafafa lona valu, tuu atu ia i latou e tusi pe tusi se ata o se mea e uiga i le Foafoaga latou te matuai faafetai ai lava (mo se faataitaiga, o latou aiga, o le vasa, manu, kiona, ma isi mea faapena).

Aoao atili

Kolose 1:9–17; Mataupu Faavae ma Feagaiga 76:22–24; Mose 1:27–39
Russell M. Nelson, “O Le Foafoaga,” Liahona, Iulai 2000, 102–104
Bruce R. McConkie, “Christ and the Creation,” Ensign, June 1982, 9–15
Thomas R. Valletta, “O Le Umi o le Foafoaga,” Liahona, Mat. 1998, ChurchofJesusChrist.org
Alicia K. Stanton, “Saienisi ma La Tatou Sailiga mo le Upumoni,” Liahona, Iulai 2016, 54–57
“We Lived with God” (vitio), ChurchofJesusChrist.org

Vaega 2

O Le Foafoaga Silisili o Tagata Uma

O Atamu ma Eva, o le uluai tane ma le fafine i le lalolagi, na foafoaina e le Atua ma tuuina atu i ai tino e foliga i ai o tatou matua faalelagi (tagai Kenese 1:27). Sa tuufaatasia Atamu ma Eva i le faaipoipoga ina ua faamanuiaina i laua e le Alii (tagai Mose 2:27–28). Ua faaalia mai e le Mataupu Faavae ma Feagaiga e faapea o se tasi o faamoemoega paia o le lalolagi e fesootai i le fuafuaga a le Atua mo Ana fanau ia auai i le faaipoipoga ma le aiga (tagai i le Mataupu Faavae ma Feagaiga 49:15–17). Ona o le Foafoaga, ua mafai ai e fanau agaga a le Atua ona maua ni tino faaletino ma oo ai i le olaga faitino.

Mea e mafaufau i ai

Faitau le Kenese 1:27; Roma 8:16–17; Eperu 12:9; Mataupu Faavae ma Feagaiga 20:17–18; Mose 2:26–27; 6:8–9. O le a se eseesega e mafai ona faia i le iloa o tatou o fanau a le Atua? E mafai foi ona e faitauina le Eteru 3:6–16; Mataupu Faavae ma Feagaiga 110:1–4; 130:22.
Faitau le parakalafa lea mai le “O Le Aiga: O Se Folafolaga i le Lalolagi”: “O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava. Matou te ta’utino atu o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina. Matou te toe ta’utino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.” E mafai faapefea e le iloaina o le faamoemoega paia o le Foafoaga ona fesoasoani ia te oe e malamalama ai pe aisea ua i ai i le Atua tulafono e pulea ai le mana o le foafoaga?

Gaoioiga mo le aoao faatasi ma isi

Matamata le vitio “God’s Greatest Creation” (2:51). Talanoaina nisi o faamaoniga na foafoaina i tatou i le faatusa o le Atua.

Aoao atili

Russell M. Nelson, “O Filifiliga mo le Faavavau,” Liahona, Nov. 2013, 106–9
The First Presidency (1909), “The Origin of Man,” Ensign, Feb. 2002, 26, 29.
O Autu o le Talafaasolopito o le Ekalesia, “Organic Evolution,” Gospel Library

Vaega 3

O Le Lalolagi o se Meaalofa, ma o i Tatou o Tausimea

Na tuuina atu e le Atua ia Atamu le “pule” i luga o meaola o le lalolagi (Mose 2:28; 5:1). I faaaliga i ona po nei, na fetalai mai ai le Alii e faapea “o mea uma e maua mai i le lalolagi” e “mo le manuia ma le faaaogaina e tagata” (Mataupu Faavae ma Feagaiga 59:18). Ae na fetalai mai le Alii e tatau ona faaaoga punaoa o le lalolagi “ma le faautauta, ae ia le sili atu, pe i le faamalosia” (Mataupu Faavae ma Feagaiga 59:20).

Na aoao mai Bishop Gerald Causse: “O le meaalofa faalelagi o le Foafoaga e le oo mai e aunoa ma ni matafaioi ma tiutetauave. O nei matafaioi e sili ona faamatalaina i le manatu faavae o le tausimea. I faaupuga faaletalalelei, o le upu tausimea e faama’oti mai ai se tiutetauave paia faaleagaga pe faaletino e tausia se mea e ō le Atua lea tatou te tali atu ai.”¹

Mea e mafaufau i ai

Faitau le Mataupu Faavae ma Feagaiga 59:16–20 ma fai se lisi o mafuaaga na tuuina mai ai e le Alii ia i tatou le lalolagi ma mea uma o i ai. Mafaufau po o a vaega o foafoaga a le Alii ua aumaia ia te oe le olioli.
Na ta’u atu e le Alii ia Iosefa Samita e faapea, o tagata uma e “tali atu mo i latou lava, o se tausimea i luga o faamanuiaga faalelalolagi, ia ua Ou faia ma saunia mo a’u meaola” (Mataupu Faavae ma Feagaiga 104:13). E mafai faapefea ona avea oe ma se tausimea lelei po o se tausimea o foafoaga a le Atua? O le a sou manatu o le a le uiga o le fetalaiga a le Alii i le lapataiga e faaaoga nei mea “ma le faautauta, ae ia le sili atu, pe i le faamalosi”? (Mataupu Faavae ma Feagaiga 59:20).

Gaoioiga mo le aoao faatasi ma isi

Alu mo se savaliga i talaane o lou fale. Vaavaai mo mea i le natura e matagofie pe e aumaia ia te oe le fiafia. Aisea e te manatu ai na faia e le Atua ia matagofie le lalolagi?

Aoao atili

Mataupu Faavae ma Feagaiga 49:19–21; 59:15–21; 104:13–15
Gérald Caussé, “O La Tatou Tausiga Faalelalolagi,” Liahona, Nov. 2022, 57
Autu ma Fesili, “Environmental Stewardship and Conservation,” Gospel Library

O Isi Punaoa e uiga i le Foafoaga