Olaga Faitino

O lau mafuaaga mo le avea ai

O le tele o taimi, e pisi ai le olaga ma tatou te le mafaufau moni lava pe i ai se faamoemoega maoae i mea uma. O loo tatou taumafai e ola i se isi aso. Ae e foliga mai o loo i ai se mea i totonu o i tatou e moomoo ia iloa “Aisea ua ou i ai iinei?” po o le “O le a le faamoemoega o le olaga?”

Ua tautino mai ma le mautinoa e le talalelei toefuataiina a Iesu Keriso e i ai se faamoemoega o lou olaga, ma e mafai ona e iloaina. I se faaupuga faigofie, ua e i ai iinei aua na tuuina atu e lou Tama oi le Lagi ia te oe lena avanoa, ma sa e taliaina ma le fiafia. O lou faamoemoega i lenei olaga o le tuputupu ae, aoao e uiga i le Atua, avea atili e faapei o Ia, ma maua le ola e faavavau faatasi ma Ia i se aso. O lou malamalama i nei upumoni e mafai ona i ai se faatosinaga mamana i le auala e te vaai ai i faamanuiaga ma tofotofoga o le olaga, faanoanoaga ma oliolisaga.

O Le a Le Olaga Faitino?

O le olaga faitino o le vaitau lea i le va o le fanau mai ma le oti. O filifiliga tatou te faia i le olaga faaletino—aemaise lava le filifiliga e mulimuli ia Iesu Keriso—e fuafua ai lo tatou taunuuga e faavavau.

Vaaiga aoao i autu: Olaga Faitino

Taiala fesootai mo le suesueina o le talalelei: Fuafuaga o le Faaolataga, Muai Olaga, Ola i le Talalelei a Iesu Keriso

Vaega 1

O Se Avanoa e Maua ai se Tino Faaletino

Ata

tina ma le tama o loo siiina se tamaitiiti

E faigata ona vaai faalemafaufau i le olaga e aunoa ma o tatou tino—o le tele o mea tatou te iloa ma aafiaga e oo mai e ala i o tatou sane faaletino. Ae ua i ai ni vaega sili atu e uiga ia te oe nai lo lou tino. E i ai sou agaga na i ai ae e te lei taitai fanau mai. O le Atua, le Tama o lou agaga, na tuuina atu ia te oe lenei tino faaletino o se meaalofa e fesoasoani ia te oe e iloa ai le olaga faaletino ma tuputupu ae ai ia avea atili e faapei o Ia. O le mauaina o se tino faaletino ma le mauaina o le olaga faitino i le lalolagi o se vaega autu lea o Lana fuafuaga mo lou fiafia e faavavau.

Mea e mafaufau i ai

O le a le mea e finagalo le Atua ia tatou malamalama i ai e uiga i o tatou tino? Mafaufau loloto i lenei mea a o e faitauina le Kenese 1:26–27; Mose 2:27; ma le 1 Korinito 6:19–20. E faapefea ona ese le silasila a le Atua i lou tino faaletino mai savali e te vaaia ma faalogo i ai i le lalolagi? E mafai faapefea e le vaai atu i lou tino e pei ona Ia faia ona aafia ai filifiliga e te faia e uiga i lou tino?
Mafaufau e matamata le vitio “God’s Greatest Creation” (2:51) po o le faitauina o le tusiga a Peresitene Russell M. Nelson “Your Body: A Magnificent Gift to Cherish.”¹ Tusifaamaumau ou lagona e uiga i le meaalofa o lou tino. O le a se mea ua musuia oe e fai e faaali atu ai lou lotofaafetai mo lenei meaalofa?

Gaoioiga mo le aoao faatasi ma isi

Mo Le Malosi o le Autalavou: O Se Taiala mo le Faia o Filifiliga ua i ai se vaega ua faaautuina “E Paia Lou Tino” (itulau 22–29). Atonu e mafai ona outou faitauina faatasi ma taofi i nisi taimi e fai atu se fesili e pei o le “O le a le uiga o lenei mea ia te oe?” po o le “O le a faapefea e nei mataupu faavae ona tosina ai filifiliga tatou te faia e uiga i o tatou tino?”

Aoao atili

Mataupu Faavae ma Feagaiga 88:15; 93:33–35
Russell M. Nelson, “O Filifiliga mo le Faavavau,” Liahona, Nov. 2013, 106–9
Dieter F. Uchtdorf, “O Lau Malaga Matagofie i le Aiga,” Liahona, Me 2013, 125–29
Aoaoga a Peresitene o le Ekalesia: Iosefa Samita (2007), 197–98

Vaega 2

O Se Taimi e Saunia ai ma Faamaonia i Tatou Lava

Afai na e alu i le aoga, atonu la ua e iloa pe faape’i le faia o se suega puupuu po o se suega. O se suega e te maua ai se avanoa e faaali atu ai mea ua e aoaoina ina ia mafai ai ona e alualu i luma i le isi vasega po o le kosi ma aoao atili ai.

O le olaga, i nisi o auala, e pei lava o se suega po o se suega puupuu. O o tatou aafiaga—ma lo tatou tali atu i na aafiaga—tatou te maua ai se avanoa e faaali atu ai “pe afai [tatou] te faia mea uma o soo se mea e poloaiina ai … e le Alii” (Aperaamo 3:25). Ae e ese mai i le tele o suega a le aoga, o le suega o le olaga e le na o se taimi e iloiloina ai; o se faagasologa foi o le avea ai. Ona o le Togiola a Iesu Keriso, e mafai ai ona e faasa’oina mea sese e ala i le salamo ma faasolosolo ai ina avea atili e faapei o le Atua. Afai tatou te faaaogaina o tatou taimi i le lalolagi e liliu atu ai ia Keriso ma maua Lana talalelei, e mafai ona Ia faaaogaina o tatou aafiaga i le olaga faitino—e aofia ai aafiaga tiga, ma faanoanoa—e saunia ai i tatou mo le faavavau (tagai Roma 8:28).

Mea e mafaufau i ai

Afai e fesili atu se tasi ia te oe “O le a le faamoemoega o le olaga?” o le a sau tala e fai atu? Mafaufau pe mafai faapefea e nei fuaitau o mau ona faailoa atu lau tali: Alema 12:24; 34:31–37; Mataupu Faavae ma Feagaiga 84:43–48. E faapefea ona e “sauni e feiloai ma le Atua”?
Sa saunoa Peresitene Russell M. Nelson, “O lenei olaga o le taimi moni lea e te filifili ai po o le a le ituaiga olaga e te manao e ola ai e faavavau.”² Fesili ifo ia te oe lava, “O le a le ituaiga olaga ou te manao e ola ai e faavavau? O a filifiliga o loo ou faia o le a taitai atu ai i lena sini? E i ai ni fetuunaiga e tatau ona ou faia? E mafai faapefea ona ou maua le mana o le Faaola e fesoasoani ai ia te au e faia na suiga?”

Gaoioiga mo le aoao faatasi ma isi

I le vitio “The Challenge to Become,”³ Ua faasoa mai ai e Peresitene Dallin H. Oaks se faataoto e uiga i se tamā mauoa. O lenei faataoto e mafai ona uunaia ai se talanoaga e uiga i faamoemoega o lo tatou Tama Faalelagi mo i tatou i le olaga faitino. E mafai ona e talanoa e uiga i auala e ono fesoasoani ai matua i a latou fanau e saunia mo lo latou lumanai. O faapefea ona saunia oe e le Tama Faalelagi mo faamanuiaga e faavavau i le lumanai e finagalo o Ia e avatu ia te oe? Atonu e mafai ona e faasoa atu i le tasi ma le isi nisi o aafiaga ma filifiliga o loo fesoasoani ia te oe e saunia ai mo le ola e faavavau.

Aoao atili

Roma 5:3–5; 1 Peteru 1:6–7; Mataupu Faavae ma Feagaiga 121:7–8; 122:5–7
David A. Bednar, “O le a Tatou Tofotofoina ai i Latou,” Liahona, Nov. 2020, 8-11

Vaega 3

O Se Auala e Maua ai le Olioli ia Iesu Keriso

Ata

Iesu Keriso

Na aoteleina e le perofeta o Liae le faamoemoega o le olaga i se fuaiupu puupuu se tasi: “Ua i ai tagata, ina ia latou maua le olioli” (2 Nifae 2:25). Ae e oo lava ia Liae sa lei faigofie lona olaga. Sa ia te ia ituaiga uma o popolega ma faanoanoaga—sa tatau ona ia sola ese mai lona fale e laveai lona ola, ma sa fouvale ona atalii e toalua e faasaga ia te ia. E uiga i le faamatalaga a Liae i le faamoemoega o le olaga, na saunoa ai Peresitene Nelson: “Vaai faalemafaufau! Mai upu uma na mafai ona faaaogaina e [Liae] e faamatala ai le natura ma le faamoemoega o o tatou olaga iinei i le faaletino, sa ia filifilia le upu olioli!”⁴ E oo lava i tofotofoga ma galuega faigata uma e aofia ai i le olaga faitino, e le tatau lava ona galo ia i tatou o mea e finagalo moni i ai lo tatou Tama, i le iuga, e mo i tatou ia maua le olioli o loo ia te Ia.

Mea e mafaufau i ai

I taimi e le lagonaina faapitoa ai le olioli—ma e tofu i tatou uma ma na taimi—o se mau e pei o le Eperu 4:14–16 e mafai ona fesoasoani. O le a se mea e te aoaoina e uiga i le Faaola mai nei fuaiupu? O le a le mea e agavaa ai o Ia e ofo atu le “fesoasoani i taimi e manaomia ai”?

Gaoioiga mo le aoao faatasi ma isi

Suesue faatasi mea na aoao mai e Peresitene Nelson e uiga i le auala e maua ai le olioli i le “Olioli ma le Ola ai Faaleagaga.”⁵ Atonu e mafai ona e faasoa atu i le tasi ma le isi le auala ua e maua ai le olioli ia Keriso, e oo lava i taimi faigata.

Aoao atili

Mataupu Faavae ma Feagaiga 101:36–38; Mose 5:10–12
D. Todd Christofferson, “O Le Olioli o le Au Paia,” Liahona, Nov. 2019, 15–18