Aiga

Vaaiga Aoao

I le avea ai o ni atalii ma afafine o ni matua faalelagi, o i tatou uma o ni tagata o le aiga o le Atua. O lo tatou aiga faalelagi ua tuuina mai ai le faataitaiga mo o tatou aiga i le lalolagi.

Ua fuafuaina e le Atua le aiga e avea ma iunite autu o le Ekalesia ma o le lalolagi. E pei ona faaaogaina i tusitusiga paia, o se aiga e i ai se tane ma se avā, fanau, ma o nisi taimi o isi tagata o aiga e nonofo ai i le fale e tasi po o lalo o le taitai e tasi o le aiga. O se aiga e mafai foi ona i ai se tagata toatasi e nofo na’o ia, o se matua e toatasi ma le fanau, po o se tane ma le avā ae leai se fanau.

Na aoao mai Peresitene Boyd K. Packer, “O le faamoemoega tupito lava o aoaoga uma, gaoioiga uma i le Ekalesia o le, fiafia o matua ma a latou fanau i le aiga, faamauina i se faaipoipoga e faavavau, ma faafesootaiina i o latou augatupulaga” (“O le Tamā ma le Aiga,” Ensign po o le Liahona, Me 1994). O faiā faaleaiga e alu lava i tua atu o le tuugamau pe a faamauina i tatou e ala i le perisitua a le Atua i totonu o se malumalu paia ma tumau faamaoni ai.

O le uluai alii ma le tamaitai—o Atamu ma Eva—sa o se aiga. Ina ua tutuli ese i laua i fafo o le Faatoaga o Etena, sa ai e Atamu ana meaai ma le afu o ona mata, ae o Eva, lana ava, sa galulue faatasi ma ia (tagai Mose 5:1). O mea uma na tutupu i le amataga ua tusifaamaumauina i le olaga o Atamu ma Eva ua faaalia ai lo la faifaimea faatasi (tagai Mose 5:1, 12). Ma e faapena foi, o tamā ma tina i aso nei o ni paaga tutusa i le aiga. “O le poloaiga muamua na tuu atu e le Atua ia Atamu ma Eva e faatatau i lo la’ua gafatia mo le tulaga faamatua o se tane ma se avā” (“O Le Aiga: O Se Folafolaga i le Lalolagi”). O lena poloaiga o loo tumau pea le faamalosia i le asō.

Ua faatulagaina i tatou e le Atua i ni aiga ina ia tatou oo i le fiafia ma aoao ia onosai ma ia le manatu faapito. O nei uiga e fesoasoani e avea atili ai i tatou e pei o le Atua ma saunia ai i tatou ia ola fiafia o ni aiga i le faavavau atoa.

Afai tatou te atinae o tatou aiga i mataupu faavae o le talalelei e aofia ai le faatuatua, tatalo, salamo, faamagaloga, faaaloalo, alofa, agalelei, galue, ma gaoioiga faafiafia lelei, e mafai ona avea le aiga o se nofoaga o le sulufaiga, toafilemu, ma le olioli tele.

Ua fautuaina e Peresitene Dieter F. Uchtdorf aiga: “Po o a lava ni faafitauli o loo feagai ma lou aiga, po o le a lava le mea e tatau ona e faia e foia ai, o le amataga ma le faaiuga o le vaifofo o le alofa mama, le alofa le pona o Keriso. A aunoa ma lenei alofa, e oo lava i aiga e foliga mai e atoatoa, e tauivi lava. Ae a i ai le alofa mama, e oo lava i aiga e i ai luitau sili, e manuia” (“I Le Viia ai o i Latou o Ē Laveai,” Ensign po o le Liahona, Me 2016).

Ina ia faitau atili i mea e aoao mai e le Ekalesia e uiga i le aiga, faitau le “O Le Aiga: O Se Folafolaga i le Lalolagi.”

Tusifaamaumau Ou Lagona Uunai